Boi do Monang Hamu Mangalo Keinginan na Sala

1. Aha do na diadopi sude jolma na so sempurna?

HEA do adong keinginan na sala tubu di rohamuna? Molo hea, unang ma metmet rohamuna. Didok di Bibel, “Sude sitaonon na masa tu hamu, sitaonon na somal masa do i tu akka jolma.” (1 Kor. 10:13) Lapatanna, adong do tong akka halak na berjuang mangalo keinginan na sala. Jadi dang holan sahalakmuna mangadopi i. Molo diurupi Jahowa hamu, pasti boi do monang hamu mangalo keinginan na sala.

2. Aha do keinginan na sala na boi tubu di rohatta dohot di roha ni parsiajar Bibelta? (Ida gambar.)

² Didok do muse di Bibel, “Diuji do ganup halak ala ditarik jala dijorat sakkap-sakkapna sandiri.” (Jak. 1:14) Sian ayat on, taboto ma marasing-asing do godaan na ro tu ganup halak. Misalna, adong do ra donganta na targoda lao mangulahon seks na so patut dohot lawan jenis. Na asing targoda do lao mangulahon seks na so patut tu sesama jenis. Asing ni i, adong do ra donganta naung pasohon hasomalan mangida pornografi. Alai boi do tubu muse keinginan na balga di roha ni nasida lao mangida i. Jala godang do tong donganta naung so marnarkoba jala dang minum-minum be. Alai boi do tubu muse keinginan ni nasida lao mangulahon i. I ma piga-piga contoh keinginan na sala na boi tubu di rohatta dohot di roha ni parsiajar Bibelta. Ra sarupa do pakkilalaatta songon Apostel Paulus na mandok, “Tikki naeng huulahon na sittong, sai na jahat i do na adong di au.”—Rom 7:21.

3. Molo adong keinginan na sala na mulak-ulak tubu di rohatta, aha do hira-hira pengaruh ni i tu hita?

³ Molo adong keinginan na sala na mulak-ulak tubu di rohamuna, olo do ra gabe dihilala hamu dang boi monang hamu mangalo keinginan i. Jala olo do ra didok rohamuna, gabe dang lomo roha ni Jahowa mangida hamu. Alai ingot ma, sala do pikkiran sisongon i! Di artikel on, lao tabahas ma dua sukkun-sukkun on: (1) Boasa tubu perasaan sisongon i di rohatta? (2) Boha do carana asa boi monang hita mangalo keinginan na sala?

AHA DO NA DIHARAPPON SIBOLIS SIAN HITA?

4. (a) Tikki tubu keinginan na sala di rohatta, aha do na diharappon Sibolis? (b) Boasa pos rohatta sanggup do hita mangalo keinginan na sala?

⁴ Lomo do roha ni Sibolis asa tadok di rohatta dang sanggup hita mangalo keinginan na sala. Alani i ma diajarhon Jesus tu akka siseanna asa martangiang songon on, “Urupi ma hami asa unang targoda jala palua ma hami sian Sibolis.” (Mat. 6:13) Didok Sibolis, molo tubu keinginan na sala di roha ni sasahalak, pasti pittor diulahon do i jala dang olo setia tu Jahowa. (Job 2:​4, 5) Boasa didok Sibolis songon i? Alana songon i do ibana. Sibolis do na parjolo sian sude toppaan na mangihutton keinginan na sala di rohana, jala dang toktong setia ibana tu Jahowa. Jala didok rohana sarupa do hita songon ibana. Pasti pittor tatinggalhon do Jahowa molo adong godaan na ro tu hita. Bahkan didok roha ni Sibolis, boi do Anak ni Debata na sempurna i digoda lao mangulahon na sala! (Mat. 4:​8, 9) Alai rimangi ma on: Tutu do dang sanggup hita mangalo keinginan na sala i? Sanggup do hita! Alana songon na didok Apostel Paulus, “Margogo do au di sude na masa, ala dilehon Debata do huaso tu au.”—Plp. 4:13.

5. Pos do roha ni Jahowa na sanggup hita mangalo keinginan na sala. Sian dia taboto?

⁵ Dang songon Sibolis, pos do roha ni Jahowa pasti boi do monang hita mangalo keinginan na sala. Sian dia taboto? Nungnga dipaboa Jahowa hian, na lao adong do punguan na bolon na toktong setia tu Ibana jala malua sian hasusaan bolon. Didok Jahowa, “Nungnga disussi nasida jubah ni nasida jala bottar dibahen di bagasan mudar ni Anak ni Biru-Biru i.” (Pgk. 7:​9, 13, 14) Lapatanna, godang do annon akka halak na toktong setia tu Jahowa jala dang olo mangihutton keinginan na sala. Pos ma rohatta, tutu do na didok Jahowa i. Alana dang olo Ibana margabus. Jadi sian on takkas ma, diboto Jahowa do pasti sanggup hita mangalo keinginan na sala.

6-7. Aha do muse na diharappon Sibolis tikki tubu keinginan na sala di rohatta?

⁶ Asing ni i, lomo do roha ni Sibolis asa porsea hita sogo roha ni Jahowa mangida hita, jala dang boi hita mangolu salelengna ala adong keinginan na sala di rohatta. Alai tutu do i? Daong. Pikkirhon ma on: Sibolis do na dihasogohon Jahowa. Ibana do na so boi mangolu salelengna. Jala na lao dihancurhon Jahowa do ibana. (1 Mus. 3:15; Pgk. 20:10) I do na mambahen muruk hian Sibolis. Alani i marsitutu ma ibana mambahen hita porsea, sarupa do hita songon ibana. Jala dang adong harapanta tu ari na naeng ro. Alai ingot ma, dang sarupa hita songon Sibolis. Adong do harapanta lao mangolu salelengna. Didok di Bibel, lomo do roha ni Jahowa mangurupi hita asa boi hita mangolu salelengna. Alana “dang lomo rohana diripasson manang ise pe, alai naeng ma sude jolma marhamubaon”.—2 Ptr. 3:9.

⁷ Jadi las hian do roha ni Sibolis molo tadok di rohatta, dang sanggup hita mangalo keinginan na sala i jala dang boi hita mangolu salelengna. Alana perasaan sisongon i do na lao disuanton ibana di rohatta. Molo takkas do taattusi taringot on, gabe marsitutu ma hita lao mangalo Sibolis i.—1 Ptr. 5:​8, 9.

BOHA DO PERASAANTA ALA MARDOSA DOPE HITA?

8. Menurut Bibel, aha do lapatan ni dosa? (Psalmen 51:5) (Ida “Hata na Dipatorang”.)

⁸ Asing ni pengaruh sian Sibolis, adong do muse na mambahen hita merasa dang sanggup mangalo keinginan na sala. Jala didok rohatta dang boi hita mangolu salelengna. Aha ma i? Dosa na diwarisson si Adam tu hita sude.a—Job 14:4; jaha Psalmen 51:5.

9-10. (a) Songon dia do perasaan ni si Adam dohot si Hawa dung mardosa nasida? (Ida gambar.) (b) Aha do pengaruh ni dosa i tu hita saonari?

⁹ Parrohahon ma songon dia perasaan ni si Adam dohot si Hawa dung mardosa nasida. Dung dialo nasida paretta ni Jahowa, martabuni do nasida jala ditutupi do pamatangna. Di bukku Pemahaman, dipaboa do songon dia perasaan ni nasida. Didok disi, “Dosa i mambahen nasida gabe merasa bersalah, marsak, mabiar, jala maila.” Asing ni i, dang na lao denggan be hubungan ni nasida tu Jahowa. Dang soal aha na diulahon nasida, sai merasa bersalah do nasida jala marsak, alana nungnga mardosa nasida.

¹⁰ Alai dang songon i hita, alana adong do tobusan. Ala adong tobusan i, boi ma diampuni dosatta jala boi denggan muse hubungatta tu Jahowa. (1 Kor. 6:11) Nang pe songon i, tetap dope mardosa hita jala dang sempurna. Jadi alani dosa i, olo do tong sipata merasa bersalah hita, marsak, mabiar, jala maila. Alani i ma didok di Bibel, balga do pengaruh ni dosa i tu sude jolma. Bahkan marhuaso do tong dosa i “tu halak na so mangulahon dosa songon dosa na diulahon si Adam”. (Rom 5:14) Alai nang pe nungnga mardosa hita mulai sian na tubu, unang ma tadok di rohatta dang sanggup hita mangalo keinginan na sala manang dang boi hita mangolu salelengna. Boasa tadok songon i?

11. Molo tahilala hira na so sanggup hita mangalo keinginan na sala i, aha do na ikkon taingot? (Rom 6:12)

¹¹ Ala mardosa dope hita, olo do sipata tadok di rohatta dang sanggup hita mangalo keinginan na sala. Boi dokkonon hira na adong na “makkusippon” tu hita dang boi monang hita mangalo keinginan na sala i. Alai unang ma tatangihon i. Boasa? Alana didok di Bibel, unang ma taloas dosa i “marhuaso gabe raja” di ngolutta. (Jaha Rom 6:12.) Sian on taboto ma, boi do hita mamillit lao taihutton do keinginan na sala i manang na dang. (Gal. 5:16) Jala pos do roha ni Jahowa, boi do monang hita mangalo keinginan na sala i. Molo dang pos rohana, tottu dang dipangido Ibana i taulahon. (5 Mus. 30:​11-14; Rom 6:6; 1 Tes. 4:3) Jadi, boi do monang hita mangalo keinginan na sala.

12. Molo didok rohatta dang boi hita mangolu salelengna ala adong keinginan na sala di diritta, aha do na porlu taingot?

¹² Asing ni i, olo do ra didok rohatta dang na boi hita mangolu salelengna. Jala hira na adong ma na “makkusippon” tu hita dang lomo be roha ni Jahowa mangida hita molo adong keinginan na sala di rohatta. Alai unang ma tatangihon i. Boasa? Alana didok di Bibel, diboto Jahowa do jolma na mardosa hita. (Ps. 103:​13, 14) Didok do muse di Bibel, “diboto [Jahowa] do saluhutna” taringot hita, termasuk ma pengaruh ni dosa na diwarisson i tu hita. Alani dosa i, gabe jotjot do tubu keinginan na sala di rohatta. (1 Joh. 3:​19, 20) Alai molo berhasil hita mangalo keinginan na sala i, gabe ias ma hita di adopan ni Jahowa. Boasa tadok songon i?

13-14. Molo tubu keinginan na sala di diritta, na so boi be tabahen las roha ni Jahowa? Patorang ma.

¹³ Dipaboa do di Bibel, sipata dang boi takendalihon asa unang tubu keinginan na sala di rohatta. Alai boi do takendalihon diritta asa unang sappe taulahon keinginan na sala i. Taparrohahon ma na masa di huria Korint, di abad na parjolo. Adong do piga-piga halak di huria i na hea mangulahon homoseks. Didok si Paulus, “Adong do deba sian hamu na songon i pangalahona najolo.” Nang pe nungnga ditinggalhon nasida pangalahona i, alai sipata olo do tubu muse keinginan lao mangulahon i. Alana nungnga bagas i marurat di diri ni nasida. Alai molo boi dirajai nasida dirina jala marsitutu asa unang diulahon be keinginan na sala i, boi do nasida ‘ias’ di adopan ni Jahowa. (1 Kor. 6:​9-11) Hamu pe boi do songon i.

¹⁴ Boi do hamu berhasil mangalo akka keinginan na sala. Nang pe dang pittor boi dibolokkon hamu keinginan na sala i, marsitutu ma mangarajai dirimuna jala unang ihutton “giot-giot ni daging dohot pikkiran na mardosa”. (Eps. 2:3) Alai boha do carana asa boi monang hamu mangalo keinginan na sala i?

ASA BOI HAMU MONANG

15. Asa boi monang hita mangalo keinginan na sala, boasa ikkon jujur hita tu diritta?

¹⁵ Asa boi monang hamu mangalo keinginan na sala, ikkon jujur do hamu tu dirimuna jala ikkon diboto hamu do hagaleonmuna. Didok di Bibel, “unang paoto-oto hamu dirimuna”. (Jak. 1:22) Contohna, adong ma sasahalak na lomo rohana minum-minum. Alai marsidalian ma ibana. Didok ibana di rohana, ‘Dang sadia dope na huinum on, upparah dope halak na asing.’ Manang adong ma sahalak bawa na lomo rohana manonton pornografi. Alai didok ibana, ‘Molo dihaholongi istrikku au, dang hutonton pornografi i.’ Molo songon i do cara marpikkirmuna, gabe mura do hamu targoda lao mangulahon na sala. Jadi unang ma marsidalian hamu, bahkan di pikkiranmuna. Ingot ma, hamu do na martanggung jawab tu sude na diulahon hamu.—Gal. 6:7.

16. Aha do na porlu diulahon hamu asa unang targoda mangulahon na sala?

¹⁶ Asing ni jujur tu dirimuna, bertekad ma hamu asa unang mangulahon keinginan na sala. (1 Kor. 9:​26, 27; 1 Tes. 4:4; 1 Ptr. 1:​15, 16) Pikkirhon ma aha do hira-hira na mambahen hamu mura targoda mangulahon na sala, jala andigan ro godaan i. Misalna, tikki loja do hamu mura targoda manang tikki tonga borngin? Denggan do molo diparade hamu dirimuna andorang so ro godaan i. Jala pikkirhon hian ma aha do na ikkon diulahon hamu asa unang sappe mangulahon na sala.—Poda 22:3.

17. Aha do na taparsiajari sian si Josep? (1 Musa 39:​7-9) (Ida gambar.)

¹⁷ Taparrohahon ma pengalaman ni si Josep. Digoda istri ni si Potipar do ibana. Alai pittor ditolak si Josep do i. (Jaha 1 Musa 39:​7-9.) Aha ma na taparsiajari sian i? Andorang so digoda istri ni si Potipar si Josep, nungnga bertekad hian ibana asa mangulahon na sittong. Tatiru ma si Josep. Andorang so digoda hita lao mangulahon na sala, ikkon tabahen hian ma tekad di rohatta asa mangulahon na sittong. Molo taulahon i, gabe ummura ma hita manolak lao mangulahon na sala.

‘TOKTONG MA UJI HAMU DIRIMUNA’

18. Aha do muse na ikkon diulahon hamu lao mangalo keinginan na sala? (2 Korint 13:5)

¹⁸ Asa boi monang hamu mangalo keinginan na sala, ikkon ‘toktong do diuji hamu dirimuna’. Jala taratur ma i ulahon hamu. (Jaha 2 Korint 13:5.) Sian tikki tu tikki pareso ma cara marpikkirmuna dohot akka na diulahon hamu. Molo adong na porlu dipadenggan hamu, padenggan ma i. Molo pe berhasil hamu manolak sada godaan, pikkirhon ma on: ‘Tikki na digoda i au mangulahon na sala, pittor hatop do i hutolak?’ Molo dang pittor hatop ditolak hamu i, unang ma metmet rohamuna. Alai berupaya ma hamu asa unang songon i muse di tikki na asing. Asing ni i pikkirhon ma sukkun-sukkun on: ‘Tikki ro pikkiran na sala, pittor hatop do i hubolokkon? Sian hiburan na hupillit, adong do na mambahen au gabe mura targoda? Pittor hupadao do matakku sian akka gambar na so hasea? Pos do rohakku mangihutton aturan ni Jahowa do na terbaik? Jala toktong do i huihutton nang pe ikkon berjuang au mangulahon i?’—Ps. 101:3.

19. Aha do pengaruh ni akka keputusan na dibahen hamu, nang pe dang keputusan na balga i?

¹⁹ Tikki dipareso hamu dirimuna, ikkon jujur do hamu. Alana didok di Bibel, “Massai akkal situtu do roha i, jala dang adong na songon i, sai naeng lomona do pasautonna.” (Jer. 17:9) Asing ni i, Jesus pe mandok, “Sian roha do tubu pikkiran na jahat.” (Mat. 15:19) Pikkirhon ma on. Adong ma sasahalak na sebelumna lomo rohana manonton pornografi. Alai saonari dang ditonton ibana be i. Dung piga-piga tikki didok ibana ma di rohana, ‘Dang pola boha kan molo huida gambar na merangsang nafsu. Ai so gambar ni halak na telanjang na huida.’ Manang didok ibana do ra, ‘Ai so mangulahon seks au, holan na mambayakkon do au.’ Alai ingot ma molo songon i do cara marpikkirmuna, olo do gabe “marsakkap hamu lao mangulahon hisap-hisap ni daging na mardosa”. (Rom 13:14) Jadi aha ma na ikkon diulahon hamu asa unang sappe songon i? Manat ma hamu tikki naeng mambahen sada keputusan, nang pe dang keputusan na balga i. Alana keputusan na dibahen hamu olo do mambahen hamu gabe mangulahon dosa.b Jadi bolokkon ma akka “pikkiran na jahat”, alana boi do i mambahen hamu gabe marsidalian lao mangulahon na sala.

20. (a) Ise do na boi mangurupi hita asa monang mangalo keinginan na sala? (b) Pasu-pasu aha do na lao jalootta haduan?

²⁰ Songon naung taparsiajari, boi do monang hita mangalo keinginan na sala ala diurupi Jahowa. Asing ni i, ala dilehon Jahowa tobusan, boi do diampuni Ibana akka dosatta jala boi ma hita mangolu saleleng ni lelengna. Pasti las hian do rohatta haduan boi hita marlas ni roha manomba Jahowa jala dang porlu be hita berjuang mangalo keinginan na sala! Alai andorang so masa i, pos ma rohatta pasti sanggup do hita mangalo keinginan na sala i, jala boi do hita mangolu saleleng ni lelengna. Jala taingot ma, pasti pasu-pasuon ni Jahowa do sude upaya na tabahen asa boi monang!