Diurupi Jahowa do Hami asa ‘Marparbue Manang Didia pe Hami Disuan’

Dohot do si Mats dohot si Ann-Catrin Kassholms tu Sikkola Gilead taon 1979. Dung i, jotjot do nasida “disuan” manang ditugasson di inganan na marasing-asing. Misalna di Iran, Mauritius, Myanmar, Tanzania, Uganda, dohot Zaire. Di Sikkola Gilead i ma adong sahalak instruktur na paboahon nasehat i. Goar ni instruktur i si Jack Redford. Nasehat i ma na mangurupi nasida tikki “disuan”, “dicabut”, jala “disuan muse” di inganan na marasing-asing. Taida ma pengalaman ni nasida.

Boi do tolong caritahon hamu songon dia hamu mananda hasittongan?

Si Mats: Tikki Porang Dunia II, tinggal di Polandia do bapakku. Godang do diida ibana akka halak na munafik di Gareja Katolik. Alai jotjot do didok bapak, “Pos do rohakku, pasti adong do agama na sittong!” Jala toho do hatana i. Najolo, jotjot do au manuhor bukku bekas. Adong ma dapottu sada bukku warna biru na marjudul Kebenaran yang Membimbing kepada Hidup yang Kekal. Tertarik do au mangida judulna i, jadi hutuhor ma i jala hujaha di bagasan saborngin. Dung sae hujaha bukku i, pos do rohakku nungnga huboto be dia agama na sittong.

Mulai bulan April 1972, lam godang ma hujaha bukku ni Saksi Jahowa. Jala dapottu ma alus ni akka sukkun-sukkunku taringot Bibel. Sebelumna, adong hian do rencanakku naeng kuliah jala naeng gabe dokter. Alai ala naeng melayani Jahowa au, gabe hubatalhon ma rencanakki. Huhilala dos songon partiga-tiga na di tudosan ni Jesus do au. Dung dapotna sada “mutiara na arga”, rade do ibana ‘manggadis’ sude na adong di ibana lao manuhor mutiara i. (Mat. 13:​45, 46) Ujungna, tardidi ma au tanggal 10 Desember 1972.

Di bagasan sataon, marsiajar do tong natua-tuakku dohot adekku jala tardidi ma nasida. Di bulan Juli 1973, merintis ma au. Di hurianami adong do piga-piga perintis biasa, termasuk ma si Ann-Catrin. Bagak do ibana jala holong hian do rohana tu Jahowa. Marhallet ma hami jala menikah di taon 1975. Dung menikah, tinggal di kota Strömsund, Swedia ma hami saleleng opat taon. Bagak hian do kota i, jala godang do halak na olo marsiajar Bibel disi.

Si Ann-Catrin: Bapakku marsiajar Bibel tikki naeng sae nama ibana kuliah di Stockholm. Tikki i, marumur tolu bulan dope au. Alai sai diboan bapak do au marpungu dohot marbarita. Mulana, muruk hian do omak ala marsiajar Bibel bapak. Jala berupaya do ibana naeng mambuktihon, sala do na diajarhon Saksi Jahowa. Alai di pudian ni ari, diboto omak ma sittong do hape na diajarhon nasida. Ujungna tardidi ma tong omak. Tikki marumur 13 taon au, tardidi ma au. Jala merintis ma au tikki marumur 16 taon. Sanga do au melayani di inganan na makkaporluhon parbarita di Umeå, jala gabe perintis istimewa ma au.

Dung menikah au dohot si Mats, las hian do rohanami ala godang na diurupi hami marsiajar Bibel. Adong ma sahalak anak boru na diurupi hami, goarna si Maivor. Atlet do ibana. Alai ditinggalhon do i ala naeng melayani Jahowa ibana. Dung i, merintis ma ibana rap dohot adekku. Dohot ma nasida tu Sikkola Gilead taon 1984, jala gabe utusan injil ma nasida di Ekuador sappe saonari.

Saleleng gabe misionaris hamu, aha do na diulahon hamu asa ‘marparbue manang didia pe hamu disuan’?

Si Mats: Jotjot do hami “disuan” manang ditugasson di inganan na marasing-asing. Alai sai boi do hami mambahen penyesuaian ala marsitutu do hami maniru Jesus, tarlumobi serep ni rohana. (Kol. 2:​6, 7) Misalna, dang diharappon hami akka dongan na di huria na menyesuaihon diri tu hami. Alai hami do na marsitutu mangattusi cara marpikkir dohot hasomalan ni nasida. Ala berupaya hami maniru Jesus, dihilala hami gabe songon suan-suanan na “disuan di labbung ni sunge” ma hami. Hasilna, gabe boi ma hami marparbue manang didia pe hami disuan.—Ps. 1:​2, 3.

Si Ann-Catrin: Molo dicabut sada suan-suanan jala disuan i muse di inganan na asing, ikkon hona mataniari do i asa boi denggan tubu. Dos songon i ma hami. Jahowa ma na gabe “mataniari” di hami. (Ps. 84:11) Dilehon Ibana do akka dongan na makkaholongi hami. Misalna, akka dongan di hurianami di Teheran, Iran. Nang pe gelleng huria i, alai massai burju do akka dongan na disi. Gabe boi ma dihilala hami haburjuon songon na dipatudu akka halak na disurat di Bibel. Las hian do rohanami melayani di Iran. Alai di bulan Juli 1980, diorai ma ulaonta marbarita disi, jala ikkon lao do hami sian i. Holan 48 jom do dilehon tikki tu hami asa borhat sian i. Dung i, ditugasson ma hami tu Zaire (saonari didok Kongo) di Afrika.

Tangis do au tikki ditugasson hami tu Afrika. Mabiar do au, alana hubege godang do ninna disan ulok dohot sahit na berbahaya. Alai adong ma dua ale-alenami na patoguhon rohanami. Hea do nasida melayani di Afrika saleleng martaon-taon. Didok nasida, “Unang mabiar hamu! Jalo hamu ma tugas i. Pasti las do rohamuna annon melayani di Afrika.” Toho do hape na didok nasida i! Massai holong do roha ni akka dongan tu hami jala massai burju do nasida. Dukkon onom taon hami disan, diorai ma ulaonta marbarita. Gabe ikkon lao ma hami sian i. Borat hian do dihilala hami. Bahkan sappe hutangiakkon do tu Jahowa asa tetap hami melayani di Afrika.

Pasu-pasu aha do naung dihilala hamu saleleng on?

Si Mats: Alani tugasnami on, gabe godang ma ditanda hami akka misionaris sian marragam negara. Jala gabe kompak ma hami dohot nasida. Asing ni i, godang do halak na olo marsiajar Bibel di piga-piga inganan penugasannami. Sipata sappe 20 halak ma parsiajar Bibelhu, songon i nang istrikku. On mambahen las hian rohanami jala puas. Dang tarhalupahon hami holong dohot haburjuon ni akka dongan di Afrika. Tikki berkunjung hami tu akka huria di Tanzania, biasana modom di mobil do hami. Diparkirhon hami ma mobilnami i di sapping jabu ni akka dongan. Memang pogos hian do akka dongan disi. Alai burju hian do nasida, jala dilehon nasida do ‘lobi sian na tolap ni nasida’. (2 Kor. 8:3) Ganup borngin, biasa do au dohot istrikku marcarita-carita. Dicaritahon hami ma aha na terjadi di sadari i, jala mandok mauliate do hami tu Jahowa ala sai didongani do hami.

Si Ann-Catrin: Las hian do rohakku ala boi hutanda godang dongan sian marragam inganan. Boi do muse hami marsiajar bahasa na baru, termasuk ma i bahasa Farsi, Luganda, Prancis, dohot Swahili. Boi do tong diboto hami godang kebudayaan di inganan penugasannami. Las do tong rohanami mangurupi akka dongan na baru tardidi, boi marale-ale dohot godang dongan, jala “marsada lao manomba [Jahowa]” rap dohot nasida.—Sep. 3:9.

Asing ni i, godang do akka toppaan ni Jahowa na massai uli na diida hami. Jala tikki dilehon tugas na baru tu hami, dihilala hami hira na diboan Jahowa ma hami mardalani. Gabe godang ma pengalamannami. Pasti dang boi dihilala hami sudena i molo dang ala na dilehon Jahowa tugas tu hami.

Tantangan aha do na diadopi hamu saleleng on, jala boha do caramuna mangadopi i?

Si Mats: Piga-piga hali hea do hami marsahit, termasuk ma hona malaria. Si Ann-Catrin pe hea do piga-piga hali ikkon dioperasi. Asing ni i, ala nga lam matua natua-tuanami, sering do hami mamikkirhon nasida. Alai tuani ma, adong akka adeknami na sai rade mangurupi. Sabar jala denggan do diurus nasida natua-tuanami. (1 Tim. 5:4) Nang pe dao hami, berupaya do hami mangalehon na dihaporluhon natua-tuanami. Alai sipata, lungun do rohanami ala dang boi langsung mangurupi nasida.

Si Ann-Catrin: Di taon 1983, tikki di Zaire hami, hona kolera ma au jala parah hian do i. Tikki i, didok dokter ma tu si Mats, “Sadari on, ikkon lao do hamu sian on!” Jadi marsogotna i, pittor borhat ma hami tu Swedia. Marpesawat barang do hami borhat, alana holan i do pesawat disi.

Si Mats: Didok dokter, dang boi be malum si Ann-Catrin. Jadi didok rohanami, ikkon so do hami sian tugasnami. Lungun hian do rohanami jala sai tangis ma hami. Alai tuani ma, malum do hape si Ann-Catrin. Sataon dukkon i, mulak ma muse hami tu Zaire. Ditugasson ma hami tu sada huria na gelleng, na marbahasa Swahili di Lubumbashi.

Si Ann-Catrin: Tikki di Lubumbashi hami, keguguran ma au. Memang, dang adong rencananami naeng marianakkon. Alai, lungun hian do rohakku tikki na keguguran i au. Di situasi i, diapuli Jahowa do rohanami. Massai godang do parsiajar Bibelnami, unggodang sian sebelumna. Dang gok dope sataon, martamba do akka penyiar di hurianami. Sebelumna 35, gabe 70 halak. Jala godang ni na ro marpungu pe martamba do. Sebelumna 40, gabe 220 halak. Asing ni i, ringgas do hami marbarita, jala dipasu-pasu Jahowa do sude upayanami. On mambahen gabe tarapul rohanami. Alai memang sahat tu saonari pe, olo do diingot hami jala dihatai hami taringot gellengnami i. Tarpaima do hami tikki dipamalum Jahowa rohanami di Paradeiso annon.

Si Mats: Hea ma loja hian dihilala si Ann-Catrin jala dang adong semangatna mangulahon manang aha pe. Au pe hona sahit kanker usus stadium opat jala ikkon dioperasi. Alai saonari, nungnga lam sehat be huhilala. Jala si Ann-Catrin pe torus do berupaya mangalehon na terbaik tu Jahowa.

Alai diboto hami do, dang holan hami hape na mangadopi sitaonon. Misalna, akka donganta di Rwanda. Dung masa kerusuhan taon 1994, godang do akka donganta na tinggal di pengungsian. Jadi ro ma hami mangida nasida. Nang pe maol situasi ni nasida, alai tetap do nasida marhaposan tu Jahowa, sabar, jala burju. Sitiruon na dipatudu nasida mambahen pos rohanami, pasti sai urupan ni Jahowa do akka naposona mangadopi sitaonon manang aha pe.—Ps. 55:22.

Si Ann-Catrin: Di taon 2007, dohot ma hami tu acara penahbisan kantor cabang Uganda. Dung sae acara i, mulak ma hami rap dohot hira-hira 25 misionaris dohot anggota Betel tu Nairobi, Kenya. Marbus do hami tikki i. Andorang so sahat hami di perbatasan Kenya, adong ma sada mobil na manabrak busnami sian jolo. Mate di tempat do supirnami dohot lima donganta. Jala sada donganta borua mate di rumah sakit. Tarpaima do hami boi pajuppang muse dohot nasida!—Job 14:​13-15.

Tikki na kecelakaan i, lukka do tong hami. Dung piga-piga tikki, malum do i. Alai au, si Mats, dohot piga-piga donganta na asing gabe trauma jala jotjot khawatir. Songon au ma, jotjot do au tarsunggul tikki borngin. Jala huhilala, hira na hona serangan jantung ma au. Molo nga songon i, mabiar hian ma au. Alai torus do hami martangiang tu Jahowa. Dijaha jala dirimangi hami ma piga-piga ayat favoritnami. Hasilna, gabe tenang ma dihilala hami. Asing ni i, lao do hami tu dokter jala bermanfaat do i. Saonari, nungnga lam denggan be dihilala hami. Jala ditangiakkon hami do asa diurupi Jahowa akka dongan na mangadopi situasi na sarupa.

Tikki dipaboa hamu songon dia hamu toktong martahan saleleng mangadopi akka sitaonon i, didok hamu do ‘hira na mamboan tolor do Jahowa tikki mamboan hamu’. Boasa didok hamu songon i?

Si Mats: Jotjot do halak Swahili mandok, “Tumebebwa kama mayai mabichi.” Artina, “Diboan do hami songon na mamboan tolor.” Dos songon sasahalak na mamboan tolor, pasti manat do ibana asa unang maputtar tolor i. Songon i ma Jahowa. Sai dipatudu Ibana do holongna tu hami, jala sai diurupi do hami. Buktina, dilehon do na dihaporluhon hami, bahkan lobi sian i. Sada cara ni Jahowa mangulahon i, i ma marhite holong na dipatudu Punguan na Mangaradoti Organisasi.

Si Ann-Catrin: Adong na lao hucaritahon taringot cara ni Jahowa mangurupi hami. Di sada tikki, ditelepon ma hami na masuk rumah sakit bapakku di Swedia jala parah do sahitna. Si Mats pe baru malum sian malaria, jala dang cukkup hepengnami lao manuhor tiket asa boi mulak. Alani i, naeng dijual hami ma mobilnami. Hape piga-piga menit dukkon i, adong ma na manelepon hami. Sada, i ma sapasang suami istri naung mamboto situasinami, jala naeng dituhor nasida sada tiket tu hami. Sada nai, i ma donganta borua naung matua na manippan hepeng di sada kotak. Disurat ibana do di kotak i, “Tu na makkaporluhon.” Songon i ma hatop ni Jahowa mangurupi hami!—Heb. 13:6.

Dung 50 taon hamu dohot tu dinas sepenuh waktu on, aha do parsiajaran na dapotmuna?

Si Ann-Catrin: Gabe huboto ma, molo ‘torus hita porsea jala dang busisaon’, boi ma hita margogo. Molo pos rohatta tu Jahowa, hira Jahowa ma na marporang lao paluahon hita. (Jes. 30:15; 2 Kron. 20:​15, 17) Asing ni i, ala marsitutu hami mangalehon na terbaik tu Jahowa, massai godang do pasu-pasu na dilehon Ibana tu hami.

Si Mats: Parsiajaran na uppetting na hudapot, i ma ikkon sai huasahon do Jahowa jala sabar paimahon Ibana mangurupi au. (Ps. 37:5) Asing ni i, sai ditepati Jahowa do janjina. Buktina, sai diurupi do hami bahkan sappe saonari. Saonari hami melayani di Betel Myanmar.

Berharap do hami asa lam godang akka na poso na rade mangalehon gumodang tikkina tu Jahowa. Molo diulahon nasida i, pasti boi do dihilala nasida holong ni Jahowa songon na dihilala hami saleleng on. Jala pos do rohanami, molo olo nasida diurupi Jahowa, pasti boi do nasida marparbue manang didia pe nasida disuan.