Urupi ma Angka na so Marnida Marsiajar taringot Jahowa
1. Songon dia do Jesus patuduhon asi ni rohana tu halak na so marnida?
1 Na laho marujung ngolu na ma Jesus pigapiga ari nai. Tingki ro ibana tu huta Jeriko, dua halak na so marnida joujou mandok: ”Asi ma roham di hami!” Nang pe Jesus mamingkirhon pangunjunan na laho adopanna, dijangkon Jesus do nasida, digora laos dipamalum ma. (Mateus 20:29-34) Songon dia do hita boi maniru asi ni roha ni Jesus tu angka na so marnida?
2. (a) Songon dia do hita boi marbarita molo pajumpang dohot halak na so marnida di inganan na ribur? (b) Aha do na porlu taingot tingki mangurupi halak na so marnida?
2 Urupi ma: Molo pajumpang hamu dohot na so marnida di inganan na ribur, patandahon ma dirimu jala lehon ma pangurupion. Di mulana olo do ndang pos roha nasida tu hita. Alai, molo burju do hita mangantoi sian ias ni roha, boi do on paposhon rohana. Porlu taingot, ndang sai sarupa posi ni sahit parnidaan nasida. On boi mangurupi hita mamingkirhon sadia godang pangurupion silehonlehon na laho talehon. Dung talehon pangurupion i, denggan ma tadok molo hita pe mangurupi halak marhite marsiajar Bibel. Sungkun ma ibana boi do tajahahon ayat, songon Psalmen 146:8 manang Jesaya 35:5, 6. Molo boi do ibana manjaha leter Braille, togihon ma ibana manjaha buku na marleter Braille asa boi mangurupi ibana marsiajar Bibel. Boi taurupi ibana asa mandapot file audio sian jw.org. Molo adong program pembaca layar (screen reader) di komputerna jala boi patubegehon teks naung jinahana sian komputer, las do ra rohana molo artikel na dicetak i didownload na marformat RTF (Rich Text Format).—Ida ma kotak ”Tingki Mangurupi na so Marnida . . .”
3. Songon dia bahenonta mangalului halak na so marnida di luatnta?
3 Lului ma Angka na so Marnida: Ndang jotjot boi tajumpangi halak na so marnida tingki marbarita sian jabu tu jabu, ala godang sian nasida maila manghatai tu halak na so ditanda na ro tu jabu nasida. Alani i, ”diori” ma angka halak sisongon i asa boi talehon barita na uli tu nasida. (Mateus 10:11) Adong do dongan sakarejo manang dongan sasingkolamu na so marnida? Jumolo ma hita mamangkulingi. Molo adong singkola tu na so marnida di luatnta, sungkun ma manang boi do lehonon bukunta na marhata Braille tu perpustakaan ni singkola i. Adong do ditanda hamu sasahalak na adong keluargana na so marnida? Adong do orhanisasi na mangurupi na so marnida di luat muna manang na paradehon inganan tu nasida? Paboa ma tu keluargana, resepsionis, manang direktur, na las do roha ni Sitindangi Ni Jahowa mangurupi angka halak na so marnida marsiajar Bibel, jala lehon ma sijahaon na marleter Braille manang rekaman audio. Patuduhon ma bagabaga ni Debata sian Bibel na so adong be satongkin nai halak na so marnida. Boi tapatudu video sian jw.org na marjudul ”Tanpanya, Saya Hilang Arah”, na paboahon pengalaman sahalak na so marnida na mandapot godang laba sian Bibel na marhata Braille. Molo tapatorang aha tujuan haroronta, boi do on gabe dalan asa boi manjumpangi angka halak na so marnida ganup marsadasada.
4. Aha ma parsiajaran na boi tadapot sian pengalaman ni si Janet?
4 Sahalak donganta borua na so marnida na margoar si Janet, ro tu inganan ni angka halak na so marnida. Manghatai ma ibana dohot sahalak anak boru. Dipaboa si Janet ma tu ibana, ”Dipamalum Jesus do angka na so marnida laho patuduhon na laho pamalumonna ma sude angka halak na so marnida.” Rap diida nasida ma ayat sian Pangungkapon 21:3, 4, jala dipatorang si Janet ma songon dia dipasaut bagabaga on marhite Harajaon ni Debata. Longang ma roha ni anak boru i jala didok ma: ”Ndang hea hubege barita on sian dongan na so marnida. Godang halak mandok angka na so marnida i, alani parniulaon nasida manang parniulaon ni angka ompungna.” Ditongos si Janet ma tu e-mail ni anak boru i link tu buku Alkitab Ajarkan, jala marsiajar Bibel ma nasida saonari dua hali saminggu.
5. Nang pe ndang boi hita pamalumhon halak na so marnida songon na binahen ni Jesus, aha do labana molo talehon rohanta tu halak na so marnida?
5 Nang pe ndang boi tapamalum halak na so marnida songon na binahen ni Jesus, alai boi do taurupi sude halak na dipapitung debata ni portibi on, dohot ma i halak na mapitung ala na so marnida, asa mamboto hasintongan sian hata ni Debata. (2 Korint 4:4) Ala ”asi ma roha ni Jesus” tu dua baoa na so marnida jonok tu huta Jeriko, dipamalum ma nasida. (Mateus 20:34) Molo tapatudu asi ni roha tu halak na so marnida, tahilala ma las ni roha ala boi mangurupi halak marsiajar taringot Jahowa, na laho pamalumhon angka na so marnida salelenglelengna.