Boasa Susa Hita, Matua jala Mate?

Alani Jolma na Parjolo

“Masuk do dosa i tu portibi on marhite sada jolma jala dosa i parohon hamatean. Nungnga rarat hamatean i tu sude jolma.”​—ROM 5:12.

Sempurna do si Adam dohot si Hawa ditoppa Debata. Jala dilehon do tu nasida inganan na denggan, i ma taman Eden. Didok Debata do tu nasida, boi do diallang nasida sude akka parbue ni hau na di taman Eden i. Alai adong sada hau na di taman i na so boi diallang nasida parbuena. Hape diallang si Adam dohot si Hawa do parbue ni hau i. Alani i, gabe mardosa ma nasida. (1 Musa 2:15-17; 3:1-19) Ala dang dioloi si Adam dohot si Hawa Debata, gabe diusir ma nasida sian taman Eden. Alani i, gabe susa ma ngolu ni nasida. Dung adong ianakkon ni nasida, gabe dohot do ianakkon ni nasida i susa. Gabe matua do nasida jala mate. (1 Musa 3:23; 5:5) Jadi marsahit pe hita, matua jala mate, ala keturunan ni si Adam dohot si Hawa do hita.

Alani Suru-suruan na Jahat

“Di bagasan huaso ni Sibolis do saluhut portibi on.”​—1 JOHANNES 5:19.

Sibolis, i ma suru-suruan na mangalo tu Debata. (Johannes 8:44; Pangungkapon 12:9) Dung i, adong do muse akka suru-suruan na mangihutton Sibolis mangalo tu Debata. Didok ma nasida, akka suru-suruan na jahat. Dipakke nasida do huasona lao manipu akka jolma, asa dohot nasida dang mangoloi Debata. Dipengaruhi nasida do godang jolma asa mangulahon akka na jahat. (Psalmen 106:35-38; 1 Timoteus 4:1) Lomo do roha ni Sibolis dohot akka suru-suruanna mambahen hita susa.

Alani Salatta Sandiri

“Manang aha na disuan sasahalak, i do panenonna.”​—GALATIA 6:7.

Godang do hasusaan na tahilala alani dosa warisan na sian si Adam dohot si Hawa, dohot alani pengaruh ni Sibolis. Alai sipata susa pe hita, olo do alani salatta sandiri. Boasa? Alana molo taulahon akka na jahat manang tabahen keputusan na sala, gabe akka na so denggan do na tadapot. Alai molo taulahon akka na denggan, pasti na denggan do hasil na tadapot. Contohna, sahalak suami jala sahalak ama na jujur, na ringgas karejo, jala na holong rohana tu keluargana, pasti godang do akka na denggan na dapotna. Jala bahagia do keluargana. Alai molo halak parjuji do ibana, parminum, manang malas karejo, gabe marpogos do ibana dohot keluargana. Alani i, ikkon taoloi do Debata. Alana, lomo do roha ni Debata asa dame ngolutta jala tadapot akka na denggan.—Psalmen 119:165.

Ala Hita Mangolu “di Ari Parpudi”

“Di ari parpudi . . .  makkaholongi dirina sandiri ma jolma, holongan di hepeng, . . . dang mangoloi natorasna, . . . dang diboto mangorom diri, parmuruk-muruk, makkasogohon na denggan.”​—2 TIMOTEUS 3:1-5.

Saonari, godang do akka pangalaho ni jolma songon na dipaboa di ayat on. On ma sada na gabe tanda naung mangolu hita “di ari parpudi” sian panutup ni jaman on. Didok Bibel do muse, taboto ma naung mangolu hita di ari parpudi tikki taida masa porang, kekurangan makanan, gempa bumi na parah dohot akka sahit. (Mateus 24:3, 7, 8; Lukas 21:10, 11) Akka i ma muse na mambahen jolma susa jala mate.