PELAJARAN 36
Sumpa ni si Jepta
Ditinggalhon halak Israel ma muse Jahowa, jala disomba nasida akka patung. Tikki ro halak Ammon menyerang nasida, dang boi diurupi akka patung i nasida. Susa do halak Israel saleleng martaon-taon. Ujungna didok nasida ma tu Jahowa, ‘Nungnga mardosa hami. Selamatton ma hami sian akka musunami.’ Dihancurhon halak Israel ma patung i, jala manomba Jahowa ma nasida muse. Alani i, gabe asi ma roha ni Jahowa tu nasida.
Adong ma sahalak bawa na margoar si Jepta na dipillit lao mamimpin halak Israel mangalo halak Ammon. Didok ibana ma tu Jahowa, ‘Ale Jahowa, urupi ma hami. Molo monang hami, marsumpa ma au lehonokku do tu Ho, manang ise pe na parjolo kaluar sian jabukku manjuppangi au.’ Ditangihon Jahowa do pangidoan ni si Jepta i, jala monang do nasida.
Tikki mulak si Jepta tu jabuna, boruna ma na parjolo manjuppangi ibana. Holan i do gellengna. Marlas ni roha do boruna i huhut manortor mamakke rebana lao manjuppangi ibana. Gabe diingot si Jepta ma sumpana tu Jahowa. Didok ma, ‘Amang tahe borukku! Nungnga malala be ate-atekku. Ikkon ho ma hape! Nungnga marsumpa au tu Jahowa, ikkon melayani nama ho di tabernakel na di Silo.’ Didok boruna i ma, ‘Bapa, molo nungnga marsumpa ho tu Jahowa, tepati ma i. Alai, lao ma jolo au dohot akka donganku tu dolok saleleng dua bulan. Dung i, lao ma au tu Silo.’ Ganup taon, sai ro do akka donganna manjuppangi ibana di Silo. Melayani di tabernakel do boru ni si Jepta sahat tu na mate.
“Manang ise na umbalga holongna tu anakna manang tu boruna sian apala tu au, dang cocok ibana gabe siseanku.”—Mateus 10:37