NA SINURAT NI SI JOHANNES

1 Sian mulana nungnga adong Hata i.+ Rap do Hata i dohot Debata+ jala debata*+ do Hata i. 2 Sian mulana, rap do ibana dohot Debata. 3 Marhite ibana do dibahen saluhutna+ jala dang adong dibahen manang aha na so marhite ibana.

4 Marhite ibana do adong hangoluan jala hangoluan i do panondang ni jolma.+ 5 Marsinondang do panondang i di na holom,+ alai dang boi ditaluhon na holom i panondang i.

6 Disuru Debata do sahalak bawa gabe wakilna, goarna si Johannes.+ 7 Ro do ibana lao paboahon* tu akka jolma taringot tu panondang i,+ asa porsea sude halak marhite ibana. 8 Dang ibana panondang i,+ alai lao paboahon taringot tu panondang i do umbahen na ro ibana.

9 Ai na ro ma panondang na tutu i tu portibi on na manondangi sude jolma.+ 10 Hea do ibana di portibi on+ jala marhite ibana do adong portibi on,+ alai dang ditanda portibi on ibana. 11 Ro do ibana tu hutana sandiri, alai dang dijalo bangsona i ibana. 12 Alai tu sude halak na manjalo ibana, dilehon ibana do hak tu nasida asa gabe akka anak ni Debata.+ Ai porsea do nasida tu goarna.+ 13 Dang sian jolma* nasida tubu, manang sian lomo ni roha ni jolma,* manang sian lomo ni roha ni sahalak bawa, alai sian Debata do.+

14 Gabe jolma ma Hata i+ jala maringanan di tonga-tongatta. Nungnga taida hasangaponna, i ma hasangapon songon na dijalo anak sasada+ sian amana. Gok do asi ni roha ni Debata na massai balga i di ibana jala diajarhon ibana do hasittongan. 15 (Jou-jou do si Johannes paboahon taringot tu ibana, ninna ma, “On do halak na hutaringoti i tikki hudok, ‘Umbalga do sian au halak na ro di pudikku, ai nungnga adong ibana andorang so adong dope au.’”)+ 16 Sude do hita manjalo asi ni roha na massai balga sian ibana, ai gok do asi ni roha na massai balga i di ibana. 17 Marhite si Musa do dilehon Patik,+ alai marhite Jesus Kristus do ro hasittongan+ dohot asi ni roha na massai balga.+ 18 Dang adong jolma na hea mangida Debata+ asing ni anak na sasada i+ na songon debata, na di labbung ni Ama i.*+ Ibana do na patorakkon taringot tu Debata.+

19 Disuru halak Jahudi ma akka malim dohot halak Lepi sian Jerusalem mandapotton si Johannes. Disukkun nasida ma tu si Johannes, “Ai ise do ho?”+ 20 Dialusi ibana ma sukkun-sukkun i jala takkas ma didok, “Dang au Kristus i.” 21 Disukkun nasida ma, “Attong ise do ho? Si Elia+ do ho?” Dialusi ibana ma, “Daong.” Disukkun nasida ma muse, “Panurirang*+ na naeng ro i do ho?” Didok ibana ma, “Daong!” 22 Dung i disukkun nasida ma ibana, “Molo songon i, ise do ho? Paboa ma jo, asa boi hualusi hami halak na manuru hami. Paboa ma ise do ho sasittongna.” 23 Dialusi si Johannes ma, “Au do halak na jou-jou di padang gurun i na mandok, ‘Parade hamu ma dalan ni Jahowa,’*+ songon na nidok ni Panurirang Jesaya.”+ 24 Halak Parise do na manuru akka malim dohot halak Lepi i. 25 Dung i disukkun nasida ma ibana, ninna ma, “Attong molo dang Kristus i ho, manang si Elia, manang Panurirang na naeng ro i, boasa ma didionmu halak?” 26 Dialusi si Johannes ma, “Anggo au aek do hudidihon tu hamu. Alai, adong do jongjong di tonga-tongamuna halak na so ditanda hamu, 27 na ro di pudikku. Gari mambukka tali ni sipatuna pe dang tama au.”+ 28 Di Betania na di bariba ni Sunge Jordan do i sude masa. Ai disi do inganan ni si Johannes mandidi akka halak.+

29 Marsogotna i, diida si Johannes ma Jesus ro mandapotton ibana. Didok si Johannes ma, “Ida ma, ibana do Anak ni Biru-Biru+ ni Debata na manesa dosa+ ni portibi on!+ 30 Ibana do halak na hutaringoti i tikki hudok, ‘Umbalga do sian au halak na ro di pudikku, ai nungnga adong ibana andorang so adong dope au.’+ 31 Au pe dang hutanda hian ibana. Alai, alani ibana do umbahen na ro au mandidi akka halak mamakke aek, asa diboto halak Israel ise ibana.”+ 32 Dipaboa si Johannes ma muse, “Huida do tondi parbadia turun sian langit na songon darapati jala songgop do tondi parbadia i tu atasna.+ 33 Au pe dang hutanda hian ibana. Alai Debata na marsuru au asa mandidihon dohot aek, mandok tu au, ‘Molo diida ho turun tondi parbadia jala songgop tu atas ni sasahalak,+ ibana ma na lao mandidihon dohot tondi parbadia.’+ 34 Nungnga huida i masa jala nungnga hupaboa* na Anak ni Debata do ibana.”+

35 Marsogotna i, jongjong do muse si Johannes rap dohot dua siseanna. 36 Tikki diida ibana Jesus mardalan, ninna ma, “Ida ma, ibana do Anak ni Biru-Biru+ ni Debata!” 37 Dung dibege sisean na dua i hatana i, diihutton nasida ma Jesus. 38 Dung i diida Jesus ma doppak nasida, gabe diboto ma na diihutton nasida ibana. Didok ibana ma, “Aha do dilului hamu?” Dialusi nasida ma ibana, “Ale Rabbi (lapatanna, “Guru”), didia do ho maringanan?” 39 Didok ibana ma tu nasida, “Beta ma asa diboto hamu.” Hira-hira jam opat botari* ma tikki i. Gabe diihutton nasida ma ibana, diida nasida ma ingananna jala rap ma nasida sadari i. 40 Si Andreas+ dongan saama ni si Simon Petrus ma sahalak sian na mambege hata ni si Johannes i. Jala diihutton ibana do Jesus. 41 Parjolo ma dijuppangi ibana si Simon donganna saama. Ninna ma, “Nungnga juppangnami Messias i”+ (lapatanna “Kristus”). 42 Dung i diboan ibana ma si Simon tu Jesus. Tikki diida Jesus si Simon, ninna ma, “Si Simon+ do ho anak ni si Johannes, alai na lao digoari ma ho si Kepas” (di bahasa Junani lapatanna “Petrus”).*+

43 Marsogotna i, naeng lao ma Jesus tu Galilea. Pajuppang ma ibana dohot si Pilippus+ jala ninna ma tu ibana, “Ihutton ma au.” 44 Sian Betsaida do si Pilippus, i ma huta ni si Andreas dohot si Petrus. 45 Pajuppang ma si Pilippus dohot si Natanael+ jala ninna ma, “Nungnga juppangnami halak na pinaboa ni Patik ni si Musa dohot na Sinurat ni Akka Panurirang i. Jesus anak ni si Josep+ na sian Nasaret i do ibana.” 46 Alai ninna si Natanael ma tu ibana, “Tarbahen ma na denggan ro sian Nasaret?” Didok si Pilippus ma tu ibana, “Beta ma asa diida ho.” 47 Tikki diida Jesus ro si Natanael mandapotton ibana, didok Jesus ma, “Ida ma, ibana do halak Israel na tutu jala dang adong gabus di ibana.”+ 48 Didok si Natanael ma tu Jesus, “Sian dia ditanda ho au?” Dialusi Jesus ma, “Nungnga huida ho di toru ni hau ara i, andorang so dijou si Pilippus dope ho.” 49 Ninna si Natanael ma, “Ale Guru,* ho do Anak ni Debata. Ho do Raja ni Israel.”+ 50 Ninna Jesus ma, “Ala na hudok i do, huida ho di toru ni hau ara i umbahen na porsea ho? Idaonmu dope muse akka na umbalga sian on.” 51 Didok Jesus ma muse, “Tutu do na hudok on tu hamu, idaonmuna ma bukka langit jala idaonmuna ma naik turun suru-suruan mandapotton Anak ni jolma i.”+

2 Dung dua ari, adong ma pesta parbogason di Kana na di Galilea jala disi do tikki i omak ni Jesus. 2 Digokkon do Jesus dohot akka siseanna tu pesta i.

3 Tikki naeng habis anggur, didok omak ni Jesus ma tu ibana, “Dang adong be anggur ni nasida.” 4 Alai ninna Jesus ma, “Dang hita na mamikkirhon i, inang. Ai dang juppang dope tikkikku.” 5 Didok omak ni Jesus ma tu akka parhobas, “Manang aha pe didok ibana tu hamu, bahen hamu ma songon i.” 6 Adong do disi onom gucci na sian batu. Dipakke do i gabe inganan ni aek tu ulaon paiasson diri mangihutton hasomalan ni halak Jahudi.+ Siat do hira-hira 44 sahat tu 66 liter aek* di ganup gucci. 7 Didok Jesus ma tu nasida, “Isi hamu ma aek tu akka gucci i.” Dung i diisi nasida ma akka gucci i sappe gok. 8 Didok Jesus ma muse tu nasida, “Buat ma saotik isi ni gucci i, jala lehon ma tu ketua ni parhobas.” Dung i diboan nasida ma i. 9 Didai ketua ni parhobas ma aek naung muba gabe anggur i. Alai dang diboto ibana sian dia dibuat anggur i, holan akka parhobas na manahui aek i do na mamboto. Dung i dijou ibana ma pangoli i 10 jala ninna ma, “Biasana anggur na dumenggan do na parjolo dilehon. Alai dung mabuk akka tamu i, dilehon ma anggur na hurang tabo daina. Hape anggo ho, disippan ho dope anggur na dumenggan sahat tu saonari.” 11 Di Kana na di Galilea ma parjolo sahali dibahen Jesus tanda halongangan.* Gabe tarida ma hasangaponna i+ jala gabe porsea ma akka sisean i tu ibana.

12 Dung salpu i, lao ma ibana tu Kapernaum+ rap dohot omakna, akka anggina,+ dohot akka siseanna. Alai holan piga-piga ari do nasida disi.

13 Dung jonok perayaan Paska+ ni halak Jahudi, borhat ma Jesus tu Jerusalem. 14 Diida ibana ma di bagas joro i akka partiga-tiga lombu, biru-biru, dohot darapati.+ Hundul do disi akka situkkar hepeng. 15 Dibahen ibana ma cambuk sian tali. Dung i, dipalao ibana ma akka partiga-tiga, biru-biru, dohot akka lombu ni nasida sian bagas joro i. Dipasserakkon ma hepeng logam ni situkkar hepeng jala ditunggalikkon ma akka meja ni nasida.+ 16 Didok ibana ma tu partiga-tiga darapati, “Boan hamu ma i sude sian on! Unang bahen hamu jabu ni Damang gabe inganan partiga-tigaan!”*+ 17 Gabe diingot akka siseanna i ma hata ni na tarsurat i, “Holong ni rohakku tu jabumi dos songon api na marsigorgor.”+

18 Alani i, didok akka halak Jahudi ma tu ibana, “Patudu ma jo tu hami tanda halongangan+ na patuduhon marhak ho mambahen songon i.” 19 Didok Jesus ma tu nasida, “Ruppakkon hamu ma bagas joro on, jala pajongjongokku ma i di bagasan tolu ari.”+ 20 Dung i didok akka halak Jahudi i ma, “Boi ma pajongjongonmu bagas joro i di bagasan tolu ari? Ai 46 taon lelengna dibangun bagas joro on.” 21 Alai sasittongna, bagas joro na nidok ni Jesus i, i ma dagingna.+ 22 Alani i, dung dipahehe ibana sian na mate, gabe diingot akka siseanna i ma na jotjot didok ibana songon i.+ Gabe porsea ma nasida tu na tarsurat i dohot tu akka hata ni Jesus.

23 Tikki di Jerusalem Jesus mangarayahon Paska, godang do halak na porsea tu ibana* dung diida nasida akka tanda halongangan na binahenna. 24 Alai dang pos roha ni Jesus tu nasida, ai ditanda ibana do nasida sude. 25 Jala dang pola porlu dipatorang tu ibana manang aha taringot tu jolma, ai diboto ibana do na di bagasan roha ni jolma.+

3 Adong ma sahalak Parise na margoar si Nikodemus.+ Ibana sahalak pamimpin ni halak Jahudi. 2 Ro ma ibana borngin-borngin+ mandapotton Jesus jala ninna ma tu ibana, “Guru,+ huboto hami do ho guru na sinuru ni Debata. Ai dang adong na boi mambahen tanda halongangan*+ songon na binahenmi molo so didongani Debata ibana.”+ 3 Dialusi Jesus ma ibana, “Tutu do na hudok on tu ho, dang adong na boi mangida Harajaon ni Debata+ anggo so ditubuhon ibana muse.”*+ 4 Disukkun si Nikodemus ma ibana, “Songon dia ma boi halak naung magodang ditubuhon muse? Songon dia ma ibana boi masuk tu bortian* ni omakna asa ditubuhon muse?” 5 Dialusi Jesus ma, “Tutu do na hudok on tu ho, dang adong na boi masuk tu Harajaon ni Debata, anggo so ditubuhon sian aek+ dohot sian tondi parbadia.+ 6 Na tubu sian jolma, i ma anak ni jolma, jala na tubu sian tondi parbadia, i ma anak ni Debata. 7 Unang ma longang roham ala hudok tu ho ikkon ditubuhon do hamu muse. 8 Mangullus do alogo manang tudia lomo ni rohana. Dibege ho do soarana alai dang diboto ho sian dia i ro jala tudia i lao. Songon i ma ganup halak na tubu sian tondi parbadia.”+

9 Disukkun si Nikodemus ma muse tu Jesus, “Songon dia ma parjadi ni i?” 10 Dialusi Jesus ma, “Ai dang guru ni halak Israel ho? Boasa dang diboto ho i? 11 Tutu do na hudok on tu ho, na huboto hami do na huhatahon hami jala na huida hami do na hupaboa hami. Alai dang dijalo hamu na hupaboa hami i. 12 Gari akka na di tano on hupaboa tu hamu dang dihaporseai hamu, songon dia ma hamu boi porsea molo hupaboa taringot tu akka na di banua ginjang? 13 Asing ni i, dang adong jolma na hea nakkok tu banua ginjang,+ ia so holan Anak ni jolma naung turun sian banua ginjang i.+ 14 Songon si Musa na manggattukkon ulok tu sada tiang tikki di padang gurun,+ Anak ni jolma i pe ikkon digattung* do,+ 15 asa ganup halak na porsea tu ibana mandapot hangoluan na saleleng ni lelengna.+

16 “Ai songon on do balga ni holong ni roha ni Debata tu portibi on, pola do Anakna na sasada i+ dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.+ 17 Ai dang disuru Debata Anakna tu portibi on lao manguhumi portibi on, alai asa malua do portibi on marhite ibana.+ 18 Manang ise na patuduhon haporseaon tu ibana dang na lao diuhumi.+ Alai manang ise na so patuduhon haporseaon nungnga diuhumi ibana, ai dang dipatuduhon ibana haporseaon tu Anak ni Debata na sasada i.+ 19 Alani on do nasida diuhumi: nungnga ro panondang i tu portibi on,+ alai na holom i do dihaholongi jolma dang na tiur i, ai akka na jahat do diulahon nasida. 20 Manang ise na mangulahon na jahat dihasogohon i do na tiur, jala dang ro i tu na tiur asa unang tarida* pambahenanna i. 21 Alai manang ise na mangulahon na sittong, ro do i tu na tiur+ asa tarida pambahenanna i hombar tu lomo ni roha ni Debata.”

22 Dung salpu i, lao ma Jesus dohot akka siseanna tu akka huta na di Judea. Disi ma ibana tinggal rap dohot nasida jala godang ma halak na tardidi dibahen ibana.+ 23 Si Johannes pe mandidihon do di Enon na jonok tu Salem, ai disi do godang aek.+ Sai marroan do akka halak jala dididi ma nasida.+ 24 Di tikki i dang dipenjarahon+ dope si Johannes.

25 Marsoal ma akka sisean ni si Johannes dohot sahalak Jahudi taringot tu ulaon paiasson diri. 26 Dung i didapotton nasida ma si Johannes jala ninna ma, “Guru, ditanda ho do kan bawa na rap dohot ho di bariba ni Sunge Jordan i? Dipaboa ho do tikki i taringot ibana.+ Saonari, dididi ibana do akka halak jala sude do halak ro mandapotton ibana.” 27 Didok si Johannes ma, “Dang adong na boi diulahon sasahalak molo dang dilehon Debata huaso tu ibana. 28 Ai nungnga dibege hamu tikki hudok, ‘Dang au Kristus i,+ alai parjolo do au disuru Debata sian ibana.’+ 29 Pangoli i do nappuna pengantin borua i.+ Alai dongan ni pangoli i, na jongjong di labbungna jala na manangihon ibana, massai las do rohana mambege soara ni pangoli i. Alani i, nungnga gok be saonari las ni rohakki. 30 Lam tu godangna ma ulaonna, alai lam otik nama ulaonku.”

31 Na ro sian ginjang i+ do na umbalga sian sasude. Alai na sian tano on, taringot tu na di tano on do hatahononna, ai sian tano on do ibana. Alani i, umbalga do na ro sian banua ginjang i sian sasude.+ 32 Taringot tu na niidana dohot na binegena do na pinaboana,+ alai dang adong nanggo sahalak pe na porsea tu na pinaboana i.+ 33 Manang ise na porsea tu na pinaboana i, na porsea situtu* do ibana na sittong Debata.+ 34 Hata ni Debata do na dihatahon na sinuru ni Debata.+ Ai dang holit Debata mangalehon tondi parbadiana. 35 Dihaholongi Ama i do Anak i+ jala dilehon do tu ibana huaso lao mangarajai sudena.+ 36 Manang ise na patuduhon haporseaon tu Anak i, dapotna do hangoluan na saleleng ni lelengna.+ Manang ise na so mangoloi Anak i, dang dapotna hangoluan+ alai toktong ma marrimas Debata tu ibana.+

4 Dibege halak Parise ma na unggodang sisean ni Jesus* jala na unggodang dibahen ibana tardidi+ sian na dibahen si Johannes. Dung dibege Jesus na masa i, 2 (sasittongna dang Jesus na mandidihon alai akka siseanna do) 3 ditadikkon ibana ma Judea jala lao tu Galilea. 4 Alai ikkon dilewati ibana do Samaria. 5 Sahat ma ibana tu kota Sikar na di Samaria, na jonok tu tano na nilehon ni si Jakkob tu anakna si Josep.+ 6 Adong do disi sumur ni si Jakkob.+ Alani i, tikki loja dihilala Jesus sian pardalananna, hundul ma ibana di topi ni sumur i. Hira-hira jam 12 arian* ma tikki i.

7 Dung i ro ma sahalak borua Samaria mangalap aek. Didok Jesus ma tu ibana, “Lehon jo aek i inumokku.” 8 (Tikki i, lao do akka siseanna manuhor sipanganon tu kota.) 9 Didok borua Samaria i ma tu ibana, “Ai halak Jahudi do ho, jala au halak Samaria, boasa ma pangidoonmu aek sian au?” (Ai dang marsipakkulingan halak Jahudi dohot halak Samaria.)+ 10 Didok Jesus ma tu borua i, “Autsugari diboto ho silehon-lehon ni Debata,+ jala aut ditanda ho na mangido aek siinumon sian ho, pangidoonmu do aek sian ibana jala lehononna ma tu ho aek hangoluan.”+ 11 Didok borua i ma tu ibana, “Ai timba ni Amang pe so adong jala bagas do sumur on. Sian dia ma dapot ni Amang aek hangoluan? 12 Umbalga ma ho sian ompunami si Jakkob? Ibana do na mangalehon sumur on tu hami. Nungnga diinum ibana aek sian sumur on. Songon i akka anakna nang akka pinahanna.” 13 Didok Jesus ma tu borua i, “Manang ise na manginum aek sian sumur on mauas do muse. 14 Alai manang ise na manginum aek na hulehon, dang mauas be.+ Ai aek na hulehon tu ibana gabe songon mata mual ma i di bagasan dirina, na mangalehon hangoluan na saleleng ni lelengna.”+ 15 Didok borua i ma tu ibana, “Lehon ma tu au aek i Amang, asa unang mauas be au jala unang ro be au tuson mangalap aek.”

16 Didok Jesus ma tu ibana, “Lao ma ho, jou ma suamim jala ro ma hamu tuson.” 17 Didok borua i ma, “Dang adong be suamikku.” Didok Jesus ma tu ibana, “Toho do na nidokmi, dang adong be suamim. 18 Ai nungnga lima hali ho muli jala bawa donganmu nuaeng pe dang suamim i. Sittong do hatami.” 19 Didok borua i ma tu ibana, “Panurirang*+ do huida ho Amang. 20 Di dolok on do ompunami manomba Debata, alai hamu halak Jahudi mandok, ikkon di Jerusalem do inganan manomba Debata.”+ 21 Didok Jesus ma tu borua i, “Porsea ma ho tu au inang, na ro ma tikkina dang di dolok on jala dang di Jerusalem be akka halak manomba Ama i. 22 Ai hamu, dang ditanda hamu na disomba hamu.+ Molo hami, hutanda hami do na disomba hami. Ai halak Jahudi do na parjolo mamboto aha na lao bahenon ni Debata lao paluahon akka jolma.+ 23 Nang pe songon i, na lao ro ma tikkina jala saonari ma i. Sombaon ni akka sisomba Debata na tutu ma Ama i marhite panogu-noguon ni tondi parbadia dohot hasittongan. Ai halak sisongon i do dilului Ama i lao manomba Ibana.+ 24 Dang boi taida Debata+ jala di surgo do Ibana.* Sude na naeng manomba Ibana ikkon mangihutton panogu-noguon ni tondi parbadia dohot hasittongan.”+ 25 Didok borua i ma tu ibana, “Huboto do na naeng ro Messias, na laos digoari Kristus. Molo dung ro ibana, patorangonna do i sude tu hami.” 26 Didok Jesus ma tu borua i, “Au do i, na makkatai dohot ho.”+

27 Di tikki i ro ma akka siseanna, gabe longang ma nasida ala makkata-hatai Jesus dohot sahalak borua. Alai dang adong sahalak pe sian nasida na manukkun boasa makkata-hatai ibana dohot borua i jala aha na niluluanna. 28 Ditadikkon borua i ma gucci inganan ni aekna i, lao ma ibana tu kota jala didok ma tu akka halak, 29 “Ro jo hamu, bereng hamu ma, adong bawa na boi paboahon sude na hea huulahon. Ibana do ra Kristus i.” 30 Gabe marroan ma nasida sian kota i mandapotton Jesus.

31 Laos di tikki i sai dijujui akka siseanna ma ibana, ninna ma, “Mangan ma ho Guru.”+ 32 Alai didok Jesus ma tu nasida, “Adong do sipanganokku, alai dang diboto hamu manang aha i.” 33 Gabe didok akka sisean i ma sama nasida, “Ai ise do nuaeng na mangalehon sipanganon tu ibana?” 34 Didok Jesus ma tu nasida, “Sipanganokku, i ma mangulahon lomo ni roha ni na marsuru au+ jala pasaehon ulaon na sian Ibana.+ 35 Didok hamu opat bulan nai nama tikkina panen. Alai hudok ma tu hamu: Tatap hamu ma ladang i. Ida hamu ma, nungnga masak* jala nungnga boi dipanen.+ 36 Nungnga dijalo akka panabi i upana saonari. Jala papunguhon hasil ni ladang i do nasida, i ma akka halak na lao mandapot hangoluan na saleleng ni lelengna. Marhite i rap marlas ni roha ma panabur dohot panabi.+ 37 Alani i tutu ma hata na mandok, na sada manabur jala na sada nai manabi. 38 Husuru do hamu manabi, hape so hamu na manabur boni. Halak na asing do na loja karejo, alai hamu do na mandapot akka na denggan sian na diula nasida.”

39 Godang ma halak Samaria na di kota i na gabe porsea tu Jesus alani hata ni borua i. Ai didok ibana do, “Dipaboa ibana do sude na hea huulahon.”+ 40 Dung ro akka halak Samaria mandapotton Jesus, dipangido nasida ma asa tinggal ibana rap dohot nasida. Jala tinggal ma ibana disi saleleng dua ari. 41 Ujungna, lam godang ma na porsea alani hata ni Jesus. 42 Jala didok nasida ma tu borua i, “Dang holan alani hatami umbahen na porsea hami. Alai nungnga dibege hami sandiri jala nungnga diboto hami ibana do na paluahon portibi on.”+

43 Dung salpu dua ari, borhat ma ibana sian i tu Galilea. 44 Ai hea do dipaboa ibana, dang dipasangap jolma sahalak panurirang di hutana sandiri.+ 45 Dung sahat ibana di Galilea, denggan do dijalo halak na disi ibana, ala diida nasida do sude na diulahon Jesus tikki perayaan na di Jerusalem.+ Ai dohot do nasida tu perayaan i.+

46 Dung i lao ma muse Jesus tu Kana na di Galilea, disi do hea dibahen ibana aek gabe anggur.+ Adong ma disi sahalak pejabat na sian Kapernaum jala di tikki i marsahit do anakna. 47 Tikki dibege ibana ro Jesus sian Judea tu Galilea, didapotton ibana ma Jesus. Dipangido ibana ma asa ro Jesus pamaluppon anakna. Ai nungnga naeng mate anakna i. 48 Alai didok Jesus ma, “Molo dang diida hamu akka tanda halongangan,* dang na porsea hamu.”+ 49 Didok pejabat i ma tu ibana, “Tuan, ro ma jo ho andorang so mate anakki.” 50 Didok Jesus ma tu ibana, “Mulak ma ho, nungnga malum be anakmi.”+ Porsea do pejabat i tu hata ni Jesus i jala mulak ma ibana. 51 Tikki di pardalanan dope ibana, ro ma akka hatobanna paboahon naung malum anakna i. 52 Disukkun ibana ma jam piga malum anakna i. Dialusi nasida ma, “Jam sada arian* ma nattoari malum mohopna i.” 53 Gabe diingot ibana ma apala di tikki i do didok Jesus tu ibana, “Nungnga malum be anakmi.”+ Gabe porsea ma ibana dohot sude donganna sajabu. 54 I ma tanda halongangan na paduahon+ na dibahen Jesus dung ro ibana sian Judea tu Galilea.

5 Dukkon i, adong ma perayaan+ ni halak Jahudi jala borhat ma Jesus tu Jerusalem. 2 Adong do sada kolam paridian di Jerusalem jonok tu Gerbang Biru-biru.+ Di bahasa Heber digoari ma i Betesda. Adong do lima inganan manisio di paridian i. 3 Godang do disi marpeakan na marsahit, na mapitung, na pakpang, dohot na lumpu. 4* —— 5 Adong ma disi sahalak bawa naung 38 taon marsahit. 6 Diida Jesus ma ibana peak disi jala diboto do naung leleng ibana marsahit. Gabe didok Jesus ma tu ibana, “Olo do ho malum?”+ 7 Dialusi na marsahit i ma, “Tikki guccang aekna i Amang, dang adong na mamboan au masuk tu kolam i. Tikki naeng masuk au tusi, nungnga parjolo na asing masuk.” 8 Didok Jesus ma tu ibana, “Jongjong ma ho! Boan ma tikkarmi* jala mardalan ma ho.”+ 9 Laos satokkin i, malum ma bawa i. Diboan ma tikkarna i jala mardalan ma ibana.

Ari Sabat do tikki i. 10 Dung i didok halak Jahudi ma tu na dipamalum i, “Ari Sabat do saonari. Alani i, dang boi boanonmu tikkarmi.”+ 11 Alai dialusi ibana ma nasida, “Halak na pamaluppon au i do na manuru au mamboan tikkar on jala manuru au mardalan.” 12 Disukkun nasida ma ibana, “Ise do na manuru ho mamboan tikkar i jala na manuru ho mardalan?” 13 Alai dang ditanda bawa i ise na pamaluppon ibana. Ai dang tarida be Jesus alani godang ni jolma na disi.

14 Dung i pajuppang ma Jesus dohot bawa i di bagas joro. Didok ma tu ibana, “Saonari nungnga malum ho. Alani i unang be ulahon dosa, asa unang masa tu ho na upposi.” 15 Dung i lao ma bawa i mandapotton halak Jahudi. Dipaboa ibana ma tu nasida Jesus do pamaluppon ibana. 16 Mulai sian i ma sogo roha ni halak Jahudi tu Jesus, ala dipamalum ibana do na marsahit di ari Sabat. 17 Didok Jesus ma tu nasida, “Toktong do karejo Damang sahat tu saonari, jala au pe toktong do songon i.”+ 18 Alani hatana i, lam marsitutu ma halak Jahudi mangalului dalan lao mambunu Jesus. Ai didok roha ni nasida, dang holan ari Sabat be dialo ibana. Jala didok roha ni nasida, naeng dibahen Jesus do akka halak porsea molo ibana dos tu Debata.+ Ai didok ibana do Bapakna Debata.+

19 Alai songon on ma alus ni Jesus tu nasida, “Tutu do na hudok on tu hamu, dang adong manang aha pe na diulahon Anak i mangihutton lomo ni rohana sandiri. Alai manang aha diida ibana diulahon Ama i, holan i do diulahon ibana.+ Ai manang aha na diulahon Ama i, laos songon i do diulahon Anak i. 20 Dihaholongi Ama i do Anak i+ jala dipatuduhon do sude na niulana tu ibana. Patuduon ni Ama i dope tu Anak i akka ulaon na umbalga sian i, asa longang rohamuna.+ 21 Songon Ama i na pahehehon halak na mate jala pangoluhon nasida,+ Anak i pe pangoluonna do manang ise lomo ni rohana.+ 22 Ai dang diuhumi Ama i manang ise pe, alai dilehon do tu Anak i huaso lao manguhumi saluhutna,+ 23 asa sude pasangappon Anak i dos songon nasida pasangappon Ama i. Manang ise na so pasangappon Anak i, dang dipasangap nasida Ama na marsuru ibana.+ 24 Tutu do na hudok on tu hamu, manang ise na manangihon hatakku jala porsea tu Ama na marsuru au, dapotna do hangoluan na saleleng ni lelengna.+ Jala dang mate ibana manang diuhumi, alai dapotna ma hangoluan.+

25 “Tutu do na hudok on tu hamu, na ro ma tikkina jala saonari ma i, begeon ni akka na mate ma soara ni Anak ni Debata jala mangolu ma manang ise na mamparrohahon i. 26 Marhuaso do Ama i lao mangalehon hangoluan+ jala dilehon ibana do huaso tu Anak i asa boi dilehon Anak i hangoluan.+ 27 Jala dilehon Ama i do tu ibana huaso lao manguhumi,+ ai ibana do Anak ni jolma i.+ 28 Unang ma longang rohamuna, ai na ro ma tikkina begeon ni saluhut na di kuburan* i ma soarana+ 29 jala kaluar ma nasida. Akka na mangulahon na denggan hehe ma tu hangoluan jala akka na mangulahon na jahat hehe lao diuhumi.+ 30 Ai dang adong na boi huulahon mangihutton lomo ni rohakku sandiri. Hombar tu na nidok ni Ama i do au manguhumi, jala tigor do panguhumakki.+ Ai dang hubahen mangihutton lomo ni rohakku sandiri, alai lomo ni roha ni na marsuru au i do na huihutton.+

31 “Molo holan au sandiri do na paboahon taringot tu dirikku, dang sittong na hupaboa i.+ 32 Alai adong do halak na asing na paboahon taringot tu au, jala huboto do sittong hata na dipaboa ibana taringot tu au.+ 33 Disuru hamu do akka halak mandapotton si Johannes jala nungnga dipaboa ibana na sittong taringot tu au.+ 34 Sasittongna anggo di au, dang porlu adong halak paboahon taringot tu au. Alai hupaboa pe on tu hamu asa boi do hamu selamat. 35 Songon lampu na galak jala na marsinondang do si Johannes, alai satokkin do las rohamuna tu sinondangna i.+ 36 Alai uppetting do na hupaboa sian na dipaboa si Johannes. Ai ulaon na dilehon Ama i lao pasidungokku, akka i do na huulahon. Jala on ma na patuduhon Ama i do na manuru au.+ 37 Jala Ama na marsuru au i pe dipaboa do taringot tu au.+ Dang hea dibege hamu soarana manang diida hamu rupana,+ 38 jala dang disippan hamu hatana i di rohamuna. Ai dang porsea hamu tu halak na disuru Ibana.

39 “Dipareso hamu do Surat na Badia,+ ala dirippu hamu marhite i dapotmu hangoluan na saleleng ni lelengna. Hape taringot tu au do na dipaboa di Surat na Badia i.+ 40 Alai dang olo hamu ro tu au,+ asa dapotmuna hangoluan i. 41 Dang hulului hasangapon sian jolma. 42 Alai takkas do huboto dang adong holong ni rohamuna tu Debata. 43 Marhite goar ni Damang do au ro, alai dang dijalo hamu. Hape molo ro halak marhite goarna sandiri, dijalo hamu do ibana. 44 Songon dia ma hamu boi porsea tu au molo hamu sama hamu do na masipasangapan? Jala songon dia ma hamu boi porsea tu au molo dang dilului hamu hasangapon na sian Debata na sasada i?+ 45 Dang tuduokku hamu mangulahon na sala di jolo ni Damang i. Jala unang ma dirippu hamu bahenokku songon i. Alai anggo si Musa na dihaporseai hamu,+ dipatudu ibana do na sala hamu marhite akka na sinuratna. 46 Sasittongna, molo porsea do hamu tu si Musa, porsea ma nian hamu tu au. Ai taringot tu au do na disurat ibana.+ 47 Alai molo so porsea do hamu tu na disurat ibana, songon dia ma hamu boi porsea tu na hudok i?”

6 Dung salpu i, lao ma Jesus tu bariba ni Laut Galilea manang Tiberias.+ 2 Godang do halak na sai mangihutton ibana,+ ala nungnga diida nasida dipamalum ibana na marsahit marhite tanda halongangan.*+ 3 Dung i, nakkok ma Jesus tu dolok jala hundul ma ibana disi rap dohot akka siseanna. 4 Di tikki i nungnga jonok Perayaan Paska+ ni halak Jahudi. 5 Dung diida Jesus godang halak na ro mandapotton ibana, disukkun ibana ma tu si Pilippus, “Didia do tuhorotta roti lao allangon ni akka jolma on?”+ 6 Alai didok Jesus pe songon i lao manguji si Pilippus do. Ai diboto Jesus do aha na lao sibahenonna. 7 Dialusi si Pilippus ma, “Dituhor hami pe roti 200 dinar,* dang cukkup i nang pe saotik be nasida.” 8 Sahalak sian sisean na margoar si Andreas, dongan saama ni si Simon Petrus mandok tu ibana, 9 “Adong do sahalak dakdanak bawa dison, na mamboan lima roti barli* dohot dua dekke na gelleng. Alai dia ma cukkup i tu akka jolma on?”+

10 Didok Jesus ma, “Suru ma nasida hundul.” Dung i hundul ma nasida di atas ni duhut-duhut na disi. Ai godang do duhut-duhut disi. Adong do sian nasida hira-hira 5.000 halak bawa.+ 11 Dibuat Jesus ma roti i, didok ma mauliate tu Debata, jala dibagi-bagi ma i tu akka na hundul i. Songon i do muse dibahen tu dekke na gelleng i. Dung i mangan ma nasida sahat tu na butong. 12 Dung butong nasida, didok Jesus ma tu akka siseanna, “Papungu hamu ma akka na lobi i asa unang adong na bolong.” 13 Dung sae mangan akka jolma i, dipapungu nasida ma akka lobi ni roti i. Adong gok 12 karanjang na lobi sian roti barli na lima i.

14 Dung diida akka jolma i tanda halongangan na binahenna i, didok nasida ma, “Tutu, ibana do Panurirang na naeng ro tu portibi on.”+ 15 Diboto Jesus ma na naeng paksaon ni nasida ibana gabe raja, alani i lao+ ma sahalakna muse tu dolok.+

16 Dung naeng borngin, lao ma akka sisean ni Jesus tu topi ni laut.+ 17 Masuk ma nasida tu parau jala menyeberang ma nasida tu Kapernaum. Nungnga holom ari tikki i, alai dang ro dope Jesus mandapotton nasida.+ 18 Jala nungnga balga galumbang ni laut i alani alogo na gogo.+ 19 Tikki didayung nasida parau i hira-hira lima sahat tu onom kilometer,* diida nasida ma Jesus mardalan di atas ni aek. Dung lam jonok Jesus tu parau i, gabe mabiar ma nasida. 20 Didok Jesus ma tu nasida, “Au do on, unang pola mabiar hamu!”+ 21 Ujungna, las ma roha ni nasida manjalo ibana masuk tu parau i. Jala dang sadia leleng sahat ma parau i tu inganan na tinuju ni nasida.+

22 Marsogotna i, diida akka halak na maringanan di bariba ni laut i ma na holan sada do parau disi. Diboto nasida do na so rap Jesus dohot akka siseanna i, ai holan akka siseanna i do na lao. 23 Alai, sahat ma parau na sian Tiberias disi. Jonok do i tu inganan di tikki dilehon Tuan i mangan akka jolma i marhite roti naung jolo ditangiakkon ibana* tu Debata. 24 Dung diida nasida dang adong Jesus dohot akka siseanna disi, nakkok ma nasida tu parau. Borhat ma nasida tu Kapernaum lao mangalului Jesus.

25 Dung juppang nasida Jesus di bariba ni laut, didok nasida ma tu ibana, “Guru,+ sadihari do ho tuson?” 26 Dialusi Jesus ma nasida, “Tutu do na hudok on tu hamu, dilului hamu pe au dang ala naung diida hamu tanda halongangan na hubahen i, alai ala naung butong do hamu mangallang roti.+ 27 Unang ma karejo hamu lao mangalului sipanganon na olo busuk. Alai karejo ma hamu lao mangalului sipanganon na so olo busuk na parohon hangoluan saleleng ni lelengna,+ na lao lehonon ni Anak ni jolma i tu hamu. Ai nungnga dibahen Debata Ama i tanda* tu ibana patuduhon na lomo rohana tu ibana.”+

28 Didok akka jolma i ma tu Jesus, “Aha do na ikkon bahenonnami asa boi diulahon hami ulaon na sian Debata?” 29 Dialusi Jesus ma nasida, “Ikkon dipatudu hamu do na porsea hamu tu halak na sinuruna i. Songon i ma carana mangulahon ulaon na sian Debata.”+ 30 Dung i didok nasida ma tu ibana, “Aha ma tanda halongangan na lao bahenonmu di jolonami+ asa porsea hami tu ho? Aha do na lao bahenonmu? 31 Tikki di padang gurun, mangallang manna do akka ompunami.+ Songon na didok di na tarsurat i, ‘Dilehon Ibana do roti sian banua ginjang lao allangon ni nasida.’”+ 32 Dung i didok Jesus ma tu nasida, “Dang si Musa na mangalehon roti na sian banua ginjang i tu hamu. Alai Damang i do na mangalehon tu hamu roti na sittong sian banua ginjang. 33 Ai roti na sian Debata, i ma ibana na turun sian banua ginjang jala na mangalehon hangoluan tu portibi on.” 34 Dung i didok nasida ma tu ibana, “Tuan, lehon ma toktong roti sisongon i tu hami.”

35 Didok Jesus ma tu nasida, “Au do roti hangoluan i. Manang ise na ro tu au dang na lao male be, jala manang ise na patuduhon haporseaon tu au dang na lao mauas be.+ 36 Songon naung hea hudok tu hamu, nang pe diida hamu au alai dang porsea hamu tu au.+ 37 Sude halak na dipasahat Ama i tu au, na lao ro do i tu au. Jala dang palaookku manang ise halak na ro tu au.+ 38 Ai turun pe au sian banua ginjang,+ dang na lao mangulahon lomo ni rohakku sandiri, alai lao mangulahon lomo ni roha ni na marsuru au i do.+ 39 Lomo ni roha ni na marsuru au, i ma asa unang mago nanggo sahalak pe sian sude naung dipasahat Ibana tu au. Alai lomo do rohana asa hupahehe+ nasida di ari parpudi. 40 Ai on do lomo ni roha ni Damang, asa manang ise na manjalo Anak i jala na patuduhon haporseaon tu ibana dapotna ma hangoluan saleleng ni lelengna.+ Jala paheheokku+ ma ibana di ari parpudi.”

41 Gabe marungut-ungut ma akka halak Jahudi alani ibana. Ai didok ibana do, “Au do roti na turun sian banua ginjang.”+ 42 Jala didok nasida ma, “Ai Jesus anak ni si Josep i do ibana kan? Tatanda do bapakna dohot omakna.+ Alai boasa ma didok ibana na turun ibana sian banua ginjang?” 43 Didok Jesus ma tu nasida, “Paso hamu ma ungut-ungutmuna i. 44 Dang adong manang ise na boi ro tu au, anggo so Ama na marsuru au i na manogu ibana,+ jala paheheokku ma ibana di ari parpudi.+ 45 Songon na Sinurat ni Akka Panurirang, ‘Na lao diajari Jahowa* ma nasida sude.’+ Ro do tu au manang ise naung manangihon Ama i jala naung marsiajar sian Ibana. 46 Alai dang adong jolma naung hea mangida Ama i.+ Holan na ro sian Debata do naung hea mangida Ama i.+ 47 Tutu do na hudok on tu hamu, manang ise na porsea dapotna ma hangoluan saleleng ni lelengna.+

48 “Au do roti hangoluan i.+ 49 Mangallang manna do akka ompumuna tikki di padang gurun, alai mate do nasida.+ 50 On do roti na sian banua ginjang i, manang ise pe boi do mangallang i jala dang na lao mate ibana. 51 Au do roti na turun sian banua ginjang i. Manang ise na mangallang roti on, mangolu ma ibana saleleng ni lelengna. Roti silehonokku, i ma dagingku, na naeng lehonokku asa mandapot hangoluan portibi on.”+

52 Gabe marsoal ma akka halak Jahudi i, ninna ma, “Boha ma bahenonna mangalehon dagingna i allangotta?” 53 Dung i didok Jesus ma tu nasida, “Tutu do na hudok on tu hamu, molo dang diallang hamu daging ni Anak ni jolma i jala dang diinum hamu mudarna, dang dapotmuna hangoluan.+ 54 Manang ise na mangallang dagingku dohot na manginum mudarhu dapotna ma hangoluan na saleleng ni lelengna, jala paheheokku+ ma ibana di ari parpudi. 55 Ai unggodang do guna ni dagingku dohot mudarhu sian sipanganon dohot siinumon na asing.* 56 Manang ise na mangallang dagingku jala na manginum mudarhu toktong ma ibana marsada dohot au, jala au marsada dohot ibana.+ 57 Ama na mangolu i do na marsuru au jala au mangolu alani Ama i. Dos songon i ma, manang ise na mangallang dagingku mangolu do alani au.+ 58 On do roti na turun sian banua ginjang, dang songon roti na diallang akka ompumuna i. Ai nang pe diallang nasida roti i mate do nasida. Manang ise na mangallang roti on, mangolu ma saleleng ni lelengna.”+ 59 Dihatahon Jesus do akka hata on tikki mangajari ibana di sinagoga* na di Kapernaum.

60 Dung dibege nasida i, godang ma sian akka sisean ni Jesus i na mandok, “Dang tarjalo hatana i. Ise ma na olo manangihon i?” 61 Alai, diboto Jesus do na marungut-ungut akka siseanna alani hatana i. Didok ibana ma tu nasida, “Na gabe tartuktuk do hamu alani hatakki? 62 Lam boha ma molo diida hamu nakkok Anak ni jolma i tu inganan haroroanna hian?+ 63 Tondi parbadia do na mangalehon hangoluan,+ dang daging na so marguna i. Aha na huhatahon tu hamu, sian tondi parbadia do i jala i do na mangalehon hangoluan.+ 64 Alai adong do deba sian hamu na so porsea.” Ai sian mulana, nungnga diboto Jesus manang ise na so porsea jala ise na lao menghianati ibana.+ 65 Didok ibana ma muse, “Alani i do hudok tu hamu, dang adong manang ise na boi ro tu au anggo so diloas Ama i.”+

66 Alani i, godang ma sian akka sisean ni Jesus na mulak tu ulaon ni nasida hian+ jala dang diihutton nasida be ibana. 67 Gabe disukkun Jesus ma tu apostel na 12 i, “Dang dohot hamu naeng lao?” 68 Dialusi si Simon Petrus ma, “Ale Tuan, tung tu ise ma hami lao?+ Akka hata na niajarhonmi do na parohon hangoluan na saleleng ni lelengna.+ 69 Nungnga porsea hami jala nungnga huboto hami ho do Nabadia ni Debata.”+ 70 Dung i dialusi Jesus ma nasida, “Hupillit do hamu 12 halak.+ Alai adong do sahalak sian hamu na gabe songon sibolis.”*+ 71 Sasittongna, si Judas anak ni si Simon Iskariot do na didok ibana disi. Ai nang pe sahalak sian apostel na 12 i ibana,+ gabe ibana do na lao menghianati Jesus.

7 Dung salpu i, didalani Jesus ma sude luat Galilea. Ai dang olo ibana mandalani luat Judea ala naeng dibunu halak Jahudi do ibana.+ 2 Alai di tikki i, nungnga jonok Perayaan Tabernakel*+ ni halak Jahudi. 3 Didok akka anggi ni Jesus+ ma tu ibana, “Lao ma ho sian on, borhat ma ho tu Judea, asa boi diida akka siseanmi akka na binahenmu. 4 Ai dang adong halak na mambahen ulaonna di na buni, molo naeng tarbarita ibana. Ala nungnga diulahon ho akka i, patudu ma dirim tu portibi on.” 5 Sasittongna, dang porsea akka anggina i tu ibana.+ 6 Ninna Jesus ma tu nasida: “Dang juppang dope tikkikku,+ alai anggo hamu, boi do lao tu perayaan i manang sadihari pe. 7 Dang adong alasan ni portibi on gabe marsogo ni roha tu hamu. Alai anggo au, sogo do rohana tu au. Ai hupaboa do pambahenan ni nasida na jahat i.+ 8 Lao ma hamu tu perayaan i. Alai anggo au dang lao dope tusi, ai dang juppang dope tikkikku.”+ 9 Dung didok ibana songon i tu nasida, tinggal dope ibana di Galilea.

10 Dung lao akka anggina tu perayaan i, borhat ma Jesus. Alai martabuni-tabuni do ibana lao tusi. 11 Dilului halak Jahudi ma ibana di perayaan i. Disukkun nasida ma, “Didia do ibana?” 12 Godang do muse halak na marhusipi pahata-hata ibana di tonga-tonga ni akka jolma i. Adong do na mandok, “Halak na burju do ibana.” Na deba nai mandok, “Daong, lilu do godang jolma dibahen ibana.”+ 13 Alai dang adong nanggo sahalak pe na barani makkatahon taringot tu ibana di jolo ni akka jolma i. Ai mabiar do nasida tu halak Jahudi.+

14 Dung satonga dalan perayaan i, masuk ma Jesus tu bagas joro lao mangajari. 15 Gabe longang ma halak Jahudi jala ninna ma, “Boasa boi godang diboto ibana taringot tu Surat na Badia?+ Hape so hea ibana marsiajar di sikkola agama.”*+ 16 Dialusi Jesus ma nasida, “Dang sian au na huajarhon i, alai sian na marsuru au i do i.+ 17 Manang ise na olo mangulahon lomo ni roha ni Debata, botoonna do sian dia na huajarhon i, sian Debata+ do manang sian dirikku sandiri. 18 Manang ise na makkatai sian dirina sandiri, na mangalului hasangapon tu dirina sandiri do ibana. Alai manang ise na mangalului hasangapon tu na marsuru ibana,+ halak na sittong do ibana jala dang adong gabus di ibana. 19 Kan dilehon si Musa do Patik i+ tu hamu? Alai dang adong sian hamu na mangoloi Patik i. Boasa gabe naeng dibunu hamu au?”+ 20 Dialusi akka jolma i ma, “Na disonggopi suru-suruan na jahat do ho. Ai ise ma naeng mambunu ho?” 21 Didok Jesus ma tu nasida, “Holan sada dope tanda halongangan* hubahen nungnga longang hamu sude. 22 Pikkirhon hamu ma on: Si Musa do na mangalehon tu hamu patik taringot sunat.+ Hape dang sian si Musa patik i, sian akka ompuna do.+ Alani i ma disunat hamu do halak di ari Sabat. 23 Molo boi do disunat hamu sahalak bawa di ari Sabat asa unang dilanggar hamu Patik ni si Musa, boasa ma gabe muruk hamu ala hupamalum na marsahit di ari Sabat?+ 24 Unang be uhumi hamu halak mangihutton na tarida, alai adil ma hamu tikki mangadili.”+

25 Dung i adong ma deba penduduk ni Jerusalem na mandok, “Ibana do kan halak na naeng dibunu i?+ 26 Alai ida ma! Makkatai do ibana di jolo ni godang halak jala dang adong didok nasida manang aha tu ibana. Atik naung takkas do diboto akka pamimpin i ibana Kristus i. 27 Alai tahe, taboto do sian dia ibana ro.+ Hape molo ro Kristus i, dang adong na mamboto sian dia ibana ro.” 28 Tikki na mangajari i Jesus di bagas joro, gogo ma didok ibana, “Ditanda hamu do au jala diboto hamu do sian dia au ro. Alai dang mangihutton lomo ni rohakku sandiri au ro.+ Jala na marsuru au i, tutu do Ibana adong alai dang ditanda hamu Ibana.+ 29 Alai hutanda do Ibana,+ ai sian Ibana do au ro jala Ibana do na manuru au.” 30 Dung i dilului nasida ma dalan lao manakkup ibana,+ alai dang adong nanggo sahalak pe na boi manakkup ibana. Ai dang juppang dope tikkina.+ 31 Nang pe songon i, godang do sian akka jolma i na porsea tu ibana.+ Didok nasida ma, “Molo ro Kristus i godang do bahenonna tanda halongangan. Kan i do na dibahen ibana saonari?”

32 Dibege halak Parise do marhusipi akka jolma i taringot tu Jesus. Gabe disuru akka malim kepala* dohot halak Parise ma akka petugas manakkup Jesus. 33 Dung i didok Jesus ma, “Satokkin nai nama au rap dohot hamu, dung i lao ma au mandapotton Ibana na marsuru au.+ 34 Luluanmuna ma au, alai dang juppangmuna au, jala dang boi hamu ro tu inganan sitopotokki.”+ 35 Didok akka halak Jahudi i ma tu donganna, “Naeng tudia do ibana lao umbahen na so boi juppangta ibana? Na naeng lao do ibana mandapotton halak Jahudi na maringanan di tonga-tonga ni halak Junani? Jala na naeng ajaranna do halak Junani? 36 Aha do lapatan ni hata na nidokna i, ‘Luluanmuna ma au, alai dang juppangmuna au, jala dang boi hamu ro tu inganan sitopotokki’?”

37 Di ari na parpudi, i ma ari na umbalga sian perayaan i,+ jongjong ma Jesus jala gogo ma didok, “Manang ise na mauas, ro ma ibana tu au asa minum.+ 38 Manang ise na porsea tu au, ‘kaluar ma aek hangoluan sian rohana,’+ songon na didok di na tarsurat i.” 39 Sasittongna taringot tu tondi parbadia do na didok Jesus, i ma na lao jaloon ni halak na porsea tu ibana. Di tikki i, dang dijalo nasida dope tondi parbadia+ ala dang dilehon dope hasangapon i tu Jesus.+ 40 Adong do piga-piga halak na mambege hatana i. Didok nasida ma, “Tutu do ibana Panurirang* na naeng ro i.”+ 41 Na deba nai mandok, “Ibana do Kristus i.”+ Alai na deba nai mandok, “Ai dang sian Galilea kan ro Kristus i?+ 42 Kan tarsurat do molo Kristus i ro sian pinoppar ni si Daud+ jala ro sian Betlehem+ huta ni si Daud?”+ 43 Gabe marsoal ma akka jolma i alani ibana. 44 Adong ma deba sian nasida na naeng manakkup ibana, alai dang adong nanggo sahalak pe na boi mangulahon i.

45 Dung i mulak ma akka petugas i. Disukkun akka malim kepala dohot halak Parise ma nasida, “Boasa dang diboan hamu ibana tuson?” 46 Dialusi akka petugas i ma, “Dang hea dope adong halak na boi makkatai songon i.”+ 47 Dung i didok halak Parise i ma tu nasida: “Naung dohot do hamu lilu dibahen ibana? 48 Ai adong diboto hamu sahalak pe sian akka pamimpin manang sian halak Parise na porsea tu ibana?+ 49 Alai akka jolma on, na so mananda Patik i, diburai Debata do nasida.” 50 Si Nikodemus, sahalak Parise na hea ro mandapotton Jesus, mandok tu nasida, 51 “Mangihutton Patik, boi do dihukum sasahalak andorang so dibege hatoranganna jala andorang so diboto manang na aha na binahenna?”+ 52 Dialusi nasida ma, “Ai naung dohot do ho halak Galilea? Pareso ma jo di Surat na Badia i manang na adong do panurirang na ro sian Galilea.”*

8 12 Dung i didok Jesus ma muse hatana tu nasida, ninna ma, “Au do panondang ni portibi on.+ Manang ise na mangihutton au, dapotna ma sinondang ni hangoluan+ jala dang mardalan be ibana di na holom.” 13 Gabe didok halak Parise i ma tu ibana, “Ho sandiri do na paboahon taringot tu dirim, jadi dang tutu hatami.” 14 Dialusi Jesus ma nasida, “Nang pe au na paboahon taringot tu dirikku, alai sittong do na hupaboa i. Ai huboto do sian dia au ro jala tudia au lao.+ Alai, dang diboto hamu sian dia au ro jala tudia au lao. 15 Ai mangihutton pikkiran ni jolma do hamu manguhumi.+ Alai anggo au, dang huuhumi manang ise pe. 16 Molo manguhumi pe au, tigor do panguhumakki. Ai dang holan sahalakku manguhumi, alai rap do au dohot Damang na manuru au.+ 17 Asing ni i adong do disurat di patikmuna, ‘Molo adong dua saksi, sittong do na pinaboana i.’+ 18 Au sandiri do na paboahon taringot tu dirikku, jala dohot do Damang na marsuru au i paboahon taringot tu au.”+ 19 Dung i didok nasida ma tu ibana, “Didia do huroa Amangmi?” Dialusi Jesus ma, “Dang ditanda hamu au dohot Damang i.+ Molo ditanda hamu au, tandaonmuna do Damang i.”+ 20 Dihatahon Jesus do sudena i tikki mangajari ibana di labbung ni poti inganan ni pelean+ na adong di bagas joro. Alai dang adong na manakkup ibana, ai dang juppang dope tikkina.+

21 Didok ibana ma muse tu nasida, “Na lao ma au jala luluanmuna ma au. Alai mate ma hamu di bagasan dosamuna.+ Jala dang boi hamu ro tu inganan sitopotokki.”+ 22 Gabe didok halak Jahudi ma, “Didok ibana dang boi hita ro tu inganan sitopotonna i, na lao manikkot do ibana?” 23 Didok Jesus ma tu nasida, “Sian toru do hamu, alai sian ginjang do anggo au.+ Sian portibi on do hamu, alai dang sian portibi on anggo au. 24 Alani i do umbahen na hudok tu hamu: Mate ma hamu di bagasan dosamuna. Ai molo dang porsea hamu na au do halak na naeng ro i, mate ma hamu di bagasan dosamuna.” 25 Dung i disukkun nasida ma ibana, “Ai ise huroha ho?” Dialusi Jesus ma nasida, “Tu aha be sai makkatai au dohot hamu? 26 Godang do na ikkon huhatahon tu hamu jala godang do parsoalan na ikkon huuhumi. Alai sasittongna, na hubege sian Ibana na marsuru au tu portibi on, i do na huhatahon. Ai toktong do ibana sittong.”+ 27 Dang diattusi nasida na taringot tu Ama i do na didok Jesus tu nasida. 28 Dung i didok Jesus ma, “Molo dung digattung* hamu Anak ni jolma i,+ botoonmuna ma au do na naeng ro i,+ jala botoonmuna ma dang adong na huulahon mangihutton lomo ni rohakku sandiri.+ Alai na diajarhon Damang i do na huhatahon. 29 Ibana na marsuru au i do donganku. Dang dipasombu Ibana sahalakku, ai toktong do huulahon lomo ni rohana.”+ 30 Dung didok ibana sudena i, godang ma na porsea tu ibana.

31 Didok Jesus ma muse tu halak Jahudi na porsea tu ibana, “Molo diihutton hamu hatakku, tutu ma hamu akka siseanku. 32 Botoonmuna ma hasittongan+ jala paluaon ni hasittongan i ma hamu.”+ 33 Gabe didok akka na asing i ma tu ibana, “Pinoppar ni si Abraham do hami. Dang hea hami gabe hatoban ni manang ise pe. Boasa ma dohononmu ikkon dipalua hami?” 34 Dialusi Jesus ma nasida, “Tutu do na hudok on tu hamu, manang ise na mangulahon dosa, hatoban ni dosa i do ibana.+ 35 Asing ni i, anggo hatoban dang sai torus tinggal di jabu ni tuanna, alai anak i do na toktong tinggal di jabu i. 36 Alani i molo dipalua Anak i hamu, tutu ma hamu malua. 37 Huboto do na pinoppar ni si Abraham hamu. Alai naeng dibunu hamu do au, ala dang dijalo hamu hatakki. 38 Hape akka na huida tikki rap dohot Damang i do na huhatahon.+ Alai anggo hamu, akka na dibege hamu sian amangmuna i do na diulahon hamu.” 39 Didok nasida ma tu ibana, “Si Abraham do amangnami.” Didok Jesus ma tu nasida, “Molo na tutu do hamu anak ni si Abraham,+ ulahononmuna do ulaon ni si Abraham. 40 Hape naeng dibunu hamu do au ala hupaboa hasittongan na hubege sian Debata.+ Alai dang bahenon ni si Abraham songon i. 41 Diulahon hamu do na diulahon amangmuna.” Dialusi nasida ma ibana, “Dang alani seks na so patut* hami tubu. Sada do Amangnami, i ma Debata.”

42 Dung i didok Jesus ma tu nasida, “Molo Debata do Amangmuna, haholonganmuna do au.+ Ai ro pe au tuson, Debata do na manuru au. Dang alani lomo ni rohakku sandiri umbahen na ro au, alai Ibana do na manuru au.+ 43 Boasa dang diattusi hamu na hudokkon i? Ai so ditangihon hamu hatakki. 44 Sibolis do amangmuna jala lomo do rohamuna mangulahon lomo ni roha ni amangmuna i.+ Pambunu do ibana sian mulana+ jala dang hot ibana di hasittongan. Ai dang adong hasittongan di bagasan rohana. Molo dihatahon ibana gabus, mangihutton lomo ni rohana do i. Ai pargabus do ibana jala ama ni gabus.+ 45 Alai hasittongan do huhatahon, jala alani i do umbahen na so porsea hamu tu au. 46 Ise ma sian hamu na boi patuduhon na mardosa au? Molo hasittongan do na huhatahon, boasa dang porsea hamu tu au? 47 Ditangihon akka anak ni Debata do hata ni Debata.+ Alai anggo hamu, dang olo hamu manangihon, ala dang anak ni Debata hamu.”+

48 Didok halak Jahudi ma tu Jesus, “Dang sala be hami molo didok hami ho halak Samaria+ jala na disonggopi suru-suruan na jahat.”+ 49 Dialusi Jesus ma, “Dang na disongggopi suru-suruan na jahat au. Damang i do na hupasangap alai dang dipasangap hamu au. 50 Dang na mangalului sangap tu dirikku sandiri au.+ Ibana do na naeng mangalehon i tu au jala Ibana do hakim na manottuhon ise na patut manjalo hasangapon i. 51 Tutu do na hudok on tu hamu, manang ise na mangoloi hatakku dang mate be ibana saleleng ni lelengna.”+ 52 Didok halak Jahudi i ma tu ibana, “Nungnga takkas be diboto hami na disonggopi suru-suruan na jahat do ho. Ai mate do si Abraham songon i nang akka panurirang.* Hape didok ho manang ise na manangihon hatam, dang mate ibana. 53 Umbalga ma ho sian amangnami si Abraham? Nungnga mate ibana, songon i nang akka panurirang. Ai ise ma huroa ho?” 54 Dialusi Jesus ma, “Molo hupasangap dirikku sandiri, dang marlapatan hasangapokki. Damang i do na pasangappon au,+ na nidokmuna i Debatamuna. 55 Dang ditanda hamu Ibana,+ alai anggo au hutanda do Ibana.+ Molo hudok dang hutanda Ibana, pargabus ma au songon hamu. Alai hutanda do Ibana jala huoloi do hatana. 56 Las situtu do roha ni si Abraham amangmuna i paima-imahon harorokku. Dibayakkon* ibana ma i, jala las ma rohana.”+ 57 Didok halak Jahudi i ma tu ibana, “Ai dia ma mungkin diida ho si Abraham? Haru umurmu pe so gok dope 50 taon.” 58 Didok Jesus ma tu nasida, “Tutu do na hudok on tu hamu, andorang so adong si Abraham, nungnga adong au.”+ 59 Dung i dibuat nasida ma batu lao mandangguri ibana, alai martabuni ma Jesus jala lao ma ibana sian bagas joro i.

9 Tikki mardalan Jesus, diida ibana ma sahalak bawa na mapitung. Nungnga mapitung bawa i sian mulai tubu. 2 Disukkun akka siseanna ma Jesus, “Guru,+ alani dosa ni ise do umbahen na mapitung ibana sian mulai tubu? Alani dosana do manang dosa ni natua-tuana?” 3 Dialusi Jesus ma, “Dang alani dosana manang dosa ni natua-tuana, alai masa pe songon i asa idaon ni akka jolma do aha na boi diulahon Debata* marhite ibana.+ 4 Bissan arian dope, ikkon taulahon do ulaon ni Ibana na marsuru au.+ Ai molo dung borngin, dang adong be manang ise na boi karejo. 5 Saleleng di portibi on dope au, au do panondang ni portibi on.”+ 6 Dung didok ibana songon i, ditijuri ibana ma tano, dilala ma tano i jala didaisson ma tu mata ni bawa i.+ 7 Dung i didok Jesus ma, “Lao ma ho marsuap tu kolam Siloam” (molo diterjemahon lapatanna, “Na Sinuru”). Lao ma bawa i marsuap jala tikki mulak ibana, nungnga boi ibana marnida.+

8 Ro ma akka tetanggana dohot akka halak na somal mangida ibana mangido-ido i. Didok nasida ma, “Ibana do kan halak na sai hundul mangido-ido i?” 9 Adong ma na mandok, “Ibana do i.” Na asing muse mandok, “Dang ibana i, na mirip do bawa i tu ibana.” Alai sai didok bawa i ma, “Au do i.” 10 Gabe disukkun nasida ma ibana, “Songon dia do carana gabe boi ho marnida?” 11 Dialusi ibana ma, “Adong sahalak bawa na margoar Jesus mandaisson gambo tu matakku. Dung i disuru ibana ma au marsuap tu kolam Siloam.+ Lao ma au marsuap gabe boi ma au marnida.” 12 Disukkun nasida ma, “Nungnga didia ibana?” Dialusi bawa i ma, “Dang huboto.”

13 Diboan nasida ma bawa i tu halak Parise. 14 Pas di ari Sabat+ do Jesus na mambahen gambo i jala na mambahen marnida mata ni bawa i.+ 15 Disukkun halak Parise i ma muse tu bawa i songon dia carana gabe boi ibana marnida. Didok ibana ma tu nasida, “Didaisson ibana ma gambo tu matakku, dung i marsuap ma au gabe boi ma au marnida.” 16 Adong ma deba sian halak Parise i mandok, “Dang sian Debata halak na mambahen on, ai dang dioloi ibana patik ni ari Sabat.”+ Na deba nai mandok, “Dia ma mungkin boi halak pardosa mambahen tanda halongangan* na songon on?”+ Dung i gabe marsalisi ma nasida.+ 17 Disukkun nasida ma muse bawa i, “Ala nungnga dibahen ibana ho marnida, songon dia do pandapotmu taringot tu ibana?” Dialusi ibana ma, “Panurirang* do ibana.”

18 Alai nang pe songon i, dang porsea halak Jahudi i na mapitung hian ibana jala nungnga boi marnida. Alani i dijou nasida ma natua-tuana. 19 Disukkun nasida ma natua-tuana i, “Anakmuna do on? Tutu do ibana mapitung sian mulai tubu? Songon dia do carana gabe boi ibana marnida saonari?” 20 Dialusi natua-tuana i ma, “Anaknami do ibana jala tutu do ibana mapitung sian mulai tubu. 21 Alai dang huboto hami boasa boi ibana marnida saonari, jala dang huboto hami ise na mambahen ibana boi marnida. Sukkun hamu ma ibana, ai nungnga balga ibana jala ibana sandiri ma na mangalusi.” 22 Didok natua-tuana i pe songon i ala mabiar do nasida tu halak Jahudi i.+ Ai nungnga sahata halak Jahudi mandok, manang ise na makkaporseai Jesus i Kristus ikkon dipakaluar do ibana sian sinagoga.*+ 23 Alani i ma didok natua-tuana i, “Sukkun hamu ma ibana, ai nungnga balga ibana.”

24 Dijou nasida ma muse bawa i jala didok ma tu ibana, “Pasangap ma Debata marhite paboahon na sittong. Ai huboto hami do, pardosa do bawa na pamaluppon ho i.” 25 Dialusi bawa i ma, “Dang huboto manang na pardosa ibana manang na dang. Holan on do na huboto, mapitung hian do au, alai saonari nungnga boi marnida.” 26 Disukkun nasida ma muse tu ibana, “Aha do dibahen ibana tu ho? Songon dia do dibahen pamaluppon matami?” 27 Dialusi ibana ma nasida, “Nungnga hupaboa tu hamu, alai dang olo hamu manangihon. Boasa ma naeng begeonmuna i muse? Na naeng dohot do hamu gabe siseanna?” 28 Dileai nasida ma ibana, ninna ma, “Ho do siseanna, molo hami sisean ni si Musa do. 29 Na huboto hami, tu si Musa do Debata makkatai. Alai anggo ibana, dang huboto hami manang sian dia ibana ro.” 30 Dialusi ibana ma, “Bingung do au mamereng hamu. Dang diboto hamu manang na sian dia ibana ro, hape nungnga dibahen ibana marnida matakku. 31 Taboto do, dang ditangihon Debata pardosa,+ alai ditangihon Ibana do manang ise na makkabiari Ibana dohot na mangulahon lomo ni rohana.+ 32 Sian najolo, dang hea dope tabege adong na boi pamaluppon halak na mapitung sian mulai tubu. 33 Tottu molo dang sian Debata ibana ro, dang boi bahenonna songon i.”+ 34 Dialusi nasida ma ibana, “Nungnga mardosa ho mulai sian na tubu, alai saonari naeng ajaranmu hami?” Dung i, dipakaluar nasida ma ibana sian i!+

35 Dibege Jesus ma naung dipakaluar ibana sian i. Tikki pajuppang nasida, didok Jesus ma, “Porsea do ho tu Anak ni jolma i?” 36 Dialusi bawa i ma, “Ise do ibana Amang, asa boi au porsea tu ibana?” 37 Didok Jesus ma tu ibana, “Nungnga diida ho ibana. Sasittongna, ibana do na makkatai tu ho.” 38 Didok ibana ma, “Porsea do au Tuan.” Laos marsinggang ma ibana di jolo ni Jesus. 39 Didok Jesus ma, “Lao manguhumi do au ro tu portibi on, asa marnida akka na mapitung+ jala asa mapitung akka na marnida.”+ 40 Adong do deba halak Parise na mambege hata ni Jesus i. Ninna nasida ma, “Na nidokmu nuaeng, na dohot do hami mapitung?” 41 Dialusi Jesus ma nasida, “Molo mapitung hamu, dang mardosa hamu. Alai ala didok hamu do, ‘Marnida do hami,’ gabe toktong ma hamu mardosa.”+

10 “Tutu do na hudok on tu hamu, molo adong na masuk tu handang ni biru-biru dang sian pintu, alai manjakkit sian tembok, panakko do i jala pangarampok.+ 2 Alai halak na masuk sian pintu i do parmahan ni biru-biru i.+ 3 Bukkaon ni panjaga ma pintu tu ibana,+ jala begeon ni biru-biru i ma soarana.+ Ai jouonna do ganup goar ni biru-biruna jala boanonna ma i tu luar. 4 Dung diboan ibana kaluar sude biru-biru i, mardalan ma ibana di jolo ni akka biru-biru i. Diihutton akka biru-biru i ma ibana, ai ditanda do soarana. 5 Dang na lao olo akka biru-biru i mangihutton halak na asing, alai lari do akka biru-biru i sian halak na asing i, ai dang ditanda soarana.” 6 Didok Jesus do tudosan i tu nasida, alai dang diattusi nasida aha lapatanna.

7 Didok Jesus ma muse, “Tutu do na hudok on tu hamu, au do pintu ni biru-biru i.+ 8 Sude halak na mandok dirina parmahan asing ni au, panakko do i jala pangarampok, jala dang ditangihon akka biru-biru i soara ni nasida. 9 Au do pintu i. Manang ise na masuk marhite au, pasti selamat. Masuk ma ibana jala kaluar, dung i dapotna ma panjappalan.+ 10 Holan na lao manakko, lao mambunu, dohot na lao manghancurhon do ro panakko i.+ Alai anggo au ro, asa mandapot hangoluan do akka biru-biru i, asa mangolu saleleng ni lelengna nasida. 11 Au do parmahan na burju i.+ Ai dilehon parmahan na burju do ngoluna humokkop biru-biruna.+ 12 Anggo halak na digaji, na so parmahan, jala na so nappunasa biru-biru i, molo ro serigala lari do ibana. Pasti ditinggalhon ibana do biru-biru i. Dung i, diserang serigala i ma akka biru-biru i jala dibahen ma nasida marserak. 13 Ai halak na digaji do ibana jala dang disarihon ibana biru-biru i. 14 Au do parmahan na burju i. Hutanda do biru-birukku jala ditanda biru-birukku do au,+ 15 dos songon Ama i na mananda au jala au mananda Ama i.+ Hulehon do ngolukku humokkop biru-biru i.+

16 “Adong dope biru-birukku na asing na so sian handang on+ jala ikkon dohot do akka i boanokku. Tangihonon ni nasida ma soarakku, gabe sada punguan ma nasida jala sada parmahan.+ 17 Dihaholongi Ama i do au+ ala hulehon do ngolukku+ asa boi jalookku i muse. 18 Dang adong na boi mambuat i sian au, alai mangihutton lomo ni rohakku do hulehon i. Ai marhak do au mangalehon i jala marhak do au manjalo i muse.+ On do paretta na hujalo sian Damang.”

19 Gabe tubu ma muse parsalisian di tonga-tonga ni halak Jahudi+ alani hatana i. 20 Godang do sian nasida na mandok, “Na disonggopi suru-suruan na jahat do ibana jala nungnga rittik ibana. Tu aha be ditangihon hamu ibana?” 21 Na asing mandok, “Dang mungkin boi halak na disonggopi suru-suruan na jahat mandok songon i. Ai boi ma bahenon ni suru-suruan na jahat marnida na mapitung?”

22 Tikki i, adong do perayaan di Jerusalem, i ma Perayaan Pabadiahon Bagas Joro jala musim dingin do tikki i. 23 Mardalan-dalan ma Jesus di Terras ni si Salomo+ na di bagas joro i. 24 Marpungu ma halak Jahudi makkaliangi Jesus jala ninna ma, “Sadia leleng nai sukkun-sukkun rohanami bahenonmu? Molo Kristus i do ho, takkas ma paboa tu hami.” 25 Dialusi Jesus ma nasida, “Nungnga hupaboa tu hamu alai dang porsea hamu. Akka ulaon na hubahen di bagasan goar ni Damang, i do na paboahon taringot tu au.+ 26 Alai dang porsea hamu, ala dang biru-birukku hamu.+ 27 Ditangihon biru-birukku do soarakku, hutanda do nasida, jala diihutton do au.+ 28 Lehonokku do hangoluan na saleleng ni lelengna tu nasida,+ jala dang adong na boi manghancurhon nasida. Dang adong na boi mambuat nasida sian au.+ 29 Ummarga do biru-biru na dilehon Damang i tu au sian saluhutna. Jala dang adong na boi mambuat nasida sian Damang i.+ 30 Sada* do au dohot Ama i.”+

31 Dibuat halak Jahudi ma muse batu lao mandangguri ibana. 32 Disukkun Jesus ma nasida, “Nungnga godang hupatuduhon tu hamu ulaon na denggan na sian Damang i. Ulaon na dia do sian akka i na mambahen naeng dangguronmuna au?” 33 Dialusi halak Jahudi i ma ibana, “Dang alani ulaon na denggan umbahen naeng didangguri hami ho. Alai ala dileai ho do Debata.+ Hape jolma do ho, alai dibahen ho do dirim songon debata.” 34 Didok Jesus ma tu nasida, “Kan adong do tarsurat di Patikmuna hata ni Debata na mandok, ‘Akka debata* do hamu’?+ 35 Dang boi muba dibahen jolma akka na tarsurat i. Attong, molo didok Ibana do ‘akka debata’+ tu akka halak na diburai i, 36 boasa ma dohononmuna tu au, ‘Na mangaleai Debata do ho’ ala hudok, ‘Anak ni Debata do au’?+ Hape dipabadia jala disuru Ama i do au tu portibi on. 37 Molo so ulaon na sian Damang i na huulahon, unang pola porsea hamu tu au. 38 Alai molo i do na huulahon, porsea ma hamu tu na huulahon i+ nang pe dang porsea hamu tu au. Marhite i, attusanmuna ma jala toktong ma hamu porsea na marsada do Ama i dohot au, jala marsada do au dohot Ama i.”+ 39 Naeng ditakkup nasida ma muse Jesus, alai boi do ibana lari sian tonga-tonga ni nasida.

40 Lao ma muse Jesus tu sada inganan di bariba ni Sunge Jordan. Disi do parjolo sahali si Johannes mandidihon akka halak.+ Dung i, tinggal ma Jesus disi. 41 Godang do halak ro mandapotton ibana jala ninna nasida ma, “Dang adong nanggo sada tanda halongangan* dibahen si Johannes, alai sittong do sude hata ni si Johannes taringot tu ibana.”+ 42 Gabe godang ma halak na disi porsea tu ibana.

11 Adong ma sahalak bawa na marsahit, goarna si Lasarus. Di Betania do ibana tading rap dohot ibotona si Maria dohot si Marta.+ 2 Si Maria i do borua na hea mangusehon miak na angur tu pat ni Tuan jala na mangapusi patna mamakke obukna.+ Itona do si Lasarus na marsahit i. 3 Jadi disuru akka ibotona i ma halak manjuppangi Jesus lao mandok, “Tuan, marsahit do nuaeng ale-ale na dihaholongi ho.” 4 Dung dibege Jesus hata i, didok ibana ma, “Dang hamatean ujung ni sahit i alai parohon hasangapon do i tu Debata,+ jala marhite i gabe dipasangap do Anak ni Debata.”

5 Holong do roha ni Jesus tu si Marta, tu si Maria, dohot tu si Lasarus. 6 Alai dung dibege Jesus na marsahit si Lasarus, toktong dope ibana tinggal dua ari nai di ingananna i. 7 Dung salpu i, didok ibana ma tu akka siseanna, “Beta ma hita lao muse tu Judea.” 8 Didok akka siseanna i ma tu ibana, “Guru,+ baru dope naeng didangguri halak Judea ho,+ hape naeng lao hita muse tusi?” 9 Dialusi Jesus ma, “Kan 12 jom do torang ari?+ Manang ise na mardalan tikki torang ari, dang tartuktuk i, ala tiur dope portibi on. 10 Alai manang ise na mardalan tikki borngin, tartuktuk do i ai dang adong cahaya na tiur di bagasan dirina.”

11 Dung didok Jesus songon i, didok ma muse, “Anggo donganta si Lasarus i nungnga modom.+ Alai naeng lao nama au tusi mandungoi ibana.” 12 Dung i didok akka siseanna ma tu ibana, “Tuan, molo na modom do ibana, na lao malum nama i.” 13 Sasittongna, na nidok ni Jesus disi nungnga mate si Lasarus. Alai dirippu nasida do na nidok ni Jesus disi na modom songon na somal si Lasarus i. 14 Dung i takkas ma didok Jesus tu nasida, “Nungnga mate si Lasarus.+ 15 Tuani ma dang pas disi au masa i, asa gabe lam togu haporseaonmuna. Alani i ma gabe las rohakku. Beta ma taida ibana.” 16 Dung i didok si Tomas na laos margoar si Kembar ma tu akka donganna sisean, “Beta ma hita lao, asa rap mate hita dohot ibana.”+

17 Dung sahat Jesus, nungnga opat ari si Lasarus dikubur. 18 Jonok do Betania sian Jerusalem, hira-hira tolu kilometer* ma daona. 19 Jala godang do halak Jahudi na ro lao patoguhon roha ni si Marta dohot si Maria ala parmate ni ibotona i. 20 Dung dibege si Marta naung ro Jesus, lao ma ibana mandapotton Jesus. Alai tinggal do si Maria+ di jabu. 21 Didok si Marta ma tu Jesus, “Molo dison hian ho Tuan, dang mate ibotokki. 22 Nang pe songon i, toktong do au porsea manang aha dipangido ho tu Debata, lehononna do i tu ho.” 23 Didok Jesus ma tu si Marta, “Mulak mangolu do muse ibotomi.” 24 Didok si Marta ma, “Huboto do na lao mulak mangolu ibana di haheheon+ di ari parpudi.” 25 Didok Jesus ma tu ibana, “Au do haheheon dohot hangoluan.+ Manang ise na porsea tu au, mulak mangolu do ibana muse nang pe naung mate. 26 Manang ise na mangolu jala na porsea tu au, dang na lao mate be ibana saleleng ni lelengna.+ Porsea do ho disi?” 27 Dialusi si Marta ma, “Olo Tuan, porsea do au, ho do Kristus i, Anak ni Debata na ro tu portibi on.” 28 Dung didok ibana songon i, lao ma ibana manjou anggina si Maria. Dihusippon ma tu si Maria, “Nungnga ro Guru,+ dilului do ho.” 29 Mambege i, pittor lao ma ibana mandapotton Jesus.

30 Tikki i, dang masuk dope Jesus tu huta i, di inganan parjuppanganna dohot si Marta i dope ibana. 31 Tikki i, godang do halak Jahudi na ro tu jabu ni si Maria lao patoguhon rohana. Tikki diida nasida pittor jongjong si Maria jala hatop kaluar, diihutton nasida ma ibana. Ai dirippu nasida do na lao mangandungi si Maria tu kuburan.+ 32 Dung sahat si Maria tu inganan ni Jesus, marsinggang ma ibana tu pat ni Jesus jala ninna ma, “Molo dison hian ho Tuan, dang mate ibotokki.” 33 Tikki diida Jesus sai tangis si Maria songon i nang halak Jahudi na ro dohot ibana, massai lungun ma dihilala ibana. 34 Didok Jesus ma, “Didia do dikubur hamu ibana?” Dialusi nasida ma, “Beta ma taida Tuan.” 35 Dung i manetek ma ilu ni Jesus.+ 36 Gabe didok halak Jahudi i ma, “Ida ma, holong situtu do rohana tu si Lasarus i!” 37 Adong ma deba sian nasida na mandok, “Ai boi do kan dipamalum ibana halak na mapitung?+ Alai boasa dang boi dibahen ibana asa unang mate si Lasarus i?”

38 Lungun ma muse roha ni Jesus. Dung i lao ma ibana tu kuburan i, i ma liang batu* na ditutup dohot batu. 39 Didok Jesus ma, “Handit hamu ma batu i sian i.” Gabe didok si Marta iboto ni na mate i ma tu ibana, “Nungnga bau i Tuan, ai nungnga opat ari ibana dikubur.” 40 Ninna Jesus ma tu ibana, “Dang naung hudok tu ho, molo porsea ho idaonmu ma hasangapon ni Debata?”+ 41 Dihandit nasida ma batu i. Diida Jesus ma doppak ginjang+ jala didok ma, “Mauliate ma di Ho Amang, ala ditangihon Ho do au. 42 Huboto do sai ditangihon Ho do au. Alai hudok pe on, alani akka jolma na jongjong dison do, asa porsea nasida na Ho do manuru au.”+ 43 Dung didok ibana i, gogo ma didok, “Lasarus, kaluar ma ho!”+ 44 Kaluar ma na mate i, lilit dope kain i tu patna dohot tu tanganna songon i nang tu bohina. Didok Jesus ma tu nasida, “Bukkai hamu ma kain i, asa boi ibana mardalan!”

45 Godang do sian halak Jahudi na ro mangapuli si Maria i gabe porsea tu Jesus, dung diida nasida na binahen ni Jesus i.+ 46 Alai, lao ma deba sian nasida mandapotton halak Parise jala dipaboa nasida ma na binahen ni Jesus i. 47 Alani i, dijou akka malim kepala* dohot halak Parise ma asa marpungu anggota ni Sanhedrin* jala ninna ma, “Aha ma sibahenotta? Ai nungnga godang dibahen ibana tanda halongangan.*+ 48 Molo tapasombu ibana songon i, sude ma halak porsea tu ibana. Gabe ro ma annon halak Rom mangarampas bagas jorotta on dohot bangsotta.” 49 Alai adong ma sahalak sian nasida na margoar si Kayapas.+ Ibana do sintua ni malim di taon i. Didok ibana ma tu nasida, “Dang adong diboto hamu manang aha. 50 Na so diboto hamu do? Tumagon do mate sahalak jolma paluahon sada bangso, sian apala mate sude bangso i.” 51 Alai dang sian pikkiranna sandiri ibana mandok i. Ala sintua ni malim do ibana di taon i, disurirakkon ibana ma na lao mate do Jesus humokkop halak Jahudi. 52 Alai dang holan humokkop halak Jahudi Jesus mate, dohot do lao papunguhon akka anak ni Debata na marserak i. 53 Mulai sian tikki i, sahata ma nasida lao mambunu Jesus.

54 Dang mardalani be Jesus di jolo ni godang halak, di tonga-tonga ni halak Jahudi. Dung i lao ma ibana sian i tu inganan na jonok tu padang gurun, tu sada kota na margoar Epraim.+ Disi ma ibana tinggal rap dohot akka siseanna. 55 Nungnga jonok Paska+ ni halak Jahudi. Godang do halak na ro sian akka huta na dao tu Jerusalem lao mangulahon ulaon paiasson diri andorang so Paska. 56 Dilului nasida ma Jesus. Huhut jongjong di bagas joro, didok nasida ma tu akka dongan ni nasida, “Songon dia do pandapotmuna? Tutu do ibana dang ro tu perayaan on?” 57 Alai nungnga diparettahon akka malim kepala dohot halak Parise, manang ise na mamboto didia Jesus, ikkon paboaonna do i asa boi ditakkup nasida ibana.

12 Onom ari andorang so Paska, sahat ma Jesus di Betania di huta ni si Lasarus+ na dipahehe Jesus sian na mate. 2 Ditogihon nasida ma Jesus mangan disi. Si Marta ma na marhobas tu nasida+ jala dohot do si Lasarus mangan rap dohot ibana. 3 Dung i, dibuat si Maria ma satonga liter* miak nardus na angur jala na massai arga. Diusehon ibana ma i tu pat ni Jesus jala diapus ibana ma pat ni Jesus i dohot obukna. Gabe angur ma sude jabu i.+ 4 Alai ro ma si Judas Iskariot,+ sahalak sisean ni Jesus na lao menghianati ibana i mandok, 5 “Boasa dang digadis miak na angur i 300 dinar* jala dilehon tuhorna i tu na pogos?” 6 Didok ibana pe songon i dang na lao manarihon na pogos, alai ala panakko do ibana. Ibana do na maniop kotak ni hepeng jala jotjot do ditakko ibana hepeng sian i. 7 Dung i didok Jesus ma, “Pasombu hamu ma dibahen ibana songon i. Ai na lao paradehon tu ari panguburanku+ do na binahenna i. 8 Ai anggo halak na pogos toktong do adong rap dohot hamu,+ alai anggo au dang sai rap dohot hamu.”+

9 Godang do halak Jahudi mamboto na di Betania Jesus. Dung i ro ma nasida tusi. Sasittongna, dang holan naeng mangida Jesus nasida ro, alai naeng diida nasida do si Lasarus naung dipahehe ibana sian na mate.+ 10 Gabe direncanahon akka malim kepala* ma muse lao mambunu si Lasarus. 11 Ai alani si Lasarus, gabe godang ma halak Jahudi ro tu Betania jala gabe porsea tu Jesus.+

12 Marsogotna i, dibege halak na ro tu perayaan i ma naeng ro Jesus tu Jerusalem. 13 Dibuat nasida ma dakka ni hau palem* jala lao ma nasida manomu-nomu Jesus. Huhut do nasida marsurak mandok, “Sai lehon ma haluaon tu ibana! Dipasu-pasu ma na ro di bagasan goar ni Jahowa,*+ Raja ni Israel!”+ 14 Dung dapot ni Jesus sada anak ni halode, hundul ma ibana di atasna.+ Ai songon on do didok di na tarsurat i, 15 “Unang ho mabiar ale boru Sion. Nungnga ro be rajam mandapotton ho, hundul do ibana di atas ni anak ni halode.”+ 16 Tikki i dang diattusi akka sisean ni Jesus dope na masa i. Alai dung dilehon tu Jesus hasangaponna i,+ gabe diingot akka sisean i ma nungnga tarsurat hian akka na masa i.+

17 Godang do jolma na mangida Jesus manjou si Lasarus kaluar sian kuburan i+ jala tikki na dipahehe i ibana sian na mate. Sai torus do dipaboa nasida na diida nasida i tu akka jolma.+ 18 Alani i ma godang halak na ro mandapotton ibana, ala dibege nasida dibahen ibana tanda halongangan* i. 19 Didok halak Parise i ma tu akka donganna, “Nungnga takkas diida hamu, marisuang do na tabahen i. Ida ma! Sude do portibi on mangihutton ibana.”+

20 Adong do piga-piga halak Junani na ro tu perayaan i lao manomba Debata. 21 Didapotton nasida ma si Pilippus+ na sian Betsaida na di Galilea, ninna nasida ma, “Tuan, naeng pajuppang hami dohot Jesus.” 22 Lao ma si Pilippus paboahon tu si Andreas, gabe rap ma nasida na dua paboahon tu Jesus.

23 Alai didok Jesus ma tu nasida, “Nungnga juppang tikkina asa dipasangap Anak ni jolma i.+ 24 Tutu do na hudok on tu hamu, molo dang madabu sada eme tu tano jala mate, toktong do i sada. Alai molo dung mate eme i,+ gabe godang ma parbuena. 25 Manang ise na makkaholongi ngoluna, na lao mate do ibana. Alai manang ise na rade agoan ngoluna*+ di portibi on, na paluahon ngoluna do i lao mandapot hangoluan saleleng ni lelengna.+ 26 Manang ise na olo gabe parhobashu ikkon ihuttononna do au. Manang didia au, disi do ibana.+ Jala manang ise na olo gabe parhobashu, pasangapon ni Ama i ma ibana. 27 Saonari susa do huhilala,+ aha ma na lao dohonokku? Ale Amang, palua ma au sian hasusaan on.+ Alai alani i do au umbahen na ro, asa hubolus hasusaan i. 28 Ale Amang, pasangap ma goarmi.” Tarbege ma soara+ sian surgo na mandok, “Nungnga hupasangap i, jala pasangapokku do i muse.”+

29 Dibege akka jolma na jongjong disi do soara i. Adong ma na mandok soara ni ronggur do i. Na asing muse mandok, “Adong suru-suruan na makkatai tu ibana.” 30 Didok Jesus ma, “Tarbege pe soara i dang na lao tu au i, alai lao tu hamu do. 31 Saonari ma tikkina diuhumi portibi on. Jala saonari, na lao dipalao+ ma na mangarajai portibi on.+ 32 Molo dung diangkat* au sian tano on,+ toguokku ma sude ragam ni jolma ro tu au.” 33 Sasittongna didok ibana pe songon i, na lao patuduhon songon i ma parmatena+ satokkin nai. 34 Dialusi akka jolma i ma ibana, “Hubege hami sian Patik i, mangolu saleleng ni lelengna do Kristus i.+ Boasa ma dohononmu ikkon diangkat* Anak ni jolma i?+ Ai ise do Anak ni jolma i?” 35 Didok Jesus ma tu nasida, “Satokkin nai nama adong sinondang na tiur i di tonga-tongamuna. Mardalan ma hamu saleleng adong dope di hamu sinondang i, asa unang dirajai na holom i hamu. Manang ise na mardalan di na holom, dang botoonna tudia ibana lao.+ 36 Saleleng di hamu dope sinondang na tiur i, patudu hamu ma haporseaon tu panondang i asa gabe akka anak ni na tiur i hamu.”+

Dung didok Jesus hatana i, lao ma ibana jala martabuni sian nasida. 37 Ai nang pe nungnga godang dipatuduhon ibana tanda halongangan di jolo ni nasida, dang porsea nasida tu ibana. 38 Gabe saut ma hata ni panurirang* Jesaya na mandok, “Ale Jahowa,* ise do na porsea tu barita na pinaboanami?*+ Jala tu ise ma patuduhonon ni Jahowa* huasona?”*+ 39 Dipaboa si Jesaya ma muse alani aha nasida dang porsea, 40 “Nungnga dipapitung Debata mata ni nasida jala nungnga dipatakkang roha ni nasida, asa unang marnida mata ni nasida, asa unang mangattusi nang roha ni nasida, jala asa unang mulak nasida tu au lao pamalumokku.”+ 41 Didok si Jesaya pe songon i, ala diida ibana do hasangapon ni Kristus jala dihatahon do taringot tu ibana.+ 42 Sasittongna godang do akka pamimpin na porsea tu Jesus.+ Alai alani halak Parise, dang dihatahon nasida i di jolo ni akka jolma asa unang dipakaluar nasida sian sinagoga.*+ 43 Unlomo do roha ni nasida manjalo hasangapon na sian jolma sian hasangapon na sian Debata.+

44 Dung i gogo ma didok Jesus, “Manang ise na porsea tu au, dang holan tu au ibana porsea alai dohot do tu na manuru au i.+ 45 Manang ise na marnida au, diida do nang Ibana na manuru au.+ 46 Dos songon sinondang na tiur do au ro tu portibi on,+ asa unang toktong di na holom+ manang ise na porsea tu au. 47 Alai manang ise na mambege hatakku jala dang dioloi, dang na lao hukumokku ibana. Ai dang na lao manguhumi portibi on au umbahen na ro, alai na lao paluahon portibi on do.+ 48 Manang ise na so mangakkui au jala na so manjalo hatakku, adong do na manguhumi ibana. Akka hata naung huhatahon i ma manguhumi ibana di ari parpudi! 49 Ai dang sian au akka na huhatahon i, alai Ama na manuru au i do na mangalehon paretta tu au taringot tu aha na lao hatahonokku dohot na lao ajarhonokku.+ 50 Huboto do, parohon hangoluan na saleleng ni lelengna+ do parettana. Alani i, manang aha na dipaboa Ama i tu au, i do na huhatahon.”+

13 Andorang so Perayaan Paska, nungnga diboto Jesus naung juppang tikkina+ naeng tinggalhononna portibi on, jala naeng lao ibana mandapotton Ama i.+ Dihaholongi Jesus do akka siseanna na adong di portibi on jala dihaholongi do nasida sahat ro di ujungna.+ 2 Di borngin i rap mangan do Jesus dohot akka apostelna. Alai nungnga dirajai Sibolis roha ni si Judas Iskariot,+ anak ni si Simon. Nungnga dirajai rohana lao menghianati Jesus.+ 3 Nungnga diboto Jesus naung dipasahat Ama i saluhutna tu tanganna. Diboto ibana do na sian Debata ibana jala na ikkon mulak do ibana tu Debata.+ 4 Di tikki na mangan i nasida, jongjong ma Jesus jala dibukka ibana ma abit luarna. Dung i dibuat ma anduk jala dialitton tu gottingna.+ 5 Dibahen ibana ma aek tu baskom, disussi ibana ma pat ni akka siseanna i, jala dilap dohot anduk na di gottingna i. 6 Dung i sahat ma giliran ni si Simon Petrus. Didok si Petrus ma tu Jesus, “Naeng sussionmu do pattu, Tuan?” 7 Dialusi Jesus ma ibana, “Dang saonari attusanmu na hubahen i, haduan pe.” 8 Didok si Petrus ma tu Jesus, “Dang loasokku sussionmu pattu, Tuan.” Didok Jesus ma, “Molo dang husussi patmi,+ dang boi ho rap dohot au.” 9 Didok si Simon Petrus ma, “Tuan, unang ma holan pattu sussi dohot ma tanganku nang ulukku.” 10 Didok Jesus ma tu ibana, “Manang ise naung maridi nungnga ias be dagingna, alani i holan patna nama na porlu disussi. Nungnga ias hamu, alai dang sude hamu ias.” 11 Ai diboto Jesus do ise na lao menghianati ibana.+ Alani i do didok ibana, “Dang sude hamu ias.”

12 Dung sae disussi Jesus pat ni nasida, dipakke ibana ma muse abit luarna i. Hundul ma muse ibana jala didok ma tu nasida, “Diattusi hamu do na hubahen i tu hamu? 13 Dijou hamu do au ‘Guru’ dohot ‘Tuan’ jala tutu do na nidokmuna i.+ 14 Nang pe Tuan au jala Guru, husussi do patmuna.+ Alani i, hamu pe ikkon sussionmuna do pat ni donganmuna.+ 15 Nungnga hupatuduhon sitiruon tu hamu, alani i ikkon diulahon hamu do songon na hubahen i tu hamu.+ 16 Tutu do na hudok on tu hamu, dang umbalga hatoban sian tuanna. Jala dang umbalga halak na disuru sian na manuru ibana. 17 Saonari nungnga diboto hamu akka i, alai marlas ni roha ma hamu molo diulahon hamu i.+ 18 Dang taringot tu hamu sude hatakkon. Ai hutanda do akka halak na hupillit. Alai masa pe i, asa saut do hata ni na tarsurat i+ na mandok, ‘Halak na rap mangan dohot au, ibana do na mangalo au.’*+ 19 Hupaboa do i saonari tu hamu andorang so masa dope i, asa molo dung masa i, porsea ma hamu au do na dipaboa di na tarsurat i.+ 20 Tutu do na hudok on tu hamu, manang ise na manjalo halak na husuru, na manjalo au do i.+ Jala manang ise na manjalo au, na manjalo na manuru au do ibana.”+

21 Dung didok Jesus songon i, marsak ma ibana, jala takkas ma didok, “Tutu do na hudok on tu hamu, adong do sahalak sian hamu na lao menghianati au.”+ 22 Marsiberengan ma akka sisean i, ala dang diboto nasida ise na nidok ni Jesus.+ 23 Alai adong do sahalak sian akka sisean i na hundul jonok tu ibana.* Sisean na dihaholongi Jesus do ibana.+ 24 Dibahen si Simon Petrus ma tanda tu sisean i jala ninna ma, “Ise do na nidokna i?” 25 Dung i lam dipajonok sisean i ma tu Jesus jala ninna ma, “Tuan, ise do na nidokmi?”+ 26 Ninna Jesus ma mangalusi, “Manang tu ise hulehon roti na husornoppon on, i ma ibana.”+ Dung i disornoppon ibana ma roti i, jala dilehon ma i tu si Judas anak ni si Simon Iskariot. 27 Dung dijalo si Judas roti i, dirajai Sibolis ma rohana.+ Ninna Jesus ma tu ibana, “Hatop ma ulahon na lao sibahenonmi.” 28 Alai dang adong sian na hundul na disi na mamboto boasa didok Jesus songon i tu ibana. 29 Dirippu na deba do na disuru Jesus ibana manuhor na porlu tu perayaan i, manang lao mangalehon hepeng tu na pogos. Ai si Judas do na maniop kotak ni hepeng.+ 30 Dung dijalo si Judas roti i, pittor kaluar ma ibana jala nungnga borngin tikki i.+

31 Dung lao si Judas, didok Jesus ma, “Saonari dipasangap ma Anak ni jolma i+ jala dipasangap ma Debata marhite ibana. 32 Pasangapon ni Debata ma Anak ni jolma i+ jala hatop ma i bahenonna. 33 Hamu akka anakkokku, dang leleng be au rap dohot hamu. Luluanmuna ma au, alai songon na hudok tu halak Jahudi, dohonokku ma i muse tu hamu saonari, ‘Dang boi hamu ro tu inganan sitopotokki.’+ 34 Hulehon ma tu hamu paretta na imbaru, marsihaholongan ma hamu.+ Ikkon dihaholongi hamu do akka donganmuna na asing dos songon carakku makkaholongi hamu.+ 35 Molo marsihaholongan hamu,+ botoon ni sude jolma ma na siseanku hamu.”

36 Disukkun si Simon Petrus ma Jesus, “Tuan, naeng tudia do ho lao?” Dialusi Jesus ma, “Dang boi dope ihuttononmu au saonari tu inganan sitopotokki. Alai ihuttononmu ma au haduan.”+ 37 Disukkun si Petrus ma muse, “Boasa dang boi ihuttonokku ho saonari Tuan? Rade do au mate alani ho.”+ 38 Dialusi Jesus ma, “Rade do ho mate alani au? Tutu do na hudok on tu ho, dang martahuak dope manuk, nungnga tolu hali dohononmu na so ditanda ho au.”+

14 “Unang pola busisaon rohamuna.+ Porsea ma hamu tu Debata+ jala porsea ma hamu tu au. 2 Godang do inganan di jabu ni Damang. Molo dang tutu i, dang dohonokku songon i tu hamu. Ai na lao ma au paradehon inganan di hamu.+ 3 Dung lao au paradehon inganan di hamu, ro do au muse jala boanokku ma hamu tu jabukku asa rap hamu dohot au.+ 4 Jala diboto hamu do dalan tu inganan sitopotokki.”

5 Didok si Tomas+ ma tu ibana, “Dang huboto hami manang naeng tudia ho lao Tuan. Songon dia ma boi botoonnami dalan tusi?”

6 Didok Jesus ma tu ibana, “Au do dalan+ dohot hasittongan+ dohot hangoluan.+ Dang adong na boi ro tu Damang i molo so marhite au.+ 7 Molo nungnga ditanda hamu au, pasti ditanda hamu do Damang i. Sian saonari pe, nungnga ditanda hamu Ibana, jala nungnga diida hamu Ibana.”+

8 Didok si Pilippus ma, “Tuan, patudu ma Damang i tu hami. Holan i pe nungnga cukkup di hami.”

9 Didok Jesus ma tu ibana, “Nungnga pola leleng au rap dohot hamu, hape laos so ditanda ho dope au Pilippus? Manang ise na mangida au, nungnga diida ibana Damang i.+ Boasa dope dohononmu, ‘Patudu ma Damang i tu hami’? 10 Na so porsea do ho na marsada au dohot Damang i jala na marsada Damang i dohot au?+ Dang sian pikkiranku sandiri sude na hudok i.+ Alai Damang i do na toktong marsada dohot au, jala Ibana do na mangulahon ulaonna marhite au. 11 Porsea ma ho tu hatakku, na marsada do au dohot Damang i, jala marsada do Damang i dohot au. Molo dang porsea ho tu hatakki, porsea ma ho tu akka na huulahon i.+ 12 Tutu do na hudok on tu hamu, manang ise na porsea tu au, diulahon do akka ulaon na huulahon i. Jala ulahononna dope akka ulaon na umbalga sian i.+ Ai naeng lao nama au tu Damang i.+ 13 Ulahonokku do manang aha na dipangido hamu marhite goarhu, asa gabe dipasangap Damang i marhite Anak i.+ 14 Ulahonokku do manang aha na dipangido hamu marhite goarhu.

15 “Molo dihaholongi hamu do au, oloanmuna do akka parettakku.+ 16 Pangidookku ma tu Damang i asa dilehon tu hamu pangurupi* na asing na mandongani hamu salelengna,+ 17 i ma tondi parbadia na mambahen tarida hasittongan.+ Dang dijalo portibi on anggo tondi parbadia, ala dang diida jala dang ditanda portibi on i.+ Alai ditanda hamu do i, ala toktong do i mandongani hamu jala maringanan di hamu. 18 Dang tinggalhonokku hamu songon dakdanak na so marama so marina. Ro do au muse mandapotton hamu.+ 19 Satokkin nai, dang idaon ni portibi on be au. Alai idaonmuna ma au muse.+ Ai mangolu do au jala hamu pe na lao mangolu do muse. 20 Di ari i, botoonmuna ma na marsada do au dohot Damang i, jala hamu marsada dohot au, jala au marsada dohot hamu.+ 21 Manang ise na manjalo jala na mangoloi parettakku, ibana ma na makkaholongi au. Manang ise na makkaholongi au, dihaholongi Damang i ma ibana. Huhaholongi ma ibana jala takkas ma patuduokku dirikku tu ibana.”

22 Didok si Judas+ (dang si Judas lskariot) ma tu ibana, “Tuan, aha do na masa umbahen naeng patuduonmu dirim tu hami? Boasa dang tu portibi on patuduonmu dirim?”

23 Dialusi Jesus ma ibana, “Halak na makkaholongi au, oloanna do hatakku.+ Dihaholongi Damang i ma ibana, ro ma hami tu ibana jala maringanan ma hami rap dohot ibana.+ 24 Halak na so makkaholongi au, dang oloanna hatakku. Ai dang sian au hata na binegemuna i, alai sian Ama na marsuru au i do.+

25 “Hupaboa do i tu hamu saleleng rap dope au dohot hamu. 26 Alai pangurupi i, i ma tondi parbadia na lao dilehon Damang i marhite goarhu, i ma na mangajarhon sude tu hamu. Jala tondi parbadia i ma na paingotton hamu di sude naung hupaboa tu hamu.+ 27 Na lao toktong do lehonokku hadameon i tu hamu, i ma hadameon na dihilala hamu nuaeng tikki rap dohot au. Hadameon na hulehon i,+ dang songon hadameon na dilehon portibi on. Alani i, unang ma busisaon rohamuna jala unang ma mabiar hamu. 28 Nungnga dibege hamu hatakku na mandok, ‘Na lao ma au jala na ro ma au muse mandapotton hamu.’ Molo dihaholongi hamu au, las ma rohamuna ala na lao do au tu Damang i, ai umbalga do Damang i sian au.+ 29 Hupaboa do i saonari tu hamu andorang so masa dope, asa molo dung masa i porsea ma hamu.+ 30 Dang godang be sidohonokku tu hamu, ai nungnga ro na mangarajai portibi on.+ Alai dang boi dirajai ibana au.*+ 31 Huulahon do songon na diparettahon Damang i,+ asa diboto portibi on na holong do rohakku tu Damang i. Beta, lao ma hita sian on.

15 “Au do hau anggur na sittong jala Damang do pangula ni ladang i. 2 Diponggol Ibana do ganup rattingku na so marparbue jala dipaias do ratting na marparbue asa lam godang parbuena.+ 3 Nungnga ias be hamu alani hata na hupasahat tu hamu.+ 4 Toktong ma hamu marsada dohot au jala toktong ma au marsada dohot hamu. Dang boi ratting i marparbue molo dang toktong i lokkot di bona ni hau anggur i. Songon i ma nang hamu, dang boi hamu marparbue molo dang toktong marsada dohot au.+ 5 Au do hau anggur i jala hamu ma akka rattingna. Manang ise na marsada dohot au jala au marsada dohot ibana, godang ma parbuena.+ Alai molo dang marsada hamu dohot au, dang boi diulahon hamu manang aha. 6 Manang ise na so toktong marsada dohot au, gabe songon ratting na dibolokkon ma ibana jala gabe koring. Papunguon ni halak ma ratting i, disappatton ma i tu api gabe matutung ma. 7 Molo toktong hamu marsada dohot au jala akka hatakki toktong di bagasan rohamuna, pangido hamu ma aha lomo ni rohamuna, pasti dilehon do i tu hamu.+ 8 Gabe dipasangap do Damang i molo toktong godang parbuemuna jala molo toktong dipatudu hamu dirimuna siseanku.+ 9 Dos songon holong ni roha ni Damang i tu au,+ songon i do holong ni rohakku tu hamu. Toktong ma hamu di bagasan holong ni rohakki! 10 Molo dioloi hamu akka parettakku, toktong ma hamu di bagasan holong ni rohakku, songon au na mangoloi akka paretta ni Damang i jala toktong di bagasan holongna.

11 “Huhatahon pe akka i tu hamu, asa marlas ni roha situtu do hamu songon au.+ 12 On ma parettakku: Marsihaholongan ma hamu, songon au naung makkaholongi hamu.+ 13 Dang adong holong na umbalga sian holong ni halak na olo mangalehon ngoluna humokkop akka donganna.+ 14 Ale-alekku do hamu molo diulahon hamu akka parettakku.+ 15 Dang dohonokku be hamu hatoban, ai dang diboto hatoban na diulahon tuanna. Alai dohonokku ma hamu ale-alekku, ai nungnga hupaboa tu hamu sude naung hubege sian Damang i. 16 Dang hamu na mamillit au, alai au do na mamillit hamu. Hupillit do hamu asa toktong hamu marparbue, i ma parbue na toktong adong. Alani i, manang aha dipangido hamu tu Damang i di bagasan goarhu, lehononna ma i tu hamu.+

17 “Huparettahon do akka i tu hamu asa marsihaholongan hamu.+ 18 Molo sogo roha ni portibi on tu hamu, ingot hamu ma naung parjolo do au dihasogohon portibi on sian hamu.+ 19 Molo sian portibi on hamu, dihaholongi portibi on ma hamu ai appunana do hamu. Alai dang sian portibi on hamu,+ ai nungnga hupillit hamu sian portibi on. Alani i ma umbahen na sogo roha ni portibi on tu hamu.+ 20 Ingot hamu ma hata na hudok on tu hamu: Dang umbalga hatoban sian tuanna. Molo dibahen nasida na haccit tu au, bahenon ni nasida do songon i nang tu hamu.+ Molo dioloi nasida hatakku, oloan ni nasida do nang hatamuna. 21 Alai bahenon ni nasida ma i sude tu hamu alani goarhu, ai dang ditanda nasida Ibana na manuru au.+ 22 Molo dang ro au jala molo dang makkatai au dohot nasida, dang mardosa nasida.+ Alai saonari, dang adong be sidalian ni nasida lao manutupi dosa ni nasida.+ 23 Manang ise na marsogo ni roha tu au, sogo do rohana nang tu Damang i.+ 24 Molo dang hea hubahen di tonga-tonga ni nasida tanda halongangan* na so hea dibahen halak na asing, dang mardosa nasida.+ Alai saonari nungnga diida nasida au jala sogo do roha ni nasida tu au nang tu Damang i. 25 Masa pe i, asa saut do hata na tarsurat di Patik ni nasida na mandok, ‘Sogo do roha ni nasida tu au, hape so adong salakku.’+ 26 Suruokku ma tu hamu pangurupi na sian Damang i, i ma tondi parbadia na mambahen tarida hasittongan+ na ro sian Damang i. Molo dung ro, patuduon ni tondi parbadia i ma taringot tu au.+ 27 Hamu pe paboaonmuna do taringot tu au,+ ai nungnga rap au dohot hamu sian mulana.

16 “Hupaboa do akka i tu hamu asa unang tartuktuk hamu. 2 Palaoon ni halak ma hamu sian sinagoga.*+ Sasittongna na ro ma tikkina, dohonon ni ganup halak na mambunu hamu+ ma molo nasida marhobas tu Debata. 3 Alai dibahen nasida pe songon i, ala na so ditanda nasida do Damang i dohot au.+ 4 Alai hupaboa pe akka i tu hamu asa molo masa i, ingotonmuna ma naung hea hupaboa i tu hamu.+

“Dang hupaboa dope i tu hamu sian mulana, ala rap dope au dohot hamu. 5 Saonari, na lao ma au tu Ibana na marsuru au.+ Alai dang adong sahalak pe sian hamu na manukkun tudia au lao. 6 Ala hupaboa akka i tu hamu, gabe massai lungun do rohamuna.+ 7 Nang pe songon i, hudok ma na sasittongna tu hamu, parohon na denggan do tu hamu molo lao au. Ai molo dang lao au, dang ro pangurupi i+ tu hamu. Alai molo lao au, suruokku ma i tu hamu. 8 Molo dung ro i, takkas ma patuduonna tu portibi on taringot tu dosa, taringot tu na sittong, dohot taringot tu panguhuman ni Debata. 9 Na parjolo, takkas ma patuduonna na mardosa portibi on,+ ai dang porsea portibi on tu au.+ 10 Dung i takkas ma patuduonna tu portibi on na sittong na huulahon i. Ai na lao ma au tu Damang i jala dang idaonmuna be au. 11 Takkas ma muse patuduonna ise na lao diuhumi Debata, ai nungnga diuhumi be na mangarajai portibi on.+

12 “Godang dope sidohonokku tu hamu, alai dang tolap dope hamu mangattusi akka i saonari. 13 Alai molo dung ro ibana,* i ma tondi parbadia na mambahen tarida hasittongan i,+ urupanna ma hamu mangattusi hasittongan i. Ai dang sian ibana sandiri na nidokna i. Alai aha na dibege ibana, i do na dipaboa. Paboaonna do muse tu hamu akka na lao masa.+ 14 Pasangaponna ma au,+ ai paboaonna ma tu hamu akka naung dijalo ibana sian au.+ 15 Sude appuna ni Damang i, appunakku do i.+ Alani i do hudok, paboaonna ma tu hamu akka naung dijalo ibana sian au. 16 Satokkin nai dang idaonmuna be au,+ alai satokkin nai idaonmuna ma muse au.”

17 Dung dibege akka siseanna i hata i, didok nasida ma sama nasida, “Aha do lapatan ni hatana i? Didok ibana do tu hita, ‘Satokkin nai dang idaonmuna be au, alai satokkin nai idaonmuna ma muse au,’ jala ‘na lao ma au tu Damang i’.” 18 Didok nasida ma, “Boasa didok ibana ‘satokkin nai’? Aha do lapatan ni i? Dang taattusi na nidokna i.” 19 Diboto Jesus do na naeng disukkun siseanna i ibana. Alani i didok ibana ma tu nasida, “Na masisukkunan do hamu, ala hudok, ‘Satokkin nai dang idaonmuna be au, alai satokkin nai idaonmuna ma muse au’? 20 Tutu do na hudok on tu hamu, na lao tangis ma hamu jala mangandungi, alai marlas ni roha ma portibi on. Susa ma pakkilalaanmuna, alai muba ma hasusaanmuna i gabe las ni roha.+ 21 Haccit do dihilala sahalak ina molo dung juppang tikkina naeng partus. Alai dung ditubuhon ibana anakna i, dang diingot be na haccit i. Ai nungnga las rohana ala naung tubu sahalak jolma tu portibi on. 22 Songon i ma nang hamu, marsak do pakkilalaanmuna saonari, alai tikki pajuppang au muse dohot hamu, pasti las do rohamuna.+ Jala dang adong na boi mambuat las ni rohamuna i. 23 Di tikki i, dang adong be na lao sukkunonmuna tu au. Tutu do na hudok on tu hamu, molo dipangido hamu manang aha tu Damang i+ di bagasan goarhu,+ lehononna do i tu hamu. 24 Sahat tu saonari, dang adong dope dipangido hamu manang aha di bagasan goarhu. Pangido hamu ma asa dapotmuna i, dung i gok ma las ni rohamuna.

25 “Marhite tudosan do huhatahon on sude tu hamu. Na ro ma tikkina, dang marhite tudosan be au makkatai tu hamu, alai takkas ma paboaokku tu hamu taringot tu Damang i. 26 Di tikki i, jaloonmuna ma pangidoonmuna tu Damang i di bagasan goarhu. Na hudok disi, dang na au na mangido tu Damang i na porlu di hamu. 27 Holong do roha ni Damang i tu hamu, ala holong do rohamuna tu au+ jala porsea do hamu na disuru Debata au.+ 28 Na disuru Damang i do au umbahen na ro tu portibi on. Saonari, tadikkonokku ma portibi on jala lao ma au tu Damang i.”+

29 Didok akka siseanna i ma, “Saonari, nungnga takkas be dipaboa ho jala dang dipakke ho be tudosan tikki patorakkon. 30 Nungnga huboto hami be saonari, diboto ho do saluhutna. Jala dang porlu be sukkunon ni halak ho, ai diboto ho do pikkiran ni nasida. Alani i ma hami porsea na ro sian Debata do ho.” 31 Didok Jesus ma tu nasida, “Nungnga porsea be hamu saonari? 32 Na ro ma tikkina jala nungnga ro i, marserak ma hamu jala mulak tu jabumuna be. Ditinggalhon hamu ma holan sahalakku.+ Alai sasittongna, dang gabe holan sahalakku, adong do Ama i mandongani au.+ 33 Hupaboa pe akka on tu hamu asa dapotmuna do hadameon+ marhite au. Susa do hamu dibahen portibi on, alai unang ma mabiar hamu! Ai nungnga hutaluhon portibi on.”+

17 Dung sae didok Jesus akka i, diida ma doppak ginjang, ninna ma, “Ale Amang, nungnga juppang tikkina. Pasangap ma anakmi asa dipasangap anakmi Ho.+ 2 Dilehon Ho do tu ibana huaso mangarajai sude jolma,+ asa boi lehononna hangoluan na saleleng ni lelengna+ tu sude halak na dilehon Ho tu ibana.+ 3 On do hangoluan na saleleng ni lelengna,+ ikkon tandaon ni nasida do* Ho Debata na Sasada i,+ na sittong i dohot Jesus Kristus na sinurum.+ 4 Nungnga hupasangap Ho di tano on+ jala nungnga hupasae ulaon na dipasahat Ho lao ulahonokku.+ 5 Saonari pe ale Amang, lehon ma tu au hasangapon di labbungmi, songon hasangapokku tikki rap au dohot Ho andorang so adong dope portibi on.+

6 “Nungnga hupaboa goarmi tu akka jolma na sian portibi on, na dilehon Ho tu au.+ Ho do nappuna nasida, nungnga dipasahat Ho nasida tu au, jala nungnga dioloi* nasida hatam. 7 Saonari nungnga diboto nasida, molo sude na dipasahat Ho tu au na sian Ho do i. 8 Ai nungnga hupasahat tu nasida sude hata na dilehon Ho tu au,+ jala nungnga dijalo nasida i. Nungnga takkas diboto nasida na ro sian Ho do au,+ jala nungnga dihaporseai nasida na Ho do manuru au.+ 9 Hutangiakkon do nasida. Dang portibi on hutangiakkon, alai akka na pinasahatmi do, ai Ho do nappuna nasida. 10 Sude appunakku, appunam do i. Sude appunam, appunakku do i.+ Jala nungnga dipasangap au di tonga-tonga ni nasida.

11 “Na ro ma au tu Ho, tinggalhonokku nama portibi on, alai di portibi on do nasida.+ Ale Amang na badia, jaga ma nasida+ alani goarmu na nilehonmi tu au, asa gabe sada* nasida, songon Ho na sada* dohot au.+ 12 Tikki rap au dohot nasida, hujaga do nasida+ alani goarmu na nilehonmi tu au. Hujaga do nasida jala dang adong na mago sian nasida,+ asing ni halak na ikkon mago i hian,+ asa saut na tarsurat i.+ 13 Alai saonari, na ro ma au tu Ho. Huhatahon do on sude tikki di portibi on dope au, asa marlas ni roha situtu do nasida songon au.+ 14 Nungnga hupaboa hatami tu nasida, alai sogo do roha ni portibi on tu nasida. Ai dang sian portibi on nasida,+ songon au na so sian portibi on.

15 “Dang hupangido asa dibuat Ho nasida sian portibi on. Alai asa jagaonmu do nasida sian Sibolis.*+ 16 Dang sian portibi on nasida,+ songon au na so sian portibi on.+ 17 Pabadia ma nasida di bagasan hasittongan.+ Hatami do hasittongan.+ 18 Dos songon Ho na manuru au tu portibi on, husuru do nasida tu portibi on.+ 19 Hupabadia do dirikku alani nasida, asa nasida pe gabe badia di bagasan hasittongan.

20 “Dang holan nasida hutangiakkon, alai dohot do akka na porsea tu au alani hata ni nasida. 21 Hutangiakkon do asa gabe sada nasida sude,+ songon Ho Amang na marsada dohot au jala au marsada dohot Ho.+ Dung i, gabe marsada ma nasida dohot hita asa porsea portibi on na Ho do manuru au. 22 Nungnga hulehon hasangapon tu nasida, i ma hasangapon na dilehon Ho tu au, asa gabe sada nasida songon Ho na sada dohot au.+ 23 Marsada do au dohot nasida, jala marsada do Ho dohot au, asa tutu nasida gabe sada. Alani i, botoon ni portibi on ma Ho do na manuru au, jala dihaholongi Ho do nasida songon Ho na makkaholongi au. 24 Ale Amang, dipangido rohakku do asa rap au dohot akka halak na nilehonmi tu au di inganakki,+ asa diida nasida hasangapon na dilehon Ho tu au. Ai dihaholongi Ho do au andorang so adong dope portibi on.*+ 25 Ale Amang na tigor roha, nang pe dang ditanda portibi on Ho,+ alai hutanda do Ho.+ Jala akka halak na nilehonmu tu au, diboto nasida do na Ho manuru au. 26 Nungnga hupaboa goarmu tu nasida jala toktong dope paboaokku i,+ asa adong holong ni roha di nasida songon holong ni rohami tu au, jala asa marsada au dohot nasida.”+

18 Dung sae didok Jesus sudena i, lao ma ibana dohot akka siseanna tu sada taman+ na di bariba ni Rura Kidron.*+ 2 Si Judas na menghianati Jesus i pe, diboto ibana do inganan i. Ai jotjot do Jesus marpungu dohot akka siseanna disi. 3 Diboan si Judas ma tusi sarombongan tentara dohot akka petugas na disuru akka malim kepala* dohot halak Parise. Diboan nasida do obor, lampu, dohot sinjata.+ 4 Ala diboto Jesus do manang aha na naeng masa tu ibana, maju ma ibana jala disukkun ma nasida, “Ise do na dilului hamu?” 5 Dialusi nasida ma, “Jesus halak Nasaret i.”+ Dialusi Jesus ma, “Au do i.” Disi do si Judas na menghianati Jesus i jongjong rap dohot nasida.+

6 Alai tikki didok Jesus tu nasida, “Au do i,” mundur ma nasida jala martinggangan ma nasida.+ 7 Disukkun Jesus ma muse nasida, “Ise do na dilului hamu?” Dialusi nasida ma, “Jesus halak Nasaret i.” 8 Didok Jesus ma, “Nungnga hupaboa tu hamu, au do i. Molo au do na dilului hamu, paloas ma lao nasida sian on.” 9 Gabe saut ma hata na nidokna i hian, “Dang adong na mago nanggo sahalak pe sian nasida na nilehonmi tu au.”+

10 Disittak si Simon Petrus ma podangna, diroro ma hatoban ni sintua ni malim jala ditallik ma pinggolna sabola kanan.+ Si Malkus do goar ni hatoban ni sintua ni malim i. 11 Alai didok Jesus ma tu si Petrus, “Pamasuk ma podangmi tu ingananna.+ Kan ikkon minum do au sian makkuk na dilehon Ama i tu au?”+

12 Ditakkup akka tentara, komandan militer, dohot akka petugas ni halak Jahudi ma Jesus. Dung i diikkat ma tanganna. 13 Diboan nasida ma Jesus parjolo tu si Hannas. Ibana do simatua ni si Kayapas,+ sintua ni malim di taon i.+ 14 Sasittongna ibana do si Kayapas na hea mandok tu halak Jahudi, tumagon do mate sahalak jolma lao paluahon bangso ni nasida.+

15 Tikki i, diihutton si Simon Petrus dohot sahalak sisean na asing do Jesus.+ Ditanda sintua ni malim do sisean na asing i. Dung i, rap masuk ma ibana dohot Jesus tu alaman ni sintua ni malim i. 16 Alai jongjong do si Petrus di luar, di gerbang lao masuk. Dung i, kaluar ma sisean na ditanda ni sintua ni malim i makkatai tu panjaga ni pintu, jala diboan ma si Petrus masuk. 17 Disukkun hatoban borua na manjaga pintu i ma tu si Petrus, “Kan ho do sada sisean ni bawa i?” Dialusi si Petrus ma, “Daong.”+ 18 Ala ngali do ari, dipagalak akka hatoban dohot akka petugas i ma api. Jongjong ma nasida marsisulu di labbung ni api i. Dohot do si Petrus jongjong marsisulu rap dohot nasida.

19 Disukkuni malim kepala ma Jesus taringot tu akka siseanna dohot akka na diajarhon ibana. 20 Dialusi Jesus ma ibana, “Takkas do au makkatai di jolo ni godang jolma. Toktong do au mangajari di sinagoga* dohot di bagas joro,+ inganan parpunguan ni sude halak Jahudi. Dang hea martabuni-tabuni au makkatai. 21 Boasa pola disukkuni hamu au? Sukkun hamu ma halak na hea mambege na huhatahon i. Diboto nasida do aha na hudok.” 22 Dung didok Jesus songon i, dipastap sahalak petugas na jongjong disi ma bohi ni Jesus.+ Didok ma, “Songon i do caram mangalusi malim kepala?” 23 Dialusi Jesus ma ibana, “Molo adong na sala na hudok i, paboa* ma dia na sala. Alai molo sittong do na hudok i, boasa pastaponmu au?” 24 Dung i disuru si Hannas ma nasida mamboan Jesus tu si Kayapas sintua ni malim i.+ Diikkat dope tangan ni Jesus di tikki i.

25 Tikki i jongjong dope si Simon Petrus marsisulu. Didok nasida ma tu ibana, “Kan ho do sada siseanna?” Alai dang diakkui* si Petrus i, jala ninna ma, “Daong.”+ 26 Adong do disi sahalak naposo ni sintua ni malim, keluarga ni bawa na ditallik si Petrus i pinggolna.+ Didok ibana ma: “Ai huida do ho rap dohot ibana di taman i!” 27 Alai tong do dang mangakku si Petrus jala pittor martahuak ma manuk.+

28 Sogot manogot i, diboan nasida ma Jesus sian jabu ni si Kayapas tu jabu ni gubernur.+ Alai dang masuk nasida tu jabu ni gubernur i, asa unang ramun* nasida+ jala asa boi nasida mangallang sipanganon Paska. 29 Dung i kaluar ma si Latus mandapotton nasida, ninna ma, “Aha do ulaon na jahat na dibahen ibana?” 30 Dialusi nasida ma si Latus, “Ai molo dang parjahat ibana, dang pasahatonnami ibana tu ho.” 31 Dung i didok si Latus ma tu nasida, “Boan hamu ma ibana jala adili hamu ma ibana hombar tu patikmuna.”+ Didok halak Jahudi i ma tu ibana, “Dang marhak hami lao mambunu sasahalak.”+ 32 Gabe saut ma hata ni Jesus taringot tu songon dia parmatena.+

33 Dung i masuk ma muse si Latus tu jabu ni gubernur, dijou ma Jesus jala disukkun ma ibana, “Tutu do ho raja ni halak Jahudi?”+ 34 Dialusi Jesus ma, “Sian roham do sukkun-sukkunmi manang na adong do halak paboahon tu ho taringot tu au?” 35 Dialusi si Latus ma, “Ai na dirippu ho do halak Jahudi au? Bangsomi dohot akka malim kepala do na pasahatton ho tu au. Aha huroha diulahon ho?” 36 Dialusi Jesus ma,+ “Dang sian portibi on Harajaokku. Molo sian portibi on Harajaokku,+ pasti aloon ni akka naposokki do nasida asa unang dipasahat au tu halak Jahudi.+ Alai dang sian portibi on Harajaokku.” 37 Dung i disukkun si Latus ma, “Attong tutu do ho raja?” Dialusi Jesus ma, “Tutu, songon na nidokmi ma, raja do au.+ Alani i do au tubu jala ro tu portibi on, ai ikkon paboaokku do hasittongan i.+ Manang ise na mangoloi hasittongan i, tangihononna do soarakku.” 38 Didok si Latus ma, “Ai aha do huroa hasittongan i?”

Dung didok ibana songon i, kaluar ma ibana mandapotton halak Jahudi jala ninna ma tu nasida, “Dang adong dapottu na sala sian ibana.+ 39 Asing ni i, somal do hupalua tu hamu sasahalak tikki Paska.+ Lomo do rohamuna molo hupalua Raja ni halak Jahudi i?” 40 Dung i gogo ma didok nasida, “Unang ma ibana palua, si Barabas ma palua!” Hape pangarampok do si Barabas.+

19 Dung i, disuru si Latus ma asa diboan Jesus jala disuru asa dilissingi.+ 2 Didandan akka tentara i ma suga-suga gabe songon mahkota, dibahen ma i tu uluna, jala dibahen ma pakkeonna abit na ungu.+ 3 Mulak-ulak ma nasida ro tu jolo ni Jesus huhut mandok, “Horas ma di raja ni halak Jahudi!”* Jala dipastapi nasida ma bohina.+ 4 Kaluar ma muse si Latus jala didok ma tu akka jolma i, “Ida hamu ma! Huboan do ibana tuson, asa diboto hamu dang adong dapottu diulahon ibana na sala.”+ 5 Kaluar ma Jesus mamakke mahkota na sian suga-suga jala mamakke jubah na ungu. Didok si Latus ma tu nasida, “Ida hamu ma bawa on!” 6 Dung diida akka malim kepala* dohot akka petugas i ibana, marsurak ma nasida mandok, “Gattung ma ibana tu hau!* Gattung ma ibana tu hau!”+ Didok si Latus ma tu nasida, “Hamu ma na mamboan ibana jala na manguhum mate ibana, ai dang adong dapottu diulahon ibana na sala.”+ 7 Dialusi halak Jahudi i ma ibana, “Adong do patiknami. Jala mangihutton patiknami, ikkon mate do ibana.+ Ai didok ibana do dirina anak ni Debata.”+

8 Dung dibege si Latus hata ni nasida i, gabe lam mabiar ma ibana. 9 Masuk ma ibana muse tu jabu ni gubernur i, jala disukkun ma Jesus, “Sian dia do asalmu?” Alai dang dialusi Jesus ibana.+ 10 Didok si Latus ma tu ibana, “Dang alusanmu au? Dang diboto ho na marhuaso au paluahon ho dohot manguhum mate ho?”* 11 Dialusi Jesus ma ibana, “Dang marhuaso ho tu au, molo so Debata na mangalehon huaso i tu ho. Alani i ma umbalga do dosa ni halak na pasahatton au tu ho.”

12 Dung i, dilului si Latus ma dalan lao paluahon Jesus. Alai marsurak ma halak Jahudi mandok, “Molo dipalua ho ibana, dang dongan ni Kesar ho. Manang ise na mambahen dirina raja, na mangalo Kesar do i.”+ 13 Dung dibege si Latus akka hata i, diboan ibana ma Jesus tu luar. Hundul ma si Latus di kursi pengadilan* di inganan na marlante batu, di bahasa Heber goarna Gabbata. 14 Hira-hira jam 12 arian* do di tikki i jala ari Paska do marsogotna i.*+ Didok si Latus ma tu akka halak Jahudi i, “Ida ma! On do rajamuna i!” 15 Alai marsurak ma nasida muse mandok, “Pamate ma ibana! Pamate ma ibana! Gattung ma ibana tu hau!”* Didok si Latus ma tu nasida, “Pamateonku ma rajamuna on?” Dialusi akka malim kepala ma, “Holan Kesar i do rajanami.” 16 Gabe dipasahat si Latus ma Jesus tu nasida asa digattung tu hau.+

Dung i diboan nasida ma ibana. 17 Huhut dituhuk Jesus hau partinaonan* i, mardalan ma ibana tu inganan na digoari Golgata di bahasa Heber,+ lapatanna Inganan ni Tengkorak.+ 18 Disi, dipakkuhon nasida ma ibana tu hau+ rap dohot dua halak na asing, sada di sabola kananna jala sada nai di sabola kirina.+ 19 Disurat si Latus ma di sada papan, “Jesus halak Nasaret Raja ni Halak Jahudi.”+ Dung i dibahen ma i tu hau partinaonan* i. 20 Godang do halak Jahudi na manjaha i, ai jonok do Jerusalem tu inganan ni Jesus na dipakkuhon tu hau i. Jala tarsurat do i di bahasa Heber, Latin, dohot Junani. 21 Alai didok akka malim kepala ni halak Jahudi i ma tu si Latus, “Unang ma surat, ‘Raja ni Halak Jahudi’, alai surat ma, ‘Didok ibana do dirina Raja ni Halak Jahudi.’” 22 Didok si Latus ma mangalusi, “Aha naung husuratton, dang boi be diuba.”

23 Dung dipakkuhon akka tentara i Jesus tu hau, dibuat nasida ma abit luarna. Dibagi opat ma abitna i, ganup tentara mandapot sada bagian. Dibuat nasida ma muse abitna na asing na dipakke ibana di bagasan. Alai dang dijait abitna i, ai ditonun do i mulai sian ginjang sahat tu toru. 24 Dung i didok tentara i ma tu donganna, “Unang ma taribaki abit on. Tabahen ma undi lao manottuhon manang di ise abit on.”+ Masa pe i asa saut do na tarsurat i, “Dibagi-bagi nasida do abit luarhu jala dibahen nasida do undi lao mambuat i.”+ Sasittongna, songon i ma na dibahen akka tentara i.

25 Jongjong do omak ni Jesus+ rap dohot anggi ni omakna i di labbung ni hau partinaonan* i. Dohot do muse disi si Maria istri ni si Kleopas dohot si Maria Magdalena.+ 26 Tikki diida Jesus jongjong omakna i dohot sisean haholongan ni rohana disi,+ didok ibana ma, “Inang, ibana ma anakmu!” 27 Dung i didok Jesus ma tu sisean i, “Ibana ma inangmu!” Mulai sian i, diboan sisean i ma omak ni Jesus tu jabuna.

28 Dung diboto Jesus naung diulahon ibana sude pangidoan ni Amana na di banua ginjang i, didok ibana ma, “Mauas au.”+ Didok ibana pe songon i asa saut do sude na tarsurat i. 29 Adong ma disi gucci marisi gok anggur na asom. Dung i, disornoppon nasida ma bunga karang tusi jala dibahen ma tu hau-hau* lao dilehon inumonna.+ 30 Dung didai Jesus anggur na asom i, didok ibana ma, “Nungnga huulahon be sude na pinangidomi sian au!”+ Dung i, unduk ma uluna jala mate ma ibana.+

31 Ari Sabat do marsogotna i.+ Alani i, dang olo halak Jahudi molo toktong targattung akka bakke i di hau partinaonan i+ saleleng ari Sabat (ai ari Sabat na balga do on).+ Dipangido halak Jahudi ma tu si Latus asa diponggol pat ni akka na targattung i jala dipaturun bakke ni nasida. 32 Dung i, lao ma akka tentara i mamonggolhon pat ni sidua halak na targattung rap dohot Jesus. 33 Alai dung sahat nasida tu Jesus, diida nasida ma nungnga mate ibana, gabe dang diponggol nasida be patna. 34 Ditullangkon sahalak sian akka tentara i ma tombakna*+ tu rusuk ni Jesus, pittor kaluar ma mudar dohot aek. 35 Halak na mangida na masa i do na paboahon i jala sittong do na pinaboana i. Diboto halak na paboahon i do na sittong hatana i, jala dipaboa ibana pe i asa dohot do hamu gabe porsea.+ 36 Masa pe i asa saut do songon na tarsurat i, “Dang adong na ponggol* nanggo sada pe holi-holina.”+ 37 Jala adong do muse ayat na asing na mandok, “Ditatap nasida ma halak na ditusuk nasida.”+

38 Dung salpu akka i, lao ma si Josep na sian Arimatea mandapotton si Latus. Sisean ni Jesus do ibana, alai dang dipaboa ibana tu halak na asing, ala mabiar do ibana tu halak Jahudi.+ Dipangido ibana ma asa dipaturun bakke ni Jesus. Dioloi si Latus ma pangidoanna i, dung i lao ma ibana mambuat bakke ni Jesus.+ 39 Dohot do si Nikodemus+ ro tusi. Ibana do na hea manjuppangi Jesus borngin-borngin. Diboan ibana do hira-hira 30 kilogram* miak mir* na dicampur* dohot gaharu.+ 40 Dibuat nasida ma bakke ni Jesus i. Dibukkus nasida ma i dohot abit linen. Dibahen ma rempah-rempah+ mangihutton hasomalan ni halak Jahudi lao makkubur sasahalak. 41 Jonok tu inganan ni Jesus dihukum mate adong do sada ladang. Di ladang i, adong do sada kuburan na baru.+ Dang hea dope dipeakkon bakke ni manang ise tusi. 42 Ala ari Sabat ni halak Jahudi do marsogotna i+ jala jonok do kuburan i, dipeakkon nasida ma bakke ni Jesus tu kuburan i.

20 Di ari na parjolo di minggu i, tikki manogot dope, ro ma si Maria Magdalena tu kuburan i.+ Diida ibana ma nungnga targuling batu na manutup kuburan i.+ 2 Dung i marlojong ma ibana mandapotton si Simon Petrus dohot sisean na asing, haholongan ni roha ni Jesus.+ Ninna ma tu nasida, “Nungnga dibuat halak be Tuan sian kuburan i+ jala dang huboto hami didia dipeakkon nasida ibana.”

3 Dung i, lao ma si Petrus dohot sisean na asing i tu kuburan. 4 Rap marlojong ma nasida na dua. Alai ukkatop do sisean na asing i sian si Petrus, gabe parjolo ma ibana sahat tu kuburan. 5 Unduk ma ibana lao mangida tu bagasan kuburan i. Diida ibana ma peak kain linen i disi,+ alai dang masuk ibana tu bagasan. 6 Di pudina, ro ma si Simon Petrus jala masuk ma ibana tu kuburan i. Diida ibana ma peak kain linen disi. 7 Kain na dipakke mangalilit ulu ni Jesus dang rap peak dohot kain na asing na dipakke mambukkus daging ni Jesus. Nungnga gulung kain i jala peak di inganan na asing. 8 Masuk ma muse sisean na asing na parjolo sahat tu kuburan i. Dung diida ibana, gabe porsea ma ibana. 9 Alai dang diattusi nasida dope ayat na mandok na ikkon dipahehe Jesus sian na mate.+ 10 Dung i, mulak ma akka sisean i tu jabu ni nasida.

11 Alai sai jongjong do si Maria tumatangis di labbung ni kuburan. Huhut sai tangis, unduk ma ibana mangida tu bagasan ni kuburan i. 12 Gabe diida ibana ma disi dua suru-suruan+ marabit na bottar, hundul di inganan ni bakke ni Jesus hian. Sada hundul di inganan ni uluna jala sada nai hundul di inganan ni patna. 13 Didok suru-suruan i ma tu si Maria, “Boasa sai tangis ho inang?” Dialusi ibana ma, “Nungnga dibuat halak Tuanki, jala dang huboto didia dipeakkon nasida ibana.” 14 Dung didok songon i, dibereng ibana ma tu pudi jala diida ma Jesus jongjong disi. Alai, dang diboto ibana na Jesus do i.+ 15 Didok Jesus ma tu ibana, “Boasa sai tangis ho inang? Ise do na dilului ho?” Dirippu si Maria do ibana pangula ni ladang i, gabe ninna ma, “Amang, molo ho do na mambuat ibana, paboa ma tu au didia dipeakkon ho ibana, asa hubuat ibana sian i.” 16 Didok Jesus ma tu ibana, “Maria!” Dibereng si Maria ma tu pudi, jala didok ibana ma di bahasa Heber, “Rabboni!” (lapatanna “Guru!”) 17 Didok Jesus ma tu ibana, “Unang ma sai tiop au, ai dang lao dope au tu Ama i. Alai lao ma ho manjuppangi akka haha anggikku,+ jala dokkon ma tu nasida, ‘Na lao ma au tu Damang i+ dohot Amamuna jala tu Debatakku+ dohot Debatamuna.’” 18 Dung i lao ma si Maria Magdalena, dipaboa ma i tu akka sisean. Ninna ma, “Nungnga huida Tuan!” Dipaboa ibana ma tu nasida hata ni Jesus i.+

19 Di ari na parjolo di minggu i, marpungu ma akka sisean tikki borngin. Dikucci nasida do pintu ala mabiar nasida tu halak Jahudi. Dung i ro ma Jesus jala jongjong di tonga-tonga ni nasida, ninna ma, “Dame ma di hamu.”+ 20 Dung didok Jesus songon i, dipatuduhon ma tanganna dohot rusukna+ tu nasida. Las ma roha ni akka sisean i mangida Tuan.+ 21 Didok Jesus ma muse tu nasida, “Dame ma di hamu.+ Dos songon Ama naung manuru au,+ suruokku ma hamu.”+ 22 Dung didok ibana songon i, diombusson ibana ma hosana doppak nasida jala didok ma, “Jalo hamu ma tondi parbadia.+ 23 Molo disesa hamu dosa ni sasahalak, naung disesa Debata ma dosana i. Alai molo dang disesa hamu dosana, dang disesa Debata dosana i.”

24 Alai anggo si Tomas+ sahalak sian apostel na 12 i, na laos digoari si Kembar, dang rap dohot nasida disi tikki ro Jesus. 25 Tikki didok akka sisean na asing tu ibana, “Nungnga huida hami Tuan!” Didok ibana ma tu nasida, “Saleleng so huida tanganna na hona pakku i jala hupamasuk jari-jarikku tusi dohot tu rusukna,+ dang porsea au.”

26 Dung salpu ualu ari, marpungu ma muse akka sisean i di sada jabu jala dohot do si Tomas disi. Dikucci nasida do pintu, alai ro ma Jesus jala jongjong di tonga-tonga ni nasida. Didok Jesus ma, “Dame ma di hamu.”+ 27 Dung i didok Jesus ma tu si Tomas, “Ida ma tangankon, pamasuk ma jari-jarim tusi dohot tu rusukkon. Unang be ganggu roham alai porsea ma ho.” 28 Didok si Tomas ma tu ibana, “Tuanku jala Debatakku!”* 29 Didok Jesus ma tu ibana, “Ala naung diida ho do au umbahen na porsea ho? Marlas ni roha ma akka na porsea nang pe dang diida au.”

30 Godang dope akka tanda halongangan* na dibahen Jesus di jolo ni akka siseanna na so disurat di gulungan on.+ 31 Alai disurat do akka on asa porsea hamu Jesus i do Kristus, Anak ni Debata. Jala molo porsea hamu, dapotmuna ma hangoluan marhite goarna.+

21 Dung salpu i, dipataridahon Jesus ma muse dirina tu akka siseanna di Laut Tiberias. Songon on ma na masa tikki dipataridahon Jesus dirina tu nasida. 2 Marpungu do disi si Simon Petrus, si Tomas (na laos digoari si Kembar),+ si Natanael+ na sian Kana na di Galilea, akka anak ni si Sebedeus,+ dohot dua halak sisean na asing. 3 Didok si Simon Petrus ma tu nasida, “Naeng lao nama au manakkup dekke.” Didok nasida ma tu ibana, “Dohot ma hami.” Dung i lao ma nasida marparau, alai dang adong dapot ni nasida manang aha pe saborngin i.+

4 Tikki lao torang ari, jongjong ma Jesus di topi ni laut. Alai dang diboto akka sisean i na Jesus do i.+ 5 Dung i disukkun Jesus ma tu nasida, “Adong do siallangon* di hamu?” Dialusi nasida ma, “Dang adong!” 6 Didok Jesus ma tu nasida, “Sappatton hamu ma jala i tu sabola kanan ni parau i asa dapotmuna dekke.” Disappatton nasida ma jala i. Alai alani godang ni dekke i, gabe dang tartarik ni nasida be jala i.+ 7 Didok sisean na dihaholongi Jesus i+ ma tu si Petrus, “Tuan do i!” Dung dibege si Simon Petrus na Tuan do i, dipakke ma abit luarna, ai dang marpakkean hian ibana. Dung i manibbung ma ibana tu laut. 8 Alai ro ma akka sisean na asing marparau na gelleng. Disarat nasida ma jala na gok dekke i, ai dang pola dao nasida sian darat, hira-hira 90 meter* do daona.

9 Dung sahat nasida di topi ni laut, diida nasida ma adong dekke dohot roti di atas ni gara. 10 Didok Jesus ma tu nasida, “Boan ma deba tuson dekke na dapotmuna i.” 11 Dung i nakkok ma si Simon Petrus tu parau. Ditarik ibana ma jala i tu darat. Gok do jala i marisi dekke na balga, godangna 153 ekor. Nang pe godang dekke i, alai dang maribak jala i. 12 Didok Jesus ma tu nasida, “Ro ma hamu mangan!” Alai dang adong sian akka sisean i na barani mandok, “Ise do ho?” Ai nungnga diboto nasida Tuan i do i. 13 Dibuat Jesus ma roti jala dibagihon ma tu nasida, songon i ma muse dibahen tu dekke i. 14 On ma na patoluhalihon+ Jesus pataridahon dirina tu akka siseanna dung dipahehe ibana sian na mate.

15 Dung sae nasida mangan, didok Jesus ma tu si Simon Petrus, “Simon, anak ni si Johannes, umbalga do holong ni roham tu au sian apala akka on?” Dialusi si Simon ma, “Olo Tuan, diboto ho do na holong rohakku tu ho.” Didok Jesus ma tu ibana, “Lehon ma mangan anak ni biru-birukki.”+ 16 Didok Jesus ma muse paduahalihon tu ibana, “Simon, anak ni si Johannes, holong do roham tu au?” Ninna ibana ma mangalusi, “Olo Tuan, diboto ho do na holong rohakku tu ho.” Ninna Jesus ma tu ibana, “Parmahani ma anak ni biru-birukki.”+ 17 Didok Jesus ma muse patoluhalihon tu ibana, “Simon anak ni si Johannes, holong do roham tu au?” Gabe lungun ma roha ni si Petrus ala nungnga tolu hali disukkun Jesus songon i. Alani i didok si Petrus ma, “Tuan, sude do diboto ho. Diboto ho do na holong rohakku tu ho.” Didok Jesus ma tu ibana, “Lehon ma mangan anak ni biru-birukki.+ 18 Tutu do na hudok on tu ho, tikki poso ho, ho sandiri do na mamakkehon bajum jala lao do ho manang na tudia lomo ni roham. Alai molo dung matua ho, lehononmu ma tanganmu jala halak ma na mamakkehon bajum, boanonna ma ho tu inganan na so dihalomohon roham.” 19 Didok Jesus pe songon i, lao patuduhon songon dia do parmate ni si Petrus ala pasangappon Debata. Dung i didok Jesus ma muse, “Toktong ma ihutton au.”+

20 Dibereng si Petrus ma tu pudi, diida ibana ma sisean na dihaholongi Jesus+ mardalan mangihutton nasida. Ibana do sisean na hundul di labbung ni Jesus tikki mangan di borngin i jala na mandok, “Ise do na lao menghianati ho Tuan?” 21 Dung diida si Petrus ibana, disukkun ma Jesus, “Boha do taringot tu ibana Tuan?” 22 Didok Jesus ma tu ibana, “Molo lomo rohakku mangolu ibana sahat tu na ro au, boasa pola pikkirhononmu i? Toktong ma ihutton au.” 23 Gabe rarat ma barita di tonga-tonga ni akka siihutton Jesus na mandok dang na lao mate sisean i. Alai dang adong didok Jesus songon i, na nidok ni Jesus, “Molo lomo rohakku mangolu ibana sahat tu na ro au, boasa pola pikkirhononmu i?”

24 Ibana do sisean+ na paboahon dohot na manuratton hata on jala taboto do sittong na pinaboana i.

25 Massai godang dope na dibahen Jesus, alai molo sude disuratton sada-sada, dang siat be sude gulungan i di portibi on.+