Songon dia do Parsiajaran boi Hona tu Roha ni Parsiajar Bibelmuna
1. Aha do pangkorhon ni pangajarion ni Jesus tu roha ni angka na manangihon?
1 Tingki Jesus mangajar, hona do tu roha ni halak na manangihon. Di sada tingki, marhiras ni roha do angka siseanna dung dipatorang Jesus na tarsurat i tu nasida. (Luk. 24:32) Ingkon sian roha do sasahalak mangoloi Debata. Songon dia do asa hona tu roha ni parsiajar Bibel tingki tapangido nasida mambahen hamubaon di ngoluna?—Rom 6:17.
2. Aha do pangkorhon ni bisuk dohot pangantusion tu roha ni sasahalak?
2 Pangke ma Bisuk dohot Pangantusion: Molo pintor tapatudu do ayat ni Bibel na paboahon ulaon na sintong dohot na sala tu angka jolma, ndang sae on mambahen hona tu roha ni nasida. Laho manjujui sasahalak mangulahon na denggan, parjolo ingkon taantusi do aha na mambahen nasida porsea jala boasa diulahon nasida i. Alani i, marbisuk ma mamillit sungkunsungkun na boi mangonjar roha ni nasida. (Poda 20:5) Molo manat hita pasahathon hata ni Debata boi ma hona pangajarion i tu roha ni nasida. Alani i, ingkon tapatudu do hasabaron jala talehon roha mangurupi nasida. (Poda 25:15) Ingot ma, ndang dos hamajuon ni halak di partondion. Alani i, marhite pangurupion ni tondi ni Jahowa do hasintongan boi tubu di roha ni sasahalak.—Mrk. 4:26-29.
3. Songon dia do hita boi mangurupi parsiajar Bibel marparange na denggan?
3 Mangurupi Nasida Marparange na Denggan: Patudu ma ayat ni Bibel na manggombarhon habasaon dohot holong ni Jahowa ala on mangurupi parsiajar Bibel marparange na denggan. Tapangke ma ayat di Psalmen 139:1-4 manang Lukas 12:6, 7 na patuduhon Debata mamparrohahon jolma. Molo sasahalak patuduhon pangargaion tu Jahowa, lam togu ma holongna tu Ibana. (Rom 5:6-8; 1 Joh. 4:19) Dung diparsiajari molo aha na diulahon marpangkorhon tu roha ni Jahowa, on boi mangonjar roha ni nasida asa pasonangkon dohot pasangaphon Debata.—Ps. 78:40, 41; Poda 23:15.
4. Songon dia do hita patuduhon na taargai hak ni sasahalak laho mambahen haputusan tu dirina sandiri?
4 Jahowa ndang mamaksa manang ise laho mangoloi Ibana. Alai, Jahowa mangalehon bisuk tu ganup halak asa boi mangihuthon podaNa. (Jes. 48:17, 18) Tatiru ma Jahowa molo taurupi parsiajar Bibel mambahen haputusan tu dirina sandiri. Gumodang do labana molo nasida mambahen haputusan sandiri. (Rom 12:2) On mambahen nasida lam jonok tu Jahowa na ”manguji angka roha ni jolma”.—Poda 17:3.