Aha do Pengaruh ni Handphone tu Cara Marpikkirmuna?

Godang do na ikkon taparsiajari di sikkola, di parkarejoan, manang di ulaon na asing. Jadi, handphone boi do mangurupi hita marsiajar. Alani handphone, gabe boi ma hita mura mandapot godang informasi nang pe di jabutta hita.

Alai godang do halak ala sai marhandphone karejona gabe . . .

maol fokus tikki manjaha.
maol fokus tikki mangulahon sada ulaon.
hatop bosan molo tikki sahalakna.

AHA MA NA IKKON DIBOTO HAMU

Sahalak remaja makkarejohon piga-piga karejo sekaligus. Makkirim pesan, mar-video call dohot donganna, jala mambukka parsiajaranna sian komputer dohot sian bukkuna.

TIKKI MANJAHA

Biasana halak na sering marhandphone, dang sabar tikki manjaha sada sijahaon manang bukku. Jadi, hatop-hatop ma i di jaha asa boi pittor hatop dapotna kesimpulan sian na dijahana i.

Molo holan naeng mandapot informasi do, adong do manfaatna molo holan sekilas hita manjaha. Alai molo naeng mamboto parsiajaran aha na boi tadapot sian na tajaha i, dang boi holan sekilas hita manjaha.

PIKKIRHON MA: Sadia godang do parsiajaran na dapotmuna tikki manjaha sijahaon na ganjang? Aha do manfaatna molo dang holan sekilas hamu manjaha?—PODA 18:15.

ASA BOI FOKUS

Piga-piga halak mandok, alani handphone gabe boi do diulahon nasida lobi sian sada karejo sekaligus. Contohna, belajar sambil makkirim pesan. Alai molo songon i do dibahen, boi do gabe dang fokus jala dang boi denggan makkarejohon sude karejona i.

Ikkon talatik do diritta asa boi fokus jala dang sia-sia i. Sahalak remaja na margoar si Grace mandok, “Molo diulahon hamu songon i, boi ma gabe otik kesalahan na dibahen hamu jala dang stres. Menuruttu, tumagon do fokus makkarejohon sada karejo daripada makkarejohon godang karejo sekaligus.”

PIKKIRHON MA: Alani handphone, gabe maol do hamu fokus jala gabe hatop lupa tu na diparsiajari hamu?—PODA 17:24.

TIKKI SAHALAKMUNA

Adong do piga-piga halak dang lomo rohana molo sahalakna, jadi gabe marhandphone ma nasida asa unang kesepian. Si Olivia mandok, “Pittor bosan do au molo holan 15 menit pe dang hubukka handphoneku, tablet, manang dang manonton TV.”

Sude hita, porlu do tabahen tikki lao mangarimangi dohot mamikkirhon aha na taparsiajari.

PIKKIRHON MA: Tikki sahalakmuna, dipakke hamu do tikkimuna i lao mangarimangi?—1 TIMOTEUS 4:15.

AHA NA BOI DIULAHON HAMU

PIKKIRHON MA NAENG TU AHA DO DIPAKKE HAMU HANDPHONE

Akka aha do na boi diparsiajari hamu sian handphone? Aha do na boi dibahen hamu asa unang terganggu hamu holan alani handphone jala boi mamparsiajari akka na baru?

DIDOK DI BIBEL: “Toktong ma ho marbisuk jala sai manat ma ho marpikkir.”—PODA 3:21.

PIKKIRHON MA ON . . .

Maol do au fokus tikki manjaha sian handphone molo ganjang teksna? Molo songon i do, aha do na mambahen au gabe maol fokus?
Aha ma na boi huulahon asa boi fokus?

Saran: Coba ma jo jaha paragraf na pendek, dung i jaha ma muse paragraf na ganjang. Marsoara ma tikki manjaha, unang hatop-hatop, jala fokus ma tu na dijahamuna i.

Aha do na boi hubahen asa boi denggan hupikkirhon aha na hujaha?

Saran: Bahen ma tikkimuna apala sappulu menit lao mamikkirhon aha naung diparsiajari hamu.

Di situasi na songon dia do au gabe naeng makkarejohon sude karejokku di tikki na sarupa?
Aha do na boi hubahen asa boi au fokus makkarejohon sada-sada karejokku?

Saran: Tikki marsiajar hamu, padao ma akka aha na boi mambahen hamu gabe dang fokus.

DIDOK DI BIBEL: “Marsitutu ma ho asa marbisuk jala asa manat ho marpikkir.”—PODA 4:5.