Ajari ma Ianakhonmuna

Jahowa do na mangalehon tanggung jawab tu natuatua laho manarihon ianakhonna. (Kolosse 3:20) Alani i, tanggung jawabmu do mangajarajari ianakhonmuna asa manghaholongi Jahowa jala asa tongtong nasida gabe halak na martanggung jawab dung magodang. (2 Timoteus 1:5; 3:15) Porlu botoonmu aha na di roha ni anak dohot borumuna. Hamu do na ingkon sitiruon di nasida. Alani i, parjolo ma hamu mangulahon hata ni Debata asa boi denggan ajarahononmuna tu nasida.​—Psalmen 40:9.

1 RADE MA HAMU MANANGIHON IANAKHONMUNA

SONGON ON MA HATA NI BIBEL: ”Girgir ma ibana mananginangi, bangkol ma ibana mangkatai.” (Jakobus 1:19) Tontu lomo do rohamu molo ndang mabiar ianakhonmu mangkatahatai tu hamu. Alani i, tingki mangkatai nasida rade ma hamu laho manangihon. Jaga ma hadameon di jabumuna, asa mura hamu mangkatahatai tu nasida. (Jakobus 3:18) Olo do gabe mabiar ianakhonmuna mangkatahatai dohot hamu molo diboto nasida mura hamu muruk jala jotjot manguhumi. Alani i, burju ma hamu manangihon ianakhonmuna jala jotjot ma patuduhon holong muna tu nasida.​—Mateus 3:17; 1 Korint 8:1.

NA BOI ULAHONONMU:

• Rade ma hamu manangihon ianakhonmuna

• Jotjot ma hamu mangkatahatai dohot ianakhonmuna, unang holan tingki adong hasusaan di nasida

2 MARBISUK MA LAHO MANGANTUSI ROHA NI IANAKHONMUNA

SONGON ON MA HATA NI BIBEL: ”Hata ni sahalak jolma boi do gabe matamual ni habisuhon.” (Poda 18:4, Bibel siganup ari) Denggan ma parrohahon hamu aha na adong di roha ni ianakhonmuna sian pangkataionnasida. Olo do sipata dakdanak manggandai hatana. ”Manang ise na mangalehon alus andorang so dibege dope parsoalan, i ma na oto.” (Poda 18:13) Alani i, unang ma mura hamu muruk.​—Poda 19:11.

NA BOI ULAHONONMU:

• Unang ma olani pangkataion ni ianakhonmuna manang pintor muruk tu nasida aha pe dipaboa nasida

• Mardop ni roha ma hamu tu nasida, ingot ma hamu di tingki poso

3 MARDOS NI ROHA MA MANGAJARI IANAKHONMU

SONGON ON MA HATA NI BIBEL: ”Sai tangihon ma, ale anaha, pangajaran ni amangmu, jala unang tulakkon poda ni inangmu.” (Poda 1:8) Dilehon Jahowa do huaso tu hamu natuatua mangatur ianakhonmuna. Ingkon ajaranmu do nasida laho mangoloi jala pasangaphon hamu. (Epesus 6:1-3) Boi do botoon ni ianakhonmuna molo ndang adong ”sada ni roha” di hamu. (1 Korint 1:10) Unang pataridahon di jolo ni ianakhonmu molo ndang dos pandapotmuna laho mangajari nasida, asa tongtong dipasangap nasida hamu.

NA BOI ULAHONONMU:

• Hatai hamu ma songon dia bahenonmu laho maminsang ianakhonmu

• Marlambas ni roha ma tingki ndang sapandapot hamu tu dongan saripemu laho mangajarajari ianakhonmu

4 PINGKIRI HIAN MA

SONGON ON MA HATA NI BIBEL: ”Tibu hian pasomalsomal dakdanak i marparange hombar tu dalanna” (Poda 22:6) Asa boi hamu denggan mangajar ianakhonmuna, pingkiri hamu hian ma songon dia bahenonmu laho mangajarajari jala maminsang nasida tingki porlu. (Psalmen 127:4; Poda 29:17) Tingki dipinsang hamu ianakhonmu, paboa ma boasa hona pinsang ibana. (Poda 28:7) Ajari ma nasida mangulahon hata ni Debata jala mangantusi angka prinsipNa. (Psalmen 1:2) On boi mangurupi nasida asa togu partondionna jala ias panggora ni roha nasida.​—Heber 5:14.

NA BOI ULAHONONMU:

• Urupi ma ianakhonmuna mananda jala marpos ni roha tu Debata

• Ajari ma nasida laho mananda jala mangantusi songon dia pasidingkon angka ulaon na rorang songon di internet. Jala ajari ma nasida asa boi malua sian halak na jotjot mangulahon na rorang tu dakdanak