Toktong ma Setia Nang pe Adong na So Taboto Dope

1. Songon dia do Jahowa manoppa hita, jala boasa?

DITOPPA Jahowa do hita boi marpikkir, marsiajar, mangattusi akka na taparsiajari, jala boi mangulahon i. Boasa? Alana, lomo do roha ni Jahowa asa tadapot “parbinotoan taringot [Ibana]” jala boi tasomba Ibana sesuai tu parbinotoan i.—Poda 2:​1-5; Rom 12:1.

2. Aha do na porlu tasadari, jala boasa denggan i? (Job 37:​23, 24) (Ida gambar.)

² Nang pe ditoppa Jahowa hita boi marsiajar, alai godang dope na so taboto. (Jaha Job 37:​23, 24.) Taingot ma si Job. Dibahen Jahowa do godang sukkun-sukkun tu si Job asa disadari ibana godang dope na so diboto ibana. Dukkon i, gabe boi ma dipadenggan si Job cara marpikkirna jala gabe serep ma rohana. (Job 42:​3-6) Dos songon i ma, denggan do molo tasadari godang dope na so taboto. Boi ma i mangurupi hita asa serep rohatta jala pos rohatta tu Jahowa. Alana, pasti lehononna do akka hatorangan na tahaporluhon asa boi tabahen keputusan na denggan.—Poda 2:6.

3. Aha do na lao tabahas di artikel on?

³ Di artikel on, lao tabahas ma akka aha do na so taboto dope dohot aha tantanganna, jala aha manfaatna molo pe dang taboto i. Akka na lao taparsiajari di artikel on boi paposson rohatta, Jahowa do “Debata nappuna parbinotoan na sun denggan i”. Pasti paboaonna do tu hita akka hatorangan na tahaporluhon.—Job 37:16.

DANG TABOTO DOPE ANDIGAN RO ARI I

4. Songon na dipaboa di Mateus 24:​36, aha do na so taboto dope?

⁴ Jaha Mateus 24:36. Dang adong hita na mamboto andigan ro ari ni Jahowa i. Bahkan tikki di tano on dope Jesus, dang diboto ibana “ari dohot jamna”.a Jala dipaboa ibana do tu akka apostelna, holan Jahowa do “na marhak manottuhon” andigan masa sada situasi tertentu. (Ul. 1:​6, 7) Alai taingot ma, sai tepat waktu do Jahowa. Nungnga ditottuhon Ibana andigan ro ari i. Alai memang andigan “ari dohot jamna”, dang dipaboa Jahowa i tu hita.

5. Ala dang taboto dope andigan ro ari i, aha do pengaruh ni i tu hita?

⁵ Dang taboto dope ikkon sadia leleng nai tapaima ro ari i. Alani i, olo do ra gabe dang sabar hita manang kecewa, tarlumobi molo nungnga leleng hita paimahon i. Asing ni i, olo do ra gabe direhei keluarga manang halak na asing hita ala dang marna ro dope ari i. Jala boi do on mambahen metmet rohatta. (2 Ptr. 3:​3, 4) Ra gabe didok rohatta ma, molo taboto andigan ro ari i, boi do i mambahen hita lam sabar jala dang gabe metmet rohatta molo pe adong na mangarehei hita.

6. Aha do manfaatna ala dang taboto andigan ro ari i?

⁶ Adong do manfaatna ala dang dipaboa Jahowa andigan ro ari i. On gabe kesempatan tu hita lao patuduhon tasomba pe Jahowa ala na holong do rohatta tu Ibana jala pos rohatta tu Ibana. Lomo do rohatta manomba Ibana sahat tu saleleng ni lelengna, dang holan sahat tu na ro ari i. Jadi, unang ma taringot andigan ro “ari ni Jahowa” i na sai tapikkiri. Alai, tapikkirhon ma akka aha do na lao masa dung ro ari i. Molo taulahon songon i, gabe lam pos ma rohatta tu Jahowa jala gabe berupaya ma hita mambahen las rohana.—2 Ptr. 3:​11, 12.

7. Akka aha do naung taboto?

⁷ Massai penting do mamikkirhon akka aha naung taboto. Di Bibel, dipaboa Jahowa do godang surirang naung saut di tikkitta saonari. Contohna, dipaboa do molo ari parpudi i dimulai sian taon 1914. Jala dipaboa do tong songon dia situasi ni portibi on dukkon taon i. Sian on gabe pos ma rohatta, “nungnga jonok be ari ni Jahowa, ari na balga i”. (Sep. 1:14) Asing ni i, taboto do na lomo roha ni Jahowa asa tapasahat “barita na uli taringot tu Harajaon i” tu godang halak. (Mat. 24:14) Saonari, nungnga sahat be barita na uli i tu hira-hira 240 negeri di lobi sian 1.000 bahasa. Jadi nang pe dang taboto dope “ari dohot jamna”, alai boi do hita toktong semangat pasahatton barita na uli i.

DANG TABOTO DOPE CARA NI JAHOWA MANGURUPI HITA

8. Boi do benar-benar taattusi “akka ulaon ni Debata na sittong”? Patorang ma. (Parjamita 11:5)

⁸ Dang sai boi taattusi “akka ulaon ni Debata na sittong”. (Jaha Parjamita 11:5.) Lapatanna, dang sai taboto boasa dibahen Jahowa manang dipasombu Ibana masa sada situasi lao pasautton lomo ni rohana. Jala dang sai taboto songon dia cara ni Jahowa bertindak lao mangurupi hita (Ps. 37:5) Sarupa ma on songon akka peneliti na so boi benar-benar mangattusi songon dia partubu ni sada poso-poso di bortian.

9. Ala dang sai taboto boha cara ni Jahowa lao mangurupi hita, aha do pengaruhna tu hita?

⁹ Dang sai taboto boha cara ni Jahowa lao mangurupi hita. Alani i, olo do gabe ragu hita mambahen keputusan asa boi talehon unggodang tikkitta di ulaon manomba Jahowa. Contohna, mambahen asa sederhana ngolutta manang pinda tu inganan na makkaporluhon parbarita. Asing ni i, olo do ra didok rohatta, “Las dope roha ni Jahowa mangida au?” Ra, nungnga tabahen cita-cita rohani, alai dang tercapai. Torus do hita semangat marbarita, alai dang marna adong parsiajar Bibelta. Jala nungnga semangat hita mangulahon akka tugas di organisasi, hape sai adong tantanganna tikki mangulahon i.

10. Ala dang sai taboto boha cara ni Jahowa mangurupi hita, aha do manfaat ni i tu hita?

¹⁰ Sebenarna, denggan do molo dang sai taboto boha cara ni Jahowa mangurupi hita. Boi do i mangurupi hita padenggatton akka parangetta, misalna gabe lam serep ma rohatta. Jala gabe tasadari ma diboto Jahowa do aha na terbaik tu hita. (Jes. 55:​8, 9) Asing ni i, gabe lam pos ma rohatta tu Jahowa jala gabe sai taasahon ma Ibana. Alani i, molo dapotta akka hasil na denggan di ulaon marbarita manang tikki mangulahon akka tugas na asing di organisasi, Jahowa ma na tapuji. (Ps. 127:1; 1 Kor. 3:7) Alai boha do molo hasilna dang sesuai tu na taharappon? Taingot ma, diboto Jahowa do sasude. (Jes. 26:12) Jadi taulahon ma akka na boi taulahon, jala pos ma rohatta pasti diurupi Jahowa do hita. Nang pe dang dibahen Jahowa be mukjizat songon najolo lao mangurupi hita saonari, alai pasti lehononna do akka petunjuk na tahaporluhon.—Ul. 16:​6-10.

11. Akka aha do naung taboto?

¹¹ Rimangi ma sude naung taboto taringot Jahowa. Misalna, taboto do Jahowa i Debata parholong, adil, jala marbisuk. Massai diargai Ibana do sude naung taulahon tu Ibana dohot tu akka dongan sahaporseaotta. Jala pasti pasu-pasuonna do akka halak na setia tu Ibana.—Heb. 11:6.

DANG TABOTO DOPE SONGON DIA NGOLUTTA HADUAN

12. Songon na disurat di Jakobus 4:​13, 14, aha do na so taboto dope?

¹² Jaha Jakobus 4:​13, 14. Memang, dang taboto songon dia ngolutta sogot. Alana, “boi do masa tu [hita] sude akka na so diharappon di tikki na so panagaman”. (Pjm. 9:11) Alani i, gabe dang taboto boi do saut akka rencanatta i, manang tolap dope gogotta lao pasautton rencanatta i di ari na naeng ro.

13. Ala dang taboto dope songon dia ngolutta haduan, aha do pengaruh ni i tu hita?

¹³ Ala dang taboto dope songon dia ngolutta haduan, on boi mambahen hita maol martahan. Olo do ra gabe holsoan hita mamikkirhon akka na lao masa, jala on boi mambahen hita dang marlas ni roha. Asing ni i, boi do toppu ro hasusaan di ngolutta. On boi mambahen gabe lungun hian rohatta jala mandele. Asing ni i molo dang saut aha na taharappon, olo do ra gabe kecewa hita jala metmet rohatta.—Poda 13:12.

14. Aha do na mambahen hita boi tetap marlas ni roha? (Ida gambar.)

¹⁴ Dang soal sitaonon aha na masa di ngolutta, tapatudu ma ala na holong do rohatta tu Jahowa umbahen na tasomba Ibana. Memang dipaboa do di Bibel, dang boi taharappon asa dijaga Jahowa hita sian akka sitaonon. Jala dang ditottuhon Jahowa aha na lao masa tu hita. Alai diboto Jahowa, boi do marlas ni roha hita nang pe dang taboto aha na lao masa di ngolutta haduan. Alana na mambahen hita marlas ni roha, i ma molo talului tudu-tudu sian Jahowa jala taoloi akka parettana. (Jer. 10:23) Molo taulahon i, hira na tadokkon ma songon on, “Molo lomo roha ni Jahowa, mangolu ma hami jala bahenonnami ma songon on dohot songon an.”—Jak. 4:15.

15. Aha do na taboto taringot ari na naeng ro?

¹⁵ Memang, dang taboto aha na lao masa di ngolutta haduan. Alai taboto, lao lehonon ni Jahowa do tu hita hangoluan na salelengna di surgo manang di tano on. Taboto do muse dang olo Jahowa margabus, jala dang adong na boi mangabbati Ibana pasautton sude janjina. (Tit. 1:2) Holan Ibana do na boi mandok, “Sian mulana nungnga hupaboa hian songon dia ujungna, jala mulai sian najolo nungnga hupaboa akka na so masa dope.” Godang do surirang na dipaboa di Bibel naung saut. Jadi pos ma rohatta, pasti saut do sude surirang na asing taringot ari na naeng ro. (Jes. 46:10) Asing ni i, taboto do dang adong na boi manirang hita sian holong ni Jahowa. (Rom 8:​35-39) Pasti lehononna do bisuk, las ni roha, dohot gogo tu hita asa boi hita martahan mangadopi sude na masa di ngolutta. Jadi pos ma rohatta, pasti urupan ni Jahowa do hita jala pasu-pasuonna.—Jer. 17:​7, 8.

DANG TABOTO SADIA TAKKAS JAHOWA MANANDA HITA

16. Aha do na diboto Jahowa taringot hita, jala songon dia do pakkilalaanmuna mamboto i? (Psalmen 139:​1-6)

¹⁶ Jaha Psalmen 139:​1-6. Takkas do diboto Jahowa sude taringot hita. Diattusi Ibana do cara marpikkirta dohot perasaanta. Diboto Ibana do tong aha na tadokkon dohot aha na adong di bagasan rohatta. Asing ni i, diboto Jahowa do sude na taulahon dohot alasanta mangulahon i. Songon na disurat Raja Daud, sai diparrohahon Jahowa do hita jala rade do Ibana mangurupi hita. Jadi boha do perasaanmuna mamboto Debata Pargogo na So Hatudosan na manoppa langit dohot tano on massai parduli tu hamu? Sarupa do ra perasaanta songon si Daud na mandok, “Longang do rohakku alani parbinotoanmi. Dang tarbahen au mangattusi i.”—Ps. 139:​6, surat na di toru.

17. Aha do na boi mambahen dang pos rohatta na takkas ditanda Jahowa hita?

¹⁷ Olo do ra dang pos rohatta molo Jahowa i Ama parholong jala parduli tu hita. Boasa? Ra alani latar belakang ni keluargatta, budaya, manang haporseaotta andorang so gabe Saksi Jahowa. Asing ni i, olo do ra ala hea hita mangulahon dosa na balga, gabe tadok di rohatta dang olo Jahowa mananda hita manang jonok tu hita. Si Daud pe hea do makkilala songon i. (Ps. 38:​18, 21) Jala muse, tikki marsitutu sasahalak paubahon pangalahona mangihutton aturan ni Debata, olo do ra gabe sukkun-sukkun rohana, ‘Molo parduli do Debata tu au, boasa ma pola dipangido Ibana asa hupauba pangalahokku? Kan memang nga songon on au halakna?’

18. Aha do manfaatna molo pos rohatta na takkas ditanda Jahowa hita? (Ida gambar.)

¹⁸ Pos ma rohatta, Jahowa do na paling mananda hita sian diritta sandiri. Asing ni i, diida Jahowa do akka na denggan sian diritta nang pe hita sandiri dang mamboto i. Memang diboto Jahowa do hahurangatta, alai diboto Ibana do tong aha na sabotulna naeng taulahon jala toktong do holong rohana tu hita. (Rom 7:15) Jadi molo pos rohatta diida Jahowa akka na denggan sian diritta, pasti gabe lam bertekad ma hita asa toktong setia tu Ibana jala boi ma hita marlas ni roha.

19. Aha do na takkas taboto taringot Jahowa?

¹⁹ Takkas do taboto Debata parholong do Jahowa i, jala godang do bukti taringot i. (1 Joh. 4:8) Akka parettana patuduhon na massai holong do rohana tu hita, jala lomo rohana asa marlas ni roha hita. Taboto do muse, lomo roha ni Jahowa asa mangolu salelengna hita. Alani i ma dilehon Ibana tobusan. Marhite tobusan i dipapos Ibana do rohatta, nang pe dang sempurna dope hita, alai boi do tabahen las rohana. (Rom 7:​24, 25) Asing ni i, “umbalga do Debata sian rohatta jala diboto Ibana do saluhutna”. (1 Joh. 3:​19, 20) Jadi diboto Jahowa do sude taringot diritta, jala pos do rohana pasti boi do taulahon lomo ni rohana.

20. Asa unang marsak hita mamikkirhon akka na so taboto dope, aha do na ikkon taingot?

²⁰ Pasti dipaboa Jahowa do sude hatorangan na tahaporluhon. Molo taingot on, dang gabe marsak be hita mamikkirhon akka na so taboto dope. Gariada, gabe fokus ma hita tu na uppetting. Molo taulahon on, on patuduhon na serep do rohatta jala pos rohatta tu Jahowa. Alana, Ibana do “nappuna parbinotoan na sun denggan i”. (Job 36:4) Memang, godang dope na so taattusi saonari. Alai tarpaima do hita di ari na naeng ro, unggodang dope na boi taparsiajari sian Jahowa jala lam takkas ma tatanda Ibana. Boi ma taulahon on sahat tu saleleng ni lelengna.—Pjm. 3:11.