1921—Saratus Taon Naung Salpu

DI MAJALAH Watch Tower 1 Januari 1921, hea do dibahen sukkun-sukkun on, “Aha do na ikkon taulahon sataon on?” Dung i dikutip ma Jesaya 61:1, 2 na mandok, “Dipillit Jahowa do au lao marbarita na uli tu halak na lambok roha . . . lao paboahon taon na dihalomohon Jahowa, dohot ari ni Debatanta lao mambalos akka musuna.” Dikutip do ayat i lao paingotton akka Parsiajar Bibel di tikki i asa semangat nasida marbarita na uli.

BARANI MARBARITA NA ULI

Asa boi semangat akka Parsiajar Bibel marbarita na uli, dang boi halak i mabiar. Ikkon barani do nasida “marbarita na uli” tu halak na lambok roha, jala ikkon barani do tong halak i paboahon ‘ari ni Debata lao mambalos akka musuna’.

Misalna taida ma pengalaman ni donganta si J. H. Hoskin, na tinggal di Kanada. Dang mabiar ibana marbarita na uli nang pe adong tantangan. Di taon 1921, marbarita ma ibana tu sahalak pandita Metodis. Didok donganta si Hoskin on ma tu ibana, “Las rohakku makkata-hatai tu hamu taringot Bibel. Annon molo adong pe na so sapandapot hita, boi do denggan tahatai ate.” Alai dang songon i na terjadi. Didok donganta on, “Holan piga-piga menit dope hami makkatai dohot ibana, nga pittor ditumbukkon ibana pintuna massai gogo. Nga hurippu be pocca kaca na di pintuna i.”

Didok pandita Metodis i ma tu ibana, “Boasa ma dang tu halak na so Kristen i hamu lao?” Alai dang dialusi donganta si Hoskin on, sip do ibana. Dung i ditinggalhon ibana ma jabu i. Didok ibana ma di rohana, ‘Boasa gabe muruk ibana ate?’

Marsogotna i tikki marjamita pandita i di garejana, didok ma barita na negatif taringot donganta si Hoskin. Donganta si Hoskin mandok, “Didok pandita Metodis i do tu akka dongan sagarejana, molo au sahalak panipu. Jala didok ibana do muse ikkon dipamate au.” Alai dang menyerah donganta si Hoskin. Torus do ibana marbarita na uli tu akka halak. Didok si Hoskin, “Las hian do rohakku marbarita na uli. Piga-piga halak mandokkon tu au, ‘Tutu ma ho na disuru Debata!’ Jala dilehon nasida do tu au akka na huhaporluhon.”

PARSIAJARAN PRIBADI DOHOT IBADAT KELUARGA

Asa boi mangurupi halak mambahen kemajuan secara rohani, dibahen akka Parsiajar Bibel ma publikasi na marisi akka sukkun-sukkun jala adong alusna disi, di majalah The Golden Age na digoari saonari Dungo ma! Jadi di bukku on dibahen ma sukkun-sukkun tu akka na poso, jala boi do nasida mardiskusi dohot natua-tuana. Carana, natua-tuana ma na manjahahon sukkun-sukkun na adong di bukku i. Jala diurupi ma anakkonna mandapot alusna sian Bibel. Misalna adong do sukkun-sukkun na sederhana songon on, “Piga do jumlah ni bukku na adong di Bibel?” Sukkun-sukkun na asing muse, “Boasa halak Kristen ikkon dianiaya?” Sukkun-sukkun i boi mangurupi akka na poso asa barani marbarita na uli.

Dibahen do muse sukkun-sukkun tu akka halak naung adong parbinotoanna taringot Bibel. Dibahen do alus ni sukkun-sukkun i di bagian na parjolo sian bukku Studies in the Scriptures. Godang do manfaat na dapot nasida sian akka sukkun-sukkun i. Alai di terbitan The Golden Age 21 Desember 1921, dipaboa ma dang adong be annon akka sukkun-sukkun i dibahen. Boasa dipamago i?

BUKKU NA BARU

Bukku *The Harp of God*

Pembatas bukku na marisi tugas na ikkon dijaha

Kartu na marisi sukkun-sukkun

Diboto akka dongan na mamimpin di organisasi ma, porlu do akka parsiajar Bibel na baru taratur marsiajar Bibel. Alani i, diterbitton ma bukku The Harp of God bulan November 1921. Boi do nasida sandiri na mamparsiajari bukku i. Sian bukku i, boi ma diparsiajari nasida “janji ni Debata taringot hangoluan na saleleng ni lelengna”. Songon dia do cara ni nasida mamparsiajari bukku i?

Tikki dapot ni sasahalak bukku i, dilehon do tong tu ibana sada kartu na gelleng na marisi bagian dia ma na parjolo diparsiajari. Minggu berikutna muse, dilean ma sada kartu na marisi akka sukkun-sukkun taringot na dijaha ibana i. Di kartu i dipaboa do muse, bagian dia na ikkon dijaha ibana berikutna.

Ganup minggu dilehon huria ma kartu i tu akka halak na marsiajar Bibel. Dilean ma i sappe 12 minggu. Biasana, ditugasson huria ma akka dongan na matua dohot akka dongan na so boi be kaluar dinas mangirim akka kartu i. Donganta si Anna K. Gardner, sian Millvale, Pennsylvania, AS, mandok, “Kakakku si Thayle maol do ibana kaluar dinas, ala dang boi ibana mardalan. Alai dung dirilis bukku The Harp of God, boi ma ibana aktif mardinas. Dohot ma ibana mangirim kartu na marisi sukkun-sukkun i ganup minggu tu akka halak.” Molo dung sae na 12 minggu i, ditugasson ma sahalak donganta mangunjungi halak na berminat i. Dung i diurupi ma nasida marsiajar Bibel.

TORUS DO NASIDA SEMANGAT MARBARITA

Di ujung ni taon 1921, dibahen donganta si J. F. Rutherford ma surat tu sude huria. Didok ibana, “Marhasil do ulaonta marbarita na uli di taon on. Nungnga lam godang be halak na mambege barita na uli.” Didok ibana ma muse, “Alai dang sae dope ulaonta i. Alani i, tatogihon ma asa lam godang halak na dohot mangulahon tugas na luar biasa on.” Pittor diulahon akka Parsiajar Bibel do na didok donganta si Rutherford i. Buktina, taon 1922 nungnga lam barani be nasida paboahon barita na uli taringot tu Harajaon ni Debata.

Akka Dongan na Barani

Masihaholongan do akka Parsiajar Bibel najolo. Sai masiurupan do nasida “tikki masa sitaonon”. (Poda 17:17) Saonari taida ma jo pengalaman ni sahalak donganta.

Di ari Selasa tanggal 31 Mei 1921, adong ma sahalak bawa kulit hitam di kota Tulsa (Oklahoma, AS) na dipenjarahon ala ditudu ibana menyerang sahalak borua kulit putih. Alani i, adong ma lobi sian 1.000 bawa kulit putih na marbadai dohot akka bawa kulit hitam. Sappe sahat ma kerusuhan i tu kota Greenwood. Godangan halak na tinggal di kota i, kulit hitam do. Lobi sian 1.400 jabu dohot toko na dijarah, dung i ditutung. Adong ma 36 halak na dilaporhon mate, alai bisa jadi adong do sekitar 300 halak na mate di tikki i. Kerusuhan na masa i, didok ma Pembantaian Ras Tulsa.

Adong do sahalak donganta mangida na masa i, i ma si Richard J. Hill, sahalak Parsiajar Bibel na tinggal di Greenwood, jala kulit hitam do ibana. Didok si Hill, “Di borngin tikki masa kerusuhan i, pas lagi adong do kelas marsiajar Bibel di hurianami. Dung sae i, hubege hami dope soara ni na marsitembakan. Jala tikki naeng modom hami, hubege hami dope soara ni kerusuhan i.” Marsogotna i ari Rabu tanggal 1 Juni, lam parah ma situasi. Didok si Hill, “Adong ma akka halak na manuru hami lao tu Gedung Pertemuan na di kota Tulsa asa aman hami.” Jadi lao ma donganta si Hill, istrina, dohot lima gellengna tu gedung i. Ternyata nungnga adong hira-hira 3.000 halak kulit hitam disi, jala adong do akka tentara na disuru pamaretta manjaga nasida.

Di tikki i, adong do sahalak donganta kulit putih na barani mangurupi donganta si Hill. Goarna si Arthur Claus. Didok ibana, “Dung hubege nungnga dijarah jala ditutung akka jabu di kota Greenwood, pittor lao ma au tusi. Naeng hupastihon songon dia keadaan ni donganta si Hill.”

Si Arthur Claus mangajar 14 dakdanak mamakke bukku The Harp of God

Dung sahat ibana di jabu ni donganta si Hill, pittor ro ma tetangga ni si Hill mandapotton si Arthur sambil maniop senjata. Mardongan do donganta si Hill tu tetanggana i. Dirippu ibana ma naeng mangarampok jabu ni donganta si Hill si Arthur ro tusi. Gabe berteriak ma ibana mandok, “Naeng marhua ho tuson?”

Didok donganta si Arthur ma, “Molo so boi huyakinhon ibana tikki i, hurasa nga ditembak ibana au. Jadi hupapos ma rohana, dongan ni si Hill do au. Jala nungnga sering au ro tu jabuna.” Gabe kerja sama ma donganta si Arthur dohot tetangga ni si Hill i manjaga jabu ni si Hill sian akka pangarampok.

Dung i berencana ma donganta si Arthur naeng lao tu Gedung Pertemuan i mangalap si Hill dohot keluargana. Alai asa boi halak kulit hitam mulak sian gedung i, ikkon jolo adong do izin sian Jenderal Barrett. Ibana do komandan ni akka tentara na manjaga gedung i. Didok si Arthur ma, “Sabotulna dang mura mangulahon i. Alani i ma, tikki hupaboa tu jenderal i rencanakku naeng mamboan mulak halak si Hill, didok ibana ma tu au, ‘Boi do pastihononmu aman halak on jala tersedia kebutuhanna?’ Pittor hudok ma, boi.”

Dung dapotna izin sian jenderal i, lao ma si Arthur tu Gedung Pertemuan i. Dipatudu ibana ma surat izin na sian jenderal i tu tentara na manjaga disi. Didok tentara i ma, “Baru ho dope halak na diizinhon mamboan mulak halak sian on. Alai boha be bahenon, nga dapotmu izin sian jenderal i.” Pittor diboan ma masuk donganta si Hill dohot keluargana tu mobil ni si Arthur. Jala diboan ma nasida mulak tu jabu ni si Hill.

Torus do dipastihon donganta si Arthur Claus asa aman si Hill dohot keluargana. Ala barani ibana mangurupi donganta si Hill nang pe adong tantangan, denggan do hasilna. Didok donganta si Arthur ma, “Gabe lam diargai tetangga ni si Hill ma akka Parsiajar Bibel, jala lam godang ma halak na olo marsiajar Bibel. Ala diida nasida, olo do hita mardongan tu manang ise pe dang soal aha warna kulitna. Jala dang olo hita manganggap unjago hita sian na asing.”