Diboan ma si Paulus tu Rom

Marujung ma pardalanan ni si Paulus na patoluhalihon di Jerusalem. Ditakkup jala dipenjarahon ma ibana disi. Di sada borngin, dapot penglihatan ma si Paulus. Didok Jesus ma tu ibana, ‘Lao ma ho tu Rom jala marbarita ma ho disi.’ Dung i diboan ma si Paulus sian Jerusalem tu Kaesarea, dipenjarahon ma ibana disi saleleng dua taon. Tikki diadili Gubernur Festus ibana, didok si Paulus ma, ‘Kesar ni Rom ma mangadili au.’ Didok si Festus ma, ‘Ala dipangido ho Kesar ni Rom mangadili ho, tu Kesar ma ho lao.’ Ujungna, diboan ma si Paulus markapal tu Rom rap dohot si Lukas dohot si Aristarkus.

Tikki di pardalanan, ro ma badai saleleng piga-piga ari. Dirippu akka na di kapal i na lao mate ma nasida. Alai didok si Paulus ma, ‘Nungnga didok malaikat tu au, “Unang ho mabiar Paulus. Lao tu Rom nama ho jala selamat do sude donganmu na sakapal i.” Unang pola mabiar hamu! Dang na lao mate hita.’

Saleleng 14 ari ma ro badai. Dung i, diida nasida ma adong pulo, i ma pulo Malta. Lonong ma kapal i jala hancur. Alai selamat do na 276 halak na di kapal i. Adong ma na marlange jala adong na maniop ponggol-ponggol ni kapal i asa boi sahat tu pulo i. Burju do halak Malta, dibahen do api asa unang ngalian si Paulus dohot akka halak na selamat i.

Tolu bulan dukkon i, diboan akka tentara ma si Paulus tu Rom mamakke kapal na asing. Dung sahat di Rom, ro ma akka dongan sahaporseaon manjuppangi ibana. Gabe las ma roha ni si Paulus jala mandok mauliate do ibana tu Jahowa. Saleleng dua taon, dibahen do tentara lao manjaga si Paulus di sada jabu. Sai ro do godang halak manjuppangi ibana. Alani i, dipaboa si Paulus ma taringot Jesus dohot Harajaon ni Debata tu nasida. Dibahen si Paulus do muse surat tu huria di Asia Kecil dohot di Judea. Tutu ma, dipakke Jahowa do si Paulus lao paboahon barita na uli tu sude bangso.