HANGOLUAN NI HALAK KRISTEN

Na Baru di Parpunguanta

Mulai Januari 2018, taulas ma hatorangan dohot media sian New World Translation of the Holy Scriptures (nwtsty-E) edisi siparsiajaran di parpunguanta. Ndang rade dope on di bahasa Batak Toba. Alai, boi do on mangurupi hita asa lam tu dengganna paradehon angka na laho taulas di parpunguanta. Na rumingkot, on boi mambahen hita lam jonok tu Debatanta na parholong, i ma Jahowa!

HATORANGAN SIPARSIAJARAN

Hatorangan taringot angka halak, inganan, dohot bahasa na dipangke di angka ayat ni Bibel.

Mateus 12:20

Sumbu na marnehetnehet: Somal do palito dipangke di jabujabu najolo. Inganan ni miak na dibahen sian tano jala miakna, i ma miak jetun. Dipangke ma sumbu ni rami laho pagalakhon apina. Hata Junani na dipangke laho mandok ”sumbu na marnehetnehet”, lapatanna sumbu na so adong be apina alai adong dope barana. Surirang na didok di Jesaya 42:3 paboahon, ndang na laho intopan ni Jesus pangkirimon ni halak na serep marroha jala marsitaonon.

Mateus 26:13

Tutu: Hata Junani a·menʹ, molo dibahen tu hata Ibrani gabe ʼa·menʹ, lapatanna ”sai saut ma”, manang ”tutu”. Jotjot do on didok Jesus di mula ni pangkataionna, janjina, manang bagabagana. On patuduhon na haposan do hatana jala sintong. Jala, adong na mandok holan di angka buku na badia do hata i dipangke. Tingki mulahulak didok Jesus hata on (a·menʹ a·menʹ), songon na didok di Buku Johannes, diterjemahon ma i gabe ”tutu situtu”.—Joh 1:51.

MEDIA

Marisi foto, gombar, video na so marsoara, dohot animasi na paboahon angka hatorangan na sian Bibel.

Betpage, Dolok Jetun, dohot Jerusalem

Video on patuduhon dalan tu Jerusalem sian timur, i ma huta na digoari et-Tur (huta na digoari Betpage di Bibel) tu punsu ni Dolok Jetun. Di sabola timur ni huta Betpage ma huta Betania, di robean na di dompak timur. Tingki di Jerusalem, somalna Jesus dohot siseanna marborngin di Betania, saonari digoari huta el-ʽAzariyeh. Molo di bahasa Arab lapatanna ”Inganan ni si Lasarus”. Pasti di jabu ni si Lasarus, si Maria dohot si Marta do Jesus marborngin. (Mat 21:17; Mrk 11:11; Luk 21:37; Joh 11:1) Ra, sian on do Jesus mardalan tingki laho sian jabu ni si Maria tu Jerusalem. Di tanggal 9 bulan Nisan tahun 33 M, tingki Jesus marhalode sian Dolok Jetun tu Jerusalem, ra sian Betpage do ibana.

Dalan sian Betania tu Betpage
Betpage
Dolok Jetun
Aek Kidron
Dolok Bagas Joro

Paku di Tambihul ni Pat

Foto tiruan ni holiholi pat ni jolma na hona paku na ganjangna 11,5 cm. Na asli didapot taon 1968, tingki laho angka panulingkit tu Jerusalem dompak utara. Holiholi on nunga adong sian masa ni halak Rom. Jala didapot di bagasan ni kotak batu. I ma na gabe inganan ni holiholi, molo dung busuk bangke ni halak na mate. Lapatanna, dung digantung sasahalak jala mate, ditanom do ibana muse. On patuduhon, somal do di nasida tingki i mamakkuhon pat ni halak tu sada hau laho manguhum. Ra, sarupa do paku on tu paku na dipangke tentara ni Rom laho mamakkuhon pat ni Jesus tu sada tiang.—Mat 27:35.