PARSIAJARAN 18

Marlaba tu Angka na Mambege

1 Korint 9:19-23

NA INGKON DIULAHON: Urupi ma angka na mambege asa diboto na marlaba situtu do hatorangan i tu nasida. Jala paboa ma angka hatorangan na so hea dope tarpingkir ni nasida.

CARA MANGULAHON:

Pingkirhon ma aha do naung diboto nasida. Unang ma holan paboahon hatorangan naung diboto nasida. Alai urupi ma nasida mandapot parsiajaran na asing sian hatorangan i, na so hea dope tarpingkir ni nasida.

Tingki paboahon hatorangan naung diboto nasida, boi do hamu hatop mangkatai. Alai tingki paboahon hatorangan na so diboto nasida dope, lambat ma hamu mangkatai.
Denggan ma parade jala rimangi. Tingki paboahon bagian na ringkot, bahen ma hatoranganmuna menarik jala na so hea dope tarpingkir ni nasida. Manang paboa ma na masa baru-baru on. Alai denggan ma i parade, asa boi diboto hamu pas do i tu hatoranganmuna manang na ndang.

Tingki mamparsiajari sada bahan, lului hamu ma alus ni piga-piga sungkun-sungkun songon ‘aha, boasa, nandigan, didia, ise, dohot songon dia’. Jadi tingki dipasahat hamu bagianmuna, ulas ma angka sungkun-sungkun i. Molo diulahon hamu songon i, gabe menarik ma hatorangan i.
Paboa ma laba ni hatoranganmuna. Patorang ma laba ni ayat na diulas hamu tu ulaon ni nasida siganup ari. Paboa ma hubungan ni ayat i tu situasi dohot ulaon na jotjot diulahon nasida.