Dipillit Jesus ma si Saulus

Sahalak warga negara Rom do si Saulus na tubu di kota Tarsus. Halak Parise do ibana jala diboto ibana do sude taringot Hukum ni halak Jahudi. Sogo hian do rohana tu halak Kristen. Disiksa ibana do akka halak Kristen jala dipenjarahon do nasida. Diida ibana do si Stepanus sahalak murid ni Jesus didangguri akka halak sappe mate.

Alai, dang puas si Saulus holan mamenjarahon halak Kristen na di Jerusalem. Alani i, dipangido ibana ma tu sintua ni malim asa dipaloas ibana lao tu Damaskus, asa boi ibana mamenjarahon akka halak Kristen na disi. Alai tikki naeng sahat ibana tu kota i, toppu ma diida ibana cahaya jala madabu ma ibana tu tano. Dung i dibege ibana ma soara na mandok, ‘Saulus, boasa disiksa ho au?’ Didok si Saulus ma, ‘Ise do ho?’ Didok soara i ma muse, ‘Jesus do au. Lao ma ho tu Damaskus, asa diboto ho aha na ikkon ulahononmu.’ Toppu ma gabe buta si Saulus, jala ikkon ditogu-togu do ibana asa sahat tu kota i.

Adong do di Damaskus sahalak Kristen na togu haporseaonna na margoar si Ananias. Marhite penglihatan, didok Jesus ma tu ibana, ‘Lao ma ho tu jabu ni si Judas na di dalan Lurus. Lului ma disi halak na margoar si Saulus.’ Didok si Ananias ma, ‘Tuan, nungnga godang na hubege taringot ibana! Dipenjarahon ibana do akka muridmu!’ Alai didok Jesus ma, ‘Lao ma ho. Nungnga hupillit si Saulus asa marbarita tu godang bangso.’

Juppang ni si Ananias ma si Saulus, jala didok ma, ‘Horas Saulus donganku, disuru Jesus do au lao pamaluppon ho.’ Gabe boi ma si Saulus marnida. Diparsiajari ibana ma taringot Jesus, jala tardidi ma ibana. Dung i, marbarita ma ibana di sinagoga rap dohot halak Kristen na asing. Gabe tarsonggot ma roha ni sude halak na manangihon ibana, didok nasida ma, ‘Dang na ibana tahe na mamenjarahon akka murid ni Jesus najolo?’

Saleleng tolu taon, marbarita do si Saulus di Damaskus. Sogo ma roha ni halak Jahudi mangida ibana. Gabe naeng dibunu ma ibana. Alai diurupi akka murid na asing do si Saulus. Dipamasuk ma ibana tu karanjang jala dipaturun sian lubang ni tembok ni kota i.

Dung sahat si Saulus di Jerusalem, naeng bergabung ma ibana dohot halak Kristen na adong disi. Alai mabiar do nasida tu si Saulus. Jadi, diboan sahalak murid na margoar si Barnabas ma ibana tu akka apostel, jala dipapos si Barnabas ma roha ni nasida na tutu do muba si Saulus. Ujungna marbarita ma si Saulus rap dohot akka dongan na di huria Jerusalem. Semangat do ibana mangulahon i. Di pudian ni ari, gabe si Paulus ma goarna.