Diboto Hamu Do?

Akka aha do jenis ni pajak di jaman ni Jesus?

SABOTULNA sian najolo, nungnga somal halak Israel papunguhon hepeng lao mendukung ibadat tu Jahowa. Alai di jaman ni Jesus gabe godang do pajak na ikkon gararaon ni halak i, na mambahen susa ngolu ni nasida.

Sude bawa ni halak Jahudi naung dewasa, ikkon dilehon do pajak na godangna satonga sekel (dua drakhma) lao mendukung ibadat tu Jahowa di tabernakel dohot di bagas joro. Di abad na parjolo, tetap dope dilean halak i pajak i lao paradehon pelean dohot mangarawat bagas joro na dipajongjong ni si Herodes. Hea do disukkun halak Jahudi tu si Petrus pandangan ni Jesus taringot tu pajak sisatonga sekel i. Alai dang adong didok Jesus na sala do manggarar pajak i. Gariada disuru ibana do si Petrus mangalehon hepeng logam lao mambayar pajak ni nasida na dua.​—Mat. 17:24-27.

Ikkon dilean halak Jahudi do muse saparsappulu sian hasil ni ladang manang sian penghasilan ni nasida. (3 Mus. 27:30-32; 4 Mus. 18:26-28) Alai ditamba-tambai akka pamimpin agama do saparsappulu na ikkon leanon ni nasida. Didok pamimpin agama i, ikkon dilean do saparsappulu sian sude jenis ni suan-suanan. Termasuk ma i “suan-suanan mint, adas, dohot jintan na bottar”. Dang hea didok Jesus na sala mangalean saparsappulu. Alai na sala didok Jesus, cara ni siboto surat dohot halak Parise papunguhon saparsappulu i.​—Mat. 23:23.

Asing ni i, ikkon leanon ni halak Jahudi do muse pajak tu halak Rom na mamaretta nasida di tikki i. Misalna akka nappuna tano, ikkon dilehon do pajak, boi do hepeng manang boi do hasil ladang ni nasida. Hira-hira 20 sappe 25 persen ma na ikkon leanon ni nasida. Ikkon gararon ni sude halak Jahudi do muse pajak kepala tu halak Rom. Jala taringot pajak i ma na hea disukkun halak Parise tu Jesus. Didok Jesus ma tu nasida, “Lehon ma tu Kesar appuna ni Kesar jala tu Debata appuna ni Debata.” (Mat. 22:15-22) Ikkon songon Jesus do pandanganta taringot manggarar pajak.

Adong dope muse pajak na dijalo sian akka partiga-tiga na ro tusi. Dipapungu ma pajak i di pelabuhan, persimpangan, dohot di pintu masuk ni kota manang pintu masuk ni pasar.

Alai paborattu do pajak na dibahen pamarettaon ni Rom. Taringot pamarettaon ni si Tiberius tikki di tano on dope Jesus, hea do sejarawan Rom na margoar si Tacitus mandok songon on, “Sappe minta tolong do halak Siria dohot halak Judea, asa diorui pajak sigararon ni nasida, ala paborattu do i.”

Asing ni i muse, lam susa do halak Jahudi alani cara ni sijalo pajak papunguhon pajak. Asa boi sasahalak gabe sijalo pajak ikkon godang do hepeng na dilean ibana. Jadi dung gabe sijalo pajak ibana dipapungu ma anggotana. Nasida ma na disuru papunguhon pajak jala sude do anggotana i mambuat uttung. Olo do ra si Sakkeus kepala ni sijalo pajak na godang anggotana. (Luk. 19:1, 2) Ala songon i cara ni nasida papunguhon pajak, gabe sogo hian ma roha ni halak Jahudi tu akka sijalo pajak.