SURAT TU HALAK HEBER

1 Jotjot do Debata makkatai tu akka omputta najolo marhite akka panurirang* jala marragam do cara na dipakke Ibana lao makkatai tu nasida.+ 2 Alai di tikki parpudi on, marhite Anakna do Ibana makkatai tu hita.+ Dipillit do Anakna i gabe nappuna* sasude,+ jala marhite ibana do dibahen nasa na adong di langit dohot di tano* on.+ 3 Marhite Anakna i tarida do hasangapon ni Debata+ jala ibana do na suman situtu tu Debata.+ Dijaga ibana do nasa na adong marhite hata ni Debata na marhagogoon i. Jala dung ias hita dibahen sian dosatta,+ hundul ma ibana di surgo di sabola kanan ni Debata na Marmulia i.+ 4 Asing ni i, dibahen do ibana untimbo sian akka suru-suruan,+ ai dilehon do tu ibana goar na ussangap sian akka suru-suruan.+

5 Ai tu suru-suruan dia ma hea didok Debata, “Anakku do ho, mulai sadari on Bapakmu ma Au”?+ Manang, “Au ma na gabe Bapakna jala ibana gabe anakku”?+ 6 Alai tikki disuru Debata ro Anakna Siakkangan i+ tu portibi on, didok do, “Ikkon marsinggang do sude suru-suruan ni Debata tu ibana.”

7 Taringot tu suru-suruanna, didok Debata do, “Dibahen Ibana do akka suru-suruanna massai gogo* jala dibahen Ibana do parhobasna+ songon api na marjibbur-jibbur.”+ 8 Alai taringot tu Anakna i didok Debata do, “Debata do na gabe tahtam+ saleleng ni lelengna. Jala hatigoran do na gabe tukkot Harajaonmu. 9 Holong do roham tu na sittong jala magigi do roham mangida hajahaton. Alani i do dipillit* Debata ho, dipillit Debatami.+ Jala tu ho do unggodang dilehon las ni roha i sian apala tu akka donganmu.”+ 10 Adong do muse tarsurat, “Ale Tuhan,* Ho do na mambahen* fondasi ni tano on sian mulana jala dibahen Ho do langit i marhite tanganmu sandiri. 11 Na lao salpu do langit dohot tano on, alai anggo Ho na lao toktong do adong. Jala dos songon pakkean, na lao buruk do langit dohot tano on. 12 Jala loppitonmu do langit dohot tano on songon jubah jala gattionmu do i sude songon pakkean. Alai, dang na lao muba anggo Ho jala dang na lao hea marujung ngolum.”+

13 Alai tu suru-suruan na dia ma hea didok Debata, “Hundul ma ho di sabola kananku paima hubahen akka musum gabe sidege-degean ni patmu”?+ 14 Sude do nasida kan marhobas tu Debata?+ Jala sude do nasida kan disuru mangurupi akka na lao diselamatton i?

2 Alani i do ikkon lam marsitutu hita mamparrohahon akka naung tabege,+ asa unang maup hita.+ 2 Ai molo tutu do masa hata na dipasahat marhite suru-suruan i,+ jala molo dijalo halak na so mangulahon dohot na mangalanggar patik i do hukuman na patut jaloonna,+ 3 songon dia ma hita boi malua molo dang taparrohahon haluaon na balga i?+ Ai Tuanta i+ sandiri do na parjolo paboahon haluaon i, jala akka na mambege i ma na paposson rohatta taringot tusi. 4 Laos dohot do Debata paposson rohatta marhite akka tanda halongangan*+ dohot marhite tondi parbadia na dilehon sesuai tu lomo ni rohana.+

5 Ai taringot tu tano na tahatai saonari, dang suru-suruan dibahen Debata mamaretta tano i di ari na naeng ro.+ 6 Alai adong do sahalak saksi na hea mandok, “Tung aha ma huroha jolma i, umbahen na diingot Ho ibana? Jala tung aha ma anak ni jolma i, umbahen na diparrohahon Ho ibana?+ 7 Holan saotik do dibahen Ho ibana uttoru sian akka suru-suruan, dilehon Ho do hamuliaon dohot hasangapon tu ibana, jala dipillit Ho do ibana marhuaso tu akka na tinoppam. 8 Sude do dibahen Ho tunduk tu toru ni patna.”+ Ala nungnga dibahen Debata ibana mangarajai sudena i,+ dang adong be na so dipatunduk tu ibana.+ Tutu, dang boi dope taida saonari naung dirajai ibana sudena i.+ 9 Nang pe najolo dibahen ibana uttoru sian akka suru-suruan,+ alai saonari taida do Jesus manjalo hasangapon dohot hamuliaon. Ai nungnga marsitaonon ibana sahat tu na mate.+ Jala alani asi ni roha ni Debata na massai balga i, mate do ibana humokkop sude jolma.+

10 Ai tu hamuliaon ni Debata do nasa na adong jala marhite Ibana do adong sudena i. Alani i, tama do dibahen Debata gabe sun denggan Pamimpin ni haluaon+ ni nasida i marhite sitaonon,+ asa boi akka anakna i manjalo hamuliaon.+ Ai dipalua Debata do nasida marhite Pamimpin i. 11 Sada do Ama+ ni Jesus dohot Ama ni akka na dipabadia i.+ Alani i, dang maila ibana mandok nasida akka haha anggina.+ 12 Ai didok ibana do, “Baritahonokku ma goarmu tu akka haha anggikku, jala marende do au mamuji Ho di tonga-tonga ni punguan i.”+ 13 Didok do muse, “Tu Ibana do au marpos ni roha.”+ Jala didok do muse, “Ida ma! Dison do au rap dohot akka dakdanak na dilehon Jahowa* tu au.”+

14 Ala jolma* do “akka dakdanak” i gabe jolma ma ibana,+ asa marhite hamamatena, ripassononna ma Sibolis+ na parohon hamatean i.+ 15 Paluaonna ma* sude halak na mabiar tu hamatean. Ai nungnga diparhatoban biar ni roha tu hamatean i+ akka halak saleleng ngolu ni nasida. 16 Pinoppar ni si Abraham+ do na diurupi ibana, dang akka suru-suruan. 17 Alani i, ikkon dos do ibana dohot “akka haha anggina” di sasudena.+ Marhite i, boi ma ibana gabe sintua ni malim na marasi ni roha jala na setia marhobas tu Debata. Jala gabe boi ma dilehon ibana pelean+ na mambahen jolma mardame tu Debata.*+ 18 Ala ibana sandiri pe nungnga hea marsitaonon tikki diuji,+ gabe boi ma ibana mangurupi akka halak na marsitaonon tikki diuji.+

3 Alani i, ale akka dongan na badia, na dohot dijou tu banua ginjang,+ parrohahon hamu ma Jesus na tahaporseai gabe apostel dohot sintua ni malim i.+ 2 Setia do ibana tu Debata na mamillit ibana,+ songon si Musa na setia marhobas di jabu ni Debata.*+ 3 Umbalga do hasangapon+ ni Jesus sian si Musa. Ai umbalga do hasangapon ni halak na pajongjokkon jabu sian jabu i sandiri. 4 Ganup jabu, adong do na pajongjokkon, alai Debata do na manoppa nasa na adong. 5 Setia do si Musa marhobas di jabu ni Debata, jala i ma na gabe gombaran tu* na lao dipaboa di ari na naeng ro. 6 Alai anggo Kristus i, songon anak+ do ibana na setia mangurus jabu ni Debata. Hita do jabu ni Debata+ molo toktong hita barani makkatai,* jala molo gomos tatiop sahat tu ujungna janji na tapaima-ima, na tabanggahon i.

7 Alani i, songon na dipaboa marhite tondi parbadia,+ “Sadari on, molo dibege hamu soarakku, 8 unang ma pajogal hamu rohamuna songon ompumuna. Dibahen nasida do Au tarrimas tikki diuji nasida Au di padang gurun.+ 9 Dialo nasida do Au jala diuji, hape diida nasida sandiri do akka na huulahon saleleng 40 taon i.+ 10 Alani i do Au magigi tu nasida, jala hudok ma, ‘Sai dialo nasida do hatakku di bagasan roha ni nasida, jala dang ditanda nasida akka dalanku.’ 11 Gabe tarrimas ma Au jala marsumpa ma Au mandok, ‘Dang boi nasida masuk tu ari paradianakki.’”+

12 Ale akka dongan, manat ma hamu, asa unang adong nanggo sada pe sian hamu na marroha na jahat, na gabe so porsea, jala gabe mandao sian Debata na mangolu i.+ 13 Alai toktong ma patogu hamu donganmuna ganup ari, saleleng so marujung dope hata “Sadari on”.+ Molo dibahen hamu songon i, dang na lao adong sian hamu na gabe jogal rohana ala dioto-otoi dosa. 14 Boi do tajalo songon na dijalo Kristus i molo tatiop gomos sahat ro di ujungna haporseaotta na sian mulana i.+ 15 Ai songon i do didok na tarsurat i, “Sadari on, molo dibege hamu soarakku, unang ma pajogal hamu rohamuna songon ompumuna. Dibahen nasida do Au tarrimas.”+

16 Adong do bangso naung mambege hata i alai sai dibahen dope Debata tarrimas. Bangso na dia ma i? Nasida do kan bangso na diboan si Musa kaluar sian Mesir i?+ 17 Tu bangso na dia do Debata magigi saleleng 40 taon?+ Kan tu bangso na mardosa na bakkena marragean di padang gurun i do?+ 18 Jala tu bangso na dia do Debata marsumpa na so boi nasida masuk tu ari paradiananna i? Kan tu bangso na so mangoloi Ibana i do? 19 Alani i boi ma taida, ala na so porsea do nasida tu Debata umbahen na so boi nasida masuk tu ari paradiananna i.+

4 Nungnga didok Debata, boi dope hita masuk tu ari paradiananna i. Alani i manat ma hita asa unang adong sian hita na so boi masuk tusi.+ 2 Ai songon nasida, nungnga tajalo barita na uli i.+ Alai dang marlapatan barita i di nasida. Ai dang songon haporseaon ni halak na manangihon i haporseaon ni nasida. 3 Alai anggo hita, masuk do tu ari paradiananna i, ai tapatudu do haporseaotta. Jala taringot tu halak na so manangihon i, didok Debata do, “Gabe tarrimas jala marsumpa ma Au, ‘Dang boi nasida masuk tu ari paradianakki,’”+ nang pe nungnga sae sude ulaon ni Debata mulai sian parmulaan ni portibi on.*+ 4 Ai didok Ibana do di sada ayat taringot tu ari papituhon i, “Maradi ma Debata sian sude ulaonna di ari papituhon.”+ 5 Jala didok Debata do muse, “Dang boi nasida masuk tu ari paradianakki.”+

6 Ala mangalo do akka na parjolo mambege barita na uli i, dang boi be nasida masuk tu ari paradianan i. Alai adong dope piga-piga na boi masuk tusi.+ 7 Alani i dung manang na sadia leleng, ditottuhon Debata ma muse ari na digoari “Sadari on” di psalmen ni si Daud, songon naung didok di surat on, “Sadari on, molo dibege hamu soarakku, unang ma pajogal hamu rohamuna.”+ 8 Ai sugari ma nungnga diboan si Josua+ bangso i masuk tu inganan paradianan i, dang paboaon ni Debata be taringot tu ari na asing dukkon i. 9 Alani i, adong dope ari paradianan na songon ari Sabat tu naposo ni Debata.+ 10 Ai manang ise naung masuk tu ari paradianan ni Debata, nungnga maradi ibana sian ulaonna sandiri, songon Debata naung maradi sian ulaonna.+

11 Alani i, tabahen ma sian nasa gogotta asa boi hita masuk tu ari paradianan i, asa unang adong sian hita na mangihutton halak na so mangoloi i.+ 12 Ai mangolu do hata ni Debata i jala marhuaso.+ Uttajom do i sian podang sidua baba.+ Boi do i manusuk jala manirang hosa sian daging, manirang sumsum sian holi-holi. Jala boi patuduhon na adong di roha dohot na adong di pikkiranta. 13 Ai dang adong toppaan ni Debata na buni sian Ibana.+ Sude do takkas tarida jala bukka di jolo ni Debata na manguhumi hita sesuai tu parniulaotta.+

14 Nungnga adong be sintua ni malimta na sangap naung masuk tu surgo. Ibana do Jesus Anak ni Debata i.+ Alani i, toktong ma tabaritahon haporseaotta taringot tu ibana.+ 15 Diattusi sintua ni malimta i do hagaleotta,+ ai nungnga hea ibana manaon sude hasusaan ni jolma, alai dang mardosa ibana.+ 16 Alani i, tapajonok ma diritta tu tahta ni Debata na patuduhon asi ni roha na massai balga i jala pos ma rohatta martangiang tu Ibana.+ Dung i tahilala ma asi ni rohana dohot haburjuonna* na mangurupi hita di tikki na tahaporluhon.

5 Dipillit do ganup sintua ni malim sian tonga-tonga ni jolma. Dipillit do ibana lao mangurus akka na porlu tu ulaon ni jolma manomba Debata.+ Jala sintua ni malim i ma na mamelehon silehon-lehon dohot pelean hasesaan ni dosa.+ 2 Boi do ibana marasi ni roha* tu akka halak na hurang parbinotoanna, dohot tu halak na mangulahon na sala,* ai ibana sandiri pe adong do hagaleonna. 3 Alani i, ikkon dilehon ibana do pelean tu dosana sandiri, songon pelean na dibahen ibana alani dosa ni bangso i.+

4 Dang adong jolma na boi mandapot hasangapon sisongon i alani lomo ni rohana sandiri, alai ikkon Debata do na mamillit ibana, songon na masa tu si Aron.+ 5 Songon i ma nang Kristus, dang na pasangappon dirina+ ibana umbahen na gabe sintua ni malim. Alai Debata do na pasangappon ibana. Ai didok Debata do tu ibana di na tarsurat i, “Anakku do ho, mulai sadari on Bapakmu ma Au.”+ 6 Jala didok do di ayat na asing, “Ho do malim na saleleng ni lelengna na songon si Melkisedek.”+

7 Tikki mangolu Jesus di portibi on,* dipasahat ibana do tangiangna dohot pangidoanna marhite angguk-angguk dohot ilu-ilu+ tu Debata. Ai Debata do na boi paluahon ibana sian hamatean. Ditangihon do tangiangna i, ala dihabiari ibana do Debata. 8 Nang pe anak ni Debata ibana, marsiajar do ibana asa boi toktong mangoloi Debata. Marsiajar do ibana sian sitaonon na masa tu ibana.+ 9 Dung tarida na dioloi ibana Debata di sasude,*+ gabe boi ma akka halak na mangoloi ibana selamat jala mandapot hangoluan na saleleng ni lelengna marhite ibana.+ 10 Ai nungnga dipillit Debata ibana gabe sintua ni malim songon si Melkisedek.+

11 Godang dope na naeng dipaboa hami tu hamu taringot tu Kristus. Alai maol do i patorangon, ai lambat do hamu mangattusi.* 12 Ai mangihutton lelengna nian,* nungnga boi hamu gabe guru. Hape porlu dope hamu diajari taringot tu ajaran na parjolo sian hata ni Debata.+ Jala ikkon susu dope inumonmuna, dang tarallang hamu dope sipanganon na karas. 13 Akka halak na ikkon susu dope inumonna, dakdanak dope i.+ Dang diboto i dope dia na sittong dohot na so sittong. 14 Alai sipanganon na karas, sipanganon ni halak na magodang do i. Ai halak sisongon i toktong do jolo dipikirhon ibana aha na lao diulahon.* Alani i gabe tarlatik ma ibana mamboto dia na sittong dohot na sala.

6 Alani i, dung sae taparsiajari ajaran na parjolo+ taringot tu Kristus, marsitutu ma hita asa toras.+ Unang be holan ajaran na parjolo i na sai taparsiajari. Unang ma holan ajaran taringot tu hamubaon sian ulaon na so marlapatan* na taparsiajari, ajaran taringot tu marhaporseaon, 2 ajaran taringot tu pandidion, ajaran taringot tu na mangappehon tangan,+ ajaran taringot tu haheheon ni halak na mate,+ dohot ajaran taringot tu panguhuman saleleng ni lelengna. 3 Alani i, marsitutu ma hita asa toras jala tapangido ma asa diurupi Debata hita.

4 Ai adong do deba naung hea manjalo hatiuron na sian Debata,+ naung manjalo silehon-lehon sian banua ginjang, naung manjalo tondi parbadia ni Debata, 5 naung manjalo hata ni Debata, jala naung manjalo pasu-pasu* na lao dilehon Debata tu portibi on di ari* na naeng ro. 6 Alai ditadikkon+ nasida do haporseaonna i. Dang na boi be nasida diurupi asa muba, ai dipakkuhon nasida do muse Anak ni Debata di hau, jala dipaila do ibana di jolo ni godang halak.+ 7 Mandapot pasu-pasu na sian Debata do tano on alani udan na jotjot turun tu atasna. Ai dibahen udan i do maraek tano on. Alani i, tubu ma akka suan-suanan na marguna tu na mangula tano i. 8 Alai molo suga-suga do na tubu, dang adong guna ni tano i. Diburai ma i jala ditutung.

9 Alai akka dongan na hinaholongan, nang pe hudok hami songon i, pos do rohanami dumenggan do hamu sian akka halak naung manadikkon haporseaonna i. Jala pos do rohanami, pasti diulahon hamu do ulaon na mambahen hamu boi mandapot haluaon i. 10 Ai tigor do Debata, dang lupahononna akka naung diulahon hamu dohot holong naung dipatudu hamu tu goarna i.+ Dipatuduhon hamu do i marhite mangurupi* akka na badia i sahat tu saonari. 11 Nang pe songon i, lomo do rohanami asa toktong hamu ringgas songon naung dibahen hamu saleleng on. Molo diulahon hamu songon i, boi ma pos situtu rohamuna sahat tu ujungna+ na lao saut sude na pinaima-imamuna i.+ 12 Unang ma gabe malas hamu.+ Alai lomo do rohakku ditiru hamu akka halak na porsea jala na sabar. Ai nasida do na gabe manjalo akka na dijanjihon Debata.

13 Tikki marjanji Debata tu si Abraham, marsumpa do Ibana na lao pasautonna janjina i. Marhite dirina sandiri do dibahen Debata sumpana. Ai dang adong be na umbalga sian Ibana.+ 14 Ninna Ibana do, “Pasu-pasuokku ma ho, jala bahenokku ma massai godang situtu pinopparmu.”+ 15 Ala sabar do si Abraham paimahon, dapotna ma janji ni Debata i. 16 Molo marsumpa jolma, pasti marhite halak na ussangap sian ibana do bahenonna sumpana i. Jala sumpa ni nasida i ma na paujukkon sude parsoalan, ai sumpana i do na gabe jaminan lao patoguhon janjina.+ 17 Songon i ma nang Debata, marsumpa do Ibana lao paposson roha ni halak na marhak manjalo janjina i.+ Sumpana i ma na gabe jaminan na so muba janjina* i. 18 Dang na olo muba janji dohot sumpa ni Debata, jala dang boi Ibana margabus.+ Akka on ma na patoguhon roha ni akka na marlinggom tu Debata, gabe lam pos ma rohatta na lao saut do sude akka janji na adong di jolotta. 19 Songon jangkar ni kapal do janji i+ di ngolutta na mambahen hita togu, marpos ni roha, jala na mamboan hita masuk tu pudi ni tire i.+ 20 Nungnga parjolo Jesus masuk tusi,+ lao mambukka jala paradehon dalan tu hita. Ibana do sintua ni malim na saleleng ni lelengna na songon si Melkisedek.+

7 Pajuppang ma si Melkisedek raja ni Salem malim ni Debata Natumimbul i dohot si Abraham. Tikki i, baru mulak do si Abraham sian parporangan manaluhon akka raja. Dipangido si Melkisedek ma tu Debata asa dipasu-pasu si Abraham.+ 2 Jala dilehon si Abraham ma tu ibana saparsappulu sian sude na dibuat ibana sian parporangan i. Molo diterjemahon, lapatan ni goar ni si Melkisedek, i ma “Raja ni Hatigoran”. Alai ala raja ni Salem do ibana, lapatan ni goarna gabe “Raja ni Hadameon”. 3 Dang adong na mamboto ise bapak ni si Melkisedek jala ise omakna. Dang adong na manurat taringot tu tarombona, ari hatutubuna, dohot hamamatena. Alai dibahen do ibana songon Anak ni Debata, jala gabe malim ma ibana saleleng ni lelengna.+

4 Boi ma taida massai sangap do si Melkisedek i! Pola do dilehon omputta* si Abraham tu ibana saparsappulu na dumenggan sian sude na dibuat ibana sian parporangan i.+ 5 Tutu, molo mangihutton Patik, pinoppar ni si Lepi+ do na dipillit gabe malim. Nasida do na diparettahon lao papunguhon saparsappulu sian na adong di bangso i.+ Nang pe haha anggi ni nasida do bangso i jala sasittongna dohot do bangso i pinoppar ni si Abraham. 6 Hape anggo si Melkisedek, dang pinoppar ni si Lepi ibana alai dijalo ibana do saparsappulu sian si Abraham. Jala dipasu-pasu ibana do si Abraham nang pe sasittongna si Abraham do na mandapot janji ni Debata.+ 7 Takkas do taboto, ussangap do na mamasu-masu sian na manjalo pasu-pasu i. 8 Halak na boi mate do pinoppar ni si Lepi na manjalo saparsappulu i. Alai anggo bawa na songon si Melkisedek na manjalo saparsappulu i toktong do mangolu songon na tarsurat i.+ 9 Boi ma didok, gari halak Lepi na manjalo saparsappulu i pe, digarar nasida do saparsappulu marhite si Abraham. 10 Ai pinoppar ni si Abraham do si Lepi. Alai dang tubu dope si Lepi tikki pajuppang si Abraham dohot si Melkisedek.+

11 Nungnga disurat di Patik ni si Musa aturan taringot tu hamalimon ni halak Lepi.+ Attong, molo boi do hamalimon i mangurupi halak malua sian dosa, boasa dipillit dope malim na asing na songon si Melkisedek?+ Kan nungnga cukkup be di hita malim na songon si Aron? 12 Molo nungnga muba aturan taringot tu hamalimon i, ikkon muba do nang Patik i.+ 13 Sian marga na asing do bawa na didok dison. Jala dang adong dope halak sian marga i na hea marhobas di langgatan.+ 14 Sude do halak mamboto, sian marga Juda+ do Tuanta i. Alai dang hea didok si Musa na lao adong malim sian marga i.

15 Lam takkas ma i tarida dung ro malim na asing+ na songon si Melkisedek.+ 16 Dang ala mangihutton Patik, manang ala pinoppar ni malim umbahen na dipillit si Melkisedek gabe malim. Alai ala dilehon do tu ibana huaso na mambahen ibana mandapot hangoluan na so ra suda.+ 17 Ai adong do ayat na mandok taringot tu ibana, “Ho do malim na saleleng ni lelengna na songon si Melkisedek.”+

18 Alani i, dang pakkeon be aturan na parjolo i, ala adong do batasna jala dang marguna.+ 19 Ai dang boi Patik i pasautton sude lomo ni roha ni Debata.+ Alai diparade Debata do janji na dumenggan,+ na boi mambahen hita jonok tu Debata.+ 20 Asing ni i, nungnga marsumpa Debata tikki mamillit Jesus gabe malim 21 (ai dang marsumpa Debata tikki mamillit akka na asing i gabe malim, alai marsumpa do Ibana tikki mamillit Jesus gabe malim, didok do taringot tu ibana, “Nungnga marsumpa Jahowa* jala dang solsolanna sumpana i,* ‘Ho do malim na saleleng ni lelengna’”).+ 22 Alani i, Jesus ma jaminan tu parjanjian na dumenggan i.+ 23 Dung i muse, mate do akka malim i.+ Alani i, ikkon gattion ni na asing ma malim na parjolo i lao manorusson ulaon ni nasida. 24 Alai anggo Jesus, dang porlu ibana gattion ni na asing, ai mangolu do ibana saleleng ni lelengna.+ 25 Dibahen i, boi do ibana paluahon sude jolma na pajonokkon dirina tu Debata marhite ibana. Ala mangolu do ibana saleleng ni lelengna, gabe boi ma ibana mambahen pangidoan tu Debata taringot tu nasida.+

26 Ai sintua ni malim na songon i do na porlu di hita. Na setia tu Debata, na so olo mangulahon na jahat, na so ramun,*+ na asing sian halak pardosa, jala nungnga dipatimbo di atas ni langit.*+ 27 Ibana dang songon sintua ni malim na asing, na ikkon ganup ari mangalehon pelean+ alani dosana dohot alani dosa ni bangso i.+ Alai holan sahali do ulahononna i ro di saleleng ni lelengna, i ma tikki dilehon ibana dirina gabe pelean.+ 28 Jolma na mardosa do sintua ni malim na dipillit mangihutton Patik.+ Alai, dang songon i halak na dipillit marhite janji na mardongan sumpa+ na adong dukkon Patik i. Ibana do Anak naung dibahen sun denggan+ saleleng ni lelengna i.

8 On do na uppetting sian sude naung tahatai i: Nungnga adong di hita sintua ni malim na songon i.+ Jala nungnga hundul ibana di sabola kanan ni tahta ni Debata na Marmulia i.+ 2 Marhobas ma ibana di inganan na badia+ di kemah na sasittongna i. Jahowa* do na pajongjokkon i dang jolma. 3 Sasittongna, lao pasahatton silehon-lehon dohot pelean do umbahen na dipillit sahalak sintua ni malim. Alani i, Jesus pe ikkon adong do na lao pelehononna.+ 4 Molo di tano on do ibana, dang boi ibana gabe malim.+ Ai nungnga adong akka malim na asing na pasahatton akka pelean na sesuai tu Patik i. 5 Sude na diulahon akka malim i gabe gombaran+ do i lao patuduhon akka na di banua ginjang.+ Tarida ma i sian paretta ni Debata tu si Musa tikki naeng dipajongjong kemah na badia i. Didok Debata do tu ibana, “Ikkon bahenonmu do i sude songon rancangan na hulehon tu ho di dolok i.”+ 6 Alai saonari, nungnga dilehon tu Jesus ulaon na uppetting sian ulaon ni akka malim i. Ai ibana sandiri pe nungnga gabe parhitean*+ di parjanjian na dumenggan,+ naung sah dibahen akka janji na dumenggan i.+

7 Molo dang adong na hurang di parjanjian na parjolo i, dang porlu be parjanjian na paduahon.+ 8 Alai adong do diida Debata na hurang di bangso i. Ai “ninna Jahowa* do, ‘Ida ma, na ro ma tikkina, bahenokku ma parjanjian na imbaru tu halak Israel dohot tu halak Juda.’ 9 Jala didok Jahowa* do muse, ‘Parjanjian na imbaru na hubahen i, dang songon parjanjian na hubahen tu ompu ni nasida, di ari tikki hutogu nasida kaluar sian Mesir.+ Alai dang setia nasida tu parjanjian na hubahen i. Alani i, dang parduli be Au tu nasida.’

10 “‘On ma parjanjian na lao bahenokku tu bangso Israel dukkon na masa i,’ ninna Jahowa.* ‘Bahenokku ma akka patikku di pikkiran ni nasida jala surattonokku ma i di roha ni nasida.+ Au ma na gabe Debata ni nasida jala nasida ma na gabe bangsokku.+

11 “‘Dang porlu be ajaran ni nasida donganna sabangso dohot haha anggina lao mananda Jahowa.* Ai sude nama nasida mananda Au, mulai sian na mora sahat tu na pogos, mulai sian na poso sahat tu na matua. 12 Salpuhonokku ma hasalaan ni nasida jala dang ingotokku be akka dosa ni nasida.’”+

13 Ala nungnga dipaboa Debata taringot tu “parjanjian na imbaru” gabe buruk ma parjanjian naung leleng i.+ Jala nasa naung buruk dohot naung leleng hatop nama i salpu.+

9 Ai di parjanjian na parjolo i adong do akka aturan lao marhobas tu Debata jala adong do kemah lao manomba Debata+ di tano on. 2 Adong dua inganan di bagasan ni kemah i. Di inganan na parjolo dibahen ma inganan ni lampu,+ meja, dohot roti pelean.+ Digoari ma inganan on, Inganan na Badia.+ 3 Di pudi ni tire na paduahon+ di kemah i, adong ma inganan na asing na digoari Inganan na Massai Badia.+ 4 Disi, adong do inganan ni dupa na sian mas+ dohot poti parpadanan+ na marlappis mas.+ Di poti i, adong do baskom na sian mas na marisi manna,+ tukkot ni si Aron na hea martumbur,+ dohot dua batu panuratan+ ni patik* i. 5 Di atas ni poti i adong do dua kerubim* na mulia na mangalinggomi tutup*+ ni poti i. Alai dang tikkina saonari lao patorakkon i sude.

6 Dung dibahen sudena songon i, ganup ari masuk ma akka malim tu Inganan na Badia na adong di kemah i lao marhobas tu Debata.+ 7 Alai holan sintua ni malim do na boi masuk tu Inganan na Massai Badia i sahali sataon.+ Ikkon boanonna do mudar+ lao dipelehon tu Debata. Dilehon ibana ma i gabe pelean hasesaan ni dosana sandiri+ dohot dosa na so sengaja diulahon bangso i.+ 8 Jadi marhite tondi parbadia, takkas do dipatudu na so bukka dope dalan tu Inganan na Massai Badia i* saleleng adong dope kemah na parjolo i.*+ 9 Lao manggombarhon tikki sisaonari on do kemah i.+ Nang pe adong dibahen disi aturan lao pasahatton silehon-lehon dohot pelean,+ alai dang boi akka i mambahen massai denggan situtu panggora ni roha ni halak na manomba Debata.+ 10 Ditottuhon do sudena i di Patik ni si Musa jala holan tu sipanganon, siinumon, dohot tu akka ulaon paiasson diri* do i dibahen.+ Holan tu pardagingon do dibahen akka aturan i,+ na marlakku sahat tu na juppang tikkina padengganon ni Debata saluhutna.

11 Alai nungnga gabe sintua ni malim be Kristus jala nungnga tahilala be akka na denggan saonari. Tikki gabe sintua ni malim ibana, masuk do ibana tu kemah na umbalga jala na dumenggan. Dang jolma na pajongjokkon kemah i jala dang sian tano on kemah i. 12 Masuk do ibana tu Inganan na Massai Badia i, mudarna sandiri+ do na dipelehon ibana, dang mudar ni hambing manang mudar ni lombu jantan na poso. Masuk do ibana tusi sahali ro di saleleng ni lelengna, jala marhite ibana, nungnga tadapot haluaon* na manoktong i.+ 13 Ai gari mudar ni hambing manang mudar ni lombu jantan na poso+ jala abu ni lombu na dipispisson* tu halak na ramun* boi mambahen nasida ias di jolo ni Debata,+ 14 apalagi ma mudar ni Kristus i,+ pasti dumenggan do i kan sian i? Ai marhite tudu-tudu ni tondi parbadia na manoktong i, dipelehon ibana do dirina tu Debata gabe pelean na sempurna. Mudarna i ma na mambahen ias panggora ni rohatta sian akka ulaon na jahat na hea taulahon,+ asa boi hita marhobas tu Debata na mangolu i.+

15 Alani i do Kristus gabe parhitean* ni parjanjian na imbaru,+ asa boi halak na tarjou i manjalo janji taringot hangoluan na saleleng ni lelengna.+ Ai marhite hamamatena ditobus+ ma nasida jala dipalua sian hasalaan na diulahon nasida tikki marlakku dope parjanjian na parjolo i. 16 Molo adong dibahen sada parjanjian, ikkon mate do jolma na mambahen parjanjian i.* 17 Ai gabe sah do parjanjian i molo dung adong na mate. Alana, dang marlakku parjanjian i molo mangolu dope halak na mambahen parjanjian i. 18 Alani i ma dang marlakku parjanjian na parjolo i molo so adong mudar. 19 Ai ganup dipaboa si Musa paretta na adong di Patik i tu bangso i, dibuat ibana do mudar ni lombu jantan na poso, dohot mudar ni hambing jala dicampur ma i dohot aek. Dibuat ma ibbulu na merah, dohot hau-hau,* dipispisson ma i tu bukku* ni parjanjian i dohot tu sude bangso i 20 jala didok ma, “Mudar on ma na mambahen sah parjanjian na diparettahon Debata lao ihuttononmuna.”+ 21 Dohot do dipispisson si Musa mudar i tu kemah i dohot tu sude peralatan na dipakke tu ulaon na badia i.*+ 22 Sasittongna mangihutton Patik, hira sude do dipabadia marhite mudar+ jala molo dang adong mudar diusehon, dang adong hasesaan ni dosa.+

23 Alani i, porlu do bahenonna songon i lao pabadiahon+ akka na manggombarhon+ na di banua ginjang. Alai anggo akka na di banua ginjang i, ikkon pelean na dumenggan do dibahen lao pabadiahon i. 24 Dang masuk Kristus tu Inganan na Massai Badia na dipajongjong jolma.+ Ai holan manggombarhon Inganan na Massai Badia na sasittongna do i.+ Alai tu surgo do ibana masuk+ jala saonari di jolo ni Debata do ibana humokkop hita.+ 25 Dibahen ibana pe songon i dang na lao mulak-ulak ibana mamelehon dirina, songon sintua ni malim na masuk ganup taon+ tu Inganan na Massai Badia i lao mamelehon mudar ni binatang.* 26 Ai molo songon sintua ni malim i do, ikkon mulak-ulak ma ibana marsitaonon sian mulai ditoppa portibi on.* Alai saonari di panutup ni jaman* on, nungnga dipatuduhon ibana dirina sahali ro di saleleng ni lelengna lao manesa dosa ni jolma marhite mamelehon dirina.+ 27 Holan sahali do jolma mate ro di saleleng ni lelengna, dung i diadili Debata ma ibana. 28 Songon i do nang Kristus i, holan sahali ro di saleleng ni lelengna do dipelehon ibana dirina lao manesa dosa ni godang halak.+ Jala harorona na paduahalihon i dang na lao manesa dosa ni jolma, alai ro do ibana lao paluahon akka jolma na paima-imahon ibana.+

10 Sude na adong di Patik i, holan bayangan+ ni akka na denggan na masa di ari na naeng ro do i.+ Jala dang i dope na sasittongna. Nang pe ganup taon sai dilehon akka pelean, alai dang boi i* mambahen sempurna akka na manomba Debata.+ 2 Molo boi do pelean i mambahen sempurna halak na mamboan pelean i, dang porlu be sai dilehon akka pelean. Ai molo nungnga ias nasida dibahen pelean i, dang mardosa be nasida didok roha ni nasida. 3 Alai alani pelean siganup taon i,+ gabe sipaingot ma i di nasida na mardosa do nasida. 4 Ai dang boi mudar ni lombu jantan dohot mudar ni hambing manesa dosa.

5 Alani i tikki ro ibana tu portibi on, didok ibana do, “‘Dang lomo roham tu silehon-lehon dohot tu pelean. Alai diparade Ho do sada daging di au. 6 Dang dipangido ho pelean situtungon dohot pelean hasesaan ni dosa.’+ 7 Dung i hudok ma, ‘Nungnga ro be au. Disurat do taringot au di bagasan gulungan. Ale Debatakku, lomo do rohakku mangulahon lomo ni roham.’”+ 8 Alai nungnga didok ibana hian, “Dang lomo roham jala dang dipangido Ho pelean, silehon-lehon, pelean situtungon, dohot pelean hasesaan ni dosa,” i ma akka pelean na dilehon sesuai tu Patik i. 9 Dung i didok ibana ma muse, “Nungnga ro be au lao mangulahon lomo ni roham.”+ Alani i, disesa ibana ma aturan na parjolo i asa boi marlakku aturan na paduahon i. 10 Sesuai tu “lomo ni roha”+ ni Debata i, nungnga dipabadia be hita marhite daging ni Jesus Kristus na dipelehon sahali ro di saleleng ni lelengna.+

11 Asing ni i, ganup ari do akka malim mangulahon ulaonna di ingananna be lao marhobas tu Debata.+ Jala mulak-ulak do dipelehon nasida pelean na sarupa,+ nang pe sasittongna, dang boi pelean i manesa sude dosa.+ 12 Alai anggo Kristus i, holan sada do pelean na dipelehon ibana lao manesa dosa ro di saleleng ni lelengna, jala hundul do ibana di sabola kanan ni Debata.+ 13 Disi ma ibana paimahon sahat tu na dibahen Debata akka musuna gabe sidege-degean ni patna.+ 14 Marhite pelean na sada i, dibahen ibana do gabe sempurna sude halak na dipabadia i+ sahat tu saleleng ni lelengna. 15 Asing ni i, marhite tondi parbadia dipapos do rohatta dung didok, 16 “‘On ma parjanjian na lao bahenokku tu bangso Israel dukkon na masa i,’ ninna Jahowa.* ‘Bahenokku ma akka patikku di roha ni nasida jala surattonokku ma i di pikkiran ni nasida.’”+ 17 Dung i didok do muse, “Dang ingotokku be akka dosa dohot akka hasalaan ni nasida.”+ 18 Molo dung disesa akka dosa dohot akka hasalaan i, dang porlu be pelean hasesaan ni dosa.

19 Alani i akka dongan, marhite mudar ni Jesus, dang pola mabiar be hita masuk* sian dalan i tu Inganan na Massai Badia*+ i. 20 Dibukka ibana do tu hita dalan na imbaru tu hangoluan mamolus tire i,+ i ma dagingna i. 21 Ala adong do di hita malim na untimbo na mangaradoti jabu ni Debata,+ 22 tapajonok ma diritta tu Debata sian nasa rohatta dohot sian haporseaon na togu. Ai nungnga dipaias* rohatta sian panggora ni roha na jahat+ jala nungnga dipaias dagingta marhite aek na ias.+ 23 Alani i, toktong ma tapaboa janji taringot hangoluan na lao tajalo i, unang ma ragu hita paboahon i,+ ai boi do tahaporseai na manjanjihon i. 24 Taparrohahon ma akka donganta, asa boi hita manjujui na asing lao patuduhon holong ni roha dohot mangulahon na denggan.+ 25 Unang ma tatinggalhon parpunguanta+ songon na somal diulahon piga-piga halak, alai tapatogu ma akka donganta.+ Jala lam marsitutu ma hita mangulahon i, ai nungnga lam jonok ari i.+

26 Ai molo nungnga takkas taboto na sittong parbinotoan na tajalo taringot tu hasittongan i,+ hape sengaja hita mangulahon dosa, dang adong be pelean lao manesa dosatta i.+ 27 Alai jalootta ma panguhuman na parohon biar dohot rimas ni Debata na marsigorgor na mangaripasson halak na mangalo Ibana.+ 28 Manang ise na mangalanggar Patik ni si Musa, jala adong dua manang na tolu saksi+ na paboahon i, ikkon pamateon do ibana jala dang pola asi roha mangida i. 29 Alani i, tama do molo ubborat sian i dibahen hukuman tu halak na mandege-dege Anak ni Debata, tu halak na so mangargai mudar parjanjian+ na pabadiahon ibana, dohot tu halak na mangaleai tondi parbadia ni Debata na patuduhon asi ni roha na massai balga i!+ 30 Ai taboto do, nungnga didok Debata, “Au do na marhak mambalos. Balosokku do hajahaton ni nasida.” Jala didok do muse di na tarsurat i, “Jahowa* do na lao manguhumi bangsona.”+ 31 Marjea do halak na madabu tu panguhuman ni Debata na mangolu i.

32 Alani i, ikkon ingotonmuna do akka na masa di tikki naung salpu i. Ai dung dijalo hamu parbinotoan taringot tu hasittongan i,*+ godang do sitaonon na masa tu hamu alai dang talu hamu dibahen i. 33 Sipata dibahen do hamu marsitaonon jala dileai di jolo ni godang halak.* Jala sipata marsitaonon do hamu rap dohot halak na manaon sisongon i. 34 Sapakkilalaan do hamu tu* akka dongan na di penjara, jala toktong do hamu marlas ni roha nang pe dirampas artamuna.+ Ai diboto hamuna do na adong artamuna na dumenggan jala na martahan saleleng ni lelengna.+

35 Alani i, toktong ma hamu barani makkatai,* ai parohon pasu-pasu na godang do i.+ 36 Ikkon sabar do hamu jala togu,+ asa molo dung diulahon hamu lomo ni roha ni Debata, dapotmuna ma na dijanjihon i. 37 Ai “satokkin nai”,+ “sahat nama Ibana na naeng ro i jala dang palelengonna be i”.+ 38 “Alai toktong do mangolu halak na mangulahon na sittong ala setia do ibana,”+ jala “molo mabiar do ibana, dung i gabe mandao sian Au, dang lomo rohakku mangida ibana.”+ 39 Saonari, hita dang halak na mabiar na gabe mandao sian Debata, jala ujungna gabe mate.+ Alai halak na setia do hita asa toktong boi mangolu.

11 Haporseaon i, i ma pos ni roha na togu na ikkon saut na tapaima-ima i.+ Haporseaon i do na patuduhon* na tutu akka na tahaporseai i nang pe dang taida dope. 2 Alani haporseaon ni akka omputta najolo do umbahen na dipatuduhon Debata na lomo rohana tu nasida.

3 Alani haporseaon do umbahen na taattusi, molo nasa na adong di langit dohot na di tano* on ditoppa marhite hata ni Debata. Alani i, sian akka na so tarida do dibahen akka na tarida i.

4 Alani haporseaon do umbahen dipelehon si Abel pelean na dumenggan tu Debata sian pelean ni si Kain.+ Marhite haporseaonna i, dipatuduhon Debata do naung diulahon ibana na sittong, ai dijalo Debata do silehon-lehonna i.+ Nang pe naung mate si Abel, alai makkatai dope ibana+ marhite haporseaonna.

5 Alani haporseaon do umbahen dipapinda Debata si Henok+ asa unang dihilala ibana be na haccit tikki naeng mate. Jala dang adong be ibana manang na didia pe. Alai andorang so dipapinda dope ibana,+ dipatuduhon Debata do na lomo rohana tu ibana. 6 Molo dang porsea sasahalak tu Debata, dang boi bahenonna las roha ni Debata. Ai manang ise na naeng manomba Debata, ikkon porsea do ibana na adong Debata, jala ikkon porsea do ibana na lehononna upa tu halak na marsitutu mangalului Ibana.+

7 Alani haporseaon do umbahen ditangihon si Noak+ sipasingot na sian Debata taringot tu na lao masa na so diida ibana dope.+ Dioloi ibana do Debata jala dibahen ibana ma parau+ asa malua keluargana. Marhite haporseaonna, dipatuduhon ibana ma na patut do portibi on dihukum.+ Jala marhite haporseaonna didok do ibana mangulahon na sittong.

8 Alani haporseaon do umbahen na dioloi si Abraham+ Debata tikki disuru ibana borhat tu inganan na lao silehonon ni Debata tu ibana. Ditadikkon ibana do hutana nang pe dang diboto dope manang tudia ibana lao.+ 9 Alani haporseaonna i, olo do ibana gabe halak panoppang di luat na dijanjihon i.+ Di kemah+ do ibana maringanan rap dohot si Isak nang si Jakkob na dohot manjalo janji i.+ 10 Ai dipaima-ima si Abraham do kota na marfondasi na togu, i ma kota na dibahen jala na dipajongjong Debata.+

11 Alani haporseaon do umbahen na boi si Sara hamil,* nang pe nungnga matua ibana.+ Ai pos do rohana, na boi do dihaporseai Debata na mangalehon janji i. 12 Alani i nang pe nungnga matua situtu*+ si Abraham, tubu do godang pinoppar sian ibana.+ Songon godang ni bintang na di langit do pinopparna jala songon godang ni pasir na di topi ni laut na so taretong godangna.+

13 Toktong do nasida marhaporseaon sahat tu na mate. Nang pe dang dipasaut Debata dope janjina di ngolu ni nasida,+ jala nang pe sian na dao ditatap nasida i,+ alai las do roha ni nasida manjalo i. Dipaboa nasida do tu akka halak na panoppang do nasida jala holan satokkin do nasida tinggal di luat i. 14 Marhite hata ni nasida i, takkas ma tarida na marsitutu do nasida mangalului inganan na lao gabe appuna ni nasida. 15 Autsugari sai diingot nasida inganan na ditinggalhon nasida i,+ sasittongna boi dope nasida mulak tusi. 16 Alai marsitutu do nasida mangalului inganan na dumenggan, inganan na sian banua ginjang i. Alani i dang maila Debata didok gabe Debata ni nasida,+ gariada diparade Ibana do sada kota di nasida.+

17 Alani haporseaon ni si Abraham, pola do naeng dipelehon ibana si Isak tikki diuji Debata ibana.+ Tutu, las do roha ni si Abraham manjalo akka janji i jala rade do ibana mamelehon anakna na sasada i.+ 18 Hape nungnga didok Debata hian tu ibana, “Ai sian si Isak do pinoppar* na dijanjihon i tu ho.”+ 19 Pos do roha ni si Abraham na boi Debata pahehehon anakna i sian hamatean, jala tutu do mulak muse dijalo ibana anakna i. Laos gabe gombaran do i tu na naeng masa di ari na naeng ro.+

20 Alani haporseaon do si Isak mamasu-masu si Jakkob+ dohot si Esau,+ jala dipaboa ibana do tu nasida akka na lao masa di ari na naeng ro.

21 Alani haporseaon ni si Jakkob, nang pe naeng mate ibana+ dipasu-pasu ibana do anak ni si Josep na dua i.+ Jala marsomba do ibana tu Debata, nang pe holan tukkot nama ditiop ibana.+

22 Alani haporseaon ni si Josep do umbahen na dipaboa ibana na lao kaluar halak Israel sian Mesir tikki naeng mate ibana. Jala alani haporseaon do umbahen na diparettahon ibana asa diboan nasida holi-holina+ sian i.

23 Alani haporseaon do umbahen na ditabunihon natua-tuana si Musa sahat tu na marumur tolu bulan ibana.+ Ai bagak do diida nasida poso-poso i+ jala dang mabiar nasida tu paretta ni raja.+ 24 Alani haporseaon do umbahen na so olo si Musa dung magodang+ digoari anak ni boru ni si Firaun.+ 25 Tumagon do didok rohana marsitaonon rap dohot bangso ni Debata sian apala makkilala hasonangan na satokkin di bagasan dosa. 26 Ai didok rohana, ummarga do gabe Halak na Pinillit* ni Debata sian sude arta na di Mesir nang pe gabe marlea ibana. Ai sian nasa rohana do ibana paima-imahon upa na lao dijalo ibana di ari na naeng ro. 27 Alani haporseaon do umbahen na ditinggalhon si Musa tano Mesir,+ dang ala na mabiar ibana tu rimas ni raja i.+ Toktong do ibana togu, ai hira naung diida ibana do Debata na so boi idaon i.+ 28 Alani haporseaon do umbahen na diulahon ibana Paska jala dipispisson mudar tu tiang ni pintu, asa unang dibunu* suru-suruan ni Debata anak siakkangan ni nasida.+

29 Alani haporseaon do umbahen na didalani halak Israel Laut Merah songon na mandalani tano na mahiang.+ Hape tikki halak Mesir naeng lewat sian i maup do nasida.+

30 Alani haporseaon do umbahen na dikalilingi bangso Israel tembok ni kota Jeriko saleleng pitu ari, jala dukkon i maruppak ma tembok i.+ 31 Alani haporseaon do umbahen na denggan dijalo si Rahab mata-mata ni halak Israel i.+ Alani i ma dang dipamate si Rahab boru-boru na so hasea i songon akka halak na mangalo Debata.

32 Taringot tu ise dope na naeng paboaokku? Dang adong be tikkikku molo ikkon paboaokku dope taringot tu si Gidion,+ si Barak,+ si Simson,+ si Jepta,+ si Daud,+ si Samuel+ dohot akka panurirang* na asing. 33 Alani haporseaon do umbahen na lao nasida marporang manaluhon akka harajaon,+ mangulahon na sittong, mandapot akka janji i,+ manutup baba ni singa,+ 34 mangittopi api na marsigorgor+ jala malua sian podang,+ dapotan gogo nang pe nungnga gale,+ monang di parporangan+ jala dilele nasida do tentara ni bangso na asing.+ 35 Nungnga dijalo akka borua keluargana naung dipahehe sian hamatean.+ Alai anggo na deba disiksa do ala dang olo manjalo haluaon.* Disiksa do nasida sahat tu na mate asa dipahehe tu hangoluan na dumenggan. 36 Na deba nai diuji, dileai, dilissingi, jala adong do na sappe diratte,+ dung i dipenjarahon.+ 37 Didangguri do nasida dohot batu,+ diuji do nasida asa manadikkon haporseaonna, digergaji,* dibunu dohot podang,+ marabitton kulit ni biru-biru dohot kulit ni hambing,+ hahurangan do nasida, marsitaonon,+ jala dibahen do na haccit tu nasida.+ 38 Dang denggan portibi on gabe inganan ni nasida. Di akka padang gurun do nasida tinggal, di akka dolok, di akka gua,+ dohot di akka lubang di toru ni tano.

39 Nang pe dipatuduhon Debata na lomo rohana tu nasida alani haporseaon ni nasida, alai dang diida nasida dipasaut Debata sude janjina. 40 Ai nungnga sian najolo marjanji Debata lao mangalehon na dumenggan tu hita.+ Alani i, dang boi dope nasida sempurna molo dang rap dohot hita.

12 Ala songon ombun do godang ni saksi na makkaliangi hita, tabolokkon ma boban dohot dosa na boi mangabbati hita di parlumbaatta.+ Alani i, toktong ma hita marsitutu marlojong di parlumbaan naung ditottuhon tu hita.+ 2 Huhut marlojong, manat ma taparrohahon Jesus i, ai ibana do halak na dipillit Debata lao mangurupi hita marhaporseaon na togu.*+ Sai toktong do las rohana mamikkirhon akka naung diparade di jolona. Alani i ma sabar jala togu ibana manaon na haccit di hau partinaonan* i, jala dang maila ibana alani i. Saonari, nungnga hundul ibana di sabola kanan ni tahta ni Debata.+ 3 Sabar jala togu do ibana manaon akka hata ni jolma na mardosa+ na mangalo ibana. Nang pe sasittongna, parohon jea do i tu diri ni nasida sandiri. Alani i ingot hamu ma ibana, asa unang habis gogomuna jala asa unang mandele hamu.+

4 Dang hea dope adong sian hamu pola naeng mate* alani mangalo dosa i. 5 Nungnga lupa hamu tu poda ni Debata naung manjou hamu gabe anakna. Ai ninna do, “Ale anakku, unang ma leas roham tu na diajarhon* Jahowa,* jala unang ma mandele ho tikki dipissang. 6 Ai dipissang* Jahowa* do na dihaholongi Ibana, jala dilissingi* Ibana do ganup halak naung dijou gabe anakna.”+

7 Ikkon togu jala ikkon sabar do hamu tikki dipissang, ai dalan lao mangajari* hamu do i. Dibahen Debata do hamu songon anakna.+ Ai dia ma adong anak na so dipissang bapakna?+ 8 Molo dang sude hamu manjalo pissang-pissangna i,* dang anakna hamu, anak ni na asing do hamu. 9 Gari bapakta na di tano on tapasangap do nang pe dipasingot hita. Tarlumobi ma Bapakta na di surgo i, pasti ussangap do bahenotta tu Ibana. Ai Ibana do na mamillit hita marhite tondi parbadiana asa boi hita toktong mangolu.+ 10 Anggo bapakta na di tano on, holan satokkin do pasingotton hita, jala mangihutton na sittong di rohana do ibana mangulahon i. Alai anggo Bapakta na di banua ginjang i, dipasingot do hita lao mambahen na denggan tu hita jala asa boi hita badia songon Ibana.+ 11 Tutu, parohon haccit* ni roha do pissang-pissang i tikki dilehon, dang las ni roha. Alai massai godang do laba na dapotna molo rade ibana marsiajar sian i. Dung i, boi ma ulahononna lomo ni roha ni Debata jala dame ma rohana.

12 Alani i, patogu hamu ma tangan na hitir-hitir dohot dugul-dugul na gale.+ 13 Patigor hamu ma sidalanan ni patmuna,+ asa unang lam haccit patmuna na gale i jala asa malum. 14 Bahen hamu ma sian nasa tolapmuna lao mardame tu sude halak,+ jala badia ma bahen hamu parngoluonmuna.+ Ai molo dang songon i, dang adong na boi mangida Tuan* i. 15 Manat ma hamu asa unang adong sian hamu na so manjalo asi ni roha ni Debata na massai balga i, asa unang tubu urat na marraccun na mambahen parsoalan jala na mambahen ramun* godang halak.+ 16 Unang ma adong sian hamu na mangulahon seks na so patut,* manang na so mangargai akka na badia songon si Esau. Ai digadis ibana do hak ni anak siakkangan holan alani samakkuk sipanganon.+ 17 Ai diboto hamu do ujungna, tikki naeng manjalo pasu-pasu i si Esau, dang dapotna pasu-pasu i. Nang pe sai tangis ibana jala marsitutu mangalului dalan lao paubahon roha ni bapakna,+ alai toktong do dang dapotna pasu-pasu i.

18 Ai dang tu Dolok Sinai na boi tarjama i hamu disuru ro,+ i ma dolok na marjibbur-jibbur dohot api i.+ Dikalilingi ombun na golap do dolok i, massai holom, jala massai gogo do alogo disi.+ 19 Tarbege do disi soara ni tarompet na gogo+ dohot soara ni na makkatai.+ Dung dibege bangso i soara i, mangelek-elek ma nasida asa unang didok be hata tu nasida.+ 20 Ai mabiar situtu do nasida tu paretta na mandok, “Sada binatang pe dais tu dolok on, ikkon dangguran do i sappe mate pakke batu.”+ 21 Ai parohon biar do na masa i, pola do didok si Musa, “Hitir-hitir do au alani biarna.”+ 22 Alai tu Dolok Sion+ kota ni Debata na mangolu i do hamu ro, tu Jerusalem na di banua ginjang i.+ Adong do disi marpulu ribu* suru-suruan 23 na marpungu,+ punguan ni akka anak siakkangan naung tarsurat goarna di banua ginjang, Debata Hakim ni saluhutna,+ dohot akka na mangulahon na sittong na dipillit Debata marhite tondi parbadia+ naung dibahen sempurna.+ 24 Jala adong do muse disi Jesus parhitean*+ ni parjanjian na imbaru,+ dohot mudar na dipispisson tu hita, i ma mudar na dumenggan sian mudar ni si Abel.+

25 Manat ma hamu asa unang adong sian hamu na so manangihon* na makkatai i. Haru halak na so manangihon sipasingot ni Debata na dipaboa di tano on, dang malua sian hukuman. Apalagi ma molo dang tatangihon soara ni na makkatai na sian banua ginjang i!+ 26 Di tikki i, dihutur soarana i do tano on,+ alai saonari dijanjihon Ibana do, “Huturokku ma sahali nai tano on, alai dang holan i dohot do langit i.”+ 27 Hata “sahali nai” patuduhon na lao pasidingon ni Debata do akka na tarhutur i, i ma akka na so dibahen tanganna. Bahenonna do songon i asa boi toktong adong akka na so tarhutur i. 28 Alani i, ala naeng jalootta do Harajaon na so tarhutur i, toktong ma tajalo asi ni roha ni Debata na massai balga i. Ai i do na mambahen hita boi manomba Ibana marhite cara na sesuai tu lomo ni rohana mardongan biar ni roha dohot unduk ni roha. 29 Ai songon api na pasudahon do Debatanta i.+

13 Toktong ma haholongi hamu dongan sahaporseaon.+ 2 Unang ma lupa hamu patuduhon burju ni roha+ tu halak na asing. Ai adong do halak na mangulahon sisongon i jala di na so pamotoan ni nasida, akka suru-suruan do na gabe tamuna.+ 3 Ingot hamu ma akka dongan na dipenjarahon.*+ Sapakkilalaan* ma hamu dohot nasida.+ Ingot hamu ma akka na manaon na haccit, ai mardaging jolma do hamu songon nasida.* 4 Ikkon sangap do pardongan saripeon dibahen sude halak. Ikkon setia do sahalak suami dohot sahalak istri tu janji ni nasida.+ Ai hukumon ni Debata do halak na mangulahon seks na so patut* dohot halak na mangalakkup.+ 5 Unang ma holan hepeng na dipikkiri hamu di ngolumuna,*+ alai las ma rohamuna tu akka na adong di hamu.+ Ai didok Debata do, “Dang tadikkonokku ho jala dang pasombuokku ho.”+ 6 Alani i, pos ma rohatta mandok, “Jahowa* do na mangurupi au, dang mabiar au. Aha ma na boi bahenon ni jolma tu au?”+

7 Ingot hamu ma akka na manguluhon hamu,+ na pasahatton hata ni Debata tu hamu. Parrohahon hamu ma songon dia ujung ni pangalaho ni nasida na denggan jala tiru hamu ma haporseaon ni nasida.+

8 Dang muba anggo Jesus Kristus, songon i nattoari, songon i saonari, laos songon i do ibana sahat tu saleleng ni lelengna.

9 Unang ma olo hamu dililuhon akka ajaran na imbar sian na hea dijalo hamu. Ai sasittongna, asi ni roha ni Debata na massai balga i do na patoguhon rohamuna, dang aturan taringot tu sipanganon. Ai dang adong dapot ni akka halak na mangurus sipanganon i laba sian aturan i.+

10 Adong do di hita sada langgatan, jala akka halak na marhobas di kemah i, dang marhak lao mangallang pelean na adong disi.+ 11 Ai diboan sintua ni malim do mudar ni akka binatang tu Inganan na Massai Badia gabe pelean hasesaan ni dosa. Alai anggo daging ni binatang i ditutung do di luar ni perkemahan i.+ 12 Songon i ma nang Jesus, marsitaonon do ibana di luar ni gerbang ni kota+ lao pabadiahon akka jolma marhite mudarna sandiri.+ 13 Alani i, lao ma hita mandapotton ibana tu luar ni perkemahan, jala lok ma dohot hita dileai songon ibana.+ 14 Ai dang adong dison appunatta kota na hot saleleng ni lelengna. Alani i sai tapaima do kota na lao ro i.+ 15 Toktong ma talehon pujian tu Debata marhite Jesus.+ Ai songon pelean tu Debata do i. Tabaritahon ma goarna+ tu akka halak marhite pamanganta.*+ 16 Asing ni i, unang ma lupa hamu mangulahon akka na denggan jala urupi hamu ma na asing sian nasa tolapmuna.+ Ai lomo do roha ni Debata tu akka pelean sisongon i.+

17 Oloi hamu ma akka na manguluhon hamu+ jala unduk ma hamu tu nasida.+ Ai dijaga nasida do hamu jala sesuai tu parniulaon ni nasida do hukuman ni Debata nasida.+ Molo diulahon hamu i, las ma roha ni nasida mangulahon ulaon ni nasida. Alai molo dang diulahon hamu i, marsak ma nasida jala dang parohon na denggan i tu hamu.

18 Toktong ma tangiakkon hamu hami. Ai pos do rohanami na ias* panggora ni rohanami jala lomo do rohanami asa jujur di saluhutna.+ 19 Tarlumobi, hujujui do hamu manangiakkon au asa boi hatop au ro mandapotton hamu.

20 Sai anggiat ma Debata hadameon, na pahehehon Tuanta Jesus parmahan na bolon i,+ na mamboan mudarna tu parjanjian saleleng ni lelengna, 21 mangalehon na porlu di sude ulaonmuna lao mangulahon lomo ni rohana. Anggiat ma Debata mangonjar rohatta mangulahon akka na mambahen las rohana marhite Jesus Kristus. Jala hasangapon ma di Debata sahat tu saleleng ni lelengna. Amen.

22 Alani i akka dongan, hupangido ma tu hamu sabar ma hamu manangihon akka hata na patoguhon on. Ai dang pola ganjang hubahen surat on tu hamu. 23 Jala boto hamu ma, nungnga dipalua si Timoteus sian penjara. Molo tibu ibana ro, rap ma au dohot ibana mandapotton hamu.

24 Pasahat ma tabekku tu sude na manguluhon hamu dohot tu sude akka na badia i. Sahat ma tabe ni akka donganta na di Italia+ tu hamu.

25 Anggiat ma asi ni roha ni Debata na massai balga i mandongani hamu sude.