SAKARIA
1 Di bulan na paualuhon di taon na paduahon Raja Darius+ mamaretta, ro ma hata ni Jahowa tu Panurirang* Sakaria*+ anak ni si Berekia pahoppu ni si Iddo. Didok ma, 2 “Muruk situtu do Jahowa tu akka ompumuna.+
3 “Dokkon ma tu nasida, ‘On ma na nidok ni Jahowa Pamimpin ni Akka Tentara* i, “‘Mulak ma hamu tu Au,’ ninna Jahowa Pamimpin ni Akka Tentara i, ‘asa mulak Au muse tu hamu,’+ ninna Jahowa Pamimpin ni Akka Tentara i.”’
4 “‘Unang ma hamu songon akka ompumuna i. Didok akka panurirang do najolo tu nasida, “On ma na nidok ni Jahowa Pamimpin ni Akka Tentara i, ‘Tinggalhon hamu ma akka pambahenanmuna dohot pangalahomuna na jahat i.’”’+
“‘Alai dang ditangihon nasida Au, jala dang olo nasida mamparrohahon hatakku,’+ ninna Jahowa.
5 “‘Tutu, nungnga mate akka ompumuna i. Jala dang mangolu be akka panurirang i. 6 Alai masa do hatakku dohot keputusakku tu akka ompumuna songon na hupaboa tu akka panurirang naposokki.+ Dung i mulak ma nasida tu Au jala didok nasida ma, ‘Nungnga dibahen Jahowa Pamimpin ni Akka Tentara i tu hita songon naung ditottuhon Ibana, hombar tu pambahenatta dohot tu pangalahotta.’”+
7 Di ari na paduapulu opatton, di bulan na pasappulu sadahon i ma bulan Sebat,* di taon na paduahon Raja Darius+ mamaretta, ro ma hata ni Jahowa tu Panurirang Sakaria anak ni si Berekia pahoppu ni si Iddo. Didok ma, 8 “Di borngin i, ro ma parnidaan tu au. Huida ma sahalak bawa hundul di hoda na merah. So do ibana di tonga-tonga ni hau mirtel na tubu di lombang. Jala adong do hoda na merah, na cokelat, dohot na bottar di pudina.”
9 Gabe hudok ma, “Ale tuan, ise do nasida?”
Didok suru-suruan na makkatai i ma, “Hupaboa pe ise nasida.”
10 Dung i didok bawa na so di tonga-tonga ni hau mirtel i ma, “Nasida ma na disuru Jahowa makkaliangi saluhut tano on.” 11 Didok nasida ma tu suru-suruan ni Jahowa na jongjong di tonga-tonga ni hau mirtel i, “Nungnga dihaliangi hami be saluhut tano on. Dame jala sonang do saluhut tano on.”+
12 Gabe didok suru-suruan ni Jahowa i ma, “Ale Jahowa Pamimpin ni Akka Tentara, sadia leleng nai do Ho dang patuduhon asi ni roha tu Jerusalem dohot tu akka kota na di Juda?+ Hape nungnga 70 taon Ho muruk tu akka kota i.”+
13 Burju jala lambok do Jahowa mangalusi suru-suruan na makkatai tu au i. 14 Dung i didok suru-suruan i ma tu au, “Paboa ma, ‘On ma na nidok ni Jahowa Pamimpin ni Akka Tentara i, “Nungnga hutottuhon na lao urupanku do Jerusalem dohot Sion.+ 15 Muruk situtu do Au tu akka bangso na dame i.+ Ai ditambai akka bangso i do sitaonon ni naposokku,+ hape so na pola muruk hian Au tu naposokki.”’+
16 “Alani i on ma didok Jahowa, ‘“Marasi ni roha ma Au muse tu Jerusalem.+ Jala pajongjongokku ma jabukku disi,”+ ninna Jahowa Pamimpin ni Akka Tentara i, “Jala ukkuronku ma Jerusalem*+ asa boi pajongjongokku i muse.”’
17 “Paboa ma muse jala dokkon ma, ‘On ma na nidok ni Jahowa Pamimpin ni Akka Tentara i, “Marroan ma muse akka na denggan sian akka kotakku. Apulan ni Jahowa ma muse Sion+ jala pillitonna ma muse Jerusalem.”’”+
18 Dung i huida ma muse, adong opat tanduk.+ 19 Husukkun ma tu suru-suruan na makkatai tu au i, “Akka aha do i?” Dialusi ibana ma, “Akka tanduk i ma na mambahen marserak penduduk ni Juda,+ Israel,+ dohot Jerusalem.”+
20 Dung i dipatudu Jahowa ma tu au opat halak tukkang. 21 Husukkun ma, “Na lao marhua do nasida?”
Dialusi Ibana ma, “Na lao pabiar-biarhon jala manghancurhon akka tanduk ni bangso i do nasida, i ma akka tanduk na mangalo jala na mambahen marserak penduduk ni Juda. Ai gabe marserak do penduduk ni Juda alani akka tanduk i. Jala dang adong nanggo sahalak pe na boi mangalo tanduk i.”
2 Dung i huida ma sahalak bawa na maniop tali pangukkur.+ 2 Jadi husukkun ma tu ibana, “Na lao tudia do ho?”
Dialusi ibana ma, “Na lao mangukkur Jerusalem do au, asa huboto manang na sadia ganjangna dohot bidangna.”+
3 Dung i lao ma suru-suruan na makkatai tu au i, jala ro ma suru-suruan na asing mandapotton ibana. 4 Didok suru-suruan na asing i ma tu ibana, “Lao ma ho tusan jala dokkon ma tu bawa i, ‘“Na lao gabe kota na so marbenteng do Jerusalem+ ala lam godang jolma dohot akka binatang na dipiaro disi.+ 5 Au ma na lao gabe tembok api di sakalilingna+ jala gabe sangap ma ibana ala di tonga-tongana Au,”+ ninna Jahowa.”’”
6 “Hatop! Hatop! Lari ma hamu sian luat na di utara,”+ ninna Jahowa.
“Ai nungnga hubahen hamu marserak tu sude inganan,”*+ ninna Jahowa.
7 “Ale Sion, pahatop ma! Hamu akka na tinggal di Babel,+ lari ma hamu sian i. 8 Dung dipasangap Jahowa Pamimpin ni Akka Tentara* i, disuru Ibana ma au tu akka bangso na mangarampok hamu.+ On ma na nidokna, ‘Manang ise na manjama hamu, dos songon na manjama anak ni matakku do i.+ 9 Saonari angkatokku ma tanganku lao mangalo nasida. Jala bahenokku ma nasida dirampok akka hatoban ni nasida.’+ Dung i botoonmuna ma Jahowa Pamimpin ni Akka Tentara i do na manuru au.
10 Marende ma hamu marlas ni roha ale anak boru Sion.+ Ai nungnga ro Au,+ jala na lao maringanan do Au di tonga-tongamuna,”+ ninna Jahowa. 11 Didok Ibana ma muse, “Di ari i godang ma bangso na lao marpihak tu Au.+ Gabe bangsokku ma nasida jala na lao maringanan ma Au Jahowa di tonga-tongamuna.” Dung i botoonmuna ma Jahowa Pamimpin ni Akka Tentara i do na manuru au. 12 Bahenon ni Jahowa ma Juda gabe appunana di tano na badia. Jala pillitonna ma muse Jerusalem.+ 13 Hamu saluhut jolma, hohom ma hamu di jolo ni Jahowa. Ai nungnga ro Ibana sian ingananna na badia mangulahon lomo ni rohana.
3 Dung i dipatuduhon Debata ma tu au Sintua Malim Josua.+ Jongjong do ibana di jolo ni suru-suruan ni Jahowa, jala jongjong do Sibolis*+ di sabola kananna lao mangalo ibana. 2 Didok suru-suruan ni Jahowa ma tu Sibolis, “Sai disonggak Jahowa ma ho Bolis.+ Sai anggiat ma Jahowa na mamillit Jerusalem i+ na manonggak ho. Ai dang na dos si Josua i songon hau na ditarik sian api?”
3 Tikki i, jongjong do si Josua di jolo ni suru-suruan i jala abit na kotor do na dipakke ibana. 4 Didok suru-suruan i ma tu suru-suruan na asing na jongjong di jolona, “Bukka ma abitna na kotor i.” Dung i didok ibana ma muse tu si Josua, “Ida ma, nungnga hubolokkon hasalaanmu. Jala pakkeonmu ma abit na bagak.”*+
5 Jadi hudok ma, “Pakkehon ma sorban* tu uluna.”+ Gabe dipakkehon nasida ma sorban na ias tu uluna jala dipakkehon ma abitna. Tikki i jongjong do suru-suruan ni Jahowa di labbungna. 6 Dung i didok suru-suruan ni Jahowa i ma tu si Josua, 7 “On ma na nidok ni Jahowa Pamimpin ni Akka Tentara* i, ‘Molo diihutton ho akka dalanku jala diulahon ho tanggung jawabmu di jolokku, gabe hakim ma ho di jabukku.+ Jagaonmu ma alaman ni jabukku, jala loasokku ma ho ro tu jolokku rap dohot akka halak na jongjong dison.’
8 “‘Ale Sintua Malim Josua, tangihon ma. Na lao gabe tanda tu na lao masa di ari na naeng ro do ho dohot akka malim na hundul di jolom. Ida ma! Boanokku ma naposokku+ na margoar Tunas!+ 9 Ida ma batu na hubahen di jolo ni si Josua! Adong do pitu mata di batu i. Huukir do surat di batu i. Jala hubolokkon do hasalaan ni luat i di bagasan sadari,’+ ninna Jahowa Pamimpin ni Akka Tentara i.
10 “‘Di ari i, sude ma hamu manogihon donganmuna hundul di toru ni hau anggur dohot di toru ni hau aramuna,’”+ ninna Jahowa Pamimpin ni Akka Tentara i.
4 Ro ma muse suru-suruan na makkatai tu au i jala didungoi ibana ma au dos songon na mandungoi halak na modom. 2 Didok ibana ma tu au, “Aha do na niidam?”
Jadi hudok ma, “Adong huida sada inganan ni lampu na sian mas,+ adong makkuk di ginjangna. Adong do muse pitu lampu di ginjang ni inganan ni lampu i+ jala adong pitu pipana. 3 Adong dua hau jetun+ di labbungna. Sada di sabola kanan ni makkuk i, jala na sada nai di sabola kirina.”
4 Dung i husukkun ma tu suru-suruan na makkatai tu au i, “Ale tuanku, aha do lapatan ni akka i?” 5 Didok suru-suruan i ma tu au, “Dang diboto ho lapatan ni i?”
Hudok ma, “Dang huboto tuan.”
6 Didok ibana ma tu au, “On ma na nidok ni Jahowa tu si Serubabel, ‘“Alani tondi parbadiakku do i masa,+ dang alani akka tentara manang alani gogo ni jolma,”+ ninna Jahowa Pamimpin ni Akka Tentara* i. 7 Tung ise ma ho ale dolok na timbo? Na lao gabe tano na dosdos+ do ho di jolo ni si Serubabel.+ Na lao boanonna ma batu parginjang jala dokkonon ni akka halak ma, “Bagak nai! Bagak nai!”’”
8 Didok Jahowa ma muse tu au, 9 “Si Serubabel do na mambahen fondasi ni jabu on,+ jala ibana do na lao pasaehon i.+ Dung i botoonmuna ma, Jahowa Pamimpin ni Akka Tentara i do na manuru au mandapotton hamu. 10 Unang ma leas rohamuna ala otik dope na diulahon di mulana i.+ Ai na lao marlas ni roha nama nasida. Jala idaon ni nasida ma si Serubabel maniop batu lot.* Taringot tu pitu lampu* i, i ma mata ni Jahowa na manatap saluhut tano on.”+
11 Dung i hudok ma muse, “Aha do lapatan ni dua hau jetun na di sabola kanan dohot na di sabola kiri ni inganan ni lampu i?”+ 12 Husukkun ma muse, “Aha do lapatan ni akka ratting* ni dua hau jetun na pakaluarhon miak mas sian dua pipa na sian mas i?”
13 Didok ibana ma, “Diboto ho do lapatan ni i?”
Hualusi ma, “Dang huboto tuan.”
14 Didok ibana ma, “On manggombarhon dua halak na dipillit* na jongjong di labbung ni Tuan ni saluhut tano on.”+
5 Dung i huida ma muse sada gulungan na habang. 2 Disukkun ibana ma tu au, “Aha do na niidam?”
Hudok ma, “Adong huida sada gulungan na habang, na ganjangna 20 asta* jala bidangna 10 asta.”
3 Didok ibana ma tu au, “On ma bura na lao masa tu saluhut tano on. Bura na tarsurat di gulungan i, i ma na lao masa tu akka panakko.+ Ai dang dihukum nasida. Jala bura na tarsurat di balik ni gulungan i, i ma na lao masa tu akka halak na marsumpa lao makkatahon gabus.+ Ai dang dihukum nasida. 4 ‘Nungnga huparo bura i. Na lao masuk ma i tu jabu ni akka panakko dohot tu jabu ni akka halak na mamakke goarhu tikki marsumpa lao makkatahon gabus. Maringanan ma i disi jala na lao habis ma bahenonna akka hau dohot akka batu na disi,’” ninna Jahowa Pamimpin ni Akka Tentara* i.
5 Dung i ro ma suru-suruan na makkatai i mandapotton au. Didok ibana ma, “Bereng, bereng ma jo an.”
6 Gabe husukkun ma, “Aha do i?”
Didok ibana ma, “Karanjang* do i.” Didok ibana ma muse, “Songon i ma rupa ni halak na jahat di saluhut tano on.” 7 Adong do tutup ni karanjang i na bulat na sian timah na birong. Dung i tarangkat ma tutup ni karanjang i jala huida ma adong sahalak boru-boru hundul di bagasan karanjang i. 8 Didok ibana ma muse, “Hajahaton do goar ni boru-boru i.” Dung i, dionjarhon ibana ma boru-boru i masuk tu bagasan karanjang i. Jala ditutuppon ma karanjang i.
9 Dung i huida ma tu ginjang, adong hubereng dua borua na habang manjonok tu au. Dos songon habong ni burung bangau* do habong ni nasida. Diangkat nasida ma karanjang i jala habang ma nasida. 10 Husukkun ma tu suru-suruan na makkatai tu au i, “Lao tudia do boanon ni nasida karanjang i?”
11 Dialusi ibana ma, “Tu luat Sinear.*+ Asa dibahen jabuna disi. Dung sae jabuna i, disi ma ibana tinggal. Ai ikkon disi do ibana.”
6 Dung i huida ma muse ro opat kareta porang sian holang-kolang ni dua dolok na sian tombaga. 2 Kareta porang na parjolo ditarik akka hoda na merah. Kareta porang na paduahon ditarik akka hoda na birong.+ 3 Kareta porang na patoluhon ditarik akka hoda na bottar. Jala kareta porang na paopatton ditarik akka hoda na marbintik-bintik dohot na marbolang-bolang.+
4 Husukkun ma tu suru-suruan na makkatai tu au, “Aha do lapatan ni i tuan?”
5 Dialusi suru-suruan i ma, “On manggombarhon opat punguan ni suru-suruan+ na sian surgo. Na baru ro do nasida sian jolo ni Tuan saluhut tano on.+ 6 Kareta porang na ditarik akka hoda na birong lao tu akka luat na di sabola utara.+ Na ditarik akka hoda na bottar lao tu akka luat na di sabola barat.* Jala na ditarik akka hoda na marbintik-bintik lao tu akka luat na di sabola selatan. 7 Lomo hian do roha ni kareta porang na ditarik akka hoda na marbolang-bolang i naeng makkaliangi saluhut tano on.” Alani i didok suru-suruan i ma, “Lao ma, kalilingi ma saluhut tano on.” Dung i lao ma nasida makkaliangi saluhut tano on.
8 Dijou ibana ma au jala didok ma, “Dang muruk be Jahowa tu pangisi ni luat na di sabola utara ala nungnga lao kareta porang i tusi.”
9 Didok Jahowa ma muse tu au, 10 “Pangido ma sian si Heldai, si Tobia, dohot si Jedaya akka barang na diboan nasida sian akka tawanan i. Jala ikkon lao do ho di ari i tu jabu ni si Josia anak ni si Sepania rap dohot akka halak na ro sian Babel i. 11 Ikkon buatonmu do perak dohot mas sian i, jala bahen ma sada mahkota. Dung i bahen ma i tu ulu ni Sintua Malim Josua+ anak ni si Jehosadak. 12 Jala dokkon ma tu ibana,
“‘On ma na nidok ni Jahowa Pamimpin ni Akka Tentara* i, “On ma halak na margoar Tunas.+ Na lao martunas ma ibana sian ingananna. Jala ibana ma na lao pajongjokkon bagas joro ni Jahowa.+ 13 Pajongjongonna ma bagas joro ni Jahowa, jala jaloonna ma hasangapon. Na lao hundul ma ibana di tahtana, jala mamaretta ma ibana gabe raja dohot malim.+ Dung i, diparo ibana ma hadameon. 14 Jala bahen ma mahkota i di bagas joro ni Jahowa asa gabe parningotan tu akka na niulahon ni si Helem, si Tobia, si Jedaya,+ dohot si Hen anak ni si Sepania. 15 Na lao ro ma akka halak sian luat na dao mangurupi pajongjokkon bagas joro ni Jahowa.” Dung i botoonmuna ma Jahowa Pamimpin ni Akka Tentara i do na manuru au. Molo ditangihon hamu sude hata ni Jahowa Debatamuna, na lao saut ma i sude.’”
7 Di ari na paopatton di bulan na pasiahon, i ma bulan Kislew* di taon na paopatton Raja Darius mamaretta, ro ma hata ni Jahowa tu si Sakaria.+ 2 Disuru penduduk ni Betel ma si Sareser dohot si Regem-melek dohot akka parkarejona mangido asi ni roha ni Jahowa. 3 Didok nasida ma tu akka malim ni jabu* ni Jahowa Pamimpin ni Akka Tentara* i dohot tu akka panurirang,* “Porlu do hami mangandungi jala marpuasa di bulan na palimahon+ songon naung hubahen hami saleleng martaon-taon?
4 Didok Jahowa Pamimpin ni Akka Tentara i ma muse tu au, 5 “Dokkon ma tu sude pangisi ni luat i dohot tu akka malim, ‘Tikki marpuasa jala mangandungi hamu di bulan na palimahon dohot di bulan na papituhon+ saleleng na 70 taon i,+ tutu do na tu Au hamu marpuasa? 6 Tu dirimuna sandiri do hamu mangulahon i, songon i nang molo mangan jala minum hamu. 7 Oloanmuna ma nian hata ni Jahowa na dipaboa marhite akka panurirang najolo.+ Tikki i marisi dope kota Jerusalem dohot akka kota na di sakalilingna, jala dame dope nasida. Marisi do muse Negeb dohot Syefela.’”
8 Didok Jahowa ma muse tu si Sakaria, 9 “Ai on do didok Jahowa Pamimpin ni Akka Tentara i, ‘Tigor ma bahen hamu tikki mangadili+ jala patuduhon hamu ma holong ni roha*+ dohot asi ni roha tu donganmuna. 10 Unang ma oto-otoi hamu ina na mabalu manang dakdanak na so marama,+ akka panoppang+ manang halak na pogos.+ Jala unang ma marsakkap hamu mambahen na jahat tu donganmuna.’+ 11 Alai dang olo nasida manangihon.+ Dipajogal nasida do rukkung ni nasida.+ Jala ditutup nasida do pinggol ni nasida asa unang ditangihon nasida i.+ 12 Dipajogal nasida do roha ni nasida.*+ Dang olo nasida manangihon patik* dohot hata ni Jahowa Pamimpin ni Akka Tentara i na pinaboana marhite akka panurirang na ditogu-togu tondi parbadiana.+ Alani i, gabe muruk situtu ma Jahowa Pamimpin ni Akka Tentara i.”+
13 “‘Tikki hujou nasida dang olo nasida manangihon.+ Alani i, dang tangihonokku nasida tikki jou-jou nasida,’+ ninna Jahowa Pamimpin ni Akka Tentara i. 14 ‘Parookku ma haba-haba lao mambahen nasida marserak tu sude bangso na so ditanda nasida,+ jala gabe tarulang ma luat i. Dang adong nanggo sahalak pe na olo mamolus sian i, manang na olo mulak tusi.+ Ai nungnga gabe mabiar be halak mangida luat i.’”
8 Didok Jahowa Pamimpin ni Akka Tentara* i ma muse, 2 “On ma na nidok ni Jahowa Pamimpin ni Akka Tentara i, ‘Nungnga hutottuhon na lao urupanku do Sion.+ Jala hupatudu do rimashu lao mangurupi ibana.’”
3 “On ma na nidok ni Jahowa, ‘Mulak ma Au tu Sion,+ jala maringanan ma Au di Jerusalem.+ Goaron ma Jerusalem i kota na setia.+ Jala goaron ma dolok ni Jahowa Pamimpin ni Akka Tentara i dolok na badia.’”+
4 “On ma na nidok ni Jahowa Pamimpin ni Akka Tentara i, ‘Na lao hundul ma akka na matua di tano lapang ni Jerusalem. Jala ditiop nasida be ma tukkotna ala nungnga matua.+ 5 Godang ma muse dakdanak na marmeami di tano lapang ni kota i.’”+
6 “On ma didok Jahowa Pamimpin ni Akka Tentara i, ‘Nang pe hira na so mungkin i masa di bangsokku na tinggal i dope, alai tarpatupa Au do i,’ ninna Jahowa Pamimpin ni Akka Tentara i.”
7 “On ma didok Jahowa Pamimpin ni Akka Tentara i, ‘Paluaokku ma bangsokku sian luat na di sabola timur dohot na di sabola barat.*+ 8 Dung i, boanokku ma nasida jala bahenokku ma nasida maringanan di Jerusalem.+ Gabe bangsokku ma nasida, jala Au ma na gabe Debata ni nasida+ na mambahen akka ulaon na sittong jala na tigor.’”
9 “On ma na nidok ni Jahowa Pamimpin ni Akka Tentara i, ‘Unang ma hamu mabiar.*+ Dibege hamu do saonari akka hata on sian akka panurirang,*+ songon naung binegemuna tikki dipeakkon fondasi ni jabu ni Jahowa Pamimpin ni Akka Tentara i, i ma tikki na lao dipadenggan bagas joro i. 10 Andorang so juppang tikki i, dang dapotan upa jolma na karejo. Jala binatang pe, maol do dapotan sipanganon.+ Alani akka musu, gabe dang boi be manang ise pe mardalani. Ai hubahen do nasida sude marmusu.’
11 “‘Alai saonari dang bahenokku be songon i tu akka halak na tinggal i dope,’+ ninna Jahowa Pamimpin ni Akka Tentara i. 12 ‘Ai suanon ni nasida ma boni na parohon hadameon. Marparbue ma hau anggur ni nasida. Jala bahenon ni tano i ma marparbue akka hau.+ Ro ma nambur sian langit. Jala lehonokku ma i sude gabe appuna ni akka halak na tinggal i dope.+ 13 Ale halak Juda dohot halak Israel, najolo dipakke akka bangso do goarmuna tikki mamburai.+ Alai na lao paluaokku do hamu. Jala na lao pakkeon ni nasida ma goarmuna tikki mamasu-masu.+ Unang ma mabiar!+ Barani ma hamu.’+
14 “Ai on do na didok Jahowa Pamimpin ni Akka Tentara i, ‘“Tikki muruk Au dibahen akka ompumuna, nungnga hutottuhon lao parohon jea tu hamu,” ninna Jahowa Pamimpin ni Akka Tentara i, “jala hupasaut do i.*+ 15 Saonari pe nungnga huttotuhon lao parohon akka na denggan tu Jerusalem dohot tu halak Juda.+ Unang ma hamu mabiar!”’+
16 “‘On ma na ikkon diulahon hamu: Hatahon hamu na sittong tu donganmuna,+ ikkon adil do hamu tikki mangadili di gerbang ni kotamuna. Jala ikkon diurupi hamu do akka donganmuna asa mardame.+ 17 Unang ma marsakkap hamu mambahen na jahat tu donganmuna.+ Jala unang ma margabus hamu tikki marsumpa.+ Ai sogo do rohakku tu akka sisongon i,’+ ninna Jahowa.”
18 Didok Jahowa Pamimpin ni Akka Tentara i ma muse tu au, 19 “On ma na nidok ni Jahowa Pamimpin ni Akka Tentara i, ‘Puasa di bulan na paopatton,+ palimahon,+ papituhon,+ dohot pasappuluhon,+ na lao parohon hasonangan dohot las ni roha ma i tu halak Juda. Gabe perayaan na mambahen las ni roha ma i.+ Alani i, haholongi ma na sittong jala ulahon ma akka ulaon na parohon hadameon.’
20 “On ma didok Jahowa Pamimpin ni Akka Tentara i, ‘Na lao ro ma tikkina marroan ma akka bangso dohot penduduk ni akka kota. 21 Dokkonon ni penduduk ni sada kota ma tu penduduk ni kota na asing, “Beta, lao ma hita mangido asi ni roha ni Jahowa jala talului ma Jahowa Pamimpin ni Akka Tentara i. Hami pe lao do.”+ 22 Marroan ma godang halak dohot akka bangso na gogo tu Jerusalem+ lao mangalului Jahowa Pamimpin ni Akka Tentara i, jala lao mangido asi ni roha ni Jahowa.’
23 “On ma didok Jahowa Pamimpin ni Akka Tentara i, ‘Di ari i, ro ma sappulu bawa na sian sude bahasa ni akka bangso.+ Gomos ma ditiop nasida jubah* ni sahalak Jahudi. Dokkonon ni nasida ma, “Dohot ma hami lao rap dohot ho.+ Ai nungnga hubege hami didongani Debata do bangsom.”’”+
9 On ma barita sian Debata,
“Didok Jahowa ma na lao hukumonna luat Hadrak,
Tarlumobi ma kota Damaskus.+
Ai ditatap Jahowa do saluhut jolma,+
Dohot sude halak Israel.
2 Hukumonna ma Hamat,+ i ma luat na di labbungna.
Jala hukumonna ma Tirus+ dohot Sidon,+ ai dirippu nasida do na marbisuk nasida.+
3 Dipajongjong Tirus do inganan na marbenteng.
Dipapungu ibana do godang perak dos songon godang ni orbuk,
Jala dipapungu ibana do godang mas dos songon godang ni tano na di dalan.+
4 Ida ma! Na lao buaton ni Jahowa ma artana.
Na lao disappatton* ma akka tentarana tu laut.+
Jala na lao tartutung ma ibana.+
5 Idaon ni Askelon ma i jala gabe mabiar ma ibana.
Gabe marsak ma Gasa,
Songon i nang Ekron, ai dang adong be na boi diharappon ibana.
Dang na lao adong be raja di Gasa,
Jala dang na lao adong be na mangingani Askelon.+
6 Akka panoppang nama na lao mangingani Asdod,
Jala patutoruokku ma Palistim asa unang ginjang be rohana.+
7 Apusokku ma mudar sian babana,
Bolokkonokku ma sipanganon na dihagigihon sian holang-kolang ni ngingina.
Jala na lao gabe appuna ni Debatanta ma akka halak na tinggal i.
Na lao gabe pamimpin ni marga Juda do ibana,+
Jala na lao gabe songon halak Jebus ma Ekron.+
8 Markemah ma Au lao manjaga jabukku,+
Asa unang adong na boi masuk manang kaluar sian i.
Jala asa unang adong akka halak na mambahen susa lewat sian i,+
Ai Au sandiri do na mangida na masa i.*
9 Ale boru Sion, marlas ni roha ma.
Ale boru ni Jerusalem, marsurak ma marlas ni roha.
Ida ma! Nungnga ro be rajam mandapotton ho.+
Diulahon ibana do na sittong, jala nungnga ditaluhon ibana akka musuna.*
Serep do rohana+ jala di ginjang ni halode do ibana hundul,
Di ginjang ni anak ni halode.+
10 Hancurhonokku ma akka kareta porang na sian Epraim.
Pamateonku ma akka hoda na sian Jerusalem.
Jala ponggolhonokku ma akka panah na dipakke marporang.
Paboaon ni rajami ma tu akka bangso na adong hadameon.+
Na lao mamaretta ma ibana sian laut tu laut.
Jala na lao mamaretta ma ibana mulai sian Sunge Euprat sahat tu ujung ni tano on.+
11 Ale Sion,* alani parjanjian na hubahen tu ho, na hot binahen ni mudar,
Kaluarhonokku ma akka anakmu na tarhurung sian sumur na koring.+
12 Ale akka halak na tarhurung na sai toktong paimahon, mulak ma hamu tu inganan na marbenteng.+
Sadari on hudok ma tu ho,
‘Ale Sion, gararokku ma tu ho dua hali loppit.+
13 Ai bahenokku ma Juda gabe panah di au.
Jala bahenokku ma Epraim gabe akka anak panah i.
Bahenokku ma akka anakmu, ale Sion
Mangalo akka anakmu, ale Junani.
Jala bahenokku ma ho gabe dos songon podang ni sahalak tentara.’
14 Patuduon ni Jahowa ma na didongani Ibana do bangsona,
Tembakkononna ma panahna dos songon sillam.
Ombuson ni Jahowa Tuan Natumimbul i ma tarompet na sian tanduk.+
Jala lao ma Ibana marporang mangalo akka musuna, dos songon haba-haba na sian selatan.
15 Marpihak ma Jahowa tu nasida,
Jala taluhonon ni nasida ma akka musu na mamakke ambalang.+
Minum ma nasida huhut marlas ni roha dos songon na manginum anggur.
Jala dos ma nasida songon makkuk na gok marisi anggur,
Dos songon mudar na diusehon di sudut ni mezbah.+
16 Di ari i paluaon ni Jahowa Debata ni nasida ma nasida,
Dos songon parmahan na paluahon biru-biruna.+
Ai na lao marhillong ma nasida di luatna, dos songon permata ni mahkota.+
17 Ai burju situtu do Ibana,+
Jala sangap situtu!
Lam gogo do doli-doli dohot anak boru alani sipanganon
Dohot anggur na baru.”+
10 Molo dung dapot tikkina ro musim udan na parpudi, pangido ma udan tu Jahowa.
Ai Jahowa do na mambahen ombun na golap,
Ibana do na mangalehon udan tu jolma.+
Jala Ibana do na mambahen tubu suan-suanan di ladang tu ganup jolma.
2 Alai anggo akka patung terapim* i, gabus do na dihatahon i.
Jala dang tutu parnidaan na niida ni akka datu.
Akka nipi na so marlapatan do na dipaboa nasida,
Jala dang adong gunana nasida mangapuli.
Alani i ma mampar-ampar bangso i dos songon biru-biru na lilu.
Susa ma nasida, ai dang adong parmahan ni nasida.
3 Muruk situtu ma Au tu akka parmahan i,
Jala hukumokku ma akka pamimpin na mambahen susa.*
Ai parrohahonon ni Jahowa Pamimpin ni Akka Tentara* i ma halak Juda biru-biruna i.+
Jala bahenonna ma nasida dos songon hoda na jago tikki di parporangan.
4 Ai na lao ro ma pamimpin* sian Juda,
Na lao ro ma sian nasida halak na boi mamaretta jala mangurupi.*
Na lao ro ma sian nasida panah na dipakke di parporangan.
Jala na lao ro ma sian nasida akka pengawas, ro sian nasida ma i sude.
5 Na lao gabe songon akka tentara ma nasida,
Na mandege-dege gambo di dalan tikki marporang.
Marporang ma nasida, ai didongani Jahowa do nasida.+
Jala na lao dipaila ma akka tentara ni musu na marhoda.+
6 Gabe jago ma bahenokku halak Juda,
Jala paluaokku ma pinoppar ni si Josep.+
Boanokku ma nasida mulak,
Ai asi do rohakku tu nasida.+
Bahenokku ma nasida songon na so hea hupalao.+
Ai Au do Jahowa Debata ni nasida, jala alusakku ma nasida.
7 Bahenokku ma halak Epraim gabe dos songon tentara na jago,
Jala marlas ni roha ma nasida dos songon halak na manginum anggur.+
Idaon ni akka anak ni nasida ma i jala marlas ni roha ma nasida.
Marlas ni roha ma nasida alani Jahowa.+
8 ‘Marsiul ma Au lao papunguhon nasida,
Ai tobusokku ma nasida+ jala lam godang ma nasida,
Jala torus ma nasida martamba-tamba.
9 Nang pe hea hubahen nasida marserak dos songon boni na marserak di tonga-tonga ni akka bangso,
Ingoton ni nasida do Au sian inganan na dao.
Bahenokku ma nasida dohot akka anak ni nasida dang margogo jala boanokku ma nasida mulak.
10 Boanokku ma nasida mulak sian Mesir,
Jala papunguokku ma nasida sian Asiria.+
Boanokku ma nasida tu Gilead+ dohot tu Libanon,
Jala dang siat be i gabe inganan ni nasida.+
11 Tikki dang boi nasida lewat alani laut,
Bolaokku ma galumbang ni laut i jala bolusokku ma i.+
Tikki dang boi nasida mardalan alani Sunge Nil, bahenokku ma aekna mahiang.
12 Au Jahowa, bahenokku ma naposokku lam margogo,+
Jala parohon sangap tu goarhu ma ngolu ni nasida,’+ ninna Jahowa.
11 “Ale Libanon, bukka ma akka pintum,
Asa boi api manutung akka hau aresmu.
2 Ale hau juniper, mangandungi ma ho, ai nungnga maruppak be akka hau ares.
Nungnga maruppak be akka hau na timbo!
Ale akka hau ek* na di Basan, mangandungi ma ho,
Ai nungnga maruppak be akka hau na di tombak!
3 Tangihon ma andung-andung ni akka parmahan,
Ai nungnga mago be hasangapon ni nasida.
Tangihon ma anak ni singa na marauang,
Ai nungnga habis be ramba bolak na di labbung ni Sunge Jordan.
4 “On ma na nidok ni Jahowa Debatakku, ‘Parmahani ma biru-biru na lao diseat.+ 5 Na lao diseat panuhor+ do akka biru-biru i jala dang sala ni nasida i. Dokkonon ni akka na manggadis i+ ma, “Sai dipuji ma Jahowa, ai na lao mamora do au.” Jala dang asi roha ni akka parmahan i tu biru-biru i,’+
6 Didok Jahowa ma, “‘Dang asi be rohakku tu penduduk ni luat i. Bahenokku ma sude halak susa dibahen akka donganna dohot rajana. Hancurhonon ni nasida ma luat i, jala dang adong manang ise pe na hupalua sian tangan ni nasida.’”
7 Dung i huparmahani ma punguan ni biru-biru na lao diseat i.+ Hubahen pe songon i, alani hamu do ale akka halak na susa na adong di punguan i. Dung i hubuat ma muse dua tukkot. Hugoari ma na sada Hasonangan, jala na sada nai Marsada.+ Jala huparmahani ma punguan ni biru-biru i. 8 Di bagasan sabulan, hupalao ma tolu parmahan. Ai dang sabar be Au tu nasida jala nasida pe nungnga magigi mangida Au. 9 Dung i hudok ma, “Dang huparmahani be hamu. Lok ma mate na naeng mate i. Lok ma mago na naeng mago i. Jala akka na tinggal i, lok ma masiallangan nasida.” 10 Dung i hubuat ma tukkottu na margoar Hasonangan+ jala huponggolhon ma i. Dang hupasaut be parjanjian na hubahen tu saluhut bangso i. 11 Huponggolhon do i di ari i, jala diida akka halak na susa na sian punguan i do i. Gabe diboto nasida ma, tanda na sian Jahowa do na hubahen i.
12 Dung i hudok ma tu nasida, “Molo denggan di rohamuna, lehon ma upakku. Alai molo dang, ba unang.” Jadi dilehon nasida ma upakku 30 logam perak.+
13 Didok Jahowa ma tu au, “Sappatton ma upakku na godang i tu inganan panimpanan ni arta, i ma upa na nilehon ni nasida tu Au.”+ Hubuat ma 30 logam perak i jala husappatton ma i tu inganan panimpanan ni arta na di jabu ni Jahowa.+
14 Dung i huponggolhon ma tukkottu na paduahon na margoar Marsada,+ asa marsirang Juda dohot Israel.+
15 Didok Jahowa ma tu au, “Buat ma perlengkapan ni parmahan na so marguna i.+ 16 Ai pillitokku ma sahalak parmahan di luat i. Dang luluanna biru-biru na mago,+ dang luluanna anak ni biru-biru, dang ubatanna akka na marsahit,+ jala dang dilean ibana mangan akka biru-biru na sehat. Gariada, diboddut ibana do akka biru-biru na mokmok,+ jala dicabut ibana do sisilon ni akka biru-biru i.+
17 Marjea ma ho akka parmahan na so marguna,+ na manadikkon punguan ni biru-biru!+
Na lao hona podang ma tanganna dohot matana na di sabola kanan.
Gabe lumpu ma tanganna i,
Jala gabe mapitung* ma matana na di sabola kanan i.”
12 On ma barita sian Debata:
“On ma na nidok ni Jahowa taringot halak Israel,” ninna Jahowa,
Na pahembangkon langit,+ na mambahen fondasi ni tano on,+
Jala na mangalehon hosa tu jolma asa mangolu.
2 “Bahenokku ma Jerusalem gabe dos songon makkuk na marisi anggur na mambahen mabuk akka bangso di sakalilingna, jala na lao dikepung ma Juda dohot Jerusalem.+ 3 Di ari i bahenokku ma Jerusalem gabe dos songon batu na borat* tu saluhut bangso. Gabe lukka do manang ise pe na naeng mangangkat i.+ Jala marpungu ma saluhut bangso na di tano on lao mangalo ibana.+ 4 Di ari i bahenokku ma mabiar akka hoda, jala gabe rittik ma bahenokku akka halak na makkunduli hoda i. Parrohahonokku ma halak Juda, alai bahenokku ma mapitung hoda ni akka bangso,” ninna Jahowa. 5 Dokkonon ni akka kepala suku ni halak Juda ma di bagasan rohana, ‘Penduduk ni Jerusalem do gogonami, ai Jahowa Pamimpin ni Akka Tentara* i do Debata ni nasida.’+ 6 Di ari i bahenokku ma akka kepala suku ni halak Juda gabe dos songon api di tonga-tonga ni hau, jala gabe dos songon api di tonga-tonga ni eme na dipapungu.+ Suda ma bahenon ni nasida akka bangso na di sakalilingna, na di sabola kananna dohot na di sabola kirina.+ Jala na lao maringanan ma muse halak Jerusalem di hutana, i ma di kota Jerusalem.+
7 “Paluaon ni Jahowa ma parjolo kemah ni Juda, asa unang gabe ussangap keluarga ni si Daud dohot penduduk ni Jerusalem sian Juda. 8 Di ari i gabe perisai ma Jahowa tu penduduk ni Jerusalem.+ Gabe dos songon si Daud ma akka halak na gale na adong di tonga-tonga ni nasida. Jala gabe dos songon Debata ma keluarga ni si Daud, dos songon suru-suruan ni Jahowa na mardalan di jolo ni nasida.+ 9 Jala di ari i pamateonku ma saluhut bangso na ro mangalo Jerusalem.+
10 “Usehonokku ma tondi parbadia tu keluarga ni si Daud dohot tu penduduk ni Jerusalem. Lomo ma rohakku tu nasida jala tangihonokku ma pangidoan ni nasida. Ditatap nasida ma halak na ditusuk+ nasida jala diandungi nasida ma ibana, dos songon halak na mangandungi anak sasada. Lungun ma roha ni nasida alani ibana, dos songon halak na marlungun ni roha ala mate anak siakkanganna. 11 Di ari i lam gogo ma soara ni halak na mangandungi di Jerusalem, dos songon soara ni akka halak na mangandungi di Hadad-rimmon na di Rura Megiddo.+ 12 Mangandungi ma luat i, pulik ma sasakeluarga mangandungi, pulik ma keluarga ni si Daud mangandungi, jala pulik ma punguan ni akka borua mangandungi. Jala songon i ma nang pinoppar ni si Natan,+ pulik ma nasida mangandungi, 13 songon i nang halak Lepi,+ halak Simei,+ dohot sude keluarga na tinggal i dope, 14 pulik ma na sasakeluarga mangandungi, jala pulik ma punguan ni akka borua mangandungi.
13 “Di ari i digali ma sumur lao paiasson dosa dohot akka na ramun* sian keluarga ni si Daud dohot penduduk ni Jerusalem.+
2 Didok Jahowa Pamimpin ni Akka Tentara* i ma, “Di ari i sesaokku ma goar ni akka patung na disomba akka halak na di luat i.+ Jala dang na lao ingoton ni jolma be nasida. Palaokku ma sian luat i akka panurirang na so sittong+ dohot akka halak na lomo rohana mangulahon akka ulaon na ramun. 3 Molo adong sahalak bawa na paboahon taringot ari na naeng ro hape dang sian Debata i, dokkonon ni omakna dohot bapakna ma tu ibana, ‘Na lao mate nama ho, ai dipakke ho do goar ni Jahowa lao makkatahon gabus.’ Dung i omakna dohot bapakna sandiri ma na manikkam ibana mamakke podang ala didok ibana na so tutu.+
4 “Di ari i gabe maila ma akka panurirang na so tutu tikki paboahon parnidaan na so tutu jala dang pakkeon ni nasida be abit panurirang na maribbulu+ na dipakke lao mangoto-otoi. 5 Dokkononna ma, ‘Dang panurirang au. Pangula do au, ai na dituhor do au tikki poso lao gabe hatoban ni halak.’ 6 Jala molo disukkun halak ibana, ‘Boasa adong lukka di dagingmu?’* Dokkononna ma, ‘Na lukka do au tikki di jabu ni donganku.’”*
7 “Ale podang, dungo ma ho mangalo parmahanku,+
Mangalo donganku,” ninna Jahowa Pamimpin ni Akka Tentara i.
8 Didok Jahowa ma muse, “Na lao dipamate ma dua partolu sian pangisi ni saluhut luat,
Jala dipasombu ma mangolu na sapartolu nai.
9 Ujiokku ma na sapartolu i jala bahenokku ma nasida ias,
Dos songon perak dohot mas na ditutung asa ias.+
Jouon ni nasida ma goarhu,
Jala alusakku ma nasida.
Dokkonokku ma, ‘Nasida ma bangsokku,’+
Jala dokkonon ni nasida ma, ‘Jahowa do Debatanami.’”
14 “Ida ma! Na lao ro ma ari ni Jahowa. Di tikki i dibagi-bagi ma di jolom akka barang na dibuat sian ho.* 2 Papunguokku ma sude bangso lao mamorangi Jerusalem. Ditaluhon ma kota i, dipambuati ma barang na sian akka jabu jala diperkosa ma akka borua. Diboan ma satonga penduduk ni kota i gabe tawanan, alai dang dipamate akka penduduk ni kota na tinggal i dope.
3 “Dung i lao ma Jahowa mamorangi akka bangso i,+ songon na binahenna di ari parporangan.+ 4 Di ari i jongjong ma Ibana di Dolok Jetun+ na di sabola timur ni Jerusalem. Gabe tarbola dua ma Dolok Jetun i mulai sian timur* sahat tu barat.* Satonga sian dolok i marhusor tu sabola utara, jala satonga nai marhusor tu sabola selatan. Alani i gabe adong ma rura na bidang. 5 Jadi lari ma hamu tu rura ni dolokki, ai bidang do rura ni dolokki sahat tu dalan na lao tu Asel. Ikkon lari do hamu tusi songon parlarimuna tikki masa gempa bumi, i ma tikki mamaretta Raja Usia di Juda.+ Dung i, ro ma Debata Jahowa rap dohot sude akka na badia.+
6 “Di ari i makkolom ma saluhutna jala dang adong na tiur.+ Gabe marpir* ma sude alani ngalina. 7 Ditanda ma ari i ari ni Jahowa.+ Dang adong imbar ni arian dohot borngin di tikki i. Ai tiur do ari tikki i nang pe borngin. 8 Di ari i marbullak-bullak ma aek hangoluan+ kaluar sian Jerusalem.+ Satonga lao tu laut na di sabola timur,*+ jala satonga nai lao tu laut na di sabola barat.*+ Masa ma i di tikki musim panas nang di tikki musim dingin. 9 Jala Jahowa ma na lao gabe Raja ni saluhut tano on.+ Di ari i holan Jahowa ma sombaon ni akka halak+ jala holan goarna ma pujion ni nasida.+
10 “Na lao gabe dos songon Araba+ ma saluhut luat mulai sian Geba+ sahat tu Rimmon+ na di sabola selatan ni Jerusalem. Sangap ma muse Jerusalem jala diingani+ mulai sian Gerbang Benjamin+ sahat tu Gerbang na Parjolo jala sahat ma muse tu Gerbang Sudut, dohot ma muse mulai sian Menara Hananel+ sahat tu inganan pamoroan ni anggur ni raja. 11 Dang na lao dihancurhon be Jerusalem.+ Na lao diingani jolma ma i jala dame ma ngolu ni akka halak na maringanan disi.+
12 “On ma sahit na lao bahenon ni Jahowa tu sude bangso na mangalo Jerusalem:+ Busuk ma daging ni nasida nang pe mangolu dope nasida, jala busuk ma mata dohot dila ni nasida.
13 “Di ari i bahenon ni Jahowa ma nasida gaor. Ganup ma nasida manakkup donganna jala gabe marbadai ma nasida sama* nasida.+ 14 Jala dohot ma muse Juda marporang di Jerusalem. Dipapungu ma arta ni sude bangso na di sakaliling ni nasida, dipapungu ma godang mas, perak, dohot pakkean.+
15 “Masa ma muse sahit na songon i tu akka hoda, tu akka halode na balga,* tu akka unta, tu akka halode, dohot tu sude binatang na dipiaro na adong di perkemahan ni musu.
16 “Ganup taon ro ma akka halak na mangolu dope na sian akka bangso na mangalo Jerusalem lao marsomba tu Raja i,+ i ma Jahowa Pamimpin ni Akka Tentara*+ i, jala dohot ma nasida mangarayahon Perayaan Pondok Daun.*+ 17 Alai molo adong keluarga di tonga-tonga ni tano on na so lao tu Jerusalem lao marsomba tu Raja i, i ma tu Jahowa Pamimpin ni Akka Tentara i, dang na lao ro udan tu nasida.+ 18 Molo adong keluarga ni halak Mesir na so ro jala na so masuk tu kota i, dang na lao ro udan tu nasida. Gariada paroon ni Jahowa ma sahit tu halak Mesir, songon na diparo Ibana tu akka bangso na so dohot mangarayahon Perayaan Pondok Daun. 19 On ma hukuman na lao masa tu halak Mesir dohot tu sude bangso na so mangarayahon Perayaan Pondok Daun.
20 “Di ari i na lao tarsurat ma di giring-giring ni akka hoda hata na mandok, ‘Badia do Jahowa!’+ Jala akka hudon+ na di jabu ni Jahowa, na lao gabe dos ma i songon akka makkuk+ na di jolo ni langgatan. 21 Jala sude hudon na adong di Jerusalem dohot di Juda, na lao gabe badia ma i jala lao gabe appuna ni Jahowa Pamimpin ni Akka Tentara i. Pakkeon ni akka halak na naeng mangalehon pelean ma akka hudon i lao mangarobus pelean ni nasida. Di ari i dang na lao adong be halak Kanaan* di jabu ni Jahowa Pamimpin ni Akka Tentara i.”+
Ida di Kamus.
Lapatanna, “Nungnga Diingot Jahowa”.
Manang “Sebaot”, lapatanna pamimpin ni akka suru-suruan na di banua ginjang.
Ida Lampiran B15.
As. “Ditarik ma tali pangukkur lao mangukkur Jerusalem”.
As. “tu opat alogo na sian langit”.
Manang “Sebaot”, lapatanna pamimpin ni akka suru-suruan na di banua ginjang.
As. “Setan”. Ida di Kamus.
Manang “jubah”.
Kain na dililitton tu ulu lao gabe topi.
Manang “Sebaot”, lapatanna pamimpin ni akka suru-suruan na di banua ginjang.
Manang “Sebaot”, lapatanna pamimpin ni akka suru-suruan na di banua ginjang.
Alat na dipakke lao mamboto tigor do manang na dang sada bangunan.
Manang boi do “pitu mata”.
Na didokna dison, i ma akka ratting na godang parbuena.
As. “dimiahi”. Ida di Kamus.
1 asta = 44,5 cm. Ida Lampiran B14.
Manang “Sebaot”, lapatanna pamimpin ni akka suru-suruan na di banua ginjang.
As. “Epa”. Karanjang na dipakke lao mangukkur sada epa. 1 epa = 22 liter. Ida Lampiran B14.
Manang “siborutasik”.
Na nidokna dison i ma Babel.
Manang “na di bariba ni laut”.
Manang “Sebaot”, lapatanna pamimpin ni akka suru-suruan na di banua ginjang.
Ida Lampiran B15.
Manang “bagas joro”.
Manang “Sebaot”, lapatanna pamimpin ni akka suru-suruan na di banua ginjang.
Ida di Kamus.
Manang “holong na manoktong”. Ida di Kamus.
Manang “Karas do roha ni nasida dos songon intan”.
Manang “tudu-tudu”.
Manang “Sebaot”, lapatanna pamimpin ni akka suru-suruan na di banua ginjang.
Manang “sian luat ni parbissar ni mataniari dohot sian luat parbonomna”.
Manang “Barani ma hamu”.
Ida di Kamus.
Manang “jala dang manolsoli Au”.
Manang “ujung ni abit”.
Manang boi do “Na lao ditaluhon”.
Olo do ra na nidokna dison hasusaan ni bangsona.
Manang “jala nungnga monang ibana; jala nungnga malua ibana”.
Manang boi do “Jerusalem”. As. “ho”.
Manang “patung na disomba sada keluarga”.
As. “na songon hambing”.
Manang “Sebaot”, lapatanna pamimpin ni akka suru-suruan na di banua ginjang.
As. “menara sudut”.
As. “patok”. On manggombarhon sasahalak na mangurupi.
As. “tukkot”.
Jenis ni hau na massai balga. Di bahasa Inggris digoari “hau ek”.
As. “rambonon”.
Manang “songon boban”.
Manang “Sebaot”, lapatanna pamimpin ni akka suru-suruan na di banua ginjang.
Ida di Kamus.
Manang “Sebaot”, lapatanna pamimpin ni akka suru-suruan na di banua ginjang.
As. “di holang-kolang ni tanganmu?” Na didokna dison, i ma di andora manang di tanggurung.
Manang “jabu ni halak na makkaholongi au”.
Na didokna dison, i ma akka barang na dibuat sian kota na dipaboa di ayat 2.
Manang “sian parbissar ni mataniari”.
As. “laut”.
Manang “Gabe dang boi bergerak”, alani ngalina.
Na didokna dison, i ma Laut Mati.
Na didokna dison, i ma Laut Mediterania.
Manang “gabe masiattukan ma”.
Di bahasa Heber, binatang on i ma hasil perkawinan ni halode jantan dohot hoda boru-boru.
Manang “Sebaot”, lapatanna pamimpin ni akka suru-suruan na di banua ginjang.
Ida di Kamus.
Manang boi do “partiga-tiga”.