4 Musa
16 Marpungu ma si Kora,+ rap dohot si Datan, si Abiram, dohot si On. Si Kora, i ma anak ni si Ishar,+ anak ni si Kohat,+ anak ni si Lepi.+ Si Datan dohot si Abiram, i ma anak ni si Eliab.+ Jala si On anak ni si Pelet. Pinoppar ni si Ruben+ do si Datan, si Abiram, dohot si On. 2 Marsada ma nasida mangalo si Musa. Marsada ma nasida rap dohot 250 halak Israel, i ma akka pamimpin ni bangso i, na dipillit sian tonga-tonga ni nasida, jala akka halak na sangap. 3 Marpungu ma nasida sude mangalo+ si Musa dohot si Aron. Didok nasida ma, “Paso ma na binahenmuna i! Badia do bangso on,+ jala didongani Jahowa do nasida.+ Boasa ma pola dibahen hamu untimbo dirimuna sian bangso ni Jahowa?”
4 Dung dibege si Musa i, marsinggang ma ibana. 5 Dung i didok ibana ma tu si Kora dohot tu akka na mangihutton ibana, “Manogot, paboaon ni Jahowa ma ise do na gabe appunana,+ ise na badia, ise na ikkon jonok tu Ibana,+ jala ise pillitonna+ na boi jonok tu Ibana. 6 Alani i, ho Kora dohot na mangihutton ho,+ ulahon hamu ma on: Buat hamu ma inganan ni gara ni api,+ 7 jala bahen ma gara ni api tusi. Marsogot, tutung ma dupa di jolo ni Jahowa. Manang ise na dipillit Jahowa,+ ibana ma na badia. Ai nungnga malobihu pambahenanmuna, hamu akka pinoppar ni si Lepi!”+
8 Didok si Musa ma tu si Kora, “Hamu akka pinoppar ni si Lepi, tangihon hamu ma. 9 Ai didok rohamuna, hurang dope on di hamu? Sian sude halak Israel on, nungnga dipapulik Debata ni Israel hamu.+ Diloas do hamu jonok tu Ibana lao marhobas di tabernakel ni Jahowa. Jala dibahen do hamu jongjong di jolo ni bangso on lao marhobas di nasida.+ 10 Diboan Ibana do hamu asa jonok tu Ibana rap dohot akka haha anggimuna pinoppar ni si Lepi. Hurang dope i di hamu? Ninna rohamu, na ikkon hamu do na gabe malim?+ 11 Alani i, na mangalo Jahowa do ho dohot akka na mangihutton ho. Ai ise huroha si Aron i, umbahen na marungut-ungut hamu tu ibana?”+
12 Dung i, disuru si Musa ma halak manjou si Datan dohot si Abiram+ anak ni si Eliab i. Alai didok nasida do, “Dang olo hami ro! 13 Nungnga diboan ho hami kaluar sian luat na godang susu dohot madu lao pamatehon hami di gurun on.+ Hurang dope i di ho? Saonari naeng gabe pamimpin ma ho di hami?* 14 Nimmu naeng boanonmu do hami tu luat na godang susu dohot madu,+ jala naeng lehononmu do di hami ladang dohot porlak anggur gabe parbagianannami. Dia ma luat i? Maksudmu, ihuttonon ni akka jolma on ma ho songon halak na mapitung?* Dang olo hami ro!”
15 Gabe muruk situtu ma si Musa. Didok ibana ma tu Jahowa, “Unang ma olo Ho mangida pelean sipanganon* ni nasida. Dang hea hubuat nanggo sada pe halode ni nasida. Jala dang hea hubahen na jahat tu nasida.”+
16 Didok si Musa ma tu si Kora, “Marsogot, ikkon ro do hamu sude tu jolo ni Jahowa. Ikkon ro do ho, akka na mangihutton ho, dohot si Aron. 17 Ganup halak ikkon mamboan inganan ni gara ni apina be. Jala dibahen ma dupa tusi. Boan ma i tu jolo ni Jahowa, 250 ma sude inganan ni gara ni api i. Ro ma hamu sude rap dohot si Aron, boan hamu ma inganan ni gara ni apimuna be.” 18 Ro ma nasida, jala sude do nasida mamboan inganan ni gara ni apina be. Dibahen nasida ma api dohot dupa tusi. Ro ma nasida tu jolo ni pintu kemah parpunguan jala jongjong ma nasida rap dohot si Musa dohot si Aron. 19 Tikki disuru si Kora marpungu akka na mangihutton ibana i+ di jolo ni pintu kemah parpunguan, diida bangso i ma marsinondang hamuliaon ni Jahowa.+
20 Didok Jahowa ma tu si Musa dohot tu si Aron, 21 “Papulik hamu ma dirimuna sian punguan i, asa pittor hupamate nasida di bagasan satokkin.”+ 22 Dung i marsinggang ma si Musa dohot si Aron, ninna ma, “Ale Tuhan, Debata na mangalehon ngolu tu sude jolma.+ Naeng hukumonmu do sude bangso on alani dosa ni sahalak?”+
23 Didok Jahowa ma tu si Musa, 24 “Dok ma tu bangso i, ‘Padao hamu ma dirimuna sian sakaliling ni kemah ni si Kora, si Datan, dohot si Abiram!’”+
25 Dung i lao ma si Musa rap dohot akka pangituai*+ ni Israel mandapotton si Datan dohot si Abiram. 26 Didok si Musa ma tu bangso i, “Padao hamu ma dirimuna sian kemah ni halak na jahat on. Jala unang jama hamu akka appuna ni nasida, asa unang dohot hamu mate alani dosa ni nasida.” 27 Pittor lao ma nasida mandao sian sakaliling ni kemah ni si Kora, si Datan, dohot si Abiram. Kaluar ma si Datan dohot si Abiram jala jongjong di pintu kemah ni nasida be, rap dohot istri ni nasida, anakkonna, dohot poso-poso ni nasida.
28 Didok si Musa ma, “Marhite na masa on, botoonmuna ma na sinuru ni Jahowa do au mangulahon on jala dang na lomo-lomokku mambahen on:* 29 Molo sarupa do parmate ni halak on songon parmate ni halak na asing, jala sarupa hukuman na dijalo nasida songon na dijalo sude jolma, i patuduhon dang tutu au disuru Jahowa.+ 30 Alai molo dibahen Jahowa do tu nasida na so hea masa, jala molo mabola* tano on mamboddut nasida dohot sude appuna ni nasida, jala mangolu nasida masuk tu Kuburan* i, botoonmuna ma akka halak na mangaleai Jahowa do nasida.”
31 Dung sae si Musa makkatai, pittor mabola+ ma tano inganan ni nasida jongjong. 32 Bola dua ma tano i, diboddut ma nasida, keluarga ni nasida, dohot sude na mangihutton si Kora+ rap dohot sude na adong di nasida. 33 Jala mangolu do nasida masuk tu Kuburan* i rap dohot sude halak na mangihutton nasida. Tartutup ma muse tano i manutupi nasida. Songon i ma nasida dipamate sian tonga-tonga ni bangso i.+ 34 Marlarian ma sude halak Israel na adong di sakaliling ni nasida, jala na mambege angguk-angguk ni nasida. Didok nasida ma, “Mabiar do hami, sotung dohot hami diboddut tano i!” 35 Dung i ro ma api sian Jahowa.+ Ditutung ma na 250 halak na mamelehon dupa i.+
36 Didok Jahowa ma tu si Musa, 37 “Paboa ma tu si Eleasar anak ni Malim Aron i, asa dibuat sude inganan ni gara ni api i+ sian api i. Ai badia do i sude. Paboa ma tu ibana muse asa dao dipasserakkon ibana apina.* 38 Inganan ni gara ni api ni halak na mate alani dosa ni nasida i, ikkon dibahen do gabe lempengan na tipis lao mangalappis langgatan.+ Ai nungnga dipelehon nasida i tu jolo ni Jahowa, jadi badia do i. Ikkon gabe tanda ma i tu sude halak Israel.”+ 39 Dipapungu Malim Eleasar ma akka inganan ni gara ni api na sian tombaga na dipelehon ni akka halak naung ditutung i. Ditopa ibana ma i lao gabe lapis ni langgatan. 40 Diulahon ibana ma i dos songon na diparettahon Jahowa marhite si Musa. Gabe parningotan ma i di halak Israel, na so boi halak na asing* na so sian pinoppar ni si Aron ro tu labbung ni Jahowa manutung dupa di jolona.+ Jala asa unang adong be na songon si Kora dohot sude na mangihutton ibana.+
41 Marsogotna i, ro ma sude halak Israel marungut-ungut tu si Musa dohot tu si Aron.+ Didok nasida ma, “Nungnga mate be bangso ni Jahowa dibahen hamu na dua.” 42 Tikki marpungu bangso i mangalo si Musa dohot si Aron, diida nasida ma doppak kemah parpunguan i. Diida nasida ma ditutupi ombun kemah i. Jala diida nasida ma marsinondang hamuliaon ni Jahowa.+
43 Ro ma si Musa dohot si Aron tu jolo ni kemah parpunguan.+ 44 Didok Jahowa ma tu si Musa, 45 “Papulik hamu ma dirimuna sian bangso i, asa pittor hupamate nasida di bagasan satokkin.”+ Gabe marsinggang ma nasida.+ 46 Dung i, didok si Musa ma tu si Aron, “Buat ma inganan ni gara ni api jala bahen ma gara na sian langgatan+ tusi, tutung ma dupa. Hatop ma ho lao tu bangso i, jala pangido ma tu Debata asa disesa dosa ni bangso i.+ Ai nungnga muruk situtu Jahowa. Jala nungnga ro be jea tu bangso on!” 47 Pittor dibuat si Aron ma i songon na didok si Musa. Marlojong ma ibana tu tonga-tonga ni bangso i, hape nungnga sahat jea i tu nasida. Dibahen ibana ma dupa tu atas ni inganan ni gara i, jala dipangido ibana ma tu Debata asa disesa dosa ni bangso i. 48 Torus ma ibana jongjong di holang-kolang ni halak naung mate dohot na mangolu i. Dung i so ma jea i. 49 Jadi 14.700 halak ma na mate alani jea i, asing ni na mate alani si Kora. 50 Tikki mulak muse si Aron mandapotton si Musa tu pintu ni kemah parpunguan i, nungnga so be jea i.