Diselidiki Sahalak Borua Halak Jahudi Muse Agamana

Ceritahon ma jo taringot ngolum najolo.

Tubu di Amerika Serikat do au taon 1979. Tikki marumur tolu taon au, marsirang ma natua-tuakku. Omak do na pagodang-godangkon au. Diajarhon ibana do tu au tradisi ni halak Jahudi, jala dipasikkolahon ma au tu yeshivas, i ma sikkola agama Jahudi. Tikki marumur pitu taon au, pinda ma hami tu Israel saleleng sataon. Disi, sikkola ma au di kibbutz, i ma sikkola na dibahen akka halak Jahudi na karejo disi. Dung i pinda ma au dohot omak tu Meksiko.

Nang pe dang adong sinagoga di Meksiko, alai tong do hudalatton tradisi ni halak Jahudi. Hubahen do lilin tikki di ari Sabat. Hujaha do tauratnami, jala martangiang do au mamakke siddur, i ma bukku tangiang. Molo di sikkola, jotjot do hudok tu akka donganku agamakku do na parjolo adong sian sude agama na asing. Dang hea hujaha Perjanjian Baru, alana taringot ajaran ni Jesus Kristus do na dipaboa disi. Jala memang diorai omak do tong au manjaha i. Mabiar do ibana terpengaruh au annon tu ajaran ni Jesus i.

Boasa ma gabe olo ho manjaha Perjanjian Baru?

Tikki marumur 17 taon, pinda ma muse au tu Amerika Serikat lao melanjutton sikkolakku. Disi adong ma sada donganku na maragama Kristen. Didok ibana, hira na adong do annon na hurang di ngolukku molo dang hutanda Jesus.

Hudok ma, “Halak na sesat do na porsea tu Jesus i.”

Disukkun ibana ma tu au, “Hea do haroa dijaha ho Perjanjian Baru?”

Nikku ma, “Dang hea dope nian.”

Jadi ninna ibana ma, “Berarti na pamalo-malohon do ho, so diboto ho dope sude, nga pittor dibahen ho kesimpulan.”

Tarsonggot ma au mambege hatana i. Alana menuruthu memang halak na oto do na pittor mambahen kesimpulan, hape dang diboto ibana sude faktana. Jadi hupinjam ma Bibelna. Dung mulak au tu jabu, mulai ma hujaha Perjanjian Baru.

Aha ma pengaruhna dung dijaha ho i?

Tarsonggot do rohakku, alana halak Jahudi do hape akka panurat ni bukku di Perjanjian Baru i. Jala lam godang hujaha gabe huboto ma, halak Jahudi na burju do Jesus i. Serep do rohana jala lomo do rohana mangurupi akka halak. Dang olo ibana mangoto-otoi nasida. Alani i sappe lao ma au tu perpustakaan jala hupinjam ma akka bukku taringot Jesus. Alai dang adong nanggo sada pe sian akka bukku i na paposson rohakku na tutu do ibana Messias na dijanjihon i. Justru adong do piga-piga bukku na mandok, Debata do Jesus i. Dang masuk akkal i di au. Alana dang mungkin Jesus martangiang tu dirina sandiri kan? Asing ni i boi do Jesus mate. Hape didok Bibel, “dang na lao mate Debata”.a

Jadi songon dia do ceritana makana boi didapot ho alusna?

Pos do rohakku boi do dapottu ajaran na sittong. Alana pasti saling mendukung do i. Jadi martangiang ma au tu Debata huhut tumatangis. Jala on ma parjolo sahali dang hupakke siddur tikki martangiang. Dang leleng dukkon i adong ma na manuktuk jabukku. Saksi Jahowa do nasida. Dilehon nasida do tu au bukku lao marsiajar Bibel. Ala torus au marsiajar Bibel dohot Saksi Jahowa i, gabe lam pos ma rohakku, sian Bibel do sude na dihaporseai nasida. Misalna dang porsea Saksi Jahowa molo Jesus i bagian ni Tritunggal. Alai “Anak ni Debata do ibana”b jala “mula ni toppaan ni Debata”.c

Dang leleng dukkon i, mulak ma au muse tu Meksiko. Hulanjutton ma muse parsiajaran Bibelhu dohot Saksi Jahowa disi. Longang do rohakku dung huboto godang do hape akka hatorangan naung dipaboa Bibel hian taringot Messias! Alai adong dope na mambahen au ragu, ‘Memang toho do holan Jesus na cocok tu sude hatorangan i?’ ‘Atik na holan dibahen-bahen ibana do i asa boi cocok sude hatorangan i tu ibana?’

Jadi aha ma na mambahen gabe pos roham?

Dipatudu akka Saksi ma tu au akka hatorangan naung dipaboa Bibel hian taringot Messias. Dang mungkin i boi dibahen-bahen sasahalak asa cocok tu dirina. Misalna lobi sian 700 taon sebelumna, nungnga dipaboa Panurirang Mika hian, di Betlehem Judea do Messias tubu.d Dang mungkin boi kan diatur sasahalak didia ibana tubu? Asing ni i didok Panurirang Jesaya do na lao dibunu do Messias gabe sahalak parjahat. Alai na lao dikubur do ibana rap dohot na mora.e Terjadi do sudena on tu diri ni Jesus.

Na paling mambahen pos rohakku, i ma bukti taringot sian pinoppar ni ise Jesus i. Didok di Bibel pinoppar ni Raja Daud do Messias.f Ala biasana disippan halak Jahudi do catatan taringot tarombo ni keluarga ni nasida, jadi dang mungkin boi akka musu ni Jesus mandok dang tutu Jesus i pinoppar ni si Daud! Alana memang tutu do pinoppar ni si Daud ibana. Bahkan godang do halak na mandok “anak ni si Daud do Jesus i”.g

Tolu pulu pitu taon dung mate Jesus, i ma taon 70 M, ro ma tentara Rom menghancurhon kota Jerusalem. Mago manang hancur do ra catatan tarombo ni halak Jahudi di tikki i. Jadi asa boi ditanda halak ise do Messias, sesuai tu catatan tarombo, pasti nga mangolu ibana sebelum taon 70 M.

Jadi aha ma pengaruhna tu ho?

Di 5 Musa 18:18, 19, nungnga dipaboa Debata hian na lao pillitonna do sahalak panurirang na songon si Musa di Israel. Jala didok Debata do, “Pangidookku do pertanggung jawaban sian halak na so manangihon hatakku, i ma hata na dipaboa ibana di bagasan goarhu.” Jadi dung huselidiki sude isi ni Bibel, gabe pos ma rohakku, Jesus na sian Nasaret do panurirang na dimaksud di ayat i.