Sahalak Pamimpin na Baru Dohot Dua Borua na Barani

Dung martaon-taon mamimpin bangso ni Jahowa, mate ma si Josua. Marumur 110 taon do ibana tikki mate. Saleleng mangolu si Josua, manomba Jahowa do halak Israel. Alai dung mate ibana, manomba patung ma halak Israel songon halak Kanaan. Ala dang manomba Jahowa be nasida, dipasombu Jahowa ma si Jabin raja ni Kanaan mambahen susa ngolu ni nasida. Dipangido halak Israel ma asa diurupi Jahowa nasida. Alani i, dipillit Jahowa ma si Barak lao mangurupi nasida mulak tu Jahowa.

Adong do sahalak nabiah na margoar si Debora. Lao do ibana tu si Barak pasahatton hata ni Jahowa. Didok ibana ma, ‘Boan ma 10.000 bawa manjuppangi tentara ni si Jabin di Sunge Kison. Disi, talu ma bahenonmu Sisera panglima tentara ni si Jabin.’ Didok si Barak ma tu si Debora, ‘Molo lao ho, dohot do au.’ Didok si Debora ma, ‘Dohot pe au. Alai nungnga didok Jahowa sahalak borua do na lao mambunu Panglima Sisera.’

Lao ma si Debora, si Barak, dohot tentarana tu Dolok Tabor jala siap-siap lao marporang. Dung dibege Sisera taringot i, dipapungu ibana ma akka tentara dohot kereta porangna di lembah ni dolok i. Didok si Debora ma tu si Barak, ‘Sadari on monang ma ho bahenon ni Jahowa.’ Turun ma si Barak dohot 10.000 tentarana mangalo tentara ni Sisera.

Dibahen Jahowa ma banjir Sunge Kison. Dang boi be mardalan kereta porang ni Sisera, jala talu ma nasida. Alai lari do Sisera. Sahat ma ibana di kemah ni sahalak borua na margoar si Jael. Dilehon si Jael ma ibana minum susu jala disalimuti. Tarpodom ma Sisera. Dung i, dibuat si Jael ma patok ni kemah i. Ditokkok ma patok i tu ulu ni Sisera. Ujungna, mate ma ibana.

Dung i, ro ma si Barak mangalului Sisera. Kaluar ma si Jael sian kemah i, didok ma, ‘Masuk ma ho. Dison do halak na dilului ho.’ Masuk ma si Barak jala diida ma nungnga mate Sisera. Marende ma si Barak dohot si Debora mamuji Jahowa ala nungnga monang nasida. Dame ma di Israel saleleng 40 taon.