HAGGAI

1 Di taon na paduahon tikki Raja Darius mamaretta, di ari na parjolo, di bulan na paonomhon, dipasahat Jahowa ma hatana marhite Panurirang* Haggai.*+ Dung i, dipasahat si Haggai ma muse hata i tu si Serubabel+ gubernur ni Juda anak ni si Sealtiel dohot tu Sintua Malim Josua anak ni si Jehosadak.

2 Didok Ibana ma, “Songon on do didok Jahowa Pamimpin ni Akka Tentara,* ‘Didok bangso on do, dang tikkina dope saonari pajongjokkon jabu* ni Jahowa.’”+

3 Dung i dipasahat Jahowa ma muse hatana marhite Panurirang Haggai.+ Didok ma, 4 “Tinggal do hamu di jabu na bagak, hape jabukku hancur dope.+ Didok rohamuna, denggan do songon i bahenonmuna saonari? 5 On ma na didok Jahowa Pamimpin ni Akka Tentara, ‘Pikkiri hamu ma jo akka na masa tu hamu. 6 Godang do boni na disuan hamu, alai otik do na dipanen hamu.+ Mangan do hamu, alai dang butong hamu. Minum do hamu, alai toktong do hamu mauas. Marabit do hamu, alai toktong do hamu ngalian. Halak na karejo pe, hira na di inganan ni hepeng na maribak do disippan gajina.’”

7 “On ma na nidok ni Jahowa Pamimpin ni Akka Tentara, ‘Pikkiri hamu ma jo akka na masa tu hamu.’”

8 “Didok Jahowa ma muse, ‘Lao ma hamu tu dolok jala buat ma hau sian i.+ Pajongjong ma jabukku,+ asa las rohakku jala dipasangap Au.’”+

9 “Didok Jahowa Pamimpin ni Akka Tentara i ma muse, ‘Didok rohamuna, godang ma nian dapotmuna hasil panen, alai otik do dapotmuna. Diboan hamu ma i tu jabukku, alai huombus ma i asa mago.+ Boasa hubahen songon i? Alana hancur dope jabukku, hape jabumuna dipagabak-bagak hamu do.+ 10 Alani i ma dang turun nambur sian langit, jala dang dilehon tano i hasilna. 11 Jala hubahen do koring tano on dohot akka dolok. Gabe dang adong be sipanganonmuna, anggur, miak, dohot akka suan-suanan. Ujungna gabe susa ma hamu dohot akka binatang. Jala gabe marisuang ma sude na niulamuna.’”

12 Ditangihon si Serubabel+ anak ni si Sealtiel+ dohot Sintua Malim Josua anak ni si Jehosadak+ do hata ni Jahowa, Debata ni nasida i. Dohot do muse sude bangso i manangihon i. Ditangihon nasida do muse hata ni Panurirang Haggai, ai Jahowa Debata ni nasida do na manuru ibana. Gabe mabiar ma bangso i tu Jahowa.

13 Dung i dipasahat si Haggai ma hata ni Jahowa tu bangso i. Didok Jahowa do, “Donganakku do hamu.”+ Dipasahat si Haggai do i tu bangso i, ai songon i do na diparettahon Jahowa tu ibana.

14 Gabe taronjar ma roha ni nasida+ lao pajongjokkon jabu ni Jahowa Pamimpin ni Akka Tentara, Debata ni nasida i.+ Dibahen Jahowa do taronjar roha ni si Serubabel anak ni si Sealtiel gubernur ni Juda i,+ roha ni Sintua Malim Josua+ anak ni si Jehosadak, dohot roha ni sude bangso i. 15 Masa ma on di taon na paduahon tikki mamaretta Raja Darius,+ di ari na paduapulu opatton, di bulan na paonomhon.

2 Di ari na paduapulu sadahon, di bulan na papituhon, dipasahat Jahowa ma hatana marhite Panurirang* Haggai.+ Didok ma, 2 “Sukkun ma jo tu si Serubabel+ gubernur ni Juda+ anak ni si Sealtiel i, tu Sintua Malim Josua+ anak ni si Jehosadak,+ dohot tu sude bangso i, 3 ‘Adong dope sian hamu na mangingot songon dia bagak ni jabukku* na parjolo i?+ Boha do dibereng hamu jabukku sisaonari on? Dao do ubbagak jabukku na parjolo i kan?’+

4 “Didok Jahowa ma, ‘Saonari togu ma ho ale Serubabel dohot ho Sintua Malim Josua anak ni si Jehosadak.’

“Didok Jahowa ma muse, ‘Hamu sude akka bangsokku, togu ma hamu+ jala ulahon hamu ma ulaon i.’

“‘Ai donganakku do hamu,’+ ninna Jahowa Pamimpin ni Akka Tentara i.* 5 ‘Ingot ma janjikku tu hamu tikki kaluar hamu sian tano Mesir.+ Toktong do hutogu-togu hamu marhite* tondi parbadiakku.+ Unang ma mabiar hamu.’”+

6 “Didok Jahowa Pamimpin ni Akka Tentara i ma, ‘Satokkin nai, huturokku ma langit, tano i, laut, dohot darat sahali nai.’+

7 “Didok Jahowa Pamimpin ni Akka Tentara i ma, ‘Huturokku ma akka bangso jala diboan ma akka arta ni nasida na arga tu jabu i.+ Ujungna gabe sangap ma jabu i.’+

8 “‘Au do nappuna perak dohot mas,’ ninna Jahowa Pamimpin ni Akka Tentara i.

9 “‘Gabe ubbagak ma jabukku sisaonari on sian jabukku na parjolo i,’+ ninna Jahowa Pamimpin ni Akka Tentara i.

“‘Jala bahenokku ma dame di inganan on,’+ ninna Jahowa Pamimpin ni Akka Tentara i.

10 Di taon na paduahon Raja Darius mamaretta, di ari na paduapulu opatton, di bulan na pasiahon, dipasahat Jahowa ma hatana marhite Panurirang Haggai.+ Didok ma, 11 “On ma na didok Jahowa Pamimpin ni Akka Tentara i, ‘Sukkun ma jo akka malim taringot patik on,+ 12 “Molo adong halak na mamboan jagal na badia* jala dibukkus di abitna, hape dais ma abitna i tu roti, manang tu sup, manang tu anggur, manang tu miak, manang tu sipanganon na dia pe taho, gabe dohot do i badia?”’”

Didok akka malim i ma, “Daong!”

13 Disukkun si Haggai ma muse, “Molo adong halak na ramun* ala manjama bakke,* hape dais ma ibana tu sipanganon i, gabe dohot do sipanganon i ramun?”+

Didok akka malim i ma, “Ido. Gabe ramun do i.”

14 Didok si Haggai ma, “Songon on do didok Jahowa, ‘Songon i ma sude bangso on di adopanku, jala songon i ma sude ulaon ni nasida. Manang aha pe na dipelehon nasida, ramun do i di Au.’

15 “‘Alai saonari, mulai sian sadari on, pikkirhon hamu ma jo on: Andorang so dipajongjong dope bagas joro ni Jahowa,+ 16 aha do na masa? Di tikki i, didok rohamuna do asa dapotmuna 20 goni gandum hape holan 10 goni do dapotmuna. Jala tikki ro sasahalak tu inganan pamoroan ni anggur lao mambuat 50 botol anggur, holan 20 botol do dapotna.+ 17 Ai huparo do alogo na mohop, jamur+ na manegai suan-suanan, dohot udan es, asa sega sude na niulamuna i. Alai dang adong hamu na mulak tu Au,’ ninna Jahowa.

18 “‘Denggan ma on parrohahon hamu, mulai sian sadari on, di ari na paduapulu opatton, di bulan na pasiahon on, nungnga mulai dibahen hamu muse fondasi ni bagas joro ni Jahowa.+ Alani i, parrohahon hamu ma on: 19 Adong dope haroa boni na tading di gudangmuna?+ Ai so marparbue dope hau anggurmuna, hau aramuna, hau delimamuna, dohot hau jetunmuna. Alai sian saonari, pasu-pasuokku ma hamu.’”+

20 Dipasahat Jahowa ma muse hatana na paduahalihon tu si Haggai, di ari na paduapulu opatton di bulan i.+ Didok ma, 21 “Dokkon ma tu si Serubabel gubernur ni Juda i, ‘Huturokku nama langit dohot tano i.+ 22 Sappattonokku ma akka tahta ni raja. Jala bahenokku ma dang adong be huaso ni akka harajaon.+ Danggurhonokku ma akka kareta porang dohot na mamboan i. Bahenokku ma madabu akka hoda. Jala bahenokku ma akka na mamboan hoda i masipamatean mamakke podang.’”+

23 “Ninna Jahowa Pamimpin ni Akka Tentara i ma, ‘Ale Serubabel,+ anak ni si Sealtiel+ naposokku, di ari i boanokku ma ho.’ Didok Jahowa ma muse, ‘Bahenokku ma ho gabe songon cincin cap, ai ho do na hupillit,’ ninna Jahowa Pamimpin ni Akka Tentara i.”