Saleleng Bulan Parningotan, Diihuthon Hamu do Hiras ni Roha ni Jahowa dohot Jesus?
1. Ulahon na sumurung aha do diulahon Sitindangi Ni Jahowa saleleng bulan Parningotan?
1 Hiras do roha ni Jahowa tingki pasauthon lomo ni rohaNa. Taringot tu angka pasupasu na laho paradeon ni Harajaoan ni Debata, Jesaya 9:6 mandok: ’Hiras ni roha ni Jahowa Zebaot patupahon songon i.’ Anak ni Debata pe, marhiras ni roha do tingki marbarita di tano on laho patandahon songon dia panombaon na sintong tu Debata. (Joh. 2:13-17; 4:34) Ganup taon saleleng bulan Parningotan, marjuta parbarita na uli di liat portibi on marsitutu laho mangihuthon hiras roha ni Jahowa dohot Jesus. Lam girgir nasida marbarita di bulan Parningotan i. Parsidohot do hamu disi?
2. Mulai 7 Maret ulaon aha ma na ingkon taulahon di bagasan hiras ni roha?
2 Pasarhon Gokhon Parningotan: Taon on, mulai Sabtu 7 Maret ma hita pasarhon gokhon Parningotan. Atur hian ma tingki saonari asa boi mangkapadothon ulaon marbarita na uli. Huria pe marhiras ni roha laho pasarhon gokhon i, nasa tolap nasida pasahathon tu sude inganan ni huria i marbarita. Marsitutu ma laho mangokhon parsiajar bibel muna, angka na olo di jumapangi muse, dongan sakarejo, sisolhot, manang dongan sasingkola muna. Lehon ma gokhon manang pangke jw.org tingki manggokhon nasida.
3. Songon dia do hita mangambai hiras ni rohanta saleleng bulan Maret dohot April?
3 Parintis Sitolupulu Jom: Hiras ni roha pe boi mambahen hita lam girgir marbarita. Unang ma ganggu rohanta laho gabe parintis saleleng bulan Maret dohot April, alana boi do tapillit marintis 30 jom di bulan i. Tingki panombaon na sasaripe manang tingki marsiajar Bibel sahalak muna, tangianghon ma asa boi hamu parsidohot disi. (Poda 15:22) Molo hiras rohanta tu ulaon on, boi do mambahen angka dongan pe marhiras ni roha. Molo olo do hita mangalehon gumodangan tingki, na mangihuthon hiras ni roha ni Jesus do hita.—Mrk. 6:31-34.
4. Angka pasupasu aha ma na boi tahilala molo taihuthon hiras ni roha ni Jahowa dohot Jesus?
4 Godang do pasupasu tadapot molo taihuthon hiras ni roha ni Jahowa dohot Jesus saleleng bulan Parningotan. Godang ma halak na boi manangihon baritanta. Las ma rohanta ala mangoloi parenta ni Jahowa jala boi mangurupi angka jolma. (Ul. 20:35) Na rumingkot, boi tabahen las roha ni Debata dohot anakNa na marhiras ni roha.