Halak “Na So Parsikkola”

1, 2. Mukjizat aha do na dibahen si Petrus dohot si Johannes di gerbang ni bagas joro?

NUNGNGA botari tikki i. Alai tiur dope mataniari manondangi akka halak na marpungu di bagas joro. Marroan ma akka halak Jahudi dohot akka sisean ni Jesus tusi. Satokkin nai, dimulai ma ‘tikki lao martangiang’.a (Ul. 2:46; 3:1) Disi do si Petrus dohot si Johannes. Naeng masuk ma nasida sian Gerbang na Uli. Rame hian do disi, godang do halak na makkata-hatai jala na mardalan. Alai adong ma disi sahalak bawa na mangido-ido. Nungnga lobi sian 40 taon umurna, jala cacat do ibana sian mulai tubu.​—Ul. 3:2; 4:22.

² Lam jonok ma si Petrus dohot si Johannes tu gerbang i. Dibege nasida ma sai mangido-ido bawa i. So ma nasida na dua, diberengi bawa i ma nasida, jala harap do rohana asa adong na dilehon nasida tu ibana. Dung i didok si Petrus ma, “Dang adong mas dohot perakku. Alai lehonokku ma tu ho na adong di au. Di bagasan goar ni Jesus Kristus halak Nasaret i, mardalan ma ho!” Tarsonggot do godang halak tikki diida nasida boi jongjong bawa i dung ditiop si Petrus tanganna. On ma parjolo sahali ibana jongjong saleleng ngoluna! (Ul. 3:6, 7) Bayakkon ma, sai diberengi bawa i do patna. Dicoba ibana ma mardalan. Alani i, gabe marinjaki ma ibana jala gogo ma soarana mamuji Debata.

3. Silehon-lehon aha do na boi dapot ni akka halak dohot bawa na cacat i?

³ Gabe semangat ma godang halak, jala marlojong ma nasida mandapotton si Petrus dohot si Johannes di Terras ni si Salomo. Disi do najolo Jesus hea jongjong jala mangajari akka halak. Jala dison do tong si Petrus paboahon aha do lapatan ni mukjizat na dibahen ibana nakkin. (Joh. 10:23) Dilehon si Petrus do tu akka halak dohot bawa na cacat i sada silehon-lehon na ummarga sian perak dohot mas. Silehon-lehon on dang holan boi pamaluppon sahit. Alai boi do dapot ni nasida kesempatan lao bertobat, disesa Debata dosa ni nasida, jala boi gabe siihutton Jesus Kristus, “Pamimpin na dipillit [Jahowa] lao mangalehon hangoluan”.​—Ul. 3:15.

4. (a) Boha do tanggapan ni akka parhuaso mangida mukjizat i? (b) Aha do sukkun-sukkun na lao tabahas?

⁴ Luar biasa do na masa di ari i. Adong sasahalak na dipamalum jala gabe boi mardalan. Jala adong marribu halak na asing na diurupi padenggatton hubunganna tu Debata. (Kol. 1:9, 10) Alai, alani peristiwa on gabe berupaya do akka parhuaso menyerang siihutton Kristus asa unang marbarita na uli be. (Ul. 1:8) Aha do na boi taparsiajari sian cara dohot sikap na dipatudu si Petrus dohot si Johannes tikki marbarita tu godang halak, nang pe ‘dang parsikkola’ nasida?b (Ul. 4:13) Boha do hita maniru nasida dohot akka sisean na asing tikki mangadopi tantangan?

Dang Marhite “Gogonami Sandiri” (Ul. 3:11-26)

5. Aha do na boi taparsiajari sian cara ni si Petrus marbarita tu akka halak?

⁵ Jongjong ma si Petrus dohot si Johannes di jolo ni natorop i. Adong do piga-piga sian halak i na dohot mendukung asa dipamate Jesus. (Mrk. 15:8-15; Ul. 3:13-15) Rimangi ma, barani do si Petrus paboahon molo bawa na cacat i nungnga dipamalum di bagasan goar ni Jesus. Dang mabiar ibana paboahon taringot hasittongan. Terus terang do si Petrus paboahon naung marsala nasida ala dohot mambunu Kristus. Alai dang na berarti sogo roha ni si Petrus tu nasida. Alana ‘dang diattusi nasida aha na diulahon nasida’ tikki i. (Ul. 3:17) Dianggap ibana do nasida donganna. Jala fokus do ibana tu balga ni manfaatna molo ditangihon nasida barita Harajaon i. Ai molo bertobat nasida jala porsea tu Kristus, bahenon ni Jahowa ma nasida “margogo”. (Ul. 3:19) Jadi hita pe, porlu do barani jala terus terang tikki paboahon barita panguhuman sian Debata. Alai unang ma hita kasar makkatai, karas, manang menghakimi akka halak. Taanggap ma nasida halak na lao gabe dongan sahaporseaotta. Jala songon si Petrus, fokus ma hita tu balga ni manfaatna molo ditangihon nasida barita Harajaon i.

6. Sian dia do taboto na serep roha ni si Petrus dohot si Johannes?

⁶ Serep do roha ni akka apostel, dang olo nasida mambahen halak marpikkir mukjizat i terjadi alani kemampuan ni nasida. Didok si Petrus ma, “Na dirippu hamu do gogonami sandiri na hupakke hami mangulahon i? Na dirippu hamu do ala hulehon hami ngolunami tu Debata umbahen na boi hubahen hami ibana mardalan?” (Ul. 3:12) Diboto si Petrus dohot akka apostel do alani huaso ni Debata do boi nasida marhasil, dang alani huaso ni nasida. Jadi holan Jahowa dohot Jesus do na ikkon dipuji.

7, 8. (a) Kesempatan aha do na dilehon tu akka halak? (b) Songon dia do Debata menggenapi janjina “lao padenggatton saluhutna”?

⁷ Hita pe porlu do serep rohatta tikki marbarita na uli. Memang dang dilehon be tu hita kemampuan mambahen mukjizat. Alai nang pe songon i, boi do taurupi akka halak asa porsea tu Debata dohot tu Kristus. Songon si Petrus, taurupi ma nasida mandapot kesempatan asa disesa Debata dosa ni nasida jala gabe margogo. Ganup taon marratus ribu halak manjalo kesempatan on jala tardidi gabe sisean ni Kristus.

⁸ Songon naung dipaboa si Petrus, adong do “tikkina lao padenggatton saluhutna”, jala mangolu di tikki i ma hita saonari. Nungnga dipaboa Debata on “tu akka panurirangna na badia i di tikki naung salpu”. Digenapi ma on tikki dipajongjong Harajaonna di surgo taon 1914. (Ul. 3:21; Ps. 110:1-3; Dan. 4:16, 17) Dang leleng dukkon i, mulai ma Kristus mangurupi akka jolma asa denggan muse hubunganna tu Debata. Hasilna, nungnga adong marjuta halak na marale-ale tu Debata jala nasida ma na gabe rakyat ni Harajaon i. Ditinggalhon nasida ma pangalaho na leleng i. Alai dipakke nasida do “pangalaho na imbaru hombar tu lomo ni roha ni Debata”. (Eps. 4:22-24) Songon si Petrus, ikkon barani do hita jala tapakke ma Hata ni Debata mangajari akka halak. Alai songon na tabahas nakkin, bawa na cacat i boi dipamalum dang alani huaso ni jolma, alani tondi parbadia ni Debata do. Saonari pe molo marhasil hita mangurupi halak gabe sisean ni Kristus, alani huaso ni Debata do i, dang alani gogotta sandiri.

“Ikkon Dipaboa Hami do” (Ul. 4:1-22)

9-11. (a) Boha do tanggapan ni akka pamimpin ni halak Jahudi tu barita na dipasahat si Petrus dohot si Johannes? (b) Boha do tanggapan ni akka apostel tikki diorai nasida marbarita?

⁹ Tikki diida akka halak si Petrus makkatai, diida muse bawa na cacat i marinjaki jala marsuraki, gabe longang ma nasida. Ro ma kepala panjaga ni bagas joro na martugas manjaga keamanan disi. Jala ro do tong akka malim kepala mangida situasi i. Halak Saduse do ra nasida, i ma sada kelompok na mora. Balga do pengaruh ni nasida secara politik jala berupaya do nasida asa mardame dohot halak Rom. Dang dijalo nasida hukum lisan na dibahen halak Parise, jala dang porsea nasida tu haheheon.c Sogo hian do roha ni nasida mangida si Petrus dohot si Johannes na barani paboahon molo Jesus nungnga dipahehe.

¹⁰ Muruk ma nasida jala dipamasuk nasida ma si Petrus dohot si Johannes tu penjara. Marsogotna i, diboan ma si Petrus dohot si Johannes tu mahkamah agung Jahudi. Ala merasa hebat do akka penguasa on, dianggap nasida do si Petrus dohot si Johannes halak “na so parsikkola”, jala dang marhak mangajari di bagas joro. Alana dang hea akka apostel marsiajar di sikkola keagamaan na dia pe. Alai longang ma roha ni akka hakim ala barani do si Petrus makkatai jala paposson roha do sude hatorangan na dipaboa ibana. Boasa boi denggan si Petrus dohot si Johannes paboahon on? Sada alasanna, ala “dongan ni Jesus” do nasida. (Ul. 4:13) Diajari Jesus do nasida mamakke huaso na sian Debata, dang songon akka siboto surat.​—Mat. 7:28, 29.

¹¹ Diparettahon pengadilan i ma asa unang marbarita be akka apostel i. Di tikki i, balga do pengaruh ni keputusan na dibahen pengadilan i tu akka halak. Piga-piga minggu sebelumna, pengadilan on do tong na paboahon molo Jesus “ikkon dipamate”. (Mat. 26:59-66) Alai dang gabe mabiar si Petrus dohot si Johannes. Nang pe nasida jongjong di jolo ni akka halak na berpengaruh, na mora, jala parsikkola na timbo, barani do si Petrus dohot si Johannes mandok, “Hamu sandiri ma na manottuhon, dia do na sittong di jolo ni Debata, manangihon hamu do manang manangihon Debata? Alai dang tarbahen hami mangulahon hatamuna i. Ikkon dipaboa hami do aha naung diida hami dohot na dibege hami.”​—Ul. 4:19, 20.

12. Aha do na boi mangurupi hita asa lam barani jala lam marpos ni roha tikki paboahon haporseaotta?

¹² Boi do hamu barani songon akka apostel i? Boha do pakkilalaanmuna molo marbarita hamu tu halak na mora, parsikkola na timbo, manang halak na berpengaruh di masyarakat? Boha do molo adong keluarga, dongan sasikkola, manang dongan sakarejo na mangarehei hamu alani haporseaonmuna? Mabiar do hamu? Molo hea hamu makkilala songon i, boi do hamu barani. Tikki di tano on Jesus, diajari ibana do akka apostelna asa barani jala denggan paboahon haporseaonna. (Mat. 10:11-18) Dung dipahehe, marjanji do Jesus na torus dongananna nasida “sahat tu panutup ni jaman on”. (Mat. 28:20) Saonari marhite “naposo haposan jala na marbisuk”, diajari Jesus do hita lao mambela haporseaotta. (Mat. 24:45-47; 1 Ptr. 3:15) Diajari do hita di parpunguan, misalna di parpunguan Hangoluan dohot Pangkobasion ni Halak Kristen. Diajari do muse hita marhite akka publikasi, contohna akka artikel “Alus ni Bibel” na di jw.org. Molo dipakke hamu sude i, lam barani jala pos ma rohamuna paboahon haporseaonmuna. Songon akka apostel, dang adong manang aha pe na boi mangabbati hamu paboahon hasittongan naung diida jala dibege hamu.

“Martangiang ma Nasida tu Debata” (Ul. 4:23-31)

13, 14. Molo adong tantangan na taadopi, aha do na ikkon taulahon, jala boasa?

¹³ Dang leleng dung dibebasson si Petrus dohot si Johannes, pajuppang ma nasida dohot akka dongan di huria. “Rap martangiang ma nasida tu Debata”, jala dipangido nasida do habaranion asa boi torus marbarita. (Ul. 4:24) Diboto si Petrus sada haotoon do molo hita holan mangandalhon gogotta sandiri tikki naeng mangulahon lomo ni roha ni Debata. Piga-piga minggu sebelumna, hea do papossu rohana tu dirina sandiri. Jala didok ibana do tu Jesus, “Nang pe sude nasida manadikkon ho, alai anggo au dang tadikkonokku ho!” Hape songon naung disurirakkon Jesus, pittor mabiar do si Petrus tu jolma, dang diakkui ibana Jesus i ale-alena dohot guruna. Alai, marsiajar do si Petrus sian kesalahanna i.​—Mat. 26:33, 34, 69-75.

¹⁴ Asa boi tadalatton tugasta gabe saksi ni Kristus, dang cukkup holan semangat. Molo adong akka halak na berupaya mambahen gale haporseaonmuna manang mangorai hamu marbarita na uli, tiru ma si Petrus dohot si Johannes. Martangiang ma tu Jahowa mangido gogo. Lului ma dukungan sian akka dongan di huria. Paboa ma tu akka sintua dohot akka dongan na marpengalaman taringot tantangan na diadopi hamu. Massai balga do pengaruhna molo adong akka dongan na manangiakkon hita.​—Eps. 6:18; Jak. 5:16.

15. Boasa dang porlu metmet rohatta molo hea hita sanga so marbarita?

¹⁵ Molo hea hamu menyerah alani tekanan jala sanga so marbarita, unang ma metmet rohamuna. Ingot ma, akka apostel i pe sanga do dang marbarita dung mate Jesus. Alai dang leleng dukkon i, lao do muse nasida marbarita. (Mat. 26:56; 28:10, 16-20) Unang ma gabe gale hamu alani kesalahanmuna di masa lalu. Alai marsiajar ma hamu sian pengalamanmuna i jala pakke ma i patoguhon na asing.

16, 17. Aha do na boi taparsiajari sian tangiang ni akka sisean ni Kristus na di Jerusalem?

¹⁶ Aha do na ikkon taulahon molo dianiaya pamaretta hita? Taingot ma, dang hea akka sisean ni Jesus mangido asa dipalua nasida sian akka paraloan i. Diingot nasida do hata ni Jesus, “Molo dibahen nasida na haccit tu au, bahenon ni nasida do songon i nang tu hamu.” (Joh. 15:20) Alai dipangido akka sisean i do asa ‘diparrohahon’ Jahowa ancaman ni akka penentang i. (Ul. 4:29) Takkas do diattusi nasida nungnga disurirakkon hian na lao masa penganiayaan i. Diboto nasida do pasti ‘saut do lomo ni roha ni Debata di tano on’, dang soal aha dibahen musu, songon tangiang na diajarhon Jesus.​—Mat. 6:9, 10.

¹⁷ Asa boi akka apostel i mangulahon lomo ni roha ni Debata, ditangiakkon nasida do tu Jahowa, “Bahen ma akka naposomon boi toktong barani paboahon hatami.” Boha do tanggapan ni Jahowa? “Humutur ma inganan ni nasida marpungu i. Sude ma nasida digohi tondi parbadia, dung i gabe barani ma nasida makkatahon hata ni Debata.” (Ul. 4:29-31) Dang adong manang aha pe na boi mangabbati lomo ni roha ni Debata. (Jes. 55:11) Dang soal songon dia situasina, sadia balga huaso ni akka halak na mangalo hita, molo martangiang hita tu Debata pasti lehononna do gogo asa torus hita barani paboahon hatana.

Martanggung Jawab ‘Dang tu Jolma, Alai tu Debata’ (Ul. 4:32–5:11)

18. Songon dia do akka anggota ni huria na di Jerusalem marsiurupan?

¹⁸ Nang pe baru dope dibentuk huria na di Jerusalem, alai nungnga lobi sian 5.000 halak anggotana.d Nang pe marragam latar belakang ni nasida, alai “saroha jala sapikkiran” do nasida sude. (Ul. 4:32; 1 Kor. 1:10) Akka sisean on dang holan martangiang, alai sai marsiurupan do nasida lao patoguhon haporseaonna. Jala molo porlu, rade do nasida mambagihon artana tu na asing. (1 Joh. 3:16-18) Songon i ma na diulahon si Josep na sering dijou si Barnabas. Digadis do ladangna jala disumbangkon sude hasilna lao mangurupi akka halak na ro sian luat na dao. Gabe boi ma nasida leleng tinggal di Jerusalem jala mandapot godang pengajaran lao patoguhon haporseaon ni nasida.

19. Boasa dihukum Jahowa si Ananias dohot si Sapira?

¹⁹ Adong ma sapasang suami istri na margoar si Ananias dohot si Sapira. Nasida pe dohot do manggadis artana jala mangalehon sumbangan. Alai ‘ditabunihon nasida do deba tuhor ni tanona i’. (Ul. 5:2) Hape nasida mandok nungnga dilehon sude hasil penjualan ni artana i. Dipamate Jahowa ma nasida ala jahat rohana jala margabus, dang ala hurang godang na dilehon nasida i. ‘Dang jolma na digabusi nasida, alai Debata do.’ (Ul. 5:4) Songon akka halak na munafik na dihasogohon Jesus, unlomo do roha ni si Ananias dohot si Sapira mangalului hasangapon di jolo ni jolma sian apala mangulahon lomo ni roha ni Debata.​—Mat. 6:1-3.

20. Aha do na boi taparsiajari taringot mangalehon tikki dohot artatta tu Jahowa?

²⁰ Songon akka sisean di Jerusalem di abad na parjolo, adong marjuta Saksi Jahowa saonari na mendukung ulaon marbarita di liat portibi on marhite mangalehon sumbangan. Dang adong manang ise pe na dipaksa mangalehon tikkina manang hepengna lao mendukung ulaon on. Dang olo Jahowa molo hita melayani Ibana ala terpaksa manang dang sian roha. (2 Kor. 9:7) Tikki talehon sumbangan, dang godang ni sumbangan i na diida Jahowa, alai alasanta mangalehon i do. (Mrk. 12:41-44) Unang ma hita songon si Ananias dohot si Sapira, na melayani Jahowa holan asa sangap diida halak. Alai songon si Petrus, si Johannes, dohot si Barnabas, anggiat ma sude pelayananta i talehon alani holongta tu Debata dohot tu dongan jolma.​—Mat. 22:37-40.