Siuhumon Nama Halak Jahudi

Marsitutu do Jesus mangurupi angka halak asa olo marale-ale tu Debata. Dung sae Jesus mangajari angka halak na di luar ni jabu ni sahalak Parise, mangajari ma ibana muse tu na asing.

Adong ma sian nasida na manaringoti na baru masa. Dipaboa nasida ma “tu Jesus taringot tu halak Galilea naung pinamate ni si Latus tingki mangalehon pelean”. (Lukas 13:1) Boasa dipaboa nasida i?

Olo do ra tarbunu halak Galilea i tingki demo marribu halak Jahudi. Ndang diloas nasida dipangke si Latus hepeng sian bagas joro laho mambahen saluran ni aek tu Jerusalem. Nunga hea denggan dipangido si Latus hepeng i sian pangurus ni bagas joro. Alani i, gabe dirimpu nasida ma na adong na sala diulahon halak Galilea umbahen na masa i tu nasida. Alai ndang sapandapot Jesus.

Alani i disungkun ibana ma, “Na dirimpu hamu do gumodang dosa ni halak Galilea i sian dosa ni halak Galilea na asing ala songon i ditaon nasida?” Dipasingot Jesus ma nasida, “Molo ndang marhamubaon hamu, sude ma hamu mate songon nasida.” (Lukas 13:2, 3) Dung i disungkun Jesus ma muse taringot tu na baru masa di inganan na asing:

“Manang, na dirimpu hamu do gumodang sala ni na 18 halak na mate ditipa menara di Siloam i sian sude halak di Jerusalem?” (Lukas 13:4) Dirimpu nasida do ala mangulahon dosa umbahen na mate halak na di menara Siloam i. Alai ndang sapandapot Jesus. Ai diboto Jesus do adong, ‘tingki dohot parsorion’ jala alani i do umbahen na masa i. (Parjamita 9:11) Alani i dipasingot Jesus ma muse nasida, “Molo ndang marhamubaon hamu, sude ma hamu mate songon nasida.” (Lukas 13:5) Alai boasa ma di tingki i dipasingot Jesus nasida?

Dipaboa Jesus ma sada tudosan na patuduhon boasa ma ingkon dipasingot nasida tingki i. Didok Jesus ma, “Adong ma hau ara ni sahalak baoa di porlak anggurna, laho ma ibana mangalului parbue ni hau ara i alai ndang adong dapotna. Didok ibana ma tu parkarejo porlakna i, ‘Nunga tolu taon ahu ro mangalului parbue ni hau ara on, alai laos so adong dapothu. Taba ma i! Aha ma guna ni i molo so marparbue?’ Dialusi parkarejo porlak i ma, ‘Tuan, pasombu ma jolo sataon nai. Huhali pe humaliangna asa hubahen pupuk tusi. Molo marparbue do hau i di ari na naeng ro, denggan ma i. Alai molo ndang, tabaon ma i.’”​—Lukas 13:6-9.

Nunga lobi tolu taon Jesus mamupuk haporseaon ni halak Jahudi. Alai holan saotik do na gabe siseanna, na dos songon parbue ni ulaonna. Saonari ma taon paopathon, alani i lam marsitutu ma ibana marbarita. Marbarita jala mangajari ma ibana tu halak Jahudi na di Judea dohot na di Perea, dos songon na mangkali dohot mamupuk hau ara. Alai otik do halak Jahudi na olo manjalo. Boi ma dohonon ndang olo bangso i muba jala patut do nasida diuhum.

Tangkas ma muse tarida na so porsea nasida dungkon na masa di ari Sabbat. Tingki mangajari Jesus di bagas joro, diida ibana ma sahalak borua na bungkuk saleleng 18 taon dibahen suru-suruan na jahat. Asi ma roha ni Jesus, didok ma, “Ale inang, malum ma sahitmi.” (Lukas 13:12) Diampehon Jesus ma tanganna tu borua i jala pintor malum ma ibana. Dung i, dipuji borua i ma Debata.

Muruk ma pamimpin ni sinagoga jala didok ma, “Adong do onom ari di hamu laho mangulahon ulaonmuna. Alani i di ari i ma hamu ro asa dipamalum, unang di ari Sabbat.” (Lukas 13:14) Porsea do ibana na boi Jesus pamalumhon na marsahit. Alai muruk do ibana tu angka halak na ro mandapothon Jesus di ari Sabbat laho dipamalum. Alani i didok Jesus ma, “E halak na munafik, nda dipalua hamu do lombu manang halodemuna sian handangna di ari Sabbat jala diboan hamu laho mangalehon minum? Tarlumobi ma borua on, boru ni si Abraham do ibana jala marsahit dibahen Sibolis saleleng 18 taon, laos so boi ma paluaon ibana di ari Sabbat sian na mamparhatoban ibana?”​—Lukas 13:15, 16.

Gabe maila ma angka musuna. Alai marlas ni roha ma angka halak i mangida na niulahon ni Jesus. Dung i dipaboa Jesus ma muse dua tudosan taringot tu Harajaon, songon naung hea dipaboa ibana sian parau tingki di Laut Galilea.​—Mateus 13:31-33; Lukas 13:18-21.