Psalmen
Sian si Daud.
3 Tiop ma tombakmu* dohot kampakmu lao mangalo akka halak na mangalele au.+
Dokkon ma tu au, “Au do paluahon ho.”+
4 Sai dipaila jala marlea ma akka halak na naeng pamatehon au,+
Sai dipaila jala lari ma akka halak na marsakkap mambahen au marjea.
5 Sai anggiat ma gabe songon lapung ni eme* na dihabangkon alogo nasida,
Sai anggiat ma dipalao suru-suruan ni Jahowa nasida.+
6 Tikki dilele suru-suruan ni Jahowa nasida,
Sai anggiat ma gabe golap jala landit dalan ni nasida.
7 Ai dibahen nasida do jaring lao manjorat au, hape so adong salakku,
Digali nasida do lubang asa madabu au tusi, hape so adong salakku.
8 Sai anggiat ma toppu masa jea tu nasida,
Sai anggiat ma tarjorat nasida alani jorat ni nasida sandiri,
Sai anggiat ma madabu nasida tusi, dung i laos mate.+
9 Alai marlas ni roha ma au alani Jahowa,
Marlas ni roha ma au ala dipalua Ibana do au.
10 Dohonokku ma sian nasa rohakku,
“Ale Jahowa, ise ma na songon Ho?
Dipalua Ho do halak na gale sian halak na gogo,+
Dipalua Ho do halak na dangol dohot halak na pogos sian halak na mangarampok nasida.”+
11 Ro ma akka saksi na jahat mangalo au,+
Didok nasida ma au mangulahon akka hajahaton na so hea huulahon.
12 Dibahen nasida do na jahat tu au balos ni akka na denggan na hubahen,+
Gabe mandele ma au.
13 Hape tikki marsahit nasida, marabit goni do au.
Marpuasa do au lao patutoru dirikku.
Tikki dang dialusi tangiakku,
14 Mardalan do au tusan tuson alani lungun ni rohakku, songon na matean ale-ale manang haha anggi.
Marsinggang do au alani arsak ni rohakku, songon na matean ina.
15 Alai tikki tartuktuk au, marlas ni roha do nasida jala marpungu,
Sahata do nasida asa sipsip ro mangalo au,
Jala torus do nasida mandok hata na so tutu taringot au.
17 Ale Jahowa, sadia leleng nai paida-idaonmu au songon on?+
Palua ma au sian akka halak na naeng mangaroro au,+
Palua ma ngolukku na arga on sian akka singa.+
18 Dung i, mandok mauliate ma au tu Ho di tonga-tonga ni punguan na bolon on,+
Pujiokku ma Ho di tonga-tonga ni godang halak.
19 Unang ma loas diparekkeli musukku au, ai sogo do roha ni nasida tu au hape so adong salakku.
Unang ma pasombu au direhei akka halak na marsogo ni roha tu au,+ hape so adong salakku.+
20 Ai dang lomo roha ni nasida mardame tu manang ise pe,
Gariada marsakkap do nasida mambahen na jahat tu halak na dame ngoluna.+
21 Dipatalak nasida do baba ni nasida lao mangalo au,
Didok nasida do, “Anggo ho, habis nama ho! Ai nungnga huboto hami be.”
22 Ale Jahowa, takkas do i diida Ho, unang ma sai sip Ho.+
Ale Jahowa, unang ma mandao Ho sian au.+
23 Ale Jahowa Debatakku, ro ma Ho mangurupi au,
Bahen ma na tigor tu au.
24 Ale Jahowa Debatakku, na tigor do Ho, alani i bahen ma na tigor tu au.+
Unang ma pasombu au diparekkeli nasida.
25 Unang ma loas nasida mandok, “Nungnga saut be sakkapnami.”
Unang ma loas nasida mandok, “Nungnga hancur be ibana hubahen hami.”+
26 Anggiat ma dipaila akka halak na mamarekkeli au tikki susa,
Anggiat ma gabe marlea nasida,
Anggiat ma maila jala marlea akka halak na sai mandok dumenggan nasida sian au.
27 Sai anggiat ma marlas ni roha akka halak na lomo rohana mangida au mangulahon na sittong,
Sai anggiat ma toktong didok nasida,
“Sai dipasangap ma Jahowa, ai lomo do rohana dame ngolu ni naposona.”+