Hadiah na Massai Arga do Tangiang i

1. Songon dia do perasaanta ala boi martangiang tu Jahowa?

DILEHON Sitoppa langit dohot tano on do hadiah na massai arga tu hita. Diloas Ibana do hita martangiang tu Ibana. Pikkirhon ma on: Boi do tapaboa sude na di rohatta tu Jahowa tikki sadihari pe, jala mamakke bahasa manang aha pe. Asing ni i dang pola ikkon jolo mambahen janji hita lao martangiang tu Ibana. Boi do hita martangiang tikki di rumah sakit, manang tikki di penjara. Jala pos do rohatta pasti ditangihon Jahowa do tangiangta i. Mandok mauliate do hita tu Jahowa alani hadiah on.

2. Sian dia do taboto na massai arga do tangiang di si Daud?

² Massai arga do tangiang di si Daud jala sada hasangapon do i di ibana. Didok ibana tu Jahowa, “Sai anggiat ma tangiakku gabe dos songon dupa na diparade di jolom.” (Ps. 141:1, 2) Di jaman ni si Daud, dipakke do dupa gabe pelean tu Jahowa, jala denggan do i diparade akka malim. (2 Mus. 30:34, 35) Sian hata ni si Daud on, taboto ma jolo dipikkiri ibana do aha na lao tangiakkononna tu Jahowa, asa songon dupa tangiangna i. Hita pe songon i ma nian. Denggan ma taparade tangiangta asa las roha ni Jahowa.

3. Boasa ikkon tapasangap Jahowa tikki martangiang?

³ Ikkon tapatudu do na tapasangap Jahowa tikki martangiang tu Ibana. Tabayakkon ma jo akka parnidaan ni si Jesaya, si Hesekiel, si Daniel, dohot si Johannes. Marasing-asing do parnidaan ni nasida, alai adong sada persamaanna. Di akka parnidaan i, digombarhon do Jahowa sebagai Raja na tung massai sangap. Didok si Jesaya, “Jahowa hundul di tahta na massai timbo.” (Jes. 6:1-3) Di parnidaan ni si Hesekiel, didok do Jahowa hundul di kareta surgawina. “Jala di sakalilingna massai tiur, songon pelangi.” (Hes. 1:26-28) Molo di parnidaan ni si Daniel, didok do Jahowa ‘Naung Adong sian Najolo. Bottar do abitna jala sian api na marsigorgor do tahtana’. (Dan. 7:9, 10) Di parnidaan ni si Johannes, Jahowa hundul di tahtana. Jala di sakaliling ni tahta i adong pelangi na songon jamrud. (Pgk. 4:2-4) Sian akka parnidaan on taboto ma massai sangap do Jahowa. Nang pe songon i diloas do hita martangiang tu Ibana. Jadi taargai ma tangiang i. Akka aha ma na boi tatangiakkon?

“SONGON ON MA HAMU MARTANGIANG”

4. Sesuai tu Mateus 6:9, 10, aha do na parjolo ikkon tatangiakkon?

⁴ Jaha Mateus 6:9, 10. Di jamita ni Jesus na di dolok, dipaboa ibana do songon dia carana martangiang asa las roha ni Debata. Dung didok ibana, “songon on ma hamu martangiang”, dipaboa Jesus ma aha na parjolo ikkon tatangiakkon, i ma pabadiahon goar ni Debata, mangido asa ro Harajaon ni Debata manghancurhon sude musu ni Debata, jala mangido asa saut lomo ni roha ni Debata di tano on dohot tu jolma. Molo tatangiakkon i sude, on patuduhon na massai penting do di hita lomo ni roha ni Debata.

5. Molo tatangiakkon akka na porlu di hita, ditangihon Jahowa do i?

⁵ Sian tangiang na diajarhon Jesus i taboto ma, boi do tatangiakkon akka na porlu di hita. Contohna, boi do tapangido asa dilehon Jahowa sipanganonta ganup ari, asa disalpuhon hasalaatta, asa unang targoda hita mangulahon na sala, jala asa dipalua hita sian Sibolis. (Mat. 6:11-13) Molo tapangido i sude, on patuduhon lomo rohatta mambahen las roha ni Jahowa jala na pos rohatta sanggup Jahowa paradehon kebutuhanta.

6. Tikki diajarhon Jesus songon dia carana martangiang, na gabe holan i do na boi tatangiakkon?

⁶ Tikki diajarhon Jesus songon dia carana martangiang, dang na berarti holan i na boi tatangiakkon. Alana hea do muse disurat di Bibel tangiang ni Jesus na paboahon kekhawatiranna tu Jahowa. (Mat. 26:39, 42; Joh. 17:1-26) Suang songon i ma, boi do tatangiakkon akka na mambahen hita khawatir. Contohna, tikki naeng mambahen keputusan boi do hita martangiang mangido bisuk. (Ps. 119:33, 34) Tikki maol tahilala mangulahon sada tugas, boi do hita martangiang asa taboto songon dia carana mangulahon tugas i. (Poda 2:6) Akka natua-tua boi do manangiakkon gellengna, jala gellengna pe boi do manangiakkon natua-tuana. Asing ni i, sude hita boi do manangiakkon akka parsiajar Bibel dohot akka halak na takabari. Alai, adong dope na boi tatangiakkon.

7. Boasa ikkon tapuji Jahowa di tangiangta?

⁷ Ikkon tapuji do Jahowa di tangiangta. Godang do alasanna boasa ikkon tapuji Jahowa. Alana holan Ibana do na layak dipuji. Asing ni i, godang do akka sifat ni Jahowa na denggan na dipatudu tu hita. Contohna, ‘rade do Jahowa manalpuhon hasalaan, burju jala parasi roha do Ibana, setia, lambat tarrimas, jala gok do holong ni roha di Ibana’.​—Ps. 86:5, 15.

8. Boasa ikkon mandok mauliate hita tu Jahowa tikki martangiang? (Psalmen 104:12-15, 24)

⁸ Tikki martangiang, porlu do muse hita mandok mauliate tu Jahowa. Alana nungnga massai godang na dilehon Ibana tu hita. Dilehon do godang jenis ni sipanganon na tabo, akka dongan na burju, dohot godang warna ni bunga na bagak. Dilehon Jahowa pe sudena i, alani holongna do tu hita jala lomo rohana asa marlas ni roha hita. (Jaha Psalmen 104:12-15, 24.) Na paling penting, mandok mauliate ma hita ala dilehon Jahowa harapan dohot akka petunjuk sian Bibel na mambahen togu haporseaotta.

9. Boha do carana asa unang lupa hita mandok mauliate tu Jahowa? (1 Tessalonik 5:17, 18)

⁹ Sipata olo do lupa hita mandok mauliate tu Jahowa. Attong songon dia ma asa unang lupa hita? Boi do tasurat aha na naeng tatangiakkon tu Jahowa, jala taida ma songon dia Jahowa mangalusi tangiangta i. Dung i mandok mauliate ma hita tu Jahowa ala nungnga diurupi Ibana hita. (Jaha 1 Tessalonik 5:17, 18.) Pikkirhon ma on: Molo adong halak mandok mauliate tu hita ala nungnga taurupi, pasti las do rohatta. Songon i ma nang Jahowa, pasti las do rohana molo mandok mauliate hita tu Ibana. (Kol. 3:15) Alai adong dope alasan na asing boasa ikkon mandok mauliate hita tu Jahowa.

MANDOK MAULIATE ALANI JESUS 

10. Sesuai tu 1 Petrus 2:21, boasa mandok mauliate hita ala disuru Jahowa Jesus mangajari hita?

¹⁰ Jaha 1 Petrus 2:21. Ikkon mandok mauliate do hita tu Jahowa ala disuru Anak haholonganna lao mangajari hita. Sian parngoluan ni Jesus, gabe boi ma tatanda Jahowa jala taboto ma songon dia carana mambahen las rohana. Molo porsea hita tu tobusan ni Kristus, gabe boi ma hita marale-ale tu Jahowa jala mardame tu Ibana.​—Rom 5:1.

11. Boasa ikkon marhite goar ni Jesus hita pasahatton tangiangta tu Jahowa?

¹¹ Mandok mauliate do hita tu Jahowa ala boi tapasahat tangiangta marhite goar ni Anakna. Asa olo Jahowa manangihon dohot mangalusi tangiangta, ikkon tapasahat do i marhite goar ni Jesus. Jesus pe mandok, “Ulahonokku do manang aha na dipangido hamu marhite goarhu, asa gabe dipasangap Damang i marhite Anak i.”​—Joh. 14:13, 14.

12. Boasa ikkon mandok mauliate hita ala dilehon Jahowa tobusan?

¹² Marhite tobusan ni Jesus do Jahowa manesa dosatta. Molo di Bibel didok do Jesus i ‘sintua ni malim na hundul di sabola kanan ni tahta ni Debata na Marmulia’. (Heb. 8:1) Didok do muse di Bibel Jesus do “na mangurupi hita”, jala rap do ibana dohot Damang i. (1 Joh. 2:1) Pasti mandok mauliate do hita tu Jahowa ala dilehon Ibana do tu hita Sintua ni Malim na boi mangattusi hagaleotta, jala na “mambahen pangidoan tu Debata taringot tu hita”. (Rom 8:34; Heb. 4:15) Molo dang alani tobusan ni Jesus, dang adong nanggo sada pe sian hita na boi langsung martangiang tu Jahowa. Alana sude do hita mardosa. Jadi silehon-lehon na massai arga do tobusan ni Jesus, jala dang tarbalos hita i. Mandok mauliate ma hita tu Jahowa ala dilehon Ibana Anak haholonganna i.

TATANGIAKKON MA AKKA DONGAN SAHAPORSEAON 

13. Di borngin sebelum mate Jesus, aha do na diulahon ibana?

¹³ Di borngin sebelum mate Jesus, leleng do ibana martangiang tu Jahowa. Dipangido ibana do asa ‘dijaga akka apostelna sian Sibolis’. (Joh. 17:15) On patuduhon massai holong do roha ni Jesus tu nasida. Hape diboto Jesus do, satokkin nai masa nama sitaonon na borat tu ibana. Alai di situasi sisongon i pe, dipikkiri Jesus dope akka siseanna.

14. Aha do buktina na tahaholongi akka donganta?

¹⁴ Molo tatiru Jesus dang holan kebutuhanta be na tapikkiri. Alai gabe tapikkirhon ma akka donganta jala tatangiakkon nasida. Molo taulahon i, berarti na taoloi do paretta ni Jesus lao makkaholongi na asing. Jala tapatudu ma tu Jahowa na holong rohatta tu akka dongan sahaporseaon. (Joh. 13:34) Godang do manfaatna molo tatangiakkon akka donganta. Alana di Bibel didok, “Margogo do tangiang ni halak na mangulahon na sittong.”​—Jak. 5:16.

15. Boasa ikkon tatangiakkon donganta sahaporseaon?

¹⁵ Porlu do tatangiakkon akka dongan sahaporseaon asa martahan nasida mangadopi godang tantangan. Tapangido ma tu Jahowa asa boi nasida martahan tikki marsahit, tikki masa bencana alam, tikki adong porang, tikki dianiaya, manang tikki mangadopi akka hasusaan na asing. Boi do muse tatangiakkon akka donganta na gabe relawan lao mangurupi na hona bencana. Jala molo adong sian akka donganta na susa i na tatanda, tadok ma goar ni nasida di tangiangta. Molo olo hita mangulahon i, berarti botul-botul do holong rohatta tu nasida.

16. Boasa porlu tatangiakkon akka sintua di huria?

¹⁶ Porlu do muse tatangiakkon akka donganta bawa na bekerja keras di huria. Songon na dihilala Apostel Paulus, godang do manfaatna di nasida molo taulahon i. Didok ibana, “Tangiakkon hamu ma nang au, asa barani au paboahon hata na dipasahat tu au, i ma rahasia na badia taringot tu barita na uli.” (Eps. 6:19) Saonari pe godang do akka sintua na bekerja keras di huriatta. Molo martangiang hita asa dipasu-pasu Jahowa nasida, berarti na holong do rohatta tu nasida.

TIKKI MARTANGIANG MEWAKILI NA ASING 

17-18. Tikki sadihari do biasana hita dipangido martangiang mewakili na asing, jala aha do na porlu taingot?

¹⁷ Sipata dipangido do hita mewakili na asing tikki martangiang. Contohna sahalak donganta borua, olo do dipangido martangiang tikki dohot manstudihon parsiajar Bibel ni donganta na asing. Alai molo so takkas dope ditanda ibana parsiajar Bibel i, undenggan do ra ibana martangiang dung sae marsiajar. Alana nga diboto ibana be aha na porlu ditangiakkon taringot parsiajar Bibel i.

¹⁸ Olo do muse dipangido sahalak donganta bawa martangiang di parpunguan lao marbarita manang parpunguan di huria. Ikkon diingot donganta i do tujuan ni parpunguan i. Tikki martangiang, unang ma dipakke ibana kesempatan i lao pasingotton manang paboahon pengumuman. Alana molo di parpunguan, holan lima menit do tikki na diparade tu ende dohot tangiang. Jadi unang ma paganjanghu tangiangmuna, khususna di tangiang pamukka.​—Mat. 6:7.

MASSAI PENTING DO MARTANGIANG

19. Aha do na ikkon taulahon asa rade hita tikki ro ari panguhuman ni Jahowa?

¹⁹ Massai penting do martangiang, khususna ala nungnga lam jonok ari ni Jahowa. Jesus pe mandok, “Sai jaga ma hamu. Toktong ma pangido asa malua hamu sian sude na lao masa i jala asa boi hamu jongjong di jolo ni Anak ni jolma i.” (Luk. 21:36) Jadi molo torus hita martangiang gabe lam togu ma haporseaotta tu Jahowa, jala gabe rade ma hita tikki ro ari panguhumanna i.

20. Aha do na porlu taulahon asa songon dupa na angur tangiangta?

²⁰ Aha do naung tabahas di artikel on? Nungnga taboto be hadiah na massai arga do tangiang i. Tikki martangiang, sai parjolo ma tatangiakkon lomo ni roha ni Jahowa, ala i do na uppetting. Porlu do muse tapatudu sian tangiangta na taargai peran ni Jesus. Tatangiakkon ma muse Harajaon ni Debata dohot akka dongan sahaporseaon. Asing ni i, boi do hita martangiang mangido kebutuhanta jala mangido asa diurupi Jahowa toktong togu haporseaotta. Alai jolo tapikkirhon ma aha na naeng tatangiakkon. Molo tabahen songon i, on patuduhon na massai arga do tangiang i di hita. Hasilna gabe songon dupa na angur ma tangiangta i, na palashon roha ni Jahowa.​—Poda 15:8.