Dipaboa Malaikat Naung Tubu Jesus

Tikki mamaretta Kesar Agustus di Rom, disuru ibana ma asa mulak sude halak Jahudi tu hutana be lao mandaftarhon diri. Alani i, lao ma si Josep dohot si Maria tu Betlehem, ala disi do huta ni si Josep. Hape nungnga naeng melahirkan si Maria.

Dung sahat nasida di Betlehem, dang adong be inganan ni nasida marborngin. Holan kandang ni binatang nama na adong. Disi ma Jesus tubu. Dung i dibukkus si Maria ma ibana tu kain lappin, jala dipeakkon di inganan ni binatang mangan.

Di borngin i, adong ma piga-piga parmahan na marmahan jonok ni Betlehem. Toppu ma ro sada malaikat tu jolo ni nasida. Gabe tiur ma inganan i alani hamuliaon ni Jahowa. Mabiar ma akka parmahan i. Alai, didok malaikat i ma, ‘Unang mabiar hamu. Na paboahon barita na denggan do au. Sadari on, nungnga tubu Messias di Betlehem.’ Tarida ma muse godang malaikat di langit na mandok, ‘Hasangapon ma di Debata, dame ma di tano on.’ Dung i, dang tarida be akka malaikat i.

Didok akka parmahan i ma, ‘Beta, lao ma hita tu Betlehem saonari.’ Dung sahat disi, juppang ni nasida ma si Josep dohot si Maria. Di kandang ni binatang do nasida rap dohot poso-poso i.

Dipaboa akka parmahan i ma tu akka halak hata ni malaikat i. Gabe heran do akka halak mambege i. Jala si Maria pe, sai dipikkiri do hata ni malaikat i. Dung i, mulak ma akka parmahan i mangida domba ni nasida. Mandok mauliate do nasida tu Debata ala nungnga dibege nasida barita na denggan i, jala nungnga diida nasida na didok ni malaikat i.