Sukkun-Sukkun Sian na Manjaha
Holan sia parange na dipaboa di Galatia 5:22, 23 do na gabe “parbue ni tondi parbadia”?
On ma sia parange na ikkon dipatudu halak Kristen, “Parbue ni tondi parbadia, i ma holong, las ni roha, dame, sabar, haburjuon, pangalaho na denggan, haporseaon, lambok ni roha, dohot mangorom diri.” Alai porlu do taingot, sasittongna dang holan akka parange i na gabe parbue ni tondi parbadia.
Sian dia taboto? Andorang so dipaboa si Paulus akka parbue ni tondi, disurat ibana do, “Parniulaon ni daging, i ma seks na so patut, ulaon na ramun, ulaon ni halak na so umboto ila, manomba gana-ganaan, mardatu, marmusu, marbada, mangiburu, muruk-muruk, marsalisi, mamola-mola, sekte-sekte, late ni roha, mabuk, marpestai sahat tu na mabuk, dohot angka ulaon na songon i.” (Gal. 5:19-21) Didok si Paulus hata “angka ulaon na songon i”. Lapatanna, dang dipaboa ibana sude ulaon na tarmasuk “parniulaon ni daging” songon na disurat di Kolosse 3:5. Songon i do tong taringot sia parange na denggan na disurat di Galatia 5:22, 23. Dang dipaboa ibana sude parange na denggan na boi tapatudu marhite pangurupion ni tondi parbadia.
Cocok do on molo tabandingkon akka parbue ni tondi parbadia on tu akka parange na sian hatiuron na disurat si Paulus tu huria di Epesus. Didok, “Angka na denggan, na hombar tu lomo ni roha ni Debata, dohot na sintong do na ro sian hatiuron i.” (Eps. 5: 8, 9) “Angka na denggan”, tarmasuk do “parange na ro sian hatiuron”, jala tarmasuk do muse i “parbue ni tondi parbadia.”
Dijujui si Paulus do si Timoteus asa patuduhon parange na denggan, i ma “mangulahon na sintong, mangulahon lomo ni roha ni Debata, patuduhon haporseaon, holong, hasabaron, dohot lambok ni roha.” (1 Tim. 6:11) Holan tolu do sian akka parange i na tarmasuk “parbue ni tondi parbadia” na disurat di Galatia 5:22, 23. Alai tottu lomo do tong roha ni si Timoteus asa diurupi tondi parbadia ibana lao patuduhon akka parange na asing, songon mangulahon na sittong, mangulahon lomo ni roha ni Debata, dohot hasabaron.—Bandingkon Kolosse 3:12; 2 Petrus 1:5-7.
Alani i, dang holan akka parange na disurat di Galatia 5:22, 23 na ikkon dipatudu halak Kristen. Memang diurupi tondi parbadia do hita mangulahon sia parange i. Alai, godang do muse parange na asing na ikkon dipatudu halak Kristen. Jala, ikkon dipakke nasida do “pangalaho na imbaru hombar tu lomo ni roha ni Debata mangihuthon hasintongan dohot roha na marsihohot”.—Eps. 4:24.