Sada Haburjuon ni Halak Kristen
DI SADA huta di Gujarat India, adong ma sada dakdanak, goarna si John. Nunga gabe Sitindangi Ni Jahowa bapakna di ujung ni taon 1950an. Alai molo si John, omakna dohot haha anggina maragama Katolik Rom do. Jala fanatik do nasida. Alani i, sogo do roha ni nasida tu haporseaon ni bapakna.
Sada tingki, disuru bapakna ma ibana manaruhon amplop tu dongan sahuria ni bapakna. Hape di manogot nai, tarseat do tangan ni si John tingki laho mambungka toples na sian timah. Alai nang pe songon i ditaruhon ibana do amplop i. Diingkat ibana ma tanganna na tarseat i.
Alai ndang jumpang ni si John dongan ni bapakna i. Gabe tu tungganeboruna ma dilehon amplop i. Sitindangi Ni Jahowa do tungganeboruna i. Diida ibana ma na tarseat tangan ni si John. Diubati donganta i ma tangan ni si John. Dibuat ma inganan ni ubatna. Dipaias ma lungkana i, jala dibahen ma perban. Dibahen ibana do muse tes tu si John. Jala lambok do ibana mangkatahata i taringot Bibel tu si John.
Alani haburjuonna gabe lomo roha ni si John mangida Sitindangi. Disungkun ibana ma dua sungkunsungkun taringot imbar ni Sitindangi Ni Jahowa dohot gareja Katolik. Disungkun ibana ma, Jesus do Debata manang na ndang, na ingkon tu si Maria do halak Kristen martangiang manang na ndang. Nunga diboto donganta on bahasa Gujarati, jadi boi ma dialusi ibana sungkunsungkun ni si John. Dipatudu ma alus na sian Bibel jala dilehon ma buku ”This Good News of the Kingdom.”
Tingki di jaha si John buku i. Pos ma rohana on do hasintongan. Disungkun ibana ma muse dua sungkunsungkun i tu panditana. Alai muruk situtu do pandita i. Disampathon ma Bibel tu si John. Jala didok ma, ”Nunga sibolison ho! Patudu ma jo, dia do hata ni Bibel na mandok na so Debata Jesus i. Jala dia do na mandok na so pola tasomba si Maria. Patudu ma!” Songgot ma roha ni si John mangida pandita i. Jala didok ma, na so olo be ibana laho tu gareja Katolik. Jala ndang hea be ibana laho tusi!
Marsiajar Bibel ma si John jala gabe Sitindangi Ni Jahowa. Suang songon i keluargana na asing. Nunga 60 taon naung tarseat tangan ni si John alai tongtong do diingot ibana haburjuon ni donganta i. jala on ma na mangonjar rohana laho mangalehon ngoluna tu Jahowa.—2 Kor. 6:4, 6.