HOSEA
1 On ma hata ni Jahowa tu si Hosea* anak ni si Beeri tikki gabe raja ni Juda+ si Usia,+ si Jotam,+ si Ahas,+ dohot si Hiskia.+ Jala tikki gabe raja ni Israel si Jerobeam+ anak ni si Joas.+ 2 Tikki makkatai Jahowa tu si Hosea, didok Jahowa ma tu ibana, “Lao ma ho, mangoli ma ho tu sahalak borua. Alai gabe boru-boru na so hasea do ibana haduan, jala tubu do anakna sian bawa na asing. Ai nungnga dos songon boru-boru na so hasea be bangso on, dang setia be nasida tu Jahowa.”+
3 Dung i lao ma ibana jala dioli ma si Gomer boru ni si Diblaim, jala ditubuhon si Gomer ma di ibana sada anak.
4 Didok Jahowa ma tu si Hosea, “Bahen ma goar ni anakmi si Jisreel,* ai satokkin nai hukumokku nama pinoppar ni si Jehu.+ Ai dipamate nasida do akka halak di Jisreel. Jala bahenokku nama dang adong be harajaon di Israel.+ 5 Di tikki i, ponggolhonokku ma panah ni halak Israel di Rura Jisreel.”
6 Hamil ma muse si Gomer jala tubu ma boruna. Didok Debata ma tu si Hosea, “Bahen ma goarna si Lo-ruhama,* ai dang patuduhonokku be asi ni rohakku+ tu halak Israel, jala palaookku nama nasida.+ 7 Alai patuduhonokku do asi ni rohakku tu halak Juda.+ Au do Jahowa Debata ni nasida na paluahon nasida.+ Alai dang paluaokku nasida marhite panah, podang, porang, hoda, manang akka halak na marhoda.”+
8 Dukkon sirang susu si Lo-ruhama, hamil ma muse si Gomer jala tubu ma anakna. 9 Didok Debata ma tu si Hosea, “Bahen ma goarna si Lo-ami,* ai dang bangsokku be hamu jala dang Au be Debatamuna.
10 “Dos songon pasir di topi ni laut na so habilangan,+ songon i ma godang ni halak* Israel. Najolo hea do di sada inganan hudok tu nasida, ‘Dang bangsokku be hamu,’+ laos disi ma muse dokkonokku tu nasida, ‘Hamu do akka anak ni Debata na mangolu i.’+ 11 Dung i marsada+ ma halak Juda dohot halak Israel. Pilliton ni nasida ma sahalak pamimpin jala lao ma nasida sian luat i. Gabe ari na balga ma i di Jisreel.+
2 “Dokkon ma tu haha anggim, ‘Hamu do bangsokku!’*+
Dokkon ma tu akka ibotom, ‘Hamu do borua na mandapot asi ni roha!’*+
2 Dokkon ma na marsala do omakmu, dokkon ma na marsala do ibana,
Ai dang istrikku be ibana+ jala dang Au be suamina.
Unang be gabe boru-boru na so hasea ibana,
Unang be dihianati ibana Au.*
3 Molo so olo ibana, bahenokku ma ibana salang-salang dos songon tikki tubu,
Bahenokku ma ibana gabe dos songon padang gurun,
Dos songon tano na koring,
Gabe mate mauas ma ibana.
4 Jala dang asi rohakku tu akka anak na ditubuhon ibana,
Ai anak ni pelacur do i.
5 Ai pelacur do omak ni nasida.+
Holan na pailahon do borua na manubuhon nasida,+ didok ibana do,
‘Lao nama au mandapotton akka hallettu,+
Nasida do na mangalehon roti dohot aek tu au,
Nasida do na mangalehon tu au abit wol dohot abit linen, miak dohot anggur.’*
6 Alani i, ikkon abbatanku do dalanna mamakke suga-suga,
Jala bahenokku ma tembok batu lao mangabbat ibana,
Asa unang boi ibana kaluar.
7 Lumbaonna ma akka halletna i, alai dang dapotna.+
Luluanna ma nasida, alai dang dapotna.
Dung i dohononna ma, ‘Mulak nama au tu suamikku na parjolo i,+
Ai ussonang do ngolukku di tikki i sian saonari.’+
8 Laos so diingot ibana do Au na mangalehon gandum,+ anggur na baru, dohot miak tu ibana,
Jala Au do na mangalehon godang perak tu ibana
Au do na mangalehon mas na dipakke ibana lao manomba Baal.+
9 ‘Alani i mulak nama Au jala buatokku nama gandumhi tikki musim panen
Buatokku nama anggur na baru tikki musim anggur,+
Hulehon do najolo abit wol dohot abit linen asa unang salang-salang ibana, alai buatokku nama i.
10 ‘Saonari bahenokku ma ibana salang-salang di jolo ni akka halletna i
Jala dang adong nanggo sada pe bawa na boi paluahon ibana sian Au.+
11 Bahenokku ma dang marlas ni roha be ibana,
Pasookku ma akka perayaanna,+ perayaan bulan baruna, Perayaan Sabat, dohot sude perayaanna na asing.
12 Tabaokku nama hau anggur dohot hau arana, ai didok ibana do,
“On ma na dapottu sian akka halletti”,
Bahenokku nama i gabe tombak,
Jala sude ma binatang buas manegai i.
13 Hukumokku nama ibana ala dilehon ibana do akka pelean tu patung ni Baal,+
Dipakke ibana do cincinna dohot akka perhiasanna jala dilumba do akka halletna i,
Alai anggo Au dilupahon ibana do,’+ ninna Jahowa.
14 ‘Alani i elekokku ma ibana,
Boanokku ma ibana tu padang gurun,
Jala makkatai ma Au tu ibana asa mulak muse rohana tu Au.
15 Lehonokku ma muse tu ibana porlak anggurna hian,+
Jala lehonokku ma tu ibana Rura Akor+ asa dapotna na dihalomohon rohana
Alusanna ma Au disi songon na binahenna tikki poso ibana,
Tikki kaluar ibana sian Mesir.+
16 Di tikki i, Au Jahowa mandok tu ibana,
‘Dokkononmu nama Au suamim, jala dang dokkononmu be Au tuanmu.’*
17 ‘Dang loasokku be dohononna goar ni akka patung ni Baal i,+
Jala dang ingotonna be goar ni akka patung i.+
18 Di tikki i bahenokku ma parjanjian dohot akka binatang buas,+
Dohot akka pidong na di langit, dohot akka binatang na mangissir+ asa unang disusai bangsokki,
Bolokkonokku ma panah dohot podang sian luat i, jala bahenokku ma dang adong be porang,+
Bahenokku ma dame ngolu ni nasida.+
19 Bahenokku nama ho gabe istrikku saleleng ni lelengna,
Bahenokku nama na sittong tu ho jala adil do Au tu ho,
Patuduhonokku nama holong ni rohakku* tu ho dohot asi ni rohakku.+
20 Marjanji ma Au tu ho, na toktong do setia Au tu ho,
Gabe takkas ma botoonmu, Au do Jahowa.+
21 Di tikki i, Au Jahowa mandok,
‘Lehonokku ma pangidoan ni langit,
Jala lehonon ni langit ma pangidoan ni tano on,+
22 Lehonon ni tano on ma pangidoan ni gandum, pangidoan ni anggur na baru, dohot miak.
23 Saburokku ma ibana dos songon na manabur boni,+
Patuduhonokku ma asi ni rohakku tu ibana na so hea mandapot asi ni roha,*
Dohonokku ma tu na so bangsokku, “Hamu ma na gabe bangsokku,”*+
Dohonon ni nasida ma tu Au, “Ho do Debatanami.”’”+
3 Dung i didok Jahowa ma tu au, “Lao ma ho, haholongi ma muse istrim naung mangalakkup i,+ na dihaholongi akka bawa na asing i. Haholongi ma ibana dos songon Jahowa makkaholongi bangso Israel,+ nang pe disomba nasida akka debata na asing+ jala dihalomohon nasida akka kue kismis.”*
2 Dung i hulehon ma 15 hepeng perak dohot sada satonga homer* barli* lao manuhor ibana muse. 3 Hudok ma tu istrikki, “Ikkon leleng nama ho rap dohot Au. Unang be mangalakkup ho, jala unang be mangulahon seks ho dohot bawa na asing, Au pe dang ulahonokku be seks dohot ho.”
4 Songon i ma na lao masa tu bangso Israel. Leleng do dang adong raja ni nasida,+ dang adong pamimpin, dang adong pelean, dang adong tugu sisombaon, dang adong baju epod,+ jala dang adong patung terapim.*+ 5 Dung i mulak ma muse halak Israel jala luluan ni nasida ma Jahowa Debata ni nasida+ dohot si Daud raja ni nasida.+ Hitir-hitir ma nasida ro tu jolo ni Jahowa lao mangido asi ni rohana di ujung ni akka ari i.+
4 Ale bangso Israel, tangihon ma hata ni Jahowa,
Adong do parsoalan ni Jahowa dohot pangisi ni luat i,+
Ai dang adong be di luat i hasittongan, holong,* dohot parbinotoan taringot Debata.+
2 Dibahen nasida do janji, alai dilanggar nasida do i
Margabus do nasida,+ mambunu,+ manakko, dohot mangalakkup,+
Sai torus do adong halak na mate dibunu.+
3 Alani i ma mangandungi luat i+
Jala dang na lao adong be pangisi ni luat i.
Akka binatang buas, pidong na di langit,
Dohot akka dekke na di laut pe, marmatean ma.
4 “Unang ma adong na mamissang manang na mamuruki bangso i,+
Ai nungnga dos nasida songon halak na mangalo malim.+
5 Tartuktuk ma nasida tikki arian dos songon halak na tartuktuk tikki borngin,
Dohot do akka panurirang tartuktuk rap dohot nasida.
Jala pamateonku ma omak ni nasida.
6 Hancurhonokku ma bangsokki, ai dang ditanda nasida Au.
Dang olo nasida mananda Au,+
Alani i dang olo be Au mambahen nasida gabe malimhu.
Ala dilupahon nasida do patik* ni Debata ni nasida,+
Au pe lupahonokku ma pinoppar ni nasida.
7 Lam godang malim ni nasida, lam godang ma dosa ni nasida tu Au.+
Alani i bahenokku ma nasida marlea, dang sangap be.*
8 Molo mardosa bangsokki, mangallang jagal ma nasida,
Alani i do sai lomo roha ni nasida mardosai bangsokki.
9 Alani pangalaho ni akka malim i,
Hukumokku ma bangsokki rap dohot nasida,
Jala ikkon martanggung jawab do nasida tu sude na binahen ni nasida.+
10 Mangan do nasida alai dang butong.+
Mangulahon seks do nasida tu godang borua, alai dang adong gellengna,+
Ai dang dipasangap nasida Jahowa.
11 Alani seks na so patut, alani anggur na leleng, dohot anggur na baru,
12 Patung na sian hau do disukkun bangsokki,
Tudu-tudu sian sada tukkot* do diihutton nasida,
Gabe lilu do nasida ala dang setia be tu Au,
Jala dang dioloi nasida be Debata ala dang setia* be nasida.
13 Dilehon nasida do pelean di pussu ni akka dolok,+
Ditutung nasida do pelean di akka dolok-dolok,
Di toru ni hau ek,* hau storaks, dohot di toru ni akka hau na balga,+
Ai linggom do disi.
Alani i ma gabe boru-boru na so hasea akka borumuna
Jala mangalakkup akka parumaenmuna.
14 Alai nang pe songon i, dang hukumokku akka borumuna i ala gabe boru-boru na so hasea
Jala dang hukumokku akka parumaenmuna ala mangalakkup.
Ai akka bawa pe lao do mandapotton akka boru-boru na so hasea,
Jala mangalehon pelean do nasida dohot boru-boru na so hasea* i
Ikkon pamateon do bangso na oto on.+
Unang ma lao nasida tu Gilgal+ manang tu Bet-apen+
Jala unang ma dohot nasida marsumpa mandok, ‘Songon pastina Jahowa mangolu!’*+
16 Ai jugul+ do halak Israel dos songon lombu,
Alani i dang mungkin parmahanon ni Jahowa nasida dos songon na marmahan anak ni biru-biru di panjappalan.*
17 Nungnga dilehon halak Epraim be ngoluna tu akka patung,+
Alani i pasombu ma nasida!
Lomo hian do roha ni akka pamimpin ni nasida mangulahon ulaon na mambahen nasida gabe marlea.+
19 Na lao dihabangkon alogo ma nasida,
Jala gabe maila ma nasida alani akka pelean ni nasida i.”
5 “Hamu akka malim,+ tangihon hamu ma,
Hamu halak Israel, parrohahon hamu ma on,
Hamu akka pinoppar ni raja, tangihon hamu ma,
Lao diadili nama hamu sude,
Ai nungnga gabe dos hamu songon jorat di Mispa
Jala dos do hamu songon jaring di Tabor.+
2 Torus do mambunu akka pangalo,
Hape nungnga hupasingot* nasida.
3 Hutanda do halak Epraim,
Jala dang buni halak Israel sian Au.
Saonari nungnga mangulahon seks na so patut be halak Epraim,
Jala nungnga dibahen halak Israel ramun* dirina.+
4 Gabe maol ma nasida mulak tu Debata ni nasida alani pangalaho ni nasida i,
Jala dang diakkui nasida be Au do Jahowa Debata ni nasida.
5 Ginjang ni roha ni halak Israel i ma na gabe bukti di hasalaan ni nasida,+
Gabe tartuktuk do halak Epraim dohot halak Israel alani dosa ni nasida sandiri,
Jala dohot do halak Juda tartuktuk rap dohot nasida.+
6 Dilului nasida do Jahowa huhut mamboan biru-biru dohot lombu,
Alai dang dapot ni nasida Ibana.
Ai nungnga ditadikkon Ibana nasida.+
Alani i hancurhononna nama nasida dohot tano parbagianan* ni nasida di bagasan sabulan.*
8 Ombus ma tarompet na sian tanduk+ di Gibea, ombus ma tarompet di Rama!+
Bahen hamu ma tarbege soara ni na marporang di Bet-apen,+ huihutton hami pe hamu sian pudi, ale Benjamin!
9 Gabe tarsonggot ma akka halak tikki dihukum halak Epraim.+
Nungnga takkas hupatudu aha na lao bahenokku tu akka marga ni halak Israel.
10 Gabe dos ma akka pamimpin ni halak Juda songon halak na papindahon batas ni tano.+
Alani i usehonokku ma rimashu tu nasida, dos songon halak na mangusehon aek.
11 Patut do halak Epraim dibahen susa jala dihancurhon,
Ai nungnga diihutton nasida musu ni nasida.+
12 Hancurhonokku ma halak Epraim dos songon ngitngit na mangallang hau sappe habis
Jala bahenokku ma halak Juda gabe dos songon hau na busuk.
13 Tikki diboto halak Epraim na marsahit nasida, jala diboto halak Juda na lukka nasida,
Lao ma halak Epraim tu Asiria+ mandapotton raja na sangap i.
Alai dang boi dipamalum ibana sahit ni nasida
Jala dang boi ibana pamaluppon lukka ni nasida.
14 Gabe dos ma Au songon anak ni singa di halak Epraim,
Jala dos ma Au songon singa na gogo di halak Juda.
15 Dung i mulak ma Au tu inganakku jala susa ma nasida alani dosa ni nasida,
Luluan ni nasida ma Au lao mandapot asi ni rohakku.+
Luluan ni nasida ma Au tikki susa nasida.”+
6 “Beta, mulak ma hita tu Jahowa,
Ai dos songon singa, nungnga diribak-ribak Ibana be dagingta,+ alai na lao pamalumonna do hita.
Nungnga diattuk Ibana hita, alai na lao balutonna do lukkatta.
2 Dung salpu dua ari, bahenonna ma hita margogo.
Di ari na patoluhon, paheheonna ma hita,
Gabe mangolu ma hita di jolona.
3 Marsitutu ma hita mangalehon rohatta lao mananda Jahowa,
Ai pasti do ro Ibana, songon mataniari na pasti bissar tikki manogot.
Sai na ro do Ibana tu hita, songon parro ni udan,
Songon musim udan na parpudi* na mambahen tonu tano on.”
4 “Ale Epraim, aha do na ikkon bahenokku tu ho?
Ale Juda, aha do na ikkon bahenokku tu ho?
Ai songon parmago ni ombun tikki manogot do holong ni roha* na dipatudu ho tu Au,
Jala songon nambur na tibu mahiang di manogotna.
5 Alani i ma husuru akka panurirangku*+ lao paboahon barita panguhuman,
Barita panguhuman i ma na pasudahon hamu.+
Jala bahenokku do takkas tarida panguhumakki dos songon sinondang ni mataniari.+
6 Ai unlomo do rohakku molo dipatuduhon hamu holong,* sian apala dilehon hamu pelean,
Jala unlomo do rohakku molo ditanda hamu Debata, sian apala dilehon hamu pelean situtungon.+
7 Alai anggo bangsokki, nungnga songon jolma pardosa nasida, nungnga dilanggar nasida parjanjiakki.+
Dihianati nasida do Au di luat ni nasida.
9 Dos do akka malim ni nasida songon punguan ni pangarampok na monggop-onggop lao manakkup halak.
Dipamate nasida do jolma di dalan na tu Sikem,+
Ai jahat do pangalaho ni nasida.
10 Nungnga huida akka na jorbut masa di tonga-tonga ni bangso Israel.
Diulahon Epraim do disi ulaon ni boru-boru na so hasea,+
11 Alai anggo tu Juda nungnga ditottuhon be na lao masa musim panen di luat i,
Boanokku ma muse mulak bangsokku naung diboan musu i.”+
7 “Molo naeng hupamalum halak Israel,
Tarida ma hasalaan ni halak Epraim,+
Dohot hajahaton ni halak Samaria.+
Ai lomo do roha ni nasida manipu,+
Mambongkar jabu ni halak lao manakko jala mangarampok jolma di tonga dalan.+
2 Dang dirippu nasida na lao ingotokku sude hajahaton ni nasida.+
Tarjorat do nasida alani hajahaton ni nasida sandiri,
Dang adong nanggo sada pe pangalaho ni nasida na buni sian Au.
3 Diulahon nasida do na jahat lao pasonakkon roha ni raja,
Jala manipu do nasida lao pasonakkon roha ni akka pamimpin.
4 Pangalakkup do nasida sude,
Dos songon oven ni tukkang roti naung dipagalak do nasida,
Na so pola porlu be dipabalga apina tikki mambahen adonan ibana sappe kabbang.
5 Di tikki marpestai raja i, marsahit ma akka pamimpin,
Gabe muruk ma nasida ala minum anggur.+
Mardongan do raja i dohot akka pangarehei.
6 Tikki ro nasida,* mohop do roha ni nasida songon mohop ni oven i.
Modom do tukkang roti saborngin manipat,
Alai tikki manogot, nungnga marsigorgor api ni oven i.
7 Mohop do nasida sude dos songon mohop ni oven,
Dihancurhon nasida do sude akka pamimpin* ni nasida.
Nungnga madabu sude raja ni nasida,+
Alai dang adong nanggo sahalak pe sian nasida na mangido asa huurupi.+
8 Mardongan do Epraim dohot akka bangso na asing.+
Dos songon kue na bulat do Epraim i, na dipasombu dang dipabalik tikki dipanggang.
9 Nungnga dibuat bangso na asing gogona,+ alai dang diboto ibana.
Nungnga sappe bottar sude obukna, alai dang diboto ibana.
10 Ginjang ni roha ni halak Israel do na patuduhon hasalaan ni nasida,+
Alai dang mulak nasida tu Jahowa, Debata ni nasida,+
Nang pe naung masa i sude, dang dilului nasida Ibana.
11 Nungnga songon darapati na loakon Epraim, dang diattusi nasida be manang aha.*+
Dipangido nasida do Mesir asa mangurupi nasida,+ dung i lao ma muse nasida tu Asiria+ mangido asa diurupi.
12 Manang tudia pe nasida lao, takkupokku do nasida mamakke jaring.
Dabuhonokku ma nasida dos songon na binahen ni halak tikki manakkup pidong.
Bahenokku ma hukuman tu nasida, dos songon naung hupaboa hian tu bangso ni nasida.+
13 Marjea ma nasida, ai nungnga lari nasida sian Au!
Lao hancur ma nasida, ai nungnga dialo nasida Au!
Nungnga rade Au paluahon nasida, alai didok nasida do akka hata na so sittong taringot tu Au.+
14 Torus do mangandungi nasida di podoman ni nasida lao mangido asa huurupi,+
Alai dang sian ias ni rohana mangido i.
Diseati nasida do daging ni nasida asa dapot ni nasida gandum dohot anggur na baru,
Alai torus do nasida mangalo tu Au.
15 Nang pe nungnga huajari nasida jala hubahen nasida margogo,
Alai sai mangalo do nasida tu Au jala sai akka na jahat do na dipikkiri nasida.
16 Mulak do nasida, alai dang mulak tu Au,
Dang tarpakke be nasida, dos songon panah na kendor talina.+
Na lao mate ma akka pamimpinna dibahen podang, ai mangalo do nasida.
Na lao direhei ma nasida di Mesir.”+
8 “Ombus ma tarompet na sian tanduk i!+
Ai nungnga ro musu songon lali mangalo bangso* ni Jahowa,+
Ai nungnga dilanggar nasida parjanjiakku+ jala dang dioloi nasida patikku.+
2 Sai didok nasida do tu Au, ‘Ale Debatanami, ditanda Israel bangsomi do Ho!’+
3 Dang olo Israel i manjalo na denggan.+
Lok ma dilele musu ibana.
4 Dipillit nasida do akka raja, hape dang huparettahon i.
Dipillit nasida do akka pamimpin di na so pamotoakku.
Dibahen nasida do perak dohot mas ni nasida gabe akka patung na lao disomba nasida,+
Alai parohon jea do i tu diri ni nasida sandiri.+
5 Ale Samaria,+ sogo do rohakku mangida patung ni anak ni lombumi.
Muruk situtu do Au tu ho.+
Sadia leleng nai bahenonmu ramun* dirim alani dosam?
6 Tukkang ni halak Israel do na mambahen patung i.
Jala dang Debata na sittong patung i,
Na lao diropukkon do patung anak ni lombu ni Samaria i.
7 Disabur nasida do alogo,
Alani i, badai ma na lao dipanen nasida.+
Dang adong nanggo sabatang gandum pe na marparbue,+
Manang aha pe na tubu dang boi dibahen gabe topung.
Molo adong pe na boi dipanen, halak na asing do na pahabisson i.+
8 Bodduton ni musu ma Israel i sappe habis.+
Gabe marserak ma nasida di tonga-tonga ni akka bangso na asing,+
Gabe songon barang na so tarpakke ma nasida.
9 Ai nungnga lao nasida tu Asiria,+ songon halode liar na lao manang tudia pe lomo ni rohana.
Digaji Epraim do akka boru-boru na so hasea lao gabe hallet ni nasida.+
10 Nang pe sian akka bangso na asing akka hallet ni nasida na digaji i,
Alai na lao papunguokku do nasida muse,
Na lao susa ma nasida+ alani boban na binahen ni raja dohot akka pamimpin.
11 Nungnga mardosa Epraim, ai ditambai ibana do lam godang langgatanna.+
Dipakke ibana do akka langgatan i lao mangulahon dosa.+
13 Dilehon nasida do pelean tu Au jala diallang nasida do jagal ni pelean i,
Alai dang lomo roha ni Jahowa tu sudena i.+
Saonari ingotokku ma hasalaan ni nasida jala hukumokku ma nasida alani akka dosa ni nasida.+
Ai nungnga marbalik nasida* tu Mesir.+
14 Nungnga lupa Israel tu Sitoppa ibana+ jala dipajongjong ibana do akka inganan panombaon,*+
Lam godang do dipajongjong Juda akka kota na marbenteng.+
Alai parookku ma api tu akka kotana i,
Tutungon ni api i ma sappe habis akka menara di ganup kotana.+
9 “Ale Israel, unang ma las roham,+
Unang ma marsonang-sonang ho songon bangso na asing.
Ai dang setia be ho dos songon boru-boru na so hasea jala nungnga mandao ho sian Debatam.+
Lomo do roham manjalo upa na dilehon di akka inganan pardegean ni gandum,+ ala nungnga gabe boru-boru na so hasea ho.
2 Dang na lao dapotmu sipanganon sian inganan pardegean dohot sian inganan pamoroan ni anggur,
Jala dang na lao dapotmu be anggur na baru.+
3 Dang na lao toktong be nasida tinggal di tano appuna ni Jahowa,+
Na lao mulak ma Epraim tu Mesir,
4 Dang na lao usehonon ni nasida be anggur gabe pelean tu Jahowa,+
Dang lomo roha ni Debata tu pelean ni nasida.+
Sudena i, nungnga dos songon roti na diallang di tikki marlungun ni roha.
Manang ise na mangallang i, gabe ramun do.
Holan tu diri ni nasida sandiri do roti i,
Dang boi diboan i tu jabu ni Jahowa.
5 Aha ma na lao bahenonmuna di akka ari perayaan naung ditottuhon hamu,
Di akka perayaan na tu Jahowa?
6 Lari ma nasida tikki dihancurhon luat ni nasida.+
Dipapungu ma nasida di Mesir+ jala dikuburhon di Mempis.+
Ditutupi akka ramba na marsuga ma akka barang-barang ni nasida na arga,
Jala tubu ma akka suga-suga di kemah ni nasida.
7 Ale halak Israel, ikkon botoonmuna do on,
Na lao juppang ma tikki panguhuman i,+
Na lao juppang ma arina dibalosson pambahenan ni ganup halak.
Maoto ma akka panurirang jala rittik ma ganup halak na mangakku mandapot parnidaan sian Debata,
Alani godang ni hasalaanmuna, massai sogo situtu ma roha ni halak mangida hamu.”
8 Najolo rap do panjaga+ ni Epraim dohot Debata.+
Alai saonari sude pangalaho ni akka panurirangna+ nungnga songon sitakkup pidong,
Gok do sogo ni roha di jabu ni Debatana.
9 Tung massai roa do pangalaho ni nasida, dos songon na hea masa di Gibea.+
Ingoton ni Debata do akka dosa ni nasida jala hukumonna do nasida alani i.+
10 “Tikki juppangku halak Israel, dos songon hau anggur na di gurun do nasida.+
Dos songon parbue ni hau ara na parjolo dipanen do akka ompu ni nasida,
Alai lao do nasida tu Baal Peor+ jala dilehon nasida do ngolu ni nasida tu debata na parohon ila,+
Alani i, gabe dihagigihon ma nasida dos songon debata na disomba nasida i.
11 Songon parhabang ni pidong ma parmago ni hamuliaon ni Epraim,
Dang adong na hamil jala dang adong na manubuhon anak.+
12 Molo tung pe adong anak na dipagodang-godang nasida,
Dang pasombuonku nanggo sada pe sian akka dakdanak i na mangolu,+
Marjea ma nasida di tikki na hutadikkon i nasida.+
13 Najolo Epraim i songon Tirus+ do di Au, songon suan-suanan na tubu di inganan panjappalan na lomak,
Alai saonari ikkon boanon ni Epraim ma akka anakna lao dipamate.”
14 Ale Jahowa, balos ma nasida, hombar tu pambahenan ni nasida,
Bahen ma keguguran akka borua di luat i jala dang boi manusui poso-posona.
15 “Diulahon nasida do akka na jahat di Gilgal,+ disi ma sogo rohakku tu nasida.
Usirokku ma nasida sian jabukku alani akka hajahaton ni nasida.+
Dang huhaholongi be nasida,+ ai akka sijogal rukkung do akka pamimpin ni nasida.
16 Tabaokku ma Epraim+ dos songon na manaba hau.
Gabe koring ma uratna, jala dang be marparbue.
Molo tubu pe anak ni nasida, pamateonku ma anak na dihaholongi nasida i.”
17 Dang jaloon ni Debata be nasida,
Ai dang ditangihon nasida Ibana,+
Gabe buronan ma nasida di tonga-tonga ni bangso na asing.+
10 “Dos ma halak Israel songon hau anggur na ramos parbuena, alai roa do parbuena i.*+
Lam godang parbuena, lam godang ma dibahen nasida akka langgatan,+
Lam denggan hasil tano ni nasida, lam bagak ma dibahen nasida akka tugu sisombaon.+
2 Munafik* do nasida,
Saonari nungnga tardapot be sala ni nasida.
Na lao adong nama halak na ro manghancurhon akka langgatan ni nasida dohot tugu sisombaon ni nasida.
3 Saonari dokkonon ni nasida ma, ‘Dang adong be rajatta,+ ai dang tahabiari Jahowa.
Aha ma haroa guna ni sahalak raja di hita?’
4 Dang toho akka hata ni nasida, dibahen nasida do janji alai dang boi dihaporseai janji ni nasida i,+
Diulahon nasida do akka na so sittong na dos songon suan-suanan na marraccun na tubu di ladang.+
5 Na lao diboan ma patung anak ni lombu na adong di Bet-apen+ tu luat ni musu.
Gabe mabiar ma pangisi ni huta Samaria,
Mangandungi ma nasida alani patung i jala dohot do akka malim ni debata na so sittong mangandungi,
Ai marlas ni roha do nasida najolo alani patung i dohot alani hasangaponna.
6 Dung i na lao diboan ma patung i tu Asiria, asa gabe hadiah i tu raja na sangap i.+
Gabe maila ma Epraim,
Jala maila ma Israel, ai diihutton nasida do poda ni halak na oto.+
7 Pasti dihancurhon do Samaria dohot rajana,+
Jala dos ma nasida songon ratting ni hau na mumbang-umbang di atas ni aek.
8 Na lao dihancurhon+ ma akka inganan panombaon* na adong di Bet-apen,+ na mambahen halak Israel mardosa.+
Martubuan ma suga-suga di akka langgatan ni nasida.+
Dokkonon ni nasida ma tu akka dolok, ‘Tipa ma hami!’
Jala dokkononna ma tu akka dolok-dolok, ‘Hukkupi ma hami!’+
9 Ale Israel, nungnga mardosa hamu,+ mulai sian na hea masa di Gibea.
Jala torus dope mardosai hamu.
Nang pe naung masa porang mangalo halak na jahat na adong di Gibea, alai dang mate dope sude halak na jahat i.
10 Hukumokku ma nasida sadihari pe lomo rohakku.
Marsada ma akka bangso na asing lao mangalo nasida,
Tikki i hukumokku ma nasida alani dua hasalaan na binahen ni nasida.*
11 Najolo dos songon lombu boru-boru naung dilatik do Epraim, jala lomo rohana mardege.
Alani i dang porlu bahenokku boban tu rukkungna,
Alai saonari suruokku nama halak makkunduli* Epraim+
Mambajak ma Juda, jala mangula ma Jakkob.
12 Ula ma tano na denggan, suan ma disi boni na denggan, i ma akka ulaon na sittong,+
Dung i panen ma holong ni roha.*
Lului ma Jahowa+ bissan adong dope tikki,
Ai na ro ma Ibana lao mangajari ho taringot akka na denggan.+
13 Alai disuan hamu do na jahat,
Alani i panenonmuna ma akka na so denggan.+
Diallang hamu do parbue ni gabus,
Ai marhaposan tu dirimuna do hamu,
Dohot tu akka tentaramuna na godang i.
14 Masa ma porang di tonga-tonga ni bangsom,
Na lao dihancurhon ma akka inganan na marbenteng na adong di kotam,+
Gabe masa ma songon na hea masa di tikki dihancurhon si Salmon kota Bet-arbel,
Di tikki masa parporangan i, dipukkuli do akka ina rap dohot gellengna sappe mate.
15 Ale Betel, songon i ma na lao masa tu ho,+ ai nungnga lam godang hajahatonmu.
Dung manogot, pasti dihancurhon do raja ni Israel.”+
Torus do dilehon nasida pelean tu akka patung ni Baal,+
Jala dilehon nasida do pelean situtungon tu akka patung.+
3 Hape Au do na mangajari Epraim mardalan,+ na manogu-nogu nasida.+
Alai laos so diakkui nasida do na Au pamaluppon nasida.
4 Marhite holongku+ dohot haburjuokku na dos songon tali,* hutogu do nasida asa ro tu Au,
Dos do Au songon halak na mangangkat auga* na borat sian rukkung ni nasida,
Jala hulehon do mangan nasida sude.
5 Dang na lao mulak be nasida tu Mesir, alai Asiria nama gabe raja ni nasida,+
Ai dang olo nasida mulak tu Au.+
6 Hancurhonokku ma akka kota ni nasida+ mamakke podang
Ruppakkonokku ma akka palang gerbang ni kota ni nasida jala pamateonku ma nasida alani sakkap ni nasida na jahat.+
7 Jotjot do dang setia bangsokki tu Au.+
Hujou do nasida asa mulak tu Au, alai dang adong na olo.
8 Boha ma bahenokku maninggalhon ho, ale Epraim?+
Boha ma bahenokku pasombuhon ho, ale Israel?
Tung bahenokku ma ho hancur songon Adma?
Tung bahenokku ma ho hancur songon Zeboim?+
Nungnga muba be rohakku,
Nungnga gabe asi be rohakku tu ho.+
9 Dang na lao marsigorgor be rimashu tu hamu.
Dang na lao hancurhonokku be muse Epraim,+
Ai Debata do Au, dang jolma,
Nabadia do Au di tonga-tongamuna,
Dang na lao muruk be Au tu hamu.
10 Mardalan ma halak Israel mangihutton Jahowa, ai na lao marauang ma Au dos songon singa,+
Tikki na marauang i Au, hitir-hitir ma ro akka anakki sian barat.+
11 Tikki ro nasida sian Mesir, dos ma nasida songon pidong na mabiar,
Tikki ro nasida sian Asiria,+ dos ma nasida songon darapati na mabiar,
Alai boanokku ma nasida muse mulak tu jabu ni nasida,” ninna Jahowa.+
12 “Holan gabus do na didok Epraim tu Au,
Jala holan na manipu+ do Israel.
12 “Akka sisoada do na dihaporseai* Epraim.
Hira na manakkup alogo na sian timur do ibana ganup ari.
Gok do gabusna dohot hajahatonna.
Dibahen ibana do parjanjian dohot Asiria+ jala diboan do miak tu Mesir.+
2 Adong do parsoalan ni Jahowa tu halak Juda,+
Ikkon martanggung jawab do si Jakkob alani sude na binahenna,
Jala na lao dibalos do sude pambahenanna.+
3 Tikki di bortian* ni omakna dope si Jakkob, ditiop ibana do tumit+ ni abangna,
Jala dibahen ibana do sian nasa gogona lao marsiranggut dohot Debata.+
4 Marsiranggut do ibana dohot suru-suruan jala monang do ibana.
Tangis do ibana mangido pasu-pasu.”+
Didapotton Debata do ibana tu Betel, jala disi do dipaboa Debata taringot tu hita.+
5 Jahowa do Pamimpin ni Akka Tentara,*+
Jahowa do goar na ikkon diingot sude jolma.+
6 “Alani i, mulak ma hamu tu Debatamuna,+
Toktong ma patudu holong* jala ulahon hamu ma na tigor,+
Jala torus ma hamu marhaposan tu Debatamuna.
7 Di tangan ni akka partiga-tiga adong do timbangan na manipu,
Lomo hian do rohana manipu.+
Di sude ulaonku, dang adong huulahon na sala jala dang adong huulahon dosa.’
9 Alai Au do Jahowa Debatamuna mulai sian tikki di Mesir dope hamu.+
Bahenokku ma muse hamu tinggal di perkemahanmuna
Songon najolo tikki adong dope akka perayaan naung ditottuhon.
10 Makkatai do Au tu akka panurirang,*+
Hupatudu do tu nasida godang parnidaan,
Jala hupasahat do akka tudos-tudos marhite nasida.
11 Holan akka panipu* dohot akka halak na so jujur do di Gilead.+
Dipelehon nasida do akka lombu di Gilgal,+
Godang ni langgatan ni nasida dos songon godang ni batu na dipapungu di ladang.+
12 Lari do si Jakkob tu luat Aram,*+
Rade do si Israel+ karejo disi asa boi dapotna istrina,+
Jala gabe parmahan ni biru-biru do ibana lao mandapot istrina i.+
13 Marhite sahalak panurirang diboan Jahowa do kaluar halak Israel sian Mesir,+
Jala marhite sahalak panurirang dijaga Ibana do nasida.+
14 Massai haccit do roha ni Debata dibahen Epraim,+
Ikkon martanggung jawab do nasida ala mambunu do nasida,
Ikkon jaloon ni nasida do balos ni pambahenan ni nasida ala dileai nasida do Tuan ni nasida.”+
13 “Najolo molo makkatai Epraim hitir-hitir do akka halak,
Ai ibana do na ussangap di Israel.+
Alai ala disomba ibana Baal,+ gabe mardosa jala mate ma ibana.
2 Saonari torus do mardosai nasida
Dibahen do akka patung sian perak,*+
Akka tukkang na malo do na mambahen akka patung i.
Didok nasida do, ‘Sude na mangalehon pelean, ikkon diumma do patung anak ni lombu.’+
3 Alani i, dos ma nasida songon ombun na hatop mago tikki manogot
Songon nambur na hatop mahiang,
Dos songon lapung ni eme* di inganan pardegean na dihabangkon alogo,
Jala dos songon timus na kaluar sian atap.
4 Alai Au do Jahowa Debatamuna mulai sian tikki di Mesir dope hamu,+
Takkas do diboto hamu dang adong Debata asing ni Au,
Jala holan Au do sipalua di hamu.+
5 Hujaga do hamu tikki di padang gurun dope hamu,+ tikki di tano na harsang i dope hamu.
6 Butong ma nasida alani hasil ni ladang ni nasida,+
Butong ma nasida jala gabe ginjang ma roha ni nasida.
Alani i ma dilupahon nasida Au.+
7 Gabe dos ma Au songon anak ni singa di nasida,+
Dos songon macan tutul na monggop-onggop di tonga dalan.
8 Ro ma Au mangaroro nasida dos songon beruang na mago anakna,
Ribakokku ma andora ni nasida.
Jala boddutokku ma nasida songon na binahen ni singa,
Ribak-ribakon ni akka binatang buas ma nasida.
9 Ale Israel, hancurhonokku nama ho,
Ai dialo ho do Au, dialo ho do na mangurupi ho.
10 Najolo didokkon ho do, ‘Lehon ma di hami raja dohot pamimpin.’*+
Alai saonari didia do rajami dohot pamimpinmi?
Boi do nasida paluahon ho di sude kotami?+
11 Muruk do Au najolo tikki hulehon sahalak raja tu ho,+
Jala tarrimas nama Au lao mambuat i sian ho.+
12 Dang na lao dilupahon hasalaan ni Epraim,
Nungnga dietong jala disurat akka dosana.
13 Hilalaon ni nasida ma na haccit dos songon na dihilala sahalak ina na naeng partus.
Alai songon anak na oto do nasida,
Na so olo kaluar nang pe nungnga dapot tikkina lao ditubuhon.
Ale Hamatean, didia do huasom na parohon na haccit i?*+
Ale Kuburan, didia do huasom na mambahen hancur i?+
Alai dang na lao patuduhonokku be asi ni roha.
15 Molo tung pe denggan nasida tubu di tonga-tonga ni ramba-ramba,
Alai paroon ni Jahowa do alogo na sian timur,
Sian padang gurun do ro alogo i, bahenon ni i do koring sumur dohot mata mualna.
Jala na lao ro ma sasahalak mangarampok akka barang ni nasida na arga.+
16 Ala mangalo do Samaria tu Debata,+ dokkonon nama na marsala ibana.+
Pamateon ma ibana mamakke podang,+
Na lao diattuk ma akka gellengna sappe mate,
Jala dibola ma butuha ni akka borua na hamil.”
14 “Ale Israel, nungnga madabu hamu alani hasalaanmuna,
Alani i, mulak ma hamu tu Jahowa Debatamuna i.+
2 Mulak ma hamu tu Jahowa,
Jala dokkon ma tu Ibana, ‘Sai sesa ma akka dosanami+ jala jalo ma akka na denggan sian hami,
Pasahatonnami ma tu Ho akka puji-pujian+ na dos songon anak ni lombu na hupelehon hami tu Ho.
3 Dang boi Asiria paluahon hami.+
Dang na lao hundul be hami di akka hoda,+
Jala dang dokkononnami be akka na binahennami i gabe Debatanami,
Ai Ho do na patuduhon asi ni roha tu akka na so marama.’+
4 Pamalumokku ma nasida.
Ai dang muruk be Au tu nasida.+
5 Gabe dos ma Au songon nambur di halak Israel,
Marbunga ma nasida dos songon bunga lili
Jala bagas ma urat ni nasida dos songon urat ni hau na di Libanon.
6 Gabe lam godang ma rattingna,
Bagak ma i dos songon hau jetun,
Jala angur ma i dos songon akka hau na di Libanon.
7 Na lao marlinggom ma muse nasida tu Au.
Suanon ni nasida ma gandum,
Dos songon bunga ni hau anggur ma godang ni nasida.+
Gabe tarbarita* ma goarhu dos songon anggur na sian Libanon.
8 Dokkonon ni Epraim ma, ‘Tu aha be akka patung on di au?’+
Dung i tangihonokku ma ibana jala jagaokku.+
Gabe dos ma Au songon hau juniper na godang bulungna.
Dos songon hau na mangalehon parbuena lao allangonna.”
9 Anggiat ma on diattusi halak na marbisuk.
Jala anggiat ma on diboto halak na malo.
Ai tigor do dalan ni Jahowa,+
Jala ihuttonon ni akka halak na tigor marroha do i,
Alai anggo pardosa, tarsulandit do nasida.
Singkatan ni Hosyaya, lapatanna, “Dipalua Jahowa; Nungnga Dipalua Jahowa”.
Lapatanna, “Saburon ni Debata ma Boni”.
Lapatanna, “Dang Dapotan Asi ni Roha”.
Lapatanna, “Dang Bangsokku”.
As. “akka anak ni”.
Ida surat na di toru na di Hos 1:9.
Ida surat na di toru na di Hos 1:6.
As. “Unang be berhianat ibana di tonga-tonga ni susuna”.
As. “siinumon”.
Manang “Baalmu”.
Manang “holong na manoktong”. Ida di Kamus.
Lapatanna, “Saburon ni Debata ma Boni”.
Ida surat na di toru na di Hos 1:6.
Ida surat na di toru na di Hos 1:9.
Dipakke do kue on tikki manomba debata na so sittong.
Hira-hira 220 Iiter. Ida Lampiran B14.
Suan-suanan na songon eme.
Manang “patung na disomba sada keluarga”.
Manang “holong na manoktong”. Ida di Kamus.
Manang “tudu-tudu”.
Manang boi do “Dang dipasangap nasida Au, alai dileai nasida do Au”.
As. “dang marroha nasida”.
Manang “tukkot ni peramal”.
Manang “dang setia songon boru-boru na so hasea”.
Jenis ni hau na massai balga. Di bahasa Inggris digoari “hau ek”.
Na nidokna dison, i ma halak na manjual dirina manang na mangulahon seks ala manomba debata na so sittong.
Manang “Nang pe dang setia halak Israel tu Debata songon boru-boru na so hasea”.
Sumpa on patuduhon pasti do ikkon saut janji on, songon pastina Debata mangolu.
As. “di inganan na bidang”.
Manang “bir gandum”.
Manang “Pasingotokku ma”.
Ida di Kamus.
Manang “dang setia nasida tu Debata songon boru-boru na so hasea”.
Na didokna dison, olo do ra akka anak ni nasida sian istri ni nasida na so halak Israel.
Manang “dohot ladang”.
Manang boi do “Dang pola sahat tu sabulan, hancurhononna do nasida”.
Musim udan na parpudi dimulai hira-hira parsitongaan ni bulan April.
Manang “holong na manoktong”. Ida di Kamus.
Ida di Kamus.
Manang “asi ni roha; holong na manoktong”. Ida di Kamus.
Ida di Kamus.
Manang boi do “Tikki dibahen nasida rencana na jahat”.
As. “hakim”.
As. “dang marroha nasida”.
Manang “bagas joro”.
Ida di Kamus.
Manang “tudu-tudu”.
Manang boi do “Ai na lao mulak do nasida”.
As. “inganan na timbo”. Ida di Kamus.
Ida di Kamus.
Manang boi do “songon hau anggur na ramos parbuena”.
Manang “Licik”.
As. “inganan na timbo”. Ida di Kamus.
Gabe songon auga na dituhuk ma hukuman na dibahen tu nasida.
Manang “saonari bahenokku ma auga tu”.
Manang “holong na manoktong”. Ida di Kamus.
Na manjou na nidokna dison, i ma akka panurirang dohot akka halak na asing na disuru lao mangajari halak Israel.
Olo ra tali na nidokna dison, tali na dipakke natua-tua tikki mangajari gellengna mardalan.
Ida di Kamus.
Manang “toktong do mardalan ibana dohot”.
As. “Alogo do diallang”.
Manang “rahim”.
Manang “Sebaot”, lapatanna pamimpin ni akka suru-suruan na di banua ginjang.
Manang “holong na manoktong”. Ida di Kamus.
Ida di Kamus.
Manang “akka na mamakke ilmu gaib”.
Manang “Siria”.
Manang “patung sian logam”.
As. “kulit ni eme”. Ida di Kamus.
As. “hakim”.
Manang “Syeol”. Ida di Kamus.
As. “didia do soropmi?”
Manang “gabe diingot”.