Marsitutu ma Hita laho Mambahen Sisean
1. Aha do na dihaporluhon asa boi sasahalak malua?
1 Laporan dinas di taon 2014, paboahon marhiras ni roha do naposo ni Debata mamaritahon barita na uli taringot Harajaon. (Mateus 24:14) Dipaboa disi, gumodangan halak boi mandapot barita na uli di taon i, ala marbarita sian jabu tu jabu, kampanye mansarhon risalah dohot gokhon jala marbarita di inganan na ribur. Alai, ingkon taurupi do nasida gabe sisean ni Jesus marhite parsiajaran Bibel, asa boi malua.—1 Timoteus 2:4.
2. Sungkunsungkun aha do na boi mangurupi hita laho mangharingkothon mambahen Parsiajaran Bibel?
2 Haringkothon ma Mambahen Parsiajaran Bibel: Molo adong na manjangkon hita tingki marbarita, marsitutu do hamu laho mandapot hatorangan manang nomor teleponna jala pintor dijumpangi hamu do nasida asa marsiajar Bibel? Andigan ma hamu parpudi mambahen parsiajaran Bibel dohot sasahalak? Andigan ma hamu parpudi mambahen parsiajaran Bibel tu langganan majalahmuna? Nunga dipatudu hamu video Boasa Ringkot Marsiajar Bibel? dohot video Songon dia do Parsiajaran Bibel na Diulahon Hami? tu dongan sakarejomuna, dongan sasingkola, hombar jabumu, keluargamu, dohot tu na asing? Tingki marbarita hamu mamangke rak buku na marroda, marsitutu do hamu paboahon adong parsiajaran Bibel na so margarar tu halak na mambuat buku?
3. Aha do na tahaporluhon asa denggan hita mangajarhon hasintongan?
3 Pangurupion sian Jahowa dohot Jesus: Tingki diparentahon Jesus asa mambahen sisean, didok ibana do ”laho ma hamu” on patuduhon na porlu do hita marsitutu manjumpangi nasida. Jala marjanji do ibana mandongani hita mangulahon i. (Mateus 28:19, 20) Dilehon Jahowa do tu hita tondi parbadia, marragam buku manang video dohot isara na tahaporluhon laho mangajarhon hasintongan tu jolma. (Sakaria 4:6; 2 Korint 4:7) Martangiang ma hita asa dilehon ”giot ni roha” laho mangulahon on.—Pilippi 2:13.
4. Boasa hita ingkon marsitutu mambahen parsiajaran Bibel?
4 Marbarita na uli mambahen hita marlas ni roha. Alai, tamba ma las ni rohanta molo taajari hasintongan tu sasahalak jala taurupi ibana asa diihuthon ”dalan laho tu hangoluan.” (Mateus 7:14, Bibel Siganup ari; 1 Tessalonik 2:19, 20) Na rumingkot, molo marsitutu hita laho mambahen parsiajaran Bibel, marlas ni roha ma Jahowa na mandok, ”unang ma nian mago agia ise, naeng ma tahe saluhutna sahat tu hamubaon ni roha.”—2 Petrus 3:9.