AKKA ENDE SIAN SI SALOMO
1 Ende na massai uli sian si Salomo,+
2 “Umma ma au pakke bibirmi,
Ai dumenggan do holong ni roham sian anggur.+
3 Massai angur do miak na pinakkemi.+
Goarmu pe dos do songon miak na angur na diusehon.+
Alani i ma godang anak boru na marholong ni roha tu ho.
4 Ai diboan raja do au tu bagasan kamarna!
Boan ma au sian on,* lao ma hita.
Rap marlas ni roha ma hita.
Tahatai ma muse taringot holong ni roham tu au, ai dumenggan do i sian anggur.
Alani i do dihaholongi anak boru ho.
5 Ale akka boru Jerusalem, birong do au alai uli do rupakku
Dos songon kemah na sian Kedar,+ jala dos songon kain kemah+ ni si Salomo.
6 Unang ma leas rohamuna ala birong au,
Ai na didadang las ni ari do au.
Muruk do akka itokku tu au,
Disuru do au karejo di ladang anggur,
Hape ladang anggurhu sandiri pe dang hukarejoi.
7 Paboa ma tu au hasian,
Didia do ho marmahan biru-birum,+
Didia do dibahen ho maradi akka biru-birumi tikki arian?
Boasa pasombuonmu au songon sahalak borua na manutupi bohina,*
Na sai mangalului ho di tonga-tonga ni biru-biru ni akka donganmu?”
8 “Ale borua na massai uli, molo dang diboto ho,
Ihutton ma akka biru-biru i
Jala parmahani ma akka anak ni hambingmi di jonok ni kemah ni akka parmahan.”
9 “Ale hasian, massai uli do ho dos songon hoda boru-boru di kareta porang ni si Firaun.+
10 Lam bagak do bohim ala mamakke perhiasan,*
Rukkungmu pe lam bagak do ala mamakke kalung.
11 Bahenonnami ma di ho mahkota na sian mas
Jala adong do hiasanna sian perak.”
15 “Uli nai ho ale hasian.
Massai uli do ho. Dos songon mata ni darapati do matami.”+
16 “Ganteng jala burju do ho hasian.+
Bulung-bulung ma na gabe podomatta.
17 Langit-langit ni jabutta pe sian hau ares,
Jala atapna pe sian hau juniper.
2 “Songon bunga lili na di tonga-tonga ni suga-suga,
Songon i ma ho hasian di tonga-tonga ni akka anak boru.”
3 “Songon hau appel na di tonga-tonga ni tombak do ho,
Lomo do rohakku marlinggom di bonana,
Jala manis do huallang parbuena.
Songon i do ho hasian di tonga-tonga ni akka doli-doli.
4 Diboan ibana do au tu jabu parpestaan,
Jala sude do halak mangida holan tu au do holong ni rohana.
5 Lehon ma tu au kue kismis+ dohot appel,
Asa las rohakku jala margogo au muse,
Ai masihol situtu do rohakku tu haholongakki.
6 Lambok do tangan kirina manjama ulukku,
Jala tangan kananna makkaol au.+
7 Ale akka borua Jerusalem, marsumpa ma hamu tu au,
Marhite kijang+ dohot rusa na di ladang,
Unang ma bahen hamu tubu holong di bagasan rohakku andorang so tikkina dope.+
8 Ida ma! Nungnga ro be haholongakki,
Hubege do soarana!
Nakkok do ibana tu dolok, jala marlojongi do ibana di dolok-dolok.
9 Dos songon kijang do haholongakki, jala dos songon anak ni rusa jantan.+
Jongjong do ibana di balik ni tembok,
Manatap-natap do ibana sian jandela,
Jala diida ibana do sian lubang ni jandela.
10 Didok haholongakki ma tu au,
‘Dungo ma ho hasian,
Beta ma haholongan, rap lao ma hita.
11 Ida ma! Nga salpu be musim dingin.*
Jala dang ro be udan.
12 Nungnga kabbang be akka bunga na di ladang,+
Nungnga dapot tikkina lao mamangkas hau anggur,+
Jala tarbege do soara ni anduhur marende di ladang.+
13 Nungnga marparbue be hau ara,+
Nungnga marbunga be hau anggur jala gabe angur ma sude porlak i.
Dungo ma ho, ale haholongan,
Ro ma ho hasian, rap ma hita na dua.
14 Ale darapatikku, na maringanan di holang-kolang ni dolok batu+
Jala na maringanan di rura,
Loas ma au mangida bohimi dohot mambege soarami,+
Ai lambok do soaram jala uli do rupam.’”+
15 “Takkup ma akka anjing hutan* i,
Akka anak ni anjing hutan na manegai ladang anggurnami,
Ai pas marbunga do hau anggurnami i.”
16 “Au do nappuna haholongakki jala ibana do nappuna au.+
Diparmahani ibana do biru-biruna+ di tonga-tonga ni akka bunga lili.+
17 Andorang so mangullus dope alogo, andorang so golap dope ari,
Hatop ma ho mulak hasian,
Songon kijang+ manang anak ni rusa jantan+ na di dolok na manirang hita.*
3 “Tikki di podoman borngin i,
Masihol do au tu haholongakki,+
Hulului ma ibana, alai dang juppangku.+
2 Tarsunggul ma au jala lao ma au makkalilingi kota,
Hulului ma tu akka dalan dohot tu tano lapang,
Sai hulului do haholongakki,
Hulului do ibana, alai dang juppangku.
3 Tikki martugas akka panjaga ni kota diida nasida ma au,+
Dung i husukkun ma nasida, ‘Adong diida hamu haholongakku?’
4 Dung hutadikkon nasida
Juppangku ma haholongakki.
Hutiop ma ibana gomos, jala dang hupalua
Sahat tu na huboan ibana tu jabu ni omakku,+
Tu bagasan kamar inganan hatubuakku.
5 Ale akka boru Jerusalem, marsumpa ma hamu tu au,
Marhite kijang dohot rusa na di ladang,
Unang ma bahen hamu tubu holong di bagasan rohakku andorang so tikkina dope.”+
6 “Aha do na songon timus i na ro sian gurun?
Angurna songon miak mir* dohot haminjon,*
Uapna songon miak na angur na digadis akka partiga-tiga.”+
7 “Ida ma! Tandu* ni si Salomo do i.
Adong do 60 bawa na gogo na makkalilingi tandu i,
Nasida ma akka bawa na gogo na sian Israel,+
8 Malo do nasida sude marporang
Jala adong be do podang ni nasida.
Adong do podang di gotting ni ganup halak
Jala rade do nasida marporang nang pe tikki borngin.”
9 “Tandu ni si Salomo do i
Na dibahen ibana sian hau Lebanon.+
10 Dibahen ibana do tiangna sian perak,
Sandaranna sian mas,
Kursina sian wol na ungu.
Jala lam bagak do bagasan ni tandu i
Alani holong ni akka boru Jerusalem.”
11 “Ro ma hamu ale boru Sion,
Ida hamu ma Raja Salomo.
Dipakke ibana do mahkota na dibahen omakna+
Di pesta tikki mangoli ibana,
Di ari na mambahen las rohana.”
4 Uli nai ho ale hasian.
Massai uli do ho.
Dos songon mata ni darapati do matami, na tarida sian balik ni salendangmu.
Obukmu pe, dos songon punguan ni akka hambing
Na turun sian Dolok Gilead.+
2 Bottar jala bagak do ngingim songon punguan ni biru-biru
Na baru dipangkas jala diparidi,
Denggan do i sude tarsusun
Jala dang adong na mago.
3 Bibirmu dos songon bonang na merah,
Jala lambok do ho makkatai.
Bohim pe dos do songon buah delima
Jala tarida do i sian balik ni salendangmu.
4 Rukkungmu+ dos do songon menara ni si Daud+
Rapi do akka batuna disusun,
Jala adong saribu perisai di ginjangna
Perisai ni akka tentara na gogo.+
5 Susum pe dos do songon dua anak ni rusa,
Songon anak ni kijang na kembar,+
Na manggagat di tonga-tonga ni bunga lili.
6 “Andorang so mangullus dope alogo, andorang so golap dope ari,
Lao ma au tu dolok na godang tubu hau mir
7 “Massai uli do ho hasianku,+
Dang adong na hurang sian ho.
8 Lao ma hita sian Libanon ale hasianku
Lao ma hita sian Libanon.+
Turun ma hita sian pussu ni Dolok Amana,*
Sian pussu ni Dolok Senir, sian pussu ni Dolok Hermon,+
Sian inganan ni akka singa, sian dolok inganan ni akka macan.
9 Ditakko ho do rohakki,+ ale ito hasian,
Tikki diida ho au, mallobok do taroktokku,
Perhiasan na di rukkungmu pe pasudahon rohakku.
10 Massai uli do holongmi,+ ale ito hasian!
11 Bibirmu pe, manis do songon madu asli, ale hasian.+
Jala dilam songon susu dohot madu,+
Angur ni bajum pe, songon angur ni Tombak Libanon.
12 Dos songon ladang na dihandangi do ho ale ito hasian,
Songon ladang na dihandangi, songon mata mual na ditutup.
13 Dos songon ladang do ho,* na gok hau delima
Massai denggan do akka parbuena jala adong do disi bunga na angur* dohot sangge-sangge na angur,
14 Adong do disi sangge-sangge,+ bunga safron, jarango,*+ dohot kulit manis.+
Adong do muse hau haminjon, hau mir, dohot hau gaharu,+
Dohot sude akka suan-suanan na angur.+
15 Dos songon mata mual na di ladang do ho, songon aek na tio,
Na ro sian Libanon.+
16 Dungo ma ho, ale alogo na sian utara,
Ro ma ho, ale alogo na sian selatan.
Mangullus ma ho tu ladangku.
Asa kaluar akka uapna na angur i.”
“Sai anggiat ma ro haholongakki tu ladangna
Jala diallang ibana ma akka parbuena na massai denggan.”
5 “Nungnga ro be au tu ladangku+
Ale ito hasian.
Nungnga hupapungu miak mir* dohot akka rempah-rempah.+
Nungnga huallang madu na sian asarna,
Nungnga huinum anggur dohot susu.”+
“Ale akka dongan, mangan ma hamu!
Minum ma hamu jala lok ma mabuk hamu alani cintamuna i!”+
2 “Modom do au, alai sai busisaon do au.+
Hubege ma manuktuki haholongakki!
‘Bukka jo ale ito hasian,
Ale darapatikku, na uli na lagu!
Nungnga maraek ulukku alani nambur,
Jala nungnga maraek obukku alani nambur.’+
3 Nga sanga hubukka pakkean luarhu,
Pakkeonku ma i muse?
Nungnga sanga husussi pattu,
Gabe kotor ma i muse bahenokku?
4 Ditarik haholongakki ma tanganku sian lubang ni pintu,
Gabe mallobok ma taroktokku.
5 Dungo ma au hubukka ma pintu tu haholongakki,
Maneteki do miak mir* sian tanganku,
Jala sahat do i tu jari-jarikku,
Dohot tu engsel ni pintu na hutiop.
6 Hubukka ma pintu i asa masuk haholongakki,
Hape dang disi be ibana, nungnga lao be ibana.
Marsak situtu ma rohakku ala nungnga lao ibana.
Hulului do ibana, alai dang juppangku.+
Hujou do ibana, alai dang dialusi au.
7 Pajuppang ma akka bawa na manjaga kota dohot au,
Dipukkuli nasida ma au sappe lukka.
Jala dibuat akka panjaga kota i ma salendangku.
8 Ale akka borua Jerusalem, marsumpa ma hamu tu au,
Molo juppangmuna haholongakki,
Paboa ma tu ibana na masihol situtu rohakku tu ibana.”
9 “Pittor songon dia huroa bawa i umbahen na massai holong roham tu ibana,
Ale siboru na massai uli?
Pittor songon dia huroa bawa i umbahen na massai holong roham tu ibana,
Sappe disuru ho hami ikkon marsumpa?”
10 “Ganteng do hasianki jala marhillong* do kulitna,
Unjago do ibana sian 10.000 bawa.
11 Dos songon mas do uluna, dos songon mas murni.
Dos songon bulung ni hau palem* do obukna margelombang
Jala birong do obukna i songon burung gagak.
12 Matana pe dos songon darapati na di topi ni aek,
Na maridi di bagasan susu,
Na songgop di topi ni kolam.*
13 Bohina dos songon ladang na gok tubu rempah-rempah,+
Jala godang suan-suanan na angur.
Bibirna pe dos songon akka bunga lili, jala manetek do miak mir* sian i.+
14 Dos songon mas do jari-jari ni tanganna na dihiasi batu krisolit.
Jala butuhana dos songon gading na marhillong na ditutupi batu safir.
15 Patna dos songon tiang na sian marmer na alasna sian mas murni.
Ganteng do ibana dos songon luat Libanon, jala dos songon hau ares.+
Songon i ma haholongakki, hasianki, ale akka boru Jerusalem.”
6 “Ale siboru na massai uli,
Tudia do lao haholonganmi?
Doppak dia do ibana lao?
Asa dohot hami mangalului.”
2 “Tu ladang do lao haholongakki,
Tu inganan na godang tubu rempah-rempah,
Tu ladang do ibana lao marmahan biru-biruna
Huhut papunguhon bunga lili.+
3 Au do nappuna haholongakki,
Jala ibana do nappuna au.+
Diparmahani ibana do biru-biruna di tonga-tonga ni akka bunga lili.”+
4 “Massai uli do ho ale hasian+ dos songon kota Tirza,*+
Dos songon uli ni kota Jerusalem,+
Jala dos do ho songon tentara na maol ditaluhon.+
5 Unang ma sai ida au,+
Tikki diida ho au, gabe mallobok do taroktokku.
Dos songon punguan ni akka hambing do obukmu
Na turun sian dolok-dolok Gilead.+
6 Bottar jala bagak do ngingim songon punguan ni biru-biru
Na baru diparidi,
Denggan do i sude tarsusun
Jala dang adong na mago.
7 Bohim pe dos do songon buah delima
Tarida do i sian balik ni salendangmu.
9 Alai holan sada do darapatikku,+ na uli di au.
Boru hasian ni omakna do ibana.
Jala haholongan ni* borua na manubuhon ibana.
Dibereng akka borua na asing ma ibana, jala dipuji nasida do ibana,
Akka ratu dohot akka gundik pe, dohot do mamuji ibana.
10 ‘Dos songon mataniari na marsinondang* do ibana,
Massai uli dos songon bulan purnama,
Dos songon tiur ni mataniari,
Jala songon tentara na maol ditaluhon do ibana.’”+
11 “Lao ma au tu ladang na godang hau na marparbue+
Lao mangida akka suan-suanan na baru tubu di rura,
Lao mangida atik naung martunas hau anggur,
Jala mangida atik naung marbunga hau delima.
13 Ro ma ho, ro ma ho, ale boru Sulam!
Ro ma ho, ro ma ho,
Asa boi diida hami ho muse!”
“Boasa lomo rohamuna mangida boru Sulam?”+
“Molo mangida ibana, dos do songon mangida dua pasukan tentara na manortor!”
7 “Massai uli do patmu mamakke solopmi,
Ale boru ni raja!
Massai uli do parlekkuk ni gottingmu dos songon perhiasan,
Na dibahen sahalak tukkang perhiasan.
2 Pusokmu dos do songon makkuk
Anggiat ma i toktong marisi anggur.
Butuham dos do songon gandum na dipapungu,
Di tonga-tonga ni akka bunga lili.
3 Susum pe dos do songon dua anak ni rusa
Songon anak ni kijang na kembar.+
4 Rukkungmu+ dos do songon menara na dibahen sian gading.+
Igungmu dos do songon menara Libanon,
Na doppak Damaskus.
Obukmu na ganjang i mambahen tarpangan roha ni raja.
6 Massai uli do ho ale hasianku,
Sian sude borua na bagak ho do na ubbagak!
7 Bentuk ni badanmu pe dos do songon hau palem,
Jala susum pe dos do songon tandan ni kurma.+
8 Dung i hudok ma, ‘Jakkitokku ma hau palem i
Lao mambuat parbuena.’
Susum dos do songon tandan ni buah anggur,
Hosam dos do songon angur ni appel,
9 Jala pamanganmu* dos do songon anggur na dumenggan.”
“Anggiat ma i lambok manetek tu haholongakki,
Jala lambok sahat tu bibir ni halak na modom.
10 Haholongakki do nappuna au,+
Jala lomo do rohana tu au.
11 Ro ma ho ale hasian,
Beta ma hita lao tu ladang,
12 Beta, hatop ma hita dungo manogotna i asa lao hita tu ladang anggur,
Lao mangida atik naung martumbur hau anggur,
Atik naung kabbang akka bunga,+
Atik naung marbunga hau delima.+
Disi ma patuduhonokku holong ni rohakku tu ho.+
13 Nungnga angur be buah dudaim.+
Jala adong do akka buah na massai denggan+ di jonok ni pintu ni jabutta.
Adong do akka buah na baru diputik dohot naung leleng diputik, ale hasianku,
Jala nungnga hupapulik i lao di ho.
8 “Autsugari ma nian ibotokku ho
Na manusu tu omakku!
Molo pajuppang au dohot ho di luar, jala huumma ho,+
Dang adong na mangissaki au.
Lehonokku ma tu ho anggur,
Dohot aek ni buah delima.
3 Lambok do tangan kirina manjama ulukku,
Jala tangan kananna makkaol au.+
4 Ale akka boru Jerusalem, marsumpa ma hamu tu au,
Unang ma bahen hamu tubu holong di bagasan rohakku andorang so tikkina dope.”+
5 “Ise do na ro na sian gurun i,
Na makkaol haholonganna?”
“Hudungoi ma ho di bona ni hau appel.
Disi do ho ditubuhon omakmu.
Jala haccit do dihilala omakmu tikki manubuhon ho disi.”
6 Bahen ma au songon materai di roham,
Jala songon materai di tanganmu.
Ai gogo do holong i dos songon hamatean,+
Jala holong na togu, dos do i songon Kuburan.*
Dos songon api na marsigorgor do i, api na sian Jahowa.*+
Molo adong sasahalak na naeng manuhor holong i marhite hamoraonna,
Gabe marlea do i.*
Aha do na ikkon bahenonnami
Molo adong na ro manopot ibana?”
9 “Molo tembok do ibana,
Bahenonnami ma benteng na sian perak manjaga ibana.
Alai molo pintu do ibana,
Bahenonnami ma palang na sian hau ares mangalinggomi ibana.”
10 “Dos songon tembok do au,
Jala susuku dos songon menara.
I do alana songon sahalak borua
Na mandapot hadameon do au di haholongakki.
11 Adong do ladang anggur ni si Salomo+ di Baal-hamon.
Disuru ibana do akka halak lao mangurus i.
Jala tikki marparbue, ikkon dilehon ganup halak do saribu keping perak.
12 Ale Salomo, ho do nappuna 1.000 keping perak* i,
Dohot 200 keping perak na sian akka na mangurus i.
Alai molo au, adong do porlak anggurhu sandiri.”
Songon i do nang au.”+
14 Pahatop ma hasian,
Marlojong ma ho songon kijang+
Manang songon anak ni rusa jantan
Di atas ni dolok na godang tubu akka rempah-rempah.”
As. “Tarik ma au”.
Manang “na manutupi bohina ala marlungun ni roha”.
Manang boi do “ala didandan obukmu”.
As. “uap ni sangge-sangge”.
As. “di holang-kolang ni susuku”.
Gota ni hau na angur. Ida di Kamus.
Manang “bunga hatirangga”.
As. “bunga safron”.
Manang “musim udan”.
Manang “rubah”. Ida di Kamus.
Manang boi do “di holang-kolang ni akka dolok”. Manang “di Dolok Beter”.
Gota ni hau na angur. Ida di Kamus.
Ida di Kamus.
Kursi na dihias, na somalna dipakke lao mamboan halak na sangap.
Ida di Kamus.
Manang “Dolok Anti-Lebanon”.
Manang boi do “kulitmu”.
Manang “bunga hatirangga”.
Suan-suanan na angur.
Gota ni hau na angur. Ida di Kamus.
Gota ni hau na angur. Ida di Kamus.
As. “marrara”.
Manang boi do “songon satandan kurma”.
Manang boi do “di mata mual”.
Gota ni hau na angur. Ida di Kamus.
As. “Langit-langitna”.
Manang “Kota na Mambahen Las Roha”.
As. “Jala ias do ibana di”.
As. “na mangida tu toru”.
Manang “na rade”.
As. “ulum”.
As. “langit-langitmu”.
Manang “bunga hatirangga”.
Manang “Syeol”. Ida di Kamus.
Manang “Jah”. “Jah” singkatan goar ni Jahowa. Ida Lampiran A5.
Manang boi do “ibana”.
Manang “dang magodang dope”.
As. “1.000”.
Manang boi do “akka donganmu”.