NAHUM
1 Barita tu Ninive:+ Bukku na marisi parnidaan ni si Nahum* halak Elkos:
2 Jahowa do Debata na mangido asa holan Ibana na disomba+ jolma,*
Dihukum Jahowa do akka musuna, dang lupa Ibana tu pambahenan ni nasida na jahat i.+
Dibalos Jahowa do akka musuna.
Jala usehononna do rimasna i tu nasida.
3 Lambat tarrimas+ do Jahowa jala balga do huasona,+
Alai dang hea pasombuon ni Jahowa dang dihukum halak na mangulahon dosa.+
Tikki mardalan Ibana, mangullus do alogo na gogo dohot udan haba-haba
Songon orbuk do akka ombun di toru ni patna.+
Harsang ma tano na di Basan dohot na di Karmel,+
Jala malos ma akka bunga na di Libanon.
5 Humutur ma akka dolok alani Ibana,
Jala malala ma akka dolok-dolok.+
Humutur ma tano on di jolona
Rap dohot sude luat, songon i nang akka pangisina.+
6 Ise ma na tahan jongjong molo muruk Ibana?+
Jala ise ma na tolap manaon mohop ni rimasna i?+
Marsigorgor do rimasna songon api,
Jala hancur do dolok batu alani Ibana.
7 Burju do Jahowa i,+ Ibana do benteng di tikki masa hasusaan.+
Dijaga* Ibana do halak na mangalului parlinggoman tu Ibana.+
8 Paroonna do banjir na balga lao pamatehon sude halak na di Ninive,*
Jala dilele na holom do akka musuna.
9 Aha ma rencana na lao bahenonmuna mangalo Jahowa?
Ai bahenonna ma hancur sude.
Dang pola dua hali Ibana ro lao mambahen hancur i sude.+
10 Ai nang pe marsijalinan nasida songon ramba na marsuga-suga,
Jala songon halak na mabuk alani bir,*
Na lao habis do nasida hona tutung songon durame na koring.
11 Na lao adong do sian hamu na mambahen rencana lao mangalo Jahowa,
Dilehon ibana do poda na so marguna.
12 Songon on ma hata ni Jahowa:
“Nang pe massai gogo halak Asiria* jala massai godang nasida,
Alai na lao mate do nasida sude jala gabe hancur.
Ale Juda, nungnga hubahen ho susa, alai dang bahenokku be songon i tu ho.
13 Saonari ponggolhonokku ma auga* na binahen ni Asiria* tu ho,+
Jala ponggol dua ma bahenokku tali pangikkatmi.
14 Songon on ma hata ni Jahowa taringot tu Asiria,
‘Dang adong be pinopparmu na lao mamboan goarmu.
Bolokkonokku ma sude patung na dipahat dohot patung na sian logam na adong di joro ni akka debatam.
Bahenokku ma kuburanmu, ai magigi do Au mangida ho.’
15 Ida ma! Mardalan do halak na mamboan barita na uli di akka dolok,
Halak na pasahatton barita hadameon.+
Ale Juda, bahen ma sude perayaanmi,+ gohi ma janjim,
Ai dang na lao ro be akka parjahat mangalo ho.
Na lao mate nama nasida sude.”
2 Na lao ro ma mangalo ho* halak na naeng mambahen ho marserak,+
Jaga ma akka bentengmu,
Awasi ma akka dalan,
Parade ma dirim jala pakke ma nasa gogom lao marporang.
2 Ai na lao paulakon ni Jahowa nama hasangapon ni si Jakkob,
Rap dohot hasangapon ni Israel,
Ai nungnga dihancurhon akka panegai nasida,+
Jala nungnga disegai ratting ni hau anggur ni nasida.
3 Nungnga ro be akka tentarana mamakke baju na merah,
Diboan nasida do perisai na merah,
Nungnga rade nasida lao marporang,
Diangkat nasida do tombak* na sian hau juniper
Dohot sinjata na sian bosi tu akka kareta porang ni nasida na songon api na marsigorgor.
4 Massai hatop do akka kareta porang ni nasida mardalan di akka dalan i,
Lari do nasida tusan tuson di akka lapangan.
Marsinondang do nasida songon obor na marsigorgor,
Jala songon sillam do hatop ni nasida marlojong.
5 Dijou raja* i ma akka pejabatna,
Alai tikki ro nasida, tartuktuk ma nasida.
Hatop ma nasida lao tu akka tembokna,
Dibangun nasida ma tembok partahanan.
6 Na lao bukka ma akka gerbang ni sunge,
Jala na lao hancur ma istana ni raja.
7 Nungnga ditottuhon be na masa on:
Na lao dipaila ma penduduk ni kota i di jolo ni godang halak,
Diboan musu ma nasida jala dipukkuli akka hatoban borua ma andora ni nasida alani lungun ni rohana.
Sappe songon soara ni darapati ma soara ni nasida na mangandungi i.
8 Songon kolam do Ninive i+ saleleng ngoluna,
Alai saonari, lari ma nasida sian i.
Adong ma na mandok, “So ma ho! Unang be lao ho!”
Alai dang adong na olo mulak.+
9 Buat hamu ma perak, rampas hamu ma mas sian kota i!
Dang na lao habis sude arta na adong disi.
Ai massai godang situtu do ragam ni arta na arga disi.
10 Hancur ma kota i, tarulang, jala dang adong be na tinggal disi!+
Mabiar ma pendudukna, malala ma roha ni nasida,
Hitir-hitir ma dugul-dugul ni nasida, haccitan ma daging ni nasida
Jala puccat ma bohi ni nasida sude.
11 Aha do na masa tu kota na songon asar ni singa* i?+
Didia do anak ni singa i mangan?
Didia do inganan ni singa i mardalan rap dohot anakna?
Ai inganan na sonang do i jala dang adong be na mambahen nasida mabiar.
12 Diribak-ribak singa i do daging ni mangsana, lao allangon ni anakna
Dipokkik ibana do mangsana asa adong lehononna tu akka singa boru-boru.
Gok do dibahen ibana di asarna i binatang naung ditakkup ibana,
Gok do binatang naung diribak-ribak ibana di asarna i.
13 “Ida ma! Au ma na gabe alom,” ninna Jahowa Pamimpin ni Akka Tentara,*+
“Tutungokku ma akka kareta porangmu tu bagasan api,+
Jala pamateon ni podang ma akka singam na poso i,
Pasookku ma ulaonmu na marburu i sian tano on,
Jala dang na lao tarbege be soara ni halak na sinurum.”+
3 Marjea ma kota ni pambunu* i!
Ai gok do akka panipu di kota i dohot akka pangarampok.
Torus do ditakkup ibana mangsana!
2 Tarbege do soara ni cambuk dohot soara ni roda na marlatak-latak,
Tarbege do soara ni hoda na marlojong dohot kareta porang na mardalan.
3 Adong do halak na nakkok di atas ni hoda,
Adong do podang dohot tombak* na marhillong,
Godang do halak na mate dibunu,
Jala martumpuk-tumpuk do bakke ni jolma.
Manang didia pe adong do bakke, sappe tartuktuk do halak alani bakke i.
4 Masa do i sude ala songon pelacur do kota i na mangulahon godang ulaon ni boru-boru na so hasea,
Bagak do pelacur i jala lomo do roha ni godang halak mangida ibana,
Tukkang sihir do ibana,
Dijorat ibana do akka bangso marhite ulaon ni boru-boru na so hasea,
Jala dijorat ibana do akka keluarga marhite ilmu sihirna.
5 “Ida ma! Au ma na gabe alom,”* ninna Jahowa Pamimpin ni Akka Tentara,*+
“Angkatokku ma ujung ni rokmi tu ginjang sahat tu bohim,
Bahenokku ma ho salang-salang di jolo ni akka bangso,
Hupaila ma ho di jolo ni akka harajaon.
6 Husappatton ma kotoran tu ho,
Bahenokku ma ho marlea,
Jala bahenokku ma ho gabe sitottonon ni godang halak.+
7 Lari do sude halak na mangida ho,+ ditadikkon nasida do ho,
Jala didok do, ‘Nungnga hancur be Ninive!
Ise ma na olo marasi ni roha tu ibana?’
Sian dia ma luluakku halak na boi mangubati roham?
8 Na dirippu ho do na dumenggan ho sian No-amon,*+ na jonok tu aliran ni aek na sian Sunge Nil i?+
Dikalilingi aek do kota i,
Sian laut do ro hamoraonna dohot sian tembok partahananna.
9 Etiopia dohot Mesir na massai gogo i do haroroan ni hagogoanna.
Put+ dohot halak Libia do na mangurupi ibana.+
10 Alai nang pe songon i, takkupon ni musu do ibana,
Boanon ni musu do ibana tu luatna,+
Attukon ni musu ma anakna di dalan sappe mate,
Dibagi-bagi do halak na sangap di kota i gabe hatoban,
Jala diratte do pat ni sude pejabatna.
11 Gabe mabuk ma ho,+
Martabuni ma ho,
Jala lari ma ho sian musu lao mangalului parlinggoman.
12 Nungnga songon hau ara na parjolo marparbue sude bentengmu,
Molo dihutur i, pittor madabu ma parbuena i tu pamangan ni halak na naeng mangallang i.
13 Ida ma! Nungnga gabe gale akka tentaram songon borua,
Na lao bukka ma akka gerbang ni kotami di jolo ni musu,
Na lao matutung ma akka palang ni gerbangmi dibahen api.
14 Papungu ma aek asa adong pakkeonmu tikki dikepung!+
Patogu ma akka bentengmu.
Lao ma ho tu inganan na margambo jala dege-dege ma tano liat,
Bahen ma batu bata.
15 Alai nang pe songon i, tutungon ni api do ho,
Jala pamateon ni podang do ho.+
Pasudaonna ma ho dos songon na binahen ni sihapor* na poso.+
Pagodang ma pendudukmu songon godang ni sihapor na poso!
Tutu, bahen ma songon godang ni sihapor na poso!
16 Nungnga godang situtu be dibahen ho akka partiga-tigam,
Unggodang do i sian akka bintang di langit.
Nungnga dipalua sihapor na poso kulitna, jala dao habang.
17 Songon sihapor do akka panjagam,
Jala songon punguan ni sihapor do akka pejabatmu.
Tikki ngali ari, martabuni do nasida di holang-kolang ni tembok na sian batu,
Dung bissar mataniari, lao ma nasida habang,
Alai dang adong na mamboto manang na tudia nasida lao.
18 Ale raja ni Asiria, nungnga mondok-ondok be akka parmahanmu.
Sai di jabuna be do akka halakmu na sangap,
Nungnga marserak be akka rakyatmu di akka dolok,
Jala dang adong na papunguhon nasida.+
19 Dang na lao malua ho sian hasusaan na massai balga i,
Dang na lao boi malum lukkami.
Martopak tangan ma sude halak na mambege barita taringot tu ho,+
Ai ise ma huroa halak na so hea manaon haccit ni pambahenanmu na massai kejam i?”+
Lapatanna, “Halak na Mangapuli Roha”.
Manang “na sogo rohana molo dipatudos tu debata na asing.”
Manang “Diparrohahon”. As. “Ditanda”.
As. “na di ingananna”.
Manang “bir gandum”.
As. “nasida”.
Ida di Kamus.
As. “na binahenna”.
Na nidokna dison, i ma Ninive.
Manang “hujur”.
Ra na nidokna, i ma raja ni halak Asiria.
Singa, i ma sada sian lambang nasional ni Ninive.
Manang “Sebaot”, lapatanna pamimpin ni akka suru-suruan na di banua ginjang.
Manang “kota sisopsop mudar”.
Manang “hujur”.
Na nidokna, i ma alo ni Ninive.
Manang “Sebaot”, lapatanna pamimpin ni akka suru-suruan na di banua ginjang.
Na nidokna, i ma Tebes.
Manang “belalang”.