Sahalak Pastor Maninggalhon Gareja

Caritahon ma jo didia do ho tubu?

Tubu di sada huta di Italia do au taon 1943. Partani do bapakku jala partukkang. Pitu ma hami gelleng ni omak. Diajari bapak dohot omak do hami asa gabe halak Katolik na burju.

Boasa ma lomo roham lao gabe pastor?

Tikki dakdanak au, lomo do rohakku manangihon jamita ni pastor di gareja. Tabo do begeon soarana. Jala lomo do rohakku mangida acara ibadat na dibahen nasida. Jadi marcita-cita ma au lao gabe pastor. Tikki marumur 13 taon au, dipamasuk omak ma au tu sikkola na adong asramana. Sikkola i khusus mangalatik akka bawa lao gabe pastor.

Adong do disi diparsiajari hamu Bibel?

Sebenarna dang adong. Tikki marumur 15 taon au, adong sada gurukku na mangalehon bukku Injil, na paboahon taringot Jesus. Hujaha ma bukku i piga-piga hali. Dung marumur 18 taon, tu Roma ma au lao kuliah di universitas na mangajari akka halak asa gabe paus. Jala langsung do universitas i diawasi paus. Huparsiajari do disi bahasa Latin, bahasa Junani, sejarah, filosofi, psikologi, dohot teologi. Memang hujaha hami do akka ayat ni Bibel. Jala dijahahon do Bibel tikki marminggu hami. Alai sebenarna dang diparsiajari hami isi ni Bibel.

Tikki gabe rektor, mangajar do tong ho?

Huajarhon do taringot Konsili Vatikan Kedua. Alai tugas administrasi do na unjotjot hukarejohon.

Boasa ma dang pos be roham tu gareja Katolik i?

Adong tolu alasanna. Terlibat do hape gareja tu politik. Ditutup-tutupi nasida do pangalaho ni pamimpin gareja dohot jemaatna na so hasea. Jala adong do piga-piga ajaran ni agama Katolik na so sittong huhilala. Contohna didok nasida dihukum Debata do halak naung mate saleleng ni lelengna. Jala lomo do ninna roha ni Debata molo taulang-ulangi tangiangta marratus hali mamakke rosario.a

Jadi aha ma na diulahon ho?

Martangiang ma au mangido petunjuk tu Debata huhut tumatangis. Dung i hutuhor ma Bibel Katolik, i ma Jerusalem Bible, na baru dicetak di bahasa Italia. Dung i hujaha ma i. Sada tikki dung sae acara Misa di ari Minggu pagi, hugattung ma jubahku. Adong ma ro dua bawa tu seminari. Saksi Jahowa do ninna halak i. Martukkar pikkiran do hami taringot Bibel lobi sian sajom. Jala dipaboa nasida do tanda ni agama na sittong.

Boha do menurutmu nasida?

Salut do au mangida halak i. Tenang do nasida mangalusi sukkun-sukkunku, hape Bibel ni Katolik do na dibukka nasida. Dung piga-piga leleng, ro ma Saksi Jahowa na asing na margoar si Mario. Sabar do ibana jala sai ditepati ibana do janjina. Nang pe ro udan manang las ari, sai ro do ibana jam sia tiap ari Sabtu.

Boha pastor na asing?

Huajak do halak i marsiajar Bibel, alai dang adong na serius. Hape molo au lomo hian do rohakku marsiajar Bibel. Alana gabe godang ma na huboto. Misalna gabe huboto ma boasa dipasombu Debata masa hajahaton dohot sitaonon. Nga leleng sukkun-sukkun rohakku taringot i.

Hea do adong pastor na untimbo jabatanna sian ho mangorai ho marsiajar Bibel?

Di taon 1975, lao ma au piga-piga hali tu Roma lao paboahon na huparsiajari sian Bibel. Berusaha do akka pastor na untimbo jabatanna sian au mangorai asa unang marsiajar Bibel be au. Alai dang sian Bibel alasan ni nasida. Ujungna tanggal 9 Januari 1976, hubahen ma surat tu Roma na paboahon dang olo be au gabe halak Katolik. Dua ari dukkon i hutinggalhon ma seminari i, jala lao ma au markareta api tu kebaktian ni Saksi Jahowa. On ma parjolo sahali au ro tu kebaktian ni nasida. Sian piga-piga huria do na ro tu kebaktian i. Beda hian do na huida di kebaktian i sian na huida saleleng on. Tikki dipasahat jamita, sude do Saksi Jahowa mambukka Bibelna be.

Boha ma didok keluargam?

Hampir sude do nasida mangorai au marsiajar Bibel. Alai adong do hape sada adekku na marsiajar Bibel dohot Saksi Jahowa di Lombardy, Italia. Jadi lao ma au tusi. Diurupi Saksi Jahowa na disi ma au mangalului karejo dohot jabu. Laos di taon i tardidi ma au gabe Saksi Jahowa.

Disolsoli ho do keputusanmon?

Daong. Justru las hian do rohakku alana gabe boi ma jonok hubunganku tu Debata. Sian Bibel do na huparsiajari taringot Ibana, dang sian filsafat manang ajaran ni jolma dohot tradisi gareja. Gabe boi ma pos rohakku paboahon tu akka halak taringot Ibana.