Tundalhon ma Ugamo na so Sintong!

Sibolis dohot angka surusuruanna ndang marlomo ni roha molo hamu manomba Debata. Molo boi nian, lomo do roha ni nasida asa sude jolma mandao sian Debata. Songon dia do nasida mangulahon i? Sada isarana marhite ugamo na so sintong. (2 Korint 11:13-15) Sada ugamo ndang sintong molo ndang mangajarhon hasintongan na sian Bibel. On boi mambahen jea tu hamu. Ugamo na so sintong dos songon hepeng tiruan—idaon sarupa songon hepeng na tutu, hape ndang marlangku.

Ugamo na so sintong ndang boi pasonanghon roha ni Jahowa, Debata na sintong. Di tingki Jesus di portibi on adong sada punguan ugamo na laho mamunu ibana. Dirimpu nasida nunga sintong ulaonna i. Didok nasida, ”Sada do amanami, i ma Debata.” Satahi do Jesus? Daong! Didok ibana ma tu nasida: ”Na marama tu Sibolis do hamu.” (Johannes 8:41, 44) Saonari on, dirimpu godang halak do nasida manomba Debata, hape manomba Sibolis dohot surusuruanna do nasida!—1 Korint 10:20.

Songon hau na busuk mamparbuehon parbue na so denggan, ugamo na so sintong mambahen angka jolma mangulahon angka hajahaton. Portibi on gok hasusaan ala godang jolma mangulahon hajahaton. Songon giotgiot ni daging, parbadaan, panangko, pamunu, dohot pangalangkup. Godang do na mangulahon hajahaton i nunga marugamo, alai ugamo ni nasida ndang manjujui laho mangulahon angka na denggan. Molo sai diulahon nasida angka na jahat, ndang boi nasida gabe aleale ni Debata.—Mateus 7:17, 18.

Ugamo na so sintong mangajarhon angka jolma martangiang tu ganaganaan. Debata mandok ndang boi martangiang tu ganaganaan. On boi do dapot roha. Lomo do roha muna molo sasahalak ndang hea manghatai tu hamu alai holan tu gombaranmu? Boi do nasida gabe alealemu na denggan? Daong, ndang boi. Lomo do roha ni Jahowa angka jolma manghatai tu Ibana, ndang tu sada patung manang tu sada gombaran, manang tu angka sumansuman na asing.—2 Musa 20:4, 5.

Ugamo na so sintong mangajarhon boi do mamunu jolma di parporangan. Jesus mandok aleale ni Debata ingkon masihaholongan dohot donganna. Ndang boi hita mamunu halak na tahaholongi. (Johannes 13:35) Mamunu halak parjahat pe ndang boi. Tingki ro angka musu ni Jesus laho manangkup ibana, ndang dipasombu angka siseanna maralo asa mangondingi ibana.—Mateus 26:51, 52.

Ugamo na so sintong mangajarhon angka parjahat dipasiaksiak di api na roko. Alai, Bibel mangajarhon upa tinuhor ni dosa do hamatean. (Rom 6:23) Jahowa i Debata parholong. Pulut do roha ni Debata parholong i, laho pasiaksiakhon jolma salelenglelengna? Tontu daong! Di Paradeiso holan sada do ugamo, i ma na dihalomohon ni Jahowa. (Pangungkapon 15:4) Sude ugamo na marojahan tu gabus ni Sibolis ingkon pasohotonNa.