Pos ma Rohamuna Nungnga Diampuni Jahowa Hamu

1-2. Aha do na diulahon Jahowa molo bertobat hita sian akka dosatta? (Ida sampul.)

MARSAK situtu do Raja Daud alani akka dosana di tikki naung salpu. (Ps. 40:12; 51:3; superskripsi) Alai, bertobat do ibana jala diampuni Jahowa do ibana. (2 Sam. 12:13) Ujungna, lubbang ma pakkilalaan ni si Daud ala pos rohana nungnga diampuni Jahowa be ibana.—Ps. 32:1.

² Songon si Daud, molo hea taulahon dosa na balga, olo do Jahowa patuduhon asi ni rohana jala mengampuni hita. Alai ikkon bertobat do hita. Ikkon martangiang do hita mangido asa diampuni Ibana, makkatai ma hita tu akka sintua, jala marsitutu ma hita asa unang mangulahon i muse. (Poda 28:13; Ul. 26:20; 1 Joh 1:9) Pasti gabe las hian do rohatta. Alana tikki diampuni Jahowa hita, dianggap Ibana do hira na so hea taulahon i!—Hes. 33:16.

3-4. Boha do pakkilalaan ni sahalak donganta borua dung tardidi ibana, jala aha do na lao tabahas di artikel on?

³ Sipata, olo do ra sukkun-sukkun rohatta nungnga diampuni Jahowa hita manang na daong. I ma na dihilala sahalak donganta na margoar si Jennifer. Saksi Jahowa do natua-tuana. Alai tikki remaja ibana, diulahon ibana ma akka na so denggan jala ditabunihon ibana do i sian natua-tuana. Martaon-taon dukkon i, bertobat ma ibana jala tardidi. Didok ibana, “Najolo, holan hepeng do na sai hupikkiri. Jotjot do au mangulahon seks na so patut, minum-minum, jala mura-mura do au muruk. Memang huboto do na didok di Bibel. Olo do Jahowa mengampuni au, ala adong tobusan ni Jesus. Alai nang pe nga bertobat au, jala nga hupangido tu Jahowa asa diampuni Ibana au, sukkun-sukkun dope rohakku, ‘Tutu do nungnga diampuni Jahowa au?’”

⁴ Songon i do tong na dihilala hamu? Sukkun-sukkun dope rohamuna, “Tutu do nungnga diampuni Jahowa hasalaakku di tikki naung salpu?” Ingot ma pakkilalaan ni si Daud tu asi ni roha ni Jahowa. Pos do rohana na olo Jahowa mengampuni ibana ala massai balga do asi ni roha ni Jahowa i. Jadi lomo do tong roha ni Jahowa asa songon si Daud i perasaanmuna. Di artikel on, lao tabahas ma boasa ikkon pos rohatta na olo Jahowa mengampuni hita, jala aha do na ikkon taulahon asa lam pos rohatta tusi.

BOASA IKKON POS ROHATTA NA OLO JAHOWA MENGAMPUNI HITA?

5. Aha do na diulahon Sibolis asa unang tasomba be Jahowa? Paboa ma contohna.

⁵ Molo pos rohatta na olo Jahowa mengampuni hita, dang hona jorat ni Sibolis hita. Taingot ma, marsitutu do Sibolis mambahen asa unang tasomba be Jahowa. Misalna, lomo do rohana asa tadok di rohatta dang olo Jahowa mengampuni akka dosatta. Taida ma aha na masa di huria Korint najolo. Adong sahalak bawa na mangulahon seks na so patut jala dipakaluar sian huria. (1 Kor. 5:​1, 5, 13) Ujungna bertobat ma bawa i. Alai, lomo do roha ni Sibolis asa unang diampuni akka dongan ibana jala unang be dijalo ibana di huria. Molo diulahon nasida songon i, olo do ra didok roha ni bawa i dang olo Jahowa mengampuni ibana, jala gabe “mandele ibana alani arsak ni rohana i”. Lam leleng olo do ra gabe dang disomba ibana be Jahowa. Songon i do tong na diulahon Sibolis saonari. Lomo do rohana asa porsea hita, dang olo Jahowa mengampuni akka dosatta jala asa unang tasomba be Jahowa. Alai taingot ma, “nungnga taboto aha na lao dibahen Sibolis” jala boha carana mangalo ibana.—2 Kor. 2:​5-11.

6. Molo sai merasa bersalah dope hita, aha do na porlu taingot?

⁶ Molo pos rohatta na olo Jahowa mengampuni hita, dang sai merasa bersalah be hita. Memang tikki taulahon dosa, pasti merasa bersalah do hita. (Ps. 51:17) Sasittongna, denggan do molo songon i perasaanta. Alana boi do i mangurupi hita asa bertobat jala asa unang taulahon be hasalaan i. (2 Kor. 7:​10, 11) Alai molo sai torus hita merasa bersalah hape nungnga bertobat hita, boi do i mambahen metmet rohatta jala lam leleng gabe dang tasomba be Jahowa. Taingot ma, olo do Jahowa mengampuni hita. Molo sai taingot on, dang sai merasa bersalah be hita jala gabe marlas ni roha ma muse hita manomba Jahowa. (Kol. 1:​10, 11; 2 Tim. 1:3) Alai aha do na ikkon taulahon asa pos situtu rohatta na olo Jahowa mengampuni hita?

AHA DO NA IKKON TAULAHON ASA POS ROHATTA NA OLO JAHOWA MENGAMPUNI HITA?

7-8. Aha do na didok Jahowa tu si Musa taringot dirina jala aha do na taparsiajari sian i? (2 Musa 34:​6, 7)

⁷ Rimangi ma aha na didok Jahowa taringot dirina. Misalna, taparrohahon ma aha na didok Jahowa tu si Musa tikki di Dolok Sinai.a (Jaha 2 Musa 34:​6, 7.) Sasittongna, godang do akka sifat ni Jahowa. Alai na parjolo sahali dipaboa Ibana tu si Musa, i ma “Au do Jahowa, Debata na burju jala parasi roha”. Rimangi ma on. Molo adong sasahalak na mangulahon dosa alai ujungna bertobat, olo do Jahowa mengampuni ibana? Pasti olo! Boasa? Alana Debata parasi roha do Jahowa. Molo dang olo Jahowa mengampuni ibana, berarti kejam do Jahowa i jala dang adong asi ni rohana.

⁸ Tikki didok Jahowa molo Ibana Debata parasi roha, pos ma rohamuna pasti sittong do i. Alana dang boi Ibana margabus. (Ps. 31:5) Jadi boi do tahaporseai hata ni Jahowa i. Alai molo sai merasa bersalah dope hamu alani dosamuna di tikki naung salpu, pikkirhon ma sukkun-sukkun on: ‘Pos do rohakku molo Jahowa i Debata na burju jala parasi roha? Jala pos do tong rohakku na olo Jahowa mengampuni akka naposona na bertobat?’ Molo pos do rohamuna, unang be ragu hamu. Nungnga diampuni Jahowa be akka dosamuna i.

9. Sian Psalmen 32:​5, aha do na taboto taringot cara ni Jahowa mengampuni hita?

⁹ Rimangi ma na didok Bibel taringot cara ni Jahowa mengampuni hita. Misalna, tabahas ma aha do na didok si Daud taringot cara ni Jahowa mengampuni ibana. (Jaha Psalmen 32:5.) Didok si Daud, “Disalpuhon Ho ma dosakku dohot hasalaakku.” Hata Heber na diterjemahon gabe “disalpuhon” di ayat on, boi do lapatanna “diangkat” manang “diboan”. Tikki disalpuhon Jahowa dosa ni si Daud, hira na diangkat Jahowa ma dosa i jala dao do i diboan sian si Daud. Gabe lubbang ma pakkilalaan ni si Daud, jala las rohana ala nungnga diampuni Jahowa sude dosana. (Ps. 32:​2-4) Hita pe, boi do makkilala songon i. Molo nungnga bertobat hita, unang be sai merasa bersalah hita. Alana nungnga diangkat Jahowa dosatta i jala dao do i diboan sian diritta.

10-11. Aha do lapatanna tikki didok si Daud, Jahowa i “rade manalpuhon hasalaan”? (Psalmen 86:5)

¹⁰ Jaha Psalmen 86:5. Didok si Daud di ayat on, Jahowa i Debata na “rade manalpuhon hasalaan”. Lapatanna, tikki taulahon na sala dang pittor muruk Jahowa tu hita jala sai rade do Ibana manalpuhon hasalaan ni akka halak na bertobat. Aha do na mambahen Jahowa olo mangulahon i? Didok di ayat i muse, “Sai dipatudu Ho do holong ni roham tu sude halak na jou-jou tu Ho.” Songon naung tabahas di artikel sebelumna, marjanji do Jahowa lao patuduhon holongna na manoktong i tu akka naposona jala dang lao tinggalhononna nasida. Alani holongna na manoktong i, “rade do Ibana manesa sude” hasalaan ni akka naposona na bertobat. (Jes. 55:7) Jadi molo ragu hamu na olo Jahowa mengampuni hamu, pikkirhon ma sukkun-sukkun on: ‘Pos do rohakku molo Jahowa i Debata na rade manalpuhon hasalaan? Jala pos do tong rohakku na olo Jahowa mengampuni sude naposona na mangido asi ni rohana jala na bertobat?’ Molo pos do rohamuna, pasti dipatudu Jahowa do asi ni rohana jala olo do Ibana mengampuni hamu.

¹¹ Dipaboa do muse di Bibel, takkas do diboto Jahowa songon dia hita ditoppa. Jala diboto Ibana do jolma na mardosa dope hita. Pasti gabe dipatogu do rohatta mamboto on. (Ps. 139:​1, 2) Saonari, tabahas ma aha do muse na didok si Daud taringot Jahowa, jala songon dia hatana i boi lam paposson rohatta na olo Jahowa mengampuni hita.

AHA DO NA DIINGOT JAHOWA SIAN DIRITTA?

12-13. Aha do na diingot Jahowa sian diritta, jala boha do cara ni Jahowa maradoppon hita? (Psalmen 103:14)

¹² Jaha Psalmen 103:14. Dipaboa si Daud do muse boasa rade Jahowa manalpuhon hasalaan ni akka halak na bertobat. Didok ibana, “Diingot [Jahowa] do hita orbuk.” Lapatanna, diboto Jahowa do molo hita jolma na mardosa. Saonari, tabahas ma parsiajaran aha do na tadapot sian hata ni si Daud i.

¹³ Didok si Daud, “Takkas do diboto [Jahowa] songon dia hita ditoppa.” Sian “orbuk” do ditoppa Jahowa jolma na parjolo i, i ma si Adam. Jala sempurna do ditoppa Jahowa ibana. Alai nang pe sempurna si Adam, diboto Jahowa do porlu do tong ibana mangan, modom, jala marhosa. (1 Mus. 2:7) Alai dung mardosa si Adam dohot si Hawa, diboto Jahowa ma dang sempurna be hita jala ikkon berjuang do hita mangalo hagaleonta. Asing ni i diboto Jahowa do ala mardosa hita, olo do sipata taulahon na sala. Alai molo diida Jahowa bertobat hita, asi do rohana mangida hita jala olo do Ibana mengampuni hita.—Ps. 78:​38, 39.

14. (a) Aha do muse na didok si Daud taringot cara ni Jahowa mengampuni hita? (Psalmen 103:12) (b) Aha do na boi taparsiajari sian cara ni Jahowa mengampuni si Daud? (Ida kotak “Cara ni Jahowa Mengampuni dohot Makkalupahon Dosatta”.)

¹⁴ Aha do muse na boi paposson rohatta na olo Jahowa mengampuni hita? (Jaha Psalmen 103:​12, surat na di toru.) Didok si Daud, “Songon dao ni parbissar ni mataniari sian parbonom ni mataniari, songon i ma dao ni hasalaatta dipadao Ibana sian hita.” Massai dao do inganan parbissar ni mataniari sian inganan parbonom ni mataniari. Jadi lapatan ni ayat i, tikki diampuni Jahowa akka dosatta, hira na diboan Ibana ma dosatta i massai dao sian hita. Ala nungnga massai dao dosa i sian hita, dang dipaingot-ingot Jahowa be i jala dang dibahen Ibana be i gabe alasan lao manghukum hita di ari na naeng ro.—Hes. 18:​21, 22; Ul. 3:19.

15. Molo sai merasa bersalah dope hita alani dosatta di tikki naung salpu, aha do na ikkon taulahon?

¹⁵ Aha do muse na taparsiajari sian hata ni si Daud na disurat di Psalmen 103? Molo sai merasa bersalah dope hamu alani dosamuna di tikki naung salpu, pikkirhon ma songon dia perasaan ni Jahowa mangida hamu. Diingot Jahowa do molo hamu jolma na mardosa. Lomo do rohana mengampuni akka halak na manolsoli pambahenan ni nasida jala na olo bertobat. Asing ni i, ingot ma dang dipaingot-ingot Jahowa be akka dosamuna di tikki naung salpu jala dang dibahen Ibana i gabe alasan lao manghukum hamu. Takkas ma molo nungnga bertobat hamu, nungnga dihalupahon Jahowa akka dosamuna i. Jadi tiru ma Jahowa, lupahon hamu ma i. (Ps. 130:3) Molo pos rohatta naung diampuni Jahowa hita, hasilna gabe dang sai merasa bersalah be hita jala las ma rohatta manomba Jahowa.

16. Aha do bahayana molo sai merasa bersalah hita? Bahen ma tudosan. (Ida gambar.)

¹⁶ Pikkirhon ma tudosan on: Molo sai merasa bersalah hita alani dosatta, dipatudos ma i songon sasahalak na mamboan mobil alai sai mangida kaca spion. Memang denggan do molo diida ibana sasahali tu kaca spion. Alai molo torus diida ibana i, boi do gabe kecelakaan ibana. Jadi asa aman tikki mamboan mobil i, ikkon fokus do ibana mangida tu jolo. Dos songon i ma, denggan do molo sasahali taingot hasalaatta di tikki naung salpu. Alana, gabe boi ma hita marsiajar sian i jala dang taulahon be hasalaan i. Alai molo sai torus taingot dosatta i hape nungnga diampuni Jahowa hita, boi do gabe mago las ni rohatta jala dang semangat be hita manomba Ibana. Jadi fokus ma hita melayani Jahowa jala sai tapikkirhon ma janji ni Jahowa taringot ari na naeng ro. Alana nungnga didok Ibana, “dang ingoton be” sude akka na haccit na tahilala saonari.—Jes. 65:17; Poda 4:25.

TOKTONG MA TAPAPOS ROHATTA

17. Boasa ikkon torus tapapos rohatta na holong roha ni Jahowa tu hita jala olo Ibana mengampuni hita?

¹⁷ Ikkon tapapos do rohatta na holong roha ni Jahowa tu hita, jala rade do Ibana mengampuni hita. (1 Joh. 3:19) Boasa ikkon taulahon i? Alana marsitutu do Sibolis mambahen hita porsea, dang holong roha ni Jahowa tu hita jala dang olo Ibana mengampuni hita. Tujuanna, asa unang tasomba be Jahowa. Asing ni i, lam marsitutu do Sibolis mangulahon i alana diboto ibana otik nai nama tikkina. (Pgk. 12:12) Jadi toktong ma hita setia tu Jahowa. Unang ma tapaloas monang Sibolis i!

18. Aha do na ikkon taulahon asa pos rohatta na holong roha ni Jahowa tu hita jala sai rade Ibana mengampuni hita?

¹⁸ Di artikel sebelumna, nungnga dipaboa aha na ikkon taulahon asa pos rohatta tu holong ni Jahowa. Di artikel on, nungnga tabahas aha na ikkon taulahon asa pos rohatta na olo Jahowa mengampuni hita. Carana, tarimangi ma aha na didok Jahowa taringot dirina. Dung i, tarimangi aha na didok Bibel taringot cara ni Jahowa mengampuni. Taingot ma, diboto Jahowa do molo hita jolma na mardosa jala asi do rohana tu hita. Asing ni i, ingot ma muse tikki diampuni Jahowa dosatta, dianggap Ibana do hira na so hea taulahon i. Molo pos rohatta na asi do roha ni Jahowa mangida hita, boi ma las rohatta. Jala songon si Daud, tadok ma tu Jahowa, “Mauliate ma Jahowa, nungnga ‘disalpuhon Ho dosakku dohot hasalaakku’.”—Ps. 32:5.