Bahen ma Keputusan na Pasangappon Debata
“Dipikkiri halak na marbisuk do ganup lakkana.”—PODA 14:15.
1, 2. (a) Aha do na porlu taingot tikki mambahen keputusan? (b) Sukkun-sukkun aha do na lao tabahas?
IKKON TABAHEN do keputusan tiap ari. Adong keputusan na so pola balga jala dang pola leleng pengaruhna tu ngolutta. Alai adong do tong keputusan na balga pengaruhna tu ngolutta. Balga manang gelleng keputusanta i porlu do taingot, ikkon parohon sangap do i tu Debata.—Jaha 1 Korint 10:31.
2 Menurut hamu, maol do mambahen keputusan manang na mura? Asa boi gabe halak Kristen na togu haporseaonna ikkon marlatik do hita mamboto na dia na sittong manang na sala. Dung i tabahen ma keputusan na sadalan tu haporseaotta, dang tu haporseaon ni halak na asing. (Rom 12:1, 2; Heb. 5:14) Boasa olo hita mambahen keputusan na denggan? Boasa sipata maol mangulahon i? Jala boha do carana asa boi tabahen keputusan na pasangappon Debata?
Boasa Ikkon Tabahen Keputusan?
3. Aha do na so boi mambahen hita menyerah tikki mambahen keputusan?
3 Molo ragu hita mambahen keputusan na adong hubunganna tu aturan ni Debata, olo do gabe dirippu dongan sasikkola manang dongan sakarejotta na so pos rohatta tu haporseaotta i. Jala gabe mura ma hita dipengaruhi. Olo do ra nasida margabus, menyontek, manang manakko. Dung i dibujuk nasida ma hita asa songon nasida mangihutton “godang” halak manang asa tatabunihon na diulahon nasida i. (2 Mus. 23:2) Alai molo tabahen keputusan na pasangappon Debata, pasti dang olo hita menyerah ala mabiar manang ala asa adong donganta. Boi do taihutton hati nuranitta naung dilatik Bibel.—Rom 13:5.
4. Boasa adong halak na naeng dohot mambahen keputusan di hita?
4 Adong do akka halak na berusaha mambahen keputusan tu hita. Dang ala jahat nasida, alai ala naeng dipaksa nasida do hita mangihutton nasehat ni nasida. Molo dang sajabu be hita dohot keluargatta, olo do ra dirippu nasida dang tolap dope hita mangurus diritta sandiri. Jadi gabe naeng dohot ma nasida mambahen keputusan tu hita. Misalna taringot perawatan medis. Takkas do dipaboa di Bibel, dang boi hita manjalo manang mangalehon transfusi darah. (Ul. 15:28, 29) Alai dang dipaboa di Bibel taringot sude perawatan medis na mamakke mudarta sandiri.a Jadi ikkon hita sandiri do na mambahen keputusan taringot i. Dang boi keluargatta mamaksa lao mambahen keputusan di hita. Tikki mambahen keputusan sisongon i, ikkon “ganup do halak martanggung jawab tu na diulahon ibana”. (Gal. 6:4, 5) Na paling penting, ikkon tetap do denggan hati nuranina di jolo ni Debata, dang di jolo ni jolma.—1 Tim. 1:5.
5. Boha do carana asa dang sega haporseaotta?
5 Bahaya do molo ragu-ragu hita. Didok si Jakobus, halak na ragu-ragu “dang boi ditottuhon i manang aha siulaonna”. (Jak. 1:8) Alana gabe mura ma ibana tarihut-ihut tu pandangan ni jolma na muba-uba. Sarupa ma ibana songon sasahalak na di bagasan kapal na so adong amudina. Jala na di tonga-tonga ni laut na balga ombakna. Mura do sega haporseaon ni halak sisongon i! Dung i disalahon ibana ma halak na asing. (1 Tim. 1:19) Boha do carana asa unang songon i hita? Didok Bibel, “Ikkon marurat do haporseaonmuna.” (Jaha Kolosse 2:6, 7.) Asa boi marurat haporseaotta, ikkon marlatik ma hita mangihutton Hata ni Debata tikki mambahen keputusan. (2 Tim. 3:14-17) Alai adong do na boi mambahen hita maol mambahen keputusan na denggan. Aha ma i?
Boasa Maol Mambahen Keputusan na Denggan
6. Aha do na boi mambahen hita gabe mabiar mambahen keputusan?
6 Olo do ra mabiar hita mambahen keputusan. Mabiar do ra hita so tung sala keputusanta i, so tung gagal hita, manang gabe hira halak na oto hita. Wajar do molo songon i perasaanta. Dang adong halak na olo mambahen keputusan na so denggan, na pailahon, jala na mambahen susa halak na asing. Nang pe songon i, molo holong rohatta tu Debata dohot tu Hatana boi do i mangorui biar ni rohatta. Boha carana? Molo holong rohatta tu Debata, pasti olo ma hita mamareso Hatana dohot akka publikasi sebelum mambahen keputusan. Hasilna, pasti dang godang kesalahan na tabahen. Boasa? Alana boi do Bibel “mambahen pistar halak na so marpengalaman. Asa dapot ni na poso parbinotoan jala asa manat ibana marpikkir”.—Poda 1:4.
7. Aha ma na boi tatiru sian Raja Daud taringot mambahen keputusan?
7 Pasti denggan do sude keputusanta? Belum tentu. Sude do hita olo mambahen kesalahan. (Rom 3:23) Misalna, halak na marbisuk do Raja Daud jala setia do ibana tu Debata. Alai olo do sipata ibana mambahen kesalahan na mambahen susa dirina dohot halak na asing. (2 Sam. 12:9-12) Nang pe songon i, dang gabe mabiar si Daud mambahen keputusan na sadalan tu lomo ni roha ni Debata. (1 Raj. 15:4, 5) Jadi nang pe hea tabahen keputusan na sala, unang ma gabe ragu hita mambahen keputusan na denggan. Songon na masa tu si Daud, taingot ma olo do Jahowa mengampuni kesalahanta. Jala pasti sai diurupi Ibana do akka halak na makkaholongi jala na mangoloi hatana.—Ps. 51:1-4, 7-10.
8. Aha do na boi taparsiajari sian hata ni Apostel Paulus taringot perkawinan?
8 Boha do carana asa unang ragu hita tikki naeng mambahen keputusan? Porlu do tasadari, sipata adong do piga-piga pilihan na denggan. Taparrohahon ma na didok Apostel Paulus taringot perkawinan. Diurupi tondi parbadia do ibana lao manurat, “Alai molo so boi do dirajai halak na so marhasohotan giot-giot ni dagingna, dumenggan ma ibana marhasohotan molo nungnga cukkup umurna. Ai dang mardosa ibana disi. Alai molo didok roha ni sasahalak dang porlu ibana marhasohotan, boi dirajai ibana giot-giot ni dagingna, jala nungnga ditottuhon di rohana na so marhasohotan ibana, na denggan do na binahenna i. Alani i, denggan do molo marhasohotan sasahalak, alai dumenggan do molo dang marhasohotan sasahalak.” (1 Kor. 7:36-38) Didok si Paulus dumenggan do molo dang marhasohotan sasahalak. Alai sebenarna dang holan i pilihan na denggan.
9. Porlu do tapikkirhon pandangan ni halak na asing tikki mambahen keputusan? Patorang ma.
9 Porlu do tapikkirhon pandangan ni halak na asing? Sipata porlu. Parrohahon ma na didok si Paulus taringot mangallang sipanganon naung dipelehon tu akka patung. Didok ibana dang sala sebenarna mangallang i. Alai boi do i mambahen sega haporseaon ni akka donganna na gale hati nuranina. Jadi aha ma na diulahon Apostel Paulus? Didok ibana, “Molo gabe tartuktuk do donganki dibahen sipanganon, dang allangokku be i asa unang tartuktuk ibana hubahen.” (1 Kor. 8:4-13) Hita pe porlu do tapikkirhon aha pengaruh ni keputusanta tu hati nurani ni halak na asing. Alai na paling penting, ikkon tapikkirhon do aha pengaruh ni keputusanta tu hubungatta tu Jahowa. (Jaha Rom 14:1-4.) Attong prinsip ni Bibel na dia ma na boi mangurupi hita mambahen keputusan na pasangappon Debata?
Onom Cara Lao Mambahen Keputusan na Denggan
10, 11. (a) Boha do carana asa dang lomo-lomotta di keluargatta? (b) Aha do na porlu diingot akka sintua tikki mambahen keputusan na berpengaruh tu akka dongan di huria?
10 Unang ma lomo-lomotta. Sebelum mambahen keputusan, tasukkun ma diritta, ‘Marhak do au mambahen keputusan on?’ Didok Raja Salomo do, “Na lao marlea do halak na mambahen lomo-lomona. Alai marbisuk do halak na serep marroha.”—Poda 11:2.
11 Olo do ra diloas natua-tua gellengna mambahen keputusan. Alai unang ma dirippu gellengna i sai marhak ibana mambahen keputusan tu dirina sandiri. (Kol. 3:20) Boi do memang akka istri mambahen keputusan. Alai ikkon diakkui nasida do, suamina i do na tetap gabe kepala keluarga. (Poda 1:8; 31:10-18; Eps. 5:23) Dos songon i ma tu akka suami. Ikkon diakkui nasida do, dang sai marhak nasida mambahen keputusan tu keluargana. Ikkon unduk do ibana tu Kristus. (1 Kor. 11:3) Akka sintua do na mambahen keputusan na berpengaruh tu akka dongan di huria. Alai ikkon dipastihon nasida do, ‘dang lobi sian na tarsurat’ di Bibel i keputusan na dibahen nasida. (1 Kor. 4:6) Ikkon diihutton nasida do petunjuk na sian naposo haposan. (Mat. 24:45-47) Molo serep rohatta jala dang lomo-lomotta tikki mambahen keputusan, pasti bermanfaat do i tu hita dohot tu halak na asing.
12. (a) Boasa ikkon tabahen riset sebelum mambahen keputusan? (b) Boha do carana mambahen riset?
12 Bahen ma riset. Didok si Salomo, “Sai na saut do sakkap ni halak na ringgas, alai na lao marpogos do halak na gumarapus.” (Poda 21:5) Misalna, boha do molo adong na mangalehon tawaran bisnis tu hamu? Unang ma holan roha dohot pikkiranmuna na diihutton hamu. Lului ma akka informasi taringot i. Pangido ma nasehat sian akka halak na berpengalaman. Jala lului ma akka prinsip ni Bibel na adong hubunganna tusi. (Poda 20:18) Dung dibahen hamu riset, bahen ma daftar. Tabel na parjolo, aha ma uttungna molo diihutton hamu bisnis i. Jala tabel na paduahon, aha ma rugina. Sebelum dibahen hamu keputusan, ‘etong ma sadia godang hepeng na lao sipakaluaronmuna’. (Luk. 14:28) Pikkirhon ma aha do pengaruh ni keputusanmuna i tu perekonomianmuna dohot tu hubunganmuna tu Jahowa. Memang ikkon dibahen hamu do tikki lao mambahen riset. Alai molo diulahon hamu i, gabe dang pahatophu hamu mambahen keputusan jala gabe disolsoli hamu keputusanmuna i.
13. (a) Jaminan aha do na dipaboa di Jakobus 1:5? (b) Aha do manfaatna molo jolo martangiang hita sebelum mambahen keputusan?
13 Martangiang ma asa dilehon bisuk. Molo martangiang hita tikki naeng mambahen keputusan, boi ma keputusanta i pasangappon Debata. Didok si Jakobus, “Molo adong sian hamu na hurang bisuk, toktong ma i dipangido tu Debata. Lehononna do i tu ibana jala dang pailaonna ibana. Ai burju do Debata mangalehon tu sude halak.” (Jak. 1:5) Unang pola maila hita mangakkui na porlu hita diurupi Debata tikki mambahen keputusan. (Poda 3:5, 6) Alana molo holan pikkiratta do na taihutton, boi do gabe sala keputusanta i. Alai molo jolo martangiang hita jala talului akka prinsip na adong di Bibel, boi ma tondi parbadia mangurupi hita patuduhon aha do sebenarna alasanta mambahen keputusan i.—Heb. 4:12; jaha Jakobus 1:22-25.
14. Boasa dang denggan molo tapaleleng-leleng mambahen keputusan?
14 Bahen ma keputusan. So tung dibahen hamu keputusan molo so jolo dibahen hamu riset jala martangiang tu Debata. Molo marbisuk sasahalak, pasti dilehon ibana do tikkina lao ‘mamikkiri ganup lakkana’. (Poda 14:15) Alai unang ma dipaleleng-leleng hamu mambahen keputusan. Alana sarupa do i songon na mangalului sidalian. (Poda 22:13) Sarupa tu na manuru halak do hamu asa mambahen keputusan tu ngolumuna.
15, 16. Boha do carana asa boi taulahon naung taputusson?
15 Ulahon ma keputusanmuna i. Gabe sia-sia do sude usahatta lao mambahen keputusan molo dang taulahon naung taputusson i. Didok si Salomo, “Manang aha na boi ulahononmu, ulahon ma i sian nasa gogom.” (Pjm. 9:10) Asa boi hita marhasil mangulahon keputusanta i, ikkon olo do hita paradehon na porlu tusi. Misalna, adong ma sasahalak na mamutusson lao merintis. Asa boi ibana marhasil, unang ma dipahabis ibana tikkina holan na karejo dohot bersantai. Hape boi do dipakke ibana tikki dohot gogona i lao marbarita.
16 Dang sai mura mangulahon keputusan na denggan. Alana, “di bagasan huaso ni Sibolis do saluhut portibi on”. (1 Joh. 5:19) Jala ikkon margulat do hita mangalo “pamimpin ni haholomon, dohot suru-suruan na jahat na di surgo”. (Eps. 6:12) Apostel Paulus dohot si Judas pe mandok ikkon berjuang do sude halak na naeng pasangappon Debata.—1 Tim. 6:12; Judas 3.
17. Aha do na dipangido Jahowa taringot keputusan naung tabahen?
17 Pareso ma keputusanmuna i jala bahen ma penyesuaian molo porlu. Dang sai boi taulahon keputusanta songon na taharappon. Alana Bibel mandok, ‘Boi do masa tu hita sude akka na so diharappon di tikki na so panagaman.’ (Pjm. 9:11) Alai adong do keputusan na dipangido Jahowa asa tetap taulahon nang pe adong masalah. Misalna, molo nungnga diputusson sasahalak naeng mangalehon ngoluna tu Jahowa manang naeng menikah, dang boi diuba ibana keputusanna i. Dipangido Jahowa do asa setia ibana mangulahon i. (Jaha Psalmen 15:1, 2, 4.) Alai adong do keputusan na so pola songon i balgana. Jadi molo marbisuk do sasahalak pasti olo do ibana mamareso keputusanna i muse. Dang maila ibana menyesuaihon manang membatalhon keputusanna i molo memang porlu. (Poda 16:18) Alana na rumikkot di ibana, boha ma carana asa boi parngoluonna pasangappon Debata.
Mangajari na Asing Lao Mambahen Keputusan na Pasangappon Debata
18. Boha do cara ni natua-tua lao mangajari gellengna mambahen keputusan na denggan?
18 Porlu do diajari natua-tua gellengna asa boi mambahen keputusan na pasangappon Debata. Mambahen sitiruon do cara na dumenggan lao mangajari. (Luk. 6:40) Molo cocok situasina, boi do dipaboa natua-tua tu gellengna akka aha ma biasana na diulahon nasida tikki mambahen keputusan. Asing ni i, boi do diloas nasida gellengna sahali-sahali mambahen keputusan. Jala boi do dipuji nasida gellengna, molo marhasil gellengna mangulahon i. Alai boha molo dang denggan keputusan na dibahen gellengna i? Olo do ra pittor naeng diurupi natua-tua gellengna i. Alai dang denggan sebenarna songon i. Misalna, diloas natua-tua ma gellengna mambahen SIM. Alai hona tilang ma gellengna ala dang diihutton ibana peraturan lalu lintas. Boi do sebenarna pittor digarar natua-tuana tilangna i. Alai molo disuru nasida karejo gellengna i asa boi manggarar tilang i, boi ma gabe diargai gellengna i peraturan jala gabe lebih bertanggung jawab ma ibana.—Rom 13:4.
19. Aha do na ikkon taajarhon tu parsiajar Bibelta, jala boha ma carana mangulahon i?
19 Disuru Jesus do akka halak na mangihutton ibana asa mangajari na asing. (Mat. 28:20) Termasuk ma i mangajari nasida cara mambahen keputusan na denggan. Asa boi marhasil, unang ma tapasomal mambahen keputusan tu parsiajar Bibelta. Tumagon do taajari nasida asa mangihutton prinsip ni Bibel, asa boi nasida sandiri na mambahen keputusan. Alana Bibel mandok, “Ganup do hita ikkon mampartanggung jawabhon parniulaotta di jolo ni Debata.” (Rom 14:12) Jadi, sude do hita ikkon mambahen keputusan na pasangappon Debata.
[Surat na di Toru]
a Asa lam takkas taboto taringot on, ida ma “Apa Pandangan Saya tentang Fraksi Darah dan Prosedur Medis yang Menggunakan Darah Saya Sendiri?” di Pelayanan Kerajaan Kita bulan November 2006, halaman 3-6.
Boha do Alusmuna?
• Boasa ikkon taparsiajari cara mambahen keputusan?
• Aha do na mambahen hita mabiar mambahen keputusan? Jala boha ma carana asa unang songon i be hita?
• Paboa ma onom cara na ikkon taulahon asa boi keputusanta pasangappon Debata.
[Kotak/Gambar]
Cara Mambahen Keputusan na Denggan
1 Unang ma Lomo-lomotta
2 Bahen ma Riset
3 Martangiang ma Asa Dilehon Bisuk
4 Bahen ma Keputusan
5 Ulahon ma Keputusanmuna i
6 Pareso ma Muse Keputusanmuna i jala Bahen ma Penyesuaian Molo Porlu
[Gambar]
Halak na ragu-ragu sarupa ma i songon sasahalak na markapal alai dang adong amudina, jala di tonga-tonga ni laut na balga ombakna do kapal i