2 MUSA

1 Tikki borhat si Jakkob manang si Israel tu Mesir, diboan ibana do akka anakna dohot keluargana. Goar ni akka anakna i ma:+ 2 si Ruben, si Simeon, si Lepi, si Juda,+ 3 si Isasar, si Zebulon, si Benjamin, 4 si Dan, si Naptali, si Gad, dohot si Aser.+ 5 Adong do 70 halak pinoppar* ni si Jakkob. Alai nungnga di Mesir hian si Josep.+ 6 Ujungna, mate ma si Josep,+ sude haha anggina, dohot sude halak na mangolu sajaman* dohot ibana. 7 Lam godang ma pinoppar ni halak Israel jala torus ma nasida martamba-tamba godangna. Hatop do nasida godang jala gogo, sappe digohi nasida do sude luat i.+

8 Di pudian ni ari, mamaretta ma sahalak raja di Mesir na so mananda si Josep. 9 Didok ibana ma tu rakyatna, “Nungnga unggodang be halak Israel i sian hita, jala umgogo do nasida sian hita.+ 10 Talului ma cara asa unang lam godang be nasida. Molo dang tabahen songon i, tikki masa porang gabe mardongan ma nasida tu musutta, aloonna ma hita, dung i ditinggalhon nasida ma luat on.”

11 Dipillit halak Mesir ma akka pengawas* ni hatoban. Dipaksa nasida ma halak Israel mangulahon karejo na borat.+ Disuru ma halak Israel i mambangun kota Pitom dohot Ramses,+ i ma akka kota inganan panippanan ni arta ni si Firaun. 12 Alai, nang pe lam porsuk dibahen halak Mesir tu halak Israel, gabe lam godang do nasida, jala lam marserak di luat i. Alani i, gabe mabiar situtu ma halak Mesir i jala lam sogo ma rohana mangida halak Israel.+ 13 Gabe lam kejam ma halak Mesir i, jala dipaksa nasida ma halak Israel karejo gabe hatoban ni nasida.+ 14 Lam porsuk ma ngolu ni halak Israel dibahen halak Mesir i. Disuru do nasida mangulahon karejo na borat, mambahen semen,* mambahen batu bata, dohot mangulahon sude ulaon ni hatoban di ladang. Massai kejam do halak Mesir i tu nasida, dipaksa do halak Israel mangulahon sude ulaon ni hatoban.+

15 Dung i, dijou raja ni Mesir ma dua bidan halak Heber, goarna si Sipra dohot si Pua. 16 Didok ma tu nasida, “Tikki diurupi hamu akka borua ni halak Heber partus,+ ida hamu ma anakna i. Molo bawa do na tubu i, pamate hamu ma. Alai molo borua do na tubu i, pasombu hamu ma mangolu.” 17 Alai mabiar do bidan na dua i tu Debata na sittong. Dang diulahon nasida na nidok ni raja Mesir i. Nang pe bawa na tubu, dipasombu nasida do mangolu.+ 18 Dijou raja Mesir ma muse akka bidan i. Didok ma, “Ai boasa dipasombu hamu mangolu bawa na ditubuhon halak Heber i?” 19 Dialusi bidan i ma, “Gogo do borua ni halak Heber i, dang songon borua ni halak Mesir. Andorang so ro dope bidan, nungnga tubu poso-poso ni nasida.”

20 Alani i, dipasu-pasu Debata ma akka bidan i. Lam godang ma halak Israel i jala massai gogo. 21 Ala mabiar do akka bidan i tu Debata na sittong, dibahen Ibana ma nasida boi marianakkon. 22 Ujungna, didok si Firaun ma tu rakyatna, “Bolokkon hamu ma sude poso-poso bawa ni halak Heber tu Sunge Nil. Alai molo borua do poso-poso i, pasombu ma mangolu.”+

2 Di tikki i, adong ma sahalak bawa na sian marga Lepi mangoli tu borua marga Lepi.+ 2 Hamil ma ibana, jala tubu ma anakna, bawa do anakna i. Bagak do rupa ni poso-poso i, alani i ditabunihon ibana ma anakna i saleleng tolu bulan.+ 3 Alai, tikki dang boi be ditabunihon ibana anakna i,+ dibahen ibana ma sada karanjang* sian suan-suanan na tubu di aek.* Dilappis ibana ma karanjang i pakke aspal dohot miak ter. Dipamasuk ibana ma dakdanak i tu karanjang i. Dung i, diboan ibana ma i tu topi ni Sunge Nil, jala dipeakkon di tonga-tonga ni suan-suanan na adong disi. 4 Alai dang dao sian i, jongjong do kakak ni dakdanak i+ lao mangida poso-poso i, asa diboto ibana manang aha na masa tu dakdanak i.

5 Ro ma boru ni si Firaun naeng maridi tu Sunge Nil. Disuru ma akka pangurupina borua mardalan di jolona lao tu topi ni Sunge Nil i. Diida boru ni raja i ma adong karanjang di tonga-tonga ni suan-suanan na di topi ni sunge i. Pittor disuru ma pangurupina borua mambuat karanjang i.+ 6 Tikki dibukka ibana karanjang i, diida ibana ma tangis poso-poso i. Gabe asi ma rohana, jala ninna ma, “Anak ni halak Heber do on.” 7 Ro ma kakak ni poso-poso i jala didok ma tu boru ni si Firaun, “Ale inang, hujou ma sahalak borua sian halak Heber? Asa ibana na manusui jala na manjaga poso-poso i.” 8 Didok boru ni si Firaun ma, “Olo, jou ma.” Pittor lao ma borua i jala dijou ma omak ni poso-poso i.+ 9 Didok boru ni si Firaun ma tu omak ni poso-poso i, “Boan ma poso-poso on jala jaga ma ibana lao di au. Hugaji pe ho.” Dung i, diboan borua i ma poso-poso i jala diparorot ma ibana. 10 Dung balga dakdanak i, ditaruhon omakna i ma ibana tu boru ni si Firaun. Dibahen boru ni si Firaun ma ibana gabe anakna.+ Jala dibahen ma goarna si Musa.* Ai didok do, “Sian aek do ho hubuat.”+

11 Di sada tikki, dung lam balga* si Musa, lao ma ibana mangida akka donganna sabangso halak Heber. Diida ibana ma na massai susa nasida dibahen, ala dipaksa nasida karejo.+ Diida ibana ma muse adong halak Mesir mangattuk halak Heber. 12 Dibereng ibana ma tu sakalilingna. Dung diida ibana dang adong jolma na asing, dipamate ibana ma halak Mesir i, jala ditanom bakkena tu pasir.+

13 Marsogotna i, lao ma ibana muse jala diida ibana ma marbadai dua halak Heber. Didok ibana ma tu halak na sala i, “Ai boasa diattuk ho donganmu?”+ 14 Didok halak na sala i ma, “Ai ise na mamillit ho gabe pamimpin dohot hakim di hami? Na lao pamateonmu do au songon halak Mesir na dibunumi?”+ Gabe mabiar ma si Musa, jala didok ma di bagasan rohana, “Nungnga tarboto be hape na hubahen i!”

15 Sahat ma barita i tu si Firaun, gabe naeng dipamate ibana ma si Musa. Alai lari ma si Musa sian si Firaun, lao ma ibana tu Midian,+ jala tinggal disi ma ibana. Tikki sahat disi, hundul ma ibana di labbung ni sada sumur. 16 Adong do sahalak malim di Midian,+ pitu boruna. Tikki i, ro ma akka boruna tu sumur i lao manimba jala mangisi bak inganan panginuman ni binatang na disi, asa boi minum akka biru-biru ni bapakna. 17 Alai songon na somal, ro ma akka parmahan na asing. Diusir nasida ma akka borua i. Tikki diida si Musa na masa i, jongjong ma ibana, diurupi* ma akka borua i, jala dilehon ma minum akka biru-biru ni nasida. 18 Dung i, mulak ma nasida tu jabuna. Tarsonggot ma si Reguel*+ bapak ni nasida. Didok ma, “Songon na hatop hamu mulak sadari on!” 19 Didok akka boruna i ma, “Tikki diusir akka parmahan hami, adong sahalak bawa na sian Mesir+ mangurupi hami. Ditimba ibana do aek di hami, jala dilehon do minum akka biru-birunami.” 20 Didok bapakna i ma, “Attong, nungnga didia ibana? Boasa dang ditogihon hamu tuson? Jou ma ibana, asa rap mangan hita.” 21 Dung i, olo ma si Musa rap tinggal dohot nasida. Dilehon do boruna si Zippora+ gabe istri ni si Musa. 22 Di pudian ni ari, ditubuhon si Zippora ma sahalak bawa. Dibahen si Musa ma goarna si Gersom.*+ Ai didok si Musa do, “Nungnga gabe panoppang au di luat ni halak.”+

23 Martaon-taon dukkon i, mate ma raja ni Mesir i,+ alai toktong dope gabe hatoban halak Israel. Sai mangangguhi do nasida alani haccitna dihilala nasida gabe hatoban. Sai dipangido nasida do tu Debata na sittong asa diurupi nasida.+ 24 Di pudian ni ari, dibege Debata ma na sai mangangguki halak Israel.+ Jala diingot Debata ma muse parjanjian na dibahen Ibana tu si Abraham, tu si Isak, dohot tu si Jakkob.+ 25 Alani i, diparrohahon Debata ma halak Israel i, jala diida ibana ma naung susa nasida.

3 Gabe parmahan ni biru-biru ni si Jetro ma si Musa. Simatua ni si Musa do si Jetro,+ malim na di Midian i. Di sada tikki, diboan si Musa ma akka biru-biru i tu sabola barat ni gurun jala sahat ma ibana di Dolok Horeb,+ i ma dolok na pinillit ni Debata na sittong i. 2 Dung i, dipataridahon suru-suruan ni Jahowa ma dirina tu si Musa. Dipatudu ma dirina marhite api na marsigorgor di tonga-tonga ni ramba na marsuga.+ Sai diparrohahon si Musa ma ramba i. Diida ibana do galak ramba i, alai dang matutung. 3 Didok si Musa ma di bagasan rohana, “Luar biasa do on! Ai boasa dang matutung ramba i? Hupajonok ma jo bah, asa takkas huida.” 4 Diida Jahowa ma na lam jonok si Musa mangida ramba i, gabe dijou Debata ma ibana. Tarbege ma soarana jou-jou sian tonga-tonga ni ramba i, ninna ma, “Musa! O Musa!” Didok si Musa ma, “Aha i Tuan?” 5 Didok Debata ma, “Unang pajonok tuson. Bukka ma solopmi. Ai tano na badia do ingananmu jongjong i.”

6 Didok Debata ma muse, “Au do Debata ni akka ompum,* Debata ni si Abraham,+ Debata ni si Isak,+ dohot Debata ni si Jakkob.”+ Mambege i, ditutup si Musa ma bohina. Ai mabiar do ibana mangida Debata na sittong i. 7 Dung i, didok Jahowa ma, “Nungnga huida be songon dia susana bangsokki dibahen halak Mesir. Nungnga hubege be angguk-angguk ni nasida. Ai dipaksa do nasida karejo gabe hatoban. Takkas do huboto songon dia haccit ni sitaonon ni nasida.+ 8 Ro nama Au paluahon nasida sian tangan ni halak Mesir.+ Boanokku ma nasida kaluar sian luat i tu luat na subur jala na bidang, tu luat na godang susu dohot madu,+ tu luat ni halak Kanaan, halak Het, halak Amori, halak Perisi, halak Hevi, dohot halak Jebus.+ 9 Nungnga hubege be angguk-angguk ni halak Israel i, jala nungnga huida be songon dia kejam ni halak Mesir tu nasida.+ 10 Saonari, husuru ma ho lao mandapotton si Firaun. Boan ma halak Israel bangsokki kaluar sian Mesir.”+

11 Didok si Musa ma tu Debata na sittong, “Ise ma au huroa. Dia ma tolap au ro tu jolo ni Raja Firaun jala mamboan halak Israel kaluar sian Mesir. Ai so manang na ise au!” 12 Didok Debata ma, “Hudongani pe ho.+ Marjanji ma Au* tu ho, boanokku do bangsokki kaluar sian Mesir, jala sombaonmuna ma Debata na sittong di dolok on.+ Molo dung masa i, porsea ma ho na tutu do Au na manuru ho.”

13 Alai didok si Musa ma tu Debata na sittong i, “Molo lao ma au mandapotton halak Israel, jala hudok ma tu nasida, ‘Debata ni akka ompumuna do na manuru au mandapotton hamu.’ Aha ma alushu tu nasida, molo disukkun nasida, ‘Ise goarna?’”+ 14 Didok Debata ma tu si Musa, “Boi do Au Mambahen Manang Aha pe na Huhalomohon.”*+ Jala didok Debata ma muse, “On ma dok tu halak Israel, Debata na mandok lapatan ni goarna, ‘Boi do Au Mambahen Manang Aha pe na Huhalomohon’ do na manuru au tu hamu.”+ 15 Dung i, didok Debata ma muse tu si Musa,

“On ma dok tu halak Israel, ‘Jahowa do na manuru au mandapotton hamu. Ibana do Debata ni akka ompumuna, Debata ni si Abraham,+ Debata ni si Isak,+ dohot Debata ni si Jakkob.’+ I ma goarhu saleleng ni lelengna,+ jala marhite goar i ma tandaon ni sude jolma Au sian tikki tu tikki. 16 Saonari lao ma ho, papungu ma akka pangituai* ni halak Israel. Dok ma tu nasida, ‘Nungnga dipatudu Jahowa be dirina tu au. Ibana do Debata ni akka ompumuna, Debata ni si Abraham, Debata ni si Isak, dohot Debata ni si Jakkob. Didok Ibana do, “Nungnga huida be aha na masa tu hamu,+ jala songon dia pambahenan ni halak Mesir tu hamu. 17 Alani i, ro nama Au paluahon hamu sian tangan ni halak Mesir na mambahen hamu susa.+ Boanokku ma hamu kaluar sian luat i tu luat ni halak Kanaan, halak Het, halak Amori,+ halak Perisi, halak Hevi, dohot halak Jebus,+ i ma luat na godang susu dohot madu.”’+

18 “Pasti ditangihon nasida do ho.+ Alani i, lao ma ho rap dohot pangituai ni halak Israel. Dapotton hamu ma raja ni Mesir. Dok ma tu ibana, ‘Nungnga makkatai Jahowa Debata ni halak Heber+ tu hami. Alani i, paloas ma hami lao tu gurun saleleng tolu ari lao mangalehon pelean tu Jahowa Debatanami.’+ 19 Alai huboto do, ikkon dipaksa do raja ni Mesir i asa dipaloas ibana hamu lao.+ 20 Patuduokku ma gogokku lao mangalo halak Mesir, jala bahenokku ma akka halongangan* di Mesir. Dung i, suruonna ma hamu lao.+ 21 Bahenokku ma gabe burju halak Mesir tu hamu. Tikki lao hamu, lehonon ni nasida ma akka arta ni nasida boanonmuna.+ 22 Ganup borua ni halak Israel mangido akka barang na sian mas, perak, dohot akka baju sian tetanggana halak Mesir, dohot sian halak Mesir na tinggal di jabuna. Bahen hamu ma i dipakke akka anakmuna dohot akka borumuna. Jala buat hamu ma arta ni halak Mesir i.”+

4 Didok si Musa ma, “Alai songon dia ma molo so porsea halak Israel i tu au, jala dang ditangihon nasida hatakku?+ Ai dokkonon ni nasida ma, ‘Dang tutu dipatudu Jahowa dirina tu ho.’” 2 Dung i, didok Jahowa ma tu ibana, “Aha do na di tanganmi?” Dialusi ibana ma, “Tukkot.” 3 Didok Debata ma, “Sappatton ma tukkotmi tu tano.” Disappatton si Musa ma jala gabe ulok ma tukkotna i.+ Lari ma si Musa mandao sian ulok i. 4 Didok Jahowa ma tu si Musa, “Takkup ma ihur ni ulok i.” Dung ditakkup si Musa ihur ni ulok i, gabe tukkot ma muse ulok i. 5 Didok Debata ma muse, “Bahen ma songon i asa porsea nasida naung dipataridahon Jahowa Debata ni ompu ni nasida, Debata ni si Abraham, Debata ni si Isak, dohot Debata ni si Jakkob+ do dirina tu ho.”+

6 Didok Jahowa ma muse tu ibana, “Pamasuk ma tanganmu tu bajum.” Dipamasuk si Musa ma tanganna tu bajuna. Tikki dipakaluar si Musa tanganna sian bajuna i, gabe hona kusta* ma tanganna, bottar songon salju!+ 7 Didok Debata ma tu si Musa, “Pamasuk ma muse tanganmi tu bajum.” Dipamasuk si Musa ma muse tanganna i. Tikki dipakaluar tanganna i, malum ma tanganna songon na parjolo i! 8 Didok Debata ma, “Molo dang porsea nasida tu ho, jala dang pos dope roha ni nasida tu tanda halongangan* na parjolo, pasti porsea do nasida tu tanda halongangan na paduahon.+ 9 Alai molo dang porsea dope nasida tu tanda na paduahon, jala dang ditangihon nasida ho, buat ma aek sian Sunge Nil. Usehon ma aek i tu tano na mahiang, jala gabe mudar ma aek na binuatmu sian Sunge Nil i.”+

10 Didok si Musa ma tu Jahowa, “Sattabi ma ale Jahowa, mulai sian najolo pe sahat tu na makkatai Ho tu au, dang malo au makkatai. Ai lambat do au makkatai jala hallang do dilakku.”+ 11 Didok Jahowa ma, “Ai ise huroa na mambahen baba ni jolma? Ise huroa na boi mambahen halak bisu, nengel, boi marnida manang mapitung? Au do Jahowa na boi mambahen i. 12 Saonari lao ma ho. Huurupi pe ho lao makkatai tu ibana, jala huajari pe ho asa diboto ho aha sidohononmu.”+ 13 Alai didok si Musa ma muse, “Sattabi ma ale Jahowa, halak na asing ma suru, manang ise pe lomo ni roham.” 14 Gabe muruk ma Jahowa tu si Musa. Didok Ibana ma, “Kan adong do abangmu si Aron+ halak Lepi i? Huboto do, malo do ibana makkatai. Saonari, di pardalanan do ibana lao manjuppangi ho. Massai las do rohana annon molo diida ibana ho.+ 15 Makkatai ma ho dohot ibana. Jala paboa ma hatakki tu ibana.+ Huurupi pe hamu tikki makkatai tu si Firaun.+ Jala huajari pe hamu, asa diboto hamu aha siulahononmuna. 16 Si Aron ma na makkatai tu halak Israel, ai ibana nama na paboahon hatam tu nasida. Jala ho ma na paboahon hatakku tu ibana.*+ 17 Boan ma tukkot i. Pakke ma i lao mambahen tanda halongangan.”*+

18 Mulak ma si Musa tu jabu ni si Jetro, simatuana i.+ Didok ma, “Paloas ma jo au mulak tu Mesir lao mangida akka dongan sabangsokku, asa huida jo nasida mangolu dope manang na dang.” Didok si Jetro ma tu si Musa, “Lao ma ho di bagasan dame.” 19 Dukkon i, makkatai ma muse Jahowa tu si Musa di Midian. Didok ma tu ibana, “Mulak ma ho tu Mesir. Ai nungnga mate be sude halak na naeng mambunu ho.”+

20 Borhat ma si Musa tu Mesir. Diboan ibana do istrina dohot akka anakna. Marhalode do nasida tusi. Diboan ibana do tukkot na sinuru ni Debata lao boanonna. 21 Didok Jahowa ma tu si Musa, “Nungnga hulehon huaso tu ho lao mambahen tanda halongangan. Alani i, molo dung sahat ho di Mesir, bahen ma sude tanda halongangan i di jolo ni si Firaun.+ Alai, pasombuonku do jogal roha ni si Firaun,+ jala dang paloasonna halak Israel lao sian i.+ 22 Dokkon ma tu si Firaun, ‘Songon on do hata ni Jahowa, “Anakku do si Israel, jala anakku siakkangan do ibana.+ 23 Hudok ma tu ho, paloas ma lao anakki, asa diulahon ibana lomo ni rohakku. Molo dang dipaloas ho ibana lao, pamateonku ma anakmu siakkangan i.”’”+

24 Tikki di pardalanan, di inganan ni nasida marborngin, dipatuduhon Jahowa+ ma dirina jala naeng dibunu ma ibana.*+ 25 Ujungna dibuat si Zippora+ ma batu na tajom* jala disunat ibana ma anakna. Disappatton ibana ma kulitna* i tu patna* jala didok ma, “Marhite mudar on, Ho ma na gabe suamikku.” 26 Gabe dipalua Debata ma ibana. Ai alani sunat i, didok si Zippora do tikki i, “Marhite mudar on, Ho ma na gabe suamikku.”

27 Didok Jahowa ma tu si Aron, “Lao ma ho tu gurun manjuppangi si Musa.”+ Dung i lao ma si Aron manjuppangi si Musa di dolok na pinillit ni Debata na sittong.+ Dihaol jala diumma ibana ma si Musa. 28 Dipaboa si Musa ma sude hata ni Jahowa tu si Aron,+ dohot ma i akka tanda halongangan na ikkon sibahenonna.+ 29 Dung i lao ma si Musa dohot si Aron. Dipapungu nasida ma sude pangituai* ni halak Israel.+ 30 Makkatai ma si Aron tu nasida. Dipaboa si Aron ma sude hata ni Jahowa na tu si Musa i, jala dibahen ibana ma akka tanda halongangan.+ 31 Porsea ma nasida.+ Tikki dibege nasida na diparrohahon Jahowa halak Israel+ jala nungnga diida Debata songon dia susa ni nasida,+ pittor marsomba ma nasida.

5 Dung i, lao ma si Musa dohot si Aron manjuppangi si Firaun, jala didok ma, “Songon on ma hata ni Jahowa Debata ni halak Israel, ‘Paloas ma bangsokki lao tu gurun, asa dibahen perayaan na pasangappon Au.’” 2 Alai didok si Firaun ma, “Ai ise huroa Jahowa i?+ Boasa ikkon oloakku hatana, jala ikkon pasombuonku halak Israel lao?+ Dang hutanda ise Jahowa i. Jala dang paloasokku lao halak Israel.”+ 3 Didok nasida ma, “Nungnga makkatai Debata ni halak Heber i tu hami. Alani i, paloas ma hami lao tolu ari sian luat on, asa lao hami tu gurun* mangalehon pelean tu Jahowa Debatanami.+ Molo dang lao hami, bahenonna ma hami marsahit, jala pasombuonna ma hami dipamate dohot podang.” 4 Dialusi raja Mesir i ma nasida, didok ma, “Ho Musa, dohot ho Aron, boasa digugai hamu halak on karejo? Mulak ma hamu tu parkarejoanmuna!”+ 5 Didok si Firaun ma muse, “Ida ma, massai godang do hamu di luat on. Molo lao hamu sude, dang adong be halak na karejo.”

6 Laos di ari i, diparettahon si Firaun ma tu akka pengawas dohot tu halak Israel na gabe mandor ni nasida, 7 “Unang be lehon hamu durame tu nasida lao mambahen batu bata.+ Lok ma nasida sandiri na lao mangalului durame ni nasida. 8 Alai ikkon sarupa do godang ni batu bata na lao bahenon ni nasida ganup ari, unang orui. Ai alani malas ni nasida do umbahen na sai didok, ‘Paloas ma hami lao, asa hulehon hami pelean tu Debatanami!’ 9 Tambai ma muse karejo ni nasida, asa unang adong be tikki ni nasida mambege akka hata na so tutu.”

10 Alani i, didok akka pengawas dohot akka mandor+ ni nasida i ma tu halak Israel, “Songon on ma hata ni si Firaun, ‘Dang lehonokku be tu hamu durame. 11 Hamu sandiri ma na mangalului durame di hamu, manang na sian dia pe taho. Alai, dang boi moru godang ni batu bata na lao sibahenonmuna.’” 12 Jadi marserak ma sude halak Israel i tu sude luat di Mesir lao mangalului durame. 13 Sai dipaksa akka pengawas i ma nasida karejo, jala ninna ma, “Ikkon sarupa do godang ni batu bata na lao bahenonmuna ganup ari songon tikki diparade dope durame di hamu!” 14 Dibalbali+ akka pengawas ni si Firaun i do halak Israel na gabe mandor i. Didok ma tu nasida, “Ai boasa dang songon najolo i be godang ni batu bata na dibahen hamu? Nungnga moru godangna! Nattoari nungnga moru, saonari pe moru!”

15 Dung i mangalu-alu ma halak Israel na gabe mandor i tu si Firaun. Didok nasida ma, “Boasa ma songon i dibahen raja i tu hami hatobanmon? 16 Dang adong be dilehon akka parkarejomi durame tu hami, hape sai disuru do hami mambahen akka batu bata. Dibalbali nasida do hami, hape parkarejo ni tuan i do na sala.” 17 Alai didok si Firaun ma, “Akka simalas do hamu sude! Malas!+ Ai sai didok hamu do, ‘Paloas ma hami lao, asa hulehon hami pelean tu Jahowa!’+ 18 Saonari, lao ma hamu! Karejo ma hamu muse! Dang lehonon be durame tu hamu. Jala dang boi moru batu bata na lao bahenonmuna.”

19 Diboto halak Israel na gabe mandor i ma na massai borat parsoalan na diadopi nasida. Ai didok do, “Dang boi moru godang ni batu bata na lao bahenonmuna ganup ari.” 20 Tikki kaluar akka mandor i, pajuppang ma nasida tu si Musa dohot si Aron. Ai jongjong do nasida disi paimahon akka mandor i. 21 Didok akka mandor i ma tu nasida, “Sai anggiat ma diida Jahowa na binahenmuna on. Sai anggiat ma dihukum hamu. Alani hamu, gabe sogo do roha ni si Firaun dohot pejabatna tu hami.* Ai songon na mangalehon podang do hamu tu tangan ni nasida lao pamatehon hami.”+ 22 Didok si Musa ma tu Jahowa, “Ale Jahowa, boasa ma gabe susa dibahen Ho bangsomon? Attong tu aha do suruonmu au? 23 Dung na ro i au tu jolo ni si Firaun lao paboahon hatami,*+ lam kejam do ibana tu bangsomi.+ Jala dang adong dibahen Ho manang aha lao mangurupi nasida.”+

6 Didok Jahowa ma tu si Musa, “Idaonmu ma aha na lao bahenokku tu si Firaun.+ Marhite huasokku paksaokku ma ibana asa dipaloas hamu lao. Ai dung diida ibana huasokki suruonna ma hamu lao sian luatna i.”+

2 Didok Debata ma muse tu si Musa, “Au do Jahowa. 3 Najolo jotjot do hupataridahon dirikku tu si Abraham, si Isak, dohot tu si Jakkob. Jala hupataridahon do tu nasida na Au do Debata Pargogo na So Hatudosan.+ Alai, dang sude hupaboa tu nasida+ taringot goarhu i ma Jahowa.+ 4 Jala hubahen do parjanjian na lao lehonokku luat Kanaan tu nasida. Najolo, di luat i do nasida tinggal gabe panoppang.+ 5 Saonari nungnga hubege be angguk-angguk ni halak Israel, naung gabe hatoban ni halak Mesir. Alai huingot do parjanjian na hubahen i.+

6 “Alani i, songon on ma dokkon tu halak Israel, ‘Au do Jahowa. Au do na lao paluahon hamu sian akka ulaon na borat dohot akka ulaon ni hatoban na dibahen halak Mesir.+ Marhite huasokku, paluaokku ma hamu, jala tobusokku. Bahenokku ma massai borat hukuman tu halak Mesir.+ 7 Bahenokku ma hamu gabe bangsokku, jala Au ma na gabe Debatamuna.+ Botoonmuna ma ise do sasittongna Jahowa Debatamuna i, na lao paluahon hamu sian akka ulaon ni hatoban na dibahen halak Mesir. 8 Boanokku ma hamu tu luat naung hujanjihon tu si Abraham, tu si Isak, dohot tu si Jakkob. Ai marhite sumpa do Au marjanji* lao mangalehon i tu nasida. Jala lehonokku ma i tu hamu gabe appunamuna.+ Ai Au do Jahowa.’”+

9 Dipaboa si Musa ma sude hata i tu halak Israel. Alai dang porsea nasida tu hatana i. Ai nungnga mandele nasida alani kejam ni halak Mesir mambahen nasida gabe hatoban.+

10 Dung i didok Jahowa ma muse tu si Musa, 11 “Lao ma ho manjuppangi si Firaun raja ni Mesir i. Dokkon ma tu ibana asa dipaloas halak Israel lao sian luatna i.” 12 Alai didok si Musa ma tu Jahowa, “Haru halak Israel pe dang olo manangihon au,+ lam si Firaun ma? Jala dang malo au makkatai.”*+ 13 Alai makkatai ma muse Jahowa tu si Musa dohot tu si Aron. Dipaboa Ibana ma tu nasida asa dipasahat parettana tu halak Israel dohot tu si Firaun raja ni Mesir i, na ikkon boanon ni nasida halak Israel kaluar sian Mesir.

14 Akka on ma goar ni halak na hea gabe pamimpin ni na saompu: Sian marga Ruben anak siakkangan ni si Israel,+ i ma si Hanok, si Pallu, si Hezron, dohot si Karmi.+ Akka anak ni si Ruben do nasida.

15 Sian marga Simeon, i ma si Jemuel, si Jamin, si Ohad, si Jakin, si Zohar, dohot si Saul anak ni boru Kanaan i.+ Akka anak ni si Simeon do nasida.

16 Akka on ma anak ni si Lepi,+ i ma si Gerson, si Kohat, dohot si Merari.+ Nasida ma na mamboan marga ni si Lepi. Saleleng 137 taon ma si Lepi mangolu.

17 Akka anak ni si Gerson, i ma si Libni, dohot si Simei. Nasida ma na mamboan marga ni keluarga na sian si Gerson.+

18 Akka anak ni si Kohat, i ma si Amram, si Ishar, si Hebron, dohot si Usiel.+ Saleleng 133 taon ma si Kohat mangolu.

19 Akka anak ni si Merari, i ma si Mahli, dohot si Musi.

Akka i ma pinoppar ni si Lepi jala nasida ma na mamboan marga ni keluarga ni nasida be.+

20 Dibuat si Amram ma si Jokhebed iboto ni bapakna gabe istrina.+ Ditubuhon si Jokhebed ma si Aron dohot si Musa.+ Saleleng 137 taon ma si Amram mangolu.

21 Akka anak ni si Ishar, i ma si Kora,+ si Nepeg, dohot si Sikri.

22 Akka anak ni si Usiel, i ma si Misael, si Elsapan,+ dohot si Sitri.

23 Dibuat si Aron ma si Eliseba boru ni si Aminadab gabe istrina. Iboto ni si Nahason+ do si Eliseba. Tubu ma anakna, jala dibahen ma goarna si Nadab, si Abihu, si Eleasar, dohot si Itamar.+

24 Akka anak ni si Kora, i ma si Asir, si Elkana, dohot si Abiasap.+ Nasida ma akka pinoppar ni si Kora.+

25 Si Eleasar+ anak ni si Aron mambuat sada sian boru ni si Putiel gabe istrina. Tubu ma anakna, dibahen ma goarna si Pinehas.+

Akka i ma pamimpin ni na saompu sian marga Lepi mangihutton keluarga ni nasida.+

26 Sian marga i do si Aron dohot si Musa. Didok Jahowa ma tu nasida, “Boan hamu ma kaluar halak Israel i sian Mesir mangihutton punguan ni nasida be.”*+ 27 Si Musa dohot si Aron+ do na ro tu jolo ni si Firaun raja ni Mesir. Didok nasida do tu si Firaun asa diloas boanon ni nasida halak Israel kaluar sian Mesir.

28 Tikki makkatai Jahowa tu si Musa di Mesir, 29 didok Jahowa ma, “Au do Jahowa. Lao ma ho tu si Firaun raja ni Mesir. Paboa ma tu ibana sude naung hupaboa tu ho.” 30 Didok si Musa ma tu Jahowa, “Ai dang malo au makkatai.* Sian dia ma dalanna tangihonon ni si Firaun au?”+

7 Didok Jahowa ma tu si Musa, “Nungnga hubahen ho gabe songon Debata* di jolo ni si Firaun. Jala si Aron abangmi ma na gabe panurirang* di ho, na pasahatton hatam.+ 2 Ikkon paboaonmu do sude hatakku tu si Aron, asa ibana na paboahon i tu si Firaun. Dung i, paloason ni si Firaun ma lao halak Israel sian luatna. 3 Alai pasombuonku do jogal roha ni si Firaun+ jala bahenokku do massai godang mukjizat di Mesir.*+ 4 Alai, dang tangihonon ni si Firaun hamu. Alani i, pakkeokku ma huasokku* mangalo Mesir. Dung i, boanokku ma bangsokku na bolon* i, i ma halak Israel kaluar sian luat i. Jala massai borat ma bahenokku hukuman tu halak Mesir.+ 5 Botoon ni halak Mesir ma ise do sasittongna Jahowa.+ Ai hupakke do huasokku mangalo Mesir lao mamboan halak Israel sian tonga-tonga ni nasida.” 6 Dung i, diulahon si Musa dohot si Aron ma i dos songon naung diparettahon Jahowa. 7 Tikki na makkatai nasida tu si Firaun, 80 taon ma umur ni si Musa jala 83 taon ma umur ni si Aron.+

8 Didok Jahowa ma tu si Musa dohot tu si Aron, 9 “Molo disuru si Firaun hamu mambahen mukjizat, suru ma si Aron mambuat tukkotna i, jala disappatton di jolo ni si Firaun. Dung i, gabe ulok na balga ma tukkot i.”+ 10 Jadi, lao ma si Musa dohot si Aron tu jolo ni si Firaun. Diulahon nasida ma sude na didok Jahowa i. Disappatton si Aron ma tukkotna di jolo ni si Firaun dohot akka pejabatna. Jala gabe ulok na balga ma tukkotna i. 11 Alai, dijou si Firaun ma akka halak na malo, akka tukkang sihir,* dohot akka datu na adong di Mesir+ mambahen ulaon na sarupa mamakke ilmu sihir ni nasida.+ 12 Sude ma nasida manappatton tukkot ni nasida. Jala sude ma tukkot i gabe ulok na balga. Alai, diboddut ulok* ni si Aron do sude ulok ni nasida i. 13 Nang pe songon i, toktong do jogal roha ni si Firaun.+ Songon naung dipaboa Jahowa, dang olo ibana manangihon si Musa dohot si Aron.

14 Dung i, didok Jahowa ma tu si Musa, “Ai jogal do roha ni si Firaun.+ Alani i, dang paloasonna bangsokki lao. 15 Lao ma ho manogot manjuppangi si Firaun tu Sunge Nil. Paima ma ibana di topi ni Sunge Nil. Jala ikkon boanonmu do tukkot na boi muba gabe ulok i.+ 16 Dokkon ma songon on tu ibana, ‘Jahowa Debata ni halak Heber manuru au paboahon hata on tu tuan:+ Didok Ibana do, “Paloas ma bangsokku lao tu gurun asa disomba nasida Au,” alai sahat tu sadari on, dang dioloi tuan hatana i. 17 Alani i, songon on ma hata ni Jahowa, “Sian on, botoonmu ma ise Jahowa.+ Attukonku ma Sunge Nil on mamakke tukkot on, asa muba aek i gabe mudar. 18 Mate ma sude akka dekke na di Sunge Nil, jala gabe bau busuk ma sunge i. Alani i, dang boi be buaton ni halak Mesir aek sian Sunge Nil lao inumon ni nasida.”’”

19 Dung i didok Jahowa ma tu si Musa, “Dokkon ma songon on tu si Aron, ‘Buat ma tukkotmi jala bahen ma i tu ginjang ni sude aek na di Mesir,+ i ma tu sude sunge, bondar,* kolam,+ dohot tu inganan panampungan ni aek, asa muba aek na disi gabe mudar.’ Alani i, sude aek na di Mesir muba gabe mudar, dohot ma i aek na di baskom na sian hau dohot na sian batu.” 20 Pittor diulahon si Musa dohot si Aron do paretta ni Jahowa i. Diangkat si Aron ma tukkotna di jolo ni si Firaun dohot akka pejabatna, diattuk ibana ma aek ni Sunge Nil i. Ujungna, muba ma sude aek na di sunge i gabe mudar.+ 21 Marmatean ma dekke na di Sunge Nil,+ jala bau busuk ma sunge i. Dang boi be inumon ni halak Mesir aek na sian Sunge Nil i.+ Ai nungnga muba be sude aek na di luat i gabe mudar.

22 Alai boi do dibahen akka datu na di Mesir i ulaon na sarupa mamakke ilmu sihir ni nasida.+ Alani i, toktong dope jogal roha ni si Firaun. Songon naung dipaboa Jahowa, dang olo ibana manangihon si Musa dohot si Aron.+ 23 Mulak ma si Firaun tu jabuna, jala dang parduli ibana nanggo saotik tu na masa i. 24 Alai sude ma halak Mesir manggali akka sumur di labbung ni Sunge Nil asa adong aek inumon ni nasida. Ai nanggo saotik pe dang boi diinum nasida aek na sian sunge i. 25 Saleleng pitu ari ma dibahen Jahowa aek ni Sunge Nil i gabe mudar.

8 Dung i, didok Jahowa ma tu si Musa, “Lao ma ho manjuppangi si Firaun jala dok ma tu ibana, ‘Songon on do hata ni Jahowa, “Paloas ma bangsokki lao asa disomba nasida Au.+ 2 Molo dang dipaloas ho nasida lao, uhumokku ma Mesir on.* Parookku ma katak tu sude luat di Mesir.+ 3 Gok situtu ma katak di Sunge Nil. Kaluar ma sude katak na sian sunge i jala masuk ma tu jabum, tu kamarmu, tu podomanmu, tu jabu ni akka pejabatmu, dohot tu jabu ni rakyatmu. Masuk do muse akka katak i tu bagasan ni ovenmu, dohot tu baskom inganan mambahen adonan ni roti.+ 4 Marroan ma tu ho akka katak i, tu akka pejabatmu, dohot tu rakyatmu.”’”

5 Didok Jahowa ma tu si Musa, “Songon on ma dokkon tu si Aron, ‘Buat ma tukkotmi jala bahen ma i tu atas ni sude sunge, bondar, dohot tu kolam, asa kaluar akka katak sian i lao manggohi sude luat na di Mesir.’” 6 Dibuat si Aron ma tukkotna jala dibahen ibana ma tukkotna tu atas ni sude aek na di Mesir. Ujungna, kaluar ma akka katak jala digohi ma sude luat di Mesir. 7 Alai boi do dibahen akka datu ni Mesir i ulaon na sarupa mamakke ilmu sihir ni nasida. Boi do dibahen nasida kaluar akka katak, jala dibahen manggohi sude luat na di Mesir.+ 8 Dung i, dijou si Firaun ma si Musa dohot si Aron. Didok ma, “Pangido ma tu Jahowa asa dipalao sude katak on sian au dohot sian rakyattu.+ Hupaloas pe hamu lao mangalehon pelean tu Jahowa.” 9 Didok si Musa ma tu si Firaun, “Olo tuan, hupaboa pe pangidoanmi tu Debata, asa dipalao katak i sian ho, sian pejabatmu, sian rakyatmu, dohot sian sude ingananmu. Holan di Sunge Nil ma katak i. Alani i, paboa ma tuan andigan i boi huulahon.” 10 Didok si Firaun ma, “Marsogot ma.” Didok si Musa ma, “Olo tuan. Huulahon pe songon i, asa diboto tuan, dang adong na asing na songon Jahowa Debatanami.+ 11 Dang adong be katak na manggugai tuan, akka pejabatmu, dohot rakyatmu. Jala dang adong be i di akka jabum. Ai holan di Sunge Nil nama katak i.”+

12 Dung i lao ma si Musa dohot si Aron sian jolo ni si Firaun. Dipangido si Musa ma tu Jahowa asa dipalao sude katak na diparona i tu si Firaun.+ 13 Dioloi Jahowa do pangidoan ni si Musa i. Marmatean ma sude akka katak na adong di jabu, di alaman, dohot di sude tano ni halak Mesir. 14 Dung i dipapungu halak Mesir ma sude bakke ni katak i, jala martumpuk-tumpuk do i dibahen. Alani i, gabe massai bau ma luat i. 15 Alai, dung diida si Firaun naung mate sude katak i, gabe jogal ma muse rohana+ jala dang olo manangihon hata ni si Musa dohot si Aron. Ai nungnga didok Jahowa hian songon i.

16 Didok Jahowa ma tu si Musa, “Songon on ma dokkon tu si Aron, ‘Buat ma tukkotmi, jala attukkon ma i tu tano. Alani i, gabe agas* ma orbuk na adong di sude luat na di Mesir.’” 17 Diulahon nasida ma songon i. Diangkat si Aron ma tukkotna jala diattukkon ma i tu tano. Alani i, gabe agas ma sude orbuk na di Mesir. Diharati ma jolma dohot binatang jala disusai ma nasida.+ 18 Dicoba akka datu na di Mesir do mambahen ulaon na sarupa mamakke sihir.+ Dicoba do mambahen agas, alai dang boi nasida. Torus do diharati agas i jolma dohot binatang. 19 Didok akka datu i ma tu si Firaun, “Huaso ni Debata do na mambahen masa on!”*+ Alai songon na didok Jahowa, toktong do jogal roha ni si Firaun. Dang olo ibana manangihon hata ni si Musa dohot si Aron.

20 Dung i, didok Jahowa ma tu si Musa, “Tibu ma ho dungo manogot, jala lao ma ho manjuppangi si Firaun tu Sunge Nil. Ai naeng tusi do ibana. Dokkon ma tu ibana, ‘Songon on do hata ni Jahowa, “Paloas ma lao bangsokki asa disomba nasida Au. 21 Molo dang dipaloas ho bangsokki lao, bahenokku ma ro lanok* tu ho, tu pejabatmu, tu rakyatmu, dohot tu akka jabum. Digohi lanok ma sude jabu na di Mesir. Jala ditutupi lanok ma sude tano na di luat Mesir. 22 Alai di ari i, jagaokku do luat na adong di Gosen, inganan ni akka bangsokki. Dang adong disi lanok.+ Marhite i, botoonmu ma Au, Jahowa, adong di luat on.+ 23 Marsogot, masa ma mukjizat on. Alai asing do bahenokku na masa tu bangsokku dohot na masa tu rakyatmu.”’”

24 Diulahon Jahowa ma songon i. Massai godang ma lanok na ro tu istana ni si Firaun, tu jabu ni akka pejabatna, dohot tu sude luat na di Mesir.+ Alani i, gabe susa ma sude halak na di luat i alani akka lanok i.+ 25 Ujungna, dijou si Firaun ma si Musa dohot si Aron, didok ibana ma, “Lao ma hamu mangalehon pelean tu Debatamuna, alai di luat on ma bahen hamu.” 26 Alai didok si Musa ma, “Dang boi tuan. Ai sogo do roha ni halak Mesir molo hulehon hami pelean tu Jahowa Debatanami.+ Ai molo hulehon hami pelean i di jolo ni nasida, pasti didangguri nasida ma hami mamakke batu. 27 Ikkon lao do hami tu gurun saleleng tolu ari mangalehon pelean tu Jahowa Debatanami, songon naung diparettahon Debata tu hami.”+

28 Didok si Firaun ma, “Hupaloas pe hamu lao tu gurun asa disomba hamu Jahowa Debatamuna i. Alai, unang padaohu hamu lao. Jala pangido ma tu Debata asa dipalao sude lanok on.”+ 29 Didok si Musa ma, “Lao pe au sian on asa hupangido tu Jahowa pangidoanmi. Marsogot, lao nama akka lanok i sian tuan, sian akka pejabatmu, dohot sian rakyatmu. Alai, unang be digabusi* raja i hami. Ikkon dipaloas raja i do hami lao mangalehon pelean tu Jahowa.”+ 30 Lao ma si Musa sian jolo ni si Firaun, jala martangiang ma ibana tu Jahowa.+ 31 Dioloi Jahowa ma sude pangidoan ni si Musa i. Dipalao Ibana ma akka lanok i sian si Firaun, akka pejabatna, dohot rakyatna. Jala dang adong be na tinggal nanggo sada lanok i. 32 Alai lam jogal do roha ni si Firaun. Dang dipaloas ibana lao halak Israel i.

9 Dung i, didok Jahowa ma tu si Musa, “Lao ma ho manjuppangi si Firaun jala dok ma tu ibana, ‘Songon on do hata ni Jahowa Debata ni halak Heber, “Paloas ma bangsokki lao asa disomba nasida Au.+ 2 Alai molo dang dipaloas ho nasida lao, jala sai diabbati ho nasida, 3 ida ma! Au, Jahowa, pakkeokku ma huasokku+ lao pamatehon sude binatang na dipiaro hamu. Bahenokku ma ro sahit na posi+ tu akka hoda, halode, unta, lombu, biru-biru, dohot hambingmuna. 4 Au, Jahowa, papulikkon binatang na dipiaro ni halak Israel sian binatang na dipiaro ni halak Mesir. Alani i, dang adong nanggo sada pe binatang ni halak Israel na mate.”’”+ 5 Jala nungnga ditottuhon Jahowa be andigan bahenonna i. Ai didok Ibana do, “Au, Jahowa, mambahen i masa marsogot di luat on.”

6 Marsogotna i, dibahen Jahowa ma songon na nidokna i. Mate ma sude binatang na dipiaro ni halak Mesir,+ alai dang adong nanggo sada pe binatang ni halak Israel na mate. 7 Disuru si Firaun ma halak lao mangida binatang appuna ni halak Israel. Diida ma dang adong nanggo sada pe binatang ni halak Israel na mate. Alai nang pe songon i, toktong do jogal roha ni si Firaun. Dang dipaloas ibana halak Israel lao sian luat i.+

8 Dung i didok Jahowa ma tu si Musa dohot si Aron, “Buat hamu ma abu sian tataring, jala buat hamu ma i mamakke tanganmuna na dua i. Jala ikkon disappakkon si Musa do i doppak ginjang di jolo ni si Firaun. 9 Habang ma abu i tu sude luat na di Mesir. Jala molo hona abu i tu jolma dohot tu binatang, gabe bisul na marnanah ma i di daging ni nasida.”

10 Dibuat nasida ma abu i sian tataring. Jala disappakkon si Musa ma i doppak ginjang di jolo ni si Firaun. Gabe bisul na marnanah ma abu i di daging ni jolma dohot binatang. 11 Jala dang boi ro akka tukkang sihir ni Mesir manjuppangi si Musa, ala dohot do nasida hona bisul songon halak Mesir na asing.+ 12 Alai dipasombu Jahowa dope jogal roha ni si Firaun. Songon na didok Jahowa tu si Musa, dang olo si Firaun manangihon si Musa dohot si Aron.+

13 Didok Jahowa ma muse tu si Musa, “Tibu ma ho dungo manogot. Dung i, lao ma ho manjuppangi si Firaun jala dok ma tu ibana, ‘Songon on do hata ni Jahowa Debata ni halak Heber, “Paloas ma bangsokki lao asa disomba nasida Au. 14 Molo dang dipaloas ho, parookku ma sude hasusaan tu ho, tu akka pejabatmu, dohot tu rakyatmu, asa diboto ho dang adong na songon Au di liat portibi on.+ 15 Sasittongna, boi do hupakke huasokku lao pamatehon ho dohot sude rakyatmu marhite sahit na posi, asa unang adong be hamu na mangolu di tano on. 16 Alai, hupasombu dope ho mangolu, asa hupatudu tu ho huasokku, jala asa ditanda sude halak goarhu di sude liat portibi on.+ 17 Hape tong dope ginjang roham, dang dipaloas ho bangsokki kaluar. 18 Marsogot, hira-hira di tikki songon on, parookku ma udan es na massai doras, na so hea dope masa di Mesir. 19 Alani i, suru ma akka halak pamasukkon sude binatang na dipiaro ho, dohot sude artam tu inganan na aman. Jala suru ma masuk sude parkarejom tu inganan na aman. Ai molo adong jolma manang binatang na di luar, na so di inganan na aman, mate ma nasida alani udan es i.”’”

20 Deba sian akka pejabat ni si Firaun i mabiar do tu hata ni Jahowa. Pittor disuru nasida ma asa lao sude parkarejona jala asa dipamasuk akka binatang na dipiaro nasida tu inganan na aman. 21 Alai akka halak na so parduli tu hata ni Jahowa, dipasombu do parkarejona dohot akka binatang ni nasida di luar.

22 Didok Jahowa ma tu si Musa, “Angkat ma tukkotmi tu ginjang, asa turun udan es tu sude luat na di Mesir,+ jala asa hona udan es i tu sude jolma, binatang, dohot sude suan-suanan na di ladang.”+ 23 Dung i, diangkat si Musa ma tukkotna tu ginjang, jala dibahen Jahowa ma turun udan es, ro ronggur dohot api* tu luat i. Torus ma ro udan es i dibahen Jahowa tu luat na di Mesir. 24 Massai luar biasa do udan es i. Dang marnaso api ro sian langit di tonga-tonga ni udan i. Jala dang hea dope masa songon i di luat Mesir.+ 25 Sega do sude dibahen udan es i. Mate do sude jolma dohot binatang na adong di luar. Disegai do sude suan-suanan dohot sude hau na di ladang di sude luat na di Mesir.+ 26 Holan di luat Gosen, inganan ni halak Israel i do na so ro udan es.+

27 Disuru si Firaun ma halak manjou si Musa dohot si Aron. Didok ma tu nasida, “Nungnga mardosa be au. Jahowa do na sittong. Au dohot rakyatton do na sala. 28 Pangido ma tu Jahowa asa dipaso ronggur dohot udan es on. Molo dung dipaso, hupaloas pe hamu lao. Dang huabbati be hamu lao.” 29 Didok si Musa ma, “Disi kaluar au sian kota on, pittor martangiang pe au* tu Jahowa. Pasoonna ma udan es dohot ronggur i jala botoonmu ma Jahowa do nappuna tano on.+ 30 Alai nungnga huboto hian, dang mabiar tuan dohot akka pejabatmu tu Debata Jahowa.”

31 Nungnga sega be sude suan-suanan rami* dohot barli* di luat i. Ai tikki na ro i udan es, pas naeng panen nama barli jala pas marbunga do rami. 32 Alai dang sega anggo gandum.* Ai parpudi do musim ni panen gandum. 33 Lao ma si Musa sian jolo ni si Firaun. Kaluar ma ibana sian kota i, jala martangiang ma ibana tu Jahowa. Gabe so ma ronggur dohot udan es i.+ 34 Dung diida si Firaun dang ro be udan, udan es, dohot ronggur, gabe jogal ma muse rohana+ songon i nang akka pejabatna. Ujungna, mardosa ma muse nasida. 35 Songon hata ni Jahowa hian tu si Musa, sai jogal do roha ni si Firaun. Dang dipaloas ibana lao halak Israel sian i.+

10 Didok Jahowa ma tu si Musa, “Lao ma ho manjuppangi si Firaun. Ai hupasombu do jogal roha ni si Firaun dohot akka pejabatna,+ asa boi diida ibana sude mukjizat na hubahen i.+ 2 Jala asa boi paboaonmu tu anakmu dohot tu pahoppum borat ni hukuman dohot akka mukjizat na hubahen tu halak Mesir.+ Dung i, botoonmuna ma Au do Jahowa.”

3 Lao ma si Musa dohot si Aron manjuppangi si Firaun. Jala didok ma, “Songon on do hata ni Jahowa Debata ni halak Heber i, ‘Sadia leleng nai ho mangalo Au?+ Paloas ma bangsokki lao asa disomba nasida Au. 4 Molo dang dipaloas ho lao bangsokki, marsogot parookku ma akka sihapor* tu sude luatmon. 5 Alani godangna, dang tarida be tano di luat i ala nungnga ditutupi sihapor i. Diallang sihapor i ma sude suan-suanan na so sega dibahen udan es. Jala diallang do sude hau na tubu* di ladang.+ 6 Gok ma sihapor di jabum, di jabu ni akka pejabatmu, dohot di sude jabu ni rakyatmu. Mulai sian na tinggal bapakmu dohot oppungmu di luat on, dang hea dope diida nasida songon i godang ni sihapor.’”+ Dung i lao ma si Musa dohot si Aron sian jolo ni si Firaun.

7 Didok akka pejabat ni halak Mesir ma tu si Firaun, “Sadia leleng nai hita susa* dibahen bawa on? Paloas ma lao nasida, asa disomba nasida Jahowa Debata ni nasida i. Na so diboto tuan do, nungnga sursar be Mesir on!” 8 Disuru si Firaun ma asa dijou si Musa dohot si Aron. Didok ma tu nasida, “Lao ma hamu, somba hamu ma Jahowa Debatamuna i. Alai akka ise do huroha na naeng lao?” 9 Dung i didok si Musa ma, “Sude do hami lao. Mulai sian na poso sahat tu na matua, anaknami, borunami, biru-biru, dohot lombu boanonnami do.+ Ai naeng mambahen perayaan lao pasangappon Jahowa do hami.”+ 10 Didok si Firaun ma, “Ai na dirippu hamu do na tutu paloasokku hamu lao dohot ianakkonmuna? Molo masa i, dohononmuna ma Jahowa mandongani hamu!+ Tutu ma, rencana na jahat do na lao ulahononmu. 11 Dang paloasokku hamu sude lao! Molo naeng lao do hamu manomba Jahowa, holan akka bawa ma na lao.” Dung i, diusir ma nasida sian jolo ni si Firaun.

12 Didok Jahowa ma tu si Musa, “Angkat ma tukkotmi doppak Mesir, asa ro akka sihapor tu sude luat di Mesir. Jala allangonna ma sude suan-suanan na di luat i, dohot sude na so sega dope dibahen udan es i.” 13 Alani i, diangkat si Musa ma tukkotna doppak Mesir. Dung i dibahen Jahowa ma alogo na mohop na sian timur mangullus tu luat i saleleng sadari saborngin. Dung manogot, diboan alogo na sian timur ma massai godang sihapor tu luat i. 14 Gok ma akka sihapor di sude luat Mesir jala digohi sihapor ma luat i.+ Massai susa ma sude alani sihapor i.+ Dang hea dope masa songon i godang ni sihapor, jala dang hea be masa dukkon i. 15 Ditutupi sihapor i ma sude tano na di luat i, jala holom ma langit* alani godang ni sihapor. Habis do sude diallang suan-suanan dohot akka parbue ni hau na so sega dibahen udan es. Dang adong nanggo sada pe bulung ni hau dohot akka suan-suanan na tinggal di sude luat na di Mesir.

16 Pittor dijou si Firaun ma si Musa dohot si Aron. Didok ma tu nasida, “Nungnga mardosa be au tu Jahowa Debatamuna i dohot tu hamu. 17 Tolong ma jo, salpuhon ma dosakki, sahali on pe. Pangido ma tu Jahowa Debatamuna i, asa dipaso sude hasusaan na massai posi on.” 18 Dung i, lao ma ibana* sian jolo ni si Firaun jala martangiang ma ibana tu Jahowa.+ 19 Diuba Jahowa ma haroro ni alogo i. Dibahen Ibana ma mangullus alogo na gogo sian sabola barat. Diboan alogo i ma sude sihapor i tu Laut Merah. Jala dang adong nanggo sada pe tinggal sihapor di sude luat di Mesir. 20 Dipasombu Jahowa ma jogal roha ni si Firaun.+ Dang dipaloas si Firaun lao halak Israel.

21 Didok Jahowa ma tu si Musa, “Angkat ma tukkotmi doppak langit asa holom sude luat na di Mesir. Ujungna, holom situtu ma sude luat i.” 22 Pittor diangkat si Musa ma tukkotna doppak langit. Jala gabe holom situtu ma luat na di Mesir saleleng tolu ari.+ 23 Alani holomna, dang boi diida halak Mesir i halak na asing. Saleleng tolu ari i, dang adong na boi lao manang na tudia pe. Alai tiur do ari di inganan ni halak Israel.+ 24 Dijou si Firaun ma si Musa, didok ma, “Lao ma hamu, somba hamu ma Jahowa.+ Boan hamu ma anakkonmuna. Alai unang ma boan hamu biru-biru dohot lombumuna.” 25 Didok si Musa ma, “Dang boi tuan. Ikkon paloasonmu do boanonnami akka binatang i, asa adong lehononnami gabe pelean situtungon tu Jahowa Debatanami.+ 26 Ikkon boanonnami do sude binatangnami i. Dang boi tinggal nanggo sada pe binatang i. Ai naeng bahenonnami do deba binatang i gabe pelean tu Jahowa Debatanami. Jala dang huboto hami dope binatang na dia na ikkon hupelehon hami tu Jahowa. Dung sahat pe hami disi asa diboto hami.” 27 Alai dipasombu Jahowa do jogal roha ni si Firaun. Dang dipaloas si Firaun lao halak Israel.+ 28 Didok si Firaun ma tu si Musa, “Lao ma ho sian jolokku! Sotung ro be ho manjuppangi au. Molo ro dope ho muse, pamateonku ma ho.” 29 Didok si Musa ma, “Olo tuan. Dang ro be au manjuppangi ho.”

11 Didok Jahowa ma tu si Musa, “Hukumokku ma sahali nai si Firaun dohot sude halak Mesir. Dung hubahen i, paloasonna ma hamu lao.+ Gariada, usironna do hamu sian i.+ 2 Saonari paboa ma tu sude halak Israel, bawa dohot borua, asa dijalo nasida akka barang na sian mas dohot perak sian tetangga ni nasida halak Mesir.”+ 3 Dibahen Jahowa ma gabe burju halak Mesir i tu halak Israel. Jala massai sangap ma si Musa dibahen akka pejabat ni si Firaun dohot sude halak Mesir.

4 Didok si Musa ma tu si Firaun, “Songon on ma hata ni Jahowa, ‘Annon, hira-hira tonga borngin, lao do Au mandalani sude luat di Mesir.+ 5 Mate ma sude anak siakkangan na adong di Mesir.+ Mulai sian anak siakkangan ni si Firaun na hundul di tahtana, sahat tu anak siakkangan ni hatoban na mamakke batu gilingan,* dohot sude anak ni binatang na parjolo tubu.+ 6 Tarbege ma soara ni halak na mangandungi di sude luat di Mesir. Dang hea dope masa songon i, jala dang na lao masa be songon i.+ 7 Alai dang manang na mahua anggo halak Israel dohot binatang ni nasida. Nanggo biang pe, dang marauang nasida. Sian i, botoonmu ma boi do dibahen Jahowa asing na masa tu halak Israel jala asing na masa tu halak Mesir.’”+ 8 Didok si Musa ma muse, “Na lao ro do sude pejabatmu marsomba tu au, jala dipangido nasida do asa lao au rap dohot sude halak na mangihutton au.”+ Dung didok si Musa hata i, lao ma ibana sian jolo ni si Firaun, jala massai muruk do ibana tikki i.

9 Dung i, didok Jahowa ma tu si Musa, “Dang tangihonon ni si Firaun ho.+ Masa pe i, asa boi do lam godang mukjizat bahenokku di Mesir.”+ 10 Nungnga diida si Firaun+ be sude mukjizat na dibahen si Musa dohot si Aron. Alai dipasombu Jahowa do jogal roha ni si Firaun, dang diloas ibana lao halak Israel sian luat i.+

12 Makkatai ma Jahowa tu si Musa dohot tu si Aron di Mesir. Ninna ma, 2 “On ma na gabe bulan parjolo di hamu ganup taon.+ 3 Paboa ma songon on tu sude halak Israel, ‘Di ari pasappuluhon di bulan on, ikkon buatonmuna do sada biru-biru+ tu rumah tanggamuna. Jadi sada biru-biru ma tu sada rumah tangga. 4 Alai molo otik do halak di jabumuna lao mangallang jagal ni biru-biru i, marbagi ma hamu tu tetangga na unjonok tu hamu. Bagi hamu ma i di jabumuna, jala etong ma sadia godang na boi allangon ni ganup halak. 5 Pillit hamu ma biru-biru jantan manang hambing jantan. Alai ikkon na sehat,+ jala na marumur sataon. 6 Jaga hamu ma i sahat tu ari na pasappulu opatton di bulan on.+ Dung bonom mataniari,* ikkon seaton ni ganup keluarga ni halak Israel ma binatang i.+ 7 Buat ma saotik mudar ni binatang i. Pispisson ma mudar i tu tiang ni pintu na di kiri, na di kanan, dohot tu kusen na di atas ni pintu ni jabu ingananmuna mangan.+

8 “‘Ikkon di borngin i do allangonmuna jagal i.+ Ikkon dipanggang do jagal i. Allang hamu ma i rap dohot roti na so marragi+ dohot sayur paet.+ 9 Ikkon dipanggang do jagal i rap dohot uluna, bagian dalamna,* dohot patna.* Unang ma diallang na tata manang na dirobus. 10 Dang boi ditinggalhon jagal i sahat tu manogot. Molo dang habis, ikkon ditutung do jagal na tinggal i.+ 11 Tikki mangallang jagal i hamu, ikkon pakkeonmuna do ikat pinggang, sipatu, jala ikkon ditiop hamu do tukkotmuna. Ikkon hatop do hamu mangallang i. Ai borngin i ma Perayaan Paska na lao pasangappon Jahowa. 12 Borngin i, hudalani ma sude luat di Mesir. Pamateonku ma sude anak siakkangan na di Mesir, mulai sian jolma sahat tu binatang.+ Hukumokku ma sude debata ni halak Mesir.+ Ai Au do Jahowa. 13 Mudar i ma na gabe tanda ni jabu ingananmuna. Molo huida mudar i, hulewati ma jabu i, asa unang hona tu hamu hukuman na hubahen tu halak Mesir jala asa unang mate hamu.+

14 “‘Ikkon ingotonmuna dohot pinopparmuna do ari on. Jala ikkon bahenonmuna do perayaan lao pasangappon Jahowa. On ma peraturan na marlakku saleleng ni lelengna. 15 Ikkon mangallang roti na so marragi do hamu saleleng pitu ari.+ Di ari na parjolo, bolokkon hamu ma sude ragi* na di jabumuna. Ai ikkon dipamate do halak na mangallang sipanganon na marragi saleleng na pitu ari i. 16 Ikkon marpungu do hamu manomba Debata di ari na parjolo dohot di ari na papituhon. Dang boi hamu karejo di akka ari i,+ asing ni paradehon sipanganon tu ganup halak.

17 “‘Di ari i, ikkon bahenonmuna do Perayaan Roti na So Marragi.+ Ai di ari i do boanokku hamu sude* kaluar sian Mesir. Jala ikkon sai bahenonmuna dohot pinopparmuna do perayaan on. Ai i do peraturan na marlakku saleleng ni lelengna. 18 Di bulan na parjolo, mulai sian ari na pasappulu opatton dung bonom mataniari, sahat tu ari na paduapulu sadahon dung bonom mataniari, ikkon allangonmuna do roti na so marragi.+ 19 Saleleng pitu ari i, unang ma adong ragi* di jabumuna. Ikkon dipamate do halak+ na mangallang sipanganon na marragi saleleng di ari i, nang pe ibana halak panoppang manang halak Israel.+ 20 Unang ma allang hamu sipanganon na marragi. Manang didia pe hamu tinggal, ikkon roti na so marragi do allangonmuna.’”

21 Pittor dijou si Musa ma akka pangituai* ni halak Israel.+ Didok ma tu nasida, “Pillit hamu ma sada binatang* na dipiaro hamu lao tu keluargamuna be. Seat hamu ma i gabe pelean tu Perayaan Paska. 22 Bahen ma mudar ni binatang i tu baskom. Sornoppon ma saikkat hisop* tu baskom i. Dung i, pispisson ma mudar i tu tiang ni pintu na di kiri, na di kanan, dohot tu atas ni kusen ni pintu. Unang ma adong na kaluar sian jabu i sahat tu manogot. 23 Didalani Jahowa do annon sude luat Mesir lao manguhum nasida. Alai molo diida Ibana mudar na di tiang ni pintu na di kiri, na di kanan, dohot na di atas ni kusen ni pintumuna, pasti dilewati Jahowa do jabumuna i. Jala dang pamateonna manang ise pe halak na di jabumuna.+

24 “Ikkon toktong do bahenonmuna perayaan i. Jala on ma peraturan na marlakku di hamu dohot tu pinopparmuna saleleng ni lelengna.+ 25 Jala molo dung sahat hamu di luat na dijanjihon Jahowa lao lehononna tu hamu, ikkon toktong do bahenonmuna perayaan i.+ 26 Jala molo disukkun akka anakkonmuna hamu, ‘Aha do lapatan ni perayaan on?’+ 27 Dokkon hamu ma, ‘On ma pelean tu Perayaan Paska lao pasangappon Jahowa. Ai tikki dihukum Ibana halak Mesir, dilewati Ibana do jabu ni halak Israel jala dang dipamate Ibana hita.’”

Mambege i, marsomba ma halak Israel. 28 Dung i, lao ma halak Israel sian i. Diulahon nasida ma sude dos songon na diparettahon Jahowa tu si Musa dohot tu si Aron.+

29 Di tonga borngin, dipamate Jahowa ma sude anak siakkangan na di Mesir.+ Mulai sian anak siakkangan ni si Firaun na hundul di tahtana, sahat tu anak siakkangan ni tawanan na di penjara, dohot sude anak ni binatang na parjolo tubu.+ 30 Borngin i, dungo ma si Firaun, sude pejabatna, dohot sude halak Mesir na asing. Massai gogo ma nasida mangangguki jala tarbege do i di sude luat na di Mesir. Ai di ganup jabu do adong halak na mate.+ 31 Laos di borngin i, dijou si Firaun ma si Musa dohot si Aron.+ Didok ibana ma, “Lao ma hamu dohot sude halak Israel sian luat on. Lao ma hamu manomba Jahowa, songon na nidokmuna i.+ 32 Boan hamu ma hambing, biru-biru, dohot lombumuna songon na nidokmuna i.+ Alai pangido ma tu Debata asa dipasu-pasu Ibana au.”

33 Sai dipaksa halak Mesir ma asa hatop lao halak Israel sian i.+ Didok nasida do, “Molo dang lao hamu, mate nama hami sude!”+ 34 Diboan halak Israel ma adonan ni roti na so dicampur dope dohot ragi. Diboan nasida do muse baskom ni adonan naung dibukkus dohot kain. Dibahen nasida ma i tu bahu ni nasida. 35 Diulahon halak Israel ma sude songon na diparettahon si Musa. Dipangido nasida do sian halak Mesir akka barang na sian mas, perak, dohot akka baju.+ 36 Dibahen Jahowa ma gabe burju halak Mesir i tu halak Israel. Manang aha pe dipangido nasida, dilehon halak Mesir do. Ujungna, dibuat nasida ma arta ni halak Mesir i.+

37 Dung i, borhat ma halak Israel sian Ramses+ tu Sukot.+ Adong do hira-hira 600.000 bawa na mardalan pat, asing dope akka dakdanak.+ 38 Diboan nasida do godang hambing, biru-biru, dohot lombu. Asing ni i, godang do akka halak na sian bangso na asing*+ mangihutton nasida. 39 Di pardalanan, dipanggang nasida ma adonan ni roti na so marragi naung diboan nasida i, jala dibahen ma i gabe roti na bulat. Ai dipaksa halak Mesir i do asa hatop nasida lao. Alani i dang sanga dibahen nasida ragi tu roti i, jala dang sanga nasida paradehon sipanganon ni nasida.+

40 Nungnga 430 taon+ halak Israel tinggal gabe panoppang di luat na asing tikki kaluar nasida sian Mesir.+ 41 Di ari i, di ujung ni taon paopatratus tolupuluhon, kaluar ma bangso* ni Jahowa sian Mesir. 42 Di borngin i, dibahen nasida ma perayaan na gabe parningotan naung diboan Jahowa nasida kaluar sian Mesir. Jala sahat tu pinoppar ni nasida, ikkon bahenon ni halak Israel do perayaan songon na di borngin i tu Jahowa.+

43 Dung i, didok Jahowa ma tu si Musa dohot tu si Aron, “On ma peraturan taringot tu Paska: Dang boi halak na sian bangso na asing mangallang jagal na dipelehon tu Perayaan Paska.+ 44 Alai molo adong hatobanmuna na dituhor hamu, ikkon disunat do ibana.+ Dung pe i asa boi dohot ibana mangallang jagal i. 45 Halak panoppang dohot halak na digaji pe dang boi dohot mangallang i. 46 Ikkon di jabu do i panganonmuna. Unang ma boan hamu i tu luar, jala unang adong nanggo sada pe holi-holina na ponggol.+ 47 Ikkon sude do halak Israel dohot tu Perayaan Paska. 48 Molo adong halak na sian bangso na asing na tinggal rap dohot hamu, jala lomo rohana naeng mangarayahon Paska lao pasangappon Jahowa, sude bawa na di keluargana ikkon disunat. Dung i, boi ma ibana dohot mangarayahon Paska i, jala gabe dos ma ibana songon halak Israel. Alai, dang boi halak na so marsunat dohot mangallang jagal na dipelehon tu perayaan i.+ 49 Marlakku do aturan i tu halak Israel dohot tu halak na asing na rap tinggal dohot hamu.”+

50 Diulahon halak Israel ma sudena i. Diulahon nasida do i dos songon na diparettahon Jahowa tu si Musa dohot tu si Aron. 51 Laos di ari i, diboan Jahowa ma sude halak Israel* kaluar sian Mesir.

13 Didok Jahowa ma muse tu si Musa, 2 “Papulik* ma di Au ganup anak siakkangan* ni halak Israel. Gabe appunakku ma sude anak siakkangan bawa ni halak Israel dohot binatang jantan na parjolo tubu.”+

3 Didok si Musa ma tu halak Israel, “Ingot hamu ma ari sadari on. Ai sadari on do diboan Jahowa hamu kaluar sian Mesir,+ i ma ingananmuna tikki gabe hatoban* marhite tanganna na gogo i.+ Alani i, unang ma allang hamu sipanganon na marragi. 4 Sadari on do hamu diboan kaluar sian Mesir, i ma di bulan Abib* on.+ 5 Nungnga marsumpa Jahowa tu akka ompumuna na lao lehononna luat ni halak Kanaan, halak Het, halak Amori, halak Hevi, dohot halak Jebus+ lao ingananmuna.+ Gok do susu dohot madu+ di inganan i. Jadi, molo dung sahat hamu di luat i, toktong ma bahen hamu perayaan sisongon on ganup taon di bulan Abib. 6 Saleleng pitu ari, ikkon mangallang roti na so marragi+ do hamu. Jala di ari na papituhon, ikkon bahenonmuna do perayaan lao pasangappon Jahowa. 7 Ikkon roti na so marragi do allangonmuna saleleng pitu ari.+ Jala unang ma adong sipanganon na marragi di sude ingananmuna,*+ sipanganon manang aha pe taho. 8 Laos di ari i, paboa ma tu anakkonmu, ‘Tabahen pe songon on, asa taingot do sude na denggan na binahen ni Jahowa tu hita tikki kaluar sian Mesir.’+ 9 Perayaan i ma na paingotton hamu tu na masa di tikki i. Perayaan i ma na gabe songon tanda na ditalihon di tanganmuna dohot di dahimuna.*+ Alani i, gabe toktong ma paboaonmuna uhum ni Jahowa. Ai marhite tangan ni Jahowa na gogo i, diboan Ibana do hamu kaluar sian Mesir. 10 Ikkon toktong do ulahononmuna aturan on ganup taon.+ Jala bahen ma i di tikki naung ditottuhon.

11 “Nungnga marjanji Debata marhite sumpa tu hamu dohot tu akka ompumuna na lao lehononna luat Kanaan tu hamu.+ Alani i, molo dung sahat hamu diboan Jahowa tu luat Kanaan i, 12 ikkon lehononmuna do anak siakkanganmuna* tu Jahowa, dohot ma i binatang jantan na parjolo tubu na dipiaro hamu. Ai appuna ni Jahowa do sudena i.+ 13 Molo tubu anak ni halodemuna na parjolo, tobus ma i marhite mamelehon sada biru-biru. Molo dang ditobus i, ponggol hamu ma rukkung ni halode i. Suang songon i ma nang anak siakkanganmuna, ikkon ditobus do nasida.+

14 “Jala molo disukkun akka anakkonmuna hamu, ‘Boasa pola tabahen songon i?’ Dokkon hamu ma tu nasida, ‘Ai marhite tangan ni Jahowa na gogo i do hita diboan kaluar sian Mesir inganatta dibahen gabe hatoban.+ 15 Di tikki i, jogal do roha ni si Firaun jala dang diloas hita lao.+ Gabe dipamate Jahowa ma sude anak na parjolo tubu di luat Mesir, mulai sian anak siakkangan ni jolma sahat tu anak ni binatang na parjolo tubu.+ Alani i do tapelehon tu Jahowa sude binatang jantan na parjolo tubu, jala tatobus sude anak siakkangan bawa di keluargatta.’ 16 Jadi, perayaan i ma na paingotton hamu tu na masa di tikki i. Perayaan i ma na gabe songon tanda na ditalihon di tanganmuna dohot di dahimuna.*+ Ai marhite tangan ni Jahowa na gogo i, diboan Ibana do hita kaluar sian Mesir.”

17 Tikki dipaloas si Firaun halak Israel lao, dang diboan Debata nasida mardalan sian huta ni halak Palistim, hape unjonok do sian i. Ai didok Debata do, “Atik boha gabe muba roha ni halak Israel, jala naeng mulak tu Mesir molo ikkon marporang nasida.” 18 Alai disuru Debata ma halak Israel mardalan mamutar sian gurun na jonok tu Laut Merah.+ Songon pasukan ni tentara na markelompok-kelompok do halak Israel kaluar sian Mesir. 19 Diboan si Musa do holi-holi ni si Josep. Ai nungnga disuru si Josep asa marsumpa pinoppar ni si Israel. Didok si Josep do, “Pasti urupan ni Debata do hamu, jadi molo lao hamu sian inganan on, boan hamu ma holi-holikku.”+ 20 Borhat ma nasida sian Sukot, jala markemah di Etham, di pinggir ni gurun.

21 Di jolo ni nasida do Jahowa manogu-nogu nasida. Dibahen Ibana do ombun*+ di tikki arian dohot api* di tikki borngin asa tiur dalan ni nasida. Alani i, boi ma nasida mardalan di tikki arian dohot borngin.+ 22 Di tikki arian, toktong do ombun i di jolo ni nasida. Jala di tikki borngin, toktong do api i di jolo ni nasida.+

14 Didok Jahowa ma muse tu si Musa, 2 “Dok ma tu halak Israel asa mulak muse nasida jala markemah di jolo ni Pihakirot, di holang-kolang ni Migdol dohot laut* i. Bahen hamu ma kemahmuna di topi ni laut di jolo ni Baal-zephon,+ 3 asa didok si Firaun di bagas rohana, ‘Nungnga lilu be halak Israel i. Dang adong be dalan ni nasida kaluar sian padang belantara i.’ 4 Pasombuonku ma jogal roha ni si Firaun+ jala lumbaonna ma halak Israel. Alai pasangapokku ma goarhu marhite manaluhon si Firaun dohot tentarana.+ Alani i, botoon ni halak Mesir ma na Au do Jahowa.”+ Dung i, diulahon halak Israel ma songon i.

5 Adong ma halak na paboahon tu raja ni Mesir naung lao halak Israel. Pittor muba ma roha ni si Firaun dohot akka pejabatna.+ Didok nasida ma, “Ai na mahua do hita? Boasa tapaloas akka hatoban i lao?” 6 Diparade si Firaun ma akka kareta porangna jala diboan ibana ma akka tentarana.+ 7 Diboan ibana do 600 kareta porangna na dumenggan, dohot sude kareta porang na adong di Mesir rap dohot akka tentarana. 8 Dipasombu Jahowa ma jogal roha ni si Firaun raja ni Mesir i. Dilumba ibana ma halak Israel. Alai dang mabiar halak Israel kaluar sian i.+ 9 Ro ma halak Mesir mangalumba halak Israel.+ Lam jonok ma akka kareta hoda ni si Firaun, akka tentarana na marhoda, dohot akka tentarana na mardalan pat tu halak Israel. Tikki i, markemah do halak Israel di topi ni laut na jonok tu Pihakirot di jolo ni Baal-zephon.

10 Tikki lam jonok si Firaun, diida halak Israel ma na ro halak Mesir mangalumba nasida. Gabe mabiar ma halak Israel, jala mangangguki ma nasida lao mangido tu Jahowa asa diurupi nasida.+ 11 Didok nasida ma tu si Musa, “Ai aha do na lao bahenonmu tu hami? Boasa diboan ho hami kaluar sian Mesir? Na so adong be tano lao kuburannami di Mesir, umbahen na diboan ho hami asa mate di gurun on?+ 12 Ai tikki di Mesir nungnga hudok hami tu ho, ‘Pasombu ma hami dison gabe hatoban ni halak Mesir.’ Ai tumagon do hami gabe hatoban ni halak Mesir, unang apala gabe mate di gurun on.”+ 13 Didok si Musa ma tu bangso i, “Unang mabiar hamu.+ Pos ma rohamuna. Ida hamu ma songon dia Jahowa paluahon hamu sadari on.+ Ai halak Mesir na niidamuna sadari on, dang idaonmuna be i.+ 14 Jahowa sandiri do na marporang lao mambela hamu.+ Tenang ma hamu, paima hamu ma.”*

15 Didok Jahowa ma tu si Musa, “Unang be sai mangangguki ho tu Au. Dok ma tu halak Israel i, asa ditorusson nasida pardalanan ni nasida. 16 Buat ma tukkotmu jala angkat ma tu ginjang ni laut i. Bola dua ma laut i asa boi mardalan halak Israel sian tonga-tonga ni laut i di tano na mahiang. 17 Alai, pasombuokku ma jogal roha ni halak Mesir, asa dilumba nasida halak Israel. Dung i pasangaponku ma goarhu marhite manaluhon si Firaun, akka tentarana na mardalan pat, akka tentarana na marhoda, dohot sude kareta porangna.+ 18 Jala botoon ni halak Mesir i ma na Au do Jahowa, dung hupasangap goarhu marhite manaluhon si Firaun, akka tentarana na mardalan pat, akka tentarana na marhoda, dohot sude kareta porangna.”+

19 Dung i, pinda ma tu pudi ni halak Israel suru-suruan ni Debata na sittong+ na adong di jolo ni nasida. Jala pinda do ombun na di jolo ni nasida tu pudi ni nasida.+ 20 Di holang-kolang ni halak Israel dohot halak Mesir ma ombun i.+ Gabe golap ma ombun i doppak halak Mesir, jala torang ma doppak halak Israel.+ Alani i, dang dapot ni halak Mesir i halak Israel di na saborngin i.

21 Diangkat si Musa ma muse tukkotna tu atas ni laut i.+ Di bagasan saborngin i, dibahen Jahowa ma mangullus alogo na gogo sian timur, gabe bola dua ma laut i+ jala mahiang ma tano na di tonga-tonga ni laut i.+ 22 Mardalan ma halak Israel di tano na mahiang lao menyeberangi laut i.+ Gabe songon dinding ma laut i di kanan dohot di kiri ni nasida.+ 23 Dilumba halak Mesir do halak Israel tu tonga-tonga ni laut i. Sude hoda ni si Firaun, kareta porangna, dohot tentarana na marhoda mangalele halak Israel.+ 24 Tikki naeng bissar* mataniari, diida Jahowa ma sian bagas ni api dohot ombun i+ naung ro tentara ni halak Mesir. Dibahen Ibana ma gaor halak i. 25 Dibahen Ibana ma malua akka roda ni kareta ni nasida, gabe maol ma nasida mamboan kareta i. Didok halak Mesir i ma, “Beta! Tatinggalhon ma halak Israel on. Ai Jahowa do na marporang mangalo hita lao mangurupi halak Israel.”+

26 Didok Jahowa ma muse tu si Musa, “Angkat ma tukkotmi tu ginjang ni laut, asa mulak muse aek i jala asa maup halak Mesir rap dohot akka tentarana na marhoda dohot sude kareta porangna.” 27 Pittor diangkat si Musa ma tukkotna tu ginjang ni laut i. Dung naeng bissar mataniari, mulak ma muse aek i songon na somal. Gabe lari ma halak Mesir sian i, alai dionjar Jahowa do nasida muse tu tonga-tonga ni laut i.+ 28 Mulak ma aek i songon na somal, jala maup ma kareta porang ni si Firaun, tentarana na marhoda, dohot sude tentarana na mardalan pat na mangalele halak Israel tu tonga-tonga ni laut i.+ Dang adong nanggo sada pe na dipasombu mangolu.+

29 Mardalan do halak Israel di tano na mahiang lao menyeberangi laut i.+ Gabe songon dinding ma laut i di kanan dohot di kiri ni nasida.+ 30 Songon i ma Jahowa paluahon halak Israel sian tangan ni halak Mesir di ari i.+ Diida halak Israel do bakke ni halak Mesir di topi ni laut i. 31 Dung diida halak Israel ditaluhon Jahowa halak Mesir marhite huasona* na balga i, gabe mabiar ma nasida tu Jahowa, jala gabe porsea ma nasida tu Jahowa dohot tu si Musa naposona.+

15 Tikki i, diendehon si Musa dohot halak Israel ma sada ende pujian tu Jahowa.+ Songon on ma endena:

“Marende ma au tu Jahowa, ai nungnga monang Ibana jala marmulia.+

Disappatton Ibana do hoda dohot akka tentarana tu laut.+

 2 Jahowa* do na mambahen au togu jala gogo. Ibana do Sipalua au.+

Ibana do Debatakku, jala pujiokku ma Ibana.+ Ibana do Debata ni akka ompukku,*+ pasangapokku ma Ibana.+

 3 Tentara na gogo do Jahowa.+ Jahowa do goarna.+

 4 Disappatton Ibana do akka kareta porang ni si Firaun rap dohot tentarana tu laut,+

 9 Didok musu i do, ‘Ikkon lumbaokku do nasida jala takkupokku!

Buatokku ma arta ni nasida, bagi-bagiokku sahat tu na puas rohakku!

Tarikokku ma podangku! Tanganku ma na pamatehon nasida!’+

11 Ale Jahowa, ise ma debata na asing na songon Ho?+

Massai badia do Ho,+ dang adong debata na asing na songon Ho.

Tama do Ho dipuji marhite akka ende, ai dibahen Ho do akka mukjizat.+

12 Diangkat Ho ma tangan kananmi, jala diboddut tano on ma nasida.+

Jala mandele ma sude rakyat ni Kanaan.+

16 Mabiar do sude nasida jala makkahitir.+

20 Dung i ro ma si Miryam panurirang* borua, iboto ni si Aron i. Diboan ibana ma rebana* jala diihutton sude borua ma ibana manortor huhut mamakke rebana. 21 Dialusi si Miryam ma ende ni akka bawa i. Songon on ma endena,

“Marende ma tu Jahowa, ai nungnga monang Ibana jala marmulia.+

Disappatton Ibana do hoda dohot akka tentarana tu laut.”+

22 Dipimpin si Musa ma halak Israel i borhat sian Laut Merah tu Gurun Sur. Mardalan ma nasida di padang belantara i saleleng tolu ari, alai dang adong dapot ni nasida aek. 23 Ujungna sahat ma nasida di Mara.*+ Alai dang boi diinum nasida aek na disi ala paet. I do alana dibahen goar ni inganan i Mara. 24 Marungut-ungut ma nasida tu si Musa.+ Didok ma, “Jadi aha nama inumotta?” 25 Dipangido si Musa ma tu Jahowa asa diurupi nasida.+ Dipatudu Jahowa ma sada hau tu ibana. Disappatton si Musa ma hau i tu aek i, jala gabe manis ma aek i.

Dung i, dibahen Debata ma na masa i gabe contoh di nasida, asa diboto nasida aha na dipangido Debata sian nasida. Diuji Debata ma nasida asa diboto na tutu do nasida mangoloi Ibana manang na dang.+ 26 Didok Debata ma, “Molo sian nasa rohamuna do hamu mangoloi hata ni Jahowa Debatamuna, diulahon hamu na sittong di jolona, diparrohahon hamu akka parettana,+ jala dioloi hamu sude aturanna, dang hukumokku hamu marhite parohon sahit songon na hubahen tu halak Mesir i.+ Ai Au do Jahowa na toktong mambahen hamu sehat.”+

27 Dung i sahat ma nasida di Elim. Adong do disi 12 mata mual dohot 70 hau palem. Markemah ma nasida di jonok ni mual i.

16 Borhat ma halak Israel sian Elim, jala sahat ma nasida di Gurun Sin+ na di holang-kolang ni Elim dohot Sinai. Tikki i, ari na pasappulu limahon di bulan na paduahon dung kaluar nasida sian Mesir.

2 Marungut-ungut ma sude halak Israel tu si Musa dohot tu si Aron di gurun.+ 3 Didok halak Israel ma tu nasida, “Tikki di Mesir, lomonami do mangallang jagal dohot roti.+ Saonari, diboan hamu do hami tu gurun on asa mate alani haraparon. Tumagon hian ma tangan ni Jahowa na mambunu hami di Mesir.”+

4 Didok Jahowa ma tu si Musa, “Bahenokku nama turun roti sian langit songon udan.+ Ikkon kaluar do ganup halak mambuat roti i. Dibuat be ma na cukkup lao allangonna sadari.+ Sian i, botookku ma na dioloi nasida do parettakku manang na dang.+ 5 Di ari na paonomhon,+ ikkon papunguon ni nasida do dua hali loppit godang ni roti i sian na somal dipapungu nasida. Jala ikkon diloppa nasida do sude na dibuatna i di ari i.”+

6 Didok si Musa dohot si Aron ma tu sude halak Israel, “Sadari on, dung botari, botoonmuna ma Jahowa do na mamboan hamu kaluar sian Mesir.+ 7 Manogot, idaonmuna ma hasangapon ni Jahowa. Ai nungnga dibege Jahowa be naung marungut-ungut hamu tu Ibana. Ai so manang na ise hami, boasa gabe tu hami hamu marungut-ungut?” 8 Didok si Musa ma muse, “Tikki botari, lehonon ni Jahowa ma tu hamu jagal. Tikki manogot, lehononna ma tu hamu roti, sappe puas ma hamu mangallang i. Jadi, idaonmuna ma naung dibege Jahowa ungut-ungutmuna i tu Ibana. Ai so manang na ise hami. Jadi, boasa marungut-ungut hamu tu hami? Sasittongna, dang tu hami hamu marungut-ungut, alai tu Jahowa do.”+

9 Didok si Musa ma tu si Aron, “Songon on ma dokkon tu sude halak Israel i, ‘Nungnga dibege Jahowa be ungut-ungutmuna i.+ Alani i, ikkon marpungu do hamu dison.’” 10 Dung sae si Aron makkatai tu sude halak Israel, diida nasida ma doppak gurun. Diida nasida ma hamuliaon ni Jahowa di bagasan ombun.*+

11 Dung i didok Jahowa ma muse tu si Musa, 12 “Nungnga hubege be ungut-ungut ni halak Israel.+ Paboa ma tu nasida, ‘Tikki naeng golap ari,* mangallang jagal ma hamu. Alai tikki manogot, mangallang roti ma hamu sappe puas.+ Sian i, botoonmuna ma ise do sasittongna Jahowa Debatamuna.’”+

13 Botarina i, ro ma burung puyuh manutupi sude perkemahan ni nasida.+ Jala manogotna i, gok ma ombun di sakaliling ni kemah ni nasida. 14 Dung mago ombun i, adong ma biji na halus marserakan songon salju di atas ni tano i.+ 15 Tikki diida halak Israel i, didok nasida ma sama nasida, “Ai aha do on?” Ai dang ditanda nasida manang na aha i. Didok si Musa ma tu nasida, “I do roti na dilehon Jahowa gabe sipanganonmuna.+ 16 Songon on do paretta ni Jahowa, ‘Ikkon papunguon ni ganup halak do nasa na porlu di ibana. Dipapungu ma mangihutton godang ni halak di kemahna be. Sada omer*+ ma tu sahalak.’” 17 Dibahen halak Israel ma songon i, adong do na papunguhon godang, adong do na papunguhon otik. 18 Ditakkari nasida ma na dipapungu nasida i pakke omer. Halak na papunguhon godang, dang lobian. Halak na papunguhon otik, dang hurangan.+ Ai sadia godang na porlu di nasida, nasa i do dipapungu nasida.

19 Didok si Musa ma tu nasida, “Unang adong na manippan roti i sahat tu manogot.”+ 20 Alai, dang dioloi nasida hata ni si Musa. Adong do deba na manippan roti i sahat tu manogot. Gabe bau jala gulokon ma roti i. Alani i, gabe muruk situtu ma si Musa tu nasida. 21 Ganup manogot dipapungu nasida ma roti i sesuai tu na porlu di nasida. Molo dung las ari, malala ma akka na tinggal di tano i.

22 Di ari na paonomhon dibuat nasida ma roti i dua hali loppit godangna,+ dua omer ma tu sahalak. Gabe ro ma akka pamimpin ni halak Israel i tu si Musa jala dipaboa ma na masa i. 23 Alai didok si Musa ma tu nasida, “Songon on do didok Jahowa, ‘Ari maradian* do marsogot, ari Sabat na badia tu Jahowa.+ Sadari on, panggang hamu ma akka na porlu dipanggang, robus hamu ma akka na porlu dirobus.+ Na lobi i, sippan hamu ma tu manogotna i.’” 24 Songon na didok si Musa i, disippan nasida ma i sahat tu manogot. Dang bau roti i jala dang margilok. 25 Didok si Musa ma, “Ari Sabat tu Jahowa do sadari on. Roti na disippan i ma pangan hamu. Ai dang adong dapotmuna i sadari on di luar ni kemahmuna. 26 Holan onom ari do boi dipapungu hamu i. Ai di ari na papituhon, di ari Sabat,+ dang adong dapotmuna i.” 27 Alai di ari na papituhon, adong do na lao tu luar lao papunguhon i. Alai dang adong dapot ni nasida manang aha.

28 Didok Jahowa ma tu si Musa, “Sadia leleng nai hamu dang olo mangulahon parettakku dohot patikku?+ 29 Ingot ma, lao di hamu do diparade Jahowa ari Sabat.+ Alani i do dilehon Ibana tu hamu roti dua hali loppit godangna di ari na paonomhon. Jadi di ari na papituhon, sude halak ikkon di ingananna be. Unang adong na lao manang na tudia.” 30 Alani i maradian ma nasida* di ari na papituhon.+

31 Dibahen halak Israel ma goar ni sipanganon i “manna”.* Songon biji ni ketumbar do manna i. Jala daina songon kue na dicampur madu.+ 32 Didok si Musa ma, “Songon on do paretta ni Jahowa, ‘Sippan hamu ma sada omer manna i, asa adong patuduonmuna tu akka pinopparmuna.+ Idaon ni nasida ma roti na hulehon gabe siallangonmuna di gurun tikki huboan hamu kaluar sian Mesir.’” 33 Didok si Musa ma tu si Aron, “Buat ma baskom jala pamasuk ma tusi sada omer manna. Peakkon ma i di jolo ni Jahowa, asa adong idaonmuna dohot akka pinopparmuna.”+ 34 Dibahen si Aron ma i tu jolo ni poti inganan ni Patik*+ lao disippan, songon na nidok ni Jahowa tu si Musa. 35 Saleleng 40 taon ma halak Israel mangallang manna.+ Dang diallang nasida be i dung sahat nasida tu huta na adong pendudukna.+ Mangallang manna do halak Israel sahat tu na masuk nasida tu parbatasan ni luat Kanaan.+ 36 Sada omer dos do tu saparsappulu epa.*

17 Dung borhat halak Israel sian Gurun Sin,+ marpinda-pinda do nasida songon na diparettahon Jahowa.+ Ujungna, sahat ma nasida di Rapidim.+ Alai dung sahat nasida disi, dang adong aek lao inumon ni nasida.

2 Alani i, gabe marsoal ma halak Israel dohot si Musa.+ Ninna ma, “Dia do aek siinumonnami?” Alai didok si Musa ma, “Boasa gabe tu au hamu muruk? Boasa sai diuji hamu Jahowa?”+ 3 Mauas situtu do dihilala bangso i. Alani i, sai marungut-ungut ma nasida tu si Musa.+ Ninna ma, “Boasa diboan ho hami kaluar sian Mesir? Mate mauas nama hami bahenonmu rap dohot anakkonnami, dohot akka binatang na dipiaro hami.” 4 Martangiang ma si Musa tu Jahowa. Ninna ma, “Aha ma bahenokku tu bangso on? Satokkin nai dangguran ni nasida nama au pakke batu!”

5 Didok Jahowa ma tu si Musa, “Mardalan ma ho di jolo ni bangso i. Boan ma tukkot na pinakkemi tikki mamukkul Sunge Nil.+ Togihon ma piga-piga pangituai* ni halak Israel asa rap dohot ho. 6 Jongjong pe Au di atas ni batu na balga na di Horeb. Attuk ma batu i asa kaluar aek sian i, jala asa adong siinumon ni bangso i.”+ Diulahon si Musa do songon i di jolo ni akka pangituai ni halak Israel. 7 Alani i do dibahen si Musa goar ni inganan i Massa*+ dohot Meriba.*+ Alana marsoal do halak Israel disi dohot si Musa jala diuji nasida do Jahowa.+ Ai didok nasida do, “Tutu do hita didongani Jahowa manang na dang?”

8 Dung i ro ma halak Amalek+ mangalo halak Israel di Rapidim.+ 9 Didok si Musa ma tu si Josua,+ “Pillit ma akka bawa na boi mandongani ho marporang mangalo halak Amalek. Marsogot, jongjong ma au di atas ni dolok i. Hutiop pe tukkot na disuru Debata na sittong i asa boanokku.” 10 Dioloi si Josua do hata ni si Musa i.+ Lao ma ibana marporang mangalo halak Amalek. Jala lao ma si Musa, si Aron, dohot si Hur+ tu pussu ni dolok i.

11 Saleleng tarangkat tangan ni si Musa, sai monang do halak Israel. Alai molo dipaturun ibana tanganna, gabe halak Amalek ma na monang. 12 Tikki loja tangan ni si Musa, dibuat si Aron dohot si Hur ma batu. Hundul ma si Musa disi. Dung i, ditahan si Aron dohot si Hur ma tangan ni si Musa. Sada di kanan, sada di kiri. Alani i boi ma tarangkat tangan ni si Musa sahat tu na bonom mataniari. 13 Talu ma halak Amalek dohot sude na mandongani nasida dibahen si Josua.+

14 Didok Jahowa ma tu si Musa, “Ikkon pamateonku do sude halak Amalek, asa unang adong be nasida di tano on.*+ Surat ma i di sada bukku asa toktong diingot hamu.* Jala paboa ma i muse tu si Josua.” 15 Dung i dibahen si Musa ma sada langgatan jala dibahen ma goarna Jahowa-nissi.* 16 Ai didok do, “Dialo halak Amalek do pamarettaon ni Jahowa.*+ Alani i, gabe marporang ma Jahowa mangalo nasida dohot pinoppar ni nasida.”+

18 Malim ni Midian do si Jetro simatua ni si Musa.+ Dibege ibana do sude na dibahen Debata tu si Musa dohot tu halak Israel. Jala nungnga diboto ibana songon dia Jahowa paluahon halak Israel sian Mesir.+ 2 Andorang so i, disuru si Musa do si Zippora mulak tu jabu ni bapakna. Alani i, si Jetro ma na manjaga si Zippora, istri ni si Musa i 3 rap dohot dua anakna.+ Na sada dibahen ma goarna si Gersom.*+ Ai didok si Musa do, “Nungnga gabe panoppang au di luat na asing.” 4 Na sada nai dibahen ma goarna si Elieser.* Ai didok ibana do, “Debata ni bapakku do na mangurupi au. Dipalua Ibana do au sian podang ni si Firaun.”+

5 Lao ma si Jetro simatua ni si Musa mandapotton si Musa tu gurun, na di jonok ni dolok na dipillit Debata na sittong i.+ Diboan ibana do si Zippora dohot anak ni si Musa na dua i. 6 Dung i, disuru si Jetro+ ma halak paboahon tu si Musa, “Ro nama au mandapotton ho. Huboan do istrim dohot anakmu na dua i.” 7 Didapotton si Musa ma simatuana i. Marsomba ma ibana jala diumma ma simatuana i. Masisukkunan kabar ma nasida, dung i masuk ma nasida tu kemah.

8 Dipaboa si Musa ma tu simatuana i akka na dibahen Jahowa lao paluahon halak Israel.+ Dipaboa ma akka na dibahen Debata tu si Firaun dohot tu halak Mesir. Dipaboa ibana ma sude hasusaan na diadopi nasida saleleng di pardalanan,+ jala songon dia Jahowa paluahon nasida. 9 Las do roha ni si Jetro mambege sude na denggan na dibahen Jahowa tu halak Israel tikki dipalua nasida sian Mesir.* 10 Didok si Jetro ma, “Tapuji ma Jahowa. Ai dipalua Ibana do hamu sian Mesir dohot sian si Firaun. Dipalua Ibana do bangso Israel sian halak Mesir na mambahen nasida susa. 11 Saonari botookku ma umbalga do huaso ni Jahowa sian sude akka debata na asing.+ Ai nungnga hubege akka na dibahen Ibana tu halak na marginjang ni roha tu bangsona.” 12 Dilehon si Jetro ma pelean situtungon dohot akka pelean na asing tu Debata. Dung i ro ma si Aron dohot sude pangituai* ni halak Israel rap mangan dohot si Jetro di jolo ni Debata na sittong.

13 Marsogotna i songon na somal, hundul ma si Musa gabe hakim ni bangso i. Marroan ma nasida tu jolo ni si Musa, mulai sian manogot sahat tu borngin. 14 Diida simatua ni si Musa ma akka na binahen ni si Musa tu bangso i. Ninna ma, “Boasa songon i dibahen ho tu bangso on? Marroan do halak tuson sian mulai manogot sahat tu borngin, alai boasa holan sahalakmu na gabe hakim tu nasida?” 15 Didok si Musa ma tu simatuana i, “Ai na sai ro do bangso i tu au lao mangido tudu-tudu ni Debata. 16 Molo adong parsoalan, ro ma nasida tu au. Au ma na gabe hakim di nasida. Dung i hupaboa ma tu nasida akka paretta dohot patik ni Debata na sittong.”+

17 Didok simatuana i ma tu si Musa, “Dang denggan songon i. 18 Malojahu do ho annon dohot akka halak na ro i. Ai pagodangku do karejomon. Jala dang tolap ho mangulahon i sahalakmu. 19 Saonari tangihon ma hatakkon. Sai didongani Debata ma ho.+ Toktong ma pasahat hata ni bangso on tu Debata na sittong.+ Jala paboa ma parsoalan ni nasida tu Debata na sittong.+ 20 Jala ajari ma nasida taringot patik dohot aturan ni Debata.+ Paboa ma tu nasida dalan na ikkon siihuttonon ni nasida dohot aha na ikkon ulahonon ni nasida. 21 Pillit ma akka bawa na malo,+ jala na mabiar mida Debata, na boi dihaporseai, jala na so mangalului uttung tu dirina sandiri.+ Bahen ma nasida gabe pamimpin ni na sasaribu halak, pamimpin ni na sasaratus halak, pamimpin ni lima pulu halak, dohot pamimpin ni sappulu halak.+ 22 Nasida ma gabe hakim mangurupi ho. Molo adong* parsoalan na gelleng, nasida ma na pasaehon. Alai molo balga do parsoalan i, boanon ni nasida ma i tu ho.+ Gabe neang ma karejom molo dibagi ho karejomi tu halak na asing.+ 23 Molo diulahon ho songon i, jala hombar do i tu lomo ni roha ni Debata, dang borat be ulaonmu. Jala akka halak na ro i pe, las ma rohana tikki mulak.”

24 Denggan do hata ni simatuana i di roha ni si Musa jala pittor diulahon ibana ma songon i. 25 Dipillit si Musa ma akka bawa na malo sian halak Israel jala dibahen ma nasida gabe pamimpin ni na sasaribu halak, pamimpin ni na sasaratus halak, pamimpin ni lima pulu halak, dohot pamimpin ni sappulu halak. 26 Dohot ma nasida gabe hakim ni bangso i. Molo adong parsoalan na gelleng, nasida ma na pasaehon. Alai molo adong parsoalan na balga, diboan nasida ma i tu si Musa.+ 27 Dung i, dipaborhat si Musa ma simatuana i+ mulak tu hutana.

19 Dung tolu bulan halak Israel kaluar sian Mesir, sahat ma nasida di Gurun Sinai. 2 Borhat ma nasida sian Rapidim,+ jala laos di ari i ma nasida sahat di Gurun Sinai. Markemah ma nasida disi, di jonok ni Dolok Sinai.+

3 Dung i nakkok ma si Musa tu dolok i mandapotton Debata na sittong. Sian dolok i,+ dijou Jahowa ma ibana. Ninna ma, “Songon on ma dokkon tu pinoppar ni si Jakkob, halak Israel i, 4 ‘Nungnga diida hamu na hubahen tu halak Mesir.+ Jala nungnga diida hamu songon dia Au mamboan hamu tuson. Huboan do hamu dos songon lali na mamboan anakna di habongna.+ 5 Molo toktong dioloi hamu sude hatakku, jala diulahon hamu parjanjian i, sian sude bangso hamu ma na gabe appunakku na massai arga.*+ Ai appunakku do sude tano on.+ 6 Gabe harajaon na diparetta akka malim ma hamu jala bangso na badia di Au.’+ Songon i ma dok tu halak Israel.”

7 Dung i, lao ma si Musa. Dijou ibana ma akka pangituai* ni bangso i, jala dipaboa ibana ma sude paretta ni Jahowa tu nasida.+ 8 Setuju ma bangso i lao mandok, “Rade do hami lao mangulahon sude paretta ni Jahowa.”+ Dung i dipaboa si Musa ma alus ni nasida i tu Jahowa. 9 Didok Jahowa ma muse tu si Musa, “Ida ma! Ro nama Au di bagasan ombun na golap lao mandapotton ho. Ai molo dibege nasida Au makkatai dohot ho, porsea ma nasida tu ho.” Dung i, dipaboa si Musa ma hata ni bangso i tu Jahowa.

10 Didok Jahowa ma tu si Musa, “Dapotton ma bangso i. Dok ma tu nasida asa diparade* nasida dirina lao manomba Au sadari on dohot marsogot. Jala ikkon disussi nasida do baju ni nasida. 11 Jala di ari na patoluhon i pe ikkon rade do nasida. Ai di ari i, ro do Jahowa tu Dolok Sinai tu jolo ni bangso i. 12 Bahen ma batas di sakaliling ni dolok i. Dok ma tu nasida, ‘Unang adong na nakkok tu dolok i manang na manjama batas na dibahen i. Ai manang ise na manjama dolok i ikkon dipamate do. 13 Unang jama hamu halak na mangalo i. Alai lempari hamu ma ibana pakke batu manang tusuk* hamu. Ikkon dipamate do ibana,+ jolma manang binatang.’ Alai molo dung dibege hamu soara ni tarompet,*+ nakkok ma hamu tu dolok i.”

14 Turun ma si Musa sian dolok i mandapotton bangso i. Disuru ibana ma asa diparade bangso i diri ni nasida lao manomba Debata. Jala disussi nasida ma baju ni nasida.+ 15 Didok si Musa ma tu bangso i, “Mangarade ma hamu di ari na patoluhon. Jala unang ma adong na mangulahon seks.”*

16 Di ari patoluhon tikki manogot, ro ma sillam dohot ronggur. Adong ma ombun na hapal+ di dolok i. Jala tarbege ma soara ni tarompet na gogo, gabe makkahitir+ ma sude bangso i di kemah ni nasida. 17 Disuru si Musa ma kaluar bangso i lao mandapotton Debata na sittong i. Jongjong ma nasida di toru ni dolok i. 18 Ro ma Jahowa di bagasan api jala gok ma timus di Dolok Sinai i. Nakkok ma sude timusna i songon timus na sian panutungan.+ Dung i, humutur ma sude dolok i massai gogo.+ 19 Tikki lam gogo soara ni tarompet i, makkatai ma si Musa jala dialusi Debata na sittong i do* ibana.

20 Ro ma Jahowa tu atas ni Dolok Sinai. Disuru Jahowa ma si Musa nakkok tu atas ni dolok i. Gabe nakkok ma si Musa.+ 21 Didok Jahowa ma tu si Musa, “Turun ma ho. Dokkon ma tu bangso i asa unang dilewati nasida batas i lao mangida Jahowa. Ai molo diulahon nasida i mate do nasida. 22 Jala dok ma tu akka malim na jotjot ro mandapotton Jahowa, ikkon diparade nasida do dirina lao mandapotton Au, asa unang dipamate* Jahowa nasida.”+ 23 Dung i didok si Musa ma tu Jahowa, “Dang boi be bangso i nakkok tu Dolok Sinai. Ai nungnga didok Ho, ‘Bahen ma tanda na gabe batas di sakaliling ni dolok i, jala bahen hamu ma i badia.’”+ 24 Alai didok Jahowa ma tu ibana, “Turun ma jo ho. Boan ma si Aron tuson. Alai dok ma tu akka malim dohot tu bangso i asa unang dilewati nasida batas i lao mangida Jahowa. Ai pamateonku+ do nasida molo dibahen nasida songon i.” 25 Turun ma si Musa jala dipaboa ma sudena i tu nasida.

20 Dung i dipaboa Debata ma sude hata on tu bangso Israel:+

2 “Au do Jahowa Debatamuna, na mamboan hamu kaluar sian Mesir ingananmuna gabe hatoban.*+ 3 Holan Au do na ikkon disomba hamu. Unang somba debata na asing.*+

4 “Unang bahen hamu patung,* manang gambar na suman tu manang aha pe na adong di langit, di tano on, manang na adong di aek di toru ni tano on.+ 5 Unang marsomba hamu tu akka i. Jala unang olo hamu ditogihon lao manomba i.+ Ai Au do Jahowa Debatamuna. Hupangido do tu hamu asa holan Au Debata na disomba hamu.*+ Ai molo adong na marsogo ni roha tu Au, pasombuonku ma anakna, pahoppuna, dohot ninina manaon hasusaan alani dosana i. 6 Alai tu akka halak na patuduhon holong tu Au jala na mangulahon parettakku,+ patuduokku do holong* tu ibana sahat tu marribu generasina.

7 “Unang ma sembarangan mamakke goar ni Jahowa Debatamuna.+ Ai dihukum Jahowa do halak na sembarangan mamakke goar ni Debata.+

8 “Ingot hamu ma mangulahon ari Sabat asa toktong i badia.+ 9 Boi do hamu karejo saleleng onom ari.+ 10 Alai di ari papituhon, i ma ari Sabat tu Jahowa Debatamuna. Dang boi hamu karejo. Songon i nang ianakkonmuna, hatobanmuna, akka binatang, dohot akka panoppang na rap tinggal dohot hamu.+ 11 Ai saleleng onom ari do Jahowa mambahen langit, tano, laut dohot nasa isina. Alai di ari na papituhon i maradi do Ibana.+ Alani i do, dipasu-pasu Jahowa ari Sabat i jala dibahen gabe ari na badia.

12 “Pasangap ma omakmu dohot bapakmu,+ asa ganjang umurmuna di luat na nilehon ni Jahowa Debatamuna tu hamu.+

13 “Unang hamu mambunu.+

14 “Unang hamu mangalakkup.+

15 “Unang hamu manakko.+

16 “Unang hatahon na so tutu taringot donganmu tikki disuru hamu gabe saksi.+

17 “Unang tubu di roham lao mambuat jabu ni donganmu. Unang tubu di roham lao mambuat istri ni donganmu,+ manang hatobanna, lombuna, dohot halodena. Jala unang tubu di roham naeng mambuat manang aha pe na adong di donganmu.”+

18 Diida nasida ma sillam jala dibege nasida ma ronggur dohot tarompet. Diida nasida ma muse martimus dolok i. Gabe makkahitir ma nasida. Jala dang olo nasida jonok tu dolok i.+ 19 Didok nasida ma tu si Musa, “Ho ma na makkatai tu hami, ditangihon hami pe. Unang ma Debata na makkatai tu hami. Ai mabiar do hami mate.”+ 20 Didok si Musa ma tu nasida, “Unang mabiar hamu. Ai na lao manguji hamu do umbahen na ro Debata na sittong i.+ Asa toktong dihabiari hamu Ibana jala asa unang diulahon hamu dosa.”+ 21 Toktong do mandao bangso i sian dolok i. Alai lam dipajonok si Musa do tu ombun na golap i, ai disi do Debata na sittong i.+

22 Dung i didok Jahowa ma tu si Musa, “On ma dok tu bangso Israel, ‘Nungnga diida hamu sandiri naung makkatai Au tu hamu sian surgo.+ 23 Unang ma dibahen hamu debata na asing na sian perak dohot mas,+ ai holan Au do na ikkon sombaonmuna. 24 Bahen ma sada langgatan na sian tano di Au. Pelehon ma disi pelean situtungon, pelean pardamean,* lombu, dohot biru-biru. Inganan na dia pe na hupillit gabe parningotan ni goarhu,+ tusi do Au ro jala pasu-pasuokku ma hamu. 25 Molo dibahen hamu langgatan di Au na sian batu, unang ma pakke batu naung dipotong* mamakke alat.+ Ai dang badia be i di Au molo nungnga dipotong hamu pakke pahat. 26 Unang ma pakke hamu tangga tikki nakkok tu langgatan, asa unang tarida hailaonmuna.’

21 “Akka on ma patik na ikkon paboaonmu tu nasida:+

2 “Molo halak Heber do na dituhor hamu lao gabe hatoban,+ gabe hatobanmu ma ibana saleleng onom taon. Alai di taon na papituhon, ikkon paluaonmu do ibana dang pola manggarar manang aha.+ 3 Molo sahalakna do ro, ikkon sahalakna ma lao. Molo diboan ibana do istrina tikki ro, ikkon dohot ma istrina i lao dohot ibana. 4 Alai molo tuanna i do na mangalehon istri tu ibana, jala tubu anakna manang boruna, dang boi boanonna istri dohot anakkonna i. Ai appuna ni tuanna i do istrina dohot dakdanak i.+ 5 Alai molo dang olo hatoban i lao jala didok, ‘Holong do rohakku tu tuanku, tu istrikku, dohot tu anakkokku. Alani i toktong ma au gabe hatoban ni tuanku.’+ 6 Ikkon diboan tuanna ma hatoban i tu jolo ni pintu manang tu tiang ni pintu. Dung i ditusuk tuanna i ma pinggol ni hatoban i. Gabe hatoban ni tuanna ma ibana saleleng ni ngoluna. Debata na sittong i ma na gabe saksi.*

7 “Molo adong na manggadis boruna gabe hatoban, dang boi boruna i malua songon aturan na marlakku tu hatoban bawa. 8 Molo dang lomo roha ni tuanna i tu borua i jala dang olo tuanna mambahen ibana gabe gundikna, ikkon paloason ni tuanna i do halak na asing manobus ibana. Ai dang marhak tuanna i manggadis ibana tu halak na sian bangso na asing, ala dang diulahon tuanna i be janji ni nasida di mulana i. 9 Molo dibahen ibana hatoban borua i gabe istri ni anakna, ikkon bahenonna do hatoban borua i songon boruna. 10 Molo mangoli muse anakna i* tu borua na asing, ikkon sarihononna do istrina na parjolo i. Ikkon lehononna do sipanganon, baju, jala ikkon ulahononna do tanggung jawab+ ni sahalak suami* tu istrina na parjolo i. 11 Molo dang dilehon ibana na tolu i, boi do lao borua i dang pola manggarar manang aha.

12 “Molo adong na mamukkul donganna sappe mate, ikkon dipamate do ibana.+ 13 Alai molo dang sengaja ibana mangulahon i, jala dipasombu Debata do i masa, boi do ibana lari tu inganan na lao hutottuhon di hamu.+ 14 Molo adong sahalak bawa na muruk tu donganna jala gabe dibunu donganna i,+ ikkon dipamate do bawa i. Nang pe nungnga ro ibana martabuni tu langgatanku.+ 15 Ikkon dipamate do manang ise pe na mamukkul omakna manang bapakna.+

16 “Ikkon dipamate do manang ise pe na tardapot manculik,+ makkurung,+ manang manggadis jolma.+

17 “Ikkon dipamate do manang ise pe na mamburai* omakna manang bapakna.+

18 “Molo adong halak na marbada jala diattuk na sada ma donganna pakke batu manang ditinju,* gabe peak donganna i alai dang mate, ikkon songon on do bahenonmu tu ibana: 19 Molo boi dope ibana jongjong jala mardalan tu luar mamakke tukkot, dang pola dihukum donganna na mamukkul i. Alai ikkon balanjoanna ma donganna na dipukkul i sahat tu na boi muse donganna i karejo.

20 “Molo adong na mamukkul hatobanna bawa manang hatobanna borua sappe mate, ikkon dihukum do tuanna i.+ 21 Alai molo dang mate hatobanna i di bagasan sadari manang dua ari, dang pola dihukum tuanna i. Ai appunana do i.

22 “Molo adong dua halak na marbada, jala hona tu borua na hamil, gabe tubu anak ni borua i hape dang tikkina dope,+ alai mangolu do borua i dohot poso-posona i, ikkon lehonon ni na marbada i ma gatti rugi tu suami ni borua i. Ikkon gararonna do i nasa na dipangido ni suami ni borua i di jolo ni akka hakim.+ 23 Alai molo adong do na mate, ikkon hosa do gatti ni hosa,+ 24 mata gatti ni mata, ngingi gatti ni ngingi, tangan gatti ni tangan, pat gatti ni pat.+ 25 Molo adong na mambahen donganna tartutung, lukka, manang marsalaon, ikkon songon i do muse dibahen tu ibana.

26 “Molo adong halak na mamukkul mata ni hatobanna bawa manang hatobanna borua, jala gabe sega matana i, ikkon dipaloas do hatobanna i lao. Dibebasson ma ibana gatti ni matana na sega i.+ 27 Molo adong halak na mamukkul hatobanna bawa manang hatobanna borua jala gabe ropang ngingi ni hatobanna i, ikkon paloasonna do lao hatobanna i. Dibebasson ma ibana gatti ni ngingina na maropang i.

28 “Molo adong lombu na mananduk bawa manang borua sappe mate, ikkon pamateon do lombu i.+ Unang pangan hamu jagalna. Jala unang pola dihukum nappunasa lombu i. 29 Alai molo adong lombu naung jotjot mananduk halak, jala nungnga dipasingot halak nappunasa lombu i, hape dang dijaga ibana lombuna i, jala gabe mate halak dibahen lombuna i, ikkon didangguri do lombu i pakke batu sappe mate, jala ikkon dipamate do nappunasa lombu i. 30 Molo dipangido tobusan sian nappunasa lombu i, asa unang dipamate ibana, ikkon gararonna do tobusan i nasa na dipangido sian ibana. 31 Marlakku do hukum on, nang pe dakdanak na ditanduk lombu i. 32 Molo hatoban do na ditanduk lombu i, ikkon gararon ni nappunasa lombu i do 30 sekel* tu tuan ni hatoban i. Dung i, ikkon dilempari do lombu i sappe mate.

33 “Molo adong halak na mambukka panutup ni lubang manang mambahen lubang, alai dang ditutup ibana muse lubang i, jala gabe dabu lombu manang halode tu lubang i, 34 ikkon gararon ni na mambahen lubang i do gatti rugi+ tu nappunasa lombu manang halode i. Jala gabe di ibana ma binatang na mate i. 35 Molo mate lombu ni sasahalak dibahen lombu ni donganna, ikkon digadis do lombu na mangolu i. Dung i dibagi dua ma tuhorna, jala ikkon dibagi dua do muse lombu na mate i. 36 Molo nungnga jotjot lombu i mananduk, alai dang olo nappunasa lombu i manjaga lombuna, ikkon gararon ni nappunasa lombu i do gatti rugi. Dilehon ibana ma lombu gatti ni lombu, jala di ibana ma lombu na mate i.

22 “Molo adong na manakko sada lombu manang sada biru-biru, dung i diseat manang digadis, ikkon gattionna do i. Molo lombu do na ditakko, ikkon gattionna do i dohot lima lombu. Alai molo biru-biru do, ikkon gattionna do i dohot opat biru-biru.+

2 (“Molo adong panakko+ na tardapot manakko di tikki borngin, dung i dibalbali ibana sappe mate, dang sala halak na pamatehon i. 3 Alai molo dung bissar do mataniari masa i, marsala ma na pamatehon i.)

“Ikkon gararon ni panakko i do gatti rugi. Molo dang adong artana, ikkon digadis ma ibana gabe hatoban lao manggarar na ditakkona i. 4 Molo mangolu dope lombu, manang halode, manang biru-biru na ditakkona i, ikkon lehononna do gatti rugi dua hali loppit.

5 “Molo adong sasahalak mamboan binatang na dipiarona lao mangallang rumput di ladang manang di porlak anggur, jala dipasombu ibana binatang i mangallang suan-suanan di ladang ni halak, ikkon lehononna do hasil panen na dumenggan sian ladangna gabe gatti rugi tu nappunasa ladang manang porlak anggur i.

6 “Molo adong halak na manutung ramba, hape gabe rarat apina jala gabe ditutung hasil panen, suan-suanan na lao dipanen, dohot akka na adong di ladang i, ikkon gararon ni na manutung i do gatti rugi.

7 “Molo adong halak na manippan hepeng, manang barang tu donganna, hape ditakko halak sian jabuna, jala habotoan panakkona i, ikkon gararon ni panakko i do gatti rugi dua hali loppit.+ 8 Molo dang dapot panakkona i, ikkon diboan do donganna i tu jolo ni hakim. Dung i dipareso ma ibana di jolo ni Debata,+ lao mamboto ibana do na mambuat i manang na dang. 9 Molo adong sasahalak manudu donganna mambuat barang, lombu, halode, biru-biru, baju manang akka na asing na mago, ikkon lao do nasida na dua tu jolo ni Debata na sittong lao mamboto ise do nappunasa barang i sasittongna.+ Dung i dipaboa Debata ma ise na sala. Ikkon gararon ni na sala i do gatti rugi dua hali loppit tu donganna i.+

10 “Molo adong halak na manuru donganna manjaga halode, lombu, biru-biru, manang binatang na asing, hape gabe mate binatang i, manang lukka, manang ditakkup halak tikki dang adong na mangida, 11 ikkon diboan do nasida na dua tu jolo ni hakim. Ikkon marsumpa ma donganna i di jolo ni Jahowa mandok na so dihahua ibana binatang i. Ikkon porsea do nappunasa binatang i tu sumpana i. Jala dang pola gararon ni donganna i gatti rugi.+ 12 Alai molo tutu do ditakko binatang i sian ibana,* ikkon gararonna do gatti rugi tu nappunasa i. 13 Alai molo lukka do binatang i, manang mate dibahen binatang buas dang pola porlu gararonna gatti rugi. Alai ikkon boanonna do binatang na lukka manang na mate i gabe bukti.

14 “Molo adong na maminjam binatang sian donganna, hape gabe lukka manang mate binatang i tikki dang disi nappunasa, ikkon gararon ni na maminjam i do gatti rugi. 15 Alai molo disi do nappunasa binatang i dang pola gararonna gatti rugi. Molo na disewa do binatang i, sewana i ma na gabe gatti rugina.

16 “Molo adong sahalak bawa na manggoda anak boru na so martunangan dope, gabe mangulahon seks nasida, ikkon gararon ni bawa i do sinamot, jala gabe istrina ma borua i.+ 17 Alai molo dang olo bapak ni borua i mangalehon boruna gabe istri ni bawa i, ikkon toktong do gararonna gatti rugi nasa sinamot ni borua i.

18 “Unang pasombu hamu mangolu akka boru-boru tukkang sihir.+

19 “Ikkon dipamate do manang ise pe na mangulahon seks dohot binatang.+

20 “Ikkon dipamate do manang ise pe na mangalehon pelean tu debata na asing, asing ni tu Jahowa.+

21 “Unang jahat hamu tu halak panoppang jala unang susai hamu nasida.+ Ai hamu pe panoppang do tikki di Mesir.+

22 “Unang susai hamu ina na mabalu manang dakdanak na so marama.*+ 23 Molo disusai hamu nasida, jala gabe mangalu-alu nasida tu Au, tangihonokku do nasida.+ 24 Muruk ma Au tu hamu. Pamateonku ma hamu mamakke podang, asa mabalu istrimi jala gabe dang adong be bapak ni anakkonmu.

25 “Molo dilehon hamu hepengmu dipinjam halak na pogos* na sian bangsokki, na tinggal rap dohot hamu, unang jalo anak ni hepengmi. Unang gabe songon halak na paanakkon hepeng* hamu.+

26 “Molo adong na marutang tu hamu jala dibuat hamu bajuna gabe jaminan,+ ikkon paulakonmu do i andorang so bonom mataniari. 27 Ai holan i do baju na lao pakkeonna mambahen las dagingna. Molo so adong i dang adong be pakkeonna lao modom.+ Molo mangalu-alu ibana tu Au tangihonokku do ibana. Ai parasi roha* do Au.+

28 “Unang burai* hamu Debata,+ jala unang burai hamu akka pamimpin* ni bangsomuna.+

29 “Unang ma ganggu roham lao mangalehon pelean sian hasil panenmu, miakmu, dohot anggurmu na godang i.+ Jala ikkon lehononmu do anakmu bawa na siakkangan tu Au.+ 30 Songon on ma bahen tu anak ni lombu dohot anak ni biru-biru jantan na parjolo tubu:+ Pasombu ma anakna i rap dohot indukna saleleng pitu ari. Alai di ari na paualuhon, lehon ma i tu Au.+

31 “Ikkon gabe bangso na badia do hamu di jolokku.+ Unang pangan hamu binatang naung mate diallang binatang buas.+ Alai lehon hamu ma i tu biang.

23 “Unang dohot hamu pararatton barita na so sittong.+ Jala unang olo hamu gabe saksi na paboahon na so sittong lao mangurupi halak na jahat.+ 2 Unang ihutton halak na mangulahon na jahat, nang pe godang na mangulahon i. Molo gabe saksi ho, unang paboa na so sittong. Molo diulahon ho i, na papeolhon hukum do ho disi. 3 Unang marpihak ho tu manang ise pe tikki pasaehon parsoalan ni halak na pogos.+

4 “Molo diida ho lilu lombu ni musum manang halodena, paulak ma i tu ibana.+ 5 Molo diida hamu madabu halode ni halak na marsogo ni roha tu hamu, ala paborattu siboanonna, unang pasombu jala unang tinggalhon ibana. Alai urupi ma ibana mangangkat boban ni halode i.+

6 “Unang papeol hukum tikki pasaehon parsoalan ni na pogos.+

7 “Unang dohot hamu mandok hata na so sittong. Jala unang alani hamu, gabe hona bunu halak na so marsala dohot halak na sittong. Ai dang dohonokku sittong* halak na mangulahon na jahat.+

8 “Unang olo hamu disogok. Molo olo sasahalak disogok, gabe dang boi be diida ibana dia na sittong. Jala boi do gabe muba keputusan ni halak na sittong ala disogok.+

9 “Unang bahen susa halak panoppang. Diboto hamu do songon dia haccitna gabe halak panoppang. Ai panoppang do hamu najolo di Mesir.+

10 “Saleleng onom taon, sabur ma boni di ladang jala buat ma hasilna.+ 11 Di taon na papituhon, pasombu hamu ma jala unang ula hamu ladang i. Manang aha pe na tubu disi, pasombu ma i allangon ni na pogos. Molo adong na tinggal, pasombu ma i allangon ni binatang liar. Songon i ma bahen hamu tu porlak anggurmu dohot tu porlak jetunmu.

12 “Holan saleleng onom ari do hamu boi karejo. Alai di ari papituhon, ikkon maradi do hamu karejo. Alani i, boi ma maradi lombumuna, halode, akka anak ni hatobanmuna, dohot halak panoppang na tinggal rap dohot hamu, asa mulak gogo ni nasida.+

13 “Ikkon ulahononmuna do sude na hudok tu hamu.+ Unang jou hamu goar ni akka debata na asing jala unang kaluar i sian pamanganmuna.+

14 “Di bagasan sataon, ikkon bahenonmuna do tolu hali perayaan lao pasangappon Au.+ 15 Ikkon bahenonmuna do Perayaan Roti na So Marragi.+ Bahen hamu ma i di tikki naung ditottuhon, di bulan Abib.*+ Ai di tikki i do hamu kaluar sian Mesir. Ikkon mangallang roti na so marragi do hamu saleleng pitu ari, songon naung huparettahon tu hamu. Jala molo dang adong diboan hamu manang aha, dang boi hamu ro tu jolokku.+ 16 Ikkon bahenonmuna do muse Perayaan di Mula ni Musim Panen.* Bahen ma i tikki dibuat hamu hasil na parjolo sahali sian ladangmuna.+ Jala di ujung ni taon, bahen hamu ma Perayaan di Ujung ni Musim Panen.* Bahen ma i tikki dipapungu hamu hasil panen na parpudi sian ladangmuna.+ 17 Tolu hali di bagasan sataon, ikkon ro do sude bawa tu jolo ni Jahowa, Tuan na sittong i.+

18 “Unang pelehon manang aha pe na marragi rap dohot mudar ni binatang na lao dipelehon tu Au. Jala unang sippan sahat tu manogot tabo-tabo ni binatang na dipelehon tu Au tikki perayaan i.

19 “Ikkon boanonmuna do tu jabu ni Jahowa Debatamuna hasil panen na parjolo jala na dumenggan sian ladangmuna.+

“Unang robus hamu anak ni hambing rap dohot susu ni indukna.+

20 “Husuru do suru-suruan di jolomuna,+ lao manjaga hamu di pardalanan, jala manogu-nogu hamu tu inganan naung huparade di hamu.+ 21 Parrohahon hamu ma ibana jala oloi hamu hatana. Ai di bagasan goarhu do ibana ro. Unang alo hamu ibana. Ai dang na lao salpuhononna hasalaanmuna i.+ 22 Molo toktong do dioloi hamu ibana, jala diulahon hamu sude hatakku, gabe musukku ma musumuna jala gabe alokku ma halak na mangalo hamu. 23 Suruokku ma suru-suruakki di jolomuna lao mamboan hamu tu luat ni halak Amori, halak Het, halak Perisi, halak Kanaan, halak Hevi, dohot halak Jebus. Ai pamateonku nama nasida sude.+ 24 Unang ma marsomba hamu tu akka debata ni nasida. Jala unang ma targoda lao manomba akka i. Unang ihutton akka na diulahon nasida.+ Ikkon dihancurhon hamu do akka patung dohot akka tugu sisombaon ni nasida.+ 25 Ikkon sombaonmuna do Jahowa Debatamuna,+ asa hupasu-pasu hamu jala lehonokku ma di hamu sipanganon dohot siinumon+ jala bahenokku ma dao sahit sian hamu.+ 26 Dang pasombuonku adong borua na keguguran manang na mandul di luatmuna.+ Jala bahenokku ma ganjang umurmuna.

27 “Andorang so sahat dope hamu, nungnga dibege akka bangso i taringot tu Au, jala mabiar situtu do nasida.+ Bahenokku do gaor akka bangso na mangalo hamu. Bahenokku ma talu musum jala lari sian hamu.+ 28 Andorang so sahat hamu disi, bahenokku ma musumuna i mabiar.*+ Palaookku ma halak Hevi, halak Kanaan, dohot halak Het sian jolomuna.+ 29 Dang di bagasan sataon palaookku nasida sian luat i, asa unang gabe tarulang luat i, jala gabe lam godang binatang buas na mangganggu hamu.+ 30 Dang sahali sude nasida palaookku sian jolomuna. Alai otik-otik do nasida palaookku, sahat tu na lam godang pinopparmuna jala boi mangingani sude luat i.+

31 “On ma batas ni luat na lao lehonokku tu hamu. Batasna mulai sian Laut Merah sahat tu laut ni halak Palistim. Jala mulai sian gurun sahat tu Sunge Euprat.+ Ai na lao pasahatokku nama sude penduduk ni luat i tu hamu. Jala usironmuna ma nasida sian jolomuna.+ 32 Unang bahen hamu parjanjian tu nasida dohot tu debata ni nasida.+ 33 Dang boi nasida tinggal di luatmuna. Ai boi do nasida mambahen hamu mardosa tu Au. Molo disomba hamu debata ni nasida, parohon jea do i tu hamu.”+

24 Didok Jahowa ma tu si Musa, “Nakkok ma ho rap dohot si Aron, si Nadab, si Abihu+ rap dohot 70 pangituai* ni halak Israel tu dolok i. Jala marsomba ma hamu tu Au sian na dao. 2 Holan ho do na boi ro jonok tu Jahowa. Alai na asing i, dang boi ro jonok tu Au. Jala dang boi ro halak Israel na tinggal i nakkok mangihutton ho.”+

3 Ro ma si Musa mandapotton bangso i. Dipaboa ibana ma sude hata ni Jahowa dohot sude hukum na dilehon Ibana tu nasida.+ Dung i, sada ma roha ni bangso i mandok, “Rade do hami lao mangulahon sude paretta ni Jahowa.”+ 4 Disurat si Musa ma sude hata ni Jahowa i.+ Marsogotna i, tibu ma ibana dungo, dibahen ibana ma sada langgatan di toru ni dolok i. Jala disusun ibana ma 12 batu parningotan mangihutton godang ni marga ni Israel na 12 i. 5 Dipillit si Musa ma akka doli-doli ni halak Israel. Jala disuru ma nasida mangalehon pelean situtungon, dohot akka lombu jantan gabe pelean pardamean*+ tu Jahowa. 6 Dung i, dibuat si Musa ma satonga mudar ni binatang na dipelehon i. Dibahen ibana ma i tu baskom. Jala mudar na satonga nai dipispisson ibana ma tu langgatan. 7 Dibuat si Musa ma bukku parjanjian jala gogo ma dijaha ibana di jolo ni bangso i.+ Dung i, didok bangso i ma, “Rade do hami mangoloi jala mangulahon sude paretta ni Jahowa.”+ 8 Dibuat si Musa ma mudar ni binatang i jala dipispisson ma tu bangso i.+ Didok ibana ma, “Mudar on ma na mambahen sah parjanjian na dibahen Jahowa tu hamu, marhite akka paretta na dibege hamu nakkin.”+

9 Nakkok ma si Musa, si Aron, si Nadab, si Abihu, rap dohot 70 pangituai ni Israel tu dolok i. 10 Diida nasida do Debata ni halak Israel.+ Di toru ni patna, adong do songon lantai na sian batu safir, na marsinondang songon langit na tiur.+ 11 Di tikki mangan minum akka pamimpin ni halak Israel i+ diida nasida ma Debata na sittong di bagasan parnidaan. Alai, dang dihahua* Debata nasida.

12 Didok Jahowa ma tu si Musa, “Nakkok ma ho tu dolok mandapotton Au. Ai naeng lehonokku do tu ho batu. Di batu i do naeng suratokku patik dohot akka paretta na lao ulahonon ni bangso i.”+ 13 Borhat ma si Musa dohot si Josua+ na mangurupi ibana i. Jala nakkok ma si Musa tu dolok na dipillit Debata na sittong i.+ 14 Alai nungnga didok si Musa hian tu akka pangituai ni halak Israel i, “Paima hamu ma dison, sahat tu na mulak hami.+ Adong do si Aron dohot si Hur+ mandongani hamu. Molo adong parsoalan na balga juppangi hamu ma nasida.”+ 15 Nakkok ma si Musa tu dolok. Tikki i, ditutupi ombun na hapal do dolok i.+

16 Sai maringanan do hasangapon ni Jahowa+ di Dolok Sinai.+ Ditutupi ombun na hapal do dolok i saleleng onom ari. Di ari na papituhon, sian tonga-tonga ni ombun i, dijou Debata ma si Musa. 17 Diida halak Israel do hasangapon ni Jahowa i. Diida nasida do i songon api na marsigorgor di pussu ni dolok i. 18 Torus ma si Musa mardalan nakkok tu pussu ni dolok i,+ sappe ditutupi ombun i ma ibana. Disi ma ibana saleleng 40 ari, 40 borngin.+

25 Dung i didok Jahowa ma tu si Musa, 2 “Paboa ma tu halak Israel asa dilehon sumbangan tu Au. Papungu ma sumbangan sian ganup halak na olo mangalehon sian na taronjar ni rohana.+ 3 Akka on ma sumbangan na boi jaloonmu sian nasida: mas,+ perak,+ tombaga,+ 4 bonang na balau, wol na ungu,* bonang na merah, bonang linen na halus, ibbulu ni hambing, 5 kulit ni biru-biru jantan na diwarnai pakke warna merah, kulit ni anjing laut, hau akasia,+ 6 miak na dipakke tu lampu,+ miak balsam* na dipakke tu miak na badia,*+ dohot na dipakke tu dupa na angur,+ 7 batu oniks, dohot akka batu na asing na lao dibahen tu baju epod+ dohot tu panutup ni andora.*+ 8 Ikkon bahenonmuna do inganan na badia di Au, jala maringanan* ma Au di tonga-tongamuna.+ 9 Paboaokku do tu hamu cara mambahen tabernakel i, sude perlengkapan, dohot alat-alatna. Alani i, ikkon bahenonmuna do i dos songon rancangan na hupaboa tu hamu.+

10 “Bahen ma poti parpadanan sian hau akasia. Ganjangna dua satonga asta,* bidangna sada satonga asta, jala timbona sada satonga asta.+ 11 Lappis ma poti i sian bagasan dohot sian luar mamakke mas murni.+ Bahen ma bingkai na sian mas jala lokkotton ma i tu bagian parginjang di sakaliling ni poti i.+ 12 Bahen ma opat golang na sian mas. Dung i lokkotton ma i tu ginjang ni pat ni poti i, dua di sabola kiri, dua di sabola kanan. 13 Bahen ma akka hau pangusung ni poti i sian hau akasia, jala lappis ma i mamakke mas.+ 14 Pamasuk ma hau pangusung i tu golang-golang na di sapping ni poti i, asa boi diangkat poti i. 15 Pasombu ma lokkot torus hau pangusung i di golang-golang i. Dang boi paluaonmuna hau i sian i.+ 16 Pamasuk ma tu bagasan ni poti i akka batu na lao hulehon i tu ho. Di batu i do suratokku akka patikku.+

17 “Bahen ma panutup ni poti i sian mas murni. Ganjangna dua satonga asta jala bidangna sada satonga asta.+ 18 Bahen ma dua patung kerubim* sian mas di ganup ujung ni tutup ni poti i.+ Ikkon ditopa hamu do patung i. 19 Bahen ma patung kerubim na dua i di dua ujung ni tutup ni poti i. Ganup ujung adong sada patung kerubim. 20 Ikkon marsiadop-adopan do patung kerubim na dua i, jala unduk do bohi ni nasida mangida panutup ni poti i. Herbang do habong ni patung kerubim i tu ginjang manghukkupi panutup ni poti i.+ 21 Tutup ma poti i mamakke panutup i.+ Sippan ma tu bagasan poti i batu na lao hulehon tu ho. Ai di batu i do surattonokku akka patikku. 22 Ro ma Au tu ginjang ni panutup ni poti i, jala sian i ma Au makkatai tu ho.+ Jala sian tonga-tonga ni kerubim na dua i, na di poti inganan ni Patik i ma Au paboahon tu ho sude paretta na ikkon paboaonmu tu bangso Israel.

23 “Bahen ma muse sada meja+ sian hau akasia. Ganjangna dua asta, bidangna sada asta, jala timbona sada satonga asta.+ 24 Lappis ma meja i mamakke mas murni, jala bahen ma bingkai na sian mas di bagian parginjang di sakaliling ni meja i. 25 Buat ma papan nasa bidang ni talapak ni tangan.* Bahen ma i di sakaliling ni meja i. Jala bahen ma bingkai na sian mas di bagian toru, di pinggir ni papan i. 26 Bahen ma opat golang na sian mas. Jala pasang ma i tu opat sudut pardomuan ni pat ni meja i. 27 Ikkon jonok do golang-golang i tu papan na di pinggir ni meja i. Ai tusi do dipamasuk akka hau pangusung ni meja i. 28 Bahen ma akka hau pangusung i sian hau akasia, jala lappis ma i mamakke mas. Pakke ma hau i tikki mangangkat meja i.

29 “Ikkon bahenonmu do muse akka piring, cakkir, ceret, dohot baskom na dipakke mangusehon pelean siinumon. Bahen ma i sude sian mas murni.+ 30 Jala torus ma bahen roti pelean di meja na di jolokku.+

31 “Ikkon bahenonmu do inganan ni lampu+ sian mas murni. Ikkon adong do tiangna dohot alasna. Adong dakkana, kelopakna, kuncupna, dohot bungana. Ikkon sian sada batang mas na murni do ditopa inganan ni lampu i dohot sude bagianna.+ 32 Bahen ma onom dakka ni inganan ni lampu i. Tolu di kanan, jala tolu di kiri. 33 Di sada dakka, adong tolu kelopak bunga na bentukna songon bunga almond, na di holang-kolangi kuncup dohot bunga. Songon i ma dibahen dakka ni inganan ni lampu na onom i, tolu di kanan jala tolu di kiri. 34 Alai di tiang ni lampu i, adong opat kelopak bunga na bentukna songon bunga almond, na di holang-kolangi kuncup dohot bunga. 35 Bahen ma sada kuncup di pardomuan ni dakka na parjolo, na paduahon, dohot na patoluhon. Ai adong onom dakka ni inganan ni lampu i. 36 Kuncup, dakka, dohot sude bagian ni inganan ni lampu i, ikkon ditopa sian sada batang mas na murni.+ 37 Bahen ma pitu lampu tu ginjang ni inganan ni lampu i. Molo dipagalak lampu i, gabe torang ma inganan na di jolona.+ 38 Bahen ma muse akka penjepit ni sumbu, dohot inganan ni gara ni api sian mas murni.+ 39 Sian sada talenta* mas murni ma dibahen inganan ni lampu i dohot sude alat-alatna. 40 Ikkon bahenonmu do i sude songon rancangan na hulehon tu ho di dolok.+

26 “Bahen ma sappulu kain lao tu kain kemah ni tabernakel i.+ Sian bonang linen na halus na undenggan ma dibahen akka kain i, sian bonang na balau, sian wol na ungu, dohot sian bonang na merah. Jala sulam ma gambar ni kerubim*+ di kain i.+ 2 Ikkon sarupa do sude ukkuran ni kain i.+ Ikkon 28 asta* ma ganjang ni ganup kain, jala 4 asta bidangna. 3 Padomu ma lima kain kemah i asa gabe sada kain na bidang. Jala songon i ma bahen muse tu kain na lima nai. Alani i, gabe adong ma dua kain na bidang. 4 Bahen ma akka golang sian kain na balau, jala lokkotton ma i tu pinggir ni kain na bidang i. Songon i ma bahen muse tu kain na bidang na sada nai, asa boi dipadomu kain na bidang na dua i. 5 Bahen ma 50 golang na sian kain tu pinggir ni sada kain na bidang i. Jala bahen ma muse 50 golang na sian kain tu pinggir ni kain na bidang na sada nai, asa adong pasangan ni golang i tikki dipadomu kain na dua i. 6 Bahen ma 50 hait-hait ni kain i sian mas. Padomu ma kain na bidang na dua i mamakke hait-hait i, asa gabe sada kain ni tabernakel i.+

7 “Ikkon bahenonmu do muse 11 kain sian ibbulu ni hambing,+ asa adong panutup ni tabernakel i.+ 8 Ikkon sarupa do ukkuran ni sude kain kemah na 11 i. Ganjang ni ganup kain 30 asta, jala bidangna 4 asta. 9 Padomu ma lima kain kemah i gabe sada kain na bidang. Jala padomu ma muse kain na onom nai gabe sada kain na bidang. Dohot do ditutupi kain na onom naung dipadomu i bagian jolo ni kemah i, alai ikkon dilipat do kain na manutupi bagian jolo ni kemah i. 10 Bahen ma 50 golang na sian kain tu pinggir ni kain na bidang na parjolo. Jala bahen ma muse 50 golang na sian kain tu pinggir ni kain na sada nai, asa boi dipadomu dua kain na bidang i. 11 Bahen ma 50 hait-hait na sian tombaga. Haitton ma i tu akka golang na sian kain i asa gabe sada kain na bidang kain kemah na dua i. 12 Ungganjang do kain panutup i sian kain kemah ni tabernakel, jala gattung do kain na lobi i tu pudi ni tabernakel i. Dua asta ma ungganjang kain panutup i sian kain ni tabernakel i. 13 Ungganjang do kain panutup na di sabola kiri dohot kanan ni tabernakel i sian kain ni kemah i. Sada asta ma ungganjang kain panutup i. Ai ikkon ditutup kain panutup i do sude bagian na di sabola kiri dohot kanan ni tabernakel i.

14 “Bahen ma muse panutup ni tabernakel i sian kulit ni biru-biru jantan na diwarnai pakke warna merah. Jala bahen ma tu ginjangna panutup na sian kulit ni anjing laut.+

15 “Bahen ma muse rangka+ ni tabernakel i sian hau akasia. Jala jongjong ma sude bahen rangkana i.+ 16 Timbo ni ganup rangkana i sappulu asta jala bidangna sada satonga asta. 17 Bahen ma dua pat ni ganup rangka i jala sarupa ma bahen ganjang ni patna i. Songon i ma bahen tu sude rangka ni tabernakel i. 18 Bahen ma 20 rangka ni tabernakel i lao dipasang di sabola selatan.

19 “Bahen ma 40 alas ni rangka+ na 20 i. Bahen ma alasna i sian perak, bentukna segi opat jala marlubang. Bahen ma dua alas ni pat ni sada rangka. Ai dua pat ni sada rangka. Songon i ma bahen tu sude rangka i.+ 20 Bahen ma muse 20 rangka ni tabernakel i lao dipasang di sabola utara. 21 Jala bahen ma 40 alas ni rangka na 20 i. Bahen ma alasna i sian perak, bentukna segi opat, jala marlubang. Bahen ma dua alas ni pat ni sada rangka. 22 Bahen ma muse onom rangka+ na lao dipasang tu sabola barat, i ma bagian pudi ni tabernakel i. 23 Bahen ma muse dua rangka nai lao manahan sudut ni tabernakel na di bagian pudi. 24 Bahen ma dua lappis hau ni rangka i, mulai sian toru sahat tu ginjang. Padomu ma rangka i tu golang na parjolo na di ginjang i. Songon i ma bahen tu rangka na sada nai. Jadi, rangka na dua i ma na manahan dua sudut bagian pudi ni tabernakel. 25 Gabe ualu ma sude rangka i. Dibahen ma 16 alasna na marlubang, na dibahen sian perak. Jadi, dua alas ma tu sada rangka.

26 “Ikkon bahenonmu do akka palang na sian hau akasia lao padomuhon sude akka rangka i. Bahen ma lima palang tu akka rangka na di sabola selatan ni tabernakel i.+ 27 Bahen ma muse lima palang tu akka rangka na di sabola utara ni tabernakel, jala lima palang nai tu akka rangka na di sabola barat, i ma bagian pudi ni tabernakel i. 28 Palang na dipasang di bagian tonga-tonga ni tabernakel i ikkon dipasang sian ujung tu ujung.

29 “Lappis ma akka rangka i mamakke mas.+ Bahen ma muse tu akka rangka i akka golang na sian mas, asa boi dipamasuk palang i tu akka golang i. Jala lappis ma akka palang i mamakke mas. 30 Ikkon bahenonmuna do tabernakel i dos songon tudu-tudu na hupaboa tu ho di dolok i.+

31 “Dung i bahen ma tire+ na sian bonang na balau, sian wol na ungu, sian bonang na merah, dohot sian bonang linen na halus na undenggan. Sulam ma muse akka gambar ni kerubim di tire i. 32 Gattung ma tire i tu opat tiang na dibahen sian hau akasia na dilappis dohot mas. Bahen ma hait-hait ni tire i sian mas. Bahen ma opat alas ni tiang i sian perak, jala marlubang ma bahen. 33 Gattung ma tire i di hait-haitna jala bahen ma poti inganan ni Patik i+ tu pudi ni tire i. Jala tire i ma na gabe batas ni Inganan na Badia+ dohot Inganan na Massai Badia.+ 34 Bahen ma tutup ni poti inganan ni Patik* na di Inganan na Massai Badia i.

35 “Bahen ma meja i di sabola utara ni tabernakel, i ma di jolo ni tire i. Jala bahen ma inganan ni lampu i+ di jolo ni meja i, di sabola selatan ni tabernakel i. 36 Bahen ma tire* di pintu ni tabernakel i. Tonun ma tire i mamakke bonang linen na halus na undenggan, sian bonang na balau, sian wol na ungu, dohot sian bonang na merah.+ 37 Bahen ma lima tiang sian hau akasia na dilappis mas. Bahen ma i gabe inganan lao manggattukkon tire* i. Bahen ma hait-haitna sian mas. Jala bahen ma lima alas ni tiang i sian tombaga, jala marlubang ma bahen.

27 “Bahen ma langgatan sian hau akasia.+ Bentukna segi opat. Ganjangna lima asta,* bidangna lima asta, jala timbona tolu asta.+ 2 Bentuk ma tanduk+ di opat sudut ni langgatan i. Dung i lappis ma langgatan i dohot tombaga.+ 3 Ikkon bahenonmu do muse ember inganan ni abuna,* sekop, baskom, garpu, dohot inganan ni gara ni api. Bahen ma sude alat-alat i sian tombaga.+ 4 Buat ma piga-piga batang tombaga, jala bahen ma i songon rangrang di langgatan i. Bahen ma muse opat golang na sian tombaga, jala bahen ma i di opat sudut ni langgatan i. 5 Bahen ma rangrang i di toru ni baba ni langgatan i, i ma di tonga-tonga ni langgatan i. 6 Bahen ma piga-piga hau pangusung sian hau akasia lao tu langgatan i, jala lappis ma i pakke tombaga. 7 Tikki naeng diangkat langgatan i, pamasuk ma hau pangusung i tu golang-golang na di sapping ni langgatan i.+ 8 Sian papan ma bahen langgatan i. Bentukna songon poti na kosong, bahen ma i songon naung hupaboa tu ho di dolok on.+

9 “Ikkon adong do bahenonmu alaman+ ni tabernakel i. Bahen ma tire batas ni alaman na tu sabola selatan. Tire i dibahen sian kain linen na halus na undenggan, jala ganjangna 100 asta.+ 10 Bahen ma 20 tiangna. Bahen ma muse 20 alas ni tiang i sian tombaga jala na marlubang. Hait-hait ni tiang i dohot sude panambungna* ikkon dibahen sian perak. 11 Bahen ma tire batas ni alaman na tu sabola utara, ganjangna 100 asta. Bahen ma muse 20 tiang dohot 20 alasna na sian tombaga, jala bahen ma marlubang. Bahen ma hait-hait ni tiang i dohot sude panambungna* sian perak. 12 Bahen ma tire batas ni alaman di sabola barat, ganjangna sarupa dohot bidang ni alaman i, i ma 50 asta. Bahen ma muse sappulu tiang, jala bahen ma sappulu alasna na marlubang. 13 Bidang ni alaman na di sabola timur* ni tabernakel, i ma 50 asta. 14 Di alaman na di sabola timur i do gerbang ni tabernakel i. Ikkon adong do dibahen tire na ganjangna 15 asta di sabola kanan ni gerbang i. Tolu ma tiangna dohot tolu alasna na marlubang.+ 15 Di sabola kiri ni gerbang i, bahen ma tire na ganjangna 15 asta, tolu tiangna jala tolu alasna na marlubang.

16 “Ikkon adong do tire* di gerbang ni alaman i. Ganjang ni tire i 20 asta, opat ma tiangna jala opat ma alasna na marlubang.+ Tonun ma tire i sian bonang na balau, sian wol na ungu, sian bonang na merah, dohot sian bonang linen na halus na dumenggan.+ 17 Ikkon adong do hait-hait dohot panambung* ni sude tiang na di sakaliling ni alaman i. Bahen ma i sian perak. Alai anggo alas ni tiang na marlubang i, ikkon sian tombaga do dibahen.+ 18 Ganjang ni alaman i 100 asta+ jala bidangna 50 asta. Timbo ni tire na di sakaliling ni alaman i 5 asta. Dibahen sian bonang linen na halus na dumenggan do tire i, alas ni tiangna sian tombaga jala marlubang. 19 Ikkon sian tombaga do dibahen sude alat dohot barang na dipakke lao marhobas di tabernakel, dohot ma i akka patok ni kain kemah ni tabernakel dohot akka patok tire pembatas na di alaman ni tabernakel i.+

20 “Suru ma halak Israel i asa mamboan miak jetun na murni. Bahen ma i gabe miak ni lampu asa torus galak lampuna i.+ 21 Ikkon torus do galak lampu na di kemah parpunguan i, na di jolo ni tire na adong di labbung ni poti inganan ni Patik*+ i. Si Aron dohot akka anakna ma na mamareso lampu i, asa torus mangolu mulai sian botari sahat tu manogot di jolo ni Jahowa.+ Marlakku do peraturan on saleleng ni lelengna tu sude pinoppar ni halak Israel.+

28 “Jou ma si Aron+ dohot akka anakna,+ i ma si Nadab, si Abihu,+ si Eleasar, dohot si Itamar.+ Papulik ma nasida sian halak Israel asa marhobas nasida gabe malim di Au.+ 2 Bahen ma baju ni malim* na bagak jala na sangap tu si Aron abangmu.+ 3 Jou ma sude halak na malo, i ma akka halak naung mandapot bisuk sian Au.+ Suru ma nasida mambahen baju di si Aron, asa badia ibana di jolokku. Jala asa boi ibana marhobas gabe malim tu Au.

4 “Akka on ma na ikkon bahenon ni nasida: panutup ni andora,*+ baju epod,+ rompi na ganjang,+ jubah kotak-kotak, sorban,*+ dohot ikat pinggang.+ Ikkon bahenon ni nasida do akka baju ni malim* on di si Aron, asa boi ibana marhobas gabe malim tu Au. Jala ikkon pakkeon ni pinopparna do akka baju ni malim i tikki marhobas nasida gabe malim tu Au. 5 Ikkon bahenon ni parkarejo i do i sian bonang mas, bonang na balau, bonang wol na ungu, bonang na merah, dohot bonang linen na halus.

6 “Ikkon ditonun nasida do baju epod i sian bonang linen na halus na dumenggan, bonang na balau, wol na ungu, dohot sian bonang na merah. Jala ikkon disulam nasida do i mamakke bonang mas.+ 7 Padomu ma bagian jolo dohot bagian pudi ni baju epod i mamakke abit panutup di bahu ni baju i. 8 Tonun ma ikat pinggang ni epod i.+ Tonun ma i sian bahan na sarupa songon bahan ni baju epod, i ma sian bonang linen na halus na dumenggan, sian bonang na balau, sian wol na ungu, sian bonang na merah, dohot sian bonang mas. Pasang ma i tu baju epod, asa boi diikkat gomos baju i.

9 “Buat ma dua batu oniks+ jala ukir ma goar ni akka anak ni si Israel* disi.+ 10 Onom goar ma di sada batu, jala onom nai di batu na sada nai. Bahen ma i mangihutton ise nasida na parjolo tubu. 11 Ikkon ukiron ni tukkang ukir do goar ni anak ni si Israel di batu na dua i, songon mambahen ukiran di cincin cap.*+ Jala ikkon sian mas do bahenonna alas ni batu i. 12 Bahen ma batu na dua i di abit panutup na di bahu ni baju epod i, lao gabe parningotan di akka anak ni si Israel.+ Jala gabe parningotan ma i tikki ro si Aron tu jolo ni Jahowa mamboan goar ni nasida di bahuna. 13 Bahen ma muse alasna sian mas. 14 Jala bahen ma dua ratte sian mas murni. Ratte i dibentuk songon tali tambang.+ Dung i, padomu ma ratte i tu alas na sian mas i.+

15 “Suru ma panulam mambahen panutup ni andora na dipakke malim tikki lao manukkun lomo ni roha ni Debata.+ Bahen ma i songon mambahen epod, jala sarupa do bahanna, i ma sian bonang linen na halus na dumenggan, bonang mas, bonang na balau, bonang wol na ungu, dohot bonang na merah.+ 16 Tikki dilipat dua panutup ni andora i, ikkon songon persegi ma bentukna. Sarupa ma ganjangna dohot bidangna, i ma sajokkal.* 17 Pasang ma akka batu permata naung dibahen alasna tu panutup ni andora i. Susun ma i gabe opat baris. Baris na parjolo, i ma batu permata na merah,* batu topas, dohot batu zamrud. 18 Baris na paduahon, i ma batu pirus, batu safir, dohot batu yaspis. 19 Baris na patoluhon, i ma batu lesyem,* batu akik, dohot batu kecubung. 20 Baris na paopatton, i ma batu krisolit, batu oniks, dohot batu giok. Jala bahen ma alas ni sude batu i sian mas. 21 Jadi, 12 ma sude batu i. Ukir ma sude goar ni anak ni si Israel tu sude batu i. Sada goar ma tu sada batu. Ukir ma i songon mambahen ukiran di cincin cap. Sada goar patuduhon sada sian marga ni halak Israel na 12 i.

22 “Ikkon bahenonmu do muse ratte na sian mas murni, na didandan songon tali tambang.+ Dung i pasang ma i tu panutup ni andora. 23 Bahen ma muse dua cincin na sian mas, jala bahen ma i tu dua sudut* ni panutup ni andora i. 24 Pamasuk ma ujung ni ratte mas na dua i tu dua cincin na dipasang di sudut ni panutup ni andora i. 25 Dung i, pamasuk ma muse ujung ni ratte mas na dua nai tu alas ni panutup na di bahu ni baju epod i. Jadi, gabe di bagasan ma baju epod i jala panutup ni andora i ma di luar. 26 Bahen ma muse dua cincin sian mas, jala pasang ma i tu dua sudut ni panutup ni andora di bagian toru na dais tu baju epod i.+ 27 Bahen ma muse dua cincin mas, jala pasang ma i di bagian jolo ni epod, di toru ni panutup ni bahu, di ginjang ni ikat pinggang, di jonok ni pardomuan ni ikat pinggang dohot baju epod i.+ 28 Asa denggan panutup ni andora i, pamasuk ma tali na balau sian cincin na di panutup ni andora i tu cincin na di baju epod i. Alani i, hot ma torus panutup ni andora i di ginjang ni baju epod i dohot di ginjang ni ikat pinggang i.

29 “Molo lao si Aron tu inganan na badia,* ikkon pakkeonna do panutup ni andora na dipakke malim lao manukkun lomo ni roha ni Debata. Ai disi do disurat akka goar ni anak ni si Israel, jala panutup ni andora i do na toktong gabe parningotan di jolo ni Jahowa. 30 Bahen ma Urim dohot Tumim*+ tu bagasan ni panutup ni andora i. Jala ikkon toktong do i di andora ni si Aron molo ro ibana tu jolo ni Jahowa. Ikkon toktong do boanon ni si Aron Urim dohot Tumim i di andorana, tikki ro tu jolo ni Jahowa lao mamboto keputusan na songon dia bahenonna taringot tu halak Israel.

31 “Bahen ma muse rompi na ganjang na lao dipakke di bagasan ni baju epod. Sudena i dibahen sian bonang na balau.+ 32 Bahen ma lubang ni leher ni rompi i, jala ikkon ditonun sahalak partonun do sude pinggir ni leherna i. Ikkon songon leher ni baju porang do i dibahen, asa unang mura maribak. 33 Bahen ma muse hiasan na songon buah delima sian bonang na balau, wol na ungu, dohot bonang na merah. Dung i, bahen ma i tu toru di sakaliling ni pinggir ni rompi i. Jala holang-kolangi ma buah delima i dohot lonceng na gelleng na sian mas. 34 Dung dibahen sada lonceng na sian mas i, bahen ma muse sada buah delima. Songon i ma bahen tu sude pinggir ni rompi i. 35 Ikkon pakkeon ni si Aron do rompi i, tikki marhobas gabe malim ibana. Jala ikkon tarbege do soara ni lonceng i tikki ro ibana tu jolo ni Jahowa tu inganan na badia i, dohot tikki kaluar ibana sian i, asa unang mate ibana.+

36 “Buat ma muse sada lempengan mas murni na marhillong jala na tipis. Ukirhon ma disi hata: ‘Na Badia do Jahowa’.+ Ukir ma i songon na mambahen ukiran di cincin cap. 37 Ikkat ma i di jolo ni sorban i+ mamakke bonang na balau, jala ikkon toktong do i disi. 38 Ikkon di dahi ni si Aron do lempengan mas i. Jala ikkon si Aron do na martanggung jawab molo adong halak na mangulahon na sala tu pelean, i ma pelean na diboan halak Israel gabe silehon-lehon na badia tu Debata.+ Alani i, ikkon toktong do lempengan mas i di dahi ni si Aron, asa lomo roha ni Jahowa mangida halak Israel.

39 “Bahen ma muse jubah kotak-kotak na ditonun sian bonang linen halus. Jala bahen ma sorban sian linen halus, dohot ikat pinggang na ditonun.+

40 “Bahen ma muse jubah, ikat pinggang, dohot panutup ni ulu na denggan jala na sangap+ tu akka anak ni si Aron.+ 41 Pakkehon ma i tu si Aron dohot tu akka anakna. Usehon ma miak tu ulu ni nasida,+ lantik* ma nasida,+ jala papulik* ma nasida gabe malim di Au. 42 Bahen ma celana pendek* na sian bonang linen lao manutupi hailaon ni nasida.+ Ganjangna mulai sian pinggang sahat tu hae-hae. 43 Ikkon pakkeon ni si Aron dohot akka anakna do i tikki masuk nasida tu kemah parpunguan, manang tikki ro nasida tu labbung ni langgatan lao marhobas di Inganan na Badia, asa unang mate nasida. Marlakku do aturan on saleleng ni lelengna tu si Aron dohot tu sude pinopparna.

29 “On ma na ikkon bahenonmu tikki dipapulik* ho nasida marhobas gabe malim tu Au: Buat ma sada anak ni lombu jantan, dua anak ni biru-biru jantan na sehat,+ 2 roti na so marragi, roti na marbentuk golang na so marragi na dicampur dohot miak, dohot roti na tipis na so marragi na diolesi dohot miak.+ Bahen ma roti i sian topung gandum na halus. 3 Bahen ma sudena i tu sada karanjang.+ Dung i, boan ma karanjang i, lombu jantan i, dohot dua anak ni biru-biru i tu jolokku.

4 “Jou ma si Aron rap dohot akka anakna tu pintu ni kemah parpunguan i.+ Suru ma nasida maridi.+ 5 Buat ma akka baju i.+ Dung i pakkehon ma tu si Aron jubah i, rompi na ganjang, baju epod, dohot panutup ni andora* i. Jala ikkat ma gomos ikat pinggang ni baju epod i.+ 6 Bahen ma sorban i tu uluna jala bahen ma tu sorban i lempengan mas na tipis na badia.*+ 7 Dung i buat ma miak na badia,*+ usehon ma i tu uluna tanda naung dipillit* ibana gabe malim.+

8 “Jou ma akka anak ni si Aron i tu jolokku, jala pakkehon ma jubah tu nasida.+ 9 Ikkatton ma ikat pinggang ni jubah ni akka anakna i songon naung dibahen ho tu si Aron. Bahen ma muse panutup ni ulu ni nasida. Nasida ma na gabe malim di Au, jala aturan on ma na marlakku saleleng ni lelengna.+ Ikkon songon i do bahenonmu mangalantik si Aron dohot akka anakna gabe malim tu Au.+

10 “Dung i boan ma anak ni lombu jantan i tu jolo ni kemah parpunguan. Ikkon diappehon si Aron dohot akka anakna i do tangan ni nasida tu ulu ni lombu i.+ 11 Seat ma anak ni lombu jantan i di jolo ni Jahowa, di pintu ni kemah parpunguan i.+ 12 Buat ma saotik mudar ni lombu i mamakke jari-jarim, jala daisson ma i tu akka tanduk na di langgatan i.+ Jala lobina i usehon ma tu toru ni langgatan i.+ 13 Buat ma sude tabo-tabo+ na manutupi usus ni lombu i, tabo-tabo na di ate-atena, ginjalna na dua i dohot tabo-tabona. Tutung ma i sude, asa nakkok timusna sian langgatan i.+ 14 Alai sibukna, kulitna, dohot kotoranna ikkon ditutung di luar ni perkemahanmuna. Ai pelean hasesaan ni dosa do i.

15 “Dung i, buat ma sada sian biru-biru jantan na dua i. Ikkon diappehon si Aron dohot akka anakna i do tangan ni nasida tu ulu ni biru-biru i.+ 16 Seat ma biru-biru jantan i, buat ma mudarna, jala pispisson ma i tu sakaliling ni langgatan i.+ 17 Seati ma biru-biru i gabe piga-piga bagian, paias ma ususna,+ dohot patna.* Dung i, pajojor ma sudena i rap dohot uluna. 18 Tutung ma sudena i asa nakkok timusna sian langgatan i. Ai on do pelean situtungon tu Jahowa, jala uapna i+ palashon rohana. On ma pelean tu Jahowa na ditutung dohot api.

19 “Buat ma muse biru-biru jantan na sada nai, jala suru ma asa diappehon si Aron dohot akka anakna tangan ni nasida tu ulu ni biru-biru i.+ 20 Seat ma biru-biru jantan i, jala buat ma saotik mudarna. Daisson ma i tu pinggol ni si Aron na di sabola kanan dohot tu pinggol ni akka anakna na di sabola kanan, tu jempol ni tangan kanan ni nasida, dohot tu jempol ni pat ni nasida na sabola kanan. Jala pispisson ma lobi ni mudar i tu sakaliling ni langgatan i. 21 Dung i, buat ma saotik mudar sian langgatan dohot saotik miak na badia.+ Pispisson ma i tu si Aron dohot tu akka anakna, songon i nang tu pakkean ni nasida, asa badia nasida rap dohot pakkeanna i.+

22 “Buat ma tabo-tabo ni biru-biru jantan i, ihurna na godang tabo-tabona, tabo-tabo na manutupi ususna, tabo-tabo na manutupi ate-atena,+ ginjalna na dua i dohot tabo-tabona, songon i nang patna sabola kanan. Ai on do biru-biru na dipelehon tikki dilantik akka malim.+ 23 Buat ma akka roti na so marragi sian karanjang na di jolo ni Jahowa i. Buat ma sada roti na bulat, sada roti na marbentuk golang na diolesi miak, dohot sada roti na tipis. 24 Bahen ma i sude tu tangan ni si Aron dohot tu tangan ni akka anakna i. Dung i, ayun-ayunhon ma i tu pudi dohot tu jolo gabe pelean tu Jahowa. 25 Buat ma i sian tangan ni nasida, jala tutung ma i di langgatan i. Tutung ma i di ginjang ni pelean situtungon asa las roha ni Jahowa manganggo uap ni pelean i. On ma pelean tu Jahowa na ditutung dohot api.

26 “Dung i, buat ma andora ni biru-biru na dipelehon tikki dilantik si Aron.+ Ayun-ayunhon ma i tu pudi dohot tu jolo gabe pelean tu Jahowa. Buat ma i gabe bagianmu. 27 Sian biru-biru na dipelehon+ tikki dilantik si Aron dohot akka anakna i, papulik* ma andora ni biru-biru na dibahen gabe pelean na diayun-ayunhon. Jala papulik ma patna na sian bagian na badia naung diayun-ayunhon. 28 Andora dohot pat ni biru-biru i ma na gabe bagian na dipabadia. On ma na gabe bagian ni si Aron dohot akka pinopparna.* On ma bagian na badia na ikkon lehonon ni halak Israel. Jala on ma muse bagian na badia na dilehon halak Israel+ tu Jahowa tikki dilehon nasida pelean pardamean.*+ Peraturan on marlakku saleleng ni lelengna tu halak Israel.

29 “Tikki dipillit* jala dilantik pinoppar ni si Aron+ gabe malim manggattihon si Aron, ikkon dipakke ibana do baju malim*+ Aron. 30 Pakkeon ni pinoppar ni si Aron na tarpillit i ma baju i saleleng pitu ari. Dipakke ma i tikki ro ibana tu kemah parpunguan lao marhobas di inganan na badia.+

31 “Buat ma biru-biru jantan na dipelehon tikki dilantik akka malim. Robus ma sibukna di alaman ni inganan na badia.*+ 32 Ikkon panganon ni si Aron dohot anakna do jagal ni biru-biru i dohot roti na di karanjang i. Jala di pintu kemah parpunguan do panganon ni nasida i.+ 33 Ikkon panganon ni nasida do sudena i. Ai nungnga dipelehon i tu Debata asa disesa dosa ni nasida tikki dilantik jala dipapulik nasida gabe malim. Alai molo dang malim* ibana dang boi panganonna i. Ai badia do i.+ 34 Molo adong dope na lobi roti manang jagal ni biru-biru i sahat tu manogot, ikkon tutungonmu do i.+ Unang be dipangan, ai badia do i.

35 “Songon naung huparettahon i tu ho, songon i ma bahen tu si Aron dohot tu anakna. Pitu ari ma lelengna ho mangalantik si Aron dohot anakna i gabe malim.+ 36 Pelehon ma ganup ari lombu jantan gabe pelean hasesaan ni dosa. Ikkon bahenonmu do i asa mardame hamu dohot Debata jala asa badia langgatan i. Pispisson ma miak tu langgatan i gabe tanda naung dipapulik langgatan i lao manomba Debata.+ 37 Saleleng pitu ari ikkon bahenonmu do pelean lao pabadiahon langgatan i. Ikkon pabadiaonmu do langgatan i, asa badia situtu langgatan i.+ Jala ikkon badia do manang ise na marhobas di langgatan i.

38 “On ma na ikkon toktong pelehononmu di langgatan i. Ganup ari, ikkon pelehononmu do dua biru-biru jantan na marumur sataon.+ 39 Pelehon ma sada biru-biru jantan i di manogotna, jala dung bonom mataniari* pelehon ma na sada nai.+ 40 Tikki dipelehon ho biru-biru na parjolo i, pelehon ma muse saparopat hin* anggur. Pelehon ma i gabe pelean siinumon. Pelehon ma muse saparsappulu epa* topung na halus na dicampur dohot saparopat hin miak jetun. 41 Dung bonom mataniari,* pelehon ma na sada nai rap dohot pelean sipanganon* dohot pelean siinumon na dipelehon di tikki manogot. Lehon ma i gabe pelean tu Jahowa na ditutung dohot api jala uapna i palashon rohana. 42 Akka i ma pelean situtungon na toktong bahenonmuna ganup ari dohot akka pinopparmuna di jolo ni Jahowa, di pintu ni kemah parpunguan i. Ai tusi do Au ro lao makkatai dohot ho.+

43 “Na lao ro do Au tusi lao manjuppangi halak Israel. Ai gabe badia ma inganan i alani hamuliaokku.+ 44 Bahenokku ma badia kemah parpunguan dohot langgatan i. Bahenokku do muse badia si Aron dohot akka anakna,+ asa boi nasida marhobas gabe malim tu Au. 45 Maringanan ma Au di tonga-tonga ni halak Israel. Jala Au ma na gabe Debata ni nasida.+ 46 Botoon ni nasida ma ise do sasittongna Jahowa Debata ni nasida. Huboan do nasida kaluar sian Mesir, asa maringanan Au di tonga-tonga ni nasida.+ Ai Au do Jahowa Debata ni nasida.

30 “Bahen ma sada langgatan sian hau akasia+ inganan lao manutung dupa.+ 2 Bentukna ikkon segi opat. Ganjangna sada asta,* bidangna pe sada asta, jala timbona dua asta. Bentuk ma tanduk di langgatan i sabadan dohot langgatan i.+ 3 Lappis ma langgatan i pakke mas murni. Lappis ma bagian parginjang, mulai sian pinggirna sahat tu akka tandukna. Bahen ma muse bingkai na sian mas tu sakaliling ni bagian parginjang ni langgatan i. 4 Ikkon bahenonmu do muse opat golang na sian mas tu langgatan i. Pasang ma i di toru ni bingkai, di ganup sudut ni langgatan i. Jala tusi ma dipamasuk akka hau pangusung ni langgatan i. 5 Bahen ma akka hau pangusung i sian hau akasia jala lappis ma i pakke mas. 6 Peakkon ma langgatan i di jolo ni tire ni Inganan na Massai Badia, na di labbung ni poti inganan ni Patik i.+ Patuduhonokku ma dirikku tu ho sian panutup ni poti i.+

7 “Ganup manogot tikki diisi si Aron+ miak ni lampu i, asa toktong galak apina,+ ikkon ditutung ibana do dupa+ di langgatan i+ asa nakkok timusna. 8 Jala ikkon ditutung ibana do muse dupa, tikki naeng bonom mataniari,* i ma tikki dipagalak si Aron lampu i. Ikkon toktong do songon i ulahonon ni si Aron dohot akka pinopparna, i ma manutung dupa di jolo ni Jahowa. 9 Unang pelehon disi dupa na maralo tu Patik,+ manang pelean situtungon manang pelean sipanganon.* Jala unang usehon disi pelean siinumon. 10 Sahali sataon, ikkon bahenon ni si Aron do saotik mudar ni pelean hasesaan ni dosa+ tu akka tanduk na di langgatan i.+ Songon i ma ibana pabadiahon langgatan i. Ganup taon, ikkon songon i do ulahononna dohot akka pinopparna. Ai massai badia do langgatan i di Jahowa.”

11 Dung i didok Jahowa ma muse tu si Musa, 12 “Molo mambahen sensus ho tu halak Israel,+ jala dietong ho sadia godang bawa disi, ikkon lehonon ni ganup bawa do tobusan tu Jahowa lao manobus ngoluna. Molo dang dilehon nasida i tikki mandaftar, ro ma hasusaan tu nasida. 13 On ma na ikkon gararon ni na mandaftar i: satonga sekel* perak mangihutton timbangan di inganan na badia.*+ Sada sekel dos tu 20 gera.* Jadi satonga sekel i ma sumbangan tu Jahowa.+ 14 Ganup bawa na marumur 20 taon tu ginjang ikkon mangalehon sumbangan tu Jahowa.+ 15 Na mora dang boi mangalehon lobi, jala na pogos dang boi mangalehon hurang sian i. Ganup halak ikkon mangalehon sumbangan satonga sekel* tu Jahowa lao manobus* ngoluna. 16 Papungu ma hepeng perak na nilehon ni halak Israel i lao manobus ngolu ni nasida. Pakke ma i tu akka na porlu di kemah parpunguan. Ai hepeng i do na gabe tobus ni ngolu ni nasida, asa toktong diingot Jahowa halak Israel.”

17 Didok Jahowa ma muse tu si Musa, 18 “Bahen ma bak na sian tombaga dohot panukkolna sian tombaga.+ Peakkon ma i di holang-kolang ni kemah parpunguan dohot langgatan. Dung i isi ma aek tusi.+ 19 Disi ma si Aron dohot akka anakna manussi pat dohot tangan ni nasida.+ 20 Ikkon dipaias nasida do diri ni nasida disi molo naeng lao tu kemah parpunguan, manang tikki ro tu langgatan lao marhobas, manang tikki mangalehon pelean na ditutung dohot api tu Jahowa. Ikkon diulahon nasida do i asa unang mate nasida. 21 Ikkon disussi nasida do tangan dohot pat ni nasida, asa unang mate nasida. Marlakku do aturan on tu si Aron, dohot tu pinopparna saleleng ni lelengna.”+

22 Didok Jahowa ma muse tu si Musa, 23 “Pillit ma akka ramuan na dumenggan: gota ni hau mir 500 sekel, kulit manis 250 sekel, jarango 250 sekel, 24 dohot hau lawang* 500 sekel. Timbang ma sudena i mangihutton timbangan di inganan na badia.*+ Dung i, buat ma muse sada hin* miak jetun. 25 Campur ma i sude gabe miak na badia lao mangalantik sasahalak.+ Jala denggan ma i bahen,* ai ikkon gabe miak na badia do i.

26 “Pispisson ma miak na badia i tu kemah parpunguan,+ tu poti inganan ni Patik, 27 tu meja dohot tu akka peralatanna, tu lampu dohot tu akka peralatanna, tu langgatan inganan manutung dupa, 28 tu langgatan inganan mamelehon pelean situtungon dohot tu akka peralatanna, tu bak dohot tu panukkolna. 29 Ikkon bahenonmu do songon i asa massai badia.+ Ikkon badia do manang ise pe na manjama i.+ 30 Papulik ma si Aron+ dohot akka anakna+ di Au. Usehon ma miak na badia i tu ulu ni nasida, asa marhobas nasida gabe malim di Au.+

31 “Songon on ma dok tu halak Israel, ‘On ma na gabe miak na badia di Au saleleng ni lelengna.+ 32 Unang bahen miak i tu daging ni jolma. Jala unang bahen hamu campuran na sarupa songon miak i. Ai miak na badia do i, jala ikkon toktong do i badia di hamu. 33 Manang ise na mambahen miak na angur na songon i, jala manang ise na mambahen i tu halak na so tama,* ikkon dipamate do.’”+

34 Dung i didok Jahowa ma muse tu si Musa, “Buat ma akka ramuan on:+ gota na angur, dupa na angur, gota ni galbanum,* dohot haminjon* na so dicampur. Dos ma bahen godangna. 35 Campur ma i jala denggan ma i bahen.* Bahen ma sira+ asa toktong denggan dupa i+ jala badia. 36 Buat ma deba ramuan i jala duda ma i sappe lamot. Dung i, bahen ma deba di jolo ni poti inganan ni Patik na di kemah parpunguan. Ai disi do Au patuduhon dirikku tu ho. Alani i, ikkon massai badia do i di hamu. 37 Unang ma bahen hamu dupa sisongon i lao di hamu.+ Ala massai badia do i di Jahowa. 38 Ikkon dipamate do manang ise pe na mambahen dupa na angur sisongon i lao tu dirina.”

31 Didok Jahowa ma muse tu si Musa, 2 “Ida ma, nungnga hupillit si Bezalel,+ anak ni si Ur, pahoppu ni si Hur na sian marga Juda.+ 3 Lehonokku ma tu ibana tondi parbadia, asa gabe marbisuk ibana, marparbinotoan, jala malo lao mangulahon sude ulaon, 4 merancang, mambahen akka barang sian mas, sian perak, dohot tombaga, 5 mamotong jala mamasang akka batu na arga,+ dohot mambahen akka barang na sian hau.+ 6 Nungnga hupillit si Oholiab+ anak ni si Ahisamakh na sian marga Dan lao mangurupi ibana. Jala hulehon do bisuk tu akka parkarejo na malo, asa boi dibahen nasida sude naung huparettahon i tu ho,+ 7 i ma mambahen kemah parpunguan,+ poti inganan ni Patik+ dohot panutupna,+ sude peralatan ni kemah i, 8 meja+ dohot peralatanna, inganan ni lampu na sian mas murni dohot peralatanna,+ langgatan inganan manutung dupa,+ 9 langgatan inganan manutung pelean+ dohot peralatanna, bak dohot panukkolna,+ 10 baju na massai denggan ditonun, baju ni malim* na tu si Aron, baju tu akka anak ni si Aron na lao marhobas gabe malim,+ 11 miak na badia, dohot dupa na angur na dipakke tu inganan na badia.+ Ikkon bahenon ni nasida do sudena i songon naung huparettahon tu ho.”

12 Didok Jahowa ma muse tu si Musa, 13 “Dok ma tu halak Israel, ‘Na urrikkot, ikkon diingot hamu do ari Sabat.+ Ai i do tanda ni parjanjian naung hubahen tu hamu saleleng ni lelengna. Alani i ingotonmuna ma, Au do Jahowa na pabadiahon hamu. 14 Ikkon toktong do diulahon hamu patik taringot tu Sabat. Ai ari na badia do i.+ Manang ise na mangalanggar patik taringot tu Sabat, ikkon dipamate do. Ai manang ise na karejo di ari Sabat, ikkon dipamate.+ 15 Saleleng onom ari boi do hamu karejo. Alai molo di ari na papituhon ikkon maradi do hamu. Ai ari Sabat do i,+ jala badia do i di Jahowa. Manang ise na karejo di ari Sabat ikkon dipamate. 16 Ikkon toktong do diulahon halak Israel patik taringot tu ari Sabat, songon i nang akka pinoppar ni nasida. On ma parjanjian na marlakku saleleng ni lelengna. 17 Jadi ari Sabat on ma na gabe tanda ni parjanjiakku dohot halak Israel saleleng ni lelengna.+ Saleleng onom ari do Jahowa mambahen langit dohot tano on. Alai di ari papituhon maradi do Au.’”+

18 Dung sae Debata makkatai dohot si Musa di Dolok Sinai, dilehon Debata ma tu si Musa dua batu panuratan ni patik* i.+ Ai di batu i do disuratton Debata patik i marhite jari-jarina.+

32 Nungnga leleng dipaima bangso Israel si Musa turun sian dolok i, alai dang marnaturun ibana.+ Gabe marpungu ma nasida sude tu jolo ni si Aron, jala didok ma, “Dang huboto hami manang na mahua si Musa, na manogihon hami kaluar sian Mesir i. Alani i, bahen ma di hami sada debata, asa adong na mamimpin hami.”+ 2 Didok si Aron ma, “Bukka hamu ma anting-anting mas+ na dipakke istrimuna, dohot akka ianakkonmuna. Dung i, papungu hamu ma tu au.” 3 Gabe sude ma halak mambukka anting-anting masna jala dilehon tu si Aron. 4 Dijalo si Aron ma mas i sian nasida, jala dibahen ibana ma i gabe patung anak ni lombu.+ Dibahen ibana do i mamakke alat ukir. Dung i, didok halak Israel i ma, “Ale halak Israel, on ma Debatanta, na mamboan hita kaluar sian Mesir.”+

5 Tikki diida si Aron na masa i, dibahen ibana ma langgatan di jolo ni patung i. Dung i, gogo ma soarana mandok, “Marsogot, bahenotta ma perayaan lao pasangappon Jahowa.” 6 Marsogotna i, tibu ma nasida dungo. Dipelehon nasida ma pelean situtungon dohot pelean pardamean.* Dung i, hundul ma nasida, mangan minum jala marsonang-sonang.+

7 Didok Jahowa ma tu si Musa, “Turun ma ho. Ai nungnga mangulahon dosa na balga bangso na binoanmi kaluar sian Mesir.+ 8 Hatop do bangso i manimbil sian dalan na huparettahon tu nasida.+ Ai dibahen nasida do patung anak ni lombu. Disomba nasida do patung i jala dilehon do pelean tusi. Didok nasida do, ‘Ale halak Israel, on ma Debatanta, na mamboan hita kaluar sian Mesir.’” 9 Didok Jahowa ma muse tu si Musa, “Huida jogal do roha ni* bangso on.+ 10 Unang abbati Au pamatehon nasida. Ai muruk situtu do Au nuaeng tu nasida. Lok ma holan pinopparmu na hubahen gabe bangso na bolon.”+

11 Alai dielek-elek si Musa ma* Jahowa Debatana i.+ Didok ibana ma, “Ale Jahowa, boasa ma gabe muruk Ho tu bangso on jala naeng pamateonmu nasida? Hape marhite tanganmu na gogo i dohot huasom na massai balga i do diboan Ho bangsomon kaluar sian Mesir.+ 12 Ai molo dibahen Ho songon i, dokkonon ni halak Mesir ma annon, ‘Na lao bahenon ni Debata ni nasida do na jahat tu halak Israel. Ai diboan pe nasida kaluar sian Mesir, na lao pamateonna do nasida di dolok i, asa unang adong be nasida na mangolu di tano on.’+ Alani i, unang be muruk Ho, jala pikkiri ma muse* keputusanmi. Unang ma pamate bangso on. 13 Ingot ma naposom si Abraham, si Isak, dohot si Israel. Ho sandiri do na marsumpa tu nasida. Didok Ho do tu nasida, ‘Bahenokku ma massai godang situtu pinopparmu songon godang ni bintang di langit,+ jala lehonokku ma sude luat naung hutottuhon tu pinopparmu, asa gabe appuna ni nasida i saleleng ni lelengna.’”+

14 Alani i, dipikkiri Jahowa ma muse keputusanna i, jala dang saut dipamate Ibana bangso i songon na nidokna i.+

15 Dung i, turun ma si Musa sian dolok i, ditiop ibana+ do dua batu panuratan ni patik i.+ Disurat do patik i di bagian jolo dohot di bagian pudi ni batu na dua i. 16 Debata sandiri do na mambahen batu panuratan na dua i, jala Debata sandiri do na mangukir patik i disi.+ 17 Dibege si Josua ma na marsuraki bangso Israel, gabe didok ibana ma tu si Musa, “Ai hira soara na marporang do hubege di perkemahan.” 18 Alai didok si Musa ma,

19 Dung lam jonok si Musa tu perkemahan i, diida ibana ma patung anak ni lombu i+ jala diida ibana ma manortori bangso i. Gabe muruk situtu ma ibana. Disappatton ibana ma batu panuratan ni patik i tu pat ni dolok i, gabe hancur ma batu i.+ 20 Dung i, dibuat ibana ma patung anak ni lombu i, ditutung, jala dihancurhon ma i sappe songon topung.+ Dibahen ibana ma topungna i tu aek jala disuru ibana ma halak Israel minum sian i.+ 21 Didok si Musa ma tu si Aron, “Aha huroha na dibahen bangso on tu ho umbahen na gabe mardosa nasida dibahen ho?” 22 Dialusi si Aron ma, “Unang ma muruk ho tuannami. Ai takkas do diboto ho songon dia jahat ni bangso on.+ 23 Didok nasida do tu au, ‘Dang huboto hami manang na mahua si Musa, na manogihon hami kaluar sian Mesir i. Alani i, bahen ma di hami sada debata, asa adong na mamimpin hami.’+ 24 Jadi hudok ma tu nasida, ‘Manang ise na adong masna, bukka ma i jala lehon ma tu au.’ Hututung ma sudena i jala gabe adong ma patung lombu on.”

25 Diida si Musa ma nungnga dipasombu si Aron be bangso i mangulahon lomo ni roha ni nasida be. Alani i, gabe marlea ma nasida di jolo ni akka musu. 26 Dung i, jongjong ma si Musa di gerbang ni perkemahan i. Didok ma, “Ise na olo mangoloi Jahowa, ro ma tuson!”+ Marroan ma halak Lepi tu labbung ni si Musa. 27 Didok si Musa ma tu nasida, “Songon on ma hata ni Jahowa, Debata ni halak Israel i: Buat hamu ma podangmuna. Lao ma hamu tu sude kemah. Lao ma hamu sian gerbang tu gerbang. Bunu hamu ma keluargamuna, tetanggamuna, dohot akka donganmuna.”+ 28 Diulahon halak Lepi ma na nidok ni si Musa i. Jadi di ari i, dibunu nasida ma 3.000 bawa. 29 Dung i didok si Musa ma, “Pabadia hamu ma dirimuna lao marhobas tu Jahowa. Sadari on lehononna ma pasu-pasu tu hamu.+ Ai nungnga olo hamu mangalo anakmuna dohot haha anggimuna.”+

30 Marsogotna i didok si Musa ma tu bangso i, “Nungnga diulahon hamu dosa na massai balga. Alani i saonari, lao nama au tu dolok lao mangelek-elek Jahowa. Anggiat ma disesa dosamuna i.”+ 31 Jadi lao ma si Musa tu dolok i, jala didok ma tu Jahowa, “Massai balga do dosa na diulahon bangso i. Ai dibahen nasida do debata na sian mas!+ 32 Alai molo denggan do di roham, sesa ma dosa ni nasida.+ Molo dang, sesa ma goarhu naung sinuratmu di bukkumi.”+ 33 Alai didok Jahowa ma tu si Musa, “Manang ise na mardosa tu Au, goarna do sesaokku sian bukkuki. 34 Saonari lao ma ho, boan ma bangso i tu inganan naung hudok tu ho. Ida ma! Husuru do suru-suruan di jolomuna.+ Alai na ro ma tikkina, paresookku ma bangso i. Jala hukumokku ma nasida alani dosa ni nasida.” 35 Dung i, dihukum Jahowa ma bangso i alani patung anak ni lombu i na binahen ni si Aron alani pangidoan ni nasida.

33 Didok Jahowa ma tu si Musa, “Borhat ma ho rap dohot bangso na binoanmu sian Mesir. Lao ma hamu tu luat naung hujanjihon tu si Abraham, tu si Isak, dohot tu si Jakkob. Ai nungnga hudok tu nasida na lao lehonokku luat i tu pinoppar ni nasida.+ 2 Husuru pe suru-suruan di jolomuna,+ jala huusir pe halak Kanaan, halak Amori, halak Het, halak Perisi, halak Hevi, dohot halak Jebus.+ 3 Lao ma hamu tu luat na godang susu dohot madu.+ Alai dang dohot Au mandongani hamu, asa unang hupamate hamu tikki di dalan.+ Ai bangso na jogal roha* do hamu.”+

4 Tikki dibege nasida hata na posi i, gabe lungun situtu ma roha ni nasida. Dang adong nanggo sada pe sian nasida na mamakke perhiasan. 5 Didok Jahowa ma tu si Musa, “Dok ma tu halak Israel, ‘Sijogal roha* do hamu.+ Boi do Au ro tu tonga-tongamuna, jala dang pola leleng Au lao pamatehon hamu.+ Alani i, unang adong sian hamu na mamakke perhiasan, paima hutottuhon manang aha sibahenokku tu hamu.’” 6 Mulai sian Dolok Horeb, dang adong be halak Israel na mamakke perhiasan.*

7 Dipapinda si Musa ma kemahna tu luar ni perkemahan i. Digoari ma i kemah parpunguan, agak dao do i sian perkemahan ni halak Israel. Jadi molo adong na lao mangido tudu-tudu sian Jahowa,+ ro ma ibana tu kemah parpunguan na di luar ni perkemahan i. 8 Tikki naeng lao si Musa tu kemah i, sude ma halak Israel jongjong di pintu kemah ni nasida be, sahat tu na masuk si Musa tu kemah parpunguan i. 9 Dung masuk si Musa tu kemah parpunguan i, turun ma ombun*+ tu pintu ni kemah i. Jala saleleng makkatai Debata tu si Musa disi do toktong ombun i.+ 10 Tikki diida nasida ombun i di pintu ni kemah parpunguan i, pittor marsomba ma nasida di pintu ni kemahna be. 11 Makkatai ma Jahowa langsung* tu si Musa+ songon sasahalak na makkatai tu donganna. Jala molo mulak si Musa tu perkemahan toktong do disi si Josua,+ anak si Nun pangurupina i.+

12 Didok si Musa ma tu Jahowa, “Disuru Ho do au mamboan bangso on. Alai dang dipaboa Ho dope ise na lao mandongani au. Jala didok Ho do tu au, ‘Takkas do hutanda ho* jala lomo do rohakku mangida ho.’ 13 Alani i, molo lomo do roham mangida au, paboa ma tu au akka dalanmu.+ Ai lomo do rohakku mamboto taringot tu Ho, asa toktong huulahon lomo ni roham. Ingot ma, bangso na pinillitmu do bangso on.”+ 14 Jadi didok Debata* ma, “Au* do na lao mandongani ho,+ jala bahenokku ma dame ngolum.”+ 15 Dung i, dialusi si Musa ma, “Molo dang didongani Ho* hami lao tu luat i, unang suru hami lao sian inganan on. 16 Sian dia ma botoon ni halak na lomo roham mangida au dohot bangso on, molo so didongani Ho hami? Ai na didongani Ho do hami,+ umbahen na gabe imbar hami sian akka bangso na adong di tano on.”+

17 Didok Jahowa ma muse tu si Musa, “Huoloi pe pangidoanmi. Ai takkas do hutanda ho* jala lomo do rohakku mangida ho.” 18 Dialusi si Musa ma, “Attong, patudu ma tu au hamuliaonmi.” 19 Didok Debata* ma, “Hupatudu pe tu ho haburjuokku. Hupaboa pe tu ho Jahowa do goarhu.+ Patuduhonokku do haburjuon dohot asi ni roha tu akka halak na hupillit.”+ 20 Dung i didok Debata* ma muse, “Alai dang boi idaonmu bohikku, ai manang ise na mangida bohikku ikkon mate do.”

21 Didok Jahowa ma muse, “Adong do inganan di labbungkon. Jongjong ma ho di atas ni dolok batu i. 22 Tikki lewat hamuliaokki, bahenokku ma ho di goa na di dolok i. Jala hubahen pe tanganku lao manutupi ho sahat tu na lewat Au. 23 Dung lewat Au, hutarik ma tanganki, asa diida ho tanggurukku. Alai dang boi idaonmu bohikku.”+

34 Dung i ninna Jahowa ma tu si Musa, “Bahen ma dua batu songon na parjolo i,+ asa husurat disi akka hata songon na husurat+ di batu na diputtarhonmi.+ 2 Parade ma dirim, alana marsogot ikkon lao do ho tu Dolok Sinai, jala jongjong ma ho di jolokku di atas ni dolok i.+ 3 Alai unang adong na mandongani ho. Unang adong halak na ro tu dolok i. Jala unang adong hambing manang biru-biru na mangallang rumput disi.”+

4 Dibahen si Musa ma dua batu songon na parjolo i. Tibu ma ibana dungo manogotna i. Lao ma ibana tu Dolok Sinai songon na diparettahon Jahowa tu ibana. Jala diboan ibana do batu na dua i di tanganna. 5 Dung i, turun ma Jahowa di bagasan ombun.+ Jongjong ma ibana di jonok ni si Musa, jala dipaboa ibana ma taringot tu goar ni Jahowa.+ 6 Lewat ma Jahowa sian jolo ni si Musa, jala didok ma, “Au do Jahowa, Debata na burju+ jala parasi roha.+ Au do Jahowa na lambat tarrimas,+ jala gok holong ni roha*+ dohot hasittongan.*+ 7 Hupatudu do holong ni roha* tu marribu halak.+ Jala husesa do hasalaan ni halak, hajahatonna, dohot dosana.+ Alai dang pasombuonku dang hona hukum halak na jahat.+ Ai manang ise na mangulahon na jahat, hona hukum do hubahen. Jala hupasombu do anakna, pahoppuna, dohot ninina manaon hasusaan alani dosana i.”+

8 Pittor marsinggang jala marsomba ma si Musa. 9 Didok si Musa ma, “Saonari ale Jahowa, molo lomo roham mangida au, dongani ma hami.+ Ale Jahowa, bangso na jogal roha* do hami.+ Alai nang pe songon i sesa ma dosa dohot hasalaannami.+ Jala bahen ma hami gabe bangsom.” 10 Didok Debata* ma, “Bahenokku ma parjanjian tu hamu. Bahenokku ma mukjizat di jolomuna. Dang hea dope hubahen sisongon i di sude liat portibi on manang di tonga-tonga ni akka bangso.+ Idaon ni akka bangso na tinggal di sakalilingmuna ma akka pambahenan ni Jahowa. Halongangan* do na lao hubahen i tu hamu.+

11 “Usirokku ma halak Amori, halak Kanaan, halak Het, halak Perisi, halak Hevi, dohot halak Jebus sian jolomuna.+ Alani i, parrohahon hamu ma parettakkon.+ 12 Manat ma hamu, sotung dibahen hamu parjanjian tu akka halak na tinggal di luat na lao didapotton hamu.+ Ai boi do i gabe jorat di hamu.+ 13 Ruppakkon hamu ma langgatan ni nasida. Jala hancurhon hamu ma tugu sisombaon* dohot tiang sisombaon* ni nasida.+ 14 Unang marsomba hamu tu akka debata na asing.+ Ai Jahowa* do na mangido asa holan Ibana na disomba.* Tutu, Ibana do Debata na mangido asa holan Ibana na disomba.+ 15 Manat ma hamu, sotung dibahen hamu parjanjian tu akka halak na tinggal di luat na lao didapotton hamu. Ai tikki dang setia nasida tu Debata, marhite manomba debata ni nasida jala mangalehon pelean,+ togihonon ni nasida ma hamu mangulahon i. Ujungna gabe dohot ma hamu mangallang na dipelehon nasida.+ 16 Jala buatonmuna ma boru ni nasida gabe istri ni anakmuna.+ Ala manomba debata na so sittong do boru ni nasida i, gabe dohot ma anakmuna ditogihon manomba debata ni nasida.+

17 “Unang bahen hamu akka patung* na lao sisombaonmuna.+

18 “Ikkon bahenonmuna do Perayaan Roti na So Marragi.+ Bahen ma i songon naung huparettahon tu hamu. Allang hamu ma roti na so marragi saleleng pitu ari di tikki naung ditottuhon, di bulan Abib.*+ Ai di bulan i do hamu kaluar sian Mesir.

19 “Appunakku do sude anak siakkangan* ni jolma dohot binatang na parjolo tubu.+ Appunakku do anak ni lombu manang anak ni biru-biru na parjolo tubu.+ 20 Molo tubu anak ni halodemuna na parjolo, tobus ma i marhite mamelehon sada biru-biru. Molo dang ditobus i, ponggol hamu ma rukkung ni halode i. Suang songon i ma nang anak siakkanganmuna, ikkon ditobus do nasida.+ Molo dang adong diboan hamu manang aha, dang boi hamu ro tu jolokku.

21 “Saleleng onom ari, boi do hamu karejo. Alai di ari na papituhon ikkon maradi do hamu.*+ Nang pe tikki marsuan manang tikki panen hamu, ikkon maradi do hamu.

22 “Ikkon bahenonmuna do Perayaan Dung Pitu Minggu, jala pelehon hamu ma parbue ni gandum na parjolo dipanen hamu. Jala bahen hamu ma Perayaan di Ujung ni Musim Panen* di ujung ni taon.+

23 “Tolu hali di bagasan sataon, ikkon ro do sude bawa tu jolo ni Jahowa, Tuan na sittong i, Debata ni halak Israel.+ 24 Molo ro hamu tolu hali di bagasan sataon tu jolo ni Jahowa, dang adong halak na lao mangarampas luatmuna i. Ai usirokku ma akka bangso sian jolomuna+ jala bahenokku ma lam bidang luatmuna.

25 “Unang pelehon manang aha pe na marragi rap dohot mudar ni binatang na lao dipelehon tu Au.+ Jala unang sippan sahat tu manogot akka na dipelehon tu Au tikki Perayaan Paska.+

26 “Ikkon boanonmuna do hasil panen na parjolo jala na dumenggan sian ladangmuna tu jabu ni Jahowa Debatamuna.+

“Unang robus hamu anak ni hambing rap dohot susu ni indukna.”+

27 Didok Jahowa ma muse tu si Musa, “Suratton ma akka hata on,+ alana marhite hata on do Au mambahen parjanjian tu ho dohot tu halak Israel.”+ 28 Saleleng 40 ari 40 borngin ma si Musa rap dohot Jahowa. Dang mangan jala dang minum ibana.+ Disuratton Debata* ma isi ni parjanjian ni nasida, i ma Patik na Sappulu* i di batu na dua i.+

29 Turun ma si Musa sian Dolok Sinai. Ditiop ibana do dua batu panuratan ni patik i.+ Marsinondang do bohina tikki na turun i ibana sian dolok, ala baru makkatai ibana dohot Debata. Alai dang diboto ibana i. 30 Tikki diida si Aron dohot halak Israel marsinondang bohi ni si Musa, gabe mabiar ma nasida lao manjonoki ibana.+

31 Alai dijou si Musa ma nasida. Gabe ro ma si Aron dohot sude pamimpin ni halak Israel. Dung i, makkatai ma si Musa tu nasida. 32 Dung ro sude halak Israel tu labbung ni si Musa, dipaboa ibana ma sude paretta na dilehon Jahowa tu ibana di Dolok Sinai.+ 33 Dung sae si Musa makkatai dohot nasida, ditutup ibana ma bohina pakke kain.+ 34 Alai molo naeng makkatai si Musa tu jolo ni Jahowa, ikkon bukkaonna do tutup ni bohina.+ Dung kaluar ibana, dipaboa ibana ma sude paretta i tu halak Israel.+ 35 Alai diida halak Israel ma marsinondang bohi ni si Musa. Alani i ditutup si Musa ma bohina sahat tu na lao ibana muse makkatai dohot Debata.*+

35 Disuru si Musa ma asa marpungu sude halak Israel, jala didok ma tu nasida, “On ma paretta ni Jahowa na ikkon ulahononmuna:+ 2 Holan saleleng onom ari do hamu boi karejo. Alai di ari na papituhon, ikkon maradi do hamu. Ikkon badia do ari i di hamu. Ai ari Sabat do i, ari ni Jahowa maradian.+ Manang ise na karejo di ari Sabat ikkon dipamate.+ 3 Manang didia pe hamu tinggal, unang pagalak hamu api di ari Sabat.”

4 Dung i didok si Musa ma muse tu sude halak Israel, “On ma paretta ni Jahowa, 5 ‘Papungu hamu ma sumbangan tu Jahowa.+ Ganup halak na taronjar rohana,+ dilehon ma sumbangan tu Jahowa, i ma mas, perak, tombaga, 6 bonang na balau, wol na ungu, bonang na merah, bonang linen na halus, ibbulu ni hambing,+ 7 kulit ni biru-biru jantan na diwarnai pakke warna merah, kulit ni anjing laut, hau akasia, 8 miak na dipakke tu lampu, miak balsam* na dipakke tu miak na badia,* na dipakke tu dupa na angur,+ 9 batu oniks, dohot akka batu na asing na lao dibahen tu baju epod+ dohot tu panutup ni andora.*+

10 “‘Ro ma manang ise pe na malo sian hamu,+ asa dibahen sude na diparettahon Jahowa, 11 i ma tabernakel rap dohot kain kemah dohot panutupna, hait-haitna, rangkana, palangna, tiangna dohot alasna, 12 poti+ dohot hau pangusungna,+ panutupna+ dohot tire pembatasna,+ 13 meja+ dohot hau pangusungna, sude peralatanna dohot roti pelean,+ 14 inganan ni lampu+ dohot peralatanna, lampuna dohot miak na dipakke tu lampu,+ 15 langgatan inganan manutung dupa+ dohot hau pangusungna, miak na badia* dohot dupa na angur,+ dohot tire di pintu masuk ni tabernakel i, 16 langgatan inganan manutung pelean situtungon,+ rangrang na sian tombaga, hau pangusung dohot sude peralatanna, bak dohot panukkolna,+ 17 tire na dibahen di sakaliling ni alaman,+ tiangna dohot alasna, tire di pintu masuk ni alaman, 18 patok ni kain kemah ni tabernakel, patok ni tire na di sakaliling ni alaman dohot talina,+ 19 baju na massai denggan ditonun+ na lao dipakke tikki marhobas di inganan na badia, baju ni malim* na tu si Aron,+ dohot baju tu akka anak ni si Aron na lao marhobas gabe malim.’”

20 Dung i lao ma sude halak Israel i sian jolo ni si Musa. 21 Manang ise na taronjar rohana,+ ro ma nasida mangalehon sumbangan tu Jahowa. Las do roha ni nasida mangalehon i lao dipakke mambahen kemah parpunguan, baju ni malim,* dohot sude na porlu lao manomba Debata. 22 Marroan do nasida torus, bawa nang borua na taronjar rohana. Diboan nasida do bros, anting-anting, cincin, dohot akka perhiasan na asing, songon i nang akka barang na sian mas. Sude do nasida mangalehon mas gabe pelean* tu Jahowa.+ 23 Ro ma sude halak nappuna bonang na balau, wol na ungu, bonang na merah, bonang linen na halus, ibbulu ni hambing, kulit ni biru-biru jantan na diwarnai pakke warna merah, dohot kulit ni anjing laut. Jala dilehon ma i gabe sumbangan. 24 Akka na boi mangalehon perak dohot tombaga, ro do nasida mangalehon i gabe sumbangan tu Jahowa. Songon i do nang akka na boi mangalehon hau akasia, ro do nasida mangalehon i lao dipakke tu ulaon i.

25 Songon i nang sude borua na malo manggulung bonang.+ Ro do nasida mamboan bonang naung digulung, i ma bonang na balau, wol na ungu, bonang na merah, dohot bonang linen na halus. 26 Ro do muse sude borua na malo manggulung bonang na sian ibbulu ni hambing. Sian na nionjar ni rohana do nasida mangulahon i.

27 Marroan do akka pamimpin ni halak Israel. Diboan nasida do batu oniks dohot akka batu na asing na lao dibahen tu baju epod dohot tu panutup ni andora.*+ 28 Diboan nasida do muse miak balsam,* miak na dipakke tu lampu, na dipakke tu miak na badia,*+ dohot na dipakke tu dupa na angur.+ 29 Sude do halak Israel, bawa nang borua na taronjar rohana ro mamboan sumbangan. Diboan nasida do i lao tu ulaon na diparettahon Jahowa marhite si Musa. Dilehon nasida do i gabe pelean tu Jahowa sian na nionjar ni roha ni nasida.+

30 Didok si Musa ma muse tu halak Israel i, “Nungnga dipillit Jahowa be si Bezalel, anak ni si Ur, pahoppu ni si Hur na sian marga Juda.+ 31 Dilehon do tu ibana tondi parbadia, asa gabe marbisuk ibana, marparbinotoan, jala malo lao mangulahon sude ulaon, 32 merancang, mambahen akka barang sian mas, sian perak, dohot tombaga, 33 mamotong jala mamasang akka batu na arga, dohot mambahen akka barang na sian hau. 34 Jala dilehon do bisuk lao mangajari halak na asing tu si Bezalel dohot tu si Oholiab+ anak ni si Ahisamakh na sian marga Dan. 35 Dibahen Debata do nasida malo mangulahon sude ulaon+ ni partukkang, panulam, partonun na mamakke bonang na balau, bonang na ungu, bonang na merah, bonang linen na halus, dohot akka tonun na asing. Diulahon nasida na dua do sude ragam ni ulaon i. Jala nasida na dua do na mambahen sude rancanganna.

36 “Rap karejo do si Bezalel, dohot si Oholiab, rap dohot sude halak na malo. Ai dilehon Jahowa do tu nasida bisuk dohot parbinotoan, asa boi diattusi nasida songon dia mambahen tabernakel i dos songon na diparettahon Jahowa.”+

2 Dijou si Musa ma si Bezalel, dohot si Oholiab, dohot sude halak na malo naung mandapot bisuk sian Jahowa,+ i ma akka halak na taronjar rohana jala rade mangulahon sude ulaon i.+ 3 Dijalo nasida ma sian si Musa sude sumbangan+ na dilehon ni halak Israel lao dipakke tu ulaon na di tabernakel i. Jala ganup manogot, torus dope ditaruhon halak Israel tu si Musa pelean sian na nionjar ni roha ni nasida.

4 Dung dimulai nasida ulaon lao pajongjokkon inganan na badia i, marroan ma akka halak na malo. 5 Didok nasida ma tu si Musa, “Nungnga godang situtu na binoan ni bangso on. Unggodang do i sian na dihaporluhon tu ulaon na diparettahon Jahowa.” 6 Dung i, didok si Musa ma asa dibahen boa-boa tu sude perkemahan i. Songon on ma isi ni boa-boa i, “Unang be boan hamu sumbangan lao tu ulaon na di tabernakel.” Alani i, dang diboan nasida be sumbangan ni nasida. 7 Cukkup do sumbangan ni nasida i lao mambahen sude ulaon i, gariada lobi dope.

8 Sude tukkang na malo i+ mambahen sappulu kain kemah ni tabernakel.+ Kain kemah i dibahen sian bonang linen na halus na undenggan, sian bonang na balau, sian wol na ungu, dohot sian bonang na merah. Jala disulam si Bezalel do gambar ni kerubim* di kain i.+ 9 Sarupa do sude ukkuran ni kain i. Ganjang ni sada kain 28 asta* jala bidangna 4 asta. 10 Dipadomu ibana ma lima kain kemah i gabe sada kain na bidang. Jala dibahen ibana do muse songon i tu kain kemah na lima nai. 11 Dung i dibahen ibana ma akka golang sian kain na balau, jala dilokkotton ma i tu pinggir ni kain na bidang i. Dibahen ibana do muse songon i tu pinggir ni kain na bidang na sada nai, asa boi dipadomu kain na bidang na dua i. 12 Dibahen ibana ma 50 golang na sian kain tu pinggir ni sada kain na bidang i. Jala dibahen ibana ma muse 50 golang na sian kain tu pinggir ni kain na bidang na sada nai, asa adong pasangan ni golang i tikki dipadomu kain na dua i. 13 Dung i, dibahen ibana ma 50 hait-hait ni kain i sian mas. Dipadomu ibana ma kain na bidang na dua i mamakke hait-hait i, gabe sada ma kain ni tabernakel i.

14 Dibahen ibana do muse 11 kain sian ibbulu ni hambing, asa adong panutup ni tabernakel i.+ 15 Sarupa do ukkuran ni sude kain kemah na 11 i. Ganjang ni ganup kain 30 asta, jala bidangna 4 asta. 16 Dipadomu ibana ma lima kain kemah i gabe sada kain na bidang. Jala dipadomu ibana ma muse kain na onom nai gabe sada kain na bidang. 17 Dung i dibahen ibana ma 50 golang na sian kain tu pinggir ni kain na bidang parjolo. Jala dibahen ibana ma muse 50 golang na sian kain tu pinggir ni kain na sada nai, asa boi dipadomu dua kain na bidang i. 18 Dibahen ibana ma muse 50 hait-hait na sian tombaga asa boi dipadomu dua kain na bidang i.

19 Dibahen ibana ma muse panutup ni tabernakel i sian kulit ni biru-biru jantan na diwarnai pakke warna merah. Jala dibahen ibana do muse panutup na sian kulit ni anjing laut na lao dibahen tu ginjang ni kain i.+

20 Dibahen ibana do muse rangka ni tabernakel i sian hau akasia.+ Jala jongjong do sude dibahen ibana rangkana i.+ 21 Timbo ni ganup rangkana i sappulu asta jala bidangna sada satonga asta. 22 Dibahen ibana do dua pat ni ganup rangka i jala sarupa do dibahen ganjang ni patna i. Songon i do dibahen ibana tu sude rangka ni tabernakel i. 23 Dipasang ibana do 20 rangka ni tabernakel i di sabola selatan. 24 Dibahen ibana do 40 alas ni rangka na 20 i. Dibahen ibana do alasna i sian perak, bentukna segi opat jala marlubang. Dibahen ibana do dua alas ni pat ni sada rangka. Ai dua pat ni sada rangka. Songon i ma dibahen ibana tu sude rangka i.+ 25 Dipasang do muse 20 rangka ni tabernakel i di sabola utara. 26 Dibahen do 40 alas ni rangka na 20 i. Jala dibahen do alasna i sian perak, bentukna segi opat, jala marlubang. Dibahen ibana do dua alas ni pat ni sada rangka.

27 Dipasang ibana do muse onom rangka di sabola barat, i ma bagian pudi ni tabernakel i.+ 28 Dibahen ibana do muse dua rangka nai lao manahan sudut ni tabernakel na di bagian pudi. 29 Dibahen ibana do dua lappis hau ni rangka i, mulai sian toru sahat tu ginjang. Mardomu ma rangka i di golang na parjolo na di ginjang i. Songon i ma dibahen tu dua rangka na manahan dua sudut bagian pudi ni tabernakel i. 30 Jadi ualu ma sude rangka i. Jala 16 ma alasna na marlubang, na dibahen sian perak. Ai dua alas ni sada rangka.

31 Dibahen ibana do akka palang na sian hau akasia lao padomuhon sude akka rangka i. Dibahen ibana do lima palang tu akka rangka na di sabola selatan ni tabernakel i.+ 32 Lima palang tu akka rangka na di sabola utara ni tabernakel, jala lima palang nai tu akka rangka na di sabola barat, i ma bagian pudi ni tabernakel i. 33 Dung i, dipasang ibana ma palang na di bagian tonga-tonga ni tabernakel i sian ujung tu ujung. 34 Dilappis ibana do akka rangka i mamakke mas. Dibahen ma muse tu akka rangka i akka golang na sian mas, asa boi dipamasuk palang i tu akka golang i. Jala dilappis ibana do akka palang i mamakke mas.+

35 Dung i dibahen ibana do tire+ na sian bonang na balau, sian wol na ungu, sian bonang na merah, dohot sian bonang linen na halus na undenggan. Disulam ibana do muse akka gambar ni kerubim+ di tire i.+ 36 Dung i dibahen ibana do opat tiang panggattungan ni tire i sian hau akasia na dilappis dohot mas. Dibahen ibana do muse hait-hait ni tire i sian mas. Dibahen do muse opat alas ni tiang i sian perak, jala marlubang ma bahen. 37 Dibahen ibana do tire* di pintu ni tabernakel i. Ditonun ibana do tire i mamakke bonang linen na halus na undenggan, bonang na balau, wol na ungu, dohot bonang na merah.+ 38 Dibahen ibana do muse lima tiang panggattungan ni tire i dohot hait-haitna. Dilappis ibana do bagian parginjang ni tiang i dohot akka panambungna* mamakke mas. Alai sian tombaga do dibahen ibana alas ni tiang na lima i jala marlubang do i dibahen.

37 Dibahen si Bezalel+ ma poti parpadanan sian hau+ akasia. Ganjangna dua satonga asta,* bidangna sada satonga asta, jala timbona sada satonga asta.+ 2 Dilappis ibana ma poti i sian bagasan dohot sian luar mamakke mas murni. Jala dibahen ibana do bingkai na sian mas tu bagian parginjang di sakaliling ni poti i.+ 3 Dung i, dibahen ibana ma opat golang na sian mas. Dilokkotton ma golang i tu ginjang ni pat ni poti i, dua di sabola kiri, dua di sabola kanan. 4 Dibahen ibana ma muse akka hau pangusung ni poti i sian hau akasia, jala dilappis ibana do i mamakke mas.+ 5 Dipamasuk ibana ma hau pangusung i tu golang-golang na di sapping ni poti i, asa boi diangkat poti i.+

6 Dibahen ibana do panutup ni poti i sian mas murni.+ Ganjangna dua satonga asta jala bidangna sada satonga asta.+ 7 Ditopa ibana do dua patung kerubim*+ sian mas. Dibahen do i di ganup ujung ni tutup ni poti i.+ 8 Sada patung kerubim ma dibahen di ganup ujung ni tutup ni poti i. 9 Marsiadop-adopan do patung kerubim na dua i dibahen ibana, jala unduk do bohi ni patung i mangida panutup ni poti i.+ Herbang do habong ni patung kerubim i tu ginjang manghukkupi panutup ni poti i.+

10 Dung i, dibahen ibana do muse sada meja sian hau akasia.+ Ganjangna dua asta, bidangna sada asta, jala timbona sada satonga asta.+ 11 Dilappis ibana do meja i mamakke mas murni. Jala dibahen ibana do bingkai na sian mas tu sakaliling ni meja i di bagian parginjang. 12 Dibahen ibana ma muse papan nasa bidang ni talapak ni tangan* tu sakaliling ni meja i. Jala dibahen do muse bingkai na sian mas di bagian toru, di pinggir ni papan i. 13 Dung i, dibahen ibana ma opat golang na sian mas. Dilokkotton ma golang i tu pat ni meja i, i ma tu opat sudut ni meja i. 14 Jonok do dibahen akka golang i tu pinggir ni meja i. Dipamasuk ma hau pangusung ni meja i tu akka golang i. 15 Dibahen ibana do akka hau pangusung ni meja i sian hau akasia jala dilappis do i pakke mas. Jala hau i ma na dipakke lao mamboan meja i. 16 Dibahen ibana do muse akka peralatan na lao dibahen di atas ni meja i, i ma akka piring, cakkir, ceret, dohot baskom na dipakke mangusehon pelean siinumon. Dibahen ibana do i sude sian mas murni.+

17 Dibahen ibana do muse inganan ni lampu+ sian mas murni. Adong do tiangna dohot alasna. Jala adong do dakkana, kelopakna, kuncupna, dohot bungana. Sian sada batang mas na murni do ditopa ibana inganan ni lampu i dohot sude bagianna.+ 18 Dibahen ibana ma onom dakka ni inganan ni lampu i. Tolu di kanan, jala tolu di kiri. 19 Di sada dakka, adong tolu kelopak bunga na bentukna songon bunga almond, na di holang-kolangi kuncup dohot bunga. Songon i ma dibahen dakka ni inganan ni lampu na onom i, tolu di kanan jala tolu di kiri. 20 Alai di tiang ni lampu i, adong opat kelopak bunga na bentukna songon bunga almond, na di holang-kolangi kuncup dohot bunga. 21 Dibahen ibana do sada kuncup di pardomuan ni dakka na parjolo, na paduahon, dohot na patoluhon. Ai adong onom dakka ni inganan ni lampu i. 22 Ditopa sian sada batang mas na murni do kuncup, dakka, dohot sude bagian ni inganan ni lampu i. 23 Dibahen ibana do muse pitu lampu+ tu inganan ni lampu i. Dibahen do muse akka penjepit ni sumbu, dohot inganan ni gara ni api sian mas murni. 24 Sian sada talenta* mas murni do dibahen inganan ni lampu i dohot sude alat-alatna.

25 Dibahen ibana do muse sada langgatan sian hau akasia lao gabe inganan manutung dupa.+ Bentukna segi opat. Ganjangna saasta, bidangna pe saasta. Timbona dua asta. Jala dibentuk ibana do tanduk di langgatan i sabadan dohot langgatan i.+ 26 Dilappis ibana do langgatan i pakke mas murni. Dilappis ibana do bagian parginjang, mulai sian pinggirna sahat tu akka tandukna. Dibahen do muse bingkai na sian mas tu sakaliling ni bagian parginjang ni langgatan i. 27 Dibahen do muse opat golang na sian mas tu langgatan i. Dipasang do i di toru ni bingkai, di ganup sudut ni langgatan i. Jala tusi do dipamasuk akka hau pangusung ni langgatan i. 28 Dibahen ibana do akka hau pangusung ni langgatan i sian hau akasia, jala dilappis ibana do i mamakke mas. 29 Dibahen ibana do muse miak na badia lao mangalantik sasahalak+ dohot dupa na angur,+ na murni, jala na massai denggan dibahen.*

38 Dibahen si Bezalel do langgatan inganan manutung pelean situtungon sian hau akasia. Bentukna segi opat. Ganjangna lima asta,* bidangna lima asta, jala timbona tolu asta.+ 2 Dibentuk ibana ma tanduk di opat sudut ni langgatan i. Dung i, dilappis ma langgatan i dohot tombaga.+ 3 Dibahen ibana ma muse akka barang na dipakke tu langgatan i, i ma ember, sekop, baskom, garpu, dohot inganan ni gara ni api. Sian tombaga do dibahen ibana sudena i. 4 Dibuat ibana do piga-piga batang tombaga, jala dibahen songon rangrang. Dibahen ma i tu toru ni baba ni langgatan i, i ma di tonga-tonga ni langgatan i. 5 Dibahen ibana do muse opat golang na sian tombaga tu opat sudut ni langgatan i, na jonok tu rangrang na sian tombaga i. Tu golang-golang i ma dipamasuk hau pangusung ni langgatan i. 6 Dibahen ibana do piga-piga hau pangusung sian hau akasia lao tu langgatan i, jala dilappis do i pakke tombaga. 7 Asa boi diangkat langgatan i, dipamasuk ibana ma hau pangusung i tu golang-golang na di sapping ni langgatan i. Sian papan do dibahen langgatan i, jala bentukna songon poti na kosong.

8 Dibahen ibana do muse bak dohot panukkolna sian tombaga.+ Sian akka kaca* tombaga do dibahen ibana bak dohot panukkolna i, i ma kaca ni akka borua na diatur karejo di pintu kemah parpunguan i.

9 Dibahen ibana do muse asa adong alaman ni tabernakel i.+ Dibahen ibana do tire lao gabe batas ni alaman na tu sabola selatan. Tire i dibahen sian kain linen na halus na undenggan, jala ganjangna 100 asta.+ 10 Dibahen do 20 tiangna jala 20 alasna. Sian tombaga do alasna i dibahen jala marlubang do i dibahen. Dibahen do muse sian perak hait-hait ni tiang i dohot sude panambungna.* 11 Dibahen ibana do tire gabe batas ni alaman na tu sabola utara, ganjangna 100 asta. Dibahen do 20 tiang dohot 20 alasna sian tombaga jala na marlubang. Dibahen do hait-hait ni tiang i dohot sude panambungna* sian perak. 12 Dibahen ibana do muse tire gabe batas ni alaman na tu sabola barat, ganjangna 50 asta. Dibahen do sappulu tiangna, jala sappulu alasna na marlubang. Dibahen do hait-hait ni tiang i dohot sude panambungna* sian perak. 13 Bidang ni alaman na di sabola timur* ni tabernakel, i ma 50 asta. 14 Di alaman na di sabola timur i, dibahen do gerbang ni tabernakel i. Adong do dibahen tire na ganjangna 15 asta di sabola kanan ni gerbang i. Tolu ma tiangna dohot tolu alasna na marlubang. 15 Di sabola kiri ni gerbang i, dibahen ibana do tire na ganjangna 15 asta, tolu tiangna jala tolu alasna na marlubang. 16 Sian bonang linen na halus jala na undenggan do dibahen sude tire na di sakaliling ni alaman i. 17 Sian tombaga do sude alas ni tiang i, alai sian perak do dibahen hait-hait dohot akka panambungna.* Dilappis do sude bagian parginjang ni tiang i pakke perak, jala adong do akka panambung na sian perak di sude tiang na di alaman i.+

18 Ditonun sian bonang na balau, sian wol na ungu, sian bonang na merah, dohot sian bonang linen na halus na undenggan do tire ni gerbang ni alaman i. Ganjangna 20 asta jala timbona 5 asta. Sarupa do timbona tu timbo ni tire na di sakaliling ni alaman i.+ 19 Dibahen do opat tiangna jala opat alasna na marlubang sian tombaga. Sian perak do hait-haitna dohot akka panambungna* jala dilappis dohot perak do bagian parginjang ni tiang i. 20 Sian tombaga do dibahen sude patok ni kain kemah ni tabernakel dohot akka patok tire pembatas na di alaman ni tabernakel i.+

21 Akka on ma bahan na dipakke lao mambangun tabernakel, i ma kemah na badia inganan ni poti na marisi patik i.+ Disuru si Musa do halak Lepi+ mambahen daftar ni bahan i. Jala si Itamar+ anak ni Malim Aron ma na mangawasi nasida. 22 Si Bezalel,+ anak ni si Ur, pahoppu ni si Hur na sian marga Juda do na mangulahon sude na diparettahon Jahowa marhite si Musa. 23 Jala si Oholiab+ anak ni si Ahisamakh na sian marga Dan do na mangurupi ibana. Ai sahalak partukkang do si Oholiab, panulam, jala boi do ibana manonun bonang na balau, wol na ungu, bonang na merah, dohot bonang linen na halus.

24 Godang ni mas na dipakke tu sude ulaon na di tabernakel i, dos tu godang ni mas na dilehon gabe pelean na diayunhon.+ Godangna 29 talenta* dohot 730 sekel,* mangihutton timbangan di inganan na badia.* 25 Godang ni perak na diboan ni akka bawa na tardaftar goarna, i ma 100 talenta dohot 1.775 sekel, mangihutton timbangan di inganan na badia.* 26 Godang ni akka bawa na mandaftar na marumur 20 taon tu ginjang,+ i ma 603.550 halak.+ Ganup halak ikkon mangalehon satonga sekel mangihutton timbangan di inganan na badia.*

27 Godang ni perak na dipakke lao mambahen alas ni rangka ni tabernakel dohot alas ni tiang ni tire, i ma 100 talenta. Ai 100 do godang ni sude alas ni rangka dohot tiang i. Alani i, sada talenta ma tu sada alas na marlubang.+ 28 Dipakke ibana do 1.775 sekel perak lao mambahen hait-hait ni tiang, dohot lao mangalappis bagian parginjang ni tiang i. Dung i, dipadomu ibana ma i.

29 Godang ni tombaga na dilehon gabe pelean,* i ma 70 talenta dohot 2.400 sekel. 30 Dipakke ibana ma sude tombaga i lao mambahen alas* ni tiang ni pintu kemah parpunguan, mambahen langgatan na sian tombaga, dohot rangrang na di langgatan i, jala mambahen sude peralatan na dipakke tu langgatan i. 31 Dipakke ibana do i muse lao mambahen alas* ni sude tiang na di sakaliling ni alaman, mambahen alas ni tiang na di gerbang ni alaman, dohot mambahen patok+ ni sude kain kemah ni tabernakel dohot patok ni kain pembatas na di alaman.

39 Massai denggan do ditonun nasida akka baju na lao dipakke tikki marhobas di tabernakel. Baju i dibahen sian bonang na balau, wol na ungu, dohot bonang na merah.+ Dibahen nasida do muse baju ni malim* lao pakkeon ni si Aron,+ songon na diparettahon Jahowa tu si Musa.

2 Dibahen do muse baju epod+ sian bonang mas, bonang linen na halus na dumenggan, bonang na balau, wol na ungu, dohot sian bonang na merah. 3 Ditopa nasida ma sada lempengan mas gabe tipis. Dipotong si Bezalel ma i gabe bonang mas na lao disulam rap dohot bonang na balau, wol na ungu, bonang na merah, dohot bonang linen na halus. 4 Dibahen nasida ma muse abit panutup di bahu ni baju i lao padomuhon dua ujung ni baju epod i. 5 Ditonun nasida ma ikat pinggang ni epod i, asa boi diikkat gomos baju epod i.+ Sarupa do bahanna dohot baju epod, i ma sian bonang linen na halus na dumenggan, sian bonang na balau, sian wol na ungu, sian bonang na merah, dohot sian bonang mas. Ai songon i do paretta ni Jahowa tu si Musa.

6 Dibahen nasida ma muse akka batu oniks tu ginjang ni alas na sian mas. Jala diukir nasida ma di batu i akka goar ni anak ni si Israel. Diukir nasida do i songon na mambahen ukiran di cincin cap.+ 7 Songon paretta ni Jahowa tu si Musa, dibahen si Bezalel ma akka batu i di abit panutup na di bahu ni baju epod i. Batu i ma na gabe parningotan di akka anak ni si Israel.+ 8 Disulam si Bezalel ma muse panutup ni andora.*+ Dibahen do i songon na mambahen baju epod. Jala bahanna sian bonang linen na halus na dumenggan, bonang mas, bonang na balau, bonang wol na ungu, dohot bonang na merah.+ 9 Tikki dilipat dua panutup ni andora i, songon persegi do bentukna. Sanjokkal* ma ganjangna jala sanjokkal ma bidangna. 10 Dipasang ma akka batu i gabe opat baris di ginjang ni panutup ni andora i. Baris na parjolo, i ma batu permata na merah,* batu topas, dohot batu zamrud. 11 Baris na paduahon, i ma batu pirus, batu safir, dohot batu yaspis. 12 Baris na patoluhon, i ma batu lesyem,* batu akik, dohot batu kecubung. 13 Baris na paopatton, i ma batu krisolit, batu oniks, dohot batu giok. Jala dibahen nasida do alas ni sude batu i sian mas. 14 Jadi, 12 ma sude batu i. Diukir do sude goar ni anak ni si Israel tu sude batu i. Diukir do i songon mambahen ukiran di cincin cap. Sada goar patuduhon sada sian marga ni halak Israel na 12 i.

15 Dung i, dibahen nasida ma muse ratte na sian mas murni, na didandan songon tali tambang. Jala dipasang ma i tu panutup ni andora.+ 16 Dibahen nasida ma muse dua alas na sian mas dohot dua cincin na sian mas. Dipasang nasida ma cincin na dua i tu dua sudut* ni panutup ni andora i. 17 Dipamasuk nasida ma ujung ni ratte mas na dua i tu dua cincin na dipasang di sudut ni panutup ni andora i. 18 Dipamasuk nasida do muse ujung ni ratte mas na dua nai tu alas ni panutup na di bahu ni baju epod i. Gabe di bagasan ma baju epod i jala panutup ni andora i ma di luar. 19 Dibahen nasida do muse dua cincin sian mas, jala dipasang do i tu dua sudut ni panutup ni andora di bagian toru na dais tu baju epod i.+ 20 Dibahen nasida do muse dua nai cincin mas, jala dipasang do i di bagian jolo ni epod, di toru ni dua panutup ni bahu, di ginjang ni ikat pinggang, di jonok ni pardomuan ni ikat pinggang dohot baju epod i. 21 Lao mangikkat panutup ni andora i, dipamasuk nasida do tali na balau sian cincin na di panutup ni andora i tu cincin na di baju epod i. Alani i, hot ma torus panutup ni andora i di ginjang ni baju epod i dohot di ginjang ni ikat pinggang i. Ai songon i do diparettahon Jahowa tu si Musa.

22 Dibahen si Bezalel do muse rompi na ganjang na lao dipakke di bagasan ni baju epod. Ditonun do rompi i sian bonang na balau.+ 23 Dibahen do lubang ni leher ni rompi i. Ditonun do sude pinggir ni leherna i. Jala songon leher ni baju porang do i dibahen, asa unang mura maribak. 24 Dibahen nasida ma muse hiasan na songon buah delima. Dibahen do i sian bonang na balau, wol na ungu, dohot bonang na merah. Jala kaliling do i dibahen di toru, di pinggir ni rompi i. 25 Dibahen nasida do muse lonceng na gelleng na sian mas. Jala dipasang do i di holang-kolang ni buah delima na di sakaliling ni pinggir ni rompi i. 26 Marselang-seling do dibahen nasida lonceng dohot buah delima i. Songon i ma dibahen tu sude pinggir ni rompi i. Ai songon i do diparettahon Jahowa tu si Musa.

27 Ditonun nasida do muse jubah sian bonang linen na halus lao pakkeon ni si Aron dohot akka anakna.+ 28 Ditonun nasida do muse sorban,+ panutup ni ulu na denggan+ sian bonang linen halus, dohot celana pendek* sian bonang linen+ na halus jala na massai denggan. 29 Dibahen nasida do muse ikat pinggang na ditonun sian bonang linen na halus na undenggan, bonang na balau, wol na ungu, dohot bonang na merah. Ai songon i do diparettahon Jahowa tu si Musa.

30 Dibahen nasida ma muse sada lempengan mas na murni na marhillong, gabe lempengan mas na tipis jala na badia.* Diukir nasida ma disi hata, “Na Badia do Jahowa.” Diukir nasida do i songon na mambahen ukiran di cincin cap.+ 31 Dipasang nasida ma tali na sian bonang na balau tu lempengan mas i, asa boi diikkatton tu sorban i. Ai songon i do diparettahon Jahowa tu si Musa.

32 Songon i ma nasida mambahen sude ulaon na di tabernakel, i ma kemah parpunguan i. Diulahon halak Israel do i sude dos songon na diparettahon Jahowa tu si Musa.+ Diulahon nasida do i pas songon parettana i.

33 Dung i diboan nasida ma tu si Musa tabernakel i,+ kain panutupna,+ dohot sude peralatanna, i ma hait-haitna,+ rangkana,+ akka palangna,+ tiangna dohot akka alasna na marlubang,+ 34 panutup na sian kulit ni biru-biru jantan na diwarnai pakke warna merah,+ panutup na sian kulit ni anjing laut, tire pembatas,+ 35 poti inganan ni Patik dohot hau pangusungna,+ tutupna,+ 36 meja dohot peralatanna,+ roti na badia, 37 inganan ni lampu na sian mas murni,+ akka lampu na dipasang marbaris, sude perlengkapanna,+ miak na lao tu lampu i,+ 38 langgatan+ na sian mas, miak na badia,*+ dupa na angur,+ tire+ tu pintu ni tabernakel, 39 langgatan na sian tombaga,+ rangrang na sian tombaga na dibahen di langgatan i, hau pangusung+ dohot sude peralatanna,+ bak dohot panukkolna,+ 40 tire pembatas na di alaman, tiangna dohot alasna na marlubang,+ tire+ na di gerbang ni alaman, tali dohot patok ni kemah,+ dohot sude peralatan na dipakke lao marhobas tu tabernakel, tu kemah parpunguan i, 41 baju na massai denggan ditonun na lao dipakke tikki marhobas di inganan na badia, baju ni malim* na tu si Aron,+ dohot baju tu akka anak ni si Aron na lao marhobas gabe malim.

42 Diulahon halak Israel do i sude dos songon na diparettahon Jahowa tu si Musa.+ 43 Tikki dipareso si Musa sude ulaon ni nasida i, diida ibana ma dibahen nasida do sudena i dos songon na diparettahon Jahowa. Alani i, dipangido ibana ma tu Debata asa dipasu-pasu nasida.

40 Dung i didok Jahowa ma tu si Musa, 2 “Di ari na parjolo, di bulan na parjolo, pajongjong ma tabernakel, i ma kemah parpunguan i.+ 3 Bahen ma poti inganan ni Patik i+ tu bagasan tabernakel, jala bahen ma tire pembatas di jolo ni poti i.+ 4 Bahen ma meja i tu bagasan ni tabernakel.+ Susun ma akka peralatanna i tu ginjang ni meja i. Bahen ma muse inganan ni lampu i tu bagasan ni tabernakel+ jala pagalak ma akka lampuna.+ 5 Bahen ma langgatan na sian mas na lao gabe inganan manutung dupa i+ di jolo ni poti inganan ni patik i. Jala pasang ma tire di pintu ni tabernakel i.+

6 “Peakkon ma langgatan inganan manutung pelean situtungon+ di jolo ni pintu ni tabernakel, i ma kemah parpunguan i. 7 Peakkon ma bak na sian tombaga i di holang-kolang ni kemah parpunguan dohot langgatan i. Dung i isi ma aek tu bak i.+ 8 Pasang ma tire pembatas tu sakaliling ni alaman ni tabernakel i+ dohot tire+ na di gerbang ni alamanna. 9 Buat ma miak na badia*+ jala pispisson ma tu* tabernakel dohot tu sude na adong di bagasan ni tabernakel i.+ Pabadia ma i rap dohot sude peralatanna asa gabe badia sudena i. 10 Pispisson ma miak tu langgatan inganan manutung pelean situtungon dohot tu sude peralatanna, jala pabadia ma langgatan i, asa massai badia langgatan i.+ 11 Pispisson ma muse miak tu bak dohot tu panukkolna, jala pabadia ma i.

12 “Dung i jou ma si Aron dohot akka anakna ro tu jonok ni pintu kemah parpunguan i. Jala paridi ma nasida.*+ 13 Pakkehon ma baju malim* tu si Aron,+ lantik*+ jala papulik ma ibana lao marhobas gabe malim tu Au. 14 Dung i, jou ma muse akka anak ni si Aron jala pakkehon ma jubah tu nasida.+ 15 Songon naung dibahen ho tu bapak ni nasida, lantik* ma nasida+ muse asa marhobas gabe malim tu Au. Jala pelantikan on ma na mambahen nasida dohot akka pinopparna marhobas gabe malim tu Au saleleng ni lelengna.”+

16 Diulahon si Musa do sude na diparettahon Jahowa i.+ Diulahon ibana do i sude pas songon parettana i.

17 Di ari na parjolo, di bulan na parjolo, di taon na paduahon, sae ma dipajongjong ibana tabernakel i.+ 18 Tikki dipajongjong si Musa tabernakel i, dibahen ibana ma akka alasna na marlubang,+ dipasang ibana ma akka rangkana,+ dipamasuk ibana ma akka palangna,+ jala dipajongjong ibana ma akka tiang. 19 Dipaherbang si Musa ma kain kemah+ ni tabernakel i, jala dipaherbang ibana ma muse tu ginjang ni kain i akka kain panutup na asing.+ Ai songon i do na diparettahon Jahowa tu ibana.

20 Dung i, dibuat ibana ma akka batu panuratan ni patik i,+ jala dipamasuk ibana ma i tu poti parpadanan.+ Dipasang ibana ma akka hau pangusung+ ni poti i jala dipasang ibana ma tutup+ ni poti i.+ 21 Diboan si Musa ma poti inganan ni patik i tu tabernakel.+ Jala dipasang ibana ma tire+ lao pembatas na manutupi inganan ni poti i, songon na diparettahon Jahowa tu si Musa.

22 Diboan ibana ma muse meja+ tu kemah parpunguan i, jala dipeakkon ma i di jolo* ni tire i, di sabola utara ni tabernakel i. 23 Dipeakkon si Musa ma roti naung disusun i di ginjang ni meja,+ di jolo ni Jahowa, songon na diparettahon Jahowa tu si Musa.

24 Diboan ibana ma muse inganan ni lampu i+ tu bagasan ni kemah parpunguan i. Dipeakkon ibana ma i di jolo ni meja, di sabola selatan di tabernakel i. 25 Dipagalak si Musa ma akka lampuna i+ di jolo ni Jahowa, songon na diparettahon Jahowa tu ibana.

26 Diboan ibana ma muse langgatan na sian mas+ tu bagasan ni kemah parpunguan i. Dipeakkon ma i di jolo ni tire. 27 Di langgatan i ma ditutung dupa na angur,+ asa nakkok timusna+ songon na diparettahon Jahowa tu si Musa.

28 Dipasang ibana ma muse tire+ tu pintu ni tabernakel i.

29 Dipeakkon si Musa ma langgatan inganan manutung pelean situtungon+ di jolo ni pintu tabernakel, i ma kemah parpunguan i, asa boi dipelehon pelean situtungon+ dohot pelean sipanganon* di ginjang ni langgatan i. Ai songon i do diparettahon Jahowa tu si Musa.

30 Dibahen si Musa ma bak i di holang-kolang ni kemah parpunguan i dohot langgatan. Dung i, diisi ibana ma aek tu bak i lao dipakke manussi tangan dohot pat.+ 31 Disussi si Musa, si Aron, dohot akka anakna ma pat dohot tangan ni nasida mamakke aek na sian bak i. 32 Molo masuk nasida tu kemah parpunguan i manang ro tu labbung ni langgatan i, ikkon disussi nasida do pat dohot tangan ni nasida,+ songon na diparettahon Jahowa tu si Musa.

33 Dung i, dipasang ibana ma tire pembatas di sakaliling ni alaman ni tabernakel,+ di langgatan, dohot di gerbang ni alaman.+

Ujungna, sae ma sude ulaon ni si Musa. 34 Ditutupi ombun ma kemah parpunguan i, jala digohi hamuliaon ni Jahowa ma tabernakel i.+ 35 Dang boi si Musa masuk tu kemah parpunguan i, ai ditutupi ombun do kemah i jala digohi hamuliaon ni Jahowa do tabernakel i.+

36 Molo nakkok ombun i sian atas ni tabernakel i, ikkon dipapinda halak Israel do perkemahan ni nasida tu inganan na asing. Torus ma songon i diulahon nasida saleleng di pardalanan.+ 37 Alai molo dang nakkok ombun i sian tabernakel, dang papindaon ni halak Israel perkemahan ni nasida.+ 38 Saleleng di pardalanan halak Israel, toktong do diida nasida ombun na sian Jahowa di atas ni tabernakel i jala di tikki borngin diida nasida do adong api.+