‘Toktong Marlas ni Roha jala Digohi Tondi Parbadia’

1, 2. Aha do beda ni si Barnabas dohot si Saulus tu akka utusan injil na sebelumna, jala songon dia do i menggenapi hata ni Jesus di Ulaon ni Apostel 1:8?

ON MA ari na parohon las ni roha tu huria na di Antiokia. Sian akka panurirang dohot akka guru na adong disi, si Barnabas dohot si Saulus do na dipillit marhite tondi parbadia lao pasahatton barita na uli tu akka luat na dao.a (Ul. 13:1, 2) Memang sebelumna nungnga hea ditugasson piga-piga bawa gabe utusan injil. Alai di tikki i, nasida ditugasson tu akka luat naung manjalo barita na uli do. (Ul. 8:14; 11:22) Saonari ditugasson ma si Barnabas, si Saulus, dohot si Johannes Markus tu akka bangso na godangan pendudukna dang hea dope mambege barita na uli.

² Sekitar 14 taon sebelumna, nungnga didok Jesus tu akka siseanna, “Paboaonmuna ma taringot tu au di Jerusalem, di sude luat na di Judea, di Samaria, sahat tu ujung ni tano on.” (Ul. 1:8) Ala nungnga dilantik si Barnabas dohot si Saulus gabe utusan injil, lam hatop ma digenapi hata ni Jesus i!b

‘Dipapulik lao Mangulahon Ulaon i’ (Ul. 13:1-12)

3. Boasa borat pardalanan tu luat na dao di abad na parjolo?

³ Saonari on ala nungnga adong mobil dohot pesawat, boi do hita lao tu luat na dao holan di bagasan sajom manang dua jom. Alai dang songon i situasina di abad na parjolo M. Di tikki i, ikkon mardalan pat do halak jala dang sai bagak dalan. Di bagasan sadari mungkin holan 30 kilometer do na boi didalani halak, i pe nga loja hian.c Alani i nang pe las roha ni si Barnabas dohot si Saulus mangulahon tugas on, alai porlu do nasida berjuang jala rela berkorban mangulahon i.—Mat. 16:24.

4. (a) Ise do na mamillit si Barnabas dohot si Saulus, jala songon dia do tanggapan ni akka dongan tu keputusan i? (b) Boha do caratta mendukung akka dongan na mandapot tugas di huria?

⁴ Boasa si Barnabas dohot si Saulus ‘na dipapulik lao mangulahon ulaon i’? (Ul. 13:2) Dang adong dipaboa di Bibel alasanna, na pasti tondi parbadia do na mamillit nasida. Dang adong tong dipaboa na keberatan akka panurirang dohot guru di Antiokia tu keputusan i, justru didukung do. Bayakkon ma songon dia pakkilalaan ni si Barnabas dohot si Saulus mangida akka donganna marpuasa jala martangiang lao mendukung nasida. “Dibahen nasida ma tanganna tu atas ulu ni si Barnabas dohot tu si Saulus. Dung i, dipaborhat ma nasida na dua.” (Ul. 13:3) Jadi hita pe ikkon tadukung do akka halak na mandapot tugas di huria, termasuk akka bawa na dilantik gabe pengawas. Unang ma iri hita tu akka dongan na mandapot tugas istimewa i. Alai alani ulaon ni nasida i, ‘taparsangapi jala tahaholongi ma nasida’.—1 Tes. 5:13.

5. Songon dia do pardalanan ni si Barnabas dohot si Saulus tikki marbarita di Pulo Siprus?

⁵ Mardalan pat ma si Barnabas dohot si Saulus sahat tu Seloikia, i ma pelabuhan jonok ni Antiokia. Dung sahat disi, markapal ma nasida tu Pulo Siprus na daona hira-hira 160 kilometer.d Huta ni si Barnabas do Siprus. Jadi semangat hian do ibana naeng pasahatton barita na uli tu akka halak na disi. Dung sahat nasida di Salamis kota na di sabola timur ni pulo i, pittor diulahon nasida do tugasna. “Dibaritahon nasida ma hata ni Debata di akka sinagoga ni halak Jahudi.”e (Ul. 13:5) Didalani si Barnabas dohot si Saulus do Pulo Siprus i sian ujung tu ujung. Olo do ra nasida marbarita di akka kota na penting saleleng pardalanan i. Mungkin hira-hira 220 kilometer ma na ikkon didalani nasida, bergantung tu rute na dipillit nasida.

6, 7. (a) Ise do si Sergius Paulus, jala boasa diabbati si Bar Jesus ibana mambege barita na uli? (b) Aha do na didok si Saulus tu si Bar Jesus?

⁶ Di abad na parjolo godangan halak di Siprus mangulahon ibadat na so sittong. Tikki sahat si Barnabas dohot si Saulus di Papos, di sabola barat ni pulo i, pajuppang ma nasida dohot si Bar Jesus. “Ibana sahalak datu jala panurirang na makkatahon na so tutu.” Dilehon do tu ibana gelar Elimas, na artina “Datu”. Jala “karejo do ibana tu gubernur Sergius Paulus na massai pistar”.f Di abad na parjolo, godang do halak Rom na malo songon si Sergius Paulus mangido petunjuk tu datu manang tu tukkang sihir, molo naeng mambahen keputusan penting. Nang pe songon i, ‘lomo do roha ni si Sergius Paulus mambege hata ni Debata’ jala sungguh-sungguh do ibana manangihon. Alai dang lomo roha ni si Bar Jesus.—Ul. 13:6-8.

⁷ Ala dang lomo rohana, diabbati si Bar Jesus ma Gubernur Sergius Paulus “asa unang porsea tu Tuan”, asa boi ibana tetap gabe penasehatna. (Ul. 13:8) Alai dang dipasombu si Saulus tindakan ni si Bar Jesus i. Di bukku Ulaon ni Apostel didok, “Digohi tondi parbadia ma si Saulus na laos digoari si Paulus. Dipanotnoti ibana ma datu i. Jala didok ma, ‘E ho anak ni Sibolis! Panipu do ho, parjahat. Dialo ho do sude na sittong. Boasa sai dipapeol ho dalan ni Jahowa na tigor i? Ida ma! Hukumon ni Jahowa ma ho. Mapitung ma ho jala dang idaonmu be mataniari piga-piga leleng on.’ Satokkin i gabe kabur ma matana jala holom ma diida ibana. Dung i, dadap-dadap ma ibana mangalului sasahalak lao manogu-nogu ibana.”g Aha ma hasilna? “Dung diida gubernur i na masa i, gabe porsea ma ibana. Ai longang do rohana tu akka na diparsiajari ibana taringot tu Jahowa.”—Ul. 13:9-12.

8. Songon dia do hita boi maniru si Paulus?

⁸ Dang mabiar si Paulus tu si Bar Jesus. Saonari pe, berupaya do akka penentang manggugai haporseaon ni akka halak na berminat tu barita na uli. Alai dang gabe mabiar hita jala menyerah. Tetap do tapaboa i jala lambok do hatatta “songon na disirai”. (Kol. 4:6) Berupaya ma hita mangurupi peminat nang pe adong tantangan. Barani ma hita paboahon akka ajaran na so sittong sian agama palsu, i ma ajaran ‘naung peol sian dalan ni Jahowa na tigor i’. (Ul. 13:10) Songon si Paulus, barani ma hita marbarita jala taupayahon ma asa menarik barita na tapasahat i. Nang pe dang boi tabahen mukjizat songon si Paulus, alai pos ma rohatta lehonon ni Jahowa do tondi parbadiana tu hita asa boi mangurupi halak mananda hasittongan.—Joh. 6:44.

Hata “lao Patoguhon” (Ul. 13:13-43)

9. Aha do na boi ditiru akka pengawas di huria saonari sian si Paulus dohot si Barnabas?

⁹ Dung i, ditinggalhon nasida ma Papos jala marlayar tu Perge, di pesisir Asia Kecil na daona hira-hira 250 kilometer. Mulai sian i, adong do perubahan. Di Ulaon ni Apostel 13:13 didok, “Markapal ma si Paulus dohot akka donganna.” Sian ayat on taboto ma, si Paulus nama na mamimpin ulaon ni kelompok i. Alai dang adong ayat na patuduhon na cemburu si Barnabas tu si Paulus. Torus do nasida kerja sama mangulahon lomo ni roha ni Debata. Gabe teladan do si Paulus dohot si Barnabas tu akka bawa na gabe pengawas di huria saonari on. Dang olo nasida bersaing lao gabe na ussangap di huria. Diingot nasida do hata ni Jesus na mandok, “Marhaha maranggi do hamu sude. . . . Ai dipatutoru Debata do manang ise na pasangappon dirina sandiri, alai bahenonna do sangap halak na patutoru dirina.”—Mat. 23:8, 12.

10. Songon dia do situasi pardalanan sian Perge tu Antiokia Pisidia?

¹⁰ Dung sahat di Perge, ditinggalhon si Johannes Markus ma si Paulus dohot si Barnabas. Mulak ma ibana tu Jerusalem. Dang dipaboa aha alasanna, ai toppu do ibana lao. Alai torus do dilanjutton si Paulus dohot si Barnabas pardalananna. Sian Perge lao ma nasida tu Antiokia Pisidia, sada kota di Provinsi Galatia. Dang mura lao tusi, alana Kota Antiokia Pisidia i adong di dolok, 1.100 meter di atas permukaan laut. Berbahaya do dalan tusi, godang pangarampok, jala na upparah hurang sehat do si Paulus di tikki i.h

11, 12. Songon dia do dibahen si Paulus asa tertarik akka halak tu barita na dipasahat ibana?

¹¹ Di Antiokia Pisidia, masuk ma si Paulus dohot si Barnabas tu sinagoga tikki ari Sabat. Didok do taringot nasida, “Dung sae dijahahon Patik dohot na Sinurat ni Akka Panurirang tu akka jolma, disuru pamimpin ni sinagoga i ma sasahalak mandok tu nasida, ‘Hamu akka dongan, molo adong na naeng didok hamu lao patoguhon akka jolma on, dokkon hamu ma.’” (Ul. 13:15) Jongjong ma si Paulus jala makkatai ma ibana.

¹² Mulana ninna si Paulus ma tu nasida, “Hamu akka dongan, halak Israel dohot akka na makkabiari Debata.” (Ul. 13:16) Akka halak Jahudi dohot proselit do na mambege si Paulus tikki i. Dang diakkui nasida na dipillit Debata Jesus mangulahon lomo ni rohana. Jadi songon dia do dibahen si Paulus asa tertarik nasida tu barita na dipasahat ibana? Di mulana dipaboa si Paulus ma secara singkat sejarah ni bangso Jahudi. Dipatorang ibana ma na “dibahen Debata do nasida gabe sada bangso na balga tikki manoppang dope nasida di Mesir”. Jala dung dipalua nasida sian i, “sabar do Ibana maradoppon nasida hira-hira 40 taon di padang gurun”. Diceritahon si Paulus ma muse songon dia halak Israel gabe boi mangingani tano na dijanjihon, jala songon dia Jahowa ‘mangalehon luat i tu nasida’. (Ul. 13:17-19) Adong na mandok, olo do ra disinggung si Paulus piga-piga ayat na baru dijaha di perayaan Sabat i. Berarti berupaya do si Paulus menyesuaihon carana marbarita “lao mangurupi sude halak”.—1 Kor. 9:22.

13. Songon dia do hita boi mambahen halak tertarik tu barita na tapasahat?

¹³ Hita pe ikkon berupaya do mambahen akka halak tertarik tu barita na tapasahat. Misalna molo taboto latar belakang agama ni sasahalak, gabe taboto ma topik aha na menarik di ibana. Boi do muse takutip piga-piga ayat ni Bibel na hea dibege ibana. Denggan do tong molo tapangido ibana manjaha langsung sian Bibelna sandiri. Talului ma cara asa tertarik halak lao marsiajar taringot Jahowa.

14. (a) Songon dia do si Paulus paboahon barita na uli taringot Jesus, jala sipasingot aha do na dilehon ibana? (b) Songon dia do tanggapan ni akka halak tu hata ni si Paulus i?

¹⁴ Dibahas si Paulus ma muse akka pinoppar ni raja ni Israel na mengarah tu Jesus, jala songon dia si Johannes Pandidi mangurupi akka halak asa manjalo Jesus, “sipalua” i. Dipaboa si Paulus do songon dia Jesus dipamate jala dipahehe sian hamatean. (Ul. 13:20-37) Didok si Paulus do, “Hupaboa ma on tu hamu akka dongan, marhite ibana do disesa Debata dosamuna, jala marhite ibana ma dohonon ni Debata dang marsala ganup halak na porsea tu ibana.” Dipasingot ibana ma muse nasida, “Manat ma hamu, asa unang masa tu hamu songon na Sinurat ni Akka Panurirang. Didok do, ‘Parrohahon hamu ma, hamu akka pangaleai. Tarsonggot ma hamu jala mate. Ai huulahon do sada ulaon di tikkimuna on, alai dang porsea hamu disi nang pe adong na patorakkon i sude tu hamu.’” Luar biasa do tanggapan ni akka halak na mambege hata ni si Paulus i. “Dipangido halak na disi ma asa dipatorang nasida muse taringot tusi di ari Sabat na mangihut.” Dung sae parpunguan di sinagoga i, “godang ma halak Jahudi dohot halak na mangihutton agama Jahudi na manomba Debata mandapotton si Paulus dohot si Barnabas”.—Ul. 13:38-43.

“Lao nama Hami Marbarita tu Bangso na Asing” (Ul. 13:44-52)

15. Aha do na terjadi di ari Sabat na mangihut?

¹⁵ Di ari Sabat na mangihut, “hampir sude ma halak na di kota i” marpungu lao manangihon si Paulus. Alai adong do halak Jahudi na so marlomo ni roha. “Gabe dileai nasida do Debata ala dialo nasida do hata ni si Paulus i.” Alai barani do si Paulus dohot si Barnabas mandok tu nasida, “Tu hamu do nian porlu parjolo pasahaton hata ni Debata. Alai dang dijalo hamu i jala dibahen hamu do dirimuna dang tama manjalo hangoluan saleleng ni lelengna. Saonari, lao nama hami marbarita tu bangso na asing. Ai songon on do paretta ni Jahowa tu hami, ‘Nungnga hupillit ho gabe sinondang tu akka bangso, asa dibaritahon ho haluaon i sahat tu akka ujung ni tano on.’”—Ul. 13:44-47; Jes. 49:6.

16. Songon dia do tanggapan ni halak Jahudi tu hata ni si Paulus dohot si Barnabas, jala aha do na diulahon nasida dung dibalbali?

¹⁶ Marlas ni roha do halak na so Jahudi tikki dibege nasida hata i, “gabe porsea ma sude halak na marpangalaho na denggan na mambahen nasida tama mandapot hangoluan saleleng ni lelengna”. (Ul. 13:48) Lam rarat ma hata ni Jahowa di luat i. Alai beda do tanggapan ni halak Jahudi. Songon na didok si Paulus dohot si Barnabas, sebenarna tu nasida do parjolo dipaboa hata ni Debata i, alai ditolak nasida do Messias. Alani i hukumon ni Debata ma nasida. Dihasut halak Jahudi i ma akka borua dohot akka bawa na sangap di kota i. “Gabe dibalbali ma si Paulus dohot si Barnabas, jala dipalao ma nasida sahat tu luar ni parbatasan ni kota i.” Aha ma na diulahon nasida? “Dipaspasson si Paulus dohot si Barnabas ma orbuk ni pat ni nasida tu halak na disi. Dung i lao ma nasida tu Ikonium.” Gabe menyerah do halak Kristen na di Antiokia Pisidia? Daong. “Toktong ma marlas ni roha akka sisean i jala digohi tondi parbadia do nasida.”—Ul. 13:50-52.

17-19. Songon dia do carana hita maniru si Paulus dohot si Barnabas, jala boasa boi marlas ni roha hita molo taulahon i?

¹⁷ Gabe teladan na denggan do halak Kristen na setia on di hita. Tetap ma hita marbarita, nang pe berupaya akka halak na sangap di portibi on mangabbati ulaonta. Nakkin dipaboa di ayat i tikki adong halak Antiokia manolak barita na dipasahat nasida, “dipaspasson si Paulus dohot si Barnabas ma orbuk ni pat ni nasida”. On berarti dang na muruk nasida, alai dang martanggung jawab be si Paulus dohot si Barnabas molo adong na masa tu nasida. Sadar do si Paulus dohot si Barnabas dang boi dikendalihon nasida reaksi ni akka halak tu barita i. Alai boi do dikendalihon nasida tindakan ni nasida sandiri, naeng torus marbarita manang na dang. Torus do nasida marbarita, dilanjutton do pardalananna i tu Ikonium.

¹⁸ Songon dia do akka sisean na ditinggalhon di Antiokia? Tetap do las roha ni nasida nang pe godangan halak di inganan i dang manjalo barita na uli. Jadi las ni roha ni nasida dang bergantung tu reaksi ni halak. Hata ni Jesus on do na diulahon akka sisean di Antiokia Pisidia, “Halak na manangihon hata ni Debata jala na mangulahon hata i do na marlas ni roha!”—Luk. 11:28.

¹⁹ Songon si Paulus dohot si Barnabas, torus ma taingot tanggung jawabta lao marbarita na uli. Hak ni halak do manjalo manang manolak barita na tapasahat. Alai boi do hita marlas ni roha nang pe adong tantangan. Tatiru ma akka sisean di abad na parjolo i, taargai ma hasittongan, jala tapasombu ma tondi parbadia manogu-nogu hita.—Gal. 5:18, 22.