Pillit ma Lao Mendukung Harajaon ni Debata Saonari!
Bayakkon ma situasi on. Naeng ro ma angin topan tu ingananmuna. Dung i dipaboa pamaretta ma sian berita di TV, “KALUAR MA HAMU! LULUI MA INGANAN NA AMAN!” Aha ma na ikkon diulahon hamu? Tontu pittor lao do hamu tu inganan na aman.
Suang songon i ma, naeng ro nama “angin topan” di tikkinta saonari. Didok Jesus ma i, “hasusaan bolon”. (Mateus 24:21) Ikkon masa do i, dang boi tapasiding i. Alai, aha do na boi taulahon asa malua?
Jamita na di Dolok, dipaboa Jesus do carana asa boi malua. Didok ibana, “Sai jumolo ma lului Harajaon ni Debata dohot hatigoranna.” (Mateus 6:33) Songon dia ma carana mangulahon i?
Jumolo ma lului Harajaon ni Debata. Lapatanna, ikkon Harajaon ni Debata do na urrikkot di ngolutta sian sudena. (Mateus 6:25, 32, 33) Boasa ikkon i? Alana dang boi jolma pasaehon sude hasusaan di portibi on. Holan Harajaon ni Debata do na boi mangulahon i.
Lului ma hatigoranna. Marsitutu ma mangihutton uhum dohot prinsip ni Debata. Boasa? Alana molo dang taihutton uhum dohot prinsip ni Debata manang taulahon lomo ni rohatta sandiri, gabe susa do ujungna jala marjea. (Poda 16:25) Alai molo taihutton paretta ni Debata, tabahen do las roha ni Debata jala lam denggan do ngolutta.—Jesaya 48:17, 18.
Sai jumolo ma lului Harajaon ni Debata dohot hatigoranna. Jesus paboahon adong do halak na marpikkir, molo dilului nasida godang hepeng, gabe aman jala tabo ma ngoluna. Adong muse na paholsohu tu ngoluna, gabe dang adong be tikki lao mangalului Harajaon ni Debata.—Mateus 6:19-21, 25-32.
Tu akka halak na mendukung Harajaon ni Debata, marjanji do Jesus dapot ni nasida do sude na dihaporluhon saonari. Jala di ari na naeng ro dapot nasida ma pasu-pasu na so ra suda.—Mateus 6:33.
Nang pe Harajaon i dang ro di tikki ni akka sisean ni Jesus, alai boi do nasida martahan mangadopi hasusaan. Songon dia carana?
Diihutton nasida do uhum dohot prinsip ni Debata. I mambahen nasida dang makkilala hasusaan na diadopi akka halak na so mangoloi Debata. Ala porsea situtu nasida lao ro nama Harajaon ni Debata, gabe boi ma nasida martahan mangadopi hasusaan. Jala dilehon Debata ma ‘hagogoon na sumurung’, na mangurupi nasida asa martahan.—2 Korint 4:7-9.
OLO DO HAMU MANJUMOLOHON HARAJAON NI DEBATA?
Diulahon halak Kristen abad na parjolo do paretta ni Jesus asa manjumolohon Harajaon ni Debata. Alani i, marbarita na uli ma nasida tu sude halak. (Kolosse 1:23) Di tikkinta saonari, ise ma na mangulahon i?
I ma Saksi Jahowa! Diboto nasida do, nungnga jonok be tikkina Harajaon ni Debata lao mangaripashon pamarettaon di portibi on. Alani i ma, marsitutu do nasida mangulahon paretta ni Jesus on, “Baritahononhon ma barita na uli taringot tu Harajaon i di liat portibi on, asa saluhut bangso mambege barita i, dung pe i asa ro ujungna.”—Mateus 24:14.
Olo do hamu manangihon barita na uli? Tiru hamu ma halak Makedonia na tading di Berea di abad na parjolo. Tikki dibege nasida barita na uli taringot Harajaon ni Debata sian apostel Paulus, dijalo nasida do barita i sian nasa rohana. ‘Dipareso nasida ma surat na badia i laho mangida sintong manang na ndang na binege ni nasida i.’ Dung i, diulahon nasida do i.—Ulaon ni Apostel 17:11, 12.
Hamu pe boi do songon i. Molo dijumolohon hamu Harajaon ni Debata dohot hatigoranna, boi ma hamu martahan jala denggan ma ngolumuna saonari. Dung i, di ari na naeng ro dapotmuna ma pasu-pasu dohot hadameon.