MALEAKI

1 Barita sian Debata:

On ma didok Jahowa tu halak Israel marhite si Maleaki:*

2 “Nungnga hupatudu holong ni rohakku tu hamu,”+ ninna Jahowa.

Alai didok hamu do, “Songon dia ma dibahen Ho patuduhon holong ni roham tu hami?”

Didok Jahowa ma, “Nang pe si Esau abang ni si Jakkob,+ alai si Jakkob do na huhaholongi, 3 jala sogo do rohakku tu si Esau.+ Hubahen do akka dolokna tarulang+ jala hubahen do tano parbagiananna gabe gurun inganan ni anjing hutan.”+

4 Molo tung pe didok halak Edom, ‘Nang pe nungnga marserak hami, alai na lao mulak do hami muse, jala pajongjongonnami do muse kotanami na maruppak i.’ Alai dokkonon ni Jahowa Pamimpin ni Akka Tentara* i ma, ‘Nang pe dipajongjong nasida kota i, alai ruppakonokku do muse. Goarokku ma i “huta ni akka parjahat” jala goarokku ma nasida “bangso naung dihukum Jahowa saleleng ni lelengna”.+ 5 Idaonmuna ma i jala dokkononmuna ma, “Sai dipasangap ma Jahowa di saluhut luat ni halak Israel.”’”

6 “Au Jahowa Pamimpin ni Akka Tentara i, hudok ma tu akka malimmuna na mangaleai goarhu,+ ‘Dipasangap anakna do bapakna+ jala dipasangap hatobanna do tuanna. Jadi molo bapakmuna do Au,+ boasa dang dipasangap hamu Au?+ Jala molo tuanmuna do Au, boasa dang dihabiari hamu Au?’

“‘Alai didok hamu ma, “Songon dia haroa dibahen hami mangaleai goarmu?”’

7 “‘Dipelehon hamu do sipanganon* na ramun* di langgatanku.’

“‘Jala didok hamu do, “Songon dia haroa dibahen hami umbahen na gabe ramun hasangaponmu?”’

“‘Ai didok hamu do, “Dang pola ikkon sangap tabahen meja ni Jahowa i.”+ 8 Jala tikki dilehon hamu binatang na mapitung gabe peleanmuna, didok hamu do, “Dang pola boha i.” Tikki dilehon hamu binatang na pekkat manang na marsahit, didok hamu do muse, “Dang pola boha i.”’”+

“Coba ma jo lehon i tu gubernurmuna, las do rohana tu hamu manang olo do ibana manjalo i?” ninna Jahowa Pamimpin ni Akka Tentara i.

9 “Saonari, pangido ma tu Debata asa asi rohana tu hamu. Alai molo songon i do peleanmuna, lomo dope rohana tu hamu?” ninna Jahowa Pamimpin ni Akka Tentara i.

10 Didok Jahowa Pamimpin ni Akka Tentara i ma muse, “Ise ma sian hamu na olo manutup akka pintu?*+ Haru pagalakkon lampu di langgatanku pe dang olo hamu molo dang digaji.+ Dang lomo rohakku tu hamu jala dang lomo rohakku manjalo peleanmuna.”+

11 “Ai na lao dipasangap do goarhu di tonga-tonga ni akka bangso,+ mulai sian timur sahat tu barat. Tutungon ni nasida ma pelean di sude inganan asa nakkok timusna. Jala lehonon ni nasida ma pelean na badia lao pasangappon goarhu. Ai na lao dipasangap do goarhu di tonga-tonga ni akka bangso,”+ ninna Jahowa Pamimpin ni Akka Tentara i.

12 “Alai gabe ramun do i*+ dibahen hamu, ai didok hamu do, ‘Ramun do meja ni Jahowa, jala dang pola ikkon sangap tabahen pelean na adong disi.’+ 13 Didok hamu do muse, ‘Loja nai hita bahenon ni on!’ jala leas do rohamuna tusi,” ninna Jahowa Pamimpin ni Akka Tentara i. “Diboan hamu do binatang na ditakko, na pekkat, dohot na marsahit gabe peleanmuna! Hamu ma jo, ikkon jalookku do i?”+ ninna Jahowa.

14 “Marjea ma halak na licik, na mangalehon pelean na cacat* tu Jahowa tikki marsumpa, hape adong do binatang jantan na sehat na dipiaro ibana. Ai Raja na sangap do Au,+ jala na lao sangap do goarhu di tonga-tonga ni akka bangso,”+ ninna Jahowa Pamimpin ni Akka Tentara i.

2 “Saonari, on ma parettakku tu hamu ale akka malim.+ 2 Molo dang olo hamu manangihon jala dang dipasangap hamu goarhu sian nasa rohamuna, parookku ma jea tu hamu.+ Gattiokku ma pasu-pasu naung dijalo hamu gabe jea.+ Ido, bahenokku ma pasu-pasu i gabe jea. Ai dang olo hamu mamparrohahon parettakki,” ninna Jahowa Pamimpin ni Akka Tentara i.*

3 “Ida ma! Alani hamu, na lao hancurhonokku* ma boni na sinuanmuna+ jala sappattonokku ma kotoran tu bohimuna, i ma kotoran ni akka binatang na dipelehon hamu di akka perayaanmuna. Dung i disappatton ma hamu tusi.* 4 Jala botoonmuna ma Au do na mangalehon paretta on tu hamu asa toktong adong parjanjian na hubahen tu halak Lepi,”+ ninna Jahowa Pamimpin ni Akka Tentara i.

5 “Parjanjian na hubahen tu ibana mambahen ibana asa toktong mangolu jala mambahen dame ngoluna. Dung i dihabiari* ibana ma Au. Ido, dihabiari ibana ma Au jala dipasangap ibana ma goarhu. 6 Diajarhon ibana do tudu-tudu na sittong+ jala dang hea dihatahon ibana akka hata na jahat. Mardame do ibana tu Au, diulahon ibana do na sittong di jolokku,+ jala godang do halak na diurupi ibana asa muba. 7 Ai ikkon ajarhonon ni malim do parbinotoan taringot tu Debata tu akka halak jala ikkon tu ibana do akka halak mangalului tudu-tudu,*+ ai ibana do utusan ni Jahowa Pamimpin ni Akka Tentara i.

8 “Alai manimbil do ho sian dalan i. Alani ho gabe godang ma halak na so mangihutton* patik i.*+ Jala gabe sega do dibahen ho parjanjian na hubahen tu halak Lepi,”+ ninna Jahowa Pamimpin ni Akka Tentara i. 9 “Alani i patutoruokku jala bahenokku ma ho marlea di jolo ni sude halak, ai dang diihutton ho akka dalanku jala dang adil ho tikki mangadili.”+

10 “Sada do bapakta+ jala sada do Debata na manoppa hita. Jadi boasa ma taoto-otoi donganta,+ jala gabe ramun* tabahen parjanjian na dibahen akka omputta? 11 Licik do Juda jala dang dipasangap ibana Jahowa na makkaholongi akka na badia.* Diulahon do akka ulaon na dihagigihon Debata di Israel dohot di Jerusalem,+ jala mangoli do ibana tu akka borua na manomba* debata na asing.+ 12 Manang ise pe* sian kemah ni si Jakkob na mangulahon songon i, pamateon ni Jahowa do, nang pe dilehon ibana pelean tu Jahowa Pamimpin ni Akka Tentara i.”+

13 “Adong dope na asing* na diulahon hamu na mambahen langgatan ni Jahowa tartutup ilu-ilu jala tarbege do angguk-angguk dohot arsak ni roha sian langgatan i. Alani i dang olo be Ibana manjalo pelean na nilehonmuna jala dang lomo be rohana tu peleanmuna i.+ 14 Didok hamu ma, ‘Boasa songon i?’ Ai Jahowa do na gabe saksi di tonga-tongamuna, ho dohot istrim na niolim di haposoonmu. Ai dang setia ho tu ibana, hape ibana do donganmu jala nungnga marjanji ho lao setia tu ibana saleleng ni ngolum.*+ 15 Alai adong do deba sian hamu na so mangulahon songon i, ala ditogu-togu tondi parbadia ni Debata nasida. Boasa dibahen nasida songon i? Asa tutu gabe bangso ni Debata pinoppar ni nasida. Alani i jaga ma roha dohot pikkiranmuna jala setia ma hamu tu istri na niolimuna tikki poso hamu. 16 Ai sogo do rohakku* tu parsirangan,”+ ninna Jahowa Debata ni Israel, “jala sogo do rohakku tu halak na mangulahon na jahat. Alani i jaga ma roha dohot pikkiranmuna jala setia ma hamu,”+ ninna Jahowa Pamimpin ni Akka Tentara i.

17 “Loja do Jahowa pabege-bege hatamuna.+ Alai didok hamu do, ‘Songon dia haroa dibahen hami umbahen na loja Debata pabege-bege hatanami?’ Ai didok hamu do, ‘Denggan jala lomo do roha ni Jahowa mangida manang ise na mangulahon na jahat.’+ Jala didok hamu do muse, ‘Didia haroa Debata na adil i?’”

3 “Suruokku ma utusanku paiasson* dalan di jolokku.+ Dung i toppu ma ro Tuan na sittong i tu bagas jorona,+ i ma na niluluanmuna. Jala na lao ro ma utusan parjanjian, i ma na dipaima-ima hamu. Ida ma! Pasti do ro ibana,” ninna Jahowa Pamimpin ni Akka Tentara i.*

2 “Alai ise ma na boi martahan di ari harorona i, jala ise ma na boi jongjong tikki ro ibana? Ai dos do ibana songon api na paiasson logam, jala dos do ibana songon sabun+ ni sahalak panussi. 3 Dos songon halak na hundul lao manutung jala paiasson perak,+ songon i ma ibana paiasson halak Lepi, dos songon na paiasson mas dohot perak. Dung i tama ma nasida gabe naposo ni Jahowa na mangalehon pelean di jolona. 4 Pasti ma las roha ni Jahowa tu pelean ni halak Juda dohot halak Jerusalem songon di tikki naung salpu.+

5 “Na lao ro do Au mangadili hamu jala hatop do Au manghukum akka datu,+ akka pangalakkup, akka halak na margabus tikki marsumpa,+ akka halak na mangoto-otoi akka parkarejo,+ na mangoto-otoi akka ina na mabalu, na mangoto-otoi akka anak na so marama,+ dohot halak na so olo mangurupi akka panoppang.+ Ai dang dihabiari nasida Au,” ninna Jahowa Pamimpin ni Akka Tentara i.

6 “Ai Jahowa do Au, jala dang hea Au muba.+ Akka anak ni si Jakkob do hamu, alani i ma dang dipamate dope hamu. 7 Ai nungnga manimbil hamu sian akka aturanku, jala dang diihutton hamu i mulai sian tikki ni akka ompumuna.+ Alani i mulak ma hamu tu Au, asa mulak Au tu hamu,”+ ninna Jahowa Pamimpin ni Akka Tentara i.

Alai didok hamu ma, “Boasa ikkon mulak hami tu Ho?”

8 “Dang tarbahen ni jolma mangarampok Debata, alai dirampok hamu do Au.”

Dung i didok hamu ma, “Songon dia haroa dibahen hami mangarampok Ho?”

“Dang dilehon hamu pelean na saparsappulu i dohot sumbanganmuna. 9 Ikkon marjea do hamu,* ai dirampok hamu do Au, jala sude do bangso i mambahen songon i. 10 Boan ma sude pelean na saparsappulu i tu bagas joro,*+ asa adong sipanganon di jabukku.+ Dung i uji hamu ma Au, jala ida ma atik na bukkaokku do manang na dang akka pintu ni aek na di langit+ lao mangusehon pasu-pasu tu hamu sappe so adong be na hurangan,”+ ninna Jahowa Pamimpin ni Akka Tentara i.

11 “Dang pasombuonku suan-suananmuna diallang sihapor,* dang pasombuonku sega parbue ni hau di ladangmuna, jala bahenokku ma marparbue hau anggurmuna,”+ ninna Jahowa Pamimpin ni Akka Tentara i.

12 “Sude ma bangso mandok hamu marlas ni roha,+ ai luat na palashon roha do ingananmuna,” ninna Jahowa Pamimpin ni Akka Tentara i.

13 “Dang hasea hatamuna taringot tu Au,” ninna Jahowa.

Alai didok hamu ma, “Aha haroa didok hami taringot tu Ho?”+

14 “Didok hamu do, ‘Dang adong gunana tasomba Debata,+ aha ma gunana toktong taoloi parettana jala manolsoli hita di jolo ni Jahowa Pamimpin ni Akka Tentara i? 15 Didok rohanami halak na mambahen lomo-lomona do na marlas ni roha. Jala akka parjahat do na marhasil.+ Ai barani do nasida mangalo Debata jala dang agia mahua nasida.’”

16 Di tikki i, makkatai ma akka halak na makkabiari Jahowa, na sada tu donganna. Ditangihon jala diparrohahon Jahowa do akka na didok nasida. Dung i disuratton ma di jolo ni Jahowa bukku lao mangingot+ akka halak na makkabiari Ibana dohot akka halak na mamikkiri* goarna.+

17 Didok Jahowa Pamimpin ni Akka Tentara i ma, “Gabe appunakku ma nasida.+ Jala di ari i, gabe bangso na massai arga ma nasida di Au.+ Patuduhonokku ma asi ni roha tu nasida, songon sahalak ama na patuduhon asi ni roha tu anakna na mangoloi hatana.+ 18 Jala idaonmuna ma imbar ni halak na mangulahon na sittong dohot halak na mangulahon na jahat,+ imbar ni halak na manomba Debata dohot halak na so manomba Ibana.”

4 “Ida ma! Na lao ro ma arina. Dos do i songon api na marnala-nala di bagasan tungku,+ jala gabe dos songon durame ma sude halak na mangulahon lomo-lomona dohot sude parjahat. Didok Jahowa Pamimpin ni Akka Tentara* i ma, “Di ari na naeng ro i, na lao hancur ma nasida jala dang adong be urat manang dakka ni nasida na tinggal.” 2 Alai anggo halak na pasangappon* goarhu, na lao marsinondang ma tu hamu mataniari na mamboan akka na sittong jala boi do sinondangna* i pamaluppon hamu. Na lao marinjaki ma hamu dos songon anak ni lombu na mokmok.”

3 “Di ari na hutottuhon i, dege-degeonmuna ma parjahat, ai gabe dos ma nasida songon orbuk di talapak ni patmuna,” ninna Jahowa Pamimpin ni Akka Tentara i.

4 “Ingot ma Patik na hulehon tu si Musa naposokki tikki di Horeb, i ma aturan dohot hukum na ikkon dioloi saluhut halak Israel.+

5 “Ida ma! Suruokku ma tu hamu Panurirang* Elia+ andorang so ro dope ari ni Jahowa na balga i jala na palongang roha i.+ 6 Jala bahenokku ma muba roha ni akka ama gabe songon roha ni akka anak.+ Jala muba ma roha ni akka anak gabe songon roha ni akka ama, asa unang ro Au manghukum tano on jala mambahen i hancur.”

(On ma ujung ni Akka Bukku Heber-Aram, jala dilanjutton ma tu Akka Bukku Junani Kristen)