SIULASON NI MAJALAH ON | BOASA HITA INGKON JUJUR?

Aha do Pangkorhonna molo Ndang Jujur

”Asa sae masalah, ndang porlu hita jujur.”—Samantha, Afrika Selatan.

Tutu do i? Songon si Samantha, sude do hita hea mangadopi parsoalan. Olo do hita tarelaela asa unang jujur, alai tarida do aha na ringkot di hita sian na tabahen. Umpamana, olo do hita ndang jujur asa unang maila. Alai, molo tarboto maila ma hita. Ida ma tudosan na ditoru on.

NDANG PORSEA BE HALAK MOLO NDANG JUJUR HITA

Molo masihaposan dua halak, boi ma maraleale nasida. Las ma rohanasida jala dame ma dihilala. Alai, ndang mura maraleale dohot na asing. Molo lomo rohanta maraleale, ingkon rap paradehon tingki, mangkatahon na tutu tu dongan jala ndang mangkaringkothon diri sandiri. Boi do gabe sega paralealeon alani sada parange na so jujur. Jala, maol do padengganhon paralealeon naung sega.

Hea do hamu digabusi alealemuna? Molo hea, songon dia do pangkilalaanmuna? Ra, gabe hansit do rohamuna jala songon na dijehehon ma pangkilalaanmuna. Boi do sega paralealeonta holan alani saotik parange na so jujur.

SAHIT NA BOI BALI DO GABUS

Si Robert Innes sahalak professor ekonomi sian Universitas California, mandok ”Parange na so jujur on songon virus jala boi bali.” Molo jotjot hita mangkatai dohot halak na somal margabus, hita pe boi gabe ndang jujur ”sarupa” dohot ibana.

Songon dia do bahenonta asa boi tongtong jujur? Boi do hamu diurupi marhite Bibel. Pingkirhon ma pigapiga prinsip ni Bibel, na diulas di artikel na mangihut.

Angka Parange na so Jujur

Gabus

AHA DO I? Mangkatahon na so tutu tu sasahalak na marhak mamboto, mangkatahon na so binotona, papilithon na so sintong, ndang mangkatindangkon na sintong dohot marhata manggang.

SONGON ON MA HATA NI BIBEL: ”Ai marbiasbias do Jahowa mida halak na geduk, alai rosu do Ibana tu halak partigor.” (Poda 3:32) ”Dibahen i, bolongkon hamu gabus i; hatahon hamu ma na sintong, ganup tu donganna.”—Epesus 4:25.

Paroaroahon

AHA DO I? Pahatahatahon na mambahen roa goar ni halak na asing.

SONGON ON MA HATA NI BIBEL: ”Dibahen halak na jahat do parbadaan jala disirang do na maraleale.” (Poda 16:28, Bibel siganup ari) ”Molo soada soban mintop ma api, molo so adong na pahatahatahon, sae ma parbadaan.”—Poda 26:20.

Marangkal

AHA DO I? Mangotootoi halak asa dapotan hepeng manang barang.

SONGON ON MA HATA NI BIBEL: ”Unang marsingkor bahen halak na pogos jala na hurangan na markarejo di ho.” (5 Musa 24:14,15, Bibel siganup ari) ”Manang ise na mangarupa [pasiaksiakhon] halak na parir, mangaleai Sitompa ibana do.”— Poda 14:31.

Manangko

AHA DO I? Mambuat barang ni sasahalak na so sian pamotoanna.

SONGON ON MA HATA NI BIBEL: ”Naung manangko i, unang be manangko; mulaulaon ma ibana, tanganna i ma sumarihon ngoluna, asa adong lehononna tu na hurangan.” (Epesus 4:28) ”Unang hamu lilu: Ndang sitean harajaon ni Debata . . . angka panangko, angka parangat, angka siparmabuk, angka panginsahi, nang angka pandobo.”—1 Korint 6:9, 10.