Akka Murid Mandapot Tondi Parbadia

Sappulu ari dung naik Jesus tu surgo, mandapot tondi parbadia ma akka muridna. Tikki i ari Pentakosta taon 33 M. Godang do akka jolma na ro tu Jerusalem lao mangarayahon ari Pentakosta. Adong ma 120 halak murid ni Jesus na marpungu di sada jabu. Toppu ma adong na songon dila ni api di ginjang ni ulu ni nasida. Gabe boi ma nasida makkatai di godang bahasa. Jala tarbege ma soara ni alogo massai gogo.

Dibege akka halak na ro tu Jerusalem i ma soara. Lari ma nasida tu jabu i lao mangida aha na masa. Heran ma nasida mangida akka murid i ala boi makkatai di godang bahasa. Didok nasida ma, ‘Kan halak Galilea do halak on? Boasa diboto nasida bahasatta?’

Dung i jongjong ma si Petrus dohot akka apostel na asing di jolo ni akka halak na ro i. Didok si Petrus ma, ‘Nungnga dihukum mate Jesus, alai mulak mangolu do ibana dibahen Jahowa.’ Didok ma muse, ‘Saonari nungnga di surgo Jesus, di sabola kanan ni Debata. Dilehon do tondi parbadia songon janjina i. I do alana adong mukjizat on.’

Las do roha ni nasida mambege hata ni si Petrus i. Gabe disukkun nasida ma, ‘Aha ma na ikkon diulahon hami?’ Didok si Petrus ma, ‘Ikkon muba do hamu jala tardidi di bagasan goar ni Jesus. Dung i dapotmuna ma tondi parbadia.’ Gabe adong ma 3.000 halak na tardidi sadari i. Mulai sian i, lam godang ma murid ni Jesus di Jerusalem. Ala diurupi tondi parbadia, lam godang ma huria ni halak Kristen. Gabe boi ma nasida mangajarhon akka paretta ni Jesus.