DANIEL

1 Di taon na patoluhon tikki mamaretta Raja Jehoyakim+ di Juda, ro ma Raja Nebukadnesar na sian Babel tu Jerusalem jala dikepung ibana ma kota i.+ 2 Dung i, dipasombu Jahowa ma Raja Jehoyakim na sian Juda diboan raja ni Babel.+ Diboan do ibana rap dohot akka barang na sian jabu* ni Debata na sittong. Diboan ma i tu jabu ni debatana+ na di Sinear,*+ jala dibahen ma i di inganan panimpanan ni arta na adong disi.

3 Disuru raja ma si Aspenas kepala ni akka pejabat istana mamillit piga-piga halak Israel,* dohot ma i pinoppar ni akka raja+ dohot pinoppar ni akka pejabat. 4 Poso dope nasida, dang adong cacatna, ganteng, marbisuk, adong parbinotoanna, malo,+ jala boi karejo di istana ni raja. Dung i, diajari si Aspenas ma nasida manurat jala makkatai di bahasa ni halak Kasdim. 5 Asing ni i, disuru raja ma muse asa dilehon tu nasida sipanganon na tabo dohot anggur na dos songon na dilehon tu ibana ganup ari. Diajar-ajari ma nasida saleleng tolu taon. Dukkon i, diboan ma nasida asa karejo di istana ni raja.

6 Adong do sian nasida na sian marga Juda,* i ma si Daniel,*+ si Hanania,* si Misael,* dohot si Azaria.*+ 7 Digatti kepala ni akka pejabat istana i ma goar* ni nasida. Dibahen ma goar ni si Daniel gabe si Beltesasar,+ goar ni si Hanania gabe si Sadrak, goar ni si Misael gabe si Mesak, jala goar ni si Azaria gabe si Abednego.+

8 Alai nungnga dibahen si Daniel keputusan di bagasan rohana, na so jadi allangonna sipanganon ni raja na tabo dohot anggur na niinum ni raja, asa unang gabe ramun* ibana. Dung i, dipangido ibana ma tu kepala ni pejabat i, asa unang pola diallang ibana sipanganon dohot siinumon ni raja, asa unang gabe ramun ibana. 9 Dibahen Debata na sittong ma asa burju jala asi roha+ ni kepala pejabat ni istana i tu si Daniel. 10 Alai didok kepala ni pejabat i ma, “Mabiar do au tu raja i. Ai nungnga ditottuhon raja i sipanganon dohot siinumonmuna. Jadi molo diida ibana annon gale-gale hamu dang dos songon na asing, gabe au do annon na disalahon raja i.” 11 Nungnga dipillit kepala ni pejabat i sahalak panjaga lao mengawasi si Daniel, si Hanania, si Misael, dohot si Azaria. 12 Alani i didok si Daniel ma tu panjaga i, “Coba ma jo uji hami saleleng sappulu ari. Holan sayur ma lean allangonnami jala holan aek ma lean inumonnami. 13 Dung i ida ma ise do na sehat idaon, hami do manang akka halak na mangallang sipanganon ni raja na tabo i. Jala ho ma na manottuhon aha na lao bahenonmu tu akka naposomon.”

14 Dioloi ibana ma pangidoan ni nasida. Jala diuji ma nasida saleleng sappulu ari. 15 Dung salpu sappulu ari, ussehat* do nasida diida ibana sian sude doli-doli na mangallang sipanganon ni raja na tabo i. 16 Mulai sian i, dilehon panjaga i ma sayur tu nasida gatti ni sipanganon na tabo dohot anggur. 17 Dilehon Debata na sittong do tu halak i na opat bisuk dohot parbinotoan lao mangattusi surat ni sude bahasa. Dilehon Debata do muse tu si Daniel parbinotoan lao mangattusi parnidaan dohot akka nipi.+

18 Dung salpu tolu taon, i ma tikki naung ditottuhon ni raja i,+ diboan kepala ni akka pejabat istana i ma sude doli-doli i tu jolo ni raja Nebukadnesar. 19 Tikki makkatai raja i tu sude doli-doli i, dang adong nanggo sada sian doli-doli i na songon si Daniel, si Hanania, si Misael, dohot si Azaria.+ Alani i, gabe torus ma nasida karejo di jolo ni raja. 20 Molo adong parsoalan na disukkun raja i, dao do umbisuk jala ummalo nasida mangalusi sian sude datu dohot peramal+ na adong di harajaonna. 21 Toktong do tinggal si Daniel disi sahat tu taon na parjolo Raja Sirus mamaretta.+

2 Di taon na paduahon Raja Nebukadnesar mamaretta, marnipi ma ibana. Gabe marsak ma ibana alani nipina i, sappe so boi+ ibana modom. 2 Dung i disuru raja i ma asa dipapungu akka datu, akka peramal, akka tukkang sihir, dohot halak Kasdim* lao paboahon nipi ni raja i. Jala ro ma nasida sude tu jolo ni raja i.+ 3 Didok raja i ma tu nasida, “Marnipi au, jala gabe marsak do au naeng mamboto nipikki.” 4 Dialusi halak Kasdim i ma raja i mamakke bahasa Aram.*+ Didok ma, “Ale rajanami, sai anggiat ma mangolu ho saleleng ni lelengna. Paboa ma nipimi tu akka naposomon, asa dipaboa hami aha lapatanna.”

5 Didok raja i ma lao mangalusi halak Kasdim i, “On ma keputusanku: Molo dang dipaboa hamu nipikki dohot lapatanna, ikkon ditanggoi ma hamu jala dibahen ma jabumuna gabe inganan ni halak lao buang air.* 6 Alai molo diboto hamu nipikki dohot lapatanna, lehonokku ma tu hamu godang hadiah dohot hasangapon.+ Alani i, paboa hamu ma saonari nipikki dohot lapatanna.”

7 Dialusi nasida ma, “Ale rajanami, paboa ma jolo nipimi tu akka naposomon asa dipaboa hami lapatanna.”

8 Didok raja i ma, “Huboto do holan naeng pasuda-suda tikki do hamu, ai nungnga diboto hamu keputusanku. 9 Molo dang dipaboa hamu saonari nipikki, ikkon sarupa do hukuman tu hamu sude. Ai nungnga sahata hamu lao mangoto-otoi au jala mandok na so tutu sappe muba keputusanki. Jadi saonari, paboa ma jolo nipikki asa pos rohakku na boi do hamu paboahon lapatanna.”

10 Didok halak Kasdim i ma tu raja i, “Dang adong nanggo sahalak pe jolma di tano on na tolap mangalehon pangidoanmi ale rajanami. Ai dang adong dope nanggo sada pe raja na sangap manang gubernur na hea mangido sisongon i tu akka datu, tu akka peramal, manang tu halak Kasdim. 11 Tung na maol situtu do pangidoan ni raja i. Holan akka debata do na tolap mangalusi pangidoan ni raja i. Jala dang di tonga-tonga ni jolma nasida tinggal.”

12 Gabe muruk situtu ma raja i, jala disuru ma asa dipamate sude halak na marbisuk na adong di Babel.+ 13 Dipaboa ma paretta i jala ikkon dipamate do sude halak na marbisuk. Alani i dilului nasida ma si Daniel dohot akka donganna asa dohot dipamate.

14 Dung i, didapotton si Daniel ma si Ariok kepala ni pengawal ni raja. Ai ibana do na disuru lao pamatehon sude halak na marbisuk na adong di Babel. Sopan jala manat ma si Daniel makkatai tu ibana. 15 Disukkun ibana ma si Ariok kepala ni pengawal i, “Boasa sappe dibahen raja paretta na songon i kejamna?” Dung i dipaboa si Ariok ma tu ibana parsoalan i.+ 16 Dijuppangi si Daniel ma raja i jala dipangido ma asa dilehon tu ibana tikki lao paboahon lapatan nipi ni raja i.

17 Dung i mulak ma si Daniel tu jabuna jala dipaboa ma parsoalan i tu si Hanania, tu si Misael, dohot tu si Azaria. 18 Dipangido si Daniel ma nasida martangiang tu Debata na di surgo mangido asi ni rohana, asa dipaboa rahasia i tu nasida. Marhite i, dang jadi be dipamate nasida dohot sude halak na marbisuk na adong di Babel.

19 Di borngin i, dipaboa Debata ma rahasia i tu si Daniel marhite parnidaan.+ Alani i dipuji si Daniel ma Debata na di surgo. 20 Didok si Daniel ma,

24 Dijuppangi si Daniel ma si Ariok, ai ibana do na dipillit raja lao mambunu sude halak na marbisuk na adong di Babel.+ Didok si Daniel ma tu ibana, “Unang ma pamate manang ise pe halak na marbisuk na adong di Babel. Boan ma au tu jolo ni raja i asa hupaboa lapatan ni nipina i.”

25 Pittor diboan si Ariok ma si Daniel tu jolo ni raja i. Didok ma, “Nungnga juppangku be sahalak tawanan sian Juda+ na boi paboahon lapatan ni nipimi, ale rajanami.” 26 Didok raja i ma tu si Daniel, na laos digoari si Beltesasar,+ “Tutu do boi paboaonmu tu au nipikki dohot lapatanna?”+ 27 Dialusi si Daniel ma raja i, “Ale rajanami, dang adong nanggo sada pe sian halak na marbisuk, akka peramal, akka datu, manang akka halak na mangida bintang lao manjujur ari na boi paboahon rahasia na disukkunmi.+ 28 Alai adong do Debata na di surgo na boi paboahon rahasia i.+ Ibana do na paboahon tu ho aha na lao masa di ujung ni akka ari i, ale Raja Nebukadnesar. On ma nipimi, jala on ma parnidaan na niidam tikki modom ho.

29 “Tikki modom raja i, marnipi ma raja i taringot na lao masa di ari na naeng ro. Nungnga dipaboa Debata tu raja i aha na lao masa. Ai Ibana do Debata na patuduhon rahasia. 30 Dipaboa pe rahasia i tu au, dang ala na umbisuk au sian na asing. Alai asa boi do hupaboa lapatan ni nipi i tu raja jala asa diboto raja i nipi i.+

31 “Ale rajanami, tikki na marnipi i ho, diida ho do sada patung. Massai balga jala marhillong do patung i. Jongjong ma i di jolom jala mabiar do ho mangida i. 32 Sian mas murni+ do ulu ni patung i, sian perak+ do andorana dohot tanganna, jala sian tombaga+ do butuha dohot hae-haena. 33 Sian bosi do patna, jala sian bosi+ na marcampur tano liat+ do mulai sian mataniari ni patna* sahat tu jari-jarina. 34 Sai dipanotnoti raja i ma patung i. Dung i adong ma sada batu na diponggolhon sian dolok, alai dang tangan ni jolma na mamonggolhon batu i. Ditobbom batu i ma mataniari ni pat ni patung i na sian bosi marcampur tano liat i, gabe hancur ma patung i.+ 35 Masarsar ma bosi i, tano liat, tombaga, perak, dohot mas i. Gabe dos ma i songon lapung ni eme* di inganan pardegean tikki musim panas. Dihabangkon alogo ma i sappe so adong be na tinggal. Alai gabe dolok na balga do batu na manghancurhon patung i, pola do digohi saluhut tano on.

36 “Songon i ma nipi ni raja i jala saonari paboaokku ma lapatanna tu raja i. 37 Ale rajanami, ho do raja na ussangap sian sude raja. Nungnga dilehon Debata na di surgo i tu ho harajaon,+ huaso, gogo, dohot hasangapon. 38 Dipasahat do tu ho sude jolma manang didia pe nasida maringanan. Jala dipasahat do tu ho akka binatang na di ladang dohot pidong na martonga-tonga langit. Ho do dibahen lao mamaretta nasida sude,+ ho do ale rajanami ulu ni patung na sian mas i.+

39 “Dung salpu harajaonmi,+ jongjong ma harajaon na asing. Alai unjago do harajaonmu sian i rajanami. Dukkon i jongjong ma muse harajaon na patoluhon na sian tombaga i, mamaretta ma harajaon i di saluhut tano on.+

40 “Dung salpu i, ro ma harajaon na paopatton, karas do i songon bosi.+ Dos songon bosi na boi manghancurhon jala mangaropukkon manang aha pe, songon i ma harajaon i manghancurhon jala mangaropukkon sude harajaon na parjolo i.+

41 Jala songon na niida ni raja i, sian bosi marcampur tano liat do mataniari ni pat ni patung i sahat tu jari-jarina. Lapatanna, tarbagi do harajaon i. Karas do deba harajaon i dos songon bosi. Ai songon na niida ni raja i, sian bosi marcampur tano liat na lembek do i. 42 Sian bosi marcampur tano liat do jari-jari ni patung i. Lapatanna, gogo do deba harajaon i, alai gale do na deba nai. 43 Songon na niida ni raja i, marcampur do bosi dohot tano liat na lembek. Lapatanna, marsada do harajaon i dohot rakyatna, alai dang hea i domu dos songon bosi na so boi domu dohot tano liat.

44 “Tikki mamaretta akka harajaon i, pajongjongon ni Debata na di surgo i ma sada harajaon+ na so boi dihancurhon.+ Dang na lao pasahatonna harajaon i tu bangso na dia pe.+ Alai na lao dihancurhon jala diropukkon harajaon i do sude harajaon na parjolo i.+ Jala hot do harajaon i saleleng ni lelengna.+ 45 Songon na niida ni raja i, diponggolhon do sian dolok sada batu. Alai dang tangan ni jolma na mamonggolhon i. Na lao dihancurhon batu i ma bosi, tombaga, tano liat, perak, dohot mas i.+ Nungnga dipaboa Debata na sangap i tu raja i aha na lao masa di ari na naeng ro.+ Sittong do nipi i jala boi do dihaporseai lapatanna.”

46 Dung i marsomba ma raja Nebukadnesar tu jolo ni si Daniel pola sappe sahat bohina tu tano. Jala dipasangap ibana ma si Daniel. Disuru ibana ma asa ditutung dupa jala dilehon hadiah tu si Daniel. 47 Didok raja i ma tu si Daniel, “Tutu ma Debatami Debata na untimbo sian sude debata na asing. Ibana do na ussangap sian sude raja jala Ibana do Debata na paboahon akka rahasia. Ai boi do ho paboahon rahasia on.”+ 48 Dung i, dilehon raja i ma pangkat na timbo tu si Daniel jala dilehon ma tu ibana godang hadiah. Dibahen ma ibana gabe pamimpin ni sude provinsi na adong di Babel.+ Dibahen do muse ibana gabe pamimpin ni sude halak na marbisuk na adong di Babel. 49 Jala dipangido si Daniel ma tu raja i asa dibahen si Sadrak, si Mesak, dohot si Abednego+ gabe pejabat di akka provinsi na adong di Babel. Alai ianggo si Daniel, di istana ni raja do ibana karejo.

3 Dibahen Raja Nebukadnesar ma patung na sian mas, timbona 60 asta* jala bidangna 6 asta.* Dibahen ibana ma i di Rura Dura na di provinsi Babel. 2 Dung i dibahen Raja Nebukadnesar ma peresmian ni patung na binahenna i. Disuru ibana ma asa ro marpungu akka kepala ni gubernur, akka pejabat daerah, akka gubernur, akka penasehat, akka bendahara, akka hakim, akka pejabat pengadilan, dohot sude pejabat provinsi.

3 Dung i marpungu ma akka kepala ni gubernur, akka pejabat daerah, akka gubernur, akka penasehat, akka bendahara, akka hakim, akka pejabat pengadilan, dohot sude pejabat provinsi lao meresmihon patung na binahen ni Raja Nebukadnesar i. Jongjong ma nasida sude di jolo ni patung i. 4 Dung i disuru ma sasahalak lao paboahon boa-boa na mandok, “Hamu akka halak na sian sude bangso dohot bahasa, bege hamu ma paretta on: 5 Molo dibege hamu soara ni tarompet na sian tanduk, suling, harpa, harpa na gelleng, alat musik na martali, suling na balga, dohot sude alat musik na asing, ikkon marsinggang jala marsomba do hamu tu patung mas na binahen ni Raja Nebukadnesar. 6 Manang ise na so olo marsinggang jala marsomba tu patung i, ikkon disappatton do ibana tu api na marnala-nala.”+ 7 Alani i, tikki dibege akka halak na sian sude bangso dohot bahasa i soara ni tarompet na sian tanduk, suling, harpa, harpa na gelleng, alat musik na martali, dohot sude alat musik na asing, marsinggang jala marsomba ma nasida tu patung mas na binahen ni Raja Nebukadnesar i.

8 Dung i ro ma piga-piga halak Kasdim manjuppangi raja jala didok nasida ma hata na so tutu taringot halak Jahudi. 9 Didok nasida ma tu Raja Nebukadnesar, “Ale rajanami, sai anggiat ma mangolu ho saleleng ni lelengna. 10 Ale rajanami, nungnga dibahen ho paretta, manang ise na mambege soara ni tarompet na sian tanduk, soara ni suling, harpa, harpa na gelleng, alat musik na martali, suling na balga, dohot sude alat musik na asing, ikkon marsinggang jala marsomba do nasida tu patung mas na binahenmi. 11 Jala manang ise na so olo marsinggang dohot marsomba tu patung i, ikkon disappatton do ibana tu api na marnala-nala.+ 12 Alai rajanami, adong do halak Jahudi na pinillitmu gabe pejabat ni akka provinsi na di Babel na so mangoloi parettam, i ma si Sadrak, si Mesak, dohot si Abednego.+ Dang olo nasida manomba akka debatam, jala dang olo nasida marsomba tu patung mas na binahenmi.”

13 Gabe muruk situtu ma Raja Nebukadnesar jala disuru ma asa diboan si Sadrak, si Mesak, dohot si Abednego tu jolona. Dung i diboan ma nasida tu jolo ni raja i. 14 Didok Raja Nebukadnesar ma, “Ale Sadrak, Mesak, dohot ho Abednego, tutu do dang olo hamu manomba akka debatakku+ jala dang olo hamu marsomba tu patung mas na hubahen i? 15 Saonari, molo dibege hamu soara ni tarompet na sian tanduk, soara ni suling, harpa, harpa na gelleng, alat musik na martali, suling na balga, dohot sude alat musik na asing, ikkon marsinggang jala marsomba do hamu tu patung na hubahen i. Molo olo hamu marsomba tusi, denggan ma i. Alai molo dang olo hamu marsomba tusi, husappatton ma hamu tu api na marnala-nala. Adong huroa debata na boi paluahon hamu sian tanganku?”+

16 Didok si Sadrak, si Mesak, dohot si Abednego ma tu raja i, “Ale Raja Nebukadnesar, dang adong be sidohononnami tu ho taringot i. 17 Ale rajanami, molo ikkon ditutung pe hami di api na marnala-nala i, tolap do Debatanami paluahon hami sian i jala paluahon hami sian tanganmu.+ 18 Alai molo tung pe dang dipalua Ibana hami, porlu do botoonmu ale rajanami na so olo hami manomba akka debatami. Jala dang olo hami marsomba tu patung mas na binahenmi.”+

19 Gabe muruk situtu ma Raja Nebukadnesar tu si Sadrak, si Mesak, dohot si Abednego. Sappe muba nama bohina idaon alani murukna. Dung i diparettahon ibana ma asa dibahen api i pitu hali ummohop sian na somal. 20 Disuru ibana ma piga-piga tentarana na gogo lao mangikkat si Sadrak, si Mesak, dohot si Abednego. Jala disuru ma asa disappatton nasida tu api na marnala-nala i.

21 Dipakke nasida dope jubah, baju, topi, dohot akka baju ni nasida na asing tikki na diikat i nasida. Dung i disappatton ma nasida tu api na marnala-nala i. 22 Alani paretta ni raja i na mandok ikkon dibahen ummohop api i sian na somal, gabe mate tartutung ma akka halak na manappatton si Sadrak, si Mesak, dohot si Abednego i. 23 Alai ianggo bawa na tolu i, i ma si Sadrak, si Mesak, dohot si Abednego, tarikkat dope nasida tikki masuk tu api na marnala-nala i.

24 Alai gabe mabiar ma Raja Nebukadnesar i, jala pittor hatop ma ibana lao mandapotton akka pejabat tinggi. Didok ma, “Ai dang na tolu halak nakkin na taikkat jala tasappatton tu api i?” Dialusi nasida ma, “Ido rajanami.” 25 Didok raja i ma muse, “Alai adong opat halak huida na mardalan di tonga-tonga ni api i jala dang manang mahua nasida. Halak na paopatton i, hira anak ni debata do idaon bohina.”

26 Ro ma Raja Nebukadnesar tu pintu masuk ni panutungan i. Didok ibana ma, “Sadrak, Mesak, Abednego, hamu akka naposo ni Debata Natumimbul i,+ kaluar ma hamu sian i.” Dung i kaluar ma si Sadrak, si Mesak, dohot si Abednego sian tonga-tonga ni api i. 27 Dang tartutung nasida, obuk ni nasida, dohot jubah ni nasida. Gari bau timus pe dang adong.+ Diida akka kepala ni gubernur, pejabat daerah, gubernur, dohot akka pejabat tinggi do na masa i.+

28 Dung i dipaboa raja ma boa-boa na mandok, “Puji ma Debata ni si Sadrak, si Mesak, dohot si Abednego.+ Ai disuru Ibana do suru-suruan lao paluahon akka naposona. Ala porsea nasida tu Ibana, dialo nasida do paretta ni raja. Jala rade do nasida mate unang apala disomba nasida debata na asing, asing ni Debata ni nasida.+ 29 Alani i bege hamu ma parettakkon, manang ise halak sian bangso manang bahasa na dia pe na mangaleai Debata ni si Sadrak, si Mesak, dohot si Abednego, ikkon ditanggoi do ibana jala ikkon dibahen do jabuna gabe inganan ni halak lao buang air.* Ai dang adong debata na asing na tolap mambahen songon i lao paluahon naposona.”+

30 Jadi dibahen raja i ma naik pangkat si Sadrak, si Mesak, dohot si Abednego di provinsi Babel.+

4 Sian Raja Nebukadnesar, mandapotton sude halak na sian akka bangso dohot bahasa na tinggal di saluhut tano on: Dame ma di hamu sude! 2 Nungnga dipatudu Debata Natumimbul i akka tanda dohot halongangan* tu au, naeng paboaokku ma i tu hamu. 3 Palongang roha do akka tanda dohot halonganan na binahenna! Martahan do harajaonna saleleng ni lelengna, jala mamaretta do Ibana saleleng ni lelengna.+

4 “Au si Nebukadnesar, las do rohakku di jabukku jala sonang do ngolukku di istanakku. 5 Dung i marnipi ma au, jala mabiar do au alani nipikki. Tikki modom au, huida ma parnidaan na mambahen au mabiar.+ 6 Jadi husuru ma asa diboan sude halak na marbisuk na adong di Babel tu jolokku, asa dipaboa nasida tu au lapatan ni nipikki.+

7 “Ro ma akka datu, akka peramal, halak Kasdim,* dohot akka na mangida bintang lao manjujur ari.+ Tikki hupaboa tu nasida nipikki, dang adong nasida na boi paboahon lapatanna tu au.+ 8 Ujungna ro ma tu jolokku si Daniel na laos digoari si Beltesasar+ songon goar ni debatakku.+ Adong do di ibana huaso na sian akka debata na badia.+ Dung i hupaboa ma tu ibana nipikki.

9 “‘Ale Beltesasar, pamimpin ni akka datu,+ huboto do adong di ho huaso ni akka debata na badia,+ jala dang adong rahasia na so diboto ho.+ Alani i, paboa ma jo tu au lapatan ni parnidaan na huida di nipikki.

10 “‘Tikki modom au, ro ma tu au sada parnidaan. Huida ma sada hau+ na massai timbo tubu di tonga-tonga ni tano on.+ 11 Lam balga jala lam timbo ma hau i pola sahat tu langit. Gabe tarida ma i sian sude ujung ni tano on. 12 Lomak do bulungna jala ramos do parbuena, sae do i allangon ni sude na di tano on. Marlinggom do akka binatang buas di toru ni hau i, marasar do akka pidong di dakkana jala sude do na di tano on mangan sian i.

13 “‘Di parnidaakki, huida ma sada utusan na badia turun sian surgo.+ 14 Gogo ma didok ibana, “Taba ma hau i,+ ponggoli ma akka dakkana, paspasson ma akka dakkana i asa marurus bulungna, jala passappatton ma akka parbuena. Lok ma lao akka binatang buas na di toru ni hau i dohot akka pidong na marasar di akka dakkana. 15 Alai pasombu ma tinggal pakkalna dohot uratna disi. Ikkat ma i mamakke bosi dohot tombaga. Pasombu ma i tinggal disi rap dohot akka ramba-ramba na di ladang. Pasombu ma i hona nambur na sian langit, jala lok ma akka binatang buas dohot akka suan-suanan na di tano on na gabe donganna.+ 16 Lok ma muba rohana sian roha ni jolma gabe roha ni binatang, jala pasombu ma i songon i+ saleleng pitu taon.*+ 17 On ma keputusan ni utusan i+ dohot pangidoan ni akka na badia, asa sude jolma mamboto Natumimbul i do Parhuaso ni harajaon na adong di tano on.+ Jala lehononna do harajaon i tu manang ise pe lomo ni rohana. Gariada, lehononna do i tu halak na uppogos.”

18 “‘Songon i ma parnidaan na huida di nipikki. Saonari ale Beltesasar, paboa ma tu au lapatanna. Ai dang adong nanggo sada pe sian sude halak na marbisuk na adong di harajaokkon na boi paboahon tu au lapatanna.+ Alai pos do rohakku, boi do ho paboahon i tu au, ai adong do di ho huaso na sian akka debata na badia.’

19 “Alani biarna, gabe tarhatotong ma si Daniel na laos digoari si Beltesasar.+

“Didok raja i ma, ‘Ale Beltesasar, unang ma gabe mabiar ho alani nipi i dohot lapatanna.’

“Didok si Beltesasar ma, ‘Ale tuan, sai tu musum dohot tu alom ma masa nipi i dohot lapatanna.

20 “‘Hau na niidami na lam balga jala timbo, na pola timbona sahat tu langit, jala boi diida sian saluhut tano on,+ 21 na lomak bulungna, na sae parbuena allangon ni sude na mangolu di tano on alani ramosna, na marlinggom akka binatang buas di toruna, jala marasar akka pidong di dakkana,+ 22 ho do i ale rajanami. Ai lam balga jala lam gogo do ho. Pola do sahat hasangaponmu tu langit,+ jala mamaretta do ho di saluhut tano on.+

23 “‘Dung i diida raja i ma muse sada utusan na badia+ turun sian surgo. Didok ibana ma, “Taba ma hau i jala ruppakkon ma i, alai pasombu ma pakkalna dohot uratna disi, ikkat ma pakkalna i mamakke bosi dohot tombaga, jala pasombu ma i disi rap dohot akka ramba-ramba na di ladang. Pasombu ma i hona nambur na sian langit, jala pasombu ma akka binatang buas na di tombak na gabe donganna saleleng pitu taon.+ 24 On ma lapatanna ale rajanami, nungnga ditottuhon Natumimbul i na lao masa do i tu raja i. 25 Palaoonna ma ho sian tonga-tonga ni jolma, jala tinggal ma ho rap dohot akka binatang buas na di tombak. Rumput ma na gabe siallangonmu dos songon lombu, jala pasombuonna ma ho hona nambur na sian langit.+ Masa ma i tu ho+ saleleng pitu taon,+ sahat tu na diboto ho Natumimbul i do Parhuaso ni akka harajaon na di tano on jala lehononna do i tu manang ise pe lomo ni rohana.+

26 “‘Alai ala didok do asa dipasombu disi pakkal ni hau i dohot uratna,+ na lao gabe raja do ho muse dung diboto ho adong do na mamaretta di surgo. 27 Alani i ale rajanami, sai anggiat ma olo ho manangihon podakkon, muba ma ho sian sude dosami, jala ulahon ma na sittong, unang be ulahon na jahat, jala marasi ni roha ma ho tu na pogos asa toktong denggan jala dame ngolum.’”+

28 Masa do i sude tu Raja Nebukadnesar.

29 Dung salpu 12 bulan sian i, mardalan-dalan ma ibana di atap ni istanana na di Babel. 30 Didok raja i ma, “Tung sangap situtu do kota Babel on, na hupajongjong lao gabe istanakku. Hupajongjong do i marhite gogokku dohot huasokku lao patuduhon balga ni hasangapokku.”

31 Tikki makkatai dope raja i, tarbege ma soara sian surgo na mandok, “Tangihon ma on ale Raja Nebukadnesar, ‘Na lao dibuat nama harajaon i sian ho,+ 32 jala palaoonna ma ho sian tonga-tonga ni jolma. Akka binatang buas na di tombak nama na gabe donganmu, jala rumput nama allangonmu dos songon lombu. Masa ma i tu ho saleleng pitu taon, sahat tu na diboto ho Natumimbul i do Parhuaso ni akka harajaon na di tano on, jala lehononna do i tu manang ise pe lomo ni rohana.’”+

33 Satokkin i, saut ma sudena i tu si Nebukadnesar. Dipalao ma ibana sian tonga-tonga ni jolma, jala manggagat rumput ma ibana dos songon lombu. Sai hona nambur na sian langit ma dagingna, jala ganjang ma obukna dos songon ibbulu ni lali, sisilonna pe gabe dos ma songon sisilon ni pidong.+

34 “Dung marujung sudena i,+ au si Nebukadnesar, manatap ma au tu langit. Jala mulak ma muse au marroha jolma. Hupuji ma Natumimbul i, hupuji jala hupasangap do Ibana na mangolu saleleng ni lelengna. Ai toktong do Ibana mamaretta saleleng ni lelengna jala martahan do harajaonna saleleng ni lelengna.+ 35 Hira na soada do sude pangisi ni tano on molo martimbangkon Ibana. Dibahen Ibana do manang aha pe lomo ni rohana tu akka tentara na di surgo dohot tu pangisi ni tano on. Dang adong na boi mangabbati lomo ni rohana+ jala dang adong na boi manukkun aha na lao sibahenonna.+

36 “Dung i mulak ma muse au marroha jolma, jala mulak ma muse harajaokku na sangap i tu au.+ Gabe mulia jala sangap ma muse au. Marsitutu ma akka pejabat tinggi dohot akka pejabat mangalului au, ai nungnga gabe raja au muse jala lam sangap do au.

37 “Saonari, au si Nebukadnesar, hupuji jala hupasangap ma Raja na di surgo i.+ Ai sittong do sude akka ulaonna jala tigor do akka dalanna.+ Boi do dibahen Ibana gabe marlea akka halak siginjang roha.”+

5 Di sada tikki, dibahen Raja Belsasar+ ma pesta na balga tu 1.000 pejabatna. Manginum anggur do ibana di jolo ni nasida.+ 2 Dung mabuk Raja Belsasar, disuru ibana ma asa diboan akka makkuk na sian mas dohot perak, i ma akka makkuk na diboan bapakna si Nebukadnesar sian bagas joro na di Jerusalem.+ Disuru raja pe i dibuat, asa boi do pakkeonna, pakkeon ni akka pejabatna, akka gundikna, dohot pakkeon ni akka istrina na asing gabe panginuman ni nasida. 3 Diboan ma akka makkuk na sian mas i, i ma na dibuat sian bagas joro ni Debata na di Jerusalem. Dung i minum ma raja i, akka pejabatna, akka gundikna, dohot akka istrina na asing sian i. 4 Minum anggur ma nasida jala dipuji nasida ma akka debata na dibahen sian mas, sian perak, sian tombaga, sian bosi, sian hau, dohot sian batu.

5 Laos satokkin i, toppu ma adong tangan ni jolma na manurat di dinding na jonok tu lampu ni istana i. Diida raja i do tangan i tikki manurat. 6 Gabe puccat ma bohi ni raja i alani biarna. Hitir-hitir ma dugul-dugulna+ jala gale-gale ma patna.

7 Marsurak ma raja i lao manjou akka datu, halak Kasdim,* dohot akka halak na mangida bintang lao manjujur ari.+ Didok raja i ma tu sude halak na marbisuk na adong di Babel, “Manang ise na boi manjaha surat i jala na boi patorakkon lapatanna, lehonokku ma tu ibana baju na ungu, dipakkehon ma tu rukkungna kalung na sian mas.+ Jala bahenokku ma ibana gabe parhuaso na patoluhon di harajaon on.”+

8 Dung i ro ma sude halak na marbisuk i tu jolo ni raja, alai dang adong nasida na boi manjaha surat i manang na boi paboahon lapatanna.+ 9 Gabe mabiar situtu ma Raja Belsasar pola sappe puccat bohina. Bingung jala marsak ma sude pejabatna.+

10 Dung dibege ratu hata ni raja i dohot akka pejabatna, ro ma ibana tu pesta i. Didok ratu i ma, “Ale rajanami, sai anggiat ma mangolu ho saleleng ni lelengna. Unang pola mabiar ho, jala unang ma pola puccat bohim. 11 Ai adong do sahalak bawa di harajaonmon na mandapot huaso sian akka debata na badia. Tikki mamaretta bapakmu, dipatudu bawa i do na marbisuk ibana.+ Malo do ibana jala adong do parbinotoanna. Dipillit bapakmu Raja Nebukadnesar do ibana gabe pamimpin ni akka datu, akka peramal, halak Kasdim,* dohot akka halak na mangida bintang lao manjujur ari.+ Songon i ma na binahen ni bapakmu, ale rajanami. 12 Si Daniel do goar ni bawa i, alai dibahen raja do goarna gabe si Beltesasar.+ Marbisuk do ibana, malo, jala adong do parbinotoanna. Boi do dipaboa ibana lapatan ni akka nipi, akka teka-teki, jala boi do ibana pasaehon akka parsoalan na maol.+ Saonari suru ma asa dijou si Daniel, asa dipaboa ibana tu ho lapatan ni i.”

13 Dung i diboan ma si Daniel tu jolo ni raja i. Disukkun raja ma si Daniel, “Ho do si Daniel tawanan na diboan+ bapakku sian Juda?+ 14 Hubege, adong do huaso na sian akka debata na badia i di ho.+ Jala hubege marbisuk do ho, malo, jala adong do parbinotoanmu.+ 15 Nungnga diboan tuson akka halak na marbisuk dohot akka peramal lao manjaha surat i jala paboahon lapatanna. Alai dang adong sian nasida na boi paboahon lapatan ni surat i.+ 16 Hubege boi do ho paboahon lapatan ni akka tanda+ jala pasaehon akka parsoalan na maol. Saonari molo boi ho manjaha surat i jala paboahon lapatanna tu au, lehonokku ma tu ho baju na ungu, bahenokku ma tu rukkungmu kalung na sian mas, jala bahenokku ma ho gabe parhuaso na patoluhon di harajaon on.”+

17 Didok si Daniel ma tu raja i, “Sippan ma hadiahmi ale rajanami, manang lehon ma i tu na asing. Alai hujaha pe surat i tu raja i jala hupaboa pe lapatanna tu ho. 18 Ale rajanami, nungnga dilehon Debata Natumimbul i harajaon, huaso, hasangapon, dohot hamuliaon tu bapakmu Raja Nebukadnesar i.+ 19 Ala dilehon Debata tu ibana hasangapon, gabe sude ma halak na sian akka bangso dohot bahasa makkabiari ibana.+ Molo lomo rohana naeng pamatehon sasahalak, pamateonna do i. Molo lomo rohana pasombuhon sasahalak mangolu, pasombuonna do i. Lomo-lomona do naeng mambahen sasahalak sangap manang marlea.+ 20 Alai ginjang do rohana jala jogal do rukkungna. Holan lomo-lomona do dibahen ibana.+ Alani i dipaturun Debata ma ibana sian tahta ni harajaonna jala dibuat ma hasangaponna sian ibana. 21 Dipalao ma ibana sian tonga-tonga ni jolma. Gabe muba ma rohana sian roha ni jolma gabe roha ni binatang. Akka halode liar ma na gabe donganna, rumput ma gabe siallangonna dos songon lombu. Hona nambur na sian langit ma dagingna sahat tu na diboto ibana, Debata Natumimbul i do Parhuaso ni akka harajaon di tano on. Jala lehonon ni Debata do i tu manang ise pe lomo ni rohana.+

22 “Hape ho ale Raja Belsasar, anakna sandiri, dang serep roham nang pe nungnga diboto ho sude na masa i. 23 Ginjang do roham maradoppon Tuan na di surgo i.+ Dibuat ho do akka makkuk na sian jabuna,+ jala dipakke ho do i lao manginum anggur rap dohot akka pejabatmu, akka gundikmu, dohot akka istrim na asing. Akka debata na sian perak, sian mas, sian tombaga, sian bosi, sian hau, dohot na sian batu do na dipuji ho. Hape so boi i mangida, mambege, jala dang diboto i agia aha.+ Dang dipasangap ho Debata na mambahen ho marhosa+ jala na mangatur sude akka ulaonmu. 24 Alani i ma disuru Debata tangan i lao manuratton akka hata i.+ 25 On ma akka hata na disuratton i, MENE, MENE, TEKEL, dohot PARSIN.

26 “On ma lapatan ni akka hata i. MENE, lapatanna nungnga dibilangi Debata sadia leleng nai harajaonmu mamaretta jala paujungonna nama i.+

27 “TEKEL, lapatanna nungnga ditimbang be ho jala paneangku do hape ho.

28 “PERES, lapatanna nungnga dibagi be harajaonmu jala dilehon tu halak Media dohot halak Persia.”+

29 Disuru si Belsasar ma asa dipakkehon abit na ungu tu si Daniel jala dibahen kalung na sian mas tu rukkungna. Dung i dibahen ma boa-boa na mandok, si Daniel ma na gabe parhuaso na patoluhon di harajaon i.+

30 Di borngin i, mate tarbunu ma si Belsasar raja ni halak Kasdim i.+ 31 Jala dibuat si Darius+ halak Media i ma harajaon i. Tikki i, hira-hira 62 taon ma umurna.

6 Dung i dipillit si Darius ma 120 kepala ni gubernur di saluhut harajaonna.+ 2 Dipillit raja ma tolu pejabat tinggi lao mengawasi nasida. Ikkon melapor do akka kepala ni gubernur i+ tu nasida asa unang rugi raja. Sada sian tolu pejabat tinggi i, i ma si Daniel.+ 3 Umbisuk do si Daniel sian akka pejabat tinggi i dohot sian akka kepala ni gubernur i. Ai malo hian do ibana.+ Alani i marsakkap do raja i naeng mambahen ibana mamaretta di saluhut harajaonna.

4 Di tikki i, marsakkap do akka pejabat tinggi dohot akka kepala ni gubernur lao mangalului hasalaan ni si Daniel di akka ulaon ni harajaon. Alai dang adong dapot ni nasida dalan lao mandok si Daniel marsala. Jala dang adong hasalaan ni si Daniel. Ai boi do ibana dihaporseai, sai marhasil do ulaonna, jala jujur do ibana. 5 Didok nasida ma, “Dang na lao dapotta hasalaan ni si Daniel, holan taringot patik ni Debatana i do boi tatudu ibana marsala.”+

6 Jadi rap lao ma akka pejabat tinggi dohot akka kepala ni gubernur i tu jolo ni raja. Didok nasida ma tu raja i, “Ale Raja Darius, sai anggiat ma mangolu ho saleleng ni lelengna. 7 Nungnga sahata be sude pejabat istana, pejabat daerah, kepala ni gubernur, pejabat tinggi, dohot gubernur lao mambahen sada aturan na mandok, saleleng 30 ari dang adong na boi mambahen pangidoan tu debata na dia pe dohot tu jolma, asing ni tu ho ale rajanami. Manang ise na mambahen songon i, ikkon disappatton do ibana tu lubang ni singa.+ 8 Saonari ale rajanami, bahen ma tanda na patuduhon naung hot aturan i,+ asa unang boi be i muba. Ai dang boi be disundati+ hukum ni halak Media dohot Persia.”

9 Alani i dibahen Raja Darius ma tanda na patuduhon naung hot aturan i.

10 Disi diboto si Daniel naung hot aturan i, mulak ma ibana tu jabuna. Adong do sada kamar di loteng ni jabuna. Tu arah Jerusalem do jandela ni kamar i,+ jala sai bukka do i. Dung i marsinggang jala martangiang ma ibana lao mamuji Debatana. Ai saleleng on, sai martangiang do ibana tolu hali sadari. 11 Tikki i, toppu ma masuk akka pejabat dohot akka parhuaso tu jabu ni si Daniel. Diida nasida ma si Daniel martangiang mangido asi ni roha ni Debatana.

12 Dung i lao ma nasida mandapotton raja i jala dipaingot ma taringot aturan i. Didok nasida ma, “Ale rajanami, nungnga dibahen ho tanda na patuduhon naung hot peraturan na mandok, saleleng 30 ari dang adong na boi mambahen pangidoanna tu debata manang tu jolma asing ni tu ho. Jala manang ise na mambahen songon i, ikkon disappatton do ibana tu lubang ni singa. Dang songon i tahe rajanami?” Didok raja i ma, “Ido, tutu do i. Jala mangihutton hukum ni halak Media dohot Persia, dang boi be i disundati.”+ 13 Pittor didok nasida ma tu raja i, “Ale rajanami, dang dioloi si Daniel tawanan na sian Juda i+ aturan naung hot i. Jala dang dipasangap ibana ho, gariada martangiang do ibana tolu hali sadari.”+ 14 Gabe marsak ma raja mambege i. Jala dilului ibana ma dalan lao paluahon si Daniel. Sahat tu botari sai dilului ibana do dalan lao paluahon si Daniel. 15 Ujungna ro ma nasida sude tu jolo ni raja i. Didok nasida ma, “Ale rajanami ingot ma, mangihutton hukum ni halak Media dohot Persia, dang boi be muba aturan naung hot dibahen raja.”+

16 Dung i dibahen raja i ma paretta asa diboan si Daniel jala disappatton tu lubang ni singa.+ Alai didok raja i ma tu si Daniel, “Sai anggiat ma dipalua Debatam ho, i ma Debata na toktong disomba ho.” 17 Dibahen ma sada batu lao manutup lubang ni singa i, jala dicap raja ma i mamakke cincin capna dohot cincin cap ni akka pejabatna asa unang muba be keputusan na dibahen taringot tu si Daniel.

18 Dung i mulak ma raja i tu istanana. Marpuasa ma ibana saborngin i, dang olo ibana dihibur* jala dang boi ibana modom. 19 Dung torang ari di manogotna i, pittor hatop ma lao raja i tu lubang ni singa i. 20 Dung jonok raja i tu lubang ni singa i, digora ibana ma si Daniel. Tarida do na lungun rohana sian soarana. Didok raja i ma tu si Daniel, “O Daniel, naposo ni Debata na mangolu i, boi do Debatam na sai disomba ho paluahon ho sian akka singa i?” 21 Pittor didok si Daniel ma tu raja i, “Ale rajanami, sai anggiat ma mangolu ho saleleng ni lelengna. 22 Disuru Debatakku do suru-suruan manutup baba ni akka singa+ on jala dang dihahua akka singa i au.+ Ai so adong huulahon na sala tu Ibana jala dang adong salakku tu ho, ale rajanami.”

23 Las situtu ma roha ni raja i. Pittor disuru ma asa dipakaluar si Daniel sian lubang ni singa i. Tikki kaluar si Daniel sian lubang ni singa i, dang agia mahua ibana. Ai pos do rohana tu Debatana.+

24 Disuru raja i ma asa ditakkup akka halak na mandok na so tutu taringot tu si Daniel. Disappatton ma nasida tu lubang ni singa i rap dohot anak ni nasida dohot istri ni nasida. Dang sahat dope nasida tu lante ni lubang i, nungnga diroro akka singa i nasida jala diropukkon holi-holi ni nasida.+

25 Dung i dibahen Raja Darius ma surat tu sude halak na sian akka bangso dohot bahasa na adong di saluhut tano on.+ Didok ibana ma disuratna i, “Sai anggiat ma dame ngolumuna! 26 Tu sude halak di harajaokkon, habiari hamu ma Debata ni si Daniel.+ Ai Ibana do Debata na mangolu jala toktong do Ibana adong saleleng ni lelengna. Dang boi dihancurhon harajaonna jala mamaretta do Ibana saleleng ni lelengna.+ 27 Dipalua+ jala dijaga Ibana do akka naposona, dibahen Ibana do akka tanda dohot halongangan* di langit dohot di tano on.+ Dipalua Ibana do si Daniel sian baba* ni singa.”

28 Denggan do ngolu ni si Daniel saleleng mamaretta si Darius+ jala saleleng mamaretta si Sirus halak Persia i.+

7 Di taon na parjolo tikki mamaretta Raja Belsasar+ di Babel, marnipi ma si Daniel jala mandapot parnidaan ma ibana tikki modom.+ Dung i disuratton ibana ma i+ jala sude do disuratton ibana. 2 Dung i didok si Daniel ma,

“Tikki borngin, ro ma tu au sada parnidaan. Huida ma balga galumbang ni laut ala mangullus alogo sian sude inganan.+ 3 Dung i, kaluar ma sian bagasan laut i opat binatang buas na massai balga+ jala asing-asing do rupana.

4 “Rupa ni binatang na parjolo dos songon singa,+ adong do habongna songon habong ni lali.+ Tikki sai hupanotnoti binatang i, ponggol ma habongna jala tarangkat ma ibana sian tano on. Tikki tarangkat ibana sian tano on, holan dua do patna dipakke ibana jongjong dos songon jolma, jala dilehon do tu ibana roha ni jolma.

5 “Dung i huida ma binatang buas na paduahon, rupana dos songon beruang.+ Tarangkat do sada patna jala adong do tolu tulang rusuk diharat ibana. Adong ma soara na mandok tu binatang i, ‘Lao ma ho, allangi ma godang jagal.’+

6 “Huida ma muse binatang buas na asing, rupana dos songon rupa ni macan tutul.+ Adong do di tanggurungna opat habong dos songon habong ni pidong, jala adong do opat ulu ni binatang buas i.+ Dilehon do tu ibana huaso lao mamaretta.

7 “Huida ma muse di parnidaan i binatang buas na paopatton, massai jorbut do i jala mambahen mabiar. Massai gogo do binatang i, balga-balga do ngingina jala sian bosi do ngingina i. Diroprop jala diropukkon i do manang aha na adong, dung i didege-dege do molo adong na tinggal.+ Adong do sappulu tanduk ni binatang i jala asing do binatang i sian akka binatang buas na parjolo i. 8 Tikki hupanotnoti akka tanduk i, kaluar ma sada tanduk na gelleng sian akka tanduk i.+ Disi kaluar tanduk na gelleng i, ponggol ma tolu tanduk sian akka tanduk i. Adong do mata ni tanduk na gelleng i na songon mata ni jolma jala adong do babana na teal makkatai.+

9 “Dung i huida ma dipeakkon akka tahta. Hundul+ ma disi Ibana Naung Adong sian Najolo.+ Bottar do abitna dos songon salju,+ jala obukna dos songon wol na ias. Sian api na marsigorgor do tahtana dohot akka roda ni tahta i.+ 10 Kaluar ma api na songon sunge sian jolona.+ Adong do marribu* na marhobas di jolona jala adong do marjuta* na jongjong di jolona.+ Dung i mangadili+ ma ibana jala dibukka ma akka bukku.

11 “Sai teal do tanduk na gelleng i makkatai,+ gabe sai hupanotnoti ma i. Tikki hupanotnoti binatang buas i, dipamate ma i, disappatton ma i tu api jala hancur ma dagingna. 12 Jala taringot akka binatang buas na asing i,+ dibuat do huaso ni nasida lao mamaretta. Nang pe songon i, dipasombu dope nasida mangolu sahat tu tikki naung ditottuhon.

13 “Di parnidaan tikki borngin i, huida ma muse ro na songon anak ni jolma+ di atas ni akka ombun na di langit. Diloas do anak ni jolma i manjuppangi Ibana Naung Adong sian Najolo+ i. Jala diboan do anak ni jolma i tu jolona. 14 Dilehon do tu ibana huaso,+ hasangapon,+ dohot harajaon, asa sude halak na sian akka bangso dohot bahasa marhobas tu ibana.+ Martahan do pamarettaonna saleleng ni lelengna jala dang boi digattihon. Harajaonna pe, dang boi dihancurhon.+

15 “Alai au si Daniel, gabe mabiar do au alani parnidaan i, pola do sappe marsak au alani i.+ 16 Hujonoki ma sada sian na jongjong disi, husukkun ma tu ibana lapatan ni parnidaan i. Ujungna dipaboa ibana ma tu au lapatan ni i.

17 “‘Opat binatang buas na balga i,+ i ma opat raja na lao mamaretta di tano on.+ 18 Alai jaloon ni akka halak na badia ma sada harajaon.+ Nasida do na marhobas tu Debata Natumimbul i.+ Jala nasida ma nappuna harajaon i+ saleleng ni lelengna.’

19 “Naeng botookku ma muse taringot binatang buas na paopatton i. Asing do i sian binatang buas na asing. Massai jorbut do i jala mambahen mabiar. Sian bosi do ngingina jala sian tombaga do sisilonna. Diroprop jala diropukkon i do manang aha na adong. Molo adong na tinggal, didege-dege do i.+ 20 Naeng botookku do muse taringot sappulu tanduk+ na adong di uluna. Adong do muse tanduk na asing na ro sian i na mambahen ponggol tolu tanduk na asing.+ Adong do mata ni tanduk i jala adong do babana na teal makkatai. Umbalga do idaon tanduk i sian akka tanduk na asing.

21 “Huida ma muse marporang tanduk i mangalo akka na badia, monang do tanduk i mangalo nasida.+ 22 Dung i ro ma Ibana Naung Adong sian Najolo i+ lao mangadili. Marpihak do Ibana tu akka na badia na marhobas tu Debata Natumimbul i.+ Jala nungnga dapot be tikkina jaloon ni akka na badia i ma harajaon i.+

23 “Didok ibana ma muse, ‘Binatang buas na paopatton i, i ma harajaon na paopatton na lao mamaretta di tano on. Asing do harajaon i sian sude harajaon na asing. Roproponna do nasa na adong di tano on, dege-degeonna, jala bahenonna hancur.+ 24 Tanduk na sappulu i, i ma sappulu raja na lao mamaretta di harajaon i. Dung i, adong ma muse sada raja na asing na imbar sian sude raja i. Taluhonon ni raja i ma tolu raja.+ 25 Teal do ibana makkatai tu Natumimbul i.+ Torus do dibahen ibana akka na kejam tu akka na badia na marhobas tu Debata Natumimbul i. Naeng diuba ibana do tikki dohot patik naung ditottuhon, jala dipasahat do akka na badia i tu ibana saleleng sataon,* dua taon, dohot satonga taon.*+ 26 Alai dung dapot tikkina lao mangadili, dibuat ma huaso lao mamaretta sian ibana. Dung i, dipamate ma ibana jala dihancurhon.+

27 “‘Dipasahat ma harajaon, huaso, dohot hasangapon ni sude harajaon na adong di tano on tu akka na badia na marhobas tu Debata Natumimbul i.+ Martahan do harajaon i+ saleleng ni lelengna, sude do harajaon na asing marhobas jala mangoloi nasida.’

28 “Songon i ma ujung ni parnidaan i. Alai ianggo au si Daniel, gabe mabiar do au alani i, sappe puccat nama bohikku. Nang pe songon i, husippan do i di rohakku.”

8 Di taon na patoluhon tikki mamaretta Raja Belsasar,+ ro ma tu au sada parnidaan. Asing do on sian parnidaan naung hea ro tu au.+ 2 Di parnidaan i, di istana Susan*+ na di provinsi Elam+ do au. Huida ma au jongjong di topi ni Sunge Ulai. 3 Huida ma sada biru-biru jantan+ jongjong di jolo ni sunge i. Adong do dua tanduk ni biru-biru i,+ ungganjang do tanduk na sada sian na sada nai. Jala tanduk na ungganjang do na parpudi tubu.+ 4 Ditanduk biru-biru i do tu barat, tu utara, dohot tu selatan. Dang adong nanggo sada pe binatang buas na boi mangalo i. Jala dang adong manang ise pe na boi paluahon manang aha naung ditakkup ibana.+ Lomo-lomona do jala ginjang do rohana.

5 Dung i, huida ma ro sada hambing jantan+ sian barat.* Massai hatop do ibana marlojong mandalani saluhut tano on, sappe so dais be patna tu tano. Adong do tubu sada tanduk na balga di holang-kolang ni matana.+ 6 Diroro ibana ma biru-biru jantan na dua tandukna i, i ma na huida jongjong di jolo ni sunge i. Massai muruk do ibana tikki na mangaroro biru-biru jantan i.

7 Huida ma didapotton hambing jantan i biru-biru jantan i, jala massai muruk do ibana tu biru-biru jantan i. Ditanduk ibana ma biru-biru jantan i, gabe ponggol ma tandukna na dua i. Dang tolap biru-biru jantan i mangalo hambing jantan i. Ditoppasson hambing jantan i ma biru-biru i tu tano, didege-dege, jala dang adong manang ise pe na tolap paluahon biru-biru jantan i sian ibana.

8 Dung i, gabe ginjang ma roha ni hambing jantan i. Alai dung lam gogo ibana, ponggol ma tandukna na balga i. Tubu ma opat tanduk na balga manggattihon tandukna na sada i, jala tu sude inganan do arah ni akka tanduk i.+

9 Sian sada tanduk na opat i, tubu ma muse sada tanduk na gelleng. Lam ganjang ma tanduk i tu arah selatan, tu arah timur,* dohot tu arah ni Luat na Massai Uli i.+ 10 Lam ganjang ma tanduk i pola sahat tu dalan ni akka tentara na di langit. Gabe madabu ma deba akka tentara i dohot deba akka bintang tu tano. Jala didege-dege ibana ma nasida. 11 Ginjang do muse rohana tu Pamimpin ni akka tentara i. Dibuat ibana do pelean siganup ari na dilehon tu pamimpin i, jala diruppakkon ibana do inganan na badia na dipajongjong pamimpin i.+ 12 Dirajai ibana ma akka tentara i dohot pelean siganup ari i ala nungnga diulahon hasalaan. Disappatton tanduk i ma akka na sittong tu tano on, lomo-lomona do dibaen, jala sai marhasil do ibana.

13 Dung i hubege ma makkatai sada suru-suruan. Jala didok suru-suruan na asing ma tu suru-suruan na makkatai i, “Sappe andigan do masa parnidaan taringot pelean siganup ari dohot taringot hasalaan i?+ Jala sappe andigan do didege-dege inganan na badia dohot akka tentara i?” 14 Gabe didok suru-suruan na parjolo i ma tu au, “Sappe 2.300 ari, arian nang borngin. Dung pe i asa dipadenggan inganan na badia i.”

15 Tikki au si Daniel mangida parnidaan i, jala tikki sai hupikkiri manang aha lapatanna, toppu ma jongjong di jolokku na rupana songon jolma. 16 Dung i hubege ma soara ni jolma sian tonga-tonga ni Sunge Ulai+ i na mandok, “Ale Gabriel,+ urupi ma ibana mangattusi na niidana.”+ 17 Ro ma si Gabriel tu labbungku, alai gabe mabiar ma au. Marsinggang ma au, pola sappe dais bohikku tu tano. Didok ibana ma tu au, “Ale anak ni jolma attusi ma, di panutup ni jaman on do masa parnidaan i.”+ 18 Tikki na makkatai i ibana, pingsan ma au pola sappe tukkap bohikku tu tano. Dung i ditiop ibana ma au, jala diurupi ibana ma au jongjong.+ 19 Didok ibana ma muse tu au, “Saonari, paboaokku ma tu ho na lao masa di ujung ni ari rimas ni Debata. Ai na lao masa do i di tikki naung ditottuhon.+

20 “Biru-biru jantan na niidami na adong dua tandukna, i ma akka raja ni Media dohot Persia.+ 21 Molo hambing jantan* i, i ma raja na sian Junani.+ Jala tanduk na balga na tubu di holang-kolang ni matana, i ma rajana na parjolo.+ 22 Opat tanduk na manggattihon tandukna na ponggol i,+ i ma opat harajaon na ro sian harajaon i. Alai dang dos gogona songon harajaon na parjolo i.

23 “Di ujung ni harajaon ni nasida, tikki nungnga lam jahat akka na mangulahon hasalaan i, ro ma sada raja na garang idaon jala na malo mangoto-otoi. 24 Lam gogo ma harajaonna, alai dang alani gogona sandiri. Hancur do dibahen ibana saluhutna jala marhasil do ibana mangulahon sude ulaonna. Boi do dihancurhon ibana akka halak na gogo dohot akka halak na badia.+ 25 Dioto-otoi ibana do akka halak asa boi ibana marhasil jala dipaginjang ibana do rohana. Tikki aman dihilala akka halak, dihancurhon ibana do saluhutna.* Gariada, dialo ibana do Pamimpin ni akka pamimpin. Alai na lao hancur do ibana dang alani tangan ni jolma.

26 “Sittong do hata na didok di parnidaan i, i ma taringot pelean siganup ari na dilehon arian nang borngin. Alai ikkon dirahasiahon ho do i, ai di ari na naeng ro do i masa.”+

27 Au si Daniel, loja do huhilala jala marsahit do au saleleng piga-piga ari.+ Dung i lao ma au marhobas tu raja i.+ Alai sukkun-sukkun dope rohakku alani na huida i. Jala dang adong nanggo sahalak pe na mangattusi i.+

9 Dung i gabe raja ni halak Kasdim+ ma si Darius+ anak ni si Ahasweros halak Media i. 2 Di taon na parjolo ibana mamaretta, au si Daniel, huboto ma sian akka bukku* na lao tarulang do Jerusalem+ saleleng 70 taon,+ songon na didok Jahowa tu Panurirang* Jeremia. 3 Alani i, hupangido* ma tu Jahowa Debata na sittong i asa diurupi au. Martangiang ma au jala mangelek-elek ma au tu Ibana. Marpuasa+ do au, hupakke do abit goni, jala hundul do au di orbuk. 4 Martangiang ma au tu Jahowa Debatakku jala huakkui ma dosanami. Hudok ma,

“Ale Jahowa Debata na sittong, na marhuaso jala na sangap do Ho. Sai dipasaut Ho do janjim, jala dipatuduhon Ho do holong ni roham*+ tu akka halak na makkaholongi Ho jala na mangulahon parettam.+ 5 Nungnga mardosa jala nungnga marsala hami. Huulahon hami do na jahat jala hualo hami do Ho.+ Nungnga manimbil hami sian parettam dohot sian hukum na binahenmu. 6 Dang olo hami manangihon akka panurirangmu+ na paboahon lomo ni roham di bagasan goarmu. Dang olo akka rajanami, akka pamimpinnami, akka ompunami, dohot sude halak na di luat i manangihon panurirangmi. 7 Ale Jahowa sai diulahon Ho do na sittong.* Alai anggo hami, holan na pailahon do hami songon na masa saonari. Nungnga marserak be dibahen Ho halak Juda, pangisi ni Jerusalem, dohot sude halak Israel tu inganan na jonok dohot tu inganan na dao ala dang setia nasida tu Ho.+

8 “Ale Jahowa, holan na pailahon do hami, akka rajanami, akka pamimpinnami, dohot akka ompunami. Ai nungnga mardosa hami tu Ho. 9 Ale Jahowa Debatanami, parasi roha do Ho jala rade manalpuhon hasalaan.+ Alai holan na mangalo do hami tu Ho.+ 10 Dang huoloi hami hata ni Jahowa Debatanami. Dang huihutton hami akka hukum na nilehonmu marhite akka panurirangmu.+ 11 Sude do halak Israel mangalo Patikmu. Jala dang olo nasida manangihon hatam. Alani i ma dibahen Ho masa tu hami bura na dibahen mardongan sumpa songon na tarsurat di Patik ni si Musa, naposo ni Debata na sittong i.+ Ai nungnga mardosa hami tu Ho. 12 Dipasaut Ho do hatam na nidokmu tu hami+ dohot tu akka pamimpin na mamaretta hami.* Diparo Ho do jea tu hami. Dang hea dope masa di saluhut tano on songon na masa di Jerusalem.+ 13 Masa do sude jea songon na tarsurat di Patik ni si Musa tu hami.+ Nang pe songon i, tong do dang olo hami mangido asi ni roha ni* Jahowa Debatanami. Ai dang muba hami sian sude dosanami+ jala dang olo hami mamparrohahon songon dia Ho pasautton hatami.

14 “Sai diparrohahon Jahowa do hami, jala ujungna diparo Ibana do jea tu hami. Ai sittong do sude na binahen ni Jahowa Debatanami. Alai dang olo hami manangihon hatana.+

15 “Ale Jahowa Debatanami, Ho do na mamboan bangsom kaluar sian Mesir marhite tanganmu na gogo i.+ Jala dibahen Ho do tarbarita goarmu sahat tu sadari on.+ Alai mardosa do hami jala diulahon hami do na jahat. 16 Ale Jahowa, unang be sai muruk jala tarrimas Ho tu Jerusalem kotami, dolokmu na badia i. Ai sai diulahon Ho do na sittong sian najolo.+ Alani hasalaannami dohot dosa ni akka ompunami, gabe sude ma halak di sakalilingnami mangarehei Jerusalem dohot mangarehei bangsomi.+ 17 Ale Debatanami, tangihon ma tangiang dohot pangidoan ni naposomon. Patudu ma na lomo roham tu ingananmu na badia i,+ na tarulang i,+ asa sangap goarmu ale Jahowa. 18 Ale Debatakku, patinggil ma pinggolmu jala tangihon ma. Tatap ma hami na dangol on jala tatap ma kota na dijou mamakke goarmu. Mangelek-elek pe hami tu Ho dang ala huulahon hami na sittong, alai ala balga do asi ni roham.+ 19 Ale Jahowa, tangihon ma.+ Ale Jahowa, sesa ma dosanami. Ale Jahowa, parrohahon ma hami jala urupi ma hami. Unang ma paleleng-leleng ale Debatakku, asa sangap goarmu. Ai mamakke goarmu do dijou kotami dohot bangsomi.”+

20 Tikki martangiang au, tikki huakkui dosakku dohot dosa ni bangsokku, bangso Israel, jala tikki hupangido asa asi roha ni Jahowa Debatakku tu dolok ni Debatakku na badia i,+ 21 tikki martangiang au, ro ma bawa naung hea huida di parnidaakku,+ i ma si Gabriel.+ Tikki i, nungnga dapot tikkina lao pasahatton pelean di botarina. Jala loja hian do huhilala. 22 Ro pe ibana lao mangurupi au do, asa huattusi aha na lao masa. Didok ibana ma,

“Ale Daniel, ro pe au lao mangurupi ho do asa diboto ho jala diattusi ho aha na lao masa. 23 Tikki baru martangiang dope ho, nungnga dipaboa Debata alusna tu au. Jala alani i do au ro paboahon i tu ho. Ai massai dihaholongi Debata do ho.+ Saonari parrohahon ma jala marsitutu ma ho mangattusi lapatan ni parnidaan i.

24 “Nungnga ditottuhon 70 minggu* tu bangsom dohot tu kotam na badia i,+ lao manesa hasalaan, lao manesa dosa,+ lao mambahen pardamean tu hasalaan,+ lao parohon na sittong+ saleleng ni lelengna, lao mamateraihon parnidaan dohot akka naung pinaboa ni Debata,*+ jala lao pabadiahon Inganan na Massai Badia.* 25 Parrohahon jala attusi ma, adong do 7 minggu dohot 62 minggu+ lelengna mulai sian na dipakaluar paretta lao pajongjokkon jala padenggatton Jerusalem+ sahat tu na ro Messias,*+ Pamimpin i.+ Na lao dipajongjong jala dipadenggan do kota i, lapanganna, dohot parit na di sakalilingna. Alai di tikki hasusaan do masa i.

26 “Dung salpu 62 minggu i, na lao dipamate ma Messias.+ Jala dang adong na tinggal agia aha di ibana.+

“Dung i ro ma tentara ni sahalak pamimpin lao manghancurhon kota i dohot inganan na badia i.+ Na lao hancur ma i sude songon na hancur binahen ni banjir. Torus ma masa porang sahat tu ujungna. Ai nungnga ditottuhon Debata na lao hancur do sude.+

27 “Di bagasan saminggu, bahenonna ma marlakku parjanjian i tu godang halak. Jala di parsitongaan ni minggu i, dipaso ibana ma dipelehon akka binatang dohot akka pelean na asing.+

“Na lao ro do ibana na mambahen hancur i+ jala hundul do ibana di ginjang ni habong ni akka barang na dihagigihon Debata. Sahat tu na hancur i sude, na lao diusehon do sude naung ditottuhon Debata tu na hancur i.”

10 Di taon na patoluhon tikki mamaretta Raja Sirus+ na sian Persia, ro ma parnidaan tu si Daniel na laos digoari si Beltesasar.+ Sittong do i jala taringot porang na balga do i. Dipatorang ma tu si Daniel taringot na niidana i, gabe diattusi si Daniel ma lapatanna.

2 Tikki i, au si Daniel nungnga tolu minggu au sai marsak.+ 3 Dang huallang sipanganon na tabo, dang huallang jagal jala dang huinum anggur, dang hudaisson miak tu dagingku di bagasan na tolu minggu i. 4 Di ari na paduapulu opatton di bulan na parjolo, di topi ni Sunge Tigris*+ na balga i do au. 5 Huida ma sahalak bawa na mamakke baju linen+ jala dipakke ibana do ikat pinggang na dibahen sian mas murni na sian Upas. 6 Hira batu krisolit+ do dagingna, hira sillam do bohina, hira api na marsigorgor do matana, hira tombaga na marhillong do tanganna dohot patna,+ jala gogo do soarana hira soara ni jolma na massai godang. 7 Holan au si Daniel do na mangida i. Alai, akka halak na rap dohot au dang diida nasida i.+ Nang pe songon i massai mabiar do nasida, gabe lari do nasida jala martabuni.

8 Holan au nama na tinggal. Jala tikki huida parnidaan i gabe gale ma au, gabe puccat ma au jala dang margogo be au.+ 9 Dung i, hubege ma ibana makkatai. Alai tikki hubege ibana makkatai gabe pingsan ma au sappe tukkap ma bohikku tu tano.+ 10 Dung i, adong ma sada tangan na manjama au.+ Didungoi jala ditogu ma au gabe boi ma au marsinggang. 11 Didok ibana ma tu au,

“Ale Daniel na massai dihaholongi Debata,+ parrohahon ma hata na naeng sidohonokku tu ho. Jongjong ma ho, ai na disuru do au manjuppangi ho.”

Dung didok ibana songon i, jongjong ma au. Alai hitir-hitir dope au.

12 Didok ibana ma muse tu au, “Unang ho mabiar+ ale Daniel. Nungnga ditangihon be tangiangmu mulai sian na marsitutu ho lao mangattusi ari na naeng ro jala dipatutoru ho dirim di jolo ni Debatam. Jala alani tangiangmi+ do umbahen na ro au. 13 Alai ro ma pamimpin+ na sian luat Persia mangalo au saleleng 21 ari. Dung i ro ma si Mikhael+ sada sian akka pamimpin na untimbo pangkatna mangurupi au. Gabe toktong ma au disi, di labbung ni akka raja na sian Persia. 14 Ro pe au, lao mangurupi ho do asa diattusi ho na lao masa tu bangsom di ujung ni akka ari i.+ Ai di ari na naeng ro do masa parnidaan on.”+

15 Tikki didok ibana i, gabe unduk ma au jala dang tardok au be manang aha. 16 Dung i dijama na songon jolma i ma bibirhu,+ gabe boi ma au makkatai. Jongjong do ibana di jolokku. Hudok ma, “Ale tuan, gabe hitir-hitir do au alani parnidaan i jala dang adong be gogokku.+ 17 Dang adong be gogokku jala nungnga maol au marhosa.+ Alani i boha ma bahenon ni naposomon makkatai tu ho ale tuan?”+

18 Ditiop na songon jolma i ma au muse jala dipatogu ma au.+ 19 Dung i didok ibana ma muse, “Ale halak na massai dihaholongi Debata,+ unang ma mabiar ho.+ Sai anggiat ma dame dihilala ho.+ Patogu ma roham, patogu ma roham.” Tikki makkatai ibana tu au, gabe margogo ma au muse. Hudok ma, “Makkatai ma ho tuan, ai nungnga margogo au muse.”

20 Didok ibana ma muse, “Diboto ho do boasa ro au manjuppangi ho? Saonari lao nama au mangalo pamimpin na sian Persia.+ Molo dung lao au, ro ma pamimpin na sian Junani. 21 Alai paboaokku do tu ho akka na tarsurat di bukku hasittongan i. Holan si Mikhael+ pamimpinmuna i+ do na mangurupi au mangulahon ulaon on.

11 “Di taon na parjolo Raja Darius+ na sian Media mamaretta, ro do au lao mangurupi jala patoguhon ibana. 2 Sittong do na lao paboaokku tu ho saonari,

“Ida ma, na lao mamaretta ma tolu raja di Persia. Dung i mamaretta ma raja na paopatton. Unggodang do arta na dipapungu ibana sian raja na tolu i. Gabe lam gogo ma ibana alani hamoraonna i. Dung i lao ma ibana mangalo harajaon ni Junani.+

3 “Dung i mamaretta ma sada raja na massai gogo. Massai bidang do luat na dirajai ibana.+ Jala lomo-lomona do dibahen ibana. 4 Alai dung lam balga huasona, hancur ma harajaonna i. Jala tarbagi ma i tu opat arah.+ Alai dang pinopparna na lao manjalo i. Na lao diuppat do harajaon i jala dilehon tu halak na asing. Jala dang songon balga ni huasona balga ni huaso ni akka harajaon i.

5 “Gabe lam gogo ma sahalak sian pamimpin ni akka tentarana, i ma na gabe Raja Selatan. Alai adong do na lao manaluhon ibana, na umgogo jala na umbalga huasona sian ibana.

6 “Dung piga-piga taon, gabe mardongan ma nasida. Ro ma boru ni Raja Selatan mandapotton Raja Utara lao mambahen parjanjian. Nang pe songon i dang na lao hot huaso ni boru ni Raja Selatan i. Raja i pe, dang na lao martahan, jala dang na lao marhuaso be ibana. Na lao dipasahat ma boru ni Raja Selatan i tu halak na asing, rap dohot akka halak na mamboan ibana tusi, bapakna, dohot akka halak na mambahen ibana gabe marhuaso di tikki i. 7 Alai na lao mamaretta ma sahalak sian keluarga ni boru ni Raja Selatan i lao manggattihon raja i.* Ro ma ibana mangalo akka tentara ni Raja Utara dohot akka kota na marbenteng. Jala taluhononna ma nasida. 8 Mulak ma ibana tu Mesir, diboan ibana ma debata ni nasida, akka patung na sian logam, akka tawanan, dohot akka barang ni nasida na arga na dibahen sian perak dohot mas. Saleleng piga-piga taon dang marporang be ibana mangalo Raja Utara. 9 Alai na lao ro do Raja Utara mangalo Raja Selatan. Dung i mulak ma ibana tu hutana.

10 “Alai mangarade ma akka anakna* lao marporang jala dipapungu ma godang tentara. Dung i maju ma sahalak sian nasida, jala dihancurhon ma saluhut harajaon i dos songon na binahen ni banjir. Dung i mulak ma ibana. Torus do ibana marporang saleleng di pardalanan lao mulak tu ingananna na marbenteng.

11 “Gabe jut ma roha ni Raja Selatan jala lao ma ibana marporang mangalo Raja Utara. Nungnga dipapungu Raja Utara godang halak. Alai na lao dipasahat do nasida tu raja i. 12 Jala diboan raja i ma halak na godang i. Gabe ginjang ma rohana. Dipamate ibana ma marpulu ribu halak. Alai dang dipakke ibana i lao mambahen lam balga huasona.

13 “Dung i mulak ma Raja Utara. Dipapungu ibana ma muse massai godang jolma, unggodang sian na parjolo i. Dung dapot tikkina, dung piga-piga taon, ro ma ibana rap dohot godang tentara na marsinjata. 14 Di tikki i godang ma na ro mangalo Raja Selatan.

“Adong ma akka halak na kejam sian tonga-tonga ni bangsom na naeng pasautton parnidaan i. Alai dang marhasil* nasida.

15 “Dung i ro ma Raja Utara. Dibahen ibana ma benteng na sian tano asa boi ditaluhon ibana sada kota na marbenteng. Gabe dang boi be martahan akka tentara ni Raja Selatan, songon i nang akka tentarana na unjago. Jala dang margogo be nasida. 16 Lomo-lomona do dibahen ibana tu Raja Selatan. Dang adong na tolap mangalo ibana.* Na lao jongjong ma ibana di Luat na Massai Uli.+ Jala adong do huasona lao mambahen hancur. 17 Dibahen ibana do sian nasa gogona tikki na naeng ro i ibana. Jala diboan ibana do sude tentarana na jago na adong di harajaonna. Bahenonna ma parjanjian dohot raja i jala marhasil do ibana. Diloas do ibana mambahen marjea sada anak boru.* Alai dang saut i bahenon ni anak boru i. Ai dang torus setia anak boru i tu ibana. 18 Lao ma ibana tu akka inganan na di topi ni laut jala ditaluhon ibana ma godang inganan. Dung i adong ma sahalak pamimpin ni tentara na pasohon ginjang ni rohana i, asa unang boi be ibana mangaleai. Gabe mulak tu ibana ma akka hatana na mangaleai i bahenon ni pamimpin ni tentara i. 19 Dung i lao ma ibana muse tu akka kota na marbenteng na adong di luatna. Alai dang na lao marhasil ibana. Talu ma ibana jala dang na lao adong be ibana.

20 “Dung i adong ma sasahalak na mangattihon ibana. Suruonna ma sahalak sijalo pajak mandalani harajaon na sangap i. Alai di bagasan piga-piga ari mate ma ibana. Mate pe ibana dang alani jut ni roha manang alani porang.

21 “Dung i adong ma halak na so hasea na mangattihon ibana. Alai dang na lao dilehon hasangapon ni harajaon i tu halak na so hasea i. Aman do sude tikki na ro i ibana,* jala licik do carana mambuat harajaon i. 22 Taluhononna ma akka tentara na godangna dos songon banjir. Jala hancur ma bahenonna nasida sude, dohot do hancur bahenonna Pamimpin+ ni parjanjian i.+ 23 Ala adong na mangurupi ibana, gabe boi ma ibana torus mangoto-otoi. Gabe lam gogo ma ibana alani sada bangso na gelleng. 24 Tikki aman sude, lao ma ibana tu akka huta na ummora na adong di provinsi i. Dibahen ibana do na so hea dope dibahen bapakna dohot akka ompuna. Dibagi ibana do akka barang dohot arta na dapotna tu rakyatna. Marsakkap do ibana naeng mangalo akka kota na marbenteng. Alai holan satokkin do i.

25 “Dibahen ibana ma sian nasa gogona asa barani ibana mangalo Raja Selatan. Dipapungu ibana ma godang tentara. Raja Selatan pe dipapungu do massai godang tentara na gogo lao marporang. Alai dang na lao martahan ibana.* Ai adong do na marsakkap mangalo ibana. 26 Apala halak na nilehonna mangallang sipanganonna na tabo do na mambahen ibana hancur.

“Ditaluhon ma akka tentarana. Gabe godang ma na mate tarbunu.

27 “Holan naeng mangulahon na jahat do raja na dua i. Nang pe sameja nasida alai masigabusan do nasida, jala dang na lao marhasil nasida. Ai na lao ro do ujungna di tikki naung ditottuhon.+

28 “Mulak ma ibana* tu hutana. Dibuat ma godang arta jala naeng dialo ibana ma parjanjian na badia i. Marhasil do ibana mangulahon ulaonna. Dung i mulak ma ibana tu hutana.

29 “Di tikki naung ditottuhon, ro ma ibana muse mangalo Raja Selatan. Alai anggo sahali on, dang songon na parjolo i be. 30 Ai ro do akka kapal na sian Kittim+ mangalo ibana jala dipaila ma ibana.

“Gabe mulak ma ibana. Muruk ma ibana tu parjanjian na badia i.+ Jala marhasil do ibana mangulahon ulaonna. Mulak ma ibana jala diparrohahon ibana ma akka halak na maninggalhon parjanjian na badia i. 31 Dung i ro ma akka tentarana. Dibahen nasida ma gabe ramun* inganan na badia+ dohot akka kota na marbenteng. Jala dibahen nasida ma dang dilehon be pelean siganup ari.+

“Dung i pajongjongon ni nasida ma akka na dihagigihon Debata na mambahen hancur.+

32 “Marhite akka hatana na licik, bahenonna ma manimbil akka halak na mangulahon na jahat dohot akka halak na maninggalhon parjanjian i. Alai anggo halak na mananda Debata ni nasida, toktong do togu jala marhasil. 33 Adong do akka halak na marbisuk+ di tonga-tonga ni nasida. Urupan ni nasida ma godang halak asa mandapot parbinotoan. Alai saleleng piga-piga ari, gabe tartuktuk ma nasida alani podang, alani api, ala ditawan, jala ala dirampok nasida. 34 Tikki na tartuktuk i nasida, adong do dapot ni nasida saotik pangurupion. Jala gabe godang ma na mangihutton nasida, alai dang sian ias ni rohana. 35 Gabe tartuktuk ma deba akka halak na marbisuk. Marhite i, gabe ias ma nasida jala dang marcacat+ be. Masa ma i torus sahat tu na dapot ujungna. Ai na lao ro do ujungna di tikki naung ditottuhon.

36 “Holan lomo-lomona do dibahen raja i. Ginjang do rohana jala dirippu ibana do ussangap ibana sian sude debata.+ Dileai ibana do Debata na untimbo sian akka debata. Marhasil do ibana mangulahon i sahat tu na dapot ari rimas ni Debata. Ai ikkon masa do akka naung ditottuhon. 37 Dang dihabiari ibana Debata ni akka ompuna. Leas do rohana tu pangidoan ni akka borua. Jala dang dipasangap ibana debata na dia pe. Alai holan dirina sandiri do na dipasangap ibana. 38 Jala akka debata na di inganan na marbenteng do na dipasangap ibana. Hape so ditanda akka ompuna i. Dilehon ibana do mas, perak, permata, dohot akka barang na arga lao pasangappon akka debata i. 39 Ala diurupi debata na asing i ibana, gabe marhasil ma ibana manaluhon akka kota na marbenteng na unjago. Massai sangap do dibahen ibana manang ise pe na mangurupi ibana. Jala dibahen ibana do nasida gabe pamimpin ni godang halak. Dibagi-bagi ibana do tano tu manang ise pe na mangalehon garar na pas.

40 “Di tikki ari parpudi, ro ma Raja Selatan mangalo ibana. Dung i dialo Raja Utara ma ibana. Diboan ma akka kareta porang, akka halak na marhoda, dohot godang kapal. Lao ma ibana* tu akka luat jala dihancurhon ma i songon na binahen ni banjir. 41 Lao ma ibana muse tu Luat na Massai Uli+ jala godang do luat na ditaluhon ibana. Alai adong do akka halak na malua sian ibana, i ma halak Edom, halak Moab, dohot akka halak Ammon na sangap. 42 Torus do marporang ibana mangalo akka luat na asing. Jala dang boi malua Mesir sian ibana. 43 Gabe ibana ma na mangarajai akka arta na buni na adong di Mesir, i ma mas, perak, dohot sude barang na arga. Jala diihutton halak Libia dohot halak Etiopia do ibana.

44 “Alai gabe marsak ma ibana alani barita na sian timur dohot na sian utara. Alani murukna, gabe lao ma ibana pamatehon godang halak. 45 Dipajongjong ibana ma akka kemahna na massai bagak di holang-kolang ni laut na balga dohot dolok na badia na adong di Luat na Massai Uli i.+ Dung i, dihancurhon ma ibana jala dang adong na mangurupi ibana.

12 “Laos di tikki i, ro ma si Mikhael+ pamimpin+ na sangap i lao mangurupi bangsom. Dung i masa ma hasusaan. Dang hea dope masa hasusaan na songon i mulai sian adong akka bangso sahat tu tikki i. Alai malua+ do bangsom, malua do manang ise na tarsurat goarna di bukku i.+ 2 Na lao dipahehe ma godang halak na mate.* Deba dipahehe lao mangolu saleleng ni lelengna, jala na deba nai dipahehe lao dipaila saleleng ni lelengna.

3 “Na lao marsinondang do akka halak na marbisuk dos songon langit na tiur. Jala manang ise na mangurupi godang halak mamboto na sittong, na lao marsinondang ma nasida saleleng ni lelengna dos songon bintang.

4 “Alai anggo ho Daniel, rahasiahon ma akka hata i jala materaihon ma bukku i sahat tu panutup ni jaman on.+ Na lao godang do halak na mamareso i haduan. Jala massai godang ma parbinotoan na sittong.”+

5 Dung i au si Daniel, huida ma dua halak nai jongjong di topi ni sunge i. Na sada jongjong di bariba on, jala na sada nai jongjong di bariba an.+ 6 Disukkun sada sian nasida ma tu bawa na marabit linen+ na adong di ginjang ni aek i, “Andigan do marujung akka na palongang roha on?” 7 Dung i diangkat bawa na marabit linen na di ginjang ni aek i ma tangan kanan dohot tangan kirina tu ginjang. Jala marsumpa ma bawa i di bagasan goar ni Ibana na mangolu saleleng ni lelengna.+ Didok ma, “Na lao masa ma i saleleng sataon,* dua taon, dohot satonga taon. Disi marujung huaso ni bangso na badia i,+ marujung ma i sude.”

8 Hubege do nian saluhutna i, alai dang huattusi.+ Gabe hudok ma, “Ale tuanku, songon dia do haduan ujung ni saluhutna i?”

9 Didok ibana ma, “Lao ma ho Daniel. Ai dirahasiahon dope akka hata i jala disegel dope i sahat tu panutup ni jaman on.+ 10 Na lao godang ma akka halak na mambaen dirina ias jala dang marcacat.+ Alai bahenon ni halak na jahat ma akka ulaon na jahat. Jala dang adong sian nasida na mangattusi i. Ai holan halak na marbisuk do na mangattusi i.+

11 “Adong ma 1.290 ari lelengna mulai sian na dipaso mangalehon pelean siganup ari,+ sahat tu na dipajongjong akka barang+ na dihagigihon Debata na mambahen hancur.

12 “Marlas ni roha ma halak na sai paima-imahon sahat tu na marujung 1.335 ari!

13 “Alai Daniel, setia ma ho sahat tu ujungna. Na lao maradian nama ho, alai hehe do ho muse jala jaloonmu ma upam di ujung ni akka ari i.”+