Boasa Ro Hita tu Parpunguan?

1-3. (a) Songon dia do halak Kristen patuduhon na marsitutu do nasida ro tu parpunguan? (Ida gombar di mula ni parsiajaran.) (b) Aha do na laho taparsiajari di artikel on?

TINGKI marumur 17 taon si Corinna, ditangkup ma omakna jala diboan tu kamp kerja paksa. Ndang sadia leleng, diboan ma si Corinna dao sian jabuna tu Siberia. Disuru ma ibana karejo di ladang jala dibahen songon hatoban. Sipata, dipaksa do ibana karejo tingki musim salju jala ndang mamangke baju panas. Alai, dilului si Corinna dohot donganna do dalan asa boi marpungu.

² Didok si Corinna, ”Dung botari, laho ma hami mardalan pat tu stasiun kereta api daona 25 kilometer. Kereta api sahat jam dua manogot di terminal, dung onom jom markareta api, mardalan pat ma muse sampulu kilometer asa sahat tu parpunguan.” Nang pe dao pardalanan ni si Corinna tu parpunguan, alai las do rohana. Didok ibana, ”Di parpunguan, diparsiajari hami Joujou Paboahon jala diendehon hami ende Harajaon. Parpunguan on, paposhon jala patoguhon partondionnami.” Mulak ma muse donganta si dua halak on tu parkarejoanna dung tolu ari, alai ndang diboto tokkena na laho nasida tu parpunguan.

³ Ringkot do di sude naposo ni Jahowa marsaor dohot dongan sahaporseaon. Umpamana, halak Kristen di abad na parjolo marsitutu asa rap marpungu manomba Jahowa jala marsiajar taringot Ibana. (Ul. 2:42) Tontu, tongtong do ringkot di hita ro tu parpunguan. Alai, songon angka donganta na asing, olo do maol di hita ro tu ganup parpunguan. Sipata, ala leleng mulak sian parkarejoan, ala godang na ingkon takarejohon manang ala nunga loja hita. Alani i, aha do na boi mangurupi hita asa boi hita marsitutu ro tu parpunguan?^[1] (Ida catatan.) Songon dia do hita patoguhon parsiajar Bibelta dohot dongan na asing asa ro tu ganup parpunguan? Artikel on, patorangkon aha na tadapot sian parpunguan (1) marlaba tu hita, (2) mangurupi na asing, jala (3) palashon roha ni Jahowa.^[2]—Ida catatan.

LABA NI PARPUNGUAN TU HITA

4. Songon dia do parpunguanta mangurupi hita marsiajar taringot Jahowa?

⁴ Parpunguan mangajari hita. Sude parpunguan mangurupi hita lam tangkas mananda Jahowa. Umpamana, nunga diparsiajari di godang huria buku Mendekatlah kepada Yehuwa di parpunguan Parsiajaran Bibel di Huria. Songon dia do pangkilalaanta manaringoti parange ni Jahowa manang tingki tatangihon donganta patorangkon parangeNa i? Tontu, on mambahen tamba holongta tu Jahowa. Di parpunguan, taparsiajari do Bibel marhite manangihon jamita dohot pertunjukan manang tingki tabege dijahahon ayat ni Bibel. (Neh. 8:8) Pingkirhon ma labana di hita dohot tu donganta sian alus na taparade tu panjahaion Bibel di huria.

5. Songon dia do parpunguan mangurupi hita mangulahon na taparsiajari sian Bibel jala lam denggan di ulaon marbarita?

⁵ Parpunguan mangajari hita laho mangulahon na taparsiajari sian Bibel di parngoluonta. (1 Tes. 4:9, 10) Umpamana, hea do ditangihon hamu sian Joujou Paboahon na mambahen hamu lam ringgas marbarita, jala ringgas martangiang manang asa manalpuhon hasalaan ni donganta? Parpunguanta di tonga pokan, mangajari hita marbarita na uli jala mangajari hita lam denggan pasahathon hasintongan na sian Bibel tu halak na asing.—Mat. 28:19, 20.

6. Songon dia do parpunguanta boi manjujui jala mangurupi hita asa tongtong togu?

⁶ Parpunguan patoguhon hita. Portibi na nirajaan ni Sibolis jotjot mambahen gale haporseaonta, mambahen hita marsak jala mandele. Alai, parpunguanta manjujui jala patoguhon hita asa tongtong manomba Jahowa. (Jaha Ulaon ni Apostel 15:30-32.) Jotjot do hita mangulas surirang ni Bibel naung digohi. On paposhon rohanta, gohan ni Jahowa do sude janjiNa taringot ari na naeng ro. Angka donganta patoguhon hita ndang holan marhite jamita, alai boi do marhite alus manang ende pujian tu Jahowa na diendehon sian roha. (1 Kor. 14:26) Tingki mangkatahatai andorang so parpunguan manang dung sae, boi do on mambahen dame rohanta ala taboto adong do dongan na manarihon hita.—1 Kor. 16:17, 18.

7. Boasa ringkot hita ro tu parpunguan?

⁷ Di parpunguan, tajalo pangurupion ni tondi parbadia. Marhite tondi parbadia do Jesus manguluhon huria. Didok Jesus tu hita, ”Ditangihon na marpinggol ma na nidok ni Tondi i tu angka huria.” (Pgk. 2:7) Boi do tondi parbadia mangurupi hita pasidingkon elaela jala barani marbarita. Diurupi do hita muse mamillit na dumenggan di ngolunta. I do alana, ingkon marsitutu do hita ro tu parpunguan asa tadapot pangurupion sian tondi parbadia.

MANGURUPI DONGAN DI PARPUNGUAN

8. Tingki marende, mangalehon alus di parpunguan, songon dia do i boi mangurupi dongan na asing? (Ida kotak ”Dame Dihilala Ibana.”)

⁸ Di parpunguan, boi tapatuduhon holong tu sude donganta. Godang do na ro tu parpunguan mangkilala parungkilon alani hasusaan. Apostel Paulus manurat, ”Masiantoan ma hita, masipajujuan tu haholongon dohot tu angka ulaon na denggan!” (Heb. 10:24, 25) Na tasarihon do donganta molo rap hita marpungu jala masipajujuan. Tingki ro hita tu parpunguan, hita patuduhon tu angka donganta na lomo rohanta rap dohot nasida, mangkatahatai jala manarihon nasida. Hita pe, boi do patoguhon donganta marhite alus na tapasahat dohot ende na taendehon sian roha.—Kol. 3:16.

9, 10. (a) Patorang ma songon dia hata ni Jesus na disurat di Johannes 10:16 mangurupi hita mangantusi ringkot ni parpunguan rap dohot angka donganta. (b) Molo ro hita tu ganup parpunguan, songon dia do i mangurupi sasahalak na so dijangkon keluargana?

⁹ Molo ro hita tu parpunguan, hita mangurupi dongan na di huria lam solhot. (Jaha Johannes 10:16.) Dipatudos Jesus do ibana dohot parmahan, jala siihuthon ibana punguan ni birubiru. Pingkirhon ma, molo adong dua birubiru di dolokdolok, dua di rura jala sada di inganan na asing, sapunguan do birubiru na lima on? Ndang, ala birubiru na sapunguan ingkon rap do di sada inganan mangihuthon parmahan. Songon i ma, na mandao do hita sian angka donganta molo ndang ro tu parpunguan. Ringkot hita rap marpungu asa boi gabe ”sada punguan” jala ”sada ma parmahan”.

¹⁰ Parpunguanta mangurupi hita marsada songon sada keluarga na gok holong. (Ps. 133:1) Adong do donganta di huria na so dijangkon natuatua dohot keluargana. Alai, Jesus marjanji laho mangalehon keluarga na mangkaholongi jala manarihon nasida. (Mrk. 10:29, 30) Molo ro hita tu ganup parpunguan, boi do hita gabe songon bapa, omak, hahaanggi manang iboto tu donganta na di huria. Molo tapingkirhon on, boi taronjar rohanta mambahen na dumenggan di sude parpunguanta.

PALASHON ROHA NI JAHOWA

11. Songon dia do haroronta tu parpunguan patuduhon na talehon na pinangido ni Jahowa?

¹¹ Di parpunguan, hita mangalehon tu Jahowa na patut jaloonNa. Ala Jahowa do na manompa hita, ingkon mandok mauliate do hita tu Jahowa, pasangaphon jala mamuji Ibana. (Jaha Pangungkapon 7:12.) Boi taulahon on di parpunguan tingki hita martangiang tu Jahowa, marende jala mangkatai taringot Ibana. Hak na sumurung do di hita ganup minggu boi manomba Jahowa!

12. Songon dia do pangkilalaan ni Jahowa tingki taoloi parentaNa asa ro tu parpunguan?

¹² Ala hita ditompa Jahowa, ingkon taoloi do Ibana. Diparentahon Ibana hita ro tu ganup parpunguan, tarlumobi dung taida lam jonok ari i. Alani i, molo taoloi parenta on, mambahen las roha ni Jahowa. (1 Joh. 3:22) Diboto Jahowa do na taharingkothon parpunguan, jala diargai Ibana do sude na tabahen asa boi ro tu parpunguan.—Heb. 6:10.

13, 14. Songon dia do hita boi jonok tu Jahowa dohot tu Jesus tingki di parpunguan?

¹³ Molo ro hita tu parpunguan, hita patuduhon tu Jahowa na lomo rohanta jonok tu Ibana dohot tu anakNa. Di parpunguan, diajar Jahowa do hita marhite hataNa, Bibel. (Jes. 30:20, 21) Tingki halak na asing ro tu parpunguanta, boi do idaon ni nasida molo hita dipasupasu Debata. (1 Kor. 14:23-25) Jahowa do na manogunogu hita di parpunguan marhite tondi parbadia, jala sude na taparsiajari di parpunguan ro sian Ibana. Alani i, tingki ro hita tu parpunguan, hita manangihon Hata ni Jahowa, mangkilala holong ni rohaNa jala lam solhot tu Ibana.

¹⁴ Jesus, ulu ni huria mandok, ”Ai anggo pungu dua manang tolu pe marhitehite Goarhu, sai dongananku do nasida.” (Mat. 18:20) Dipaboa Bibel muse tu hita, Jesus ”mardalan di holangholang” ni huria. (Pgk. 1:20–2:1) Jahowa dohot Jesus mamasumasu hita jala patoguhon rohanta di parpunguan. Songon dia do pangkilalaan ni Jahowa tingki diida hita marsitutu laho manjonok tu Ibana dohot tu AnakNa?

15. Songon dia do ro tu parpunguan patuduhon na olo do hita mangoloi Debata?

¹⁵ Tingki ro tu parpunguan, patuduhon na rade do hita mangoloi Jahowa. Ndang dipaksa Jahowa hita mangoloi Ibana. (Jes. 43:23) Tingki tapillit mangoloi parentaNa asa ro tu parpunguan, hita patuduhon na tahaholongi do Ibana jala pos rohanta, Ibana do na tama mangalehon tudutudu tu hita. (Rom 6:17) Umpamana, songon dia do bahenonta molo dipangido tokketa hita karejo gabe ndang boi hita ro tu sude parpunguanta? Olo do ra pamarenta mandok, manang ise na manomba Jahowa ingkon didenda, dipenjarahon manang diuhum. Manang, umlomo rohanta mangulahon na asing unang apala ro tu parpunguan. Di situasi sisongon on, ingkon tapillit do aha na laho taulahon. (Ul. 5:29) Alai, molo tapillit do mangoloi Jahowa, hita mambahen las rohaNa.—Poda 27:11.

TONGTONG MA MARPUNGU DOHOT ANGKA DONGANTA

16, 17. (a) Sian dia do taboto ringkot parpunguan di halak Kristen abad na parjolo? (b) Songon dia do pangkilalaan ni donganta si George Gangas taringot parpunguan?

¹⁶ Dungkon rap marpungu di ari Pentakoste di taon 33 M, tongtong do halak Kristen rap marpungu manomba Jahowa. ”Marsihohot do nasida di poda ni angka apostel marparsaoran, marulaon na badia jala martangiang.” (Ul. 2:42) Ndang mansohot nasida rap marpungu, nang pe manaon hasusaan sian pamarentaon ni halak Rom dohot pemimpin ni agama Jahudi. Nang pe ndang mura, marsitutu do nasida asa boi rap marpungu.

¹⁷ Saonari pe, marlas ni roha do naposo ni Jahowa di parpunguan. Si George Gangas, sahalak sian Punguan na Mangaradoti Organisasi lobi sian 22 taon mandok, ”Molo di ahu, marpungu dohot angka dongan, sada ulaon na pasonangkon roha. Lomo rohangku parjolo sahat di Bale Harajaon, jala molo boi mulak parpudi. Huhilala do las ni roha tingki mangkatahatai dohot angka naposo ni Debata. Tingki rap dohot nasida, huhilala rap dohot keluarga di Paradeiso partondion.” Didok muse, ”Lomo hian do rohangku ro tu parpunguan.”

18. Songon dia do pangkilalaanta taringot parpunguan, jala aha do na tapillit laho taulahon?

¹⁸ Songon i do pangkilalaanta? Molo songon i do, marsitutu ma asa boi rap dohot donganta ro tu parpunguan nang pe maol. Patuduhon ma tu Jahowa na tahilala do songon pangkilalaan ni Raja Daud na mandok, ”Ale Jahowa, huhaholongi do hajongjongan ni bagasmu.”—Ps. 26:8.