6 Adong do Gunana Martangiang?

ADONG do gunana hita martangiang? Bibel mandok, adong. Godang do akka sisomba Debata na merasa godang do manfaat ni tangiang. (Lukas 22:40; Jakobus 5:​13) Sasittongna, tangiang boi do mambahen hita jonok tu Debata, mambahen dame rohatta, jala mambahen hita lam sehat. Boasa boi songon i?

Uppamana, adong ma na mangalehon hadiah tu gellengmuna. Sae do molo holan mandok mauliate ibana di bagas roha? Daong ate! Pasti disuru hamu do ibana mandok mauliate langsung tu na mangalehon i. Alani aha? Molo tadok mauliate, on mambahen hita lam mangargai hadiah na dilehon i. Boha molo tu Debata, songon i do tong? I do! Parrohahon ma akka contoh on.

Tangiang mandok mauliate. Tikki tadok mauliate tu Debata alani sude na denggan na tajalo, gabe taingot ma akka pasu-pasu na dilehon tu hita. Ujungna, gabe lam taargai ma i, tamba ma las ni rohatta, jala marpikkiran na positif ma hita.​—Pilippi 4:6.

Contohna: Mandok mauliate do Jesus tu Bapakna ala ditangihon do tangiangna jala dialusi.​—Johannes 11:41.

Tangiang mangido hasesaan ni dosa. Tikki tapangido asa diampuni dosatta, gabe lam denggan ma panggora ni rohatta, tasolsoli ma dosatta, jala lam tasadari ma balga do pengaruh ni dosatta i. Jala ujungna dang sai tapikkiri be hasalaatta i.

Contohna: Tangis do si Daud martangiang mangido asa disesa dosana.​—Psalmen 51.

Tangiang mangido tudu-tudu dohot bisuk. Molo tapangido tudu-tudu manang bisuk sian Jahowa gabe denggan ma keputusan na tabahen. Jala boi do i mambahen lam serep rohatta. Gabe tasadari ma keterbatasatta. Jala gabe lam pos ma rohatta tu Bapakta na di surgo i.​—Poda 3:​5, 6.

Contohna: Serep do roha ni si Salomo tikki dipangido ibana tudu-tudu dohot bisuk sian Debata lao mamaretta halak Israel.​—1 Raja-Raja 3:​5-​12.

Tangiang tikki marsak. Molo tapasahat sude arsak ni rohatta tu Debata, gabe dame ma rohatta. Gabe lam pos ma rohatta tu Jahowa dang tu diritta sandiri.​—Psalmen 62:8.

Contohna: Martangiang do Raja Asa tikki adong musu na gogo mangalo ibana.​—2 Kronika 14:11.

Manangiakkon halak na asing. Tangiang sisongon on mangurupi hita asa unang egois jala marasi ni roha tu halak na asing.

Contohna: Ditangiakkon Jesus do akka muridna.​—Johannes 17:​9-​17.

Tangiang mamuji Debata. Tikki tapuji Jahowa alani pambahenan dohot parangena na luar biasa, gabe lam taargai ma Ibana jala tapasangap. Tangiang sisongon i mambahen hita gabe lam jonok tu Debatanta jala Bapakta.

Contohna: Dipuji si Daud do Debata alani akka toppaanna.​—Psalmen 8.

Asing ni i, molo martangiang hita boi ma dapotta “hadameon na so boi diattusi jolma.” (Pilippi 4:7) Molo boi dame rohatta di tonga-tonga ni portibi na sursar on, sada pasu-pasu do i. On boi mambahen hita lam sehat. (Poda 14:30) Alai, alani gogotta do umbahen na boi hita songon i? Manang alani aha do?