SURAT NA PADUAHON TU SI TIMOTEUS

1 Sian si Paulus naung gabe apostel ni Kristus Jesus na sesuai tu lomo ni roha ni Debata lao paboahon janji taringot tu hangoluan na dilehon tu akka halak na marsada dohot Kristus Jesus,+ 2 mandapotton si Timoteus anakku na huhaholongi:+

Anggiat ma dipatuduhon tu ho burju ni roha,* asi ni roha, dohot dame ni roha na sian Debata Ama i dohot na sian Kristus Jesus Tuanta i.

3 Mandok mauliate do au tu Debata. Husomba do Ibana marhite panggora ni rohakku na ias songon na dibahen akka ompukku. Sai huingot do ho di tangiakku arian nang borngin. 4 Molo huingot ho na tangis i, sai naeng pajuppang do au dohot ho asa sonang rohakki. 5 Ai huingot do ho, dipatuduhon ho do haporseaonmu sian parniulaonmu.+ Parjolo do oppungmu si Lois dohot omakmu si Eunike patuduhon i, jala pos do rohakku songon i do tong haporseaonmu.

6 Alani i do hupaingot ho, asa unang lupa ho tu* silehon-lehon ni Debata na adong di ho, na dilehon tikki hubahen tanganku tu atas ni ulum.+ 7 Ai tondi parbadia na dilehon Debata tu hita dang mambahen hita mabiar.+ Alai dibahen do hita gabe margogo,+ marholong ni roha, jala marbisuk. 8 Alani i, unang ma maila ho paboahon tu akka halak taringot tu Tuanta+ manang taringot tu au na dipenjara alani ibana. Alai dohot ma ho manaon hasusaan+ alani barita na uli i jala huhut ma ho mangasahon huaso ni Debata.+ 9 Dang alani pambahenatta umbahen na dipalua hita jala dijou gabe akka halak na badia.+ Alai alani lomo ni rohana dohot alani asi ni rohana+ na massai balga i do. Nungnga sian najolo dilehon Ibana i tu hita marhite Kristus Jesus. 10 Alai, saonari nungnga lam takkas be dipatudu asi ni rohana na massai balga i dung tarida Kristus Jesus+ Sipalua hita. Ibana do naung paujukkon hamatean.+ Jala marhite barita na uli,+ dipatuduhon ibana do songon dia mandapot hangoluan+ dohot daging na so ra sega.+ 11 Dipillit do au gabe parbarita,+ apostel, jala guru lao paboahon barita na uli i.

12 Alani i ma hutaon sudena on,+ alai dang maila au disi.+ Ai hutanda do Debata na huhaporseai. Jala pos do rohakku, jagaonna do na hupasahat i tu Ibana sahat tu ari i.+ 13 Toktong ma ihutton akka aturan naung ditottuhon di ajaran na sittong+ naung dibege ho sian au. Toktong ma patuduhon haporseaonmu dohot holongmu ala naung marsada ho dohot Kristus Jesus. 14 Jaga ma arta na arga naung dipasahat tu ho marhite tondi parbadia na adong di hita.+

15 Nungnga diboto ho naung sude halak di Provinsi Asia+ maninggalhon au, dohot do si Pigelus nang si Hermogenes. 16 Anggiat ma dipatuduhon Tuhan* asi ni rohana tu keluarga ni si Onesiporus.+ Ai jotjot do dipatogu ibana rohakku jala dang maila ibana nang pe dipenjara au. 17 Gariada tikki di Rom ibana, sai dibahen ibana do sian nasa gogona lao mangalului au, jala juppangna do au. 18 Anggiat ma dilehon Tuhan* tu ibana asi ni roha na sian Jahowa* di ari i. Jala takkas do diboto ho sude na dibahen ibana tu au tikki di Epesus.

2 Alani i anakku,+ asi ni roha ni Kristus Jesus na massai balga i ma na toktong mambahen ho margogo. 2 Taringot akka na dibege ho sian au dohot sian akka saksi,+ pasahat ma i tu akka bawa na boi dihaporseai, ai nasida do muse na boi denggan mangajari na asing. 3 Songon tentara+ ni Kristus Jesus na burju ma ho na dohot manaon hasusaan i.+ 4 Ai sai naeng dibahen sahalak tentara do las roha ni komandanna. Alani i, dang adong sahalak tentara na mandalatton tugasna huhut marsitutu mangalului hepeng.* 5 Asing ni i, halak na martanding pe dang mandapot hadiah* molo dang diihutton ibana aturan tikki martanding.+ 6 Jala sahalak pangula naung loja mangula do na patut parjolo mambuat parbue ni na niulana. 7 Pikkiri ma na hudok i tu ho. Bahenon ni Tuhan* i do ho mangattusi saluhutna.

8 Ingot ma, nungnga hehe Jesus Kristus sian na mate.+ Ibana do pinoppar ni si Daud,+ jala sesuai do on tu barita na uli na hubaritahon i.+ 9 Alani i ibana do au gabe marsitaonon jala dipenjarahon songon sahalak parjahat.+ Alai nang pe songon i, dang tarabbatan* anggo hata ni Debata.+ 10 Dibahen i, sabar do au manaon hasusaan alani akka halak na tarpillit,+ asa boi nasida mandapot haluaon dohot hasangapon na saleleng ni lelengna marhite Kristus Jesus. 11 Sittong do hata on: Molo rap mate hita dohot ibana, rap mangolu ma muse hita dohot ibana.+ 12 Molo sabar hita manaon hasusaan, mamaretta ma hita gabe raja rap dohot ibana.+ Molo dang olo hita mangakkui ibana, ibana pe dang olo mangakkui hita.+ 13 Nang pe dang taulahon hata ni Debata, alai anggo Debata toktong do ulahononna aha naung didok Ibana. Ai dang ulahononna na maralo tu lomo ni rohana.

14 Toktong ma paingot nasida taringot tu akka on. Di jolo ni Debata, podai ma nasida asa unang marbadai alani akka hata. Dang adong guna ni i, ai gabe gaor* do halak na manangihon dibahen i. 15 Marsitutu ma ho mambahen dirim gabe halak na dihalomohon Debata, gabe songon parkarejo na so siissakan, denggan mangajari jala patorakkon hasittongan i.+ 16 Unang ma tangihon akka halak na mandok hata na so marguna na mambahen halak dang pasangappon Debata.+ Ai gabe lam dao do dibahen nasida akka jolma sian Debata. 17 Songon baro na rarat* do hata ni nasida i. Dohot do si Himeneus dohot si Piletus mangihutton nasida pararatton hata sisongon i.+ 18 Nungnga lilu nasida sian hasittongan. Didok nasida do naung masa haheheon i+ jala nungnga sega haporseaon ni piga-piga halak alani nasida. 19 Alai nang pe songon i, togu do fondasi na dibahen Debata. Adong do disi materai na marsurat, “Ditanda Jahowa* do akka na di Ibana,”+ dohot “Ganup na manjou goar ni Jahowa*+ ditadikkon ma hajahaton.”

20 Dang holan barang-barang na sian mas dohot perak na adong di jabu na balga. Alai adong do na sian hau dohot sian tano liat. Na deba dipakke tu na sangap, alai na deba nai tu na hurang sangap. 21 Alani i, manang ise na mandao sian barang na dipakke tu na hurang sangap, gabe barang na dipakke tu na sangap ma ibana, dipabadia, marguna tu nappunasa, jala rade tu akka ulaon na denggan. 22 Jadi pasiding ma dirim sian hisap-hisap ni akka na poso. Alai bahen ma sian nasa gogom lao mangulahon na sittong, lao patuduhon haporseaon, holong, dohot dame ni roha. Ulahon ma i rap dohot akka halak na manjou Tuhan* i sian ias ni rohana.

23 Pasiding ma sukkun-sukkun na so marlapatan dohot parsoalan na so marguna,+ ai diboto ho parbadaan do ujung ni i. 24 Ai dang porlu marbada naposo ni Tuhan* i, alai ikkon lambok do tu* sude halak,+ malo mangajari, sabar manaon akka na jahat,+ 25 jala lambok mamissang akka halak na mangalo.+ Anggiat ma dilehon Debata tikki tu nasida asa muba, asa dapot ni nasida parbinotoan na bagas taringot tu hasittongan i.+ 26 Marhite songon i, nang pe nungnga ditakkup jorat ni Sibolis nasida lao mangulahon lomo ni rohana, alai dung dapot ni nasida hasittongan i, gabe diattusi nasida ma na ikkon kaluar nasida sian jorat i.+

3 Alai boto hamu ma on, na ro ma tikki hasusaan di ari parpudi.+ 2 Ai makkaholongi dirina sandiri ma jolma, holongan di hepeng, marhata manggang, ginjang rohana, mangaleai, dang mangoloi natorasna, dang diboto mandok mauliate, dang setia, 3 dang marroha holong, dang olo mardos ni roha, paroa-roahon donganna, dang diboto mangorom diri, parmuruk-muruk, makkasogohon na denggan, 4 mangulahon na jahat tu donganna, sijogal rukkung, sombong, unlomo do rohana mangoloi giot-giot ni rohana sian apala mangoloi Debata, 5 disomba nasida do Debata idaon, alai di parngoluonna dang dipatudu na disomba nasida Debata.+ Padao ma dirim sian halak sisongon i. 6 Adong do sian nasida na sipsip masuk tu rumah tangga ni halak marhite mangaliluhon akka borua na gale haporseaonna. Diakkali nasida do akka borua naung mangulahon dosa jala na dirajai hisap-hisap ni daging. 7 Sai marsiajar do akka borua i alai dang boi takkas diattusi nasida hasittongan i.

8 Songon si Jannes dohot si Jambres na mangalo si Musa, songon i ma nasida mangalo hasittongan i. Nungnga sega pikkiran ni nasida. Jala dang lomo roha ni Debata tu nasida, ala dang sesuai tu haporseaonna parngoluon ni nasida. 9 Alai dang ro didia pambahenan ni nasida i. Ai botoon ni sude halak nama haotoon ni nasida dos songon na masa tu si Jannes dohot tu si Jambres.+ 10 Alai anggo ho, diihutton ho do sude na huajarhon i, pangalahokku, tujuan ni ngolukku,+ haporseaokku, hasabarokku, holongku, dohot togu ni rohakku. 11 Diboto ho do muse taringot tu sitaonon na masa tu au tikki di Antiokia,+ di Ikonium,+ dohot di Listra.+ Dibahen do na haccit tu au di tikki i. Alai sabar do au manaon i jala dang mandele. Dipalua Tuan* i do au sian sudena i.+ 12 Sasittongna, dibahen do na haccit tu sude halak na naeng manomba Debata dohot tu sude na gabe sisean ni Kristus Jesus.+ 13 Alai lam tu jahatna ma akka parjahat dohot panipu, mangaliluhon do nasida jala laos dililuhon.+

14 Alai nungnga diparsiajari ho akka i jala dihaporseai ho do i.+ Ai diurupi do ho asa pos roham tu akka i, jala ditanda ho do ise na mangajarhon i tu ho. Alani i, toktong ma ihutton sudena i. 15 Jala ingot ma,+ nungnga sian na metmet* ditanda ho surat na badia i,+ na mambahen ho marbisuk jala na mambahen ho mandapot haluaon ala porsea tu Kristus Jesus.+ 16 Ai sian* Debata+ do sude Surat na Badia i jala dilehon marhite panogu-noguon ni tondi parbadia. Marguna do i mangajari,+ mamissang, padenggatton pangalaho,* jala manogu-nogu lao mangulahon na sittong,+ 17 asa denggan situtu sude naposo ni Debata jala gabe rade mangulahon sude ulaon na denggan.

4 Dipillit do Kristus Jesus lao manguhumi+ na mangolu dohot na mate.+ Ulahononna ma i dung dipataridahon+ ibana dirina gabe raja di Harajaonna.+ Di jolo ni Debata dohot di jolona, huparettahon ma tu ho: 2 Baritahon ma hata ni Debata,+ di tikki susa dohot di tikki sonang. Ulahon ma i sian saonari, unang palambat-lambat. Pissang,+ pasingot, jala podai ma halak na sala. Jala sabar ma ho mangulahon i songon sahalak guru na malo mangajari.+ 3 Ai na ro ma tikkina, dang olo be halak manangihon ajaran na sittong.+ Alai ihuttonon ni nasida ma lomo ni roha ni nasida sandiri. Papunguon ni nasida ma akka guru na holan paboahon hata na tabo begeon ni nasida.*+ 4 Dang olo be nasida manangihon hasittongan, alai akka cerita na so tutu nama diparrohahon nasida. 5 Alai anggo ho, jaga ma roham di sasude. Martahan ma ho manaon hasusaan.+ Ulahon ma ulaon ni parbarita na uli.* Jala, marhobas ma ho tu Debata sian nasa gogom.+

6 Ai nungnga diusehon au songon pelean siinumon,+ jala nungnga jonok tikki haluaonku.+ 7 Nungnga marsitutu au sian nasa gogokku,+ nungnga marlojong au sahat tu ujungna,+ jala nungnga huihutton haporseaon songon na dibahen Kristus i. 8 Sian saonari, nungnga diparade sada mahkota di au.+ Dilehon Tuan Hakim na tigor i+ do mahkota sisongon i tu halak na mangulahon na sittong. Dilehon do i gabe upa di au di ari i.+ Alai dang holan di au, dohot do tu sude halak na paimahon harorona i.

9 Usahahon ma asa hatop ho ro mandapotton au. 10 Ai nungnga ditadikkon si Demas+ au, ala dihaholongi ibana do portibi* on. Nungnga lao ibana tu Tessalonik, si Kreskes tu Galatia, si Titus tu Dalmatia. 11 Holan si Lukas nama dison rap dohot au. Alap ma si Markus, dung i boan ma ibana tuson, ai boi do ibana mangurupi au di ulaonku marhobas tu Debata. 12 Alai, nungnga husuru si Tikikus+ tu Epesus. 13 Molo ro ho tuson, boan ma baju panas na hutinggalhon di Troas di jabu ni si Karpus. Jala boan ma muse akka gulungan i, tarlumobi akka gulungan* na sian kulit i.

14 Godang do na jahat na dibahen si Aleksander tukkang tombaga i tu au. Baloson ni Jahowa* do i sesuai tu pambahenanna.+ 15 Ho pe, manat ma ho maradoppon ibana. Ai sogo hian do rohana tu barita na tabaritahon i.

16 Tikki hubela haporseaokku parjolo sahali di jolo ni akka pamaretta, dang adong manang ise pe na mandongani au. Sude do nasida maninggalhon au. Sai anggiat ma dang dibalos Debata pambahenan ni nasida i.* 17 Alai jongjong do Tuan i di labbungku jala dipargogoi do au. Gabe boi ma hupasahat barita na uli i sian nasa gogokku, asa sude bangso boi manangihon i.+ Jala dipalua do au sian baba ni singa.+ 18 Paluaon ni Tuan i do au sian sude hajahaton jala paluaonna do au asa sahat tu Harajaonna na di banua ginjang i.+ Hasangapon ma di ibana saleleng ni lelengna. Amen.

19 Pasahat ma tabekku tu si Priska, tu si Akuila,+ dohot tu dongan sajabu ni si Onesiporus.+

20 Tinggal do si Erastus+ di Korint jala hutinggalhon do si Tropimus+ di Miletus ala marsahit ibana. 21 Usahahon ma asa ro ho andorang so ro musim dingin.

Sahat ma tu ho tabe ni si Eubulus, si Pudes, si Linus, si Klaudia, dohot tabe ni sude akka donganta sahaporseaon.

22 Anggiat ma dipasu-pasu Tuan i haburjuonmi. Sai didongani asi ni rohana na massai balga i ma ho.