Mangajari Ianakkon asa Mangoloi

TANTANGANNA

Ikkon berjuang do ra hamu mangadopi gellengmuna na marumur opat taon, alana sai na di rohana do na ikkon dioloi.

• Tikki disuru hamu ibana mangulahon sada ulaon na so dihalomohon rohana, dang dioloi ibana hamu.

• Tikki diorai hamu ibana mangulahon sada ulaon na dihalomohon rohana, gabe mardandi ibana.

Olo do ra gabe sukkun-sukkun rohamuna, ‘Ala na gelleng i dope nuaeng ibana makana songon i? Muba do annon i?’

Boi do hamu mangajari gellengmuna asa mangoloi pangidoanmuna. Alai sebelum tabahas songon dia carana, taida ma jo sada alasan boasa songon i ibana.

BOASA MASA SONGON I

Tikki baru tubu gellengmuna, mangarorot ibana do tugasmuna na uppetting. Ikkon rade do hamu manang sadihari pe. Alana holan tangis dope na diboto ibana. Molo nga songon i, ikkon hatop ma hamu mangida aha na dihaporluhon gellengmuna. Jadi ikkon torus do natua-tua mamparrohahon poso-posona.

Dung piga-piga bulan diurus hamu ibana songon i, gabe merasa ma ibana songon raja jala hamu dianggap ibana songon pembantuna. Alai dung marumur dua taon, disadari gellengmuna ma dang boi be songon i ibana. Dang sai dioloi natua-tuana be sude pangidoanna. Gariada ibana nama na ikkon mangoloi pangidoan ni natua-tuana. Pasti dang mura situasi on tu akka dakdanak. Adong do na gabe mardandi manang tangis. Na asing muse toktong mamaksahon na di rohana lao mangida dioloi do pangidoanna i manang na dang.

Di situasi sisongon i, porlu do natua-tua mangajari ianakkonna asa mangoloi. Ikkon takkas do dipaboa natua-tua aha na ikkon diulahon ianakkonna. Alai boha ma molo dang olo ianakkonna mangoloi paretta ni natua-tuana, songon na dipaboa di awal ni artikel on?

NA BOI DIULAHON HAMU

Patudu ma wewenangmuna. Marpulu taon na parpudi on, akka halak na mangakku ahli mandok kejam do hata “wewenang”. Adong do bahkan na mandokkon wewenang ni natua-tua i “mamaksa” jala “mangalanggar prinsip”. Hape sasittongna molo dang dipatudu hamu wewenangmuna sebagai natua-tua, pasti dang olo nasida mangoloi parettamuna. Jadi, ikkon boi do takkas diida gellengmuna na marhak hamu mangatur di keluarga. Alai sebalikna molo dipasombu hamu ianakkonmuna, gabe bingung ma ibana, manja, jala lomo-lomona. Akibatna gabe dang boi ibana gabe halak na bertanggung jawab dung dewasa.—Prinsip ni Bibel: Poda 29:15.

Lehon ma disiplin. Sada kamus patorakkon lapatan ni hata disiplin, “i ma pelatihan lao mangurupi sasahalak asa mangoloi jala boi mangorom diri, biasana marhite mangalehon aturan manang hukuman molo mangalo ibana”. Memang dang boi palobihu manang pakejamhu dibahen disiplin. Alai dang boi tong disiplin i palembekhu manang dang dilehon hukuman molo sala, alana mambahen dakdanak i dang olo muba.—Prinsip ni Bibel: Poda 23:13.

Jelas ma paboa. Piga-piga natua-tua mandok molo naeng disuru nasida ianakkonna mangulahon manang aha pe, ikkon jolo disukkun do ianakkonna i. (“Olo do ho kan paiasson kamarmu?”) Mungkin dihilala natua-tua songon i ma carana asa sopan. Hape sebenarna cara i mambahen ianakkonna gabe merasa bebas naeng mangoloi paretta ni natua-tuana do manang dang. Jadi daripada manukkun ianakkonmuna, parettahon ma langsung ibana.—Prinsip ni Bibel: 1 Korint 14:9.

Tegas ma hamu. Molo diorai hamu gellengmuna mangulahon sada ulaon, unang ma muba hamu jala sahata ma dohot pasanganmuna. Molo adong hukuman naung ditottuhon hamu ala dang unduk gellengmuna, ikkon dipasaut hamu do i. Molo nungnga dibahen hamu sada keputusan, unang pola ganjang dibahas hamu boasa dibahen keputusan i. Molo nungnga didok hamu “olo, dok ma ‘Olo’. Molo dang, dok ma ‘Dang’”.—Jakobus 5:12.

Patudu ma holong. Dang boi cara demokrasi manang diktator na dibahen di keluarga. Lapatanna dang boi gabe dakdanak na mangatur di keluarga, alai dang boi tong natua-tua pakejamhu mangatur di keluarga. Sebalikna dilehon Debata do petunjuk tu natua-tua asa mangajari gellengna marhite holong. Porlu do dilehon natua-tua disiplin lao mangajari ianakkonna asa mangoloi jala asa boi dihilala ibana na holong roha ni natua-tuana tu ibana. Hasilna, boi ma gellengna i gabe halak na bertanggung jawab dung dewasa.