Psalmen
Tu pamimpin ni akka parende. Na dibahen tu Mahalat,* na diendehon marsialus-alusan. Ende ni pinoppar ni si Kora.+ Maskil* ni si Heman+ pinoppar ni si Esrahi.
88 Ale Jahowa, Debata na paluahon au,+
Jou-jou do au tu Ho tikki arian,
Jala ro do au tu jolom tikki borngin.+
3 Ai massai godang do hasusaakku,+
Jala nungnga naeng masuk au tu Kuburan.*+
4 Nungnga dos au songon halak naung masuk tu tanoman,+
Jala dang margogo be au,+
5 Dipasombu Ho do au tinggal rap dohot na mate,
Dos songon halak na dipamate na peak di kuburan,
Na so diingot Ho,
Jala na so diparrohahon Ho be.
6 Dibahen Ho do au tu lubang na massai bagas,
Tu inganan na golap, tu lombang na massai bagas.
7 Didondoni rimasmi do au,+
Jala mogap do au dibahen galumbangmu na balga i. (Sela)
8 Dibahen Ho do au gabe ditinggalhon akka donganku,+
Dibahen Ho do nasida magigi tu au.
Nungnga tarhurung au jala dang boi be malua.
9 Rambonon do matakku alani sitaonokku.+
Ale Jahowa, jou-jou do au tu Ho ganup ari,+
Huangkat do tanganku lao martangiang.
10 Bahenonmu dope haroa ulaonmu na palongang roha tu halak naung mate?
Boi dope haroa halak naung mate hehe lao mamuji Ho?+ (Sela)
11 Boi dope haroa dipaboa taringot holong ni rohami* di kuburan?
Boi dope haroa dipaboa taringot pambahenanmu na sittong i di inganan hamagoan?*
12 Boi dope huroha diboto akka ulaonmu na balga i di inganan na holom?
Boi dope huroha diboto hatigoranmi di luat ni halak naung dilupahon?+
13 Hape molo au, jou-jou dope au tu Ho mangido asa diurupi ale Jahowa,+
Ganup manogot martangiang do au tu Ho.+
14 Boasa ma ditadikkon Ho au ale Jahowa?+
Boasa ma dipadao Ho bohim sian au?+
15 Sian mulai gelleng au,
Nungnga marsitaonon au jala nungnga naeng mate.+
Dipasombu Ho do huhilala godang sitaonon jala nungnga tung gale au.
16 Tarrimas do Ho tu au,+
Jala nungnga hancur au, ai dibahen Ho do au mabiar.
17 Ganup ari ro do i makkaliangi au dos songon aek,
Marroan ma i sian sude inganan.
18 Dibahen Ho do au ditinggalhon donganku dohot ale-alekku,+
Inganan na holom i nama na gabe ale-alekku.